ភ្នំពេញ ៖ សិស្សទូទាំងប្រទេស បានចូលរួមប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ឆ្នាំ២០១៨ កំពុងចាប់ផ្តើមពីថ្ងៃទី២០ ខែសីហា នេះទៅដល់ថ្ងៃ២១ ខែសីហា។ សិស្សជាង១១មឺន៧ពាន់នាក់ នឹងប្រឡងជា២ផ្នែក គឺ វិទ្យាសាស្ត្រ ផ្តោតលើគណិតវិទ្យាទទួលបានពិន្ទុខ្ពស់ និងផ្នែក វិទ្យាសាស្ត្រសង្គម ផ្តោតលើភាសាខ្មែរ ទទួលបានពិន្ទុខ្ពស់។
សិស្សដែលប្រឡងចប់មុខវិជ្ជាប្រវត្តិវិទ្យា ចេញមកទិញអាហារទទួលទាន បានអះអាងថា
វិញ្ញាសារប្រវត្តិវិទ្យា ដែលក្រសួងអប់រំ យុវជននិងកីឡា ដាក់ចេញឲ្យសិស្សប្រឡងម៉ោង
ដំបូងនៅថ្ងៃទី២០ខែសីហា មិនតឹងពេក ហើយក៏មិនធូរពេកដែរ។ ពួកគាត់អាចឆ្លើយនឹង
សំនួរក្នុងវិញ្ញាសារនោះបាន។
កញ្ញា សុវណ្ណនីតា ប្រឡងនៅមណ្ឌលវិទ្យាល័យសម្តេចហ៊ុនសែនភ្នំពេញថ្មី អះអាងថា អ្នកចេះគឺជាប់។ រូបគាត់ទៅក្នុងបន្ទប់ប្រឡងយកតែកាតសិស្ស ប៊ីចមួយដើមនិង ឧបករន៍
គូសគណិតវិទ្យា។
អភិបាលរងខណ្ឌសែនសុខ លោកសាំង សុភ័គ្រវិជាតិ ឲ្យដឹងថា សាលារាជធានីភ្នំពេញ និងសាលាខណ្ឌ បានដាក់កម្លាំងសមត្ថកិច្ច ការពារសន្តិសុខ នៅមណ្ឌលប្រឡង វិទ្យាល័យសម្តេចហ៊ុនសែនភ្នំពេញថ្មី ចំនួន៥០នាក់ ឃ្លាំមើលក្រែងមានសិស្សឈឺឬ មាតាបិតាសិស្សហុចសំណៅឯកសារឲ្យកូនជាដើម។ លោកបន្តថា គ្រប់ម៉ោងប្រឡង ពេលសិស្សចេញនិងចូលបន្ទប់ប្រឡង មន្ត្រីសមត្ថកិច្ចនិងមេប្រយោគ តែងតែឆែកសិស្ស មុនចូលអង្គុយក្នុងបន្ទប់ជានិច្ច។
នៅក្រៅរបងមណ្ឌលប្រឡងទូទាំងរាជធានីភ្នំពេញ មានក្រុមគ្រួសារសិស្សកំពុងប្រឡង មករង់ចាំត្រៀបត្រា ដើម្បីលើទឹកចិត្តកូនចៅ ថ្ងៃប្រឡងដំបូង។ ស្ត្រីមកពីខេត្តតាកែវ ឲ្យដឹងថា គាត់ដាំបាយយកមកឲ្យកូនញ៉ាំ នៅពេលប្រឡងចប់។
ក្រុមគ្រួសារ ឪពុកម្តាយខ្លះទៀត មកពីខណ្ឌផ្សេងៗ រង់ចាំលើកទឹកចិត្តកូន ប្រុសស្រីក្មួយ
និងចៅ សំដែងក្តីរីករាយ នៅពេលដែលក្រសួងអប់រំ យុវជននិងកីឡា បានធ្វើកំណែទម្រង់ ស៊ីជម្រៅ ក្នុងវិស័យអប់រំ ចាប់ពីឆ្នាំ២០១៣ ២០១៤មក សម្រាប់ក្នុងថ្ងៃប្រឡង សញ្ញាបត្រ
មធ្យមសិក្សាទុតិយភូមិ គឺសិស្សម្នាក់ៗបញ្ឈប់យកទូរសព្ទ សំណៅឯកសារជាដើម ចូលទៅក្នុងបន្ទប់ប្រឡង ក្រៅពីយកតែកាតសិស្ស និងប៊ិច។ ពួកគាត់បានកោតសរសើរ ពីគុណភាពអប់រំនៅពេលនេះ៖(សម្លេងបន្តគ្នា)។
នៅក្នុងឆ្នាំ២០១៨ មានសិស្សប្រឡងសញ្ញាបត្រមធ្យមសិក្សាទុតិយភូមិទូទាំងប្រទេស ចំនួន ១១ម៉ឺន៧ពាន់ ៦១នាក់។ រយៈពេលនៃការប្រឡង សញ្ញាបត្រមធ្យមសិក្សាទុតិយភូមិ ក្រសួងអប់រំ យុវជននិងកីឡា សម្រេចយកតែ២ថ្ងៃប៉ុណ្ណោះ គឺ២០និង២១ខែសីហា ឆ្នាំ២០១៨ ខុសពឺការប្រឡងច្រើនឆ្នាំមុន ដែលសម័យប្រឡងសញ្ញាបត្រ មធ្យមសិក្សា
ទុតិយភូមិ មាន២ថ្ងៃកន្លះ៕
