ក្លិបឆ្មាខ្មៅ Sunderland ត្រូវបានគេរាយការណ៍ថា កំពុងតែមានគោលបំណងចង់នាំយកលោក Patrick Vieira មកដឹកនាំក្លិបមួយនេះ ប្រសិនបើលោក Dick Advocaat ចុះចេញពីតំណែង។ បច្ចុប្បន្ន ក្លិបឆ្មាខ្មៅ Sunderland កំពុងស្ថិតនៅលំដាប់បាតតារាងក្នុងក្របខ័ណ្ឌ English Premier League បន្ទាប់ពីមិនទាន់ស្គាល់ពាក្យថាឈ្នះមួយប្រកួតនៅឡើយទេនៅ៧ប្រកួតដើមរដូវកាលថ្មីនេះ។
យោងតាមការចុះផ្សាយរបស់សរព័ត៌មាន The Mirror បានឲ្យដឹងថា ក្លិបឆ្មាខ្មៅ Sunderland ចង់បានគ្រូបង្វឹកយុវជនរបស់ក្លិបមេឃខៀវ Manchester City លោក Patrick Vieira ចាប់តាំងពីអតីតគ្រូបង្វឹករបស់ក្លិបឆ្មាខ្មៅ Sunderland លោក Gus Poyet ចុះចេញពីតំណែងកាលពីខែមីនាមកម្ល៉េះ ហើយក្លិបមួយនេះនឹងយកលោក Patrick Vieira មកដឹកនាំ ប្រសិនបើលោក Dick Advocaat ដែលកំពុងតែដឹកនាំត្រូវបណ្ដេញចេញ ឬក៏ចុះចេញពីតំណែងដោយខ្លួនឯង។
គួរបញ្ជាក់ថា ក្លិបឆ្មារខ្មៅ Sunderland បានធ្វើការផ្លាសប្ដូរអ្នកដឹកនាំក្លិបចំនួន៨នាក់មកហើយដែលនេះប្រវត្តិសាស្ត្រក្លិបនារយៈពេល៩ឆ្នាំចុងក្រោយនេះ៕
