ភ្នំពេញ ៖ ក្រសួងសុខាភិបាលនៅព្រឹកថ្ងៃទី១១ ខែឧសភា ឆ្នាំ២០២០នេះ រៀបចំសន្និសីទសារព័ត៌មាន ស្ដីពីបច្ចុប្បន្នភាពជំងឺ COVID-19 នៅក្នុងប្រទេសកម្ពុជា។ សន្និសីទសារព័ត៌មាននេះ ត្រូវធ្វើឡើងនៅទីស្ដីការក្រសួង។

សន្និសីទសារព័ត៌មាននេះ មានគោលបំណងជម្រាបអ្នកសារព័ត៌មាន និងប្រជាពលរដ្ឋអំពីស្ថានភាព និងបច្ចុប្បន្នភាពនៃជំងឺកូវីដ-១៩ ក៏ដូចជារាយការណ៍ពីការរាតត្បាត និងអន្តរាគមន៍ឆ្លើយតបជំងឺនេះ។ សន្និសីទក៏នឹងផ្តល់ព័ត៌មានស្តីពីវិធានការទប់ស្កាត់ នៃការផ្ទុះឡើងនៃជំងឺកូវីដ១៩ និងបញ្ហាពាក់ព័ន្ធផងដែរ។

សូមជម្រាបថា នៅថ្ងៃទី១០ ខែឧសភា ឆ្នាំ២០២០នេះ ក្រសួងសុខាភិបាល បានចេញសេចក្តីប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២០នាក់។ ចំណែកអ្នកកំពុងសម្រាកព្យាបាលជំងឺកូវីដ មានសរុបចំនួន២នាក់ នៃអ្នកឆ្លងសរុប១២២នាក់៕

​

​ភ្នំពេញ​ ៖​ ​ក្នុង​រយៈពេល​១០​ថ្ងៃ​ នៃ​ការ​រឹត​បន្ដឹង​ច្បាប់​ស្ដី​ពី​ចរាចរណ៍​ផ្លូវគោក​មាន​យានយន្ត​ចំនួន​១៨,៤៥០​គ្រឿង​ ល្មើសច្បាប់​ ស្មើនឹង​១៩,១៦០​ករណី​ត្រូវ​បាន​ផាកពិន័យ​តាម​អនុក្រឹត្យ​លេខ​៣៩​ នៅ​ទូ​ទាំង​ប្រទេស​។​ នេះបើយោងតាមរបាយការណ៍​ពី​នាយកដ្ឋាន​នគរបាល​ចរាចរណ៍​ និង​សណ្តាប់ធ្នាប់​សាធារណៈ។

​របាយការណ៍បាន​បង្ហាញ​ថា​ ក្នុង​ចំណោម​យានយន្ដ​ទាំង​១៨,៤៦០​គ្រឿង​នេះ​ មាន​ម៉ូតូ​ចំនួន​១៤,៦០៣​គ្រឿង​ ល្មើសច្បាប់​ស្មើនឹង​១៤,៣៤០​ករណី​ និង​រថយន្ដ​ចំនួន​៤,៨៤៧​គ្រឿង​ ល្មើសច្បាប់​ ស្មើនឹង​៤,៨២០​ករណី។​

អំពើ​ល្មើស​ភាគច្រើន​ អត់​មួក​សុវត្ថិភាព​,​ អត់​កញ្ចក់​ និង​ជិះ​ប​ញ្ជ្រា​ស​។​ ដោយឡែក​សម្រាប់​អ្នក​បើករថយន្ដ​ អំពើ​ល្មើស​រួម​មាន​ មិន​ពាក់​ខ្សែ​ក្រ​វ៉ា​ត់​,​ ល្មើស​ល្បឿន​,​បណ្ណ​បើកបរ​ ដឹក​លើស​ចំណុះ​,​ និង​ផ្ទុកទំនិញ​លើស ​ស្លា​ក​លេខ​ ភ្លើង​។

របាយការណ៍​ដដែល​បាន​វាយតម្លៃ​រយៈពេល​១០​ថ្ងៃនេះ​ថា​ ការ​អនុវត្ត​តាម​អនុក្រឹត្យ​ថ្មី​ ក្នុង​ការ​ផាកពិន័យ​យានយន្ត​ល្មើស​បាន​ដំណើរការ​ទៅ​យ៉ាង​ល្អ​ប្រសើរ​។​ អ្នក​ប្រើប្រាស់​ផ្លូវ​ទាំងអស់​ដែល​បាន​ចូលរួម​គោរព​ច្បាប់​ចរាចរណ៍​យ៉ាង​ល្អ​ប្រសើរ​។

ដោយឡែកនៅ​ថ្ងៃ​ទី​១០​ ខែឧសភា​ ឆ្នាំ​២០២០​នេះ​ នគរបាលចរាចរណ៍ទូទាំងប្រទេសបានរកឃើញ យានយន្តល្មើស ចំនួន១,២២៨គ្រឿង ក្នុងនោះមានម៉ូតូ៨៤២គ្រឿង និងរថយន្ត ៣៨៦គ្រឿង​។​

​អំពើ​ល្មើស​ភាគច្រើន​ បើកបរ​ម៉ូតូ​អត់​មួក​សុវត្ថិភាព​  និងល្មើសផ្សេងៗ។ ដោយឡែក​សម្រាប់​អ្នក​បើករថយន្ដ​ អំពើ​ល្មើស​រួម​មាន​ មិន​ពាក់​ខ្សែ​ក្រ​វ៉ា​ត់​,​ ល្មើស​ល្បឿន​៕

ព្រះរាជពិធីច្រត់ព្រះនង្គ័ល ដែលត្រូវបានគេប្រារព្ធធ្វើឡើង ជារៀងរាល់ឆ្នាំ នៅក្នុងខែពិសាខ គឺជាព្រះរាជពិធីមួយ សំខាន់បំផុត បន្ទាប់ពីព្រះរាជាអភិសេក ហើយក៏ជាព្រះរាជពិធីមួយ ស្ថិតក្នុងចំណោមព្រះរាជពិធីផ្សេងៗឯទៀតប្រចាំឆ្នាំ ដែលចាត់ចូលជាព្រះរាជពិធីទ្វារទសមាស។ នៅប្រទេសឥណ្ឌាបុរាណ និងនៅកម្ពុជា ការប្រកបរបរកសិកម្មជាមុខរបរចម្បង ដោយពឹងពាក់ទាំងស្រុងលើស្រូវអង្ករ និងភោគផល ដំណាំដទៃៗទៀត។ បើតាមជំនឿ ការបង្កើតផលិតផលស្រូវអង្ករ ឬក៏ផលដំណាំផ្សេងៗ ដូចជាពោត សណ្តែក ល្ង ដោយព្រះរាជាតាមរយៈព្រះរាជពិធីខាងលើនេះ បណ្តាលមកពីកត្តាចម្បងមួយ គឺលក្ខណៈស័ក្តិសិទ្ធិរបស់តួអង្គ «ស្តេច» ក្នុងក្រសែភ្នែករបស់ប្រជានុរាស្ត្រ។ មានន័យថា ផលដំណាំពុំមែន ស្ថិតនៅត្រឹមតែការដាំដុះ បច្ចេកទេស ឬសេដ្ឋកិច្ចនោះទេ ពោលគឺប្រាកដជាបណ្តាលមកពីពិធីកម្មនេះឯង។ តាមទម្លាប់ពិធីនេះធ្វើឡើងក្នុងការផ្សង មើលប្រថ្នូលរបស់ស្រុកទេស ទៅតាមការស៊ីផឹក របស់“ គោឧសភរាជ”។

គោ១នឹម ដែលទឹមច្រត់ព្រះនង្គ័លនោះ គេហៅថា «គោឧសភរាជ» ក៏មានកំណត់ក្នុងលក្ខណៈតាមបែបនិយមបច្ចុប្បន្ន គឺសម្បុរខ្មៅ ស្នែងរាងជ្រពាស់ ឈ្នក់ ឬ ប្រក់នាគ គឺរាងខុបទៅមុខបន្ដិច ហើយវាត់ចុងទៅលើបន្ដិច ។គោ២ នឹមទៀត ដែលសម្រាប់ ហែមុខ ហែក្រោយឃើញថា មិនទាន់កំណត់លក្ខណៈតែតាមដែលធ្លាប់ប្រើមក ហើយឃើញច្រើនតែសម្បុរក្រហម ។ ឯ«គោឧសភរាជ» នោះវេលាទឹមច្រត់ព្រះនង្គ័ល គេប្រដាប់ ដោយគ្រឿងគឺពាក់ស្រោមមុខ ស្រោមស្នែង និងពាក់សំពត់កម្រាល សម្បុរក្រហមលើខ្នងផង។

ឯព្រះនង្គ័លទាំង៣នោះ គេលាបថ្នាំពណ៌ខ្មៅកាត់ខ្សែក្រហមដោ យអន្លើៗឯចន្ទោលព្រះនង្គ័ល សម្រាប់អ្នកតំណាងព្រះអង្គនោះមានលក្ខណៈពិសេសគឺធ្វើជារូបនាគ លាបថ្នាំពណ៌លឿងបែប យ៉ាងពណ៌មាស ។ នៅត្រង់កនាគមានភូធ្វើពី រោមសត្វសម្បុរ បែបភូទួន។ ទាក់ទិននឹងការផ្សងគោឧសភរាជគឺ ព្រាហ្មណ៍ព្រះរាជគ្រូ សូត្រពាក្យអធិដ្ឋានផ្សងគោឧសភរាជ ដែលទឹមច្រត់ព្រះនង្គ័លនោះ ឱ្យស៊ីផឹកអាហារ៧យ៉ាង ដែលភ្នាក់ងាររៀបដាក់តុប្រាក់ធំៗ តាំងទុកនៅទីមុខព្រះពន្លា គឺគ្រាប់ស្រូវ១តុ គ្រាប់សណ្ដែក១តុ គ្រាប់ពោត១តុ គ្រាប់ល្ង១តុ ស្មៅស្រស់១តុ ទឹក១តុ ស្រា១តុ ។

សូត្រចប់ព្រាហ្មណ៍ព្រះរាជគ្រូ យកទឹក មន្ដប្រោះក្បាល ព្រះគោទាំងពីរ ហើយមន្ដ្រីម្នាក់ដែលកាន់នង្គ័លស្ដេចមាឃ ដឹកគោឧសភរាជទាំងពីរទៅឱ្យស៊ីផឹក របស់ទាំង៧យ៉ាង គឺដឹកទៅជិតរបស់៧យ៉ាងស្រេចហើយតែគោឧសភរាជចូលចិត្ដស៊ីផឹកអ្វី ក៏ស៊ីផឹកទៅគេមិនបង្ខំឱ្យស៊ីផឹកចំពោះអាហារណានីមួយៗទេ កាលព្រះគោស៊ីផឹកអ្វីមួយយ៉ាង ឬពីរយ៉ាងព្រាហ្មណ៍ក៏ទាយផលប្រផ្នូលទៅខាងមុខតាមនោះប្រកាសផ្សាយ។ ការទស្សន៍ទាយនេះ ឆុតឬមិន ឆុតយ៉ាងណានោះមិនជាបញ្ហាធំដុំទេ។ អ្វីដែលសំខាន់នោះគឺនិមិត្តរូបនៃពិធីនេះ។

អត្ថន័យ នៃពិធីបុណ្យប្រពៃណីដែលមានអាយុកាលដ៏យូរអង្វែងមួយនេះត្រូវ អ្នក ជំនាញខាងវប្បធម៌ខ្មែរលើកឡើងថាពិធី នេះគឺជានិមិត្តរូបដែលព្រះរាជាបានយកព្រះទ័យទុក ដាក់ ចំពោះប្រជារាស្រ្ត។ព្រះអង្គធ្វើពិធីច្រត់ព្រះនង្គ័ល ដើម្បីបួងសួងសុំទឹកភ្លៀងសុំសុខសន្តិភាពសុំកុំ ឱ្យ មាន រោគាព្យាធិ និងជាទឹកចិត្តផ្សព្វផ្សាយ ព្រហ្មវិហារធម៌ទសពិធរាជធម៌ ទៅលើប្រជារាស្រ្តព្រះ អង្គ។ គ្រាន់តែថារោគាព្យាធិវាទៅតាមអាកាសធាតុឬទៅតាមរោគអីផ្សេងៗ នៃ តំបន់នីមួយៗនោះព្រះ អង្គ ចង់ឱ្យមានសុខសន្តិភាពចង់ឱ្យរាស្ត្រទូទាំងប្រទេស បានផលស្រូវ បន្លែ ផ្លែឈើគ្រប់គ្នាប៉ុណ្ណោះ៕

ដោយ ៖ កូវ ប៊ុនហេង

ព្រះវិហារ ៖ លោកឧត្តមសេនីយ៍ត្រី ច័ន្ទ សុខុន នាយសេនាធិការកងពលតូចអន្តរាគមន៍លេខ៨ បានដឹកនាំកងកម្លាំងក្រោមឱវាទ ប្រមាណ ២៧នាក់ ជួបទំនាក់ទំនងល្អ បន្តឡើងវិញ ជាមួយកងកម្លាំងប្រដាប់អាវុធថៃ ប្រមាណ ២៥នាក់ ដឹកនាំដោយលោកវរសេនីយ៍ឯក មួន ប្រដាប់ ប្រធានទិសប្រាសាទព្រះវិហារ និងលោកវរសេនីយ៍ឯក ប៊ុន តឺប ប្រធានទំនាក់ទំនងព្រំដែន បន្ទាប់ពីបានផ្តាច់ការជួបទំនាក់ទំនងគ្នាមួយរយៈក្រោយការផ្ទុះរីករាលដាលជាសកល នៃជំងឺកូវីដ១៩ ។

កិច្ចជំនួបទំនាក់ទំនងបន្តរវាងកងទ័ពកម្ពុជា-ថៃ ធ្វើឡើងកាលពីព្រឹកថ្ងៃសៅរ៍ ទី៩ ខែឧសភា ឆ្នាំ២០២០ នៅបណ្តោយព្រំដែនក្នុងភូមិសាស្រ្តគោល៨ ខាងលិច ភ្នំប្រាសាទព្រះវិហារ។ ក្នុងគោលបំណង បង្កើនកិច្ចសហប្រតិបត្តិការ និងការទំនាក់ទំនងល្អបន្ថែមទៀត រវាងកងកម្លាំងឈរជើងជួរមុខ នៃប្រទេសទាំងពីរ ដើម្បីរក្សាបានសុខសន្តិភាព និងការអភិវឌ្ឍន៍ ព្រមទាំងការរស់នៅប្រកបដោយភាពសុខសាន្ត របស់ប្រជាជន នៃប្រទេសទាំងពីរ ឈរលើការណ៍ដោះស្រាយគ្នាដោយសន្តិវិធី ដើម្បីបញ្ជៀសបានការប្រឈមមុខដាក់គ្នាដោយកម្លាំងប្រដាប់អាវុធ ។

លោក ឧត្តមសេនីយ៍ត្រី ច័ន្ទ សុខុន នាយសេនាធិការកងពលតូចអន្តរាគមន៍លេខ៨ បានថ្លែងបញ្ជាក់ឲ្យដឹងថា ដើម្បីឆ្លើយតបទៅនឹងការជឿទុកចិត្ត របស់រាជរដ្ឋាភិបាលកម្ពុជា និងក្រសួងការពារជាតិ អគ្គបញ្ជាការបញ្ជាការដ្ឋានកងទ័ពជើងគោក នៅគ្រប់បណ្តាអង្គភាពទាំងអស់ ដែលកំពុងបំពេញភារកិច្ច ក្នុងកិច្ចការពារ នៅតាមគោលដៅខ្សែរត្រៀមជួរមុខព្រំដែនកម្ពុជា-ថៃ នៅតែប្តេជ្ញាចិត្តខ្ពស់ខិតខំប្រឹងប្រែងបន្ត ក្នុងការការពារ គ្រប់គ្រងបានយ៉ាងរឹងមាំ ដោយឈរលើស្មារតីប្រុងប្រយ័ត្ន និងទទួលខុសត្រូវខ្ពស់។ ពិសេសបង្កើនការចេញដើរល្បាតបានជាប់ជាប្រចាំ ទោះបីជាសភាពការណ៍ព្រំដែន មានសភាពស្ងប់ស្ងាត់ជាធម្មតាក្តី យើងក៏នៅតែមានការប្រុងប្រយ័ត្នជាប់ជានិច្ច៕ 

ភ្នំពេញ ៖ បុរសជនជាតិគូឡុំប៊ី ម្នាក់ បានមកដល់ប្រទេសកម្ពុជា ជាង២០ឆ្នាំមកហើយ ដើម្បីជួយដល់យុវជនកម្ពុជា តាមរយៈការបណ្ដុះបណ្ដាលដល់យុវជនក្រីក្រ និងមិនមានលទ្ធភាពសិក្សានៅថ្នាក់មហាវិទ្យាល័យ ឱ្យចូលសិក្សាជំនាញបច្ចេកទេស និងបានធ្វើអោយយុវជនរាប់ម៉ឺននាក់ហើយទទួលបានពន្លឺជីវិតថ្មី ។

បុរសរូបនេះ បានចូលមកកម្ពុជា ក្នុងនាមជាបព្វជិតក្នុងសាសនាកាតូលិក ( គ្រីស្ទេន ) និងជាគណៈគ្រប់គ្រងសាលាបច្ចេកទេសដុនបូស្កូក្នុងប្រទេសកម្ពុជាផងដែរ លោកមានឈ្មោះថា Abeiro Rodas និងមានឈ្មោះជាខ្មែរថា លី សំណាង ក៏ប៉ុន្តែលោកមិនទាន់មានសញ្ជាតិខ្មែរនៅឡើយ ហើយលោកក៏ស្រលាញ់ពេញចិត្តទឹកដីកម្ពុជា ប្រជាជនកម្ពុជា ជាពិសេសយុវជនកម្ពុជា និងចង់បានសញ្ជាតិកម្ពុជាខ្លាំងណាស់ក្នុងជីវិតរបស់លោក ។
បច្ចុប្បន្នលោក លី សំណាង ឬយុវជនក្នុងសាលាបច្ចេកទេសហៅថា លោកឪពុកសំណាង ជាអធិការគ្រប់គ្រងសាលាបច្ចេកទេស ដុនបូស្កូ ខេត្តកែប ផងដែរ ។ លោកបានចូលមកប្រទេសកម្ពុជា តាំងពីចុងឆ្នាំ១៩៩៩ និងបានជួយអប់រំបណ្ដុះបណ្ដាលយុវជនកម្ពុជា រាប់ម៉ឺននាក់គិតមកដល់បច្ចុប្បន្ននេះ តាមរយៈការអប់រំ សីលធម៌ និងជំនាញបច្ចេកទេស ។

លោក សំណាង ពិតជាចង់បានសញ្ជាតិខ្មែរ ដើម្បីមានសិទ្ធិពេញលេញដូចពលរដ្ឋខ្មែរ ព្រោះតែលោកស្រលាញ់និងពេញចិត្តប្រជាជនកម្ពុជា និងទឹកដីកម្ពុជា ។

ក្នុងឆ្នាំ ២០១៦ កន្លងទៅនេះ សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏បានចូលទស្សនាសកម្មភាពនៅក្នុងសាលាបច្ចេកទេស ដុនបូស្កូខេត្តកែប និងបានជួបជាមួយលោក លី សំណាង ដែរ ។ អ្វីដែលជាការកត់សម្គាល់សម្ដេច បានសួរទៅលោក លី សំណាងថា ប្រពន្ធកូននៅឯណា ។លោក សំណាង បានឆ្លើយតបវិញថា សិស្សក្នុងសាលានេះសុទ្ធតែជាកូនគាត់ តែគាត់មិនមានប្រពន្ធទេ មានន័យថា លោកមិនអាចរៀបការយកប្រពន្ធបានទេ ក៏ប៉ុន្តែតាមទំលាប់អ្នកកាន់សាសនាកាតូលិកគេហៅលោកថា លោកឪពុក គឺមានអ្នកន័យថា អ្នកបួសក្នុងសាសនាកាតូលិក។

លោក សំណាង ឬលោក Albeiro Rodas ធ្លាប់បានបង្ហើបអោយដឹងថា ក្នុងមួយជីវិតរបស់លោក បើសិនជាលោកទទួលបានសញ្ជាតិខ្មែរ លោកពិតជាសប្បាយចិត្ត និងកាន់តែមានទឹកចិត្តក្នុងការបណ្ដុះបណ្ដាល និងជួយយុវជនក្រីក្រក្នុងប្រទេសកម្ពុជា ក៏ប៉ុន្តែទោះបីជាពេលនេះ លោកមិនមានសញ្ជាតិខ្មែរក្ដី តែលោកនៅតែខិតខំអប់រំយុវជនកម្ពុជាអោយមានជំនាញសម្រាប់ចិញ្ចឹមជីវិត គ្រួសារ និងអភិវឌ្ឍន៍ប្រទេសកម្ពុជាដដែល ។

គួរបញ្ជាក់លោក លី សំណាង ក៏ធ្លាប់បានសរសេរលិខិត និងស្វែងរកការអន្តរាគមន៍ទៅកាន់សម្ដេចតេជោ ដើម្បីទទួលសញ្ជាតិខ្មែរនេះដែរ ដោយក្នុងលិខិតនោះ បានបញ្ជាក់ថា ក្នុងនាមលោកជាអ្នកបួសក្នុងគ្រឹស្តសាសនា លោកមិនមានទ្រព្យសម្បត្តិ ឬលុយកាក់ផ្ទាល់ខ្លួនទេ ប៉ុន្តែលោកបានផ្ដល់អ្វីៗជាច្រើនដល់កុមារ និងយុវជនជាច្រើនតាំងពីលោកបានមកដល់ប្រទេសកម្ពុជា ។ ក្នុងខែតុលា ឆ្នាំ២០២០ នេះ លោកមានអាយុ៥០ឆ្នាំគត់ ហើយលោកមានអារម្មណ៍ថា កាន់តែស្រលាញ់កម្ពុជា សប្បាយរីករាយនឹងរស់នៅក្នុងប្រទេសកម្ពុជា ។ លោកបានស្នើសុំសម្ដេចនាយករដ្ឋមន្ត្រី មេត្តាប្រណី សណ្ដោសដល់លោក ដើម្បីអោយលោកបានចូលរួមជាមួយប្រជាជនខ្មែរ ដើម្បីប្រទេសកម្ពុជា ជាទីស្រលាញ់មួយនេះ ដែលជាការរូមចំណែកដល់សង្គមកម្ពុជាដ៏ល្អ៕

កំពង់ចាម​ ÷ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម បាន​ដឹកនាំ​មន្រ្តីរាជការ​ នៃ​មន្ទីរ​អង្គភាព​ពាក់ព័ន្ធ​ជុំវិញខេត្ត​​ នារសៀល​ថ្ងៃ​ទី​០៩​ ខែឧសភា​ ឆ្នាំ​២០២០នេះ​ បាន​អញ្ជើញចូលរួមពិធីបុណ្យ​ខួប​គម្រប់​ ៧ថ្ងៃ នៃ​មាតាបង្កើត សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ស្ថិតនៅក្នុងភូមិទី២ ឃុំរការខ្នុរ ស្រុកក្រូចឆ្មា ខេត្តត្បូងឃ្មុំ និងបានចូលបច្ច័យ​ ចំនួន០៥លានរៀល ដើម្បីឧទ្ទិសកុសលផលបុណ្យ ជូនដល់វិញ្ញាណក្ខន្ធ អ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា​ ប៊ុន​ ស៊ាងលី សូម​ឲ្យ​បានទៅសោយសុខក្នុងឋានសុខគតិភព កុំបីឃ្លៀងឃ្លាតឡើយ។

គួរ​រំលឹក​ផង​ដែរ​ថា អ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន​ ស៊ាងលី​ បានទទួលមរណភាព នៅវេលាម៉ោង ២៖១២នាទីទៀបភ្លឺ ថ្ងៃ១៣កើត ខែពិសាខ ឆ្នាំជូត ទោស័ក ពុទ្ធសករាជ ២៥៦៣ ត្រូវនឹងថ្ងៃទី៤ ខែឧសភា ឆ្នាំ២០២០ ក្នុងជន្មាយុ ៩៦ឆ្នាំ ដោយជរាពាធ សពត្រូវដម្កល់ទុក​ធ្វើបុណ្យ២យប់-៣ថ្ងៃនៅរាជធានីភ្នំពេញ និងត្រូវបានដង្ហែ យកមកបញ្ចុះនៅវេលាម៉ោង ៣៖៣៣នាទីរសៀលថ្ងៃទី៦​ ឧសភា​នេះ​ នៅឯស្រុកកំណើត​ ស្ថិត​នៅ​ក្នុងភូមិទី២ ឃុំរការខ្នុរ ស្រុកក្រូចឆ្មារ ខេត្តត្បូងឃ្មុំ​ ៕ ដោយ ៖ ប៉ែន សុផល

កំពង់ចាម​ ÷ លោក អូស្មាន ហាស្សាន់ ទេសរដ្ឋមន្រ្តីទទួលបន្ទុកបេសកកម្មពិសេស អមដំណើរ​ដោយ​សហការី​ នាព្រឹក​ថ្ងៃ​ទី​៩​ ខែឧសភា​ ឆ្នាំ​២០២០នេះ​ បានអញ្ជើញជួបសំណេះសំណាល និងនាំយកអំណោយជាកញ្ចប់អាហារ សម្រាប់ទទួលទាន​ខែបួសរ៉ាម៉ាឌន ជូនដល់​បងប្អូន​ប្រជាពលរដ្ឋ​សាសនិក​ខ្មែរ​ឥស្លាម​ ដែល​ជួប​ការ​លំបាក​ក្នុង​ជីវភាព​ ចំនួន១០០គ្រួសារ នៅសង្កាត់​សំបួរ​មាស​ ក្រុង​កំពង់ចាម​ ខេត្តកំពង់ចាម​។

ដោយ​​ក្នុងមួយគ្រូសារទទួលបាន អង្ករ១០គីឡូ និងគ្រឿងឧបភោគបរិភោគមួយចំនួន មានដូចជា ស្ករស ត្រីខ ទឹកដោះគោ ប្រេងឆា អំបិល និង​ដំណាប់​ផ្លែ​ល្មេី​០១កញ្ចប់​ផងដែរ​។

ក្នុង​ពិធី​សំណេះសំណាល​នោះដែរ​ លោកទេសរដ្ឋមន្ដ្រី អូស្មាន ហាស្សាន់ បាន​ថ្លែង​​ថា​ ប្រទេស​កម្ពុជា​យេីង​មាន​សុខសន្តិភាព​ ស្ថិរភាពពេញលេញលេីផ្ទៃប្រទេស និង​មាន​ការ​អភិវឌ្ឍន៍​រីកចម្រើន​លើ​គ្រប់​វិស័យ​ ​ ដោយ​សារ​ការ​ដឹកនាំ​ប្រកប​ដោយ​គតិបណ្ឌិត​របស់​សម្តេច​តេជោ​ ហ៊ុន​ សែន​ ក្រោម​នយោបាយ​ឈ្នះ​ឈ្នះ​ ដែលបាន​នាំ​មក​នូវ​ការ​បង្រួបបង្រួម​ជាតិ​ ដូច្នេះ​សូមឲ្យ​បងប្អូន​ប្រជាពលរដ្ឋ​ ចូលរួមថែរក្សា​សុខសន្តិភាព​មួយនេះ​ ​ឲ្យ​បាន​គង់វង្ស​ ដេីម្បី​រួមចំណែកអភិវឌ្ឍន៍ប្រទេសជាតិយើង​ឲ្យ​កាន់តែមានការរីកចម្រើនទៅមុខផងដែរ។

លោកទេសរដ្ឋមន្ត្រី​ បាន​ថ្លែង​បន្ត​ថា​ ថ្វីត្បិត​តែ​ស្ថានភាពនៃ​ជំងឺ​កូវីដ​១៩​ នា​ដំណាក់កាល​បច្ចុប្បន្ន​នេះ​ មាន​ការ​ថប់​ថយ​ចុះ​ក៏ពិត​មែន​ តែ​យើង​មិនត្រូវមានការ​ធ្វេសប្រហែស​នោះ​ឡើយ​ គឺ​ត្រូវ​បន្តការ​អនុវត្ត​គម្លាត​សុវត្ថិភាព​បុគ្គល និង​គម្លាត​សុវត្ថិភាព​សង្គម ព្រមទាំងធ្វើ​អនាម័យ ជាប់​ជាប្រចាំ ឲ្យ​បាន​គ្រប់ៗ​គ្នា ពោលគឺ​ត្រូវ​យកចិត្តទុកដាក់ បន្ត​អនុវត្ត​ ​ឲ្យ​បាន​ខ្ជាប់ខ្ជួន ទៅតាម​ការណែនាំ របស់​ក្រសួងសុខាភិបាល​ ផងដែរ​។

ជាមួយគ្នា​នោះ​ ទេសរដ្ឋមន្ត្រី​ ក៏បានលេីកឡេីងផងដែរថា​ ការស្លៀកពាក់ស្បៃបិទជិតទាំងក្បាល និងមុខ ត្បិតមានពលរដ្ឋខ្លះនៅប្រទេសឥស្លាមក្នុងតំបន់មួយចំនួន ជាពិសេសនៅមជ្ឈឹមបូព៌ា ដែលអនុវត្តយកការគ្របមុខសម្រាប់ស្រ្តី ពេលចេញទៅតំបន់សាធារណៈនោះ គ្រាន់តែជាការយល់ឃើញមួយជ្រុងជាមួយនឹងប្រពៃណីរបស់ពួកគាត់ ស្របតាមស្ថានភាពនៅប្រទេសគាត់តែប៉ុណ្ណោះដែលមិនមែនជាកាតព្វកិច្ចនៃច្បាប់ឥស្លាមនោះទេ៕

ស្ថានភាពនៅកម្ពុជាយើងពីដើមមកពុំមានឡើយការស្លៀកពាក់បែបនេះ ទាំងក្របខណ្ឌប្រពៃណី រឺក្របខណ្ឌសាសនាឥស្លាម គ្រាន់តែទើបបច្ចុប្បន្នយើងឃើញថាមានមួយចំនួនតូច បានយកការអនុវត្តប្រពៃណីនេះ ហើយយល់ឃើញថា ជាកាតព្វកិច្ចក្នុងច្បាប់ឥស្លាម តែតាមពិតស្រ្តីឥស្លាម គេអនុញ្ញាតអោយបើកទម្រង់មុខ និងប្រអប់ដៃ ដោយមិនមានបញ្ហាអ្វីឡើយ​ ៕ដោយ ប៉ែន សុផល

ខេត្តបន្ទាយមានជ័យ ៖ ពលករខ្មែរប្រុសស្រីមានទាំងក្មេងផងដែរចំនួន ៦៨នាក់ត្រូវបានទាហានឈុតខ្មៅតាមព្រំដែនថៃ កម្ពុជា ឃាត់ខ្លួនខណៈពួកគេត្រូវបានមេខ្យល់បោះបង់ចោលនៅកណ្ដាលព្រៃ តាមខ្សែបន្ទាត់ព្រំដែន ត្រង់ចំណុច ភូមិណងពឺ ស្រុកអារញ្ញ ខេត្តស្រះកែវ ឈមនឹងទឹកដីកម្ពុជា នៅទល់មុខភូមិអូរសំព័រ ស្រុកម៉ាឡៃ ខេត្តបន្ទាយមានជ័យ។

គួររំលឹកថា មកដល់ពេលនេះ នៅតែជឿជាក់ទៅលើមេខ្យល់ពលករប្រុស ស្រីជាច្រើននាក់ដែលឆ្លងដែនខុសច្បាប់ត្រូវសមត្ថកិច្ចថៃចាប់ឃាត់ខ្លួនកាលពីព្រឹកថ្ងៃទី០៩ ខែឧសភា ឆ្នាំ២០២០ នេះ។

សមត្ថកិច្ចកម្ពុជាប្រាប់ថា ពលករខ្មែរ ឆ្លងដែនខុសច្បាប់តាមរយ:មេខ្យល់ មានចំនួន៦៨នាក់ មានចាស់ មានក្មេង ចាញ់បោកមេខ្យល់នៅកណ្ដាលព្រៃ ដាច់បាយដាច់ទឹក់ តែត្រូវទាហានថៃជួយសង្គ្រោះទាន់ បើមិនដូច្នេះ អាចនិងស្លាប់នៅក្នុងព្រៃ ។

លោក នាយប៉ុស្តិ៍ទាហានឈុតខ្មៅថៃ ( ភូងកង ប៊ិន) ប្រាប់ថា លោក តែងតែឃាត់ពលករខ្មែរខុសច្បាប់ ដែលចូលតាមច្រករបៀង តាមរយ:មេខ្យល់ ដើម្បីធ្វើការណែនាំដល់ពួកគាត់ ដែលចាញ់ការលួងលោមយកប្រាក់ដើម្បីឆ្លងដែនទៅធ្វើការខុសច្បាប់ប្រថុយនឹងការគ្រោះថ្នាក់ណាមួយ។ នៅក្នុងប្រទេសថៃនៅតែបន្តការរីករាលដាលវីរុស កូវីដ-១៩ ដែលកំពុងតែរាតត្បាតផង។ ម៉្យាងវិញទៀត ជៀសវាងពលករទាំងនោះចាញ់បោកមេខ្យល់ផង ព្រោះដឹងថាមេខ្យល់យកប្រាក់ម្នាក់ ២៥០០បាត ពីពលករ ហើយមិនបានដល់គោលដៅទេ គឺត្រូវគេចាប់មកវិញដដែល ។

ជុំវិញពលករខ្មែរចាញ់បោកមេខ្យល់ឆ្លងដែនតាមច្រករបៀងនេះលោកហ៊ុន សារឿន កុងស៊ុលកម្ពុជាប្រចាំខេត្តស្រះកែវអ្នកសារព័ត៏មានទំនាក់ទំនងតាមតេឡេក្រាម ហើយលោកបានចូលមើលដែរតែលោកមិនមានការឆ្លើយតបឡើយ៕

ខេត្តសៀមរាប ៖ នៅរសៀលថ្ងៃទី៨ ខែឧសភា ឆ្នាំ ២០២០ ក្រុមការងារជួសជុលប្រាសាទកណ្តាលស្រះស្រង់បានប្រទះឃើញចម្លាក់អណ្តើកចំនួន១បន្ថែមទៀត ដែលមានទំហំតូចជាងមុនបន្តិច រួមនឹងត្រីសូល៍ចំនួន២ ដែល១មានរូបពេញលេញ និងមួយទៀតមានត្រឹមមួយបំណែក។

នៅជិតក្បាលចម្លាក់អណ្តើក ក្រុមការងារក៏បានប្រទះឃើញគ្រាប់ ខ្វាតព៌ណស(គ្រីស្តាល់?)បង្កប់ក្នុងដីនៅទីនោះដែរ។ សូមបញ្ជាក់ថា គ្រាប់ខ្វាតព៌ណស(គ្រីស្តាល់?)នេះ ត្រូវបានមជ្ឍដ្ឋានមួយចំនួនយល់ច្រឡំថាជាគ្រាប់ពេជ្រឬជារបស់មានតម្លៃផ្សេង ប៉ុន្តែគ្រាប់ខ្វាតព៌ណស(គ្រីស្តាល់?)នេះ គឺត្រូវបានរកឃើញភាគច្រើននៅក្នុងរណ្តៅកំណាយស្រាវជ្រាវនៃការដ្ឋានជួសជុលនានា។

សូមរំលឹកកាលពីថ្ងៃទី៦ ខែឧសភា ឆ្នាំ២០២០ បានប្រទះឃើញចម្លាក់អណ្តើកចំនួន១ និងថ្ងៃទី៤ ខែឧសភា ឆ្នាំ២០២០ បានប្រទះឃើញវត្ថុបុរាណចំនួន៣ប្រភេទ គឺចម្លាក់នាគ ខ្វាតពណ៌ស (គ្រីស្តាល់?) និងត្រីសូល៍។ ក្នុងនោះដែរ ក្រុមការងារក៏បានរកឃើញរចនាសម្ពន្ធសំណង់ឈើនៅលើខឿនប្រាសាទផងដែរ៕

ភ្នំពេញ ៖ ១សប្តាហ៍នៃការរឹតបន្តឹងការអនុវត្តន៍ចរាចរណ៍ផ្លូវគោកកន្លងមកនេះ ស្ថានភាពចរាចរណ៍ មានភាពល្អប្រសើរជាងមុន។ នេះបើយោងតាមសេចក្តីប្រកាសព័ត៌មាន របស់គណៈកម្មាធិការជាតិសុវត្ថិភាពចរាចរណ៍ផ្លូវគោក នៅថ្ងៃទី០៨ ខែឧសភា ឆ្នាំ២០២០នេះ។

យោងតាមសេចក្តីប្រកាសព័ត៌មានបានឲ្យដឹងថា ក្នុងរយៈពេល ១សប្តាហ៍កន្លងទៅ សមត្ថកិច្ចនគរបាលចរាចរណ៍ផ្លូវគោក បានត្រួតពិនិត្យឃើញនូវបទល្មើស និងធ្វើការពិន័យចំពោះយានយន្តល្មើសច្បាប់សរុបចំនួន ១៣,៩៦៨ករណី ក្នុងនោះមានទោចក្រយានយន្ត និងត្រីចក្រយានយន្តចំនួន ១០,៨១៥ករណី ស្មើនឹង៧៧% គ្រប់ប្រភេទចំនួន ៣,១៥៣ករណី ស្មើនឹង២៣%។

ជាមួយគ្នានេះ ស្ថានភាពចរាចរណ៍មានភាពល្អប្រសើរជាងមុន ដោយគ្រោះថ្នាក់ចរាចរណ៍បានកើតឡើងចំនួន ៤៣/៩៥លើក ថយ៥២លើក ស្មើ៥៤% ស្លាប់ ២៤/៤០នាក់ ថយ១៦នាក់ ស្មើ៤០% របួស ៥៦/១១៥នាក់ ថយ ៥៩នាក់ ស្មើ៥១,៣០% ប្រៀបធៀបរយៈពេលដូចគ្នា នៃខែឧសភា ឆ្នាំ២០១៩។

ចំណុចកត់សម្គាល់នោះគឺ អ្នកប្រើប្រាស់ផ្លូវច្រើនលើសលប់នៅទូទាំងប្រទេស បានចូលរួមអនុវត្តន៍ច្បាប់ស្តីពីចរាចរណ៍ផ្លូវគោកយ៉ាងផុលផុស ដែលបានឆ្លុះបញ្ចាំងឲ្យឃើញ អំពីការគោរពច្បាប់ និងជាប្រភពលើកទឹកចិត្ត ដល់កងកម្លាំងអនុវត្តន៍ច្បាប់ មានស្មារតីបន្តអនុវត្តន៍ភារកិច្ច កាន់តែសកម្មខ្លាំងក្លាជាងមុន៕

ភ្នំពេញ ៖ នៅថ្ងៃទី០៩ ខែឧសភា ឆ្នាំ២០២០នេះក្រសួងសុខាភិបាល បានចេញសេចក្តីប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១២០នាក់។

ចំណែកអ្នកកំពុងសម្រាកព្យាបាលជំងឺកូវីដសរុបចំនួន២នាក់ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី០៩ ខែឧសភា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាលដែលទទួលបានមុននេះបន្តិច៕

ព្រះវិហារ ៖ លោក ប្រាក់ សុវណ្ណ អភិបាលខេត្តព្រះវិហារ និងជាប្រធានគណៈកម្មាការសាខាកាកបាទក្រហមកម្ពុជាខេត្ត នៅព្រឹកថ្ងៃទី០៨ ខែឧសភា ឆ្នាំ២០២០ នេះ បានទទួលអំណោយជាសម្ភារ: និងថវិកាពីសប្បុរសជន តាមមន្ទីរអង្គភាពជុំវិញខេត្ត ដើម្បីជួយទ្រទ្រង់សកម្មភាពកាកបាទក្រហមក្នុងខេត្ត ក្នុងឱកាសអបអរសារទរ ខួបលើកទី១៥៧ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា ឆ្នាំ២០២០ ក្រោមប្រធានបទ «ខ្ញុំស្រឡាញ់សន្តិភាព និងកាកបាទក្រហមកម្ពុជា»។

លោក ប្រាក់ សុវណ្ណ បានថ្លែងថា ក្នុងនាមសាខាកាកបាទក្រហមកម្ពុជាខេត្តព្រះវិហារ សូមថ្លែងអំណរគុណដ៏ជ្រាលជ្រៅបំផុតចំពោះលោកស្រី ជាប្រធានមន្ទីរ អង្គភាព និងមន្ត្រីរាជការជុំវិញខេត្ត ក៏ដូចជាសប្បុរសនានា ដែលតែងតែបាននាំអំណោយតាមរយ:គៀងគរថវិកា និងសម្ភារ:ដោយស្ម័គ្រចិត្តពីសប្បុរសជនយកមកបម្រើប្រើប្រាស់ ជាប្រយោជន៍មនុស្សធម៌ និងចែកជូនជនរងគ្រោះទូទៅ កើតឡើងដោយសារគ្រោះធម្មជាតិ ជនក្រីក្រចាស់ជរា ស្រ្តីមេម៉ាយ ក្មេងកំព្រា។

លោក ប្រាក់ សុវណ្ណ បញ្ជាក់ទៀតថា កាកបាទក្រហមកម្ពុជាដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន តែងតែចង្អុលបង្ហាញជាប្រចាំដល់សាខា អនុសាខា ត្រូវចុះពិនិត្យមើល ព្រមទាំងជួយជាសម្ភារ ថវិកា និងលើកទឹកចិត្តដល់អ្នកដែលជួបវិបត្តិទាំងអស់នោះហើយសាខា អនុសាខា និងអាជ្ញាធរគ្រប់លំដាប់ថ្នាក់ មិនត្រូវធ្វេសប្រហែសក្នុងនាមជាអាណាព្យាបាលប្រជាពលរដ្ឋ ហើយក៏មិនអនុញ្ញាតឲ្យពលរដ្ឋណាម្នាក់ស្លាប់ដោយអត់ស្បៀងអាហារនោះឡើយ។

សូមបញ្ជាក់ថា ថវិកាដែលទទួលបានក្នុងឱកាសនេះរួមមាន៖ លោក សំ លាងទ្រី ប្រធានមន្ទីរសាធារណការ និងដឹកជញ្ជូនថវិកា២០លានរៀល អង្ករ១តោន ទឹកក្រូច ២០កេស ទឹកសុទ្ធ៥កេស និងមន្ត្រីរាជការក្នុងមន្ទីរចំនួន៩០ម៉ឺនរៀល, លោក សំ សារឿន ប្រធានមន្ទីរដែនដីថវិកា ៥លានរៀល, លោក ម៉ប់ ធិរឹត ប្រធានមន្ទីរអភិវឌ្ឍន៍ ជនបទខេត្ត ថវិកា៤លានរៀល, លោក គួង ឡូ ប្រធានមន្ទីរសុខាភិបាលខេត្តថវិកា៣លានរៀល, លោក គោ ស៊ុប៊ុនសឿត អភិបាលរងខេត្តថវិកា១លានរៀល, លោក អ៊ុង វុឌ្ឍី អភិបាលរងខេត្តថវិកា ១លានរៀល, លោក សុក សាន្តតារ៉ា អភិបាលស្រុកឆែប ថវិកា ១.៥លានរៀល, លោក សុខ មុនីរិទ្ធ អភិបាលរងស្រុកឆែប ថវិកា៥០ម៉ឺនរៀល ព្រមទាំងមន្ទីរអង្គភាពជាច្រើនទៀត៕ ដោយ ៖ កូវ ប៊ុនហេង

បន្ទាយមានជ័យ ៖ នាព្រឹកថ្ងៃទី ៨ ខែ ឧសភា ឆ្នាំ២០២០ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញជាអធិបតីភាពពិធីបើកការដ្ឋានស្ថាបនាផ្លូវចាក់កៅស៊ូចំនួន ៣ ខ្សែ ក្នុងស្រុកមង្គលបូរី ដោយត្រូវចំណាយថវិកាស្ថាបនាដោយមូលនិធិខេត្តបន្ទាយមានជ័យ។

លោក រដ្ឋ ដាស៊ីណង់ អភិបាលស្រុកមង្គលបូរី បានឲ្យដឹងថា ៖ ការបើកការដ្ឋានស្ថាបនាផ្លូវ ៣ ខ្សែនេះរួមមានផ្លូវ ក្នុងភូមិនាងកេត ឃុំឬស្សីក្រោក ១ខ្សែប្រវែង ១៦៣៦ម៉ែត្រ ចាក់កៅស៊ូនិងប្រវែង ២០០០ ម៉ែត្រ តភ្ជាប់ដល់ឃុំបត់ត្រង់ ក្រាលគ្រួសក្រហម ខ្សែទី ២ ពីភូមិសំរោង តភ្ជាប់ដល់ភូមិអញ្ចាញ ឃុំឬស្សីក្រោក ប្រវែង ២៤៤០ ម៉ែត្រ ក្រាលនៅកៅស៊ូ និង១ ខ្សែទៀត ពីភូមិជំទាវ តភ្ជាប់ទៅដល់ឃុំតាឡំ ប្រវែង ២០០០ ម៉ែត្រ ក្រាលកៅស៊ូ។

ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ថា ៖ រាជរដ្ឋាភិបាលកម្ពុជា ក៏ដូចជាអាជ្ញាធរខេត្តបូករួមជាមួយអង្គភាពពាក់ព័ន្ធ បានខិតខំប្រឹងប្រែងយកចិត្តទុកដាក់ ក្នុងការបម្រើនិង ដោះស្រាយបញ្ហា នៅមូលដ្ឋានជាអទិភាពខ្ពស់។ ឯកឧត្តមបន្តថា ៖ ក្រោមការដឹកនាំរបស់សម្តេច តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានចាត់ទុកផ្លូវថ្នល់ជាវិស័យអទិភាពខ្ពស់មានសារៈសំខាន់ ហើយបាននិង កំពុងប្រែក្លាយជាបណ្តើរៗ ផ្លាស់ប្តូរពីផ្លូវដីមកជាផ្លូវក្រាលគ្រួសថ្មមិច ហើយកំពុងផ្លាស់ប្តូរមកជាចាក់កៅស៊ូ ឬ ចាក់បេតុង ស្របតាមគោលការណ៏ជាយុទ្ធសាស្រ្ត របស់រាជរដ្ឋាភិបាល ដូចនេះផ្លូវជាសរសៃរឈាមសេដ្ឋកិច្ចដ៏សំខាន់ សម្រាប់បម្រើផល ប្រយោជន៏ប្រជាពលរដ្ឋសង្គមជាតិ មានផ្លូវមានក្តីសង្ឃឹម និងមានការរីកចម្រើន។

ចុងក្រោយ ឯកឧត្តមអភិបាលខេត្ត បានធ្វើការផ្តាំផ្ញើរដល់បងប្អូនប្រជាពលរដ្ឋ ចូលរួមសហការណ៍ដូចជា កាប់ដើមឈើ បង្ខិតរបង ដើម្បីផ្លូវបានធំទូលាយ ហើយម្យ៉ាងទៀតសូមហាមរថយន្តដឹកនាំទំនិញធុនធ្ងន់ ឆ្លងកាត់បញ្ជៀសការខូចខាតផ្លូវប្រើប្រាស់មិនបានយូរ ហើយពិសេសជៀសនេះទៀត សូមបងប្អូនប្រជាពលរដ្ឋទាំងអស់ចូលរួមអនុវត្តបន្តទៀត ក្នុងការប្រយុទ្ធប្រឆាំងនូវការឆ្លងរីករាលដាលនូវមេរោគកូរ៉ូណា កូវីដ ១៩៕