ភ្នំពេញ​ ៖ នាព្រឹកថ្ងៃទី២២ ខែមិថុនា ឆ្នាំ២០២០​ នៅអាជ្ញាធរមីនមាន ពិធី​ចុះ​ហត្ថលេខាលើអនុស្សារណៈនៃការយោគយល់គ្នា រវាង​អាជ្ញាធរមីន និងអង្គការ Mine Advisory Group (MAG) ស្តីពីប្រសិទ្ធភាពនៃការគ្រប់គ្រងព័ត៌មានប្រតិបត្តិការនៅទីវាល ក្រោមជំនួយឧបត្ថម្ភគាំទ្រដោយ កម្មវិធីអភិវឌ្ឍន៍ និងស្រាវជ្រាវការបោសសម្អាតមីនមនុស្សធម៌ (Humanitarian Demining Research and Development Program_HDR&D) របស់សហរដ្ឋអាមេរិក ក្រោមអធិបតីភាពលោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន។

លោកទេសរដ្ឋមន្ត្រី បានមានប្រសាសន៍ថា បច្ចុប្បន្ននេះ វិស័យសកម្មភាពមីននៅកម្ពុជា បានឈានដល់របត់មួយនៃការគ្រប់គ្រងព័ត៌មាន តាមរយៈការប្រើប្រាស់ និងការអភិវឌ្ឍបច្ចេកវិទ្យាព័ត៌មានថ្មី ដែលជាផ្នែកមួយយ៉ាងសំខាន់ សម្រាប់ការគ្រប់គ្រងទិន្នន័យវិស័យសកម្មភាពមីននៅកម្ពុជា ប្រកបដោយប្រសិទ្ធិភាពខ្ពស់ ក្នុងសតវត្សទី២១នេះ។

អាជ្ញាធរមីន ដែលជាសេនាធិការឲ្យរាជរដ្ឋាភិបាលកម្ពុជា ផ្នែកវិស័យសកម្មភាពមីន នឹងបន្តគាំទ្រ និងផ្តល់កិច្ចសហប្រតិបត្តិការដល់គ្រប់ប្រតិបត្តិករ​បោស​សម្អាត​មីនជាតិ-អន្តរជាតិ ដើម្បីធានាឲ្យការរៀបចំផែនការសកម្មភាពមីនទទួលបានជោគជ័យ និងស្របតាមផែនការយុទ្ធសាស្រ្តជាតិសកម្មភាពមីន ២០១៨-២០២៥ គឺកម្ពុជាគ្មានមីនឆ្នាំ២០២៥។

លោកបានបន្តលើកឡើងថា ការធ្វើឲ្យប្រសើរឡើងនូវប្រព័ន្ធគ្រប់គ្រងបច្ចេកវិទ្យាព័ត៌មានវិស័យមីននៅទូទាំងប្រទេស គឺជាកត្តាចាំបាច់មួយ ដែលយើងទាំងអស់ត្រូវយកចិត្តទុកដាក់ និងគិតគូឲ្យទាន់ពេលវេលា ដើម្បីឆ្លើយតបនូវតម្រូវការរបស់គ្រប់ភាគីពាក់ព័ន្ធទាំងអស់ ដោយអាចទាញយក និងប្រើប្រាស់ព័ត៌មាន ប្រកបដោយគុណភាព និងសុក្រឹតភាព ស្របតាមទំនើបនីយកម្មនៃបច្ចេកវិទ្យាព័ត៌មានបច្ចុប្បន្ន។

ការរួមចំណែកលើកដំបូងរបស់កម្មវិធី HDR&D របស់សហរដ្ឋអាមេរិក តាមរយៈអង្គការ MAG នេះ នឹងជួយពង្រឹងសមត្ថភាពបន្ថែមទៀតដល់មន្ត្រី-បុគ្គលិកនៅថ្នាក់ជាតិ និងថ្នាក់ក្រោមជាតិរបស់អាជ្ញាធរមីនទូទាំង ២៥ រាជធានី-ខេត្ត ដោយអាចប្រមូលនូវទិន្នន័យបានលឿនជាងមុន និងអាចរាយការណ៍មកអាជ្ញាធរមីន បានទាន់ពេលវេលា។

លោកទេសរដ្ឋមន្ត្រី ក្នុង​នាម​រាជ​រដ្ឋាភិបាល​កម្ពុជា​ សូម​ថ្លែង​អំណរគុណ​ជូនចំពោះ HDR&D និងអង្គការ MAG តំណាង​ដោយ លោក Shathel Fahs ដែលបានចូលរួមជាមួយ​រាជរដ្ឋាភិបាលកម្ពុជា ក្នុងការរំដោះផ្ទៃដី និងជួយសង្រ្គោះជីវិតប្រជាពលរដ្ឋ ឲ្យរួចផុតពីការគម្រាមកំហែងដោយសារមីន និងសំណល់ជាតិផ្ទុះពីសង្រ្គាម ហើយនាថ្ងៃនេះ អង្គការ MAG បាននាំមកនូវកម្មវិធី HDR&D ចូលរួមឧបត្ថម្ភគាំទ្រការធ្វើឲ្យប្រសើរឡើងនូវប្រព័ន្ធគ្រប់គ្រងបច្ចេកវិទ្យាព័ត៌មានវិស័យមីន​នៅ​ទូទាំងប្រទេស ផងដែរ៕

ភ្នំពេញ ៖ រាជរដ្ឋាភិបាលកម្ពុជា បានសម្រេចនិរាករណ៍សេចក្ដីសម្រេច ស្ដីពីការផ្អាកជាបណ្ដោះអាសន្ន ចំពោះការធ្វើដំណើរចូលកម្ពុជា ដោយពលរដ្ឋវៀតណាម និងការធ្វើដំណើរចូលវៀតណាម ដោយពលរដ្ឋកម្ពុជា។

យោងតាមលិខិតរបស់ក្រសួងការបរទេស និងសហប្រតិបត្តិការអន្ដរជាតិ ផ្ញើជូនសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសងមហាផ្ទៃបានឱ្យដឹងថា រាជរដ្ឋាភិបាលកម្ពុជា បានសម្រេចនិរាករណ៍ សេចក្ដីប្រកាសព័ត៌មានរបស់ក្រសួងការបរទេសស្ដីពី ការផ្អាកជាបណ្ដោះអាសន្ន ចំពោះការធ្វើដំណើរចូលប្រទេសកម្ពុជា ដោយពលរដ្ឋវៀតណាម និងការធ្វើដំណើរចូលប្រទេសវៀតណាម ដោយពលរដ្ឋកម្ពុជាតាម ផ្លូវគោក ផ្លូវទឹក និងផ្លូវអាកាស។

ក្នុងលិខិតចុះហត្ថលេខាដោយលោក អ៊ុច បូររិទ្ធ រដ្ឋលេខាធិការប្រចាំការក្រសួងការបរទេស និងសហប្រតិបត្តិការអន្ដរជាតិនោះ បានបញ្ជក់ថា ចាប់ពីពេលនេះតទៅ ជាមួយវៀតណាម កម្ពុជានឹងអនុវត្តសេចក្ដីប្រកាសចុងក្រោយរបស់គណៈកម្មការអន្ដរក្រសួង ដើម្បីប្រយុទ្ធប្រឆាំងនឹងជំងឺ កូវីដ-១៩ ចុះថ្ងៃទី២០ ខែឧសភា ឆ្នាំ២០២០ ដូចដែលបានអនុវត្តកន្លងរួចមកហើយ ជាមួយ ប្រទេសដទៃទៀត ដោយអនុញ្ញាតឱ្យពលរដ្ឋវៀតណាម ចូល-ចេញ កម្ពុជា និងតម្រូវឱ្យពលរដ្ឋវៀតណាមទាំងអស់នោះ អនុវត្តតាមវិធានសុខាភិបាល ដែលបានដាក់ចេញដោយគណៈកម្មការអន្ដរក្រសួង ដើម្បីប្រយុទ្ធប្រឆាំងនឹងជំងឺ កូវិដ-១៩។

ជាងនេះទៅទៀត ពលរដ្ឋវៀតណាម ជាពិសេស អ្នកបច្ចេកទេស វិនិយោគិន និស្សិត និងពលរដ្ឋវៀតណាមផ្សេងៗទៀត អាចនឹងទទួលបានទិដ្ឋាការផ្សេងៗ លើកលែងតែទិដ្ឋាការទេសចរណ៍ ស្រមតាមអនុក្រឹត្យស្ដីពីបែបបទសម្រាប់អនុវត្តចំពោះការអនុញ្ញាតឱ្យជនបរទេសមិនមែនអន្ដោប្រវេសន៍ចូល-ចេញ និងស្នាក់អាស្រ័យនៅកម្ពុជា។

គួររម្លឹកថា ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានចេញបទបញ្ជាទៅក្រសួងការបរទេស ឱ្យផ្ញើលិខិតផ្លូវការមួយទៅស្ថានទូតវៀតណាមប្រចាំកម្ពុជា បញ្ជាក់ពីការបិទព្រំដែនបណ្ដោះអាសន្ន មិនអនុញ្ញាតឱ្យពលរដ្ឋប្រទេសទាំងពីរឆ្លងកាត់ ចាប់ពីម៉ោង ២៣:៥៩នាទីយប់ ថ្ងៃទី២០ ខែមីនា ឆ្នាំ២០២០៕

ខេត្តកណ្តាល ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា មាន​ប្រសាសន៍​បញ្ជាក់​ថា​​៖ ថ្វីត្បិតបញ្ហា Covid-19 បានក្លាយជាវិបត្តិសេដ្ឋកិច្ចជាសាកល ប៉ុន្តែ​វា​មិន​មែនជា​ឧបស​គ្គ​រាំ​ង​ស្ទះ​ដល់កិច្ចកសាងហេដ្ឋារចនាសម្ព័ន្ធនានានៅទូទាំងប្រទេសកម្ពុជានោះទេ។

នៅក្នុងដំណើរចុះត្រួតពិនិត្យការដ្ឋានសាងសង់អាកាសយានដ្ឋានអន្តរជាតិ ភ្នំពេញថ្មី ដែល​នឹង​ក្លាយទៅជាអាកាសយានដ្ឋានដ៏ទំហំប្រចាំប្រទេសស្ថិតនៅស្រុកកណ្តាលស្ទឹង ខេត្ត​កណ្តាល ជាប់ព្រំប្រទល់ស្រុកបាទី ខេត្តតាកែវ នាព្រឹកថ្ងៃទី២២ ខែមិថុនា ឆ្នាំ​២០២០​នេះ​សម្តេ​ចតេជោថា បញ្ហានៃជំងឺ Covid-19 វាមិនមែនជាបញ្ហា ឬជា​ឧបសគ្គ​សម្រា​ប់​កម្ពុជា​ក្នុង​កិច្ចសាងហេដ្ឋារចនាសម្ព័ន្ធនៅទូទាំងប្រទេសនោះទេ។

សម្ដេចតេជោ ហ៊ុន សែន មានប្រសាសន៍ទៀតថា ៖“កាលពីប៉ុន្មានថ្ងៃមុន សម្តេចបានចុះ ត្រួតពិនិត្យការសាងសង់ហេដ្ឋារចនាសម្ព័ន្ធនៅខេត្តព្រះសីហនុ ដែល​រហូត​មក​ដល់​ពេល​នេះ​ជិតបានបញ្ចប់ហើយ ហើយ​តាមរយៈនៃ​ការកសាងទាំងនេះគឺ​មាន​តម្រូវការ​កម្លាំង​កម្មក​រ​បម្រើការងាររាប់ពាន់នាក់។ ដោយឡែក សម្រាប់ការសាងសង់ព្រលានយន្តហោះថ្មីនេះ បើឈានដល់ការសាងសង់ក្នុងដំណាក់កាលទី២ គឺត្រូវការ​កម្លាំង​កម្មករ​រហូត​ប្រមាណ​២​ម៉ឺន​នាក់ក្នុងមួយថ្ងៃ”។

សម្ដេចតេជោ ហ៊ុន សែន បានលើកឡើងទៀតថា៖ ក្រៅពីការសាងសង់ទាំងនេះ សម្រាប់​តែ​ផ្នែក​សាងសង់លំនៅដ្ឋានក៏សុទ្ធតែមានដំណើរការ ដូចជាក្រុមហ៊ុនជីបម៉ុង ក្រុម​ហ៊ុន​បុរី​ប៉េងហួត និង​ក្រុមហ៊ុន​ផ្សេង​ៗ​មួយ​ចំនួន​នៅ​តែ​បន្ត​សកម្ម​ភាព​សាង​សង់​ដែលមា​ន​តម្រូវ​ការ​ផ្នែក​កម្លាំង​ពលកម្មដដែល ដូច្នេះវាអត់ទា​ន់​មាន​អីប្រែប្រួល​ច្រើន​នោះទេ​ដែល​បណ្តាល​ម​ក​ពី Covid-19 លើកលែងតែវិស័យចំនួន២ រួមមានវិស័យទេសចរណ៍ និងវិស័យឧស្សាហកម្ម ។

ជាមួយគ្នានេះ សម្ដេចតេជោ បានលើកទឹកចិត្តដល់បណ្តាក្រុមហ៊ុនឯកជន និង​អ្នកអភិវឌ្ឍន៍​ទាំង​អស់ បន្តសកម្មភាពសាងសង់ និងវិនិយោគរបស់ខ្លួនបន្តទៀត ព្រោះវិបត្តិ Covid-19 មិន​មែន​ជាឧបសគ្គធំសម្រាប់កម្ពុជានោះទេ ខណៈដែ​លពិភពលោ​កកំពុងតែ​ទទួល​បាន​សញ្ញា​វិជ្ជ​មានក្នុងការឈានទៅសម្រេចបាន១០០ភាគរយ៕

ខេត្តកែប ៖ បើតាមសេចក្តីរាយការណ៍ បានឱ្យដឹងថា អាងស្តុកទឹកដ៏ធំមួយកន្លែង ត្រូវបានគេយកត្រាក់ទ័រមកឈូសឆាយដើមស្មាច់ដុះ ក្នុង អាងទឹកចោលអស់កាលពីថ្ងៃទី១១ ខែមីនា ឆ្នាំ២០២០ ស្ថិតនៅភូមិអន្ទង់សរ ជាប់នឹងភូមិសាស្ត្រភ្នំវល្លិ៍ ឃុំពងទឹក ស្រុកដំណាក់ចង្អើរ ខេត្តកែប ហើយការឈូសឆាយរំលោភយកដីអាងទឹកនៅភ្នំវល្លិ៍ នេះ អាជ្ញាធរអះអាងថា អត់មានអ្នករំលោភ យកដីអាងទឹកនោះទេ។

បើតាមការឱ្យដឹងពីប្រជាពលរដ្ឋមានលំនៅដ្ឋា នជិតអាងទំនប់ទឹក និយាយប្រាប់ថា គាត់បានឃើញត្រាក់ទ័រមួយគ្រឿងបានចុះឈួ ស ឆាយ ព្រៃស្មាច់ដុះនៅក្នុងអាងទឹក ។តែក្រោយមកត្រាក់ទ័រមួយគ្រឿងនោះ បានឈប់ឈូសឆាយដោយ ម្ចាស់ ត្រាក់ទ័រ និយាយ ថា ឈួ ស ឆាយ មិនកើតដោយសារតែភក់ផុងពេក ។ ទោះជាត្រាក់ទ័របានដកថយពីក្នុងអាងទឹក ក៏ដោយលុះនៅព្រឹកថ្ងៃ ទី១៣ ខែមីនា នេះ មានមនុស្ស ២ នាក់ទៀតកំពុងបន្តកាប់ស្ការដើមស្មាច់នៅក្នុងអាងទឹកស្ថិតក្នុងភូមិ អន្ទុងសរ ឃុំពងទឹក ។

បើតាមប្រជាពលរដ្ឋម្នាក់ទៀតឈ្មោះ វែ ន ស៊ុ អាយុ ៦៧ឆ្នាំ នៅភូមិអន្ទង់សរ បាននិយាយប្រាប់ថា ប្រជាពលរដ្ឋរស់នៅជុំវិញអាងទឹកនេះ សប្បាយរីករាយណាស់ ព្រោះមានបានគុណអាងទឹកនេះ ប្រើខួបប្រាំង វស្សា។ ពលរដ្ឋរូបនេះ និយាយថា អាងទឹកនេះយូរហើយសូមរក្សា ថែទាំកុំឱ្យបំពានយកដីក្នុងទឹក ។

បើតាមលោក ឃី នាង ប្រធានមន្ទីរធនធានទឹកខេត្ត កែប បាននិយាយប្រាប់ឱ្យដឹងកាលពីល្ងាចថ្ងៃទី១៣ ខែមីនា ថា អាងទំនប់ទឹកនៅខេត្ត កែប មានចំនួន១១ កន្លែង ហើយអាងទឹកទាំង១១ កន្លែងនេះ មិនត្រូវបានគេរំលោភយកដីក្នុងអាងទឹកយកធ្វើកម្មសិទ្ធិទេ៕

ខេត្តកណ្តាល​ ៖ សម្តេច​តេ​ជោ ហ៊ុន សែន បានប្រកាសថា នៅ​ថ្ងៃទី​២៤ ខែមិថុនា​ខាងមុខនេះ សម្តេច​នឹង​ប្រកាស​ដាក់​ឲ្យ​ដំណើរការ​កម្មវិធី​ឧបត្ថម្ភ​សាច់ប្រាក់​ជូន​គ្រួសារ​ក្រីក្រ និង​ងាយ​រងគ្រោះ ក្នុងអំឡុងពេល​ប្រយុទ្ធ​នឹង​ជំងឺ​កូ​វីដ​១៩​។​

ការប្រកាសបែបនេះរបស់សម្តេចធ្វើឡើងកាលពី​ព្រឹក​ថ្ងៃទី​២២ ខែមិថុនា​នេះ ក្នុងពេល​អញ្ជើញ​ទៅពិនិត្យ​មើល​ការដ្ឋាន​សាងសង់​អាកាសយានដ្ឋាន​អន្តរជាតិ​ភ្នំពេញ​ថ្មី ស្ថិតនៅ​ឃុំ​ព្រែកស្លែង ស្រុក​កណ្តាលស្ទឹង ខេត្តកណ្តាល។

​សម្តេច​តេ​ជោ ហ៊ុន សែន បាន​បញ្ជាក់ថា រាជរដ្ឋាភិបាល នឹងត្រូវ​ចំណាយ​ប្រមាណ ២៥​លាន​ដុល្លារ​អាមេរិក ក្នុង ១​ខែៗ សម្រាប់​ប្រជាពលរដ្ឋ​ក្រីក្រ​ប្រមាណ ៦០​ម៉ឺន​នាក់​។​ ថវិកទាំងនោះ បានមកពីចំណូលពន្ធគយ ខណៈដែលមន្ត្រីរាជការប្រមាណពី ៦ ទៅ ៧ម៉ឺននាក់ បានស្ម័គ្រចិត្តផ្តល់ប្រាក់បៀរត្សរ៍ដល់រាជរដ្ឋាភិបាល ក្នុងអំឡុងពេលកូវីដ១៩ ដែលទទួលបានសរុបប្រមាណ ១០ម៉ឺនដុល្លារ។ រីឯថវិកាពីសប្បុរសជននានា រាជរដ្ឋាភិបាល ទទួលបានប្រមាណ ១៥លានដុល្លារអាមេរិក ហើយចំណាយទៅវិញក្នុងការទិញសម្ភារៈពេទ្យ អស់​ប្រមាណពី ៨ ទៅ ៩លានដុល្លារ។

​ក្នុង​អនុក្រឹត្យ ចុះ​ថ្ងៃទី​១២ ខែមិថុនា ឆ្នាំ​២០២០ បាន​បង្ហាញថា គ្រួសារ​ក្រីក្រ និង​ងាយ​រងគ្រោះ ដែលមាន​ប័ណ្ណ​សមធម៌ ត្រូវ​បានទទួល​ប្រាក់ឧបត្ថម្ភ ដែល​បែង​ចែកជា ៣​ប្រភេទ ចាប់ពី ១៦០០០ រៀល ដល់ ១២​ម៉ឺន​រៀល ក្នុង ១​ខែ​។ ក្នុងនោះ កុមារ​អាយុ​ក្រោម ៥​ឆ្នាំ ជនពិការ និង​ចាស់ជរា​អាយុ​ចាប់ពី ៦០​ឆ្នាំ​ឡើង ព្រមទាំង​គ្រួសារ​ក្រីក្រ ដែលមាន​សមាជិក​ផ្ទុកមេរោគ​អេដស៍ ក៏មាន​ឈ្មោះ ទទួលបាន​ប្រាក់ឧបត្ថម្ភ​នេះដែរ​។​

​តាម​អនុក្រឹត្យ ប្រាក់ឧបត្ថម្ភ​ជូន​គ្រួសារ​ក្រីក្រ និង​ងាយ​រងគ្រោះ នៅ​ទីប្រជុំជន ក្នុង​រាជធានី​ភ្នំពេញ ទទួលបាន​ពី ២៨០០០ រៀល ដល់ ១២​ម៉ឺន​រៀល​។ ចំណែក​ប្រាក់ឧបត្ថម្ភ​ជូន​គ្រួសារ​ក្រីក្រ និង​ងាយ​រងគ្រោះ នៅ​ទីប្រជុំជន ក្រៅពី​រាជធានី​ភ្នំពេញ ក៏​ទទួលបាន​ពី ២៨០០០ រៀល ដល់ ១២​ម៉ឺន​រៀល​ដែរ​។ រីឯ​ប្រាក់ឧបត្ថម្ភ​ជូន​គ្រួសារ​ក្រីក្រ និង​ងាយ​រងគ្រោះ នៅ​ជនបទ ទទួលបាន​ចាប់ពី ១៦០០០ រៀល ដល់ ៨​ម៉ឺន​រៀល​។​

​សម្តេច​តេ​ជោ ហ៊ុន សែន បានប្រកាសថា នៅ​ថ្ងៃ​ពុធ ទី​២៤ ខែមិថុនា ឆ្នាំ​២០២០ រាជរដ្ឋាភិបាល នឹង​ប្រកាស​អនុវត្ត​នូវ​កម្មវិធី​ឧបត្ថម្ភ​សាច់ប្រាក់​ជូន​គ្រួសារ​ក្រីក្រ និង​ងាយ​រងគ្រោះ ក្នុងអំឡុងពេល​ប្រយុទ្ធ​នឹង​ជំងឺ​កូ​វីដ​១៩ នេះ​៕

ភ្នំពេញ ៖ នៅព្រឹកថ្ងៃទី ២២ មិថុនា នេះ សម្តេចតេជោ ហ៊ុន សែន នឹងអញ្ជើញចុះពិនិត្យមើលការដ្ឋានសាងសង់ អាកាសយានដ្ឋានអន្តរជាតិភ្នំពេញថ្មី ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។

តាមរយៈហ្វេសប៊ុកផេក សម្តេចតេជោបានសរសេរថា នៅព្រឹកថ្ងៃទី ២២ មិថុនា នេះ ខ្ញុំនឹងទៅពិនិត្យមើលការដ្ឋានសាងសង់ អាកាសយានដ្ឋានអន្តរជាតិភ្នំពេញថ្មី ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល។

សម្តេចបន្តថា នៅពេលនេះការសាសង់ព្រលានយន្តហោះថ្មីគឺសម្រេចបានប្រមាណ ៣០% ហើយ។ អាកាសយានដ្ឋានថ្មីនេះជាប្រភេទ 4F ដែលអាចឲ្យយន្តហោះធំៗដូចជា Airbus A380-800 និង Boeing 747-800 ចុះចតបាន។ សង្ឃឹមថា កម្ពុជានឹងកាន់តែទាក់ទាញបានភ្ញៀវទេសចរ និងអ្នកវិនិយោគគិនកាន់តែច្រើនឡើងក្រោយពីព្រលានយន្តហោះអន្តរជាតិភ្នំពេញថ្មីនេះកសាងរួច។

សម្តេចបន្តទៀតថា ព្រលានយន្តហោះអន្តរជាតិថ្មីនេះ គឺវិនិយោគក្នុងទឹកប្រាក់ប្រមាណ ១,៥០០លានដុល្លារ ដែលគ្រោងនឹងបញ្ចប់ការសាងសង់អោយបានរួចរាល់នៅឆ្នាំ២០២៣ ខាងមុខនេះ។

ជាមួយគ្នានោះ សម្តេចក៏បានសូមជូនពរបងប្អូនជនរួមជាតិជួបតែសំណាងល្អនឹងចៀសផុតពីជំងឺកូវីដ-១៩​ទាំងអស់គ្នា៕

ខេត្តកោះកុង ៖ ក្រសួងបរិស្ថាន លើកទឹកចិត្តដល់សហគមន៍ក្នុងខេត្តកោះកុងបង្កើនការចិញ្ចឹមគ្រំចំពុះទា ខណៈគ្រំប្រភេទនេះមានតម្រូវការទីផ្សារខ្ពស់ដែលនឹងជួយដល់ជីវភាព និងសេដ្ឋកិច្ចគ្រួសារកាន់តែប្រសើរឡើង។
ឯកឧត្តម នេត្រ ភក្រា្ត រដ្ឋលេខាធិការ និងជាអ្នកនាំពាក្យក្រសួងបរិស្ថាន មានប្រសាសន៍ថា គ្រំមួយប្រភេទនេះនៅបរទេសគេល្បីល្បាញឈ្មោះណាស់ ដោយសារវាមានរស់ជាតិឆ្ងាញ់ ប៉ុន្តែសម្រាប់នៅប្រទេសកម្ពុជាវិញ ប្រជាពលរដ្ឋហាក់មិនសូវស្គាល់ទេ ដោយហេតុនេះហើយទើបក្រសួងទាក់ទាញឲ្យភោជនីយដ្ឋានប្រចាំសណ្ឋាគារល្បីៗ និងភោជនីយដ្ឋានធំៗនៅកម្ពុជាចាប់អារម្មណ៍បង្កើតមុខម្ហូប ដែលនឹងជួយឲ្យប្រជាសហគមន៍ចិញ្ចឹមគ្រំចំពុះទាបានទទួលទីផ្សារកាន់ធំ និងអាចពង្រីកមុខរបរនេះកាន់តែច្រើនដើម្បីលើកស្ទួយជីវភាពឲ្យកាន់តែធូរធារ។

ថ្លែងក្នុងឱកាសដឹកនាំប្រតិភូដែលជាក្រុមចុងភៅប្រចាំសណ្ឋាគារធំៗ និងភោជនីយដ្ឋានល្បីៗនៅកម្ពុជាចុះពិនិត្យការចិញ្ចឹមគ្រំចំពុះទា និងការកែច្នៃផលនេសាទនៅខេត្តកោះកុង ពីថ្ងៃទី១៨ ដល់ថ្ងៃទី២០ ខែមិថុនានេះ ឯកឧត្តម បានឲ្យដឹងថា នៅបរទេសគ្រំប្រភេទនេះ មានតម្លៃចាប់ពីជិត១០ដុល្លារឡើងទៅ ប៉ុន្តែសម្រាប់ប្រជាសហគមន៍នៅខេត្តកោះកុង អាចចិញ្ចឹមលក់បាន ក្នុងមួយគីឡូក្រាមថ្លៃត្រឹមតែ២.៥០០ ដល់៣.០០០រៀលប៉ុណ្ណោះ ដោយសារតែខ្វះទីផ្សារ និងការចាប់អារម្មណ៍ពីប្រជាជនចំពោះគុណប្រយោជន៍របស់វា ទៅលើមុខម្ហូបដែលមានរស់ជាតិឆ្ងាញ់។

បើតាមការបញ្ជាក់ពីលោក មាស រិទ្ធី អនុប្រធាននាយកដ្ឋានអភិរក្សសមុទ្រ និងតំបន់ឆ្នេរ នៃក្រសួងបរិស្ថាន បានឲ្យដឹងថា ប្រជាសហគមន៍ដែលកំពុងចិញ្ចឹមគ្រំចំពុះទានៅក្នុងខេត្តកោះកុងមានចំនួន៣កន្លែង ស្ថិតនៅក្នុងភូមិសាស្រ្តដែនជម្រកសត្វព្រៃពាមក្រសោប ដែលទី១មាននៅតំបន់មុខលំហរពាមក្រសោបចាស់ ទី២មាននៅកោះកាង និងទី៣នៅចំណុចឡាំដាំជាប់នឹងឈូងជ្រោយប្រស់។
សូមបញ្ជាក់ថា កន្លងមកប្រជាសហគមន៍ចិញ្ចឹមគ្រំចំពុះទាលក់នៅខេត្តកោះកុង បាននាំចេញទៅលក់ឲ្យប្រទេសជិតខាងក្នុងតម្លៃមួយទាប។ ហេតុនេះហើយ ទើបក្រសួងបរិស្ថាន បានទាក់ទាញបណ្តាសណ្ឋាគារធំៗ និងភោជនីយដ្ឋានល្បីៗនៅកម្ពុជា ចូលរួមទិញគ្រំប្រភេទនេះពីប្រជាពលរដ្ឋ ដើម្បីលើកទឹកចិត្តដល់សហគមន៍ក្នុងការបង្កើនការចិញ្ចឹម៕

ខេត្តកំពត ៖ ការងារគម្រោងថែទាំ និងពង្រឹងគុណភាពផ្លូវជាតិលេខ ៣ កំពត-វាលរេញ ឋិតក្នុងភូមិសាស្ត្រខេត្តកំពត និងខេត្តព្រះសីហនុប្រវែងសរុបចំនួន ៥៤,៣គីឡូម៉ែត្រ សម្រេចបាន ៧៩,៦០% ហើយ។ នេះបើតាមបញ្ជាក់របស់លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ខណ:លោកបានដឹកនាំគណៈប្រតិភូចុះពិនិត្យវឌ្ឍនភាពនៃការងារអនុវត្តន៍គម្រោងនេះ។

គោលបំណងនៃការចុះពិនិត្យនេះ គឺដើម្បីធានាឱ្យគុណភាពនៃសំណង់អនុលោមតាមបទដ្ឋានបច្ចេកទេស និងស្របតាមសៀវភៅបន្ទុក ដែលមានចែងនៅក្នុងកិច្ចព្រមព្រៀងរវាងក្រសួងសាធារណការ និងដឹកជញ្ជូន និងក្រុមហ៊ុនម៉ៅការសាងសង់ សំដៅធ្វើឱ្យផ្លូវនេះមានគុណភាពរឹងមាំ អាចប្រើប្រាស់ជាប់បានយូរអង្វែង។ គម្រោងថែទាំ និងពង្រឹងគុណភាពកំណាត់ផ្លូវជាតិលេខ៣ (ទីរួមខេត្តកំពត-វាលរេញ) មានប្រវែងជាង៥៤គម ចែកជាពីរកំណាត់។ ទី១គឺចាប់ពីគ.ម.១៤៧+១០០ ដល់គ.ម. ១៨១+០០០ ប្រវែង៣៤គម ត្រូវបានជួស ជុល និងក្រាលកៅស៊ូ AC ហើយ គ.ម. ១៨១+០០០ ដល់គម២០១+៤០០ ប្រវែង២០គម ត្រូវធ្វើការជួសជុលពង្រឹងឡើងវិញ ដោយធ្វើការលើកកម្ពស់តួផ្លូវចំនួន៤៥សង់ទីម៉ែត្រ ដើម្បីពង្រឹងតួផ្លូវ និងការពារជំនន់ទឹកភ្លៀងហូរកាត់នៅរដូវវស្សា អនុវត្តគម្រោងដោយក្រុមហ៊ុន Sichuan Road and Bridge (Group) Corporation Co., Ltd និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេស Korea Consultants International Co., Ltd។

គួររំលឹកថា កំណាត់ផ្លូវនេះត្រូវបានចាប់ផ្ដើមបើកការដ្ឋានសាងសង់ ថែទាំ និងពង្រឹងគុណភាពនៅថ្ងៃទី២៣ ខែកុម្ភៈ ឆ្នាំ២០១៨ ដោយប្រើប្រាស់រយៈពេល៥៤ខែ គ្រោងចំណាយថវិកាប្រមាណ១២លានដុល្លារសហរដ្ឋអាមេរិក ក្រោមគម្រោងឥណទាន IDA Credit។

លោកទេសរដ្ឋមន្ត្រីបានសង្កត់ធ្ងន់ថា ក្រសួង សាធារណការ និងដឹកជញ្ជូន ប្រកាន់យកគោលការណ៍ធ្វើផ្លូវឱ្យជាប់រឹងមាំ មិនមែនធ្វើផ្លូវជាប់រហូតទេ ធ្វើខាងមុខខូចខាងក្រោយ ធ្វើខាងមុខហើយធ្វើ ខាងក្រោយម្ដងទៀត។

ឯកឧត្តមទេសរដ្ឋមន្ត្រី បានអំពាវនាវដល់បងប្អូនប្រជាពលរដ្ឋ ប្រើប្រាស់កម្មវិធី ថែទាំផ្លូវ(Road Care Mobile App) ដើម្បីចូលរួមថែទាំផ្លូវថ្នល់យើងឱ្យបានគង់វង្សជាប់បានយូរ និង បានសំណូមពរឲ្យក្រុមហ៊ុនដឹកជញ្ជូន កុំដឹកជញ្ជូនទំនិញលើសទម្ងន់កម្រិតកំណត់បណ្តាលឱ្យផ្លូវឆាប់ខូច មិនត្រូវប្រើប្រាស់ចិញ្ចើមផ្លូវដើម្បីធ្វើអាជីវកម្ម រំលោភបំពានដីចំណីផ្លូវ និងសូមចូលរួមគោរពច្បាប់ ចរាចរណ៍ដើម្បីសុវត្ថិភាពយើងទាំងអស់គ្នាផងដែរ៕

ភ្នំពេញ ៖ បច្ចុប្បន្ន កម្ពុជាមានផ្ទៃដីព្រៃកោង កាង សរុបចំនួនជិត៦ម៉ឺនហិចតា កំពុងជួយបង្កើតប្រាក់ចំណូលសំរាប់សហគមន៍តាមតំបន់ឆ្នេរ និង ជួយដល់ប្រព័ន្ធអេកូឡូស៊ីបានយ៉ាងល្អប្រសើរ។ នេះបើតាមការបញ្ជាក់ពីអ្នកនាំពាក្យក្រសួងបរិស្ថាន លោក នេត ភក្ត្រា។

ក្នុងឱកាសចុះពិនិត្យដំណើរការចិញ្ចឹមខ្យងចំពុះទា និងការកែច្នៃផលិត ផលជាច្រើនទៀតក្នុង សហគមន៍តំបន់ការពារធម្មជាតិពាមក្រសោប នៃដែនជម្រកសត្វព្រៃពាមក្រសោប ក្នុងភូមិសាស្ត្រ ទឹកដីខេត្តកោះកុង កាលពីម្សិលម៉ិញ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យ ក្រសួង បរិស្ថាន បានបញ្ជាក់ថា «ព្រៃកោងកាងជារបៀងយុទ្ធសាស្រ្តតភ្ជាប់ប្រព័ន្ធអេកូឡូស៊ី ពីតំបន់ដីគោក ឆ្នេរ និងសមុទ្រ ហើយក៏ ជា រនាំងប្រឆាំងនឹងគ្រោះធម្មជាតិ និងការប្រែប្រួលអាកាសធាតុ មិនតែប៉ុណ្ណោះបានចូលរួមចំណែក ក្នុងការអភិវឌ្ឍសេដ្ឋកិច្ចជាតិ និងចូលរួមចំណែកក្នុងការកាត់បន្ថយភាពក្រីក្រ ដោយមានតួនាទី យ៉ាង សំខាន់ជាកន្លែងរក្សាផលស្តុក ជាដែនជម្រក និងប្រភពមេពូជនៃមច្ឆធម្មជាតិដែលជា ប្រភព ធនធានសមុទ្រដ៏សម្បូណ៌បែប។ លោក នេត្រ ភក្ត្រា រដ្ឋលេខាធិការក្រសួងបរិស្ថានបានថ្លែងថា ព្រៃកោង កាងក្នុងខេត្តកោះកុងពិសេសតំបន់ពាមក្រសោប បានចូលរួមចំណែកក្នុងការអភិវឌ្ឍ សេដ្ឋកិច្ចជាតិ និងចូលរួមចំណែកក្នុងការកាត់បន្ថយភាពក្រីក្រ ដោយមានតួនាទីយ៉ាងសំខាន់ ជា កន្លែងរក្សាផលស្តុក ជាដែនជម្រក និងប្រភពមេពូជ ដែលជាប្រភពធនធានសមុទ្រសំបូរបែប ដូច ជា ផ្តល់ផលវារីវប្បកម្មពីខេត្តកោះកុងមាន ១ម៉ឺន ៥១០០តោន/១ឆ្នាំ។

ផលនេសាទសមុទ្ររបស់ខេត្តកោះកុងពិសេសពីតំបន់ពាមក្រសោបមានចំនួន១ម៉ឺន ១៦៨០ តោន កាលពីឆ្នាំ២០១៩ កន្លងទៅ។ លើសពីនេះ តំបន់ព្រៃកោងកាងជាប្រភពដ៏សំខាន់ នៃការបង្កើត ប្រាក់ចំណូលសំរាប់សហគមន៍តាមតំបន់ឆ្នេរ ដូចជា ការនេសាទ និងអេកូទេសចរណ៍។ អ្នកនាំ ពាក្យក្រសួងបរិសថា បញ្ជាក់ថា ខេត្តកោះកុងជាខេត្ត ដែលមានព្រៃកោងកាងច្រើនជាងគេ ក្នុង ចំណោមខេត្តជាប់មាត់សមុទ្រទាំង ៤ របស់កម្ពុជា។

សូមជម្រាបថា កម្ពុជា មានផ្ទៃដីព្រៃកោងកាង សរុបចំនួន ៥៨ ៨០០ហិកតា ដែលក្នុងនោះនៅខេត្តកែបមានទំហំ ១ ០០៥ហិកតា ខេត្តកំពតមានទំហំ ១ ៩៦៦ ហិកតា ខេត្តព្រះសីហនុមានទំហំ ៩ ៣៥២ ហិកតា និងខេត្តកោះកុងមានទំហំ ៤៦ ៥២៩ ហិកតា ។ ព្រៃកោងកាងជាប្រភេទព្រៃដុះលូតលាស់នៅតាមតំបន់ឆ្នេរទឹកភ្លាវ ក្រោមឥទ្ធិពលទឹកជោ នាច ពីសមុទ្រ និងជាទីប្រសព្វជាមួយទឹកសាប ដែលមានប្រភពពីតំបន់ឆ្នេរដីគោក។ ព្រៃកោងកាង ជា សម្បត្តិធម្មជាតិមហាសាលសម្រាប់មនុស្សជាតិទូទៅ ពិសេសប្រជាជនដែលរស់នៅ និងប្រកប មុខរបរអ្នកនេសាទតំបន់សមុទ្រ៕

ខេត្តក្រចេះ ៖ ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជាឯកឧត្តម ប៉ាទ្រីក មឺរភី (PATRICK Murphy) និងសហការី បានចូល ជួបពិភាក្សាការងារជាមួយឯកឧត្តម វ៉ា ថន អភិបាលខេត្តក្រចេះ រួមនិង ប្រធានមន្ទីរដែនដី មន្ទីរកសិកម្ម និងមន្ទីរបរិស្ថានផងដែរ នៅ រសៀលថ្ងៃទី១៨ ខែមិថុនា ឆ្នាំ២០២០ ។
ក្នុងពិធីទទួលស្វាគមន៍ឯកអគ្គរដ្ឋទូតសហរដ្ឋអាមេរិក នាពេលនោះ ឯកឧត្តម វ៉ា ថន បានមានប្រសាសន៍ថា រដ្ឋបាលខេត្ត មានការរីករាយ ដែលឯកឧត្តមបានមកធ្វើទស្សន កិច្ចដើម្បីសិក្សាស្វែងយល់និងពិភាក្សាអំពីការរឹតចំណងមិត្តភាពប្រជាជនអាមេរិក និង ប្រជាជនកម្ពុជាពិសេសនៅខេត្តក្រចេះនាពេលនេះ ។
ឯកឧត្ដមបានបញ្ជាក់បន្ថែមថា ក្នុងកិច្ចសហការទ្វេរភាគីអាមេរិក កម្ពុជាដោយកន្លងទៅ និងពេលបច្ចុប្បន្ន គឺសបញ្ជាក់ឱ្យសកលលោកទាំងមូលបានឃើញចំណងមិត្តភាពការទូត នៃប្រទេសទាំងពីរកាន់តែរឹងមាំឡើងប្រកបដោយផ្លែផ្កា និងផ្ដល់អត្ថប្រយោជន៍ឱ្យគ្នា ទៅ វិញទៅមក ពិសេសក្នុងការផ្ដល់ជំនួយឧបត្ថម្ភផ្សេងៗ តាមរយៈអង្គការ USAID ដែល ជំនួយទាំងនេះត្រូវបានពង្រឹងពង្រីកគ្រប់ផ្នែក គ្រប់វិស័យធ្វើឱ្យសម្រេចបាននូវការ អភិវឌ្ឍ ន៍ សេដ្ឋកិច្ចសង្គម
គួរជាទីមោទនៈ ។
ក្នុងឱកាសនោះដែរ ឯកឧត្តមប៉ាទ្រីក មឺរភី ឯកអគ្គរដ្ឋទូតសហរដ្ឋអាមេរិក ប្រចាំព្រះរាជា ណា ចក្រកម្ពុជា បានថ្លែងអំណរគុណរដ្ឋបាលខេត្ត ដែលឱ្យឯកឧត្តមមកធ្វើទស្សនកិច្ច ជាផ្លូវ ការទទួលបានផ្លែផ្កា មានឱកាសជួបជាមួយធុរៈកិច្ចក្នុងស្រុក និងជួបតំណាងអង្គការ សង្គមស៊ីវិល។
ឯកឧត្ដមឯកអគ្គរដ្ឋទូតចង់ដឹងពីការងារអាទិភាព និងបញ្ហាប្រឈមមួយចំនួនក្នុងខេត្ត ក្រចេះ ក្នុងអំឡុងពេលអន្តរកាលជម្ងឺកូវិដ១៩កំពុងរីករាលដាលជាសកល កំពុងរងផល
ប៉ះពាល់ផ្នែកសេដ្ឋកិច្ចយ៉ាងធ្ងន់ធ្ងរ ។ សម្រាប់ឆ្នាំនេះ ក៏ជាខួបលើក ទី៧០ នៃចំណងការ ទូតរវាងសហរដ្ឋអាមេរិក និងកម្ពុជា ផ្តោតលើវិស័យ កិច្ចសហប្រតិបត្តិការវិនិយោគកាន់ តែស៊ីជម្រៅ ព្រមទាំងបានផ្តល់អនុសាសន៍មួយចំនួនដូចជាអង្គការសង្គមស៊ីវិល ជាធន ធានមួយមានតម្លៃ ព្រោះពួកគាត់មានជំនាញធ្វើការងារជាមួយកម្មករ និយោជិក ដែលមិន បានគោរពតាមបទដ្ឋាន ប៉ុន្តែយើងត្រូវស្តាប់ពីគ្រប់ភាគី ដើម្បីរួមចំណែកក្នុងការ អភិវឌ្ឍ ផងដែរ ។
សូមបញ្ជាក់ថា ជំនួបពិភាក្សាការងាររវាងអគ្គរដ្ឋទូតសហរដ្ឋ អាមេរិកជាមួយថ្នាក់ ដឹកនាំ ខេត្ត ក្រចេះ នាពេលនេះបានបង្ហាញឱ្យកាន់តែច្បាស់ ពីទំនាក់ទំនងកាន់តែល្អប្រសើរថែម ទៀតរវាងថ្នាក់ដឹកនាំខេត្ត និងអង្គការក្រៅរដ្ឋាភិបាលបន្តនូវសកម្មភាពការងាររបស់ខ្លួន ពិសេសនៅតាមមូលដ្ឋាននានា ក្នុងភូមិសាស្ត្រក្នុងខេត្តក្រចេះ៕

ភ្នំពេញ ៖ បើតាមក្រសួងការបរទេស និង សហប្រតិបត្តិការអន្តរជាតិ បានឱ្យដឹងនៅថ្ងៃនេះថា ឯកឧត្តម ឧប នាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិកម្ពុជា បានចូលរួម កិច្ចប្រជុំជាន់ខ្ពស់ក្នុងក្របខ័ណ្ឌ កិច្ចសហប្រតិបតិ្តការអន្តរជាតិ នៃគំនិតផ្តួចផ្តើមខ្សែក្រវាត់ និងផ្លូវ ស្តីពី ការប្រយុទ្ធប្រឆាំងជម្ងឺកូវីដ-១៩ ដោយសាមគ្គីភាពតាមរយៈប្រព័ន្ធវីដេអូ ដែលបានធ្វើឡើង កាល ពីល្ងាចថ្ងៃទី១៨ ខែមិថុនា ឆ្នាំ២០២០គឺ ជាគំនិតផ្តួចផ្តើមឡើងដោយសា ធារណរដ្ឋប្រជា មានិត ចិននិងបានដឹកនាំដោយ ឯកឧត្តម វ៉ាង យី ទីប្រឹក្សារដ្ឋនិងជារដ្ឋមន្រ្តីការបរទេសចិន និង ចូលរួមដោយរដ្ឋមន្រ្តីមកពី២៦ប្រទេស ជាដៃគូនៃកិច្ចសហប្រតិបត្តិការនេះ។
អង្គប្រជុំបានទទួលស្គាល់នូវភាពចំាំបាច់ តម្រូវឲ្យមានសាមគ្គីភាពអន្តរជាតិ កិច្ចសហប្រតិបត្តិការ ពហុភាគី និងការគាំទ្រគ្នាទៅវិញទៅមកកាន់តែរឹងមាំជាងមុន ដើម្បីដោះស្រាយជម្ងឺរាតត្បាតសកល និងផលប៉ះពាល់សេដ្ឋកិច្ចសង្គមយ៉ាងធ្ងន់ធ្ងររបស់វានៅទូទាំងពិភពលោក ឲ្យកាន់តែមានប្រសិទ្ធ ភាព ដោយគ្មានការរើសអើង ភាពលំអៀង ការប្រកាន់ពូជសាសន៍ និងភាពស្អប់ខ្ពើមឡើយ។ អង្គប្រជុំបានចូលរួមរំលែកទុក្ខដោយសុទ្ធចិត្តចំពោះមនុស្សជាច្រើនដែលបានបាត់បង់ជីវិតដោយសារជម្ងឺកូវីដ-១៩ និងបានសំដែងអំណរគុណ ដល់អ្នកដែលបានធ្វើពលីកម្ម ក្នុងការដោះស្រាយ បញ្ហាជំងឺរាតត្បាតសកល។
អង្គប្រជុំបានទទួលស្គាល់តួនាទីស្នូលរបស់ប្រព័ន្ធអង្គការសហប្រជាជាតិ ក្នុងការជំរុញនិងសម្រប សម្រួលការឆ្លើយតបជាសកល ដើម្បីគ្រប់គ្រងនិងទប់ស្កាត់ការរីករាលដាលនៃជម្ងឺកូវីដ-១៩ ជា ពិសេស តួនាទីដឹកនាំដ៏សំខាន់របស់អង្គការសុខភាពពិភពលោក។
អង្គប្រជុំបានបញ្ជាក់ជាថ្មីនូវការប្តេជ្ញាចិត្តជំរុញកិច្ចសហប្រតិបត្តិការអន្តរជាតិបន្ថែមទៀត ដោយ ស្រប ទៅតាមស្មារតី និងគោលការណ៍នានា ដែលមានចែងនៅក្នុងកិច្ច ប្រជុំតុមូលថ្នាក់ដឹក នាំលើក ទី២ ស្តីពីវេទិកាខ្សែក្រវាត់និងផ្លូវសម្រាប់កិច្ចសហប្រតិបត្តិការអន្តរជាតិ ក្នុងការស្វែងរកការអភិវឌ្ឍ ដែលមានបទដ្ឋានខ្ពស់ ផ្តោតទៅលើប្រជាជន និងប្រកបដោយចីរភាព។ ដើម្បីកសាងវិថីសូត្រ សុខភាព អង្គប្រជុំបានគូសបញ្ជាក់ពីសារៈសំខាន់នៃការចែករំលែកព័ត៌មាន និងឧត្តម្មានុវត្តន៍ ទាន់ ពេលវេលា និងការធ្វើឲ្យប្រសើរឡើង នូវការទទួលបានផលិតផលសុខាភិបាល ប្រកបដោយសម ធម៌ និងតំលៃសមរម្យ រួមទាំងវ៉ាក់សាំងការពារដែលគួរតែត្រូវបានទទួលស្គាល់ថា ជាទំនិញ សាធារ ណៈ សកល។
អង្គប្រជុំក៏បានពិភាក្សាពីវិធីសាស្រ្ត និងមធ្យោបាយ ដើម្បីជំរុញការតភ្ជាប់និងលើកកម្ពស់ការស្តារ សេដ្ឋកិច្ចឡើងវិញ តាមរយៈការពង្រឹងកិច្ចសហប្រតិបត្តិការជាក់ស្តែង ក្រោមគំនិតផ្តួចផ្តើមខ្សែ ក្រវាត់ និងផ្លូវ។
នៅក្នុងកិច្ចប្រជុំតាមប្រព័ន្ធវីដេអូនេះ ឯកឧត្តមឧបនាយករដ្ឋមន្រ្តី ប្រាក់ សុខុន បានជម្រាបជូនអង្គ ប្រជុំពីយុទ្ធនាការដ៏ជោគជ័យរបស់រាជរដ្ឋាភិបាលកម្ពុជាក្នុងការគ្រប់គ្រងការរីករាលដាលនៃជម្ងឺកូវីដ-១៩ និងការចូលរួមចំណែករបស់កម្ពុជានៅក្នុងកិច្ចប្រឹងប្រែងសកល។ ឯកឧត្តម បានវាយតម្លៃខ្ពស់ ចំពោះតួនាទីដឹកនាំនិងការរួមចំណែករបស់ប្រទេសចិន ក្នុងការប្រយុទ្ធប្រឆាំងនឹងជម្ងឺរាតត្បាតកូវីដ-១៩ នៅទូទាំងសកលលោក។

សូមបញ្ជាក់ថា អង្គប្រជុំបានអនុម័តសេចក្តីថ្លែងការណ៍រួមនៃកិច្ចប្រជុំជាន់ខ្ពស់នេះ ដែលឆ្លុះបញ្ចាំង យ៉ាងច្បាស់ពីស្មារតីរួមនៃសាមគ្គីភាពរបស់អ្នកចូលរួមប្រជុំទាំងអស់ និងបញ្ជាក់ពីការប្តេជ្ញាចិត្តរបស់ ខ្លួនចំពោះកិច្ចសហប្រតិបត្តិការពហុភាគី ជាពិសេសក្រោមក្របខ័ណ្ឌនៃគំនិតផ្តួចផ្តើម ខ្សែក្រវាត់ និងផ្លូវ ក្នុងការប្រយុទ្ធប្រឆាំងនឹង ជម្ងឺរាតត្បាតកូវីដ-១៩ លើកកម្ពស់ការស្តារសេដ្ឋកិច្ចសង្គម និង បន្តកិច្ចខិតខំប្រឹងប្រែងបន្ថែមទៀតក្នុងការកសាងសហគមន៍នៃអនាគតរួម៕

ត្បូងឃ្មុំ ៖ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស តំណាងសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នាព្រឹក ថ្ងៃ ទី ១៩ ខែមិថុនា ឆ្នាំ ២០២០ នេះ បានអញ្ជើញជាធអិបតីក្នុងពិធីសែនក្រុងពាលី បួងសួងអរគុណសន្តិភាព នៅតំបន់កោះថ្ម ចំណុចអាងដាច់ X16 “ដើមត្រយឹង” ស្ថិតនៅឃុំទន្លូង ស្រុកមេមត់ ខេត្តត្បូងឃ្មុំ ដើម្បីត្រៀមរៀបចំពិធីរំលឹកខួបលើកទី៤៣ នៃទិវាចងចាំដំណើរឆ្ពោះទៅការផ្ដួលរំលំរបបប្រល័យពូជសាសន៍ប៉ុលពត (២០ មិថុនា ១៩៧៧-២០ មិថុនា ២០២០) ដែលនឹងប្រព្រឹត្តិទៅនាព្រឹកថ្ងៃទី២០ ខែមិថុនា ស្អែកនេះ ក្នុងនោះមានអញ្ជើញចូលរួម ពីសំណាក់ ឯកឧត្តម ជាម ច័ន្ទសោភ័ណ អភិបាលខេត្តត្បូងឃ្មុំ លោក លោកស្រី អភិបាលរងខេត្ត រួមនឹងគណៈប្រតិភូអមដំណើរ ជាច្រើនរូបទៀត។

គិតត្រឹមថ្ងៃទី១៩ ខែមិថុនា ឆ្នាំ២០២០នេះ នៅសល់តែ ០១ថ្ងៃទៀតប៉ុណ្ណោះ ក្រសួងការពារជាតិ នឹងប្រារព្ធខួប ៤៣ឆ្នាំ នៃដំណើររបស់សមមមិត្ត ហ៊ុន សែន ឆ្ពោះទៅកាន់ការផ្តួលរំលំរបប ប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២០) ហើយការធ្វើនេះ គឺចង់បញ្ជាក់ និងរំលឹកនូវប្រវត្តិសាស្ត្រដ៏ជូរចត់ ក្នុងការបូជាសាច់ស្រស់ ឈាមស្រស់របស់សមមិត្ត ហ៊ុន សែន និងសមមិត្តផ្សេងទៀត ប្រាប់ដល់យុវជនជំនាន់ក្រោយឱ្យដឹង និងចងចាំបន្ថែមទៀត។

សូមជម្រាបថា ប្រវត្តិរបស់សមមិត្ត ហ៊ុន សែន និងសមមិត្តរួមដំណើរផ្សេងៗទៀត មិនអាចបំភ្លេចបាននោះឡើយ ខណៈការយកជីវិតទៅប្រថុយប្រថានជាមួយបរទេស (ស្នើសុំកម្លាំងវៀតណាម) ដើម្បីជួយ រំដោះប្រទេសជាតិឱ្យរួចផុតពីរបបដ៏សាហាវរបស់ខ្មែរក្រហម ហើយបានធ្វើឱ្យប្រទេសជាតិមានសុខសន្តិភាព និងការអភិវឌ្ឍរហូតដល់សព្វថ្ងៃនេះ ។

យោងតាមឯកសារដែលបានចងក្រងដោយក្រុមការងារសាងសង់វិមានឈ្នះ-ឈ្នះ បានឱ្យដឹងថា កាលពីជាង ៤០ឆ្នាំមុនសមមិត្ត ហ៊ុន សែន និងកម្មាភិបាលដ៏ទុកចិត្តចំនួន ០៤ រូប ផ្សេងទៀត គឺមានសមមិត្ត នុច ថន, សមមិត្ត ញឹក ហួន, សមមិត្ត សាន សាញ់, និងសមមិត្ត វ៉ា ប៉ោអ៊ាន បាន ចាប់ផ្ដើមធ្វើដំណើរ នៅថ្ងៃទី២០ ខែមិថុនា ឆ្នាំ១៩៧៧ នៅតំបន់កោះថ្ម ឃុំទន្លួង ស្រុកមេមត់ ខេត្តកំពង់ចាម (បច្ចុប្បន្នស្ថិតនៅខេត្តត្បូងឃ្មុំ) ដើម្បីស្នើសុំកម្លាំងភាគីវៀតណាម ឱ្យមកជួយរំដោះប្រទេសជាតិខ្មែរទាំងមូល ឱ្យរួចផុតពីរបបប្រល័យពូជសាសន៍ ប៉ុល ពត។

តាមឯកសារបានបញ្ជាក់ឱ្យដឹងទៀតថា សមមិត្ត ហ៊ុន សែន និងសមមិត្តដទៃទៀត បានធ្វើដំណើរជាមួយនឹងកាំភ្លើង ៣ដើម គ្រាប់បែក២គ្រាប់ និងកាំបិតខ្វែវមួយដើម ហើយការសម្រេចចិត្តរបស់សមមិត្តទាំងអស់នេះ គឺជាការចាកចេញដោយការឈឺចាប់ តែមានទឹកចិត្តមុះមុតដោយ សម្រេចចិត្តយកជីវិតធ្វើដើមទុន ដើម្បីធ្វើការតស៊ូផ្ដួលរំលំរបបប្រល័យពូជសាសន៍ ដ៏សាហាវយង់ឃ្នងនេះ។

ក្នុងការធ្វើខួបលើក៤៣ឆ្នាំ នៃទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត នេះ នឹងប្រព្រឹត្តទៅ នៅថ្ងៃទី ២០ ខែ មិថុនា ឆ្នាំ ២០២០ ស្អែកនេះ ក្រោមអធិបតីភាពសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ ស្ថិតនៅតំបន់កោះថ្ម ចំណុច អ៊ិច ១៦ ស្ថិតនៅឃុំទន្លួង ស្រុកមេមត់ ខេត្តត្បូងឃ្មុំ និងបន្តដំណើរចូលទៅក្នុងវៀតណាម ដើម្បីរំលឹកនូវការចងចាំនៃទីតាំងសំខាន់ៗ ក្នុងការចាប់ផ្ដើមតស៊ូរបស់សមមិត្ត ហ៊ុន សែន លើសមភូមិរំដោះជាតិ មាតុភូមិ និងប្រជាជនកម្ពុជា ដោយមានតាំងផ្ទាំងសិលាចារឹក នៅចំណុចអាងដាច់X16 «ដើមត្រយឹង» កាលពីជាង៤០ឆ្នាំមុន។

«ទិវាចងចាំនៃដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត» នឹងធ្វើឡើងជារៀងរាល់ឆ្នាំ ហើយរាល់ឯកសារនានារបស់សមមិត្ត ហ៊ុន សែន ពាក់ព័ន្ធនឹងដំណើរការតស៊ូលះបង់ជីវិត ដើម្បីជាតិមាតុភូមិត្រូវបានឆ្លាក់នៅវិមានឈ្នះ-ឈ្នះ ដើម្បីទុកឱ្យកូនចៅ ជំនាន់ក្រោយបានសិក្សារៀនសូត្រ និងចងចាំនូវព្រឹត្តិការណ៍មួយនេះ៕ ដោយ ៖ ប៉ែន សុផល

ខេត្តព្រះវិហារ ៖ ដីព្រៃរបស់រដ្ឋជាច្រើនហិកតា ស្ថិតក្នុងដែនជម្រកសត្វព្រៃបឹងពែរ ក្នុងឃុំរម្មណីយ៍ ស្រុករវៀង ខេត្តព្រះវិហារ ត្រូវបានប្រជាពលរដ្ឋលួចកាប់ទន្រ្ទាន យកធ្វើជាកម្មសិទ្ធិ ក្នុងគោល បំណងដាំដំណាំកសិកម្មផ្សេងៗ ត្រូវបានក្រុមការងារចម្រុះចុះបង្រ្កាប ធ្វើឲ្យក្រុមជនឈ្លៀតឱកាសគេចខ្លួន បន្សល់ទុកនូវសម្ភារជាច្រើននៅនឹងកន្លែង។

ប្រតិបត្តិការនេះ បានធ្វើឡើងនៅរសៀលថ្ងៃទី១៩ ខែមិថុនា ឆ្នាំ២០២០ ម្សិលមិញនេះ ដឹកនាំដោយលោក ហោ ប៊ុនហួរ អភិបាលរងរវៀង និងលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ និងមានការចូលរួម ពីសមត្ថកិច្ចចម្រុះជាច្រើនស្ថាប័នទៀតផង។

លោក ហ៊ ប៊ុនហួរ បានថ្លែងប្រាប់ឲ្យដឹង នៅថ្ងៃទី១៩ ខែមិថុនា ឆ្នាំ២០២០នេះថា ការចុះពិនិត្យ និងបង្រ្កាបករណីកាប់ទន្ទ្រានដីព្រៃ របស់រដ្ឋធ្វើជាកម្មសិទ្ធិនេះ គឺបន្ទាប់ពីលោកទទួលបានព័ត៌មានពីប្រជាពលរដ្ឋ ទើបលោកសហការជាមួយមន្ទីរបរិស្ថានខេត្តព្រះវិហារ ដឹកនាំសមត្ថកិច្ច ចុះទៅដល់ទីតាំងខាងលើ ជាក់ស្តែងតែម្តង។

លោកអភិបាលស្រុករវៀង បានថ្លែងបន្តថា បន្ទាប់ពីចុះដល់កន្លែងទីតាំងខាងលើ អ្វីដែលលោកមើលឃើញជាក់ស្តែង គឺដីត្រូវបានកាប់វាលជាច្រើនហិកតា មានសង់រោង និងឃើញមានកូនស្វាយចន្ទី ស្វាយកែវរមៀត និងដំណាំជាច្រើន ដើមទុកត្រៀមសម្រាប់ដាំទៀតផង។ លោកថា ចំពោះជនដែលបានប្រព្រឹត្ដបានរត់គេចខ្លួនបាត់ស្រមោលតែម្តង។

ទន្ទឹមនឹងនេះដែរ លោកអភិបាលស្រុកថា នឹងស៊ើបអង្កេតរកម្ចាស់ និងមេក្លោងនៅពីក្រោយ ដើម្បីចាត់ការតាមនិតិវិធី។ ហើយលោកក៏បាន អំពាវនាវឲ្យបងប្អូនប្រជាពលរដ្ឋ ត្រូវបញ្ឈប់សកម្មភាពការកាប់រុករានទន្រ្តានដីព្រៃ របស់រដ្ឋធ្វើជាកម្មសិទ្ធ ដែលជាអំពើខុសច្បាប់ ដែលនាំឲ្យមានទោសដល់ខ្លួន៕