បាល់ទាត់៖ប្រធានក្រុម Manchester United កីឡាករ Wayne Rooney បានបដិសេធនូវបំណងល្អរបស់អ្នកចាត់ការ Jose Mourinho ឲ្យរូបគេចាកចេញ បើសិនជាចង់ចូលលេងនៅជម្រើសដំបូង បន្ទាប់ពី រូបគេចង់បំបែកកំណត់ត្រារបស់ Sir Bobby Charlton ជាមុនសិនទើបលោកសម្រេចចិត្តចេញពី Man Utd ។
ប្រធានក្រុមវ័យ៣១ឆ្នាំរូបនេះ ចង់សម្រេចក្ដីស្រមៃ សាងកេរ្តិ៍ឈ្មោះដ៏អស្ចារ្យក្នុងប្រវត្តិសាស្ត្រក្រុម Man Utd សិន ទើបចាកចេញ។ បច្ចុប្បន្ននេះ Rooney ស៊ុតចូលទីច្រើនជាងគេលំដាប់ទី២របស់ Man Utd ដោយស៊ុតបាន ២៤៦គ្រាប់ ក្នុងការបង្ហាញខ្លួន ៥៣២ប្រកួត ខណៈដែលវីរបុរសបិសាចក្រហម Sir Bobby ជាអ្នកស៊ុតច្រើនជាងគេក្នុងប្រវត្តិសាស្ត្រ ២៤៩គ្រាប់ ក្នុងការបង្ហាញខ្លួន ៧៥៨ប្រកួត នៅចន្លោះឆ្នាំ១៩៥៦-១៩៧៣។
គួរបញ្ជាក់ថា Rooney ត្រូវការស៊ុតតែ ៤គ្រាប់ទៀតប៉ុណ្ណោះ នឹងអាចបំបែកកំណត់ត្រារយៈពេលជាង ៤០ឆ្នាំរបស់ Sir Bobby បានហើយ៕
