ភ្នំពេញ ៖ លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទាបានគូស​បញ្ជាក់ថា គិតត្រឹមថ្ងៃទី២០ ខែកក្កដា ឆ្នាំ២០២០ ការបើកប្រាក់ឧបត្ថម្ភ ជូនប្រជាពលរដ្ឋ​ក្រីក្រ និងងាយរងគ្រោះក្នុងអំឡុងពេលវិបត្ដិជំងឺកូវីដ-១៩ របស់រាជរដ្ឋាភិបាលកម្ពុជា បាន​ចំនួនប្រមាណជា៥៣ម៉ឺនគ្រួសារ លើប្រមាណ៥៦ម៉ឺនគ្រួសារ។

ថ្លែងក្នុងសិក្ខាសាលា ស្តីពីនីតិវិធី និងដំណើរការនៃការអនុវត្តកម្មវិធីឧបត្ថម្ភសាច់​ប្រាក់ជូន​គ្រួសារក្រីក្រ និងជនងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ កាល​ពី​ព្រឹកថ្ងៃទី២០ ខែកក្កដា ឆ្នាំ២០២០ នៅទីស្ដីការក្រសួងសង្គមកិច្ច អតីតយុទ្ធជន និង​យុវនីតិ​សម្បទា លោក វង សូត បានក្រើនរម្លឹកដល់ប្រជាពលរដ្ឋ ក៏ដូចជាអាជ្ញាធរ​មូល​ដ្ឋាន សូមជូន​ដំណឹងដល់ប្រជាពលរដ្ឋតាមមូលដ្ឋាន ដែលនៅសេសសល់មិនទាន់​បាន​បើក​ប្រាក់ សូម​អញ្ជើញរួសរាន់មកបើកឱ្យបានមុនថ្ងៃកំណត់ សម្រាប់ជុំទី១នេះ ដែលបាន​អនុវត្ដន៍ ពីថ្ងៃទី​២៤ ខែមិថុនា ឆ្នាំ២០២០ ដល់ថ្ងៃទី២៤ ខែកក្កដា ឆ្នាំ២០២០។

លោករដ្ឋ​មន្រ្ដីបានបន្ដថា សម្រាប់ប្រជាពលរដ្ឋ ដែលធ្លាប់បានបើករួចហើយនៅខែមិថុនា(ជុំទី១) ក៏​សូមអញ្ជើញ​ទៅ​បើកជុំទី២ នៅថ្ងៃទី២៥ ខែកក្កដា រហូតដល់ថ្ងៃទី២៤ ខែសីហា ឆ្នាំ២០២០ ដែលនេះ​ជាការបើកក្នុងខែទី២ (ជុំទី២) របស់រាជរដ្ឋាភិបាលកម្ពុជា នៅតាមបណ្តាភ្នាក់ងារ​វីង​តែម្តង មិនចាំបាច់ទៅឃុំ សង្កាត់ទៀតទេ។

សូមបញ្ជាក់ថា ដើម្បីទទួលបានប្រាក់ឧបត្ថម្ភនេះ គ្រួសារក្រីក្រ និងងាយរងគ្រោះ ត្រូវមានប័ណ្ណសមធម៌ ដែលមានសុពលភាព ដោយឈរលើកម្រិតភាពក្រីក្រ ក្រ កម្រិត១ (ទីទ័លក្រ) ឬ ក្រកម្រិត២ (ក្រ) និងបានទៅផ្ទៀងផ្ទាត់បញ្ជីឈ្មោះ នៃកម្មវិធីឧបត្ថម្ភសាច់​ប្រាក់​ជូនគ្រួសារក្រីក្រ ក្នុងអំឡុងពេលប្រយុទ្ធប្រឆាំងជំងឺកូវីដ-១៩ នៅសាលាឃុំ សង្កាត់៕

ភ្នំពេញ ៖ ក្រសួងធនធានទឹក និងឧតុនិយម នៅថ្ងៃទី២១ ខែកក្កដា ឆ្នាំ២០២០នេះ បានចេញសេចក្តីជូនដំណឹង ស្តីពី ស្ថានភាពធាតុអាកាស ចាប់ពីថ្ងៃទី ២២ ដល់ថ្ងៃទី ២៩ ខែកក្កដា ឆ្នាំ ២០២០។

ក្រសួងធនធានទឹកបានបញ្ជាក់ថា តាមរយៈនៃការប្រែប្រួលជាបន្តបន្ទាប់ នៃស្ថានភាពអាកាសធាតុ សង្កេតឃើញថា ជ្រលងសម្ពាធទាប និងខ្យល់មូសុងនិរតីអូសបន្លាយ និងមានឥទ្ធិពលមធ្យមមកលើកម្ពុជា។

ស្ថានភាពបែបនេះធ្វើឲ្យ ៖

១៖ បណ្តាខេត្តនៅតំបន់វាលទំនាបកណ្តាល ៖
– សីតុណ្ហភាពអប្បបរមា មានពី ២៦-២៧°C
– សីតុណ្ហភាពអតិបរមា មានពី ៣២-៣៤°C ។
នឹងអាចមានភ្លៀងធ្លាក់រាយប៉ាយ ក្នុងកម្រិតពីតិចទៅច្រើន ជាមួយគ្នានោះក៏មានផ្នែកខ្លះអាចមានភ្លៀងធ្លាក់ខ្លាំង។

២៖ បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន ៖
– សីតុណ្ហភាពអប្បបរមា មានពី ២៣-២៥°C
– សីតុណ្ហភាពអតិបរមា មានពី ៣០-៣២°C ។
នឹងអាចមានភ្លៀងធ្លាក់រាយប៉ាយនៅក្នុងកម្រិតពីតិចទៅបង្គួរ ។

៣៖ បណ្តាខេត្តនៅតំបន់មាត់សមុទ្រ ៖
– សីតុណ្ហភាពអប្បបរមា មានពី ២៣-២៥°C
– សីតុណ្ហភាពអតិបរមា មានពី ២៩-៣១°C ។
នឹងអាចមានភ្លៀងធ្លាក់រាយប៉ាយនៅក្នុងកម្រិតពីខ្សោយទៅមធ្យម ។

ជាមួយគ្នានេះ សូមបងប្អូនប្រជាពលរដ្ឋ បង្កើនការប្រុងប្រយ័ត្នចំពោះ បាតុភូតផ្គរ រន្ទះ និងខ្យល់កន្ត្រាក់ ដែលនឹងអាចកើតមានជាយថាហេតុ៕

ភ្នំពេញ ៖ ព្រឹកថ្ងៃអង្គារ ១កើត ខែស្រាពណ៍ ឆ្នាំជូត ទោស័ក ពស.២៥៦៤ ត្រូវនឹងថ្ងៃទី២១ ខែកក្កដា ឆ្នាំ២០២០នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញចុះពិនិត្យការធ្វើស្រែ ព្រមទាំងសំណេះសំណាលជាមួយប្រជាកសិករនៅក្នុងស្រុកព្រៃកប្បាស ខេត្តតាកែវ។

តាមរយៈហ្វេសប៊ុក សម្តេចតេជោបានសរសេរថា ៖ «នៅព្រឹកថ្ងៃអង្គារ ទី២១ កក្កដា នេះ ខ្ញុំនឹងចុះទៅពិនិត្យមើលសកម្មភាពធ្វើស្រែបង្កបង្កើនផល និងសំណេះសំណាលជាមួយបងប្អូនប្រជាកសិករនៅក្នុងស្រុកព្រៃកប្បាស ខេត្តតាកែវ»។

សម្តេចបន្តថា ពិតណាស់ វិស័យកសិកម្ម គឺសំខាន់ខ្លាំងណាស់សម្រាប់ប្រជាពលរដ្ឋកម្ពុជាតាំងពីសម័យដូនតាយើងមកម៉្លេះ។ ប្រជាពលរដ្ឋខ្មែរស្ទើរទូទាំងប្រទេស សុទ្ធសឹងជាអ្នកប្រកបរបរកសិកម្ម។ ពេលនេះជាឱកាសល្អបំផុតក្នុងការជញរុញវិស័យកសិកម្មនៅទូទាំងប្រទេសអោយកាន់តែរីកចម្រេីន។

សម្តេចបន្តទៀតថា ខេត្តតាកែវគឺជាដែនដីដ៏មានសក្តានុពលមួយលើវិស័យកសិកម្ម។ កន្លងមកខេត្តតាកែវ បានជាប់ចំណាត់ថ្នាក់លេខ៣លើវិស័យកសិកម្ម បន្ទាប់ពីព្រៃវែង និងបាត់ដំបង។ ព្រឹកនេះ ខ្ញុំអាចនឹងចុះជួយស្ទូង និងច្រូតស្រូវជាមួយបងប្អូនប្រជាពលរដ្ឋយើង​ ប៉ុន្តែមិនច្រូតដោយដៃទៀតទេ​ គឺដោយគ្រឿងម៉ាស៊ីន​៕

ខេត្តបន្ទាយមានជ័យ ៖ ប្រជាពលរដ្ឋចំនួន៣១គ្រួសារមកពីសង្កាត់ភ្នៀតនិងឃុំសំបួរបានឡើងមកសាលាខេត្តបន្ទាយមានជ័យដើម្បីសុំឲ្យអាជ្ញាធរផ្តល់ប័ណ្ណក្រីក្រជូនពួកគាត់ខណៈពួកគាត់អ្នកក្រពិតអត់បណ្ណ័ឯអ្នកមានកំរិតមធ្យមមានបណ្ណ័ក្រីក្រ។
ការស្នើសុំនេះធ្វើឡើងនៅព្រឹក ថ្ងៃទី២០ ខែកក្កដា ឆ្នាំ២០២០នៅសាលប្រជុំសាលាខេត្ត។
លោក លី សារី អភិបាលរងខេត្តបានមានប្រសាសន៍ថាក្នុងនាមលោកជាអភិបាលរងខេត្តគាត់ទទួលស្គាល់ថាប្រជាពលរដ្ឋទាំង៣១គ្រួសារនេះមិនដឹងថាជាគ្រួសារក្រីក្រពិតប្រាកដរឺយ៉ាងណានោះទេ។លោកបានបន្តថាតែប្រជាពលរដ្ឋទាំង៣១គ្រួសារនេះក៏មិនត្រូវឡើងមកខេត្តសុំប័ណ្ណក្រីក្រពីខេត្តនោះដែរព្រោះសំអាងថា មេភូមិ មេ ឃុំ ចៅសង្កាត់ជាភ្នែកច្រមុះរបស់ខេត្តធ្វើអ្វីមួយពិតជាសុក្រិតត្រឹមត្រូវណាស់។លោកបានបន្តថាប្រជាពលរដ្ឋទាំង៣១គ្រួសារនេះគាត់និងទទួលយកទាំងអស់តែអំណោយចែកជូនតាមរយះសាខាកាកបាទក្រហមកម្ពុជាខេត្តវិញតែអារឿងសុំប័ណ្ណក្រីក្រនោះទុកឲ្យប្រធានមន្ទីរផែនការចុះធ្វើអត្តសញ្ញាណកម្មឲ្យបានពិតប្រកដសិន។គួបញ្ជាក់ផងដែរថាសម្តេចតេជោហ៊ុនសែននាយករដ្ឋមន្ត្រីនៃប្រទេសកម្ពុជាបានប្រកាសដាក់ឲ្យប្រើជាផ្លូវការនូវ “កម្មវិធីផ្តល់សាច់ប្រាក់ជូនប្រជាពលរដ្ឋដែលមានជីវភាព ក្រីក្រ និងងាយរងគ្រោះដោយសារផលប៉ះពាល់នៃជំងឺកូវីដ-១៩”។ ដើម្បីធានាថាបងប្អូនប្រជាពលរដ្ឋក្រីក្រដែលកំពុងជួបបញ្ហាលំបាកពិតប្រាកដទទួលបាននូវជំនួយឧបត្ថម្ភពីរាជរដ្ឋាភិបាល គឺធ្វើការងារធ្វើបច្ចុប្បន្នភាព គ្រួសារក្រីក្រ និងជនងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ នេះ។ដើម្បីធានាឲ្យបាននូវតម្លាភាព និងសុច្ចរិតភាព ក្នុងការផ្តល់សេវាសម្រាប់កម្មវិធីឧបត្ថម្ភសាច់ប្រាក់នេះ សម្តេចបានដាក់ចេញនូវបទបញ្ជាយ៉ាងម៉ឺងម៉ាត់ដល់អាជ្ញាធរមូលដ្ឋានគ្រប់លំដាប់ថ្នាក់ ពិសេសចំពោះអ្នកអនុវត្តផ្ទាល់នៅតាមឃុំសង្កាត់ទាំងអស់គឺត្រូវផ្តោតការយកចិត្តទុក ដាក់បំពេញការងារនេះឲ្យបានត្រឹមត្រូវ និងខ្ជាប់ខ្ជួនបំផុត គឺត្រូវចៀសវាងដាច់ខាតនូវការ
ឃុបឃិតគ្នាដាក់បញ្ចូលសាច់ញាត្តិបងប្អូនកូនក្មួយខ្លួនឯងដែលមិនមែនជាគ្រួសារក្រីក្រនឹងងាយរងគ្រោះពិតប្រាកដដើម្បីទទួល បាននូវប្រាក់ឧបត្ថម្ភនេះ។ចំណែកលោកស្រី ព្រំសុីណាត ប្រធានមន្ទីរផែនការខេត្តបាននិយាយថានៅថ្ងៃទី២១ ខែកក្កដា នេះ លោកស្រីនិងចុះធ្វើអត្តសញ្ញាណកម្មដល់ប្រជាពលរដ្ឋទាំង៣១គ្រួសារហើយ ខណៈដែលបានអះអាងថាជាគ្រួសារក្រីក្រពិតប្រាកដ។
សូមបញ្ជាក់ផងដែរថាលក្ខណ័ដែលទទួលបានប័ណ្ណក្រីក្រពិតនោះគឺប្រជាពលរដ្ឋ រស់នៅឯកកោគ្មានកូនទីពឹង គ្មានផ្ទះសម្បែងពិត មានជីវភាពតោកយ៉ាក ទើបជាប់ជាជនក្រីក្រពិតប្រាកដអាចទទួលបានប័ណ្ណក្រីក្រនេះបាន៕

ភ្នំពេញ ៖ គិតត្រឹមម៉ោង​៩ និង៣០ព្រឹក​ ថ្ងៃទី២០ ខែកក្កដា​ ឆ្នាំ២០២០​នេះ យើងពុំរកឃើញករណីជំងឺកូវីដ-១៩​ ថ្មី​ទេ​ ហើយក៏មិនមានជាសះស្បើយឡើយ ដូច្នេះចំនួនសរុបកូវីដ-១៩​ ចំនួន១៧១ នាក់ដដែល​ ចំនួនសំរាកនៅពេទ្យ៣៥នាក់​ ចំនួនជាសះស្បើយសរុប​ចំនួន១៣៦នាក់​ និងស្លាប់គ្មាន​។ នេះបើយោងតាមនាយកដ្ឋានប្រយុទ្ធនឹងជំងឺឆ្លង CDC។

ទោះបីបែបនេះក្តី CDC បានលើកឡើងថា ជំងឺកូវីដ-១៩​ នៅតែបន្តគម្រាមកំហែងយើងជាប់ជានិច្ច​ ដូច្នេះសូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ​ នៅឃ្លាតឆ្ងាយពីគ្នា​ មិនចេញក្រៅផ្ទះបើមិនចាំបាច់​ ព្រោះប្រទេសជិតខាងយើង និងពិភពលោកកំពុងបន្តរាតត្បាតជំងឺកូវីដ១៩​ ដ៏ខ្លាំងក្លានៅឡើយ​ ។ ទន្ទឹមនោះត្រូវបន្តអនុវត្តគម្លាតសង្គមបន្តទៀត​ ដូចជាពន្យារការរៀបអាពាហ៍ពិពាហ៍​ ពិធីជប់លៀង​ ការចាក់ធុងបាសរាំ​។ ត្រូវបន្តគម្លាតបុគ្គលបន្តទៀត​ ដូចជា​អង្គុយគម្លាតពីគ្នា​ ឈររង់ចាំគម្លាតពីគ្នា​ ឈរជជែកគ្នាគម្លាតពីគ្នា​។ ត្រូវបន្តពាក់ម៉ាស់នៅពេលចាំបាច់​ និងឧស្សាហ៍លាងដៃជាមួយសាប៊ូ​ អាល់កុល​ ឬជែល​។

សូមបញ្ជាក់ថា​ ប្រទេសកម្ពុជារកឃើញករណីជំងឺកូវីដ១៩ដំបូងបំផុតនៅថ្ងៃទី​២៧​ ខែមករា​ ឆ្នាំ២០២០​ ។ ទន្ទឹមនោះយើងបានធ្វើតេស្តចំនួន៥២៥០២នាក់ ស្មើនឹង​៣១៦២ ក្នុង១លាននាក់៕

ភ្នំពេញ ៖ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានគូសបញ្ជាក់ប្រាប់អ្នកយកព័ត៌មាននារសៀលថ្ងៃទី១៩ ខែកក្កដា ឆ្នាំ២០២០ថា រាល់អ្នកដែលល្មើសនឹងវិធានការចត្តាឡីស័ករបស់ក្រសួងសុខាភិបាល នឹងទទួលពិន័យ ឬទោសបញ្ញត្តិជាធរមាន។

លោកស្រីសង្កត់ធ្ងន់ថា ៖ “សម្រាប់បុគ្គលដែលត្រូវធ្វើចត្តាឡីស័កចំនួន ១៤ថ្ងៃ គឺចាំបាច់បំផុតត្រូវតែគោរពអនុវត្តវិធានការចត្តាឡីស័កនេះ ឱ្យបានហ្មត់ចត់ត្រឹមត្រូវ ទាំងជនជាតិខ្មែរ ទាំងជនបរទេសទាំងអស់ដែលរស់នៅ និងចូលមកកម្ពុជា។ ខ្ញុំសូមបញ្ជាក់ផងដែរថា  ប្រសិនបើមិនប្រតិបត្តិតាមវិធានការដែលក្រសួងសុខាភិបាលដាក់ចេញឱ្យអនុវត្តនោះទេ បុគ្គលដែលមិនគោរព និងមិនប្រតិបត្តិតាមវិធានការសុខាភិបាល ឫរត់គេចវេស ពីការអនុវត្តវិធានការនេះ ដោយចេតនា ឫអចេតនាក្តី នឹងត្រូវទទួលទោស ឫទទួលការផាកពិន័យ  ស្របតាមផ្លូវច្បាប់មានជាធរមាននៅកម្ពុជា ដូចជាអនុក្រឹត្យលេខ១២៩ អនក្រ.បក ចុះថ្ងៃទី១៧ ខែកញ្ញា ឆ្នាំ២០១៥  ស្តីពី វិធានការសុខាភិបាលដើម្បីទប់ស្កាត់ និងឆ្លើយតបការឆ្លងរាលដាលជាអន្តរជាតិ នៃជំងឺនៅតាមច្រកចេញចូល ជាដើម” ។

គួររម្លឹកថា ពេលថ្មីៗនេះ ស្ត្រីជនជាតិខ្មែរ-អាមេរិកម្នាក់ បានរត់គេចខ្លួនពីកន្លែងចត្តាឡីស័ក ហើយបានទៅពួនសម្ងំនៅសណ្ឋាគារមួយនៅខេត្តកំពង់ចាម និងត្រូវបានអាជ្ញាធរមានសមត្ថកិច្ចនៅទីនោះរកឃើញ ហើយក៏ចាប់ផ្តើមបន្តអនុវត្តវិធានការចត្តាឡីស័កនៅខេត្តកំពង់ចាមតែម្តង ហើយសំណាករបស់ស្រ្តីរូបនេះ ត្រូវបានក្រុមឆ្លើយតបបន្ទាន់នៃក្រសួងសុខាភិបាល បានយកទៅធ្វើតេស្តវិភាគនៅវិទ្យាស្ថានជាតិប៉ាស្ទ័រ រួចរាល់ដែរ ដោយរង់ចាំតែលទ្ធផលប៉ុណ្ណោះ។ ចំពោះពាក់ព័ន្ធនឹងការផាកពិន័យ និងទទួលទោសបែបណាចំពោះស្ត្រីរូបនេះនៅពុំទាន់ទទួលបានការឆ្លើយតបនៅឡើយទេ ដោយត្រូវរង់ចាំវិធានចត្តាឡីស័ករួចរាល់សិន៕

ភ្នំពេញ ៖ លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត បានកត់ សម្គាល់ថា សិទ្ធិរបស់ជនជាតិដើមភាគតិច ត្រូវបានគោរព ចំពោះសេរីភាពនៅក្នុងការបោះឆ្នោត ។ 

ជនជាតិដើមភាគតិច មានសិទ្ធិដូចពលរដ្ឋធម្មតា ក្នុងការចុះឈ្មោះបោះឆ្នោត បោះឆ្នោត ប្រសិនបើពួកគាត់មានឯកសារត្រឹមត្រូវតាមច្បាប់។ ការបញ្ជាក់នេះត្រូវបានធ្វើឡើងនៅក្នុងឱកាសសំណេះសំណាល ជាមួយមន្ត្រីលេខាធិការដ្ឋាន រៀបចំការបោះឆ្នោត ខេត្តរតនគិរី នៅរសៀលថ្ងៃទី១៧ កក្កដានេះ៕

ខេត្តព្រៃវែង ៖ ល្បឿនការងារបង្ករបង្កើនផលរដូវវស្សា ឆ្នាំ២០២០ សម្រាប់ខេត្តព្រៃវែង មកទល់ថ្ងៃទី១៦ ខែកក្កដា សម្រេចព្រួសបានសរុបជាង ២០ម៉ឺន ហិកតា ស្មើនឹង ៨០.០៦% ។ ក្នុងនេះ ស្រូវស្រាលសម្រេចបាន ៥៧ ៤៣១ ហិកតា, ស្រូវកណ្ដាល ជាង១១ម៉ឺន ហិកតា និងស្រូវធ្ងន់ ៣១ ៦៤៧ ហិកតា ។ នេះបើតាមប្រធានមន្ទីរកសិកម្មខេត្ត។

កសិករបានប្រមូលផលស្រូវស្រាលដើមរដូវវស្សាបានជាបណ្តើរៗ ដោយគិតមកត្រឹម ថ្ងៃទី១៣ ខែកក្ដដា ឆ្នាំ២០២០ គឺសម្រេចប្រមូលផលស្រូវបានសរុបចំនួន ១១ ៣២២ ហិកតា ទទួលបានបរិមា ណផលសរុបចំនួន ៤៣ ៣០៤ តោន ដែលទិន្នផលជា មធ្យមចំនួន ៣.៨២ តោនក្នុងមួយហិកតា។ ដោយឡែកដំណាំសាកវប្បកម្មសម្រេចបានសរុបចំនួន ៩៦២ ហិកតា, ក្នុងនេះមានបន្លែគ្រប់មុខ ៩៤២ ហិកតា, ម្ទេសគ្រប់មុខ ៨ ហិកតា, ពោតស ៦ ហិកតា និងឪឡឹក ៦ ហិកតា។ ចំពោះការនាំស្រូវចេញទៅប្រទេសវៀណាមគិតចាប់ពីថ្ងៃទី២២ ខែឧសភា ដល់ថ្ងៃទី១៣ ខែកក្ដដា ឆ្នាំ២០២០ សម្រេចបានសរុបចំនួន ៩៣ ២៥៨ តោន (តម្លៃស្រូវ IR504 = ៨៩០ រៀល និងតម្លៃស្រូវ OM5451 = ៨១០ រៀល)។ដោយឡែកសម្រាប់ខែនេះគិតត្រឹមថ្ងៃទី០១ កក្តដា ឆ្នាំ២០២០ ដល់ថ្ងៃទី១៥ ខែកក្កដា ឆ្នាំ២០២០ សម្រេចនាំចេញស្រូវទៅកាន់ប្រទេសបានសរុបចំនួន ៣៥ ២៥៣ តោន ។ សរុបរួមបូកយោងចាប់ពីថ្ងៃទី២២ខែ មិថុនា ឆ្នាំ២០២០ ដល់ថ្ងៃទី១៥ខែ កក្តដា ឆ្នាំ២០២០ សម្រេចបានចំនួន ១២ម៉ឺន ៨ ៥១១ តោន៕