បាល់ទាត់៖ក្លិប Schalke បានចុះហត្ថលេខានាំយកខ្សែការពារ Baba Rahman ពីក្លិបតោខៀវ Chelsea លើកិច្ចសន្យាខ្ចីជើងរយៈពេលយូរ។
ខ្សែការពារសញ្ជាតិហ្គាណាវ័យ២២ឆ្នាំរូបនេះ បានចូលមកពិនិត្យជាមួយក្លិបនៅក្នុងក្របខ័ណ្ឌ Bundesliga កាលពីថ្ងៃអាទិត្យ មុនពេលផ្ទេរមកជាផ្លូវការនៅថ្ងៃអង្គារនេះ ជាមួយនឹងថ្លៃប្រាក់កម្ចីជើង ៥00.000 អឺរ៉ូ បង់ទៅឲ្យក្លិបតោខៀវ។
Rahman បានផ្ទេរចេញពីក្រុម Augsburg មកចូលរួមជាមួយ Chelsea កាលពីខែសីហា ២០១៥ លើកិច្ចសន្យារយៈ៥ឆ្នាំ បន្ទាប់ពីក្លិបមួយនេះបានចំណាយលុយ១៤លានផោនពីក្រុម Augsburg របស់អាល្លឺម៉ង់។
Rahman បង្ហាញខ្លួនត្រឹមតែ១១លើកប៉ុណ្ណោះនៅក្នុងក្របខ័ណ្ឌ Premier League កាលពីរដូវកាលមុន ហើយឥឡូវនេះ ក្រោមការដឹកនាំរបស់លោក Conte បានអនុញ្ញាតឲ្យកីឡាករូបនេះចាកចេញពីកីឡដ្ឋាន Stamford Bridge ដើម្បីស្វែងរកបទពិសោធន៍ថ្មីបណ្តោះអាសន្នជានេងអតីតអ្នកចាត់ករទូទៅលោក Markus Weinzierl។
គួរបញ្ជាក់ថា Schalke បានបញ្ចប់ត្រឹមចំណាប់ថ្នាក់លេខ៨កាលពីរដូវកាលមុន ប៉ុន្តែបច្ចុប្បន្ននេះក្រុមបាននាំយកខ្សែប្រយុទ្ធ Breel Embolo ខ្សែការពារក្រុម Sevilla កីឡាករ Coke និងខ្សែការពារកណ្តាល Naldo រួចជាស្រេចដើម្បីពង្រឹងក្រុមមុនពេលយុទ្ធនាការ 2016-17 ៕
