ភ្នំពេញ ៖ ទិន្នន័យរបស់ក្រសួងពាណិជ្ជកម្ម បានបង្ហាញថា គិតក្នុងត្រីមាសទី១ឆ្នាំ២០១៨នេះ មានក្រុមហ៊ុន និង សហគ្រាសថ្មីចំនួនជាង ៣ពាន់៥រយ បានធ្វើការចុះបញ្ជីតាមអនឡាញរបស់ក្រសួង ដែលចំនួននេះ គឺកើនឡើង១៥៩ភាគរយ បើធៀបត្រីមាសទី១ កាលពីឆ្នាំ២០១៧។
គិតត្រឹមខែមេសា ឆ្នាំ២០១៨នេះ មានក្រុមហ៊ុន និងសហគ្រាស សរុបជាង៦ម៉ឺនហើយ ដែលបានធ្វើការចុះបញ្ជីត្រឹមត្រូវ និងស្របច្បាប់ តាមរយៈក្រសួងពាណិជ្ជកម្មកម្ពុជា។ ជាមួយគ្នានេះ គិតក្នុងត្រីមាសទី១ឆ្នាំ២០១៨ មានក្រុមហ៊ុន និង សហគ្រាសថ្មីចំនួនជាង ៣ពាន់៥រយ ក្រុមហ៊ុនបានធ្វើការចុះបញ្ជីតាមប្រព័ន្ធអ៊ិនធើណិត រឺប្រព័ន្ធអនឡាញរបស់ក្រសួង។ ចំនួននេះ មានការកើន ឡើង១៥៩ភាគរយ បើធៀបនឹងត្រីមាសទី១ កាលពីឆ្នាំ២០១៧។ នេះបើតាមការបញ្ជាក់របស់ លោក ឱម តារារិទ្ធ ប្រធាននាយកដ្ឋានចុះបញ្ជីនៃក្រសួងពាណិជ្ជកម្ម។
លោកបានបញ្ជាក់ថា ក្រោយពីប្រកាសដាក់ឲ្យដំណើរចុះបញ្ជីរតាមប្រព័ន្ធអ៊ិនធើណេត ឬអនឡាញ មកដល់ពេលនេះ ការចុះបញ្ជីដោយដៃត្រូវបានបញ្ចប់ទាំងស្រុង១០០ភាគរយ ដោយសារ ពាណិជ្ជករ ម្ចាស់ក្រុមហ៊ុន ម្ចាស់សហគ្រាស បានយល់កាន់តែច្រើនអំពីអត្ថប្រយោជន៌នៃការចុះបញ្ជីតាមអនឡាញ ក្នុងនោះ ម្ចាស់ក្រុមហ៊ុន ឬម្ចាស់សហគ្រាស អាចបង់ប្រាក់តាមអនឡាញសម្រាប់ថ្លៃចុះបញ្ជីបានយ៉ាងងាយ ដោយក្រសួងពាណិជ្ជកម្ម បានសហការជាមួយធនាគារពាណិជ្ជជាច្រើនក្នុងស្រុក។ ម្យ៉ាងវិញទៀត ការចុះបញ្ជីតាមប្រព័ន្ធស្វ័យប្រវត្តិកម្មនេះ បានកាត់បន្ថយការចំណាយពេលវេលាក្នុងការចុះបញ្ជីក្រុមហ៊ុន ដែលពីមុនត្រូវចំណាយពេលពី៥ទៅ៦ថ្ងៃ មកនៅត្រឹមតែរយះពេល១ម៉ោងប៉ុណ្ណោះតាមរយៈប្រព័ន្ធអនឡាញថ្មីនេះ។
គួររំលឹកថា ដំណើរការការចុះបញ្ជីពាណិជ្ជកម្មតាមប្រព័ន្ធអ៊ិនធើណេត ឬអនឡាញ របស់ក្រសួង ពាណិជ្ជកម្ម ត្រូវបានប្រកាសដាក់ឲ្យប្រើប្រាស់ជាផ្លូវការ ចាប់តាំងខែមករា ឆ្នាំ២០១៦មក។ ចំណែក កម្មវិធី រឺ Application របស់ក្រសួងពាណិជ្ជកម្ម ក៏ត្រូវបានដាក់អោយដំណើរការ កាលពីខែធ្នូ ឆ្នាំ២០១៧កន្លងមកផងដែរ ដែលអាចអោយសាធារណៈជន ចូលមើលព័ត៌មាន រឺទាញយករបាយការណ៌នានារបស់ក្រសួងពាណិជ្ជកម្ម បានលឿន និងងាយស្រួល តាមរយៈទូរស័ព្ទដៃ។
បើតាមការលើកឡើងរបស់ លោកឧកញ៉ា តែ តាំងប៉រ ប្រធានសមព័ន្ធសមាគមសហគ្រាសធនតូច និងមធ្យម ហៅកាត់ថា FASMECs បានបញ្ជាក់ប្រាប់តាមរយៈទូរទស្សន៌អាស៊ីអាគ្នេយ៌ កន្លងមកថា ការចុះបញ្ជីពាណិជ្ជកម្មតាមប្រព័ន្ធអនឡាញ មានភាពងាយស្រួល ជាងការចុះទៅបញ្ជីដោយផ្ទាល់ជាមួយក្រសួង ដែលមានដំណើរការ និងនិតិវិធីស្មុគស្មាញ។
គួរបញ្ជាក់ថា តាមរបាយការណ៌របស់ លោកទេសរដ្ឋមន្ត្រី ចម ប្រសិទ្ធ នាពេលកន្លងមកបង្ហាញថា គិតត្រឹមដំណាច់ឆ្នាំ២០១៧ មានរោងចក្រធុនធំ សរុប ១៥២២រោងចក្រ បានចុះបញ្ជីពាណិជ្ជកម្ម។ ចំណែកឯសហគ្រាសធុនតូច និងមធ្យម និងសិប្បកម្ម មានចំនួនសរុប ១៥ម៉ឺន ៥៦៤០មូលដ្ឋាន៕
