ភ្នំពេញ ៖ នាព្រឹកថ្ងៃទី១០ ខែមេសា ឆ្នាំ២០២០នេះ រដ្ឋសភានឹងបើកកិច្ចប្រជុំពិភាក្សា និងអនុម័ត «សេចក្តីព្រាងច្បាប់ស្តីពីការគ្រងប្រទេសជាតិស្ថិតក្នុងភាពអាសន្ន»។ កិច្ចប្រជុំរដ្ឋសភានាព្រឹកថ្ងៃនេះដឹកនាំដោយសម្តេចពញាចក្រី ហេង សំរិន ប្រធានរដ្ឋសភា ហើយសម្តេចតេជោ ហ៊ុន សែន នាយករដ្ឋមន្ត្រីកម្ពុជា ក៏អញ្ជើញចូលរួមកិច្ចប្រជុំនាព្រឹកថ្ងៃនេះផងដែរ។

លោក កើត រិទ្ធ រដ្ឋមន្ត្រីថ្មីនៃក្រសួងយុត្តិធម៌ នឹងដឹកនាំមន្ត្រីរបស់ខ្លួន ដើម្បីការពារសេចក្តីព្រាងច្បាប់មួយនេះនៅចំពោះមុខសមាជិក សមាជិការដ្ឋសភា៕

ភ្នំពេញ ៖ អគ្គបញ្ជាការនៃកងយោធពលខេមរៈភូមិន្ទ នៅរសៀលថ្ងៃទី៩ មេសា ឆ្នាំ២០២០ នេះ បានចេញបទបញ្ជាឲ្យកងពលលេខ៧០ ចល័តរថក្រោះប្រភេទតេ៥៥ ចំនួន១០គ្រឿង និងរថពាសដែកប្រភេទBMP-1 ចំនួន១២គ្រឿង ពីសាលាតេជោសែនជុំគីរី ចូលមកកាន់ទីបញ្ជាការដ្ឋានកងពលលេខ ៧០ វិញក្រោយធ្វើសមយុទ្ធនាគមាសឆ្នាំ២០២០ ជាមួយកងទ័ពចិនបានបិទបញ្ចប់កាលពីពេលថ្មីៗនេះ ដោយចាប់ផ្ដើមយុទ្ធដំណើរការពីថ្ងៃទី១០ ដល់ថ្ងៃទី១១ ខែមេសា ជាកំហិត។

ក្នុងបទបញ្ជាដែលចុះហត្ថលេខាដោយ ឯ.ឧ. វង្ស ពិសេន ពុំមានការបញ្ជាក់ពីភាពចាំបាច់ ឬមូលហេតុណាមួយដែលនាំឲ្យមានការចល័តរថក្រោះ និងរថពាសដែកទាំងនេះ នោះទេ ដោយគ្រាន់តែបញ្ជាក់យ៉ាងខ្លីថា ដើម្បីរក្សាឲ្យបាននូវសុខសន្តិភាព និងសុវត្ថិភាពប៉ុណ្ណោះ។

គួរកត់សម្គាល់ថា បទបញ្ជានេះ បានធ្វើឡើងតែប៉ុន្មានម៉ោងប៉ុណ្ណោះ នៅក្រោយពេលដែលរាជរដ្ឋាភិបាលបានប្រកាសហាមឃាត់ការធ្វើដំណើរឆ្លងកាត់ចេញចូលទៅវិញទៅមករវាងរាជធានី ខេត្ត ក្រុង ស្រុក នៅទូទាំងកម្ពុជា ចាប់ពីម៉ោងសូន្យរំលងអធ្រាត្រ ឈានចូលថ្ងៃទី១០ ខែមេសា ឆ្នាំ២០២០ នេះ ដោយអះអាងថា ដើម្បីទប់ស្កាត់ការឆ្លងរាលដាល នៃវីរុស កូវីដ ១៩៕

មហាសង្ក្រាន្តឆ្នាំ ជូត ទោស័ក ពុទ្ធសករាជ ២ ៥៦៤ នឹងចូលមកដល់នៅថ្ងៃចន្ទ ៦រោច ខែចេត្រ ត្រូវនឹងថ្ងៃទី១៣ ខែមេសា គ.ស ២០២០ នាវេលាម៉ោង ២០ និង ៤៨នាទី ( ជាវារៈមហាសង្ក្រាន្ត )។

ថ្ងៃអង្គារ ៧រោច ខែចេត្រ ត្រូវនឹងថ្ងៃទី១៤ ខែមេសា គ.ស ២០២០ ជាវារនៈវ័នបត ។ថ្ងៃពុធ ៨ រោច ខែចេត្រ ត្រូវនឹងថ្ងៃទី១៥ ខែ មេសា គ.ស ២០២០ ជាវារនៈវ័នបត ។ថ្ងៃព្រហស្បត៍ ៩រោច ខែចេត្រ ត្រូវនឹងថ្ងៃទី១៦ ខែមេសា គ.ស ២០២០ នៅវេលាម៉ោង ១ និង ២៤នាទី ៣៦វិនាទី ជាវារៈឡើងស័ក ។

ទេវតាឆ្នាំថ្មីព្រះនាម គោរគៈទេវី ជាបុត្រីទី ២ នៃកបិលមហាព្រហ្ម គង់នៅចាតុមហារាជិកា ទ្រង់អម្ពរពណ៌ លឿង លម្អនៅព្រះការណ៍ដោយផ្កា អង្គារបុស្ស អភរណ កែវមុក្តា សោយ តេលំ គឺប្រេង ( ប្រេងដែលមនុស្សអាចបរិភោគបាន ) ជាអាហារ គង់លើស្តេច ខ្លា ។

កត់សម្គាល់៖ ដូចដែលបានលើកឡើងខាងលើនេះ ឃើញថា វារៈវ័នបត ឆ្នាំនេះ រយៈពេល ២ថ្ងៃ គឺថ្ងៃទី១៤ និងទី១៥ ខែមេសា ហើយជាសរុបទៅពិធីបុណ្យចូលឆ្នាំ នាឆ្នាំនេះ មានរយៈពេល ៤ថ្ងៃ គឺចាប់ពីថ្ងៃទី១៣ ដល់១៦ ខែមេសា។រណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះមួយសម្រាប់គ្រឿងពលីការផ្សេងៗ ។

ត្រូវរៀបក្រាលសំពត់ពណ៌ ស (អាចក្រាលសំពត់ព័ណ៌លឿងក៏បាន ព្រោះទេវតាឆ្នាំនេះ គ្រងអម្ពរពណ៌លឿង ) ហើយរៀបចំនូវគ្រឿងសក្ការបូជាទេវតា មានជាអាទិ៍បាយសី ៩ ថ្នាក់ មួយគូ បាយសី ៧ ថ្នាក់មួយគូ បាយសី ៥ ថ្នាក់មួយគូ បាយសី ៣ ថ្នាក់មួយគូ បាយសី ប៉ាឆា មួយគូ ស្លាធម៌មួយគូ ទឹកអប់មួយគូ ទៀន៥ ធូប ៥ លាច ៥ ផ្កា ៥ ដាក់លើជើងពាន ១ គូ ចេកនួន ចេកណាំវ៉ា ដាក់លើជើងពានមួយគូ ផ្លែឈើ ១១ មុខ រៀបដាក់លើជើងពាន ១១ ដូងឡៅ ១ គូ ទឹកស្អាត ២ កែវ ។

ស្រេចហើយ នៅវេលាម៉ោងដែលទេវតាចុះមក ត្រូវជួបប្រជុំក្រុមគ្រួសារដើម្បី នមស្សកាថ្វាយបង្គុំ ព្រះរតនត្រ័យ សមាទានសីល ហើយតាំងចិត្តឱ្យបានស្អាតបរិសុទ្ធជ្រះស្រឡះនូវមន្ទិលទាំងពួង តម្កល់ចិត្តរំពឹងគិតទៅលើព្រះពុទ្ធ ព្រះធម៌ ព្រះសង្ឃ ជាទីពឹងទីរឭក លុះចប់ពិធីទទួលទេវតា ។

ចំពោះបាយសី ៩ ថ្នាក់ ៧ ថ្នាក់ ជាទំនៀមមានចែងនៅក្នុងសៀវភៅព្រះរាជពិធីទ្វារទសមាស និង មានអនុវត្តនៅព្រះបរមរាជវាំង តែចំពោះប្រជារាស្ត្រ គួរធ្វើត្រឹម ៥ ថ្នាក់ ចុះមក ឬ រៀបត្រឹមគ្រឿងសក្ការបូជា ដែលមានទៀន ប្រាំ ធូប ប្រាំ ស្លាធម៌កូនចេកមួយគូក៏ល្មមសមគួរដែរ។ ចំពោះផ្លែឈើសម្រាប់ប្រជារាស្ត្រ គួររៀបឱ្យបានត្រឹម ៣ ឬ ៥ មុខ ក៏ជាការប្រសើរ គឺរៀបទៅតាមធនធានរបស់ខ្លួន ។ នៅគ្រប់តង្វាយទាំងអស់ ត្រូវដាក់ផ្កាម្លិះភួងពីលើគ្រប់តង្វាយ នៅលើជើងពាន និង លើបាយសី ត្រូវដោតទៀនហើយដុតបំភ្លឺ ។

បន្ថែមលើអ្វីដែលមានចែងនៅក្នុងសៀវភៅ មហាសង្ក្រាន្តត្រូវរៀបចំឱ្យមានប្រេង គឺជាប្រេងអ្វីក៏ដោយដែលមនុស្សអាចបរិភោគបាន ចំនួន ២ ចាន ដែលអាចជាចានចង្កឹះ ចានគោម ឬ ចានសំប៉ាត ក៏បានដាក់នៅក្នុងគ្រឿងរណ្តាប់ទទូលទេវតាព្រោះទេវតាឆ្នាំនេះ សោយប្រេង ៕

ភ្នំពេញ ៖ មណ្ឌលអប់រំ កែប្រែ និងពន្ធនាគាររាជធានី-ខេត្តទាំងអស់ កំពុងអនុវត្តវិធានការយ៉ាងខ្ជាប់ខ្ជួនតាមសេចក្តីណែនាំរបស់ក្រសួងសុខាភិបាល ដើម្បីបង្ការ និងការពារមន្ត្រី និងជនជាប់ឃុំកុំឲ្យឆ្លងជំងឺកូវីដ-១៩ នៅក្នុងពន្ធនាគារ ប៉ុន្តែពុំមានផែនការដោះលែងអ្នកទោសនោះទេ។ នេះបើតាមការបញ្ជាក់របស់លោក នុត សាវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ។
ការលើកឡើងនេះ បន្ទាប់ពីអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ជំរុញឲ្យពន្ធនាគារ ដោះលែងអ្នកទោសនយោបាយ ឬអ្នកទោសប្រព្រឹត្តស្រាលៗ ដើម្បីការពារការឆ្លងរាតត្បាតនៃជំងឺកូវីដ-១៩ នៅក្នុងពន្ធនាគារ។
លោក នុត សាវនា បញ្ជាក់ថា វិធានការបង្ការ និងការពារទាំងនោះ ដូចជាផ្អាកការចូលសួរសុខទុក្ខជនជាប់ឃុំបណ្ដោះអាសន្ន ការបាញ់ថ្នាំសម្លាប់មេរោគក្នុងពន្ធនាគារជាប្រចាំ បង្កើតកន្លែងលាងដៃនៅតាមពន្ធនាគារ និងមានការផ្គត់ផ្គងសាប៊ូដុំ និងសាប៊ូបោកខោអាវគ្រប់គ្រាន់ជាដើម។ លោកអះអាងបន្ថែមថា ពន្ធនាគារ ក៏បានដាក់ចេញវិធានការ ចាំបាច់នានាជាបន្តបន្ទាប់ទៀតដើម្បីសង្គ្រោះ និងអន្តរាគមន៍បន្ទាន់ក្នុងករណីមានការឆ្លងរាតត្បាតក្នុងពន្ធនាគារ៕

ភ្នំពេញ ៖ ចៅក្រមស៊ើបសួរ នៃសាលាដំបូងរាជធានីភ្នំពេញ លោក កី ម៉ានេរ៉ា នៅរសៀលថ្ងៃទី៩ ខែមេសា ឆ្នាំ២០២០នេះ បានសម្រេចចេញដីកាបង្គាប់ឲ្យឃុំខ្លួនលោក សុវណ្ណ រិទ្ធី អគ្គនាយក TVFB ដាក់ពន្ធនាគារ PJ ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍»។ នេះបើយោងតាមដីការបស់ចៅក្រមសាលាដំបូងរាជធានីភ្នំពេញ។

ការសម្រេចចេញដីកាបង្គាប់ឲ្យឃុំខ្លួន និងចោទប្រកាន់អគ្គនាយក TVFB បានធ្វើឡើងបន្ទាប់ពីជនសង្ស័យរូបនេះ បានផ្សព្វផ្សាយព័ត៌មានបែបញុះញង់ មានទាំងខ្លឹមសារផង និង LIVE វីដេអូផងតាមបណ្តាញសសង្គម ពីវិធានការរបស់រាជរដ្ឋាភិបាលក្នុងការទប់ស្កាត់ និងការពារជំងឺ COVID-19។

​ពាក់ព័ន្ធ​ករណី​ខាងលើនេះ​កាលពី​រសៀល​ថ្ងៃទី​០៨ ខែមេសា ឆ្នាំ​២០២០ លោក ខៀវ កាញារីទ្ធ រដ្ឋមន្ត្រីក្រសួង​ព័ត៌មាន បានចេញ​ប្រកាស​លុបចោល​អាជ្ញាប័ណ្ណ ផ្សព្វផ្សាយ​ព័ត៌មាន​របស់​មជ្ឈមណ្ឌល​ព័ត៌មាន TVFB ទាំងអស់ ដែលមាន​លោក សុវណ្ណ សុខា ជា​ម្ចាស់​ចាប់ពី​ថ្ងៃនេះ​តទៅ ដោយសារតែ​ស្ថាប័ន​ព័ត៌មាន​មួយ​នេះ បាន​ផ្សព្វផ្សាយ​ព័ត៌មាន​ដែលមាន​ចរិត​ញុះញង់ បង្ក​ឲ្យ​ប៉ះពាល់​ដល់​សន្តិសុខ សណ្តាប់ធ្នាប់ និង​សុវត្ថិភាព​សង្គម​៕

ខេត្តកំពង់ចាម ៖ សភាពាណិជ្ជកម្ម មណ្ឌលខេត្តកំពង់ចាម មណ្ឌលគីរី ដឹកនាំដោយលោក ឧកញ៉ា ហួត ឈឿន នាព្រឹកថ្ងៃទី៨ ខែមេសា ឆ្នាំ២០២០ នេះ បាននាំយកនូវអំណោយជាអង្ករ ចំនួន៤ តោន និងទឹកស៊ីអ៊ីវ ១៦០យួរ ផ្តល់ជូនគណៈកម្មការប្រយុទ្ធនឹងជំងឺកូវីដ១៩ ខេត្តកំពង់ចាម សម្រាប់ចាត់ចែងក្នុងយុទ្ធនាការបង្ការទប់ស្កាត់ការរីករាលដាលនៃវីរុសកូរ៉ូណា(កូវីដ១៩) ក្នុងភូមិសាស្ត្រខេត្តកំពង់ចាម ក៏ដូចជានៅក្នុងប្រទេសកម្ពុជាផងដែរ។

ឆ្លៀតក្នុងឱកាសនោះដែរ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការប្រយុទ្ធនឹងជំងឺកូវីដ១៩ ខេត្តកំពង់ចាម បានថ្លែងនូវអំណរគុណចំពោះកាយវិការ សប្បុរសធម៌ របស់សមាជិកសភាពាណិជ្ជកម្ម មណ្ឌល ខេត្តកំពង់ចាម មណ្ឌលគីរី ដែលបានឯកភាពគ្នា ក្នុងការផ្តល់សំភារៈជាអង្ករ ចំនួន៤តោន និងទឹកស៊ីអ៊ីវ១៦០យួរនេះ ដែលជាការចូលរួមចំណែកជាមួយរាជរដ្ឋាភិបាល តាមរយៈអាជ្ញាធរខេត្ត ដេីម្បីប្រយុទ្ធប្រឆាំងនឹងជំងឺកូវីដ១៩ ដ៏កាចសាហាវនេះ។

ជាមួយគ្នានោះ លោក អភិបាលខេត្ត ក៏បានលើកឡើងដែរថា អំណោយដែលសភាពាណិជ្ជកម្មមណ្ឌល ខេត្តកំពង់ចាម មណ្ឌលគីរី បានប្រគល់ជូននាពេលនេះ គឺជាការរួមចំណែកក្នុងសកម្មភាពនានា ដើម្បីប្រយុទ្ធនឹងជំងឺកូវីដ១៩ ដែលជាការជួយរំលែកទុក្ខលំបាក ការខ្វះខាត របស់បងប្អូនប្រជាពលរដ្ឋ ជាពិសេសបងប្អូនពលករដែលទើបតែត្រឡប់មកពីក្រៅប្រទេសវិញ និងក្រុមការងារចុះបំពេញបេសសកម្ម ការពារទប់ស្កាត់ការរីករាលដាលនៃវីរុសកូរ៉ូណាផង ខណៈដែលរាជរដ្ឋាភិបាលកម្ពុជា បាននឹងកំពុងយកចិត្តទុកដាក់ ក្នុងការអំពាវនាវ និងណែនាំដល់គ្រប់ស្ថាប័នរដ្ឋ វិស័យឯកជន អង្គការជាតិ អន្តរជាតិ និងបងប្អូនប្រជាពលរដ្ឋ ដើម្បីរួមគ្នាប្រយុទ្ធទប់ស្កាត់ការរីករាលដាល នៃវីរុសកូរ៉ូណា (កូវីដ១៩) ដែលជាជំងឺរាតត្បាតលេីសកលលោក ដោយប្រទេសកម្ពុជាយើងក៏មានអ្នកកើតជំងឺនេះមួយចំនួនផងដែរ ៕ ដោយ ៖ ប៉ែន សុផល

ភ្នំពេញ ៖ ថ្លែងប្រាប់ក្រុមអ្នកសារព័ត៌មាននៅព្រឹកថ្ងៃទី៩ ខែមេសា ឆ្នាំ២០២០នេះ អ្នកនាំពាក្យសាលាដំបូងរាជធានីភ្នំពេញឲ្យដឹងថា លោក ប្លង់ សុផល ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចចោទប្រកាន់លោក សុវណ្ណ រិទ្ធី អគ្គនាយក TVFB ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» តាម​មាត្រា​៤៩៤​ និង​មាត្រា​៤៩៥​នៃ​ក្រមព្រហ្មទណ្ឌ ដោយ​អាច​ប្រឈម​ជាប់ពន្ធនាគារ​ពី​៦​ខែ​ដល់​២​ឆ្នាំ ។

​​លោក គុជ គឹម​ឡុង អ្នកនាំពាក្យ​អយ្យការ​អម​សាលាដំបូង​រាជធានី​ភ្នំពេញ ក៏បាន​បញ្ជាក់ថា ក្រោយ​ព្រះរាជអាជ្ញា​ធ្វើការ​ចោទប្រកាន់​ហើយ​នោះ សំណុំរឿង​ខាងលើនេះ ​និង​ជន​ត្រូវ​ចោទ សុវណ្ណ រិទ្ធី ត្រូវបាន​បញ្ជូនទៅ​ចៅក្រម​ស៊ើបសួរ ចាត់ការ​បន្ត​តាម​នីតិវិធី​នៅថ្ងៃនេះ​ទៀត ។ លោក​បន្តថា​នៅ​ដំណាក់កាល​នេះ ចៅក្រម​ស៊ើបសួរ នឹង​សម្រេច​ឃុំខ្លួន​ឬ​មិន​ឃុំខ្លួន លោក សុវណ្ណ រិទ្ធី ។

​ពាក់ព័ន្ធ​ករណី​ខាងលើនេះ​កាលពី​រសៀល​ថ្ងៃទី​០៨ ខែមេសា ឆ្នាំ​២០២០ លោក ខៀវ កាញារីទ្ធ រដ្ឋមន្ត្រីក្រសួង​ព័ត៌មាន បានចេញ​ប្រកាស​លុបចោល​អាជ្ញាប័ណ្ណ ផ្សព្វផ្សាយ​ព័ត៌មាន​របស់​មជ្ឈមណ្ឌល​ព័ត៌មាន TVFB ទាំងអស់ ដែលមាន​លោក សុវណ្ណ សុខា ជា​ម្ចាស់​ចាប់ពី​ថ្ងៃនេះ​តទៅ ដោយសារតែ​ស្ថាប័ន​ព័ត៌មាន​មួយ​នេះ បាន​ផ្សព្វផ្សាយ​ព័ត៌មាន​ដែលមាន​ចរិត​ញុះញង់ បង្ក​ឲ្យ​ប៉ះពាល់​ដល់​សន្តិសុខ សណ្តាប់ធ្នាប់ និង​សុវត្ថិភាព​សង្គម​៕

ភ្នំពេញ ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភា បានដឹកនាំកិច្ចប្រជុំ គណៈកម្មាធិការអចិន្ត្រៃយ៍រដ្ឋសភា នៅព្រឹកថ្ងៃទី៩ ខែមេសា ឆ្នាំ២០២០នេះ នៅវិមានរដ្ឋសភា។
ជាលទ្ធផលអង្គប្រជុំ បានសម្រេចបន្តសម័យប្រជុំរដ្ឋសភាលើកទី៤ នីតិកាលទី៦ នៅព្រឹកថ្ងៃទី១០ ខែមេសា ស្អែកនេះ ដើម្បីពិភាក្សាអនុម័តសេចក្តីព្រាងច្បាប់ស្តីពី ការគ្រប់គ្រងប្រទេសជាតិស្ថិតក្នុងភាពអាសន្ន និងធ្វើការបោះឆ្នោតជ្រើសតាំង ផ្លាស់ប្តូរ សមាជិកគណៈកម្មការជំនាញរដ្ឋសភាមួយចំនួន៕

ខេត្តកណ្តាល ៖ មន្រ្តីសាខា ក.ប.ប. ខេត្តកណ្តាលបានរកឃើញ និង​ឃាត់ទុកជាបណ្តោះអាសន្ន នូវផលិតផលពោះវៀនជ្រូក មានទម្ងន់៥តោន ដែលផ្ទុកក្នុងកុងតឺន័រ ចំនួន២ និង​បាន​ពិនិត្យឃើញ​ថា ពុំមានឯកសារបញ្ជាក់ និងមានសភាពស្អុយ មានចម្លងមេរោគ ដោយ​សារការវេចខ្ចប់ និងទុកដាក់ពុំត្រឹមត្រូវតាមគោលការបច្ចេកទេស។ ចុះត្រួតពិនិត្យ​នេះ ធ្វើ​ឡើង​កាល​ពី​ថ្ងៃទី៨ មេសា ២០២០។

មន្រ្តីសាខា ក.ប.ប. បាន​បន្ត​ថា ផលិតផលពោះវៀនជ្រូក មានទម្ងន់ ៥តោន ដែលផ្ទុកក្នុងកុងទឺណ័រចំនួន ២ បាន​ស្តុកទុកក្នុងឃ្លាំងគ្មានលេខ ដែលស្ថិតក្នុងភូមិជ័យឧត្តម ឃុំ សំរោងធំ ស្រុក​កៀន​ស្វាយ ខេត្តកណ្តាល។ ការត្រួតពិនិត្យ ត្រូវបានគាំទ្រដោយរថយន្តពិសោធន៍ចល័តផ្នែកម្ហូបអាហាររបស់អគ្គនាយកដ្ឋានក.ប.ប. ផងដែល។

ក្រោយការត្រួតពិនិត្យ សមត្ថកិច្ចចម្រុះបានរកឃើញថា ទំនិញទាំងនេះបានខូចគុណភាពពុំអាច​យក​មក​ប្រើប្រាស់ជាម្ហូបអាហារសម្រាប់បរិភោគបាន សមត្ថកិច្ចចម្រុះបានសម្រេចឃាត់ទុកទំនិញទាំង​នេះ ជាបណ្តោះអាសន្ននៅឃ្លាំងខាងលើ ដើម្បីបំពេញបែបបទយកទៅកម្ទេចចោលតាមនីតិវិធី។ ចំណែក​ម្ចាស់ទំនិញត្រូវបាននាំខ្លួនទៅសាកសួរបន្តនៅស្នងការដ្ឋាននគរបាលខេត្តកណ្តាល៕

ភ្នំពេញ ៖ ថ្ងៃនេះក្រសួងសុខាភិបាល បានចេញសេចក្តីប្រកាសនូវដំណឹងល្អដល់ប្រជាពលរដ្ឋបន្តទៀតថា អ្នកជំងឺកូវីដ១៩ បានជាសះស្បើយរហូតដល់ ៦នាក់ថ្មីទៀត ធ្វើឲ្យចំនួនអ្នកជាសះស្បើយសរុបកើនឡើងរហូតដល់៦៨នាក់ និងរកឃើញករណីឆ្លងថ្មីម្នាក់ និងលាប់ជំងឹកូវីដឡើងវិញម្នាក់។

ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន៥០នាក់ នៃអ្នកឆ្លងសរុប១១៨នាក់។ បើគិតត្រឹមព្រឹកថ្ងៃទី០៩ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលទទួលបានមុននេះបន្តិច។

ករណីរជាសះស្បើយទាំង៦នាក់រួមមាន៖

* ស្ត្រីជនជាតិអង់គ្លេសអាយុ៧៩ឆ្នាំ ជាអ្នកដំណើរនាវា Wiking Cruise សំចតនៅខេត្តកំពង់ចាម ដែលត្រូវបានយកមកសម្រាកព្យាបាល នៅមន្ទីរពេទ្យក្នុងរាជធានីភ្នំពេញ បានជាសះស្បើយ ដោយទទួលលទ្ធផលតេស្តអវិជ្ជមានវីរុសកូវីដ១៩ ចំនួន០២លើក ត្រូវបានអនុញ្ញាតឱ្យចេញពីមន្ទីរពេទ្យ ដើម្បីវិលត្រឡប់ទៅប្រទេសអង់គ្លេសវិញ។

* បុរសជនជាតិបារាំងចំនួន២នាក់៖ មានអាយុ៦២ឆ្នាំ និងអាយុ៦៣ឆ្នាំ ជាអ្នកទេសចរបារាំងនៅខេត្តព្រះសីហនុ បានជាសះស្បើយ ដោយទទួលបានលទ្ធផលតេស្តអវិជ្ជមានវីរុសកវីង១៩ ចំនួន០២លើក និងស្នាក់នៅក្នុងបន្ទប់ដោយឡែកនៃសណ្ឋាគារក្នុងក្រុងព្រះសីហនុ ដើម្បីរង់ចាំជើងហោះហើរវិលត្រ ឡប់ទៅប្រទេសបារាំងវិញ។

* ស្ត្រីជនជាតិបារាំង០៣នាក់៖ មានអាយុ៦៣ឆ្នាំ អាយុ៥៩ឆ្នាំ និងអាយុ៦៧ឆ្នាំ ជាភ្ញៀវទេសចរបារាំង ដែល បានសម្រាកព្យាបាលនៅបន្ទប់ ដោយឡែកនៃសណ្ឋាគារក្នុងក្រុងព្រះសីហនុ បានជាសះស្បើយដោយទទួលលទ្ធផលតេស្តអវិជ្ជមានវីរុសកូវីដ១៩ ចំនួន២លើក និងត្រូវវិលត្រឡប់ទៅប្រទេសបារាំងវិញ។

ករណីវិជ្ជមានវីរុសកូវីដ១៩ថ្មីម្នាក់៖ ជនជាតិចិនអាយុ៣០ឆ្នាំ ជាភ្ញៀវទេសចរ និងចង់រកស៊ីបើកហាងនៅកម្ពុជា ស្នាក់នៅបណ្ដោះអាសន្ន នៅរាជធានីភ្នំពេញ ករណីប៉ះពាល់ផ្ទាល់ជាមួយគូសង្សារ (បុរសជនជាតិចិនមានវីរុសកូវីដ-១៩ រកឃើញនៅប្រទេសចិន និងស្ត្រីជនជាតិវៀតណាមមានវីរុសកូវីដ-១៩ រកឃើញនៅកម្ពុជា) ត្រូវបានរកឃើញវិជ្ជមានវីរុសកូវីដ-១៩ ហើយត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។

ករណីលាប់ជំងឺកូវីដ១៩ឡើងវិញម្នាក់៖ បុរសខ្មែរ អាយុ៤០ឆ្នាំ រស់នៅសង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ ដោយទទួលបាន លទ្ធផលតេស្តវិជ្ជមានវីរុសកូវីដ១៩ ដែលគាត់បានចាប់ជំងឺនេះម្ដងទៀត បន្ទាប់ពីធ្វើតេស្តក្រោយពេល គាត់ជាសះស្បើយបាន១៥ថ្ងៃរួចមក ហើយត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។