ភ្នំពេញ ៖ ខ្លោចចិត្តក្មេងប្រុសអាយុទើបតែ១ខួបម្នាក់បានដេកជាមួយបងប្អូនប្រុសស្រីបីនាក់ទៀតរមៀលធ្លាក់ពីលើផ្ទះចូលប្រឡាយទឹកស្អុយបឹងត្របែកបណ្ដាលឲ្យលង់ស្លាប់យ៉ាងអាណោចអាធ័មហេតុការណ៏ភ្ញាក់ផ្អើលនេះបានកើតឡើងកាលពីវេលាម៉ោង៩ព្រឹក ថ្ងៃទី០៤ ខែមិថុនា ឆ្នាំ២០២០ ស្ថិតសំណង់មិនរៀបរយនៅភូមិ៥ ក្រុម ៣១ សង្កាត់ផ្សារដើមថ្កូវខណ្ឌចំការមនរាជធានីភ្នំពេញ។

សពក្មេងប្រុសរងគ្រោះមានឈ្មោះរិន ធារិទ្ធអាយុមួយឆ្នាំរស់នៅជាមួយឪពុកស្នាក់នៅជាមួយម្ដាយមុីងទីតាំងកើតហេតុ។ មានឪពុកឈ្មោះ រិន ពិសិទ្ធ អាយុ ៤១ ឆ្នាំមុខរបររើសអេតចាយនិងម្ដាយឈ្មោះរស់ ភា អាយុ៣៩ឆ្នាំ សព្វថ្ងៃជាប់ពន្ធនាគារនៅព្រៃស។

តាមសម្ដីឪពុកបានឲ្យដឹងថាមុនពេលកើតហេតុគាត់បានក្រោកតាំងពីវេលាម៉ោង២ដើររើសអេតចាយទុកអោយកូនដេកជាមួយបងប្អូន៣នាក់ទៀតក្រោយពីត្រលប់មកពីរើសអេតចាយវិញក៏បាត់កូនប្រុសអាយុ១ឆ្នាំម្នាក់ក៏ដើររកប្រទះឃើញកូនធ្លាក់តាមប្រលោះជញ្ជាំងផ្ទះធ្លាក់នៅក្រោមចូលប្រឡាយទឹកស្អុយស្លាប់បាត់បង់អាយុជីវិតទៅហើយបង្កឱ្យមានការភ្ញាក់ផ្អើលកើតឡើងនឹងប្រញាប់រាយការណ៍ជូនសមត្ថកិច្ចចុះមកកន្លែងកើតហេតុ។

ក្រោយកើតហេតុសមត្ថកិច្ចមូលដ្ឋានបានចុះមកឲ្យទីតាំងកន្លែងកើតហេតុនិងធ្វើការទំនាក់ទំនងទៅសមត្ថកិច្ចជំនាញផ្នែកកោសល្យវិច័យចុះមកកន្លែងកើតហេតុដើម្បីធ្វើកោសល្យវិច័យសពរួចបានបញ្ជាក់ឲ្យដឹងថាក្មេងប្រុសខាងលើពិតជាស្លាប់ដោយសារលង់ទឹកពិតប្រាកដមែនរួចធ្វើកំណត់ហេតុប្រគល់សពឲ្យសាច់ញាតិយកធ្វើបុណ្យតាមប្រពៃណី៕

ភ្នំពេញ ៖ ក្នុងខែឧសភា នេះ  មានពលរដ្ឋចំនួនសរុប ១១.៧៨១ នាក់ទៅទទួលសេវាប្រឡង ប្តូរ និងពន្យារបណ្ណបើកបរយានយន្ត នៅមណ្ឌលផ្តល់បណ្ណបើកបរនៅផ្សារទំនើបអ៊ីអន១ និងអ៊ីអន២ ខណ:បានផ្លាស់ប្តូរម៉ោងធ្វើការទៅធម្មតាវិញហើយពីម៉ោង៩:០០ព្រឹក-១០:០០យប់ ចាប់ពីថ្ងៃទី០១ មិថុនា រៀងរាល់ថ្ងៃ។

សម្រាប់អគ្គនាយកដ្ឋានដឹកជញ្ជូនផ្លូវគោក ចាប់ពីថ្ងៃចន្ទ ដល់ថ្ងៃសៅរ៍ ចាប់ពីម៉ោង ០៨:០០ព្រឹក ដល់ម៉ោង ០៥:០០ល្ងាច។ សម្រាប់បងប្អូនប្រជាពលរដ្ឋមានបំណងចង់ប្តូរ និងពន្យារបណ្ណបើកបរ ត្រូវមានឯកសារដូចជា៖

១.អត្តសញ្ញាណប័ណ្ណសញ្ជាតិខ្មែរ

២.លិខិតបញ្ជាក់កាយសម្បទា(អាចធ្វើនៅទីតាំងផ្ទាល់)

៣.រូបថត ៤x៦ ផ្ទៃពណ៌ស ៣សន្លឹក(ថតនៅទីតាំងផ្ទាល់)

៤. ពាក្យបណ្តឹងបាត់បណ្ណបើកបរបញ្ជាក់ពីប៉ុស្តិ៍រដ្ឋបាល(ក្នុងករណីបាត់បណ្ណបើកបរ)៕

ភ្នំពេញ ៖ នៅព្រឹកថ្ងៃទី០៤ ខែមិថុនាឆ្នាំ២០២០នេះ សម្ដេចអគ្គមហាពញ្ញាចក្រី ហេង សំរិន ប្រធានរដ្ឋសភាកម្ពុជា បានអញ្ជើញដឹកនាំកិច្ចប្រជុំពេញអង្គរដ្ឋសភា ដើម្បីពិភាក្សា និងអនុម័ត លើសេចក្តីព្រាងច្បាប់ចំនួន៤ ដែលស្នើដោយរាជរដ្ឋាភិបាល ដោយមានការចូលរួមពីតំណាង រាស្ត្រ១១៨រូប ព្រមទាំងមានតំណាងរាជរដ្ឋាភិបាលផងដែរ។

របៀបវារៈនៃកិច្ចប្រជុំសភាពេញអង្គនេះមាន ៖ ទី១៖ ការពិភាក្សា និងអនុម័តសេចក្តីព្រាងច្បាប់ ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ។ ទី២៖ ការពិភាក្សា និងអនុម័ត សេចក្តីព្រាងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។ ទី៣៖ ការពិភាក្សា និងអនុម័តសេចក្តីព្រាងច្បាប់ស្តីពី ការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ និង ទី៤៖ ការពិភាក្សា និងអនុម័តសេចក្តីព្រាងច្បាប់ ស្តីពីការអនុម័តយល់ព្រមឱ្យព្រះរាជា ណាចក្រកម្ពុជា ចូលជាភាគីនៃអនុសញ្ញាទីក្រុងប៊ែន ស្តីពីកិច្ចការពារស្នាដៃអក្សរសាស្រ្ត និងសិល្បៈ ឆ្នាំ១៨៨៦ និងវិសោធនកម្មឆ្នាំ១៩៧៩៕

ភ្នំពេញ ៖ ក្នុងដំណាក់កាលនៃការរីករាលដាលសកលនៃមេរោគកូវីដ-១៩ ក្នុងរយៈពេល ៥ខែ ដើម​ឆ្នាំ២០២០នេះ កម្ពុជាបានធ្វើការនាំចេញផលិតផលកសិកម្មមួយចំនួន ក្រៅពីអង្ករ និងស្រូវ គឺមានការកើនឡើងខ្ពស់ ក្នុងនោះ ចំណិតដំឡូងមីក្រៀមនាំចេញបាន ៩៩៦,២៩០ តោន កើន​ឡើងប្រមាណ ៨៨, ២៩០ តោន ស្មើនឹង ៩,៧២ភាគរយ ដែលធៀប​ទៅនឹងរយៈ៥ខែ ដើមឆ្នាំ២០១៩ មានចំនួនតែ ៩០៨, ០០០ តោនប៉ុណ្ណោះ។ នេះបើយោងតាមការបញ្ជាក់​របស់​លោក វេង សាខុន រដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទតាមរយៈ​ផេកហ្វេសប៊ុកផ្លូវការ នាថ្ងៃទី០៣ ខែមិថុនា ឆ្នាំ២០២០។

លោក វេង សាខុន បានគូសបញ្ជាក់ថា យោងតាមលទ្ធផលនៃការនាំចេញ​ផលិត​ផលកសិកម្មមួយចំនួន ក្រៅពីអង្ករ និងស្រូវ ដែលបានឆ្លងកាត់ការត្រួតពិនិត្យភូតគាម​អនាម័យ​នៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ក្នុងរយៈ​ពេល ៥ខែ ដើមឆ្នាំ២០២០ សម្រេចបាននូវផលិតផលមួយចំនួន ដូចជា ម្សៅដំឡូង​មី​នាំ​ចេញបាន ១០, ២៧២ តោន ថយចុះប្រមាណ ៣៧១ ៤២៨ តោន ស្មើនឹង ៩៧,៣០​ភាគរយ ដែលធៀបទៅនឹងរយៈ៥ខែ ដើមឆ្នាំ២០១៩ មានចំនួន៣៨១,៧០០តោន។

គ្រាប់ស្វាយចន្ទីនាំចេញបាន ១៩០, ១៤១ តោន កើនឡើងប្រមាណ ៣៨, ៥៨១ តោន កើន​ឡើង ២៥,៤៦ភាគរយ ដែលធៀបទៅនឹងរយៈ៥ខែ ដើមឆ្នាំ២០១៩ មានចំនួនតែ ១៥១, ៥៥០ តោនប៉ុណ្ណោះ។ ចំពោះគ្រាប់ពោតនាំចេញ​បាន ៣៥, ៦៣៦ តោន ថយចុះប្រមាណ ១៥ ០៤៣ តោន ស្មើនឹង ២៩,៦៨ភាគរយ ដែលធៀបទៅនឹងរយៈ៥ខែ ដើមឆ្នាំ២០១៩ មានចំនួន ៥០, ៦៧៩ តោន។

លោករដ្ឋមន្រ្ដីបានកត់សម្គាល់ឃើញថា សម្រាប់ផ្លែចេកស្រស់នាំចេញបាន ១២១, ៤១៥ តោន កើនឡើងប្រមាណ ៧៦, ៨៩៧ តោន ស្មើនឹង ១៧២,៧៣ភាគរយ ដែលធៀបទៅនឹងរយៈ៥ខែ ដើមឆ្នាំ២០១៩ មានចំនួនតែ ៤៤, ៥១៨ តោនប៉ុណ្ណោះ។

ជាមួយគ្នានេះ ផ្លែស្វាយស្រស់នាំចេញបាន ៤៤, ០៩៩ តោន កើនឡើងប្រមាណ ១៤, ៨៨៥ តោន ស្មើនឹង ៥០,៩៥ភាគរយ ដែលធៀបទៅនឹងរយៈ៥ខែ ដើមឆ្នាំ២០១៩ មាន ចំនួនតែ ២៩, ២១៤ តោនប៉ុណ្ណោះ។ ដោយឡែក សម្រាប់ផលិតផល ម្រេចនាំចេញបាន ២, ៥២៧ តោន កើនឡើងប្រមាណ ៤៦៦ តោន ស្មើនឹង ២២,៦១ភាគរយ ដែលធៀបទៅ​នឹងរយៈ៥ខែ ដើមឆ្នាំ២០១៩ មានចំនួនតែ ២០, ០៦១ តោនប៉ុណ្ណោះ៕

ភ្នំពេញ ៖ រចនាសម្ព័ន្ធនៃមន្ទីរសុខាភិបាលខេត្ត រាជធានីបច្ចុប្បន្ន ត្រូវបានផ្ទេរទៅឲ្យស្ថិតក្រោមរចនាសម្ព័ន្ធគ្រប់គ្រងរបស់រដ្ឋបាលរាជធានី ខេត្ត ចាប់ពីឆ្នាំ២០២០ នេះតទៅ។ រាជរដ្ឋាភិបាល ផ្ទេរថវិកាចំនួនជាង១៦៦លានដុល្លារ ទៅកាន់រដ្ឋបាលខេត្ត រាជធានី ដើម្បីដំណើរការអភិវឌ្ឍមូលដ្ឋានដោយខ្លួនឯង(ស្វយ័តភាព)។

នៅក្នុងពិធីប្រកាសផ្សព្វផ្សាយ និងដាក់ឲ្យដំណើរការមន្ទីរសុខាភិបាល នៃរដ្ឋបាលរាជធានី ខេត្ត នាព្រឹកថ្ងៃពុធនេះ សម្តេចក្រឡាហោម ស ខេង រដ្ឋ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប)បានបញ្ជាក់ថា ការផ្ទេការគ្រប់គ្រងបែបវិមជ្ឈការពីក្រសួងសុខាភិបាល ទៅឲ្យខេត្ត រាជធានី គ្រប់គ្រងដោយផ្ទាល់នៅពេលនេះ ធ្វើឲ្យមន្ទីរពេទ្យបង្អែកខេត្តចំនួន២៥ ការរិយាល័យសុខាភិបាលស្រុកប្រតិបត្តិចំនួន១០៣ មន្ទីរពេទ្យបង្អែកស្រុក ក្រុងចំនួន៩២ មណ្ឌលសុខភាពចំនួន១២២១ និងប៉ុស្តិ៍សុខភាពចំនួន១២៧ ត្រូវបានផ្ទេរទៅក្រោមការគ្រប់គ្រងរបស់រដ្ឋបាលខេត្ត រាជធានី។

ក្រសួងសុខាភិបាល ក៏បានផ្ទេរបុគ្គលិកចំនួន ២០១២៤នាក់ ក្នុងនោះមានគ្រូពេទ្យចំនួនជាង ១៧ ០០០នាក់ បុគ្គលិករដ្ឋបាលជិត៣ពាន់នាក់ និងបុគ្គលិកជាប់កិច្ចសន្យាចំនួនជិត៣ពាន់ដែរ។ ក្រៅពីនេះ ថវិកាចំនួន១៦៦,៥លានដុល្លារ ក៏ត្រូវបានផ្ទេរទៅកាន់រដ្ឋបាលខេត្ត រាជធានីដូចគ្នាដែរ។

សម្ដេចក្រឡាហោមបានគូសបញ្ជាក់ថា លេខាធិការដ្ឋាន គ.ជ.អ.ប. ត្រូវបន្តសម្របសម្រួលជាមួយក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ ដើម្បីពន្លឿនការផ្ទេរទ្រព្យសម្បត្តិនានាពាក់ព័ន្ធនឹងមុខងារសេវាសុខាភិបាលដែលបានប្រគល់ទៅឱ្យរដ្ឋបាលរាជធានី ខេត្តឱ្យបានរួចរាល់នៅក្នុងឆ្នាំ២០២០នេះ។ សម្ដេចក្រឡាហោម បានណែនាំឲ្យក្រុមប្រឹក្សា និង រដ្ឋបាលរាជធានី ខេត្តត្រូវគ្រប់គ្រង ចាត់ចែង និងប្រើប្រាស់ធនធានមនុស្ស និងថវិកា ដែលបានផ្ទេរទៅឱ្យរដ្ឋបាលរាជធានី ខេត្តសាមីនីមួយៗ ប្រកបដោយតម្លាភាពស្របតាមគោលការណ៍បែបបទ និងនីតិវិធី ដែលបានកំណត់ ដើម្បីលើកកម្ពស់គុណភាពនិងបរិមាណនៃការផ្តល់សេវាសុខាភិបាលជូនប្រជាពលរដ្ឋ។

សម្តេចក្រឡាហោម បានគូសបញ្ជាក់បន្ថែមដែរថា រាជរដ្ឋាភិបាល នឹងបន្តសិក្សាអភិវឌ្ឍន៍រៀបចំរាជធានីភ្នំពេញ ឱ្យក្លាយទៅជារដ្ឋបាលពិសេសមួយ ដែលតម្រូវឱ្យមានរចនាសម្ព័ន្ធដោយឡែក និងមានប្រព័ន្ធគ្រប់គ្រងតាមបច្ចេកទេសព័ត៌មានទំនើប ដើម្បីធានាដល់ការគ្រប់គ្រង ការចាត់ចែងនិងការផុ្តល់សេវាសាធារណៈ និងការអភិវឌ្ឍសេដ្ឋកិច្ចក្នុងការឆ្លើយតបទៅនឹងតម្រូវការរបស់ប្រជាជនដែលកំពុងមានការកើនឡើង។ រាជរដ្ឋាភិបាលដែលមានក្រសួងមហាផ្ទៃជាសេនាធិការក៏កំពុងសិក្សាលើជម្រើសនានា ដើម្បីកំណត់នូវសក្តានុពលនៃ ខេត្ត ឬក្រុង មួយចំនួនដែលអាចរៀបចំឱ្យក្លាយទៅជារដ្ឋបាលស្វយ័តសម្រាប់ពេលអនាគតផងដែរ៕

ភ្នំពេញ៖​ រដ្ឋលេខាធិការ​ក្រសួង​សុខាភិបាល​ លោក​ស្រី យក់ សម្បត្ដិ បាន​ប្រាប់​សារព័ត៌មានក្នុងស្រុកនៅ​ថ្ងៃទី៣ ខែមិថុនា​នេះ ​ថា អ្នក​ដំណើរ​មកពី​ក្រៅ​ប្រទេស​នានា ត្រូវ​រៀបចំឱ្យ​ទៅ​កន្លែង​ពិនិត្យ​នៅ​ទីតាំង​វិទ្យាល័យ ហ៊ុន សែន ជម្ពូវ័ន។

លោក​ស្រី យក់ សម្បត្តិ បាន​បន្ត​ទៀត​ថា មន្ត្រី​ក្រុម​ការងារ​អន្តរក្រសួងបាន​ធ្វើ​ការងារ​ជាមួយ​សាលា​រាជធានី​ភ្នំពេញ ទៅ​ពិនិត្យ​ទីតាំង​វិទ្យាល័យ ហ៊ុន សែន ជម្ពូវ័ន កាលពី​ម្សិលមិញ​រួច​ហើយដើម្បី​ត្រៀម​រៀបចំ​ទទួល​អ្នក​ដំណើរ​មក​ពី​បណ្ដា​ប្រទេស​នានា ក្នុង​នោះ មាន​ពលករ​ខ្មែរ​ធ្វើការ​នៅ​ប្រទេស​កូរ៉េ​ផង​ដែរ ដោយ​ក្នុងចំណោម ៦ ជើង​ហោះហើរ​នៅ​ថ្ងៃ​នេះ។

ដើម្បី​ការពារ​ទប់ស្កាត់​ជំងឺ COVID-19 ចូល​មក​កម្ពុជា ដោយ​កន្លង​មក​អ្នក​ជំងឺ COVID-19 សុទ្ធសឹងតែ​ជា​ករណី​នាំ​ចូល ក្រសួង​សុខាភិបាល និង​ស្ថាប័ន​ពាក់ព័ន្ធ​ បាន​ត្រៀម​វិទ្យាល័យ ហ៊ុន សែន ជម្ពូវ័ន មួយ​កន្លែង​បន្ថែម​ទៀត សម្រាប់​ត្រួត​ពិនិត្យ​សុខភាព​អ្នក​ដំណើរ​ពី​ក្រៅ​ប្រទេស ត្រលប់​ចូល​មក​កម្ពុជា​វិញ តាម​អាកាសយានដ្ឋាន​អន្តរជាតិ​ភ្នំពេញ។

កន្លង​មក​នៅ​រាជធានី​ភ្នំពេញ​ មាន​កន្លែង​ត្រួត​ពិនិត្យ​សុខភាពនៅ​ក្នុង​ទ័ពអាកាស ជាប់​អាកាសយានដ្ឋាន​អន្តរជាតិ​ភ្នំពេញ ដែល​មាន​ចំនួន ១០០គ្រែ និង​មណ្ឌល​សុខភាព​នៅ​ចាក់​អង្រែក្រោម​ចំនួន ១០០គ្រែ ហើយ​សម្រាប់​វិទ្យាល័យ ហ៊ុន សែន ជម្ពូវ័ន មាន​ចំនួន ២០០គ្រែ។ ដូចនេះ​ចំនួន​សរុប​មាន​ចំនួន ៤០០គ្រែ សម្រាប់​ទទួល​អ្នក​ដំណើរ ដែល​ត្រូវ​មក​ពិនិត្យ​សុខភាព៕

ខេត្តកំពង់ចាម ៖ គិតត្រឹមខែ ឧសភា ឆ្នាំ២០២០ ស្ពានស្ទឹងត្រង់-ក្រូចឆ្មារ សម្រេចការសាងសង់បាន៨៧,៥ % ហើយគ្រោងបញ្ចប់ ក្នុងខែមីនា ឆ្នាំ២០២១ នេះ។ នេះតាមក្រសួងសាធារណ​ការ និងដឹកជញ្ជូន។

ស្ពានតភ្ជាប់ពី ស្រុកស្ទឹងត្រង់ (ខេត្តកំពង់ចាម) ទៅស្រុកក្រូចឆ្មារ (ខេត្តត្បូងឃ្មុំ) សម្រេចការសាងសង់បាន ៨៧,៥% គម្រោងនឹងរួចរាល់មុនកាលកំណត់ គឺក្នុងខែមីនា ឆ្នាំ២០២១ (កាលកំណត់ក្នុងខែឧសភា ឆ្នាំ២០២១) ហើយស្ពានអាចតភ្ជាប់រួចរាល់នៅខែធ្នូ ឆ្នាំ២០២០ ខាងមុខនេះ ។ ស្ពាននេះនឹងចូលរួមចំណែកយ៉ាងសំខាន់ ដើម្បីតភ្ជាប់ទំនាក់ទំនងការដឹកជញ្ជូន និងការធ្វើដំណើរបស់បងប្អូនប្រជាពលរដ្ឋខេត្តកំពង់ចាម និងខេត្តឃ្មុំ ដែលរស់នៅយ៉ាងច្រើនកុះករ នៅត្រើយខាងកើត និងត្រើយខាងលិច ទន្លេមេគង្គ ឱ្យបានងាយស្រួល និងឆាប់រហ័ស។

សូមបញ្ជាក់ថា ស្ពាននេះមានប្រវែងសរុប ១.១៣១ ម និង ទទឹង ១៣,៥០ ម ជាប្រភេទស្ពានបេតុងសរសៃដែក ហើយត្រូវបានបើកការដ្ឋានកាលពីថ្ងៃទី៩ ខែកុម្ភៈ ឆ្នាំ២០១៨ ដោយគ្រោងចំណាយថវិកាសរុប ៥៦,៩៩៨ លានដុល្លារសហរដ្ឋអាមេរិក(ជាងហាសិបប្រាំមួយលាន) និងប្រើប្រាស់រយៈពេលសាងសង់ចំនួន៤២ខែ៕

ភ្នំពេញ ៖ រដ្ឋបាលរាជធានីភ្នំពេញ នៅថ្ងៃទី១ ខែមិថុនា ឆ្នាំ២០២០នេះ បានជូនដំណឹង ដល់ប្រជាពលរដ្ឋ ធ្វើដំណើរឆ្លងកាត់ ចំណុចការដ្ឋាន សាងសង់ស្ពានអាកាសនិងផ្លូវក្រោមដីចោមចៅ ឲ្យដឹងអំពីការពង្វាងចរាចរណ៍រយៈ ពេល៦០ថ្ងៃចាប់ពីថ្ងៃទី២ខែមិថុនាដល់ថ្ងៃទី៣១កក្កដាឆ្នាំ២០២០ ដើម្បីធ្វើការសាងសង់ ភ្ជាប់ផ្នែកកណ្តាល នៃផ្លូវក្រោមដី ។

ខ្លឹមសារនៃសេចក្តីជូនដំណឹង របស់រដ្ឋបាលរាជធានីភ្នំពេញ ក្នុងការការពង្វាងចរាចរណ៍ នៅការដ្ឋានសាងសង់ស្ពានអាកាស និងផ្លូវក្រោមដីចោមចៅនោះបានសរសេរថា៖ សូមជម្រាបជូនដំណឹងដល់បងប្អូនប្រជាពលរដ្ឋ ដែលធ្វើដំណើរឆ្លងកាត់ទីតាំងការដ្ឋានសាងសង់ស្ពានអាកាស និងផ្លូវក្រោមដីចោមចៅ មេត្តាជ្រាបថា គិតត្រឹមថ្ងៃទី២៩ ខែឧសភា ឆ្នាំ២០២០ លទ្ធផលនៃការ សាងសង់ស្ពានអាកាស និងផ្លូវក្រោមដីចោមចៅសម្រេចបាន ៤១% នៃគម្រោង ដែលតាមផែនការនឹងបញ្ចប់ការសាងសង់នៅចុង ឆ្នាំ២០២១ ខាងមុខ ។ ក្នុងខណៈពេលនេះ ដំណើរការ ការដ្ឋានឈានដល់ដំណាក់កាលសាងសង់ភ្ជាប់ផ្លូវក្រោមដី ដែលផ្នែកសងខាងនៃផ្លូវក្រោមដីបានស្ថាបនារួចហើយចាំបាច់ត្រូវបិទ ចរាចរ តភ្ជាប់ពីមហាវិថីសហព័ន្ធរុស្ស៊ី និងផ្លូវជាតិលេខ៤ មកផ្លូវវេងស្រេង ដើម្បីសាងសង់ភ្ជាប់ផ្នែកកណ្តាលនៃផ្លូវ ក្រោមដី នេះ ។

ក្នុងផែនការបិទពង្វាងចរាចរណ៍នេះ មានរយៈ ពេល ៦០ ថ្ងៃ នឹងត្រូវចាប់ផ្តើមពីថ្ងៃទី០២ ខែមិថុនា ឆ្នាំ ២០២០ វេលាម៉ោង ៨:០០ នាទី ព្រឹក តទៅ ដល់ថ្ងៃទី ៣១ ខែកក្កដាឆ្នាំ២០២០។ អាស្រ័យហេតុនេះ រដ្ឋបាលរាជធានីភ្នំពេញ ស្នើសុំបងប្អូនប្រជាពលរដ្ឋមេត្តាយោគយល់អធ្យាស្រ័យ និងសូមធ្វើការពង្វាងចរាចរណ៍តាមតម្រាយផ្លូវដូចខាងក្រោម ៖

ភ្នំពេញ ៖ ក្រសួងការបរទេស និងកិច្ចសហប្រតិបត្តិការអន្តរជាតិកម្ពុជា បានកោះហៅលោក Vu Quang Minh ឯកអគ្គរដ្ឋទូតវៀតណាមប្រចាំនៅកម្ពុជា មកប្រាប់អំពីរឿងយោធាវៀតណាម បោះតង់ នៅតំបន់ព្រំដែនដែលមិនទាន់ឯកភាពគ្នា នាព្រំដែនខេត្តកណ្តាល។ ទន្ទឹមនោះក៏បានស្នើតាមរយៈអគ្គរដ្ឋទូតវៀតណាម ឲ្យរុះរើតង់យោធាទាំងនោះឲ្យបានឆាប់ជាទីបំផុត។ នេះបើតាមសេចក្តីប្រកាសរបស់ក្រសួងការបរទេស។

ក្រសួងការបរទេសបានបញ្ជាក់ថា ការកោះអញ្ជើញអគ្គរដ្ឋទូតវៀតណាមមកជួបនេះ បានធ្វើឡើងដោយលោកស្រី អ៊ាត សោភា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ដោយកម្ពុជាបានស្នើឲ្យភាគីវៀតណាម រុះរើតង់ចេញទាំងអស់ឲ្យបានឆាប់ ហើយបន្តរក្សាស្ថានភាពដើមមិនកែប្រែក្នុងតំបន់នោះ រហូតដល់គណៈកម្មការព្រំដែននៃប្រទេសទាំងពីរ ដោះស្រាយកំណត់ខ្សែព្រំដែនជាក់លាក់ជាស្ថាពរនៅតំបន់នោះ ដើម្បីប្រែក្លាយតំបន់ព្រំដែនប្រកបដោយសន្តិភាព មិត្តភាព សហប្រតិបត្តិការ និងការអភិវឌ្ឍជាប្រយោជន៍រួមសម្រាប់ ប្រជាជននៃប្រទេសទាំងពីរ។

សូមបញ្ជាក់ថា សម្រាប់វិធានការរឹតបន្តឹងការឆ្លងដែនដើម្បីទប់ស្កាត់ការរីករាលដាលជំងឺកូវីដ១៩ ភាគីវៀតណាមក៏បានបោះតង់យោធាចំនួន ៣១កន្លែង នៅជាប់ព្រំដែនស្រុកលើកដែក និងស្រុកកោះធំ ខេត្តកណ្ដាល ដែលនៅចំណុចនេះភាគីទាំងពីរ មិនទាន់មានការឯកភាពគ្នាលើខ្សែបន្ទាត់ព្រំដែននៅឡើយទេ៕