បាល់ទាត់៖ក្រុមកាំភ្លើងធំ Arsenalបើកទ្វារផ្ទះស្វាគមន៍ក្លិប Bayern Munich ដែលកំពុលឈរនៅកំពូលតារាងនៅក្នុងពូល F នៃក្របខ័ណ្ឌ Chapions League នៅយប់នេះ គ្រាដែលអ្នកចាត់ការ Arsene Wenger បានអះអាងថា ក្រុមកាំភ្លើងធំ Arsenal នឹងវាយសម្រុកធ្វើយ៉ាងណាយកឈ្នះ Bayern Munich ដើម្បីបន្តជីវិតរបស់ខ្លួននៅ ពានរង្វាន់ UEFA Champions League។
ការបង្ហាញពីសុទិដ្ឋិនិយមរបស់អ្នកចាត់ការសញ្ជាតិបារាំងខាងលើ កើតឡើងបន្ទាប់ពី Arsenal បង្ហាញទម្រង់លេងដ៏អស្ចារ្យ ដោយស៊ុតបញ្ចូលទីគូប្រកួតរហូត៦គ្រាប់ក្នុង២ប្រកួតចុងក្រោយនៅ Premier League រាប់បញ្ចូលទាំងជ័យជម្នះលើ Manchester United នៅកីឡដ្ឋាន Emirates ៣-០ កាលពីដើមខែផងដែរ។
យប់នេះក្រុម Arsenal អវត្តមានកីឡាករ Danny Welbeck លោក Tomas Rosicky, កីឡាករ Jack Wilshere ខ្សែបម្រើ Mikel Arteta និង Mathieu Flamini និងក្រុម Bayern Munichអវត្តមានកីឡាករ ខ្សែប្រយុទ្ធ Mario Gotze កីឡាករ Mehdi Benatia និង Franck Ribery។
ជម្រើស១១នាក់របស់Arsenal រួមមាន Cech; Monreal, Koscielny, Mertesacker, Bellerín; Cazorla, Coquelin; Sanchez, Ozil, Ramsey, Walcott។ ចំណែកជម្រើស១១នាក់របស់Bayern Munich រួមមានNeuer , Alaba, Martinez, Boateng, Lahm; Alcantara, Alonso, Vidal; Costa, Lewandowski, Muller។
គួរបញ្ជាក់ថា ២ប្រកួតដំបូងនៅ Champions League ក្រុមកាំភ្លើងធំ មិនទាន់ស្គាល់ពាក្យថាឈ្នះនៅឡើយទេ បន្ទាប់ពីចាញ់ Dynamo Kiev និង Olympiakos ជាបន្តបន្ទាប់ ដូច្នេះ Arsenal កំពុងសម្លឹងរកជ័យជម្នះ លើ Bayern Munich ដើម្បីកាត់បន្ថយការប្រឈមខ្ពស់ក្នុងការធ្លាក់ចេញពី Champions League ដែលលោក Wenger ធ្លាប់មានមហិច្ឆតាចង់ឈ្នះពាននេះកាលពីដើមរដូវកាល៕
