ខេត្តកែប ៖ ក្រុមសមត្ថកិច្ចចម្រុះ និងក្រុមជំនាញជួយសង្រ្គោះ បានរុករកឃើញមនុស្សស្លាប់ក្រោមគំនរថ្មអគារបាក់បែកកើនដល់៤នាក់ (ស្ត្រី៣នាក់ បុរសម្នាក់) និងជួយសង្គ្រោះបានចំនួន១៩នាក់ ក្នុងចំណោមមនុស្សដែលជាប់នៅខាងគំនរថ្មប្រហែលពី ៣០ទៅ ៤០នាក់ គិតត្រឹមនៅវេលាម៉ោង ៨ និង១០នាទីយប់ ថ្ងៃទី៣ ខែធ្នូ ឆ្នាំ២០២០ នេះ។ 

ភ្លាមៗពេលអគាររលំបាក់រាបដល់ដី គេឮសំឡេងស្រេកទ្រហោយំ រាប់ទាំងកូនក្មេងផងដែរ ប៉ុន្តែនៅពេលនេះ បានស្ងាត់សំឡេងទៅវិញ ដោយសង្ស័យថា អាចស្លាប់ ឬសន្លប់។សមត្ថកិច្ចកំពុងបន្តរុករកមនុស្សដែលនៅបាត់ខ្លួនក្រោមផ្ទាំងថ្មនៅឡើយ។

មន្ត្រីខេត្តបានអះអាងថា មានជនរងគ្រោះប្រមាណជា៣០ ទៅ៤០នាក់ បានជាប់នៅក្រោមអគារដែលបាក់រលំនេះ ពេលពួកគេកំពុងធ្វើការ ដែលភាគច្រើនជាកម្មករសំណង់។

សូមបញ្ជាក់ថា នៅវេលាម៉ោងប្រមាណ ៤ និង៣០នាទី ល្ងាចថ្ងៃទី៣ ខែមករា ឆ្នាំ២០២០ នេះ អគារមួយកន្លែងមានកម្ពស់ប្រមាណ ៧ជាន់ ស្ថិតនៅក្បែរវត្តសមាធិ ក្នុងក្រុងកែប ខេត្តកែប បានបាក់រលំ។ សំណង់អគារនេះ ត្រូវបានគេអះអាងថា បានសាងសង់រយៈពេលជាងមួយឆ្នាំមកហើយ ដោយសម្រេចបានប្រមាណជា ៩០ភាគរយ ហើយការបាក់ស្រុតនេះ ខណៈដែលកម្មករកំពុងចាក់ប្លង់សេនៅផ្នែកខាងលើបង្អស់។

បន្ទាប់កើតហេតុភ្លាមៗ នៅព្រលប់ថ្ងៃទី៣ ខែមករា ដដែលនេះ សម្តេចតេជោ នាយករដ្ឋមន្រ្តី បានសរសេរនៅក្នុងផេកហ្វេសប៊ុកផ្លូវការថា«…. ខ្ញុំនឹងចេញទៅខេត្តកែប នៅពេលបន្តិចទៀតនេះ ដើម្បីចូលរួមដឹកនាំការរុករកសង្រ្គោះកម្មករ ដែលកំពុងជាប់នៅក្រោមអគារដែលដួលរលំ…..»។

គួររំលឹកថា នេះជាឧបទ្ទវហេតុបណ្តាលឲ្យមនុស្សស្លាប់ដ៏រន្ធត់លើកទី២ហើយ បន្ទាប់មានករណីដូចគ្នានេះ បានកើតឡើងចំពោះអគារកម្ពស់ ៧ជាន់ ស្ថិតនៅភូមិ៣ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីវេលាព្រឹកថ្ងៃទី២២ ខែមិថុនា ឆ្នាំ២០១៩ បណ្តាលឲ្យមនុស្សស្លាប់ចំនួន ២៨នាក់ និងរបួសចំនួន ២៦នាក់៕

ភ្នំពេញ ៖ មហាជនជាង ៣ម៉ឺននាក់ នឹងចូលរួមអបអរខួបលើកទី៤១ នៃទិវាជ័យជំនៈ ៧ មករា ១៩៧៩-២០២០ ខណៈពិធីប្រារព្ធធ្វើឡើងនៅមុខសាលមហោស្រពកោះពេជ្រ ក្រោមកិច្ច ការពារសន្តិសុខ និងសណ្តាប់ធ្នាប់ពីអាជ្ញាធរមានសមត្ថកិច្ច។

នេះបើតាមការអោយដឹងពី លោក នាយឧត្តមសេនីយ៍ ទូច ណារ៉ុថ អគ្គស្នងការរង នគរបាលជាតិ និងជាប្រធាននាយកដ្ឋានអង្គរក្ស ក្នុងពេលអញ្ជើញជាអធិបតីតំណាងឱ្យ លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ក្នុង កិច្ចប្រជុំត្រួតពិនិត្យ ការងាររៀបចំទិវាជ័យជំនៈ ៧មករា ខួបលើកទី៤១ នៅសាលារាជ ធានីភ្នំពេញ។

លោក នាយឧត្តមសេនីយ៍ ទូច ណារ៉ុថ បានបន្ថែមថា កម្លាំងសមត្ថកិច្ចចំរុះ រួមមាន កម្លាំងនគរបាលជាតិ កងរាជអាវុធហត្ថ និងកម្លាំងអង្គរក្ស ត្រូវបានដាក់ពង្រាយ នៅតាម ទីតាំងជុំវិញប្រារព្ធពិធី សំដៅជួយសំរួលធ្វើយ៉ាងណា ឱ្យពិធីមិទ្ទិញ ប្រារព្ធទៅដោយ រលូន ដែលក្នុងនោះមានការចាត់ចែង ពីទីតាំង ចំណតរថយន្ត ច្រកសុវត្ថិភាព ចេញចូលផង ដែរ ។ លោក នាយឧត្តមសេនីយ៍ ក៏បានឱ្យដឹងពាក់ព័ន្ធនិងការបង្ហោះដ្រូន ដែលគ្មានការ អនុញ្ញាត និងត្រូវហាមឃាត់ ឬដកហូតមករក្សាទុកផងដែរ។

ជាមួយគ្នានោះ លោក ឃួង ស្រេង អភិបាលរាជធានីភ្នំពេញ ក៏បានលើកឡើងផងដែរ ថា ទិសដៅសំខាន់ គឺការពារពិធី ថ្នាក់ដឹកនាំ និងមហាជន ដែលចូលរួម ក្នុងពិធីបុណ្យ លោកក៏បានណែនាំ អោយអភិបាលខណ្ឌ ដែលពាក់ព័ន្ធ ធ្វើយ៉ាងណារៀបចំ បរិស្ថាន និង សណ្តាប់ធ្នាប់ ជុំវិញទីតាំងប្រារព្ធពិធី ក្នុងនោះ ក៏បានណែនាំ អោយអាជ្ញាធពាក់ព័ន្ធ យកចិត្តទុកដាក់ខ្ពស់ សំដៅការពារសុខសុវត្ថិភាព មហាជនអោយបានល្អបំផុត ។

ឯកឧត្តម អភិបាលរាជធានី បន្តអោយដឹងថា ក្នុងនាមរដ្ឋបាលរាជធានីភ្នំពេញ ត្រូវតែមាន ការចូលរួមសហការពីអាជ្ញាធជំនាញពាក់ព័ន្ធទាំងអស់ ទើបអាចទទួលបានជោគជ័យ បើ ទោះបីជាពិធីបុណ្យនេះ យើងធ្លាប់បានប្រារព្ធធ្វើជាច្រើនដងហើយ ទទួលបានជោគជ័យ ជាបន្តបន្ទាប់ក៏ដោយ អាជ្ញាធមិនគួរ មានការធ្វេសប្រហែសណាមួយ ក្នុងការ ការពារ សន្តិ សុខ សុវត្ថិភាព និងសណ្តាប់ធ្នាប់ ជូនប្រជាពលរដ្ឋ និងថ្នាក់ដឹកនាំ ដែលចូលរួមក្នុងពិធី បុណ្យ ខាងលើឡើយ។

លោក អភិបាល ក៏បានថ្លែងអំណរគុណដល់ អាជ្ញាធពាក់ព័ន្ធទាំងអស់ ដែលបានយក ចិត្តទុកដាក់ការពារសន្តិសុខ សុវត្ថិភាពនិងសណ្តាប់ធ្នាប់ ក្នុងការប្រារព្ធពិធី ដើម្បីទទួល បានភាពជោគជ័យ១០០ភាគរយ៕

ភ្នំពេញ ៖ ព្រឹទ្ធសភាកម្ពុជា នៅព្រឹកថ្ងៃទី៣ ខែធ្នូ នេះ បានបន្តប្រជុំពិនិត្យពិភាក្សា និងគាំទ្រ ទាំងស្រុងលើសេចក្តីព្រាងច្បាប់ចំនួន ៧ ពាក់ព័ន្ធ ការធានាទូទាត់របស់រាជរដ្ឋាភិបាល ទៅឲ្យក្រុមហ៊ុនឯកជនចំនួន ៦ និងការទាក់ទងនឹង ការគ្រប់គ្រង និងការអភិរក្សផល ស្តុកត្រី ដើម្បីបើកផ្លូវឲ្យរាជរដ្ឋាភិបាល យកច្បាប់នេះ ទៅបម្រើផលប្រយោជន៍របស់ ប្រជាពលរដ្ឋ និងអភិវឌ្ឍន៍ប្រទេសជាតិ។

លោក ម៉ង ប៊ុននាង សមាជិក និងជាអ្នកនាំពាក្យព្រឹទ្ធសភា បានមានប្រសាសន៍ថា ព្រឹទ្ធ សភា បានពិនិត្យ និងឱ្យយោបល់ដោយឯកភាពទាំងស្រុង លើសេចក្តីព្រាងច្បាប់ទាំងមូល ដោយឥតកែប្រែចំនួន៥៨សំឡេង នៃចំនួនសមាជិកព្រឹទ្ធសភាទាំងមូល បន្ទាប់ពីច្បាប់ទាំង អស់នេះ គឺមានលក្ខណត្រឹមត្រូវតាមទម្រង់និងគតិយុត្ដិច្បាប់ ។

ប្រាប់អ្នកសារព័ត៌មាន ក្រោយកិច្ចប្រជុំពេញអង្គដឹកនាំដោយ សម្តេច វិបុលសេនាភក្តី សាយ ឈុំ ប្រធានព្រឹទ្ធសភា នាព្រឹកថ្ងៃទី៣ ខែមករា នេះ លោក បានបញ្ជាក់ថា ការ អនុម័តច្បាប់ទាំងអស់នេះ ដើម្បីឆ្លើយតបនៃកំណើនសេដ្ឋកិច្ចរបស់កម្ពុជា ដែលកំពុងមាន ការរីកចម្រើនពីមួយថ្ងៃទៅមួយថ្ងៃ ជាពិសេស ដើម្បីប្រែក្លាយប្រទេសកម្ពុជា ជាប្រទេស មធ្យមកម្រិតខ្ពស់នៅឆ្នាំ២០៣០ខាងមុខនេះ។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមាន ប្រសាស ន៍ ថា សេចក្តីព្រាងច្បាប់ការទាក់ទងនឹងការគ្រប់គ្រង និងការអភិរក្សផលស្តុកត្រីនេះ បាន តាក់តែងឡើងក្នុងគោលបំណង ដើម្បីធានានូវការប្រើប្រាស់ និងអភិរក្សផលស្តុកត្រីផ្លាស់ ទី មធ្យម និងផលស្តុកត្រីផ្លាស់ទីឆ្ងាយ ប្រកបដោយចីរភាព តាមរយៈការអនុវត្ត បទប្បញ្ញត្តិ ពាក់ព័ន្ធនៃកិច្ចព្រមព្រៀងប្រកបដោយប្រសិទ្ធភាព។

ជាមួយគ្នានេះ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានមានប្រសាសន៍ ថា សេចក្តីព្រាងច្បាប់ការធានាទូទាត់របស់រាជរដ្ឋាភិបាលទៅឲ្យក្រុមហ៊ុនឯកជនចំនួន ៦ នេះ នឹងផ្តល់ឲ្យកម្ពុជាទទួលបាននូវអត្ថប្រយោជន៍យ៉ាងធំធេង ដែលអាចរួមចំណែក ក្នុង ការអនុវត្តគោលនយោបាយរបស់រាជរដ្ឋាភិបាល ក្នុងការអភិវឌ្ឍសេដ្ឋកិច្ច សង្គម និងលើក កម្ពស់កម្រិតជីវភាពរបស់ប្រជាពលរដ្ឋ ក្នុងការធានាដល់ការផ្គត់ផ្គង់ អគ្គិសនីប្រើប្រាស់ឱ្យ បានគ្រប់គ្រាន់ ទាំងនៅទីប្រជុំជន និងជនបទ ប្រកបដោយនិរន្តរភាព ស្ថិរភាព ប្រសិទ្ធ ភាព និងមានតម្លៃសមរម្យ៕

ខេត្តកំពង់ឆ្នាំង ៖ គួរឲ្យអាណោចអាធ័មបំផុត ដែលស្ត្រីជាម្ដាយរួមទាំងកូនទើបនឹងសម្រាលស្លាប់ទាំងពីរនាក់ ខណៈឮ ស្ត្រីរងគ្រោះ ទៅ សម្រាលកូននៅគ្លីនិកឯកជនមួយកន្លែងឈ្មោះ យឹមផល្លា មានទីតាំងនៅក្នុងភូមិ ត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង ។ ហេតុការណ៍នេះ បានកើតឡើងនៅវេលា ម៉ោងជាង ១១ យប់ថ្ងៃទី២ ខែមករា ឆ្នាំ ២០២០ ។

បុរសជាប្តីបន្តថា មុនពេលកើតហេតុ ប្រពន្ធរបស់គាត់មានធ្លាក់ឈាម ដោយសារគាត់គ្រប់ ខែត្រូវឆ្លងទន្លេផងនោះ គាត់ក៍បានជូនប្រពន្ធទៅពិនិត្យផ្ទៃពោះនៅបន្ទប់ថែទាំជំងឺឯកជន យឹម ផល្លា ហើយអ្នកគ្រូពេទ្យនៅទីនោះ បានបញ្ជាក់ប្រាប់ថា ប្រពន្ធគាត់ មិនអីទេ អាច សម្រាលនៅកន្លែងនេះបាន ដោយត្រូវបង់ថ្លៃសេវា អស់តែមួយលានរៀលប៉ុណ្ណោះ។ ឮដូច្នេះដោយមានទំនុកចិត្តលើអ្នកគ្រូពេទ្យ យឹមផល្លា ក្រុមគ្រួសារស្ត្រីរងគ្រោះ ក៏សម្រេច ចិត្តឲ្យស្ត្រីជាប្រពន្ធឆ្លងទន្លេនៅទីនោះតែម្ដងទៅ ដោយយល់ថា អ្នកគ្រូពេទ្យ យឹមផល្លា គឺជាគ្រូពេទ្យ ធ្វើការប្រចាំនៅមន្ទីរពេទ្យបង្អែក ខេត្តកំពង់ឆ្នាំង។

ក្រោយពេលសំរាល រួច កូននោះ បានស្លាប់បាត់ទៅហើយ ចំណែកឯស្ត្រីជាម្តាយ មាន អាការៈខ្សោយទៅៗ ឃើញសភាព ដូច្នេះក្រុមគ្រួសារក៏បានជំរុញឱ្យអ្នកគ្រូពេទ្យ បញ្ជូន ប្រពន្ធគាត់ទៅមន្ទីរពេទ្យបង្អែក ខេត្តកំពង់ឆ្នាំង ព្រោះប្រពន្ធគាត់មិនស្រួលទេ ខ្សោយខ្លាំង ណាស់ ពេលនោះអ្នកគ្រូពេទ្យក៍សំរេចបញ្ជូន ប្រពន្ធគាត់ទៅកាន់មន្ទីរពេទ្យ តែរឿងដែល នឹកស្មានមិនដល់ពេល ទៅដល់មន្ទីរពេទ្យបង្អែកខេត្តកំពង់ឆ្នាំង គឺហួសពេលអស់ទៅ ហើយ ។
ក្រុមគ្រូពេទ្យដែលប្រចាំការនៃមន្ទីរពេទ្យបង្អែក ខេត្តកំពង់ឆ្នាំង ក៏បានរៀបចំបញ្ជូន សព ម្ដាយ និងកូនតាមរថយន្ដសាម៉ុយ ត្រឡប់មកផ្ទះវិញ ។ បុរសជាប្ដីបានបញ្ជាក់ដោយកក្តីសោកសៅថា គាត់មានការហួសចិត្ត ប្រសិនបើគ្រូពេទ្យ ឯកជនគ្មានលទ្ធភាព ម្ដេចមិនបញ្ជូនប្រពន្ធគាត់ទៅសម្រាល នៅមន្ទីរពេទ្យខេត្ត តាំងពី ពេលដំបូង បញ្ហានេះលោកមិនសុខចិត្តឡើយ លោកនឹងរៀបចំដាក់ពាក្យប្ដឹងទៅកាន់ តុលាការតាមផ្លូវច្បាប់ នៅពេលបន្ទាប់ពីធ្វើបុណ្យសពប្រពន្ធ និងកូនគាត់រួច ។

ជុំវិញបញ្ហានេះដែរ លោក ប្រាក់ វ៉ុន ប្រធានមន្ទីរសុខាភិបាលខេត្ត មិនអាចទាក់ទងសុំ ការ បំភ្លឺបានទេ ព្រោះពេលទូរស័ព្ទចូល លោកគ្រាន់តែប្រាប់ថា លោកជាប់រវល់ខ្លាំងណាស់ ហើយក៏បិទទូរស័ព្ទទៅវិញ ។ដោយឡែកលោក សូរិន្ទ ទីរ៉ាវុឌ្ឍី ប្រធានមន្ទីរពេទ្យបង្អែក ខេត្តកំពង់ឆ្នាំង បានបញ្ជាក់ថា អ្នកជំងឺឆ្លងទន្លេ ពេលមកដល់មន្ទីរពេទ្យ គឺខ្សោយណាស់ ទៅហើយ ក្រុមគ្រូពេទ្យ បានប្រឹងប្រែងជួយសង្គ្រោះណាស់ដែរ ក៏ប៉ុន្តែវាហួសពេល ទៅ ហើយ និងបានជួយរៀបចំបញ្ជូនសាកសពជនរងគ្រោះត្រឡប់ទៅផ្ទះវិញ ដើម្បីឲ្យក្រុម គ្រួសារធ្វើពិធីបុណ្យតាមប្រពៃណី៕

ខេត្តកំពង់ចាម ៖ សពកុមារាអាយុ៦ឆ្នាំជាកូនកំព្រាម្នាក់ រស់នៅជាមួយជីដូនក្នុងខណៈដែលឪពុកម្តាយបង្កើតនៅមានជីវិតរស់នៅឡើយ បានលង់ទឹកស្លាប់ត្រូវបានស្រង់ចេញពីទំនប់ទឹកមកធ្វើបុណ្យតាមប្រពៃណី។
ប៉ូលិសបានអោយដឹងថា នៅថ្ងែទី២ ខែមករា ឆ្នាំ២០២០ វេលាម៉ោង១៤នាទីប៉ុស្តិ៍នគរបាលដងក្តារ បានទទួលពត៌មានពីលោក ប៉ាន់ យាន មេភូមិអូរពីរថា មានកុមារាឈ្មោះ មានបញ្ញា អាយុ៦ឆ្នាំ ជាតិខ្មែរ ទីលំនៅភូមិអូរពីរ ឃុំដងក្តារ ស្រុកស្ទឹងត្រង់បានទៅលេងទឹកទំនប់ធំខាងលិចភូមិអូរពីរ ឃុំដងក្តារស្រុកស្ទឹងត្រង់ ហើយធ្លាក់ក្នុងអន្លុងលង់ទឹកបណ្តាលអោយស្លាប់។
ប៉ូលិសបានអោយដឹងថា ក្រោយពីបានទទួលព័ត៌មានភ្លាមលោកវរសេនីយ៍ឯកអធិការនគរបាលស្រុកស្ទឹងត្រង់ បានចាត់បញ្ជាកំលាំងជំនាញនៃអធិការដ្ឋាននគរបាលស្រុកស្ទឹងត្រង់ដោយសហការជាមួយកំលាំងប៉ុស្តិ៍ដងក្តារ ដឹកនាំដោយលោកវរសេនីយ៍ត្រី ពៅ លីមស៊ាង អធិការរងទទួលការងារព្រហ្មទណ្ឌបានចុទៅដល់កនលែងកើតហេតុធ្វើការពិនិត្យស្រាវ ជ្រាវ ឃើញសពកុមារាឈ្មោះ មានបញ្ញាស្លៀកខោខ្លីពណ៌ខៀវជើងខ្លីពាក់អាវយឺតដៃខ្លីពណ៌ក្រហម។

តាមការបំភ្លឺរបស់ឈ្មោះ ឆេង សុខចាន់ ភេទស្រីអាយុ៥៤ឆ្នាំជាតិខ្មែរ ត្រូវជាជីដូនបង្កើតបានបំភ្លឺថា កុមារាឈ្មោះ មាន បញ្ញា ជាកូនកំព្រាដោយសារ ឳពុកម្តាយលែងលះគ្នា ហើយម្តាយទៅប្រទេសចិន។ រីឯឳពុកទៅប្រទេសថៃបាត់អស់ ដោយទុកកូនឲ្យរស់នៅជាមួយជីដូន។
ជីដូន របស់កុមារារងគ្រោះបានបានបន្តថា នៅវេលាម៉ោង ៩ថ្ងៃទី២ ខែមករា ឆ្នាំ២០២០ ចៅរបស់គាត់បានទៅលេងទឹកទំនប់នៅខាងលិចភូមិ ហើយក៍បាត់រហូត។ បន្ទាប់ពីដឹងថា បាត់ចៅគាត់ និងអ្នកជិតខាងបាននាំគ្នាដើររកនឹងចុះរាវក្នុងទឹកទំនប់រហូតដល់វេលាម៉ោង ១៤ថ្ងៃដដែលទើបរកឃើញ។

លោកប៉ាក ជាតិបានបន្តថា បន្ទាប់មកគណៈកម្មការចំរុះធ្វើការត្រួតពិនិត្យ សព នៅផ្នែកក្បាល.ផ្នែកក.ផ្នែកដងខ្លួននឹងផ្នែកអវះយវះគឺពុំមានស្លាកស្នាមអ្វីឡើយ។ ផ្អែកតាមលទ្ធផលនៃការស្រាវជ្រាវការបំភ្លឺនងការពិនិត្យសាកសពឃើញ ថា កុមារាឈ្មោះ មានបញ្ញា គឺពិតជាបានស្លាប់ដោយសារលង់ទឹកប្រាកដ មែនគឺពុំមានពាក់ពន្ធ័បទល្មើសព្រហ្មទណ្ឌ័អ្វីឡយ។
ក្រោយពីបានពិនិត្យចប់សព្វគ្រប់ហើយសមត្ថកិច្ចបានប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី៕

ភ្នំពេញ ៖ យុវជនម្នាក់មានអាយុជាង២០ឆ្នាំ រស់នៅក្នុង«មណ្ឌលសំចតព្រៃស្ពឺ» មិនទាន់ដឹងច្បាស់ថាមានជំងឺអ្វីខ្លះនោះទេ បន្ទាប់ពីខាងមណ្ឌលសំចត សង្គមកិច្ចរាជធានីភ្នំពេញ ដែលមានទីតាំងស្ថិតនៅក្នុងភូមិស្រែជម្រៅ សង្កាត់ចោមចៅ២ ខណ្ឌពោធិសែនជ័យ ដឹកតាមរថយន្តចូលមន្ទីរពេទ្យបង្អែកពោធិចិនតុង សង្កាត់កាកាប១ ខណ្ឌពោធិសែនជ័យ ហើយប្រញ៉ាប់ប្រញ៉ាល់បើករថយន្តចាកចេញទៅបាត់ ក្រុមគ្រូពេទ្យ ពិនិត្យជាក់ស្តែង ឃើញយុវជនខាងលើក្នុងសភាពធ្ងន់ធ្ងរ ក៏ដឹកតាមរថយន្តសង្គ្រោះគោលបំណងឆ្ពោះទៅមន្ទីរពេទ្យព្រះកុសុមៈ ជាអកុសលដល់ចំណុចផ្សារទឹកថ្លា យុវជនខាងលើស្លាប់បាត់ជីវិត ទើបទឹកវិលត្រឡប់មកវិញ កាលពីវេលាម៉ោង៧ព្រឹក ថ្ងៃទី០៣ ខែមករា ឆ្នាំ២០១៩ ទំនាក់ទំនងហៅខាងមណ្ឌលមកវិញ តែពុំបានលទ្ធផល មានតែរាយការណ៍ទៅសមត្ថកិច្ច ចុះពិនិត្យមើលជាក់ស្តែង ។

តាមបុគ្គលិកបម្រើការងានៅមន្ទីរពេទ្យបង្អែកពោធិចិនតុង បានឲ្យដឹងថា នៅវេលាម៉ោង៦និង៣០នាទីព្រឹក ថ្ងៃទី០៣ ខែមករានេះ ខាងមណ្ឌលសំចត សង្គមកិច្ចរាជធានីភ្នំពេញ ស្រែជម្រៅ បានដឹកអ្នកជម្ងឺម្នាក់ តាមរថយន្តរបស់មណ្ឌល មកចូលមន្ទីរពេទ្យបង្អែក ដាក់ចុះឲ្យក្រុមគ្រូពេទ្យជួយពិនិត្យមើល រថយន្តរថយន្តមណ្ឌលប្រញ៉ាប់ប្រញ៉ាល់ បើកចាកចេញទៅវិញបាត់ ទុកអ្នកជម្ងឺ ទាំងគ្មានអ្នកផ្តល់ព័ត៌មានជុំវិញជម្ងឺរបស់យុវជនរូបនេះ ដោយឃើញជាក់ស្តែង ស្ថានភាពធ្ងន់ធ្ងរ ខាងមន្ទីរពេទ្យបង្អែក ក៏បានដឹកបញ្ជូនទៅមន្ទីរពេទ្យព្រះកុសុមៈ ទើបបានពាក់កណ្តាលផ្លូវ បានស្លាប់បាត់ ទើបដឹកវិលមកមន្ទីរពេទ្យវិញ ព្យាយាមទំនាក់ទំនងទៅខាងមណ្ឌល ដើម្បីសាកសួរព័ត៌មាន ឬក្រុមគ្រួសារ ទោះជាយ៉ាងណា មិនបានមកសហការបំភ្លឺរឿងនេះឡើយ។

ក្រោយពីយុវជនរូបនេះស្លាប់ ខាងមណ្ឌលមិនសហការជាមួយសមត្ថកិច្ច គ្រូពេទ្យ មានតែសមត្ថកិច្ចមូលដ្ឋាន ជំនាញក្រុងចុះទៅពិនិត្យជាក់ស្តែង និងរងចាំសម្រេចពីថ្នាក់លើ ។

បើតាមមតិមហាជនបានឲ្យដឹងថា មណ្ឌលសំចត សង្គមកិច្ចរាជធានីភ្នំពេញ ស្រែជម្រៅ ច្រើនដងមកហើយ មិនទទួលខុសត្រូវ ចំពោះ ជនជាប់ឃុំ ក្នុងមណ្ឌល ដែកកើតមានបញ្ហាផ្នែកសុខភាពឡើយ សូម្បីសមត្ថកិច្ចមូលដ្ឋាន ទៅសុំសហការ សាកសួរ ត្រូវធ្វើការងារផ្សេងៗ មិនទាំងឲ្យសមត្ថកិច្ច ប៉ូលិសទៅក្បែរផង ប្រជាពលរដ្ឋមិនយល់ពីប្រព័ន្ធការងារ របស់មណ្ឌល មើលតែមានតែឯង ចង់មិនចង់ អ្នកសុំទាន មនុស្សអនាថា ឬមនុស្សមានជម្ងឺស្រាប់ ដែលចាប់ឃាត់យកពីមូលដ្ឋានមួយចំនួនទៅ គ្មានសាច់ញាតិទៅសាកសួរ ២ឬ៣ថ្ងៃ ដេញចេញបាត់ ពោលទុកតែជនណាដែលមានប្រយោជន៍ដល់មណ្ឌល ៕

បន្ទាយមានជ័យ ៖ ជនជាប់ចោទម្នាក់ត្រូវបានស្លាប់បន្ទាប់ពីឃុំខ្លួនមួយយប់នៅពន្ធនាគារខេត្តបន្ទាយមានជ័យ។

យោងតាមប្រភពព័ត៌មានដែលអាចជឿទុកចិត្ត បានអោយដឹងថា ជនជាប់ចោទមានឈ្មោះ ទុយ ស្រស់ អាយុ៣៤ឆ្នាំ មានទីលំនៅ ក្នុងភូមិជ្រៃ ឃុំ សឹង្ហ ស្រុកអូរជ្រៅ ខេត្តបន្ទាយមានជ័យ ត្រូវបានចាប់ខ្លួននៅក្នុងសកម្មភាពតវ៉ារឿងដីធ្លី នៅមុខសាលាខេត្តបន្ទាយមានជ័យកាលពីថ្ងៃទី៣១ ខែ ធ្នូ ឆ្នាំ ២០១៩។

ប្រភពបានបញ្ជាក់អោយដឹងដែរថា ប្រជាពលរដ្ឋមួយក្រុមបាននាំគ្នាមកប្រមូលផ្តុំតវ៉ានៅមុខសាលាខេត្តដើម្បីសុំអោយអាជ្ញាធរជួយដោះស្រាយរឿងដីធ្លីរបស់ពួកគាត់ស្ថិតនៅចំនុច បឹងកន្សែង ឃុំ សឹង្ហ ស្រុក អូរជ្រៅ ដែលអាជ្ញាធរចុះរុះរើនិងហាមឃាត់កាលពីអំឡុងដើមខែធ្នូកន្លងទៅ។

ក្នុងសកម្មភាពតវ៉ារឿងដីធ្លីនៅមុខសាលាខេត្តនោះដែរ សមត្ថកិច្ចបានចាប់មនុស្សចំនួន៥នាក់ ដែលគេអះអាងថា ជាមេក្លោងញ៉ុះញុងអោយមានការតវ៉ា។មនុស្សទាំង៥នាក់ដែលត្រូវឃាត់ខ្លួនមាន ១-ឈ្មោះ នូវ នឿន ភេទប្រុស អាយុ ៦១ ឆ្នាំ រស់នៅ ភូមិគីឡូម៉ែត្រលេខ៤ សង្កាត់ ផ្សារកណ្តាល ក្រុងប៉ោយប៉ែត ២- ឈ្មោះ យិប ម៉ក់ ភេទប្រុស អាយុ ៦២ឆ្នាំ រស់នៅ ភូមិជ្រៃ ឃុំសឹង្ហ ស្រុក អូរជ្រៅ ៣-ឈ្មោះ ហឹម គីរី ភេទប្រុស អាយុ ៤៥ឆ្នាំ រស់នៅភូមិ ស្រមោច ឃុំ-ស្រុក ព្រះនេត្រព្រះ ៤-ឈ្មោះ អាន រួន ភេទប្រុស អាយុ ៥៩ ឆ្នាំ រស់នៅភូមិក្បាលខ្ទីង ឃុំ បុស្បូវ ស្រុកព្រះនេត្រព្រះ និង៥-ឈ្មោះ ទុយ ស្រស់ ភេទប្រុស អាយុ៣៤ឆ្នាំ រស់នៅ ភូមិជ្រៃ ឃុំសឹង្ហ ស្រុក អូរជ្រៅ ។ក្រោយចាប់ខ្លួន សមត្ថកិច្ចបានបញ្ជូនខ្លួនភ្លាមៗទៅកាន់ពន្ធនាគារខេត្តតាមអំណាចអយ្យការ។

បន្ទាប់ពីឃុំខ្លួនរយៈពេលមួយថ្ងៃមួយយប់ជនជាប់ចោទឈ្មោះ ទុយ ស្រស់ ត្រូវបានបញ្ចេញចេញទៅមន្ទីរពេទ្យ បង្អែកមង្គលបូរីដើម្បីព្យាបាល ខណៈជនជាប់ចោទមានអាការៈទ្រុឌទ្រោមខ្លាំង ហើយក៏បានស្លាប់ក្នុងមន្ទីរពេទ្យនោះទៅ។

ជួបជាមួយអ្នកយកព័ត៌មានយើងតាមទូរសព្ទ័ លោក អ៊ុង ស៊ីផាន ប្រធានពន្ធនាគារខេត្តបន្ទាយមានជ័យមិនបានបញ្ជាក់ពីមូលហេតុនៃការស្លាប់របស់ជនជាប់ចោទខាងលើនេះទេដោយលោកសុំទោសថាប៉ូលីសកំពុងធ្វើការហើយ ។

តែទោះជាយ៉ាងណាក៏ដោយក្រុមគ្រួសារជនជាប់ចោទបានអះអាងថា ការស្លាប់នេះគឺបណ្តាលមកពីការធ្វើទារុណកម្មហួសកំណត់ ព្រោះលើរាងកាយរបស់សពមានស្នាមជាំគ្រប់កន្លែងរួមទាំងផ្ទៃមុខផងដែរ ពួកគាត់ក៏បានទាមទារអោយរកយុត្តិធម៌ចំពោះការស្លាប់នេះ៕

ភ្នំពេញ ៖ រាជរដ្ឋាភិបាល ចាប់ផ្តើមកែលម្អគុណភាព នៃការផ្តល់សេវាដែនដីនគរូបនីយកម្ម និងសំណង់នៅថ្នាក់ក្រោមជាតិ ដើម្បីធានាការផ្តល់សេវា ជូនប្រជាពលរដ្ឋឲ្យកាន់តែងាយស្រួល ពិសេសបង្កើនចំណូលថវិកាជាតិ។
ក្នុងឱកាសជួបពិភាក្សាការងាររវាងអភិបាលរាជធានីភ្នំពេញ និងក្រុមការងារអន្តរក្រសួង ស្តីពី ចុះសិក្សាទំរង់បែបបទ និង នីតិវិធី នៃការផ្តល់សេវា ក្នុងវិស័យរៀបចំដែនដីនគរូបនីយកម្ម និងសំណង់នៅថ្ងៃទី២ ខែមករា នេះ លោក ប្រាក់ សំអឿន អគ្គនាយក នៃអគ្គនាយកដ្ឋាន រដ្ឋបាលក្រសួងមហាផ្ទៃ និង ជាប្រធានក្រុមការងារ អន្តរក្រសួងបានឲ្យដឹងថា ក្រសួងមហាផ្ទៃ បានសម្រេចជ្រើសរើសយករាជធានីខេត្តចំនួន៤ មាន៖ រាជធានីភ្នំពេញ ខេត្តកណ្តាល កំពង់ចាម និងខេត្តសៀមរាប ដើម្បីសិក្សានីតិវិធី ផ្តល់សេវាដីធ្លីឡើងវិញ នៅថ្នាក់ក្រោមជាតិ នៅតាមការិយាល័យច្រកចេញចូលតែមួយ។
លោកបានបញ្ជាក់ថា ការសម្រេចសិក្សាពីនីតិវិធី ផ្តល់សេវាដីធ្លីនៅរដ្ឋបាលថ្នាក់ក្រោមជាតិនេះ គឺជាការកែទម្រង់ការផ្តល់សេវាឲ្យកាន់តែងាយស្រួល ប្រកបដោយគុណភាព ជូនប្រជាពលរដ្ឋ ខណៈបច្ចុប្បន្ននីតិវិធី នៃការផ្តល់សេវាដីធ្លី នៅតាមការិយាល័យច្រកចេញចូលតែមួយមានភាពលំបាកស្មុគស្មាញ ដែលជាហេតុផ្តល់សេវាពុំសូវបានល្អ។
លោក ឃួង ស្រេង អភិបាលរាជធានីភ្នំពេញ បានសម្តែងនូវការគាំទ្រ ចំពោះការកែទម្រង់លើការផ្តល់សេវាផ្នែកដែនដីនគរូបនីយកម្ម និងសំណង់នៅថ្នាក់រាជធានីខេត្តនេះថា នឹងជួយដោះស្រាយការលំបាកជាច្រើន រវាងមន្រ្តីផ្តល់សេវា និង អ្នកមកទទួលសេវា ឲ្យកាន់តែងាយស្រួលជាងមុន លឿនរហ័ស និង ប្រកបដោយគុណភាព។
លោកអភិបាលរាជធានីភ្នំពេញបានអៈអាងថា កន្លងមកនេះ ប្រជាពលរដ្ឋ បានគាំទ្រយ៉ាងខ្លំាង លើការមកទទួលសេវាផ្នែកនេះ នៅរាជធានីភ្នំពេញ ប៉ុន្តែក៏បានជួបបញ្ហាប្រឈមមួយចំនួន ក្នុងការផ្តល់សេវាមិនបានទាន់ពេលវេលាផងដែរ ដោយសារប្រជាពលរដ្ឋ ដែលជាអ្នកស្នើសុំ ដាក់ពាក្យពុំបានភ្ជាប់ ជាមួយនឹងឯកសារគ្រប់គ្រាន់ ការដកឯកសារត្រលប់ទៅវិញហើយលក់ទៅឲ្យអ្នកដ៏ទៃច្រើនដំណាក់កាល ឯកសារមានជាប់បណ្តឹង ខ្វះស្នាមមេដៃ អ្នកជាប់ព្រំជាដើម។
គួរបញ្ជាក់ថា ចាប់ពីបើកដំណើរការការិយាល័យច្រកចេញចូលតែមួយ នៅរាជធានីភ្នំពេញ ចាប់ពីឆ្នាំ២០១៧ មកដល់ដំណាច់ឆ្នាំ២០១៩ ការិយាល័យនេះ បានផ្តល់សេវាជូនប្រជាពលរដ្ឋ បានចំនួនជាង ៣១០០០សេវា ហើយទទួលបានទឹកប្រាក់ ចូលថវិកាជាតិ ជាង៤៧៤៤លានរៀលផងដែរ៕

ភ្នំពេញ ៖ នៅឆ្នាំ២០១៩ សមត្ថកិច្ច (ប៉ូលិស និងអាវុធហត្ថ) បានបង្ក្រាបករណីជួញដូរ និងប្រើប្រាស់គ្រឿងញៀនជាង៩ពាន់ករណី ឃាត់មនុស្សជាង២ម៉ឺននាក់ ដកហូតថ្នាំញៀនជាង៧២០ គីឡូក្រាម។ នេះបើយោងតាមរបាយការណ៍របស់គណៈកម្មការទី៣ នៃយុទ្ធនាការប្រឆាំងគ្រឿងញៀន។

របាយការណ៍បន្តថា លទ្ធផលអនុវត្តន៍ច្បាប់ចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០១៩ សមត្ថកិច្ចបង្ក្រាបបាន ៩៥៧២ករណីឃាត់មនុស្ស២០១១៣នាក់ (ស្រី១៣២៥នាក់) ក្នុងនោះជនបរទេស ៤០១នាក់ (ស្រី៦៤នាក់) មាន១២សញ្ជាតិ។ ក្នុងចំណោមការបង្ក្រាបជាង៩ពាន់ករណី មានករណីជញដូរ រក្សាទុក កែច្នៃ ចាត់ចែង និងដាំដុះ ចំនួន៥៧០៥ករណី ឃាត់មនុស្ស១០៩៥០ នាក់(ស្រី ៨៨៨នាក់) និងករណីប្រើប្រាស់ ៣៨៦៧ករណី ឃាត់មនុស្ស ៩១៦៣នាក់ (ស្រី៤៣៧នាក់)។ ចំណែកករណីអនុវត្តន៍ដីកាមានចំនួន៣២៩ដីកា ឃាត់មនុស្ស ៣២៤នាក់ (ស្រី១១នាក់)។

របាយការណ៍បញ្ជាក់ថា ចំពោះសារធាតុញៀនគ្រប់ប្រភេទដែលសមត្ថកិច្ចដកហូតបានមានចំនួនជាង៧២០គីឡូក្រាម និង៩១៣កញ្ចប់តូច, កញ្ឆាក្រៀមជិត១០០គីឡូក្រាម និង ៩៤,៤៤១ដើម, សម្ភារៈចាប់យកមានរថយន្ដ ៦៤គ្រឿង, ម៉ូតូ ២២៥២គ្រឿង, ទូរស័ព្ទ៥៨៧៨គ្រឿង, ជញ្ជីង៣២៩ គ្រឿង, អាវុធខ្លី៦ដើម អាវុធវែង១០ដើម, ចលន និងអចលនទ្រព្យស្នើសុំបង្កក ចំនួន២កន្លែង, ដីឡូត៍២កន្លែង និងផ្ទះល្វែង១កន្លែង៕

ខេត្តក្រចេះ ៖ ប្រធានមន្ទីទេសចរណ៍ខេត្តក្រចេះ បានឱ្យដឹងថា ក្នុងឱកាសថ្ងៃចូលឆ្នាំសាកល នៃថ្ងៃឈប់សំរាក មានភ្ញៀវទេសចរណ៍ជាតិ និងអន្តរជាតិមានចំនួនជាង៧ពាន់នាក់ បានមកលេង កំសាន្តនៅរមនីយដ្ឋានមួយចំនួនក្នុងខេត្ត។

ថ្លែងបញ្ជាក់នៅរសៀលថ្ងៃទី២ខែមករា នេះ លោក ជួប រតនា ប្រធានមន្ទីរទេសចរណ៍ខេត្ត បានឱ្យដឹងថា មានភ្ញៀវទេចរណ៍ចំនួន៧.៦៧៨នាក់ បានមកលេងកំសាន្តនៅតាមរមណីយដ្ឋាននានាក្នុងខេត្តក្រចេះ នៅថ្ងៃឈប់សម្រាកចូលឆ្នាំសកល ក្នុងនោះភ្ញៀវបានផ្តោតសំខាន់លើរមនីយដ្ឋានកាំពី ស្ថិតក្នុងឃុំសំបុក ស្រុកចិត្របុរី និងមានចំងាយជាង១០គីឡូម៉ែត្រ ពីទីប្រជុំជនខេត្តក្រចេះ។
លោកអះអាងថា ចំនួននេះ បើប្រៀបធៀបនិងឆ្នាំមុនគឺមានការកើនឡើង។

លោកបន្តថា រមណីយដ្ឋានទឹកជួរទន្លេមេគង្គកាំពី ជារមនីយដ្ឋានអេកូទេសចរណ៍មួយដែលគួរឲ្យទាក់ ទាញសម្រាប់ភ្ញៀវទៅលេងកំសាន្ត។ អ្វីដែលចាប់អារម្មណ៍នោះ គឺសន្ឋឹកទឹកហូរខ្មួលខ្មាញ់ថ្លារ ឆ្វង់នៅតាមជ្រលងថ្មកណ្តាលទន្លេមេគង្គ ដែលដុសអមទៅដោតជួរដើមជ្រៃទឹកសាប។

ភ្ញៀវទេសចរដែលទៅលេងកំសាន្តនៅទីនោះ ក្រៅពីអង្គុយទទួលទានអារហារនៅ លើរោងក្យូសផ្ទះទឹក ដែលសហគមន៍ទេចសរណ៍បានសង់ជាជួរៗនៅតាមមាត់ទឹកហូរ ពួក គាត់ក៏នាំគ្នាចុះងូតទឹកលេងក្នុងសភាពយ៉ាងសប្បាយអ៊ឺងកង។

ប្រធានមន្ទីរទេសចរណ៍ខេត្តលោក ជួប រតនា បានថ្លែងឲ្យដឹងទៀតថា នារដូវប្រាំងឆ្នាំ នេះអាជ្ញាធររបស់លោក បានចុះពិនិត្យមើលពីគុណភាពនិងលក្ខណះសម្បត្តិលើរោងក្យូស ក៏ដូចជាទីតាំងផ្សេងៗដែលរៀបចំពីប្រជាសហគមន៍សម្រាប់ទទួលភ្ញៀវមកលេងកំសាន្ត នា រដូវប្រាំង ដែលសម្បូរដោយថ្ងៃឈប់សម្រាក។

បន្ថែមពីលើនោះ ការពង្រឹងសេវាកម្មផ្នែកបដិសណ្ឋារកិច្ច ក៏ដូចជាតម្លៃមុខម្ហូប អនាម័យ នៃការវេចខ្ចប់ ក៏ត្រូវបានលោក ប្រធានមន្ទីរអះអាងថា ក្រុមការងាររបស់លោកបានចុះទៅ ពង្រឹងនិងបង្ហាត់បង្ហាញ ដល់ក្រុមប្រជាសហគមន៍នៅតាមតំបន់រមណីយដ្ឋាននានារួចអស់ទៅហើយដែរ៕