ប៉ោយប៉ែត ៖ ផ្ទះពលរដ្ឋប្រមាណ ៤៣ខ្នង ខ្លះមានទំហំ ​៤គុណនឹង ៥ម៉ែត្រ ធ្វើអំពីឈើប្រក់ស័ង្កសី ត្រូវប្រធានសហគមន៍លោក សាន់ ស៊ីម បញ្ជា និងនាំកម្លាំងប្រមាណជិត២០០នាក់មកពី ៥ភូមិក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ ចុះទៅរុះរើ និងបំផ្លាញចោល ធ្វើឲ្យពលរដ្ឋបាត់បង់ទីជម្រកគ្រប់ៗគ្នា កាលពីព្រឹកថ្ងៃទី៣ ខែមិថុនា ឆ្នាំ២០១៩ នៅចំណុច៦៧១ ឋិតក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ។

ក្នុងសកម្មភាពខាងលើនោះ គេឃើញមានសមត្ថកិច្ច និងប្រជាការពារភូមិ ចុះមកមើលដើម្បីការពារសុវត្តិភាព និងបញ្ជៀសអំពើរហិង្សាផងដែរ។ ​ជាមួយគ្នានេះ គេឃើញពលរដ្ឋប្រដាប់ដោយកាំបិត ពូថៅ និងដំបង ជាច្រើននាក់ តែមិនអាចទប់ស្កាតសកម្មភាពរុះរើនោះបានឡើយ ។

លោក សាន់ ស៊ីម ប្រធានសហគមន៍ បានបញ្ជាក់ថា ពលរដ្ឋដែលត្រូវក្រុមសហគមន៍ចុះរុះរើផ្ទះនោះ ដោយសារពួកគាត់បានមកសាងស់ង់ផ្ទះលើដីរបស់សហគមន៍ ដែលមានទំហំក្បាលដីទទឹង ១ពាន់ម៉ែត្រ ជម្រៅ ៥ពាន់ម៉ែត្រ ស្មើ៥០០ហិតា។ លោកបន្តថា ការចុះរុះរើផ្ទះរបស់ពលរដ្ឋនោះថា លោកមិនបានខ្វល់អំពីការឯកភាព ឬមិនឯកភាពពីអាជ្ញាធរនោះទេ ព្រោះថា ជាដីរបស់សហគមន៍ហេតុអ្វីក្រុមពលរដ្ឋទាំងនោះមកសង់ផ្ទះនៅ។ លោក សាន់ ស៊ីម បញ្ជាក់ថា លោកមានសិទ្ធការពារដីនេះ ព្រោះលោកត្រូវបានតែងតាំងដោយអភិបាលខេត្តបន្ទាយមានជ័យយ៉ាងត្រឹមត្រូវ ឲ្យលោកធ្វើជាប្រធានសហគមន៍ខាងលើនេះ។

ករណីរុះរើផ្ទះពលរដ្ឋអស់ជាង ៤០ខ្នង នេះលោក ហឹម យឿន តំណាងពលរដ្ឋបញ្ជាក់ថា ផ្ទះដែលពលរដ្ឋធ្វើនេះ មិនប៉ះពាល់នឹងដីរបស់សហគមន៏ដូចការលើកឡើងរបស់លោក សាន់ ស៊ីម ប្រធានសហគមន៍នោះទេ។ លោកបន្តថា កាចុះរុះរើ នេះមិនមានឯកសារលាយលក្ខអក្សរជូនដំណឹងជាមុន ឬជួបពិភាក្សាជាមួយក្រុមប្រជាពលរដ្ឋនោះ ឡើយ ហើយថា ដីព្រៃសហគមន៍មានបង្គោលព្រំត្រឹមត្រូវ ពីជ្រុងមួយទៅជ្រុងមួយ មិពាក់ព័ន្ធនឹងដីលំនៅឋានរបស់ពលរដ្ឋទេ ហេតុអីបានជាចុះរុះរើទាំងកម្រោលបែបនេះ។ តំណាងពលរដ្ឋរូបនេះ ប្រាប់ថា លោកនឹងប្តឹងតវ៉ាទៅថ្នាក់លើ ដើម្បីទាមទាររកយុត្តិធម៌ជូនម្ចាស់លំនៅដ្ឋានទាំងអស់។ មិនតែប៉ុណ្ណោះលោកថា បើទីតាំងកើតហេតុជាដីព្រៃសហគមន៌ ហេតុអ្វីមានគេលក់ដូរបាន ដោយអាជ្ញាធរចុះហត្ថលេខាទទួលស្គាល់លើឯកសាទិញលក់ ហើយលោកក៏មានឯកសារនោះក្នុងដៃរួចហើយ។

លោក ហ៊ឹម យឿន បញ្ជាក់ថា ដីចំណុច671 និងបឹងជម្រុក ជាដីរបស់អតីតយោធិនពលី ពិការ មានចំនួន631ហិកតា ធ្លាប់មានទំនាស់ប្តឹងផ្តល់គ្នាយូរឆ្នាំមកហើយ ជាមួយក្រុមហ៊ុនមួយរហូតមានចំណារជាបន្តបន្ទាប់ពីទីស្តីការគណៈរដ្ឋមន្ត្រី/រដ្ឋសភា និងក្រសួងមហាផ្ទៃ ប៉ុន្តែ ស ជ ណ របស់ថ្នាក់លើជាប់គាំងតាំងពីឆ្នាំ2011 មកទល់ពេលនេះ។

ទោះជាយ៉ាងនេះក្តី លោក សាន់ ស៊ីម ប្រធានសហគមន៍ បានលើកឡើងថា បញ្ហារុះរើសំណង់ របស់ប្រជាសហគមន៍ជារឿងត្រឹមត្រូវ ព្រោះបើទុកវាអាចទៅជាចលនាបំផុសរឿង ឈ្នះបានដីចាញ់បានលុយ។លោកបន្តថា លោកខិតខំប្រឹងបង្រួមទំនាស់ហត់នឿយចង់ជ្រុះសក់ទៅហើយ ៗថា សំណង់ទាំងអស់ជាសំណង់អនាធិបតេយ្យមិនដឹងថា ម្ចាស់សំណង់មកពីណា? អាជ្ញាធរ និងគណៈកម្មការណាបែងចែកដីឲ្យទេ ?។មិនតែប៉ុណ្ណោះលោកបញ្ជាក់ថា សម័យនេះ អ្នកណាមានដីចែកទៀត? លោកថា កន្លងមកឮក្រុមមួយអះអាងថា មានចំណាពីថ្នាក់លើ ប្រគល់ដីឲ្យពលរដ្ឋ ប៉ុន្តែពេលអាជ្ញាធរសុំមើលឯកសារបែរជាមិនដែលឃើញមានសោះ។

ប្រភពចុងក្រោយនៅរសៀលថ្ងៃទី៤ ខែមិថុនា នេះ បានឲ្យដឹងថា លោក សាន់ ស៊ីម ប្រធានសហគមន៏ ដែលបញ្ជាឲ្យពលរដ្ឋមករុះរើផ្ទះនោះ បានឲ្យមនុស្សមកហៅតំណាងប្រជាពលរដ្ឋគឺលោក ហ៊ឹម យឺន ដែលរងការរុះរើខូចខាតផ្ទះឲ្យទៅចរចា តែភាគីខាងប្រជាពលរដ្ឋមិនព្រមទៅជួប។

សូមជម្រាថា រហូតមកដល់ថ្ងៃទី៤ ខែមិថុនា នេះអាជ្ញាធរមិនទាន់បានបញ្ជាក់ ឬបកស្រាយបែបណាចំពោះវិវាទដីធ្លីខាងលើនេះនៅឡើយទេ៕ ដោយ ៖ ន.វ.   

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នាព្រឹកថ្ងៃទី៣ ខែមិថុនា នេះ បានបញ្ចេញប្រតិកម្មខ្លាំងៗដែលមិនធ្លាប់មានទាល់តែសោះ ដោយប្រើពាក្យហៅលោក សម រង្ស៊ី ថា «អាឆ្កែ កូនអាក្បត់ជាតិ»។

ប្រតិកម្មរបស់នាយករដ្ឋមន្ត្រីបែបនេះ បានធ្វើឡើងបន្ទាប់ពីលោក សម រង្ស៉ី កាលពីពេលថ្មីៗនេះ បានប្រកាសចូលចាប់សម្តេចតេជោ ហ៊ុន សែន ហើយប្រឌិតនូវព័ត៌មានញុះញង់ដោយភ្ជាប់ករណីស្លាប់របស់លោក ហុក ឡង់ឌី អតីតអគ្គស្នងការនគរបាលជាតិ ដែលជាដន្លងរបស់សម្តេច ថា សម្តេចតេជោ ហ៊ុន សែន គឺជាអ្នកសម្លាប់ ហើយថែមទាំងអះអាងថា កូនច្បងរបស់លោក ហុក ឡង់ឌី គឺលោក ឌី វិជ្ជា កំពុងរកវិធីសងសឹក តាមរយៈការសហការជាមួយសម្តេចក្រឡាហោម ស ខេង ​ទៀតផង។

សម្តេចតេជោ ហ៊ុន សែន បានបែបនេះ ថ្លែងក្នុងពិធីប្រគល់សញ្ញាបត្រ ដល់និស្សិតសាកលវិទ្យាល័យភូមិន្ទភ្នំពេញ (RUPP) នៅមជ្ឈមណ្ឌលកោះពេជ្រ នាព្រឹកថ្ងៃទី៣ ខែមិថុនា ឆ្នាំ២០១៩។ សម្តេចតេជោ ក៏បានបញ្ជាក់ផងដែរថា«…. អ្វីដែលសម្តេចបានប្រកាសធ្វើសង្គ្រាមជាមួយទណ្ឌិត សម រង្ស៉ី នៅទីក្រុងតូក្យូ មិនមែនជារឿងចៃដន្យនោះទេ ប៉ុន្តែជាចេតនារបស់សម្តេច ចង់ឱ្យពួកគេដឹង…»។

សម្តេចតេជោ បានបញ្ជាក់ថា ៖ «…ឥឡូវចេញមក វាឱ្យកូនខ្ញុំមកសងសឹកខ្ញុំទៅទៀត អាឆ្កែ១ក្បាលនេះ ប៉ុន្តែអាឆ្កែ១ក្បាលនេះ កាលពីមុនស្រួលប្រើមែនទែន ប្រើវាឱ្យជួយកែរដ្ឋធម្មនុញ្ញពី២ភាគ៣ មកត្រឹម ៥០+១ ប៉ុន្តែអាឆ្កែ១ក្បាលនេះ ក្បត់ម្ចាស់រហូត ដូចឪវាអញ្ចឹង ហ្អែងឈ្លើយម្ល៉េះ ហើយបានវិទ្យុមួយទេគ្រាន់សម្ភាស អញប្រើហ្អែង ហើយចាប់ពីថ្ងៃនេះទៅ អញហៅហ្អែងតែអាឆ្កែទេ អាឆ្កែកូនអាក្បត់ជាតិ ហ្អែងចេះជេរអញ អញក៏ចេះជេរហ្អែងដែរ..»។

គួររំឭកថា លោក សម សារី ដែលជាឪពុករបស់ លោក សម រង្ស៉ី គឺជាអ្នកនយោបាយជំនាន់សង្គមរាស្រ្តនិយម ដែលត្រូវបាន អតីតព្រះមហាក្សត្រ ហៅថា ជាជនក្បត់ជាតិ។ តាមឯកសាររបស់ « សមាគមឯកសារវិទូខ្មែរ» បានរៀបរាប់ថា លោក សម សារី ក្នុងអំឡុងឆ្នាំ១៩៥៦ បានលួចឃុបឃិតជាមួយសហរដ្ឋអាមេរិក ក្នុងចេតនាផ្តួលរំលំរបបសង្គមរាស្រ្តនិយមរបស់សម្តេច នរោត្តម សីហនុ ដែលជាប្រមុខដឹកនាំបានផ្តល់គុណូបការៈគុណជាច្រើនសម្រាប់រូបលោក។ ល្បិចកិច្ចកលរបស់លោក សម សារី ក្នុងការដណ្តើមអំណាចនេះ ធ្វើឲ្យព្រះប្រមុខរដ្ឋ សម្ត្តេច នរោត្តម សីហនុ ដឹងជាមុន ហើយបានប្រកាសដកតំណែង និងឋានន្តរស័ក្តិសព្វបែបយ៉ាង។

គួរកត់សម្គាល់ថា នេះជាលើដំបូងហើយ ដែលប្រមុខដឹកនាំរាជរដ្ឋាភិបាល និងជាប្រមុខដឹកនាំនយោបាយឈ្នះៗដ៏កំពូលរបស់កម្ពុជា បានបញ្ចេញប្រតិកម្មដោយពាក្យសំដីតិះដៀលដ៏កម្រសម្រាប់អ្នកនយោបាយ។ ប្រតិកម្មគួរឲ្យភ្ញាក់ផ្អើលម្តងនេះ ធ្វើឲ្យមានការគិតថា ជីវិតនយោបាយរបស់លោក សម រង្ស៊ី ទំនងជាត្រូវបញ្ចប់ជាស្ថាពរគ្មានឱកាសនឹងឈានជើងចូលប្រឡូកក្នុងឆាកនយោបាយនៅកម្ពុជាបានទៀតឡើយ។ គេនៅចាំបានថា កន្លងមក នាយករដ្ឋមន្ត្រីកម្ពុជាសម្តេចតេជោ ហ៊ុន សែន ក៏ធ្លាប់ប្រកាសដាច់ណាត់ម្តងជាពីរដងរួចមកហើយថា បើសម្តេចចុះហត្ថលេខាស្នើព្រះមហាក្សត្រលើកលែងទោសឲ្យលោក សម រង្ស៊ី សម្តេចនឹងកាត់ដឺម្ខាងចោល៕ ដោយ ៖ ខេមរិន្ទ

ខេត្តតាកែវ ៖ ប្រភពព័ត៌មាន បានឲហយដឹងថា មានករណីរំលោភ និងប្លន់លោកយាយអាយុ ៧៨ឆ្នាំម្នាក់ បានសម្រេចត្រង់ចំណុចបន្ទប់ក្រោមផ្ទះរបស់លោកយាយរងគ្រោះ ស្ថិតនៅភូមិស្វាយស ឃុំរាមអណ្ដើក ស្រុកគីរីវង់ ខេត្តតាតែវ កាលពីវេលាម៉ោង៣ ទៀបភ្លឺ ឈានចូលថ្ងៃទី៣ ខែមិថុនា ឆ្នាំ២០១៩ ។

តាមប្រភពពីកន្លែងកើតហេតុ បានអោយដឹងថា ជនសង្ស័យបានស្រែក ហៅជនរងគ្រោះឲ្យបើកទ្វារ ខណ:នោះ ជនរងគ្រោះបានបើកទ្វារចេញមករកមើលមិនឃើញ គាត់ក៏ចូលទៅក្នុងបន្ទប់វិញ ស្រាប់តែឃើញជនសង្ស័យនៅក្នុងទីនោះដែរ ក្រោយមកក៏ចាប់ផ្ដើមធ្វើសកម្មភាពបង្ខំរំលោភផ្លូវភេទលើលោកយាយរងគ្រោះរហូតបានសម្រេច ហើយបានគំរាមយកចញ្ចៀន ១វង់ លុយ ៥ម៉ឺនរៀល ហើយចេញទៅក្រៅបាត់។

សូមជម្រាបថា ក្នុងថ្ងៃកើតហេតុ លោកយាយស្នាក់នៅក្នងផ្ទះនោះតែម្នាក់ឯងទេ។

ក្រោយកើតហេតុសមត្ថកិច្ច ចុះត្រួតពិនិត្យជុំវិញកន្លែងកើតហេតុ ដើម្បីប្រមូលភស្ភុតាងកសាងសំណុំរឿង និងកំណត់មុខសញ្ញាជនសង្ស័យ តាមស្រាវជ្រាវចាប់ជនល្មើសមកផ្ដន្ទាទោសទៅតាមផ្លូវច្បាប់៕ ដោយ ៖ សុផល

បន្ទាយមានជ័យ ៖ រដ្ឋបាលខេត្តបន្ទាយមានជ័យ បានរៀបចំពីធីអបអរសាទរ ទិវាសប្តាហ៍ជាតិ សុវត្ថិភាពចរាចរណ៍ផ្លូវគោកលេីកទី១២ រួមគ្នាគាំទ្រ ការរឹតបន្តឹងអនុវត្តន៍ច្បាប់ ស្តីពីចរាចរណ៍ផ្លូវគោក ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់ លោក អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ រួមនឹងមានការចូលរួមពីមន្ត្រីរាជការ សមត្ថកិច្ចពាក់ព័ន្ធគ្រប់ជាន់ថ្នាក់ ប្រជាពលរដ្ឋ សិស្ស-និស្សិត បានចូលរួម ដែលប្រព្រឹត្តនៅបរិវេនសួនមានជ័យ ក្រុងសិរីសោភ័ណ នាថ្ងៃទី ០៣ ខែមិថុនា ឆ្នាំ២០១៩ ។

ក្នុងឱកាសនោះ លោក អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានផ្តល់នូវអនុសាសន៍ មួយចំនួនដូចជា ៖ ១/ត្រូវពាក់មួកសុវត្ថិភាពជានិច្ចក្នុងពេលធ្វើដំណើរតាមទោចក្រយានយន្ត ។ ២/ មិនត្រូវបើកបរលើសល្បឿនកំណត់ដាច់ខាត ។ ៣/ មិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត ។ ៤/ ត្រូវគោរពសិទ្ធិអាទិភាពគោរពសញ្ញាចរាចរណ៍និងប្រកាន់ស្ដាំជានិច្ច ។ ៥/ ត្រូវពាក់ខ្សែក្រវ៉ាត់សុវត្ថិភាពជានិច្ចក្នុងពេលធ្វើដំណើរទៅតាមរថយន្ត។ ៦/ មិនត្រូវបត់ ឬជែងក្នុងភាពប្រថុយប្រថាន ឬប្រើទូរសព្ទក្នុងដោយគ្មានឧបករណ៍ភ្ជាប់សម្លេងទំនាក់ទំនងឡេីយ។ ៧/ ត្រូវពិនិត្យលក្ខណៈបច្ចេកទេសយានយន្តជានិច្ចពិសេសពិនិត្យមើលកង់ ចង្កូត ហ្វ្រាំង និងភ្លើងបំភ្លឺ-ល- មុនពេលចេញធ្វេីដំណេីរ ។ ៨/ សូមកុំផ្ទុកអ្នកដំណើរឬទំនិញលើសច្បាប់កំណត់ ចំពោះរថយន្តដឹកអ្នកដំណើរ និងរថយន្តដឹកកម្មករ មិនត្រូវផ្ទុកអ្នកដំណើរ ឬកម្មករលើដំបូល និងសូមមេត្តាកុំដំឡើងថ្លៃធ្វើដំណើរ។ ៩/ មិនត្រូវបើកបរក្នុងស្ថានភាពងងុយដេកជាដាច់ខាត។ ១០/ ត្រូវបើកបរក្នុងស្មារតីប្រុងប្រយ័ត្នជានិច្ចប្រកបដោយសីលធម៌យោគយល់អធ្យាស្រ័យគ្នា។ ជាមួយគ្នានោះឯកឧត្តម អភិបាលខេត្តក៏បានជម្រុញដល់ក្មួយគរុកសិស្ស និស្សិត សិស្សានុសិស្ស ត្រូវចូលរួមគោរពច្បាប់ចរាចរណ៍ឲ្យបានទាំអងស់គ្នា និងត្រូវចូលរួមអប់រំ ផ្សព្វផ្សាយពីច្បាប់ចរាចរណ៍ ទៅដល់មិត្តភត្កិ បងប្អូន តាមសាលារៀន សហគមន៍ ឲ្យបានយល់ច្បាស់ពីច្បាប់ចរាចរណ៍ផ្លូវគោក ដេីម្បីចូលរួមកាត់បន្ថយគ្រោះថ្នាក់ចរាចណ៍ដែលកេីតមាននៅក្នុងប្រទេសកម្ពុជា ពិសេសអនុវត្តន៍តាមអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រ កម្ពុជា “ថ្ងៃ នេះ ថ្ងៃស្អែក សូមកុំឲ្យមានគ្រោះថ្នាក់ចរាចរណ៍ ” ។

យោងតាមរបាយការណ៍របស់ស្នងការដ្ឋាននគបាលខេត្តបានបង្ហាញថា ៖ ក្នុងឆមាសទី១ ឆ្នាំ២០១៩ គ្រោះថ្នាក់ចរាចរណ៍កេីតមានទូទាំងខេត្តបន្ទាយមានជ័យកើតឡើងមានចំនួន ១០១លើក ក្នុងនោះរួមមាន៖ គ្រោះថ្នាក់ប្រភេទធ្ងន់ចំនួន៩៥ករណី , គ្រោះថ្នាក់ប្រភេទស្រាលចំនួន០៦ករណី បណ្ដាលឲ្យមនុស្សស្លាប់៦៣នាក់/ស្រី ១៤នាក់ ,របួសធ្ងន់ចំនួន៩៣នាក់/ស្រី២០នាក់ ,របួសស្រាលចំនួន៥៧នាក់/ស្រី១១នាក់ ។

សរុបគ្រោះថ្នាក់ចរាចរណ៍ចំនួន ២១៣នាក់ ដោយក្នុងនោះមិនមានមួកសុវត្ថិភាព និងមិនពាក់ខ្សែក្រវាត់ចំនួន៩០នាក់ ។ ចំពោះ ករណីដែលបង្កឲ្យកេីតមានគ្រោះចរាចរណ៍ភាគច្រេីនបង្កឡេីងដោយកត្តាមនុស្ស ៩៨/១០១ករណី ។ ករណី ដែលគ្រោះថ្នាក់ច្រេីនជាងគេគួឲ្យកត់សំគាល់មាន បេីកបរលេីសល្បឿនកំណត់ (ល្បឿនលឿន ) ,បេីកបរក្នុងស្ថានភាពស្រវឹង, បេីកបរជែងក្នុងស្ថានភាពគ្រោះថ្នាក់ និងមិនគោរពច្បាប់ ៕ ដោយ ៖ ស.រ. 

ខេត្តស្វាយរៀង ៖ សមត្ថកិច្ចកងរាជអាវុធហត្ថ បានចុះបង្ក្រាបក្រុមឈ្មួញលួចនាំកូនជ្រូករស់ពីប្រទេសវៀតណាម មកតាមច្រករបៀងឆ្លងដែនចូលមកទឹកដីរដ្ឋបាលស្រុករមាសហែក ប្រគល់អោយចការិយាល័យ ផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្ត កាលពីវេលាម៉ោង១០យប់ ថ្ងៃទី១ ខែមិថុនា ២០១៩ នេះ ចំនួន៥៤ក្បាល យកទៅមន្ទីរកសិកម្មរុក្ខាប្រមាញ់ និងនេសាទខេត្តស្វាយរៀង ដើម្បីចាត់ការតាមនីតិវិធី។

ទាក់ទងករណីនេះដែរ សមត្ថកិច្ចបានឲ្យដឹងថា ក្រុមសមត្ថកិច្ចចរាចរសត្វការិយាល័យផលិតកម្ម និងបសុព្យាបាលខេត្តស្វាយរៀង និងមន្ត្រីបសុព្យាបាលស្រុករមាសហែក បាន សហការជាមួយកងរាជអាវុធហត្ថ ស្រុករមាសហែក ឃាត់បានរថយន្តមួយគ្រឿង ម៉ាកតូយូតាដឹក កូនជ្រូករស់ចំនួន៥៤ក្បាល កាលពីវេលាម៉ោង១០យប់ ថ្ងៃទី១ ខែមិថុនា ឆ្នាំ២០១៩ នៅត្រង់ចំណុចភូមិត្រពាំងព្រីង ឃុំកំពង់អំពឹល ស្រុករមាសហែក សង្ស័យក្រុមឈ្មួញដឹកមកពីប្រទេសវៀតណាម។

ក្រោយពីសមត្ថកិច្ចឃាត់រថយន្តដើម្បីត្រួតពិនិត្យនិងសាកសួររកច្បាប់អនុញ្ញាតិគឺគ្មានទើបសមត្ថកិច្ចឃាត់រថយន្តរួមទាំងវត្ថុតាងកូនជ្រូកចំនួន៥៤ក្បាលយកមករក្សាទុកនៅមន្ទីរកសិកម្មខេត្តដើម្បីអនុវត្តតាមនីតិវិធីច្បាប់។

បើតាមលោក ប៉ែន ចន្ធី ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្ត បានឲ្យដឹងថា ដោយសង្ស័យមានផ្ទុកជំងឺប៉េស្តអាហ្វ្រិក មន្ត្រីជំនាញបានបូមឈាមកូនជ្រូកទាំងអស់ យកទៅពិនិត្យនៅមន្ទីរពិសោធន៍នៃអគ្គនាយកដ្ឋានសុខភាពសត្វ និងផលិតកម្មសត្វរាជធានីភ្នំពេញកាលពីវេលាម៉ោង៧និង៣០នាទីព្រឹកថ្ងៃទី២ ខែមិថុនា ឆ្នាំ២០១៩ នេះ ប្រសិនបើមានផ្ទុកជម្ងឺគឺដកហូតយកទៅកំទេចចោលបើគ្មានផ្ទុកជំងឺនោះទេ និងធ្វើការផាកពិន័យតាមច្បាប់៕ ​ ដោយ ៖​ សុផល

ភ្នំពេញ ៖ កម្ពុជា បានប្រកាសគាំទ្របេក្ខភាព ទីម័រខាងកើត (ទីម័រឡេស្តេ) ចូលជាសមាជិកសមាគមនៃប្រជាជាតិអាស៊ីអាគ្នេយ៍ ហៅកាត់ថា អាស៊ាន(ASEAN) ដែលនឹងរៀបចំនៅចុងឆ្នាំនេះ ។ នេះបើតាមការបញ្ជាក់របស់ លោក អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។

បើតាមលោក អ៊ាង សុផល្លែត បានឲ្យដឹងថា សម្ដេចតេជោ ហ៊ុន សែន បានថ្លែងថា កម្ពុជាគាំទ្រប្រទេសទីម័រឡេស្តេ ឲ្យចូលជាសមាជិករបស់អាស៊ាន ដោយសារសម្តេចយល់ឃើញថា ទីម័រមានសមត្ថភាពគ្រប់គ្រាន់ក្នុងការក្លាយជាសមាជិកអង្គការតំបន់មួយនេះ។ ការប្រកាសគាំទ្រទីម័រនេះ ធ្វើឡើងនៅក្នុងជំនួបទ្វេភាគីជាមួយ រដ្ឋមន្ត្រីក្រសួងការ បរទេស និង សហប្រតិបត្តិការនៃសាធារណេដ្ឋប្រជាធិបតេយ្យទីម័រខាងកើត លោក ឌីយូនីស្យូ ដាកូស្តា បាបូ ស័តរ៉េស(Dionisio da Costa Babo Soares) នៅវិមានសន្តិភាព។

លោក អ៊ាង សុផល្លែត បានបញ្ជាក់ឲ្យដឹងនៅក្រោយជំនួបថា ទាំងរដ្ឋាភិបាលទីម័រឡេស្តេ និងប្រជាជនទីម័រ សុទ្ធតែបានចាត់ទុកប្រទេសកម្ពុជា ជាបងប្អូនរបស់ខ្លួន ពិសេសទីម័រ អរគុណនិងគោរពចំពោះសម្ដេចតេជោ ហ៊ុន សែនដែលបានគាំទ្រចំពោះរដ្ឋាភិបាលក៏ដូចជាប្រទេសទីមរខាងកើតនាពេលកន្លងមក។ លោកបន្តថា ទស្សនកិច្ចរបស់លោកមកកាន់ប្រទេសកម្ពុជានៅពេលនេះ គឺក្នុងគោលបំណងពង្រឹងនូវកិច្ចសហប្រតិបត្តិការ និងមិត្តភាពឲ្យកាន់តែប្រសើររវាងប្រទេសទាំងពីរ កម្ពុជានិងទីម័រខាងកើត ។

លោកបន្តថា សម្ដេចតេជោ សង្កេតឃើញថា ប្រទេសទីម័រលឡេស្តេ បានរៀបចំនូវខ្លួនយ៉ាងល្អក្នុងការចូលជាសមាជិកអាស៊ាន ទាំងការរៀបចំឲ្យមានស្ថានទូតទាំងនៅគ្រប់ប្រទេសទាំងអស់នៅក្នុងអាស៊ាន ក៏ដូចជាសមត្ថភាពរបស់មន្ត្រីរាជការរបស់ទីម័រខាងកើត និងសមត្ថភាពនៃការគ្រប់គ្រងសេដ្ឋកិច្ច និងហិរញ្ញវត្ថុរបស់ប្រទេសទីម័រ។

សូមជម្រាបថា ប្រទេស ទីម័រខាងកើត មានប្រជាពលរដ្ឋចំនួនជាង ១ លាននាក់ ហើយបានប្រកាស ជារដ្ឋ ឯករាជ្យពីការគ្រប់គ្រងដោយប្រទេស ឥណ្ឌូណេស៊ី កាលពីឆ្នាំ២០០២ កន្លងទៅ គឺបានទទួលស្គាល់ដោយ អគ្គលេខាធិការអង្គការសហប្រជាជាតិលោក កូហ្វី អាណាន់ (Kofi Annan) ផងដែរ។

គួររំឭកថា បច្ចុប្បន្ន អាស៊ានមានសមាជិកចំនួន១០ប្រទេស ហើយកំពុងមានកំណើតសេដ្ឋកិច្ច គួរឱ្យកត់សម្គាល់។ ប្រទសកម្ពុជា ត្រូវបានចាត់ទុកថា ស្ថិតនៅក្នុងក្រុមអាស៊ានថ្មី ជាមួយនឹងប្រទេសឡាវ វៀតណាម និងមីយ៉ាន់ម៉ា ដែលចូលជាសមាជិកអាស៊ានក្រោយឆ្នាំ១៩៩០។ កម្ពុជាបានចូលជាសមាជិកអាស៊ាន ក្រោយគេ និងជាសមាជិកទី១០ នៅថ្ងៃ ទី ៣០ ខែ មេសា ឆ្នាំ ១៩៩៩ ហើយឆ្នាំ២០១៩នេះ ក៏ជាខួប២០ឆ្នាំ នៃការចូលជាសមាជិកអាស៊ានផងដែរ៕ ដោយ ៖ នរិន្ទ្រ

ភ្នំពេញ ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបញ្ជាក់ថា បញ្ហាកង្វះខាតអគ្គិសនីប្រើប្រាស់នៅទូទាំងប្រទេសនៅឆ្នាំនេះ ជាបទពិសោធន៏មួយសម្រាប់រាជរដ្ឋាភិបាល ដែលត្រូវបានគិតគូស្វែងរកប្រភពអគ្គិសនីមកជំនួស។ សម្តេចតេជោ បានថ្លែងដោយធានាថា នៅឆ្នាំក្រោយនេះ អ្នកនៅភ្នំពេញនឹងលែងខ្វះអគ្គិសនីប្រើប្រាស់ទៀតហើយ គ្រាដែលរាជរដ្ឋាភិបាលបានសម្រេចជួលម៉ាស៊ីនផលិតអគ្គិសនីដោយដើរប្រេងខ្មៅពីអាឡឺម៉ង់ និងហ្វាំងឡង់។ ការធានានេះ ត្រូវបានធ្វើឡើងនៅក្នុងពិធីចែកសញ្ញាបត្រជូនដល់និស្សិតជ័យលាភីជាង៣ពាន់នាក់ នៃសាកលវិទ្យាល័យភូមិន្ទភ្នំពេញ នៅព្រឹកថ្ងៃទី៣ ខែមិថុនា នេះ។

នៅក្នុងពិធីចែកសញ្ញាបត្រជូនដល់និស្សិតជ័យលាភីជាង ៣ពាន់នាក់ ដែលបញ្ចប់ការសិក្សាដោយជោគជ័យពីសាកលវិទ្យាល័យភូមិន្ទភ្នំពេញ នៅមជ្ឈមណ្ឌលសន្និបាតកោះពេជ្រ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានឲ្យដឹងថា រាជរដ្ឋាភិបាល នឹងជួលម៉ាស៊ីនផលិតអគ្គិសនីដើរដោយប្រេងខ្មៅពីប្រទេសអាឡឺម៉ង់ និងហ្វាំងឡង់ ដែលមានសមត្ថភាពផលិតអគ្គិសនីបាន ៤០០មេហ្គាវ៉ាត់ សម្រាប់យកមកផ្គត់ផ្គង់នៅកម្ពុជា ពិសេសនៅភ្នំពេញ។

បើតាមការបញ្ជាក់របស់សម្តេចតេជោ នៅខែតុលា ឆ្នាំនេះ ម៉ាស៊ីនទាំងពីរគ្រឿងនឹងមកដល់កម្ពុជា ហើយអ្នកនៅភ្នំពេញនៅឆ្នាំក្រោយ នឹងលែងខ្វះខាតអគ្គិសនីប្រើប្រាស់ទៀតហើយ។ សម្តេចបានចាត់ទុកកង្វះខាតអគ្គិសនីប្រើប្រាស់នៅទូទាំងប្រទេស ជាបទពិសោធន៏ថ្មីមួយរបស់កម្ពុជា ដែលរាជរដ្ឋាភិបាលត្រូវរកដំណោះស្រាយ នៅគ្រាដែលរាជរដ្ឋាភិបាល និងអគ្គិសនីកម្ពុជាវាយតម្លៃខុស ចំពោះការរីកចំរើនលឿនរហ័ស។ បន្ថែមជាមួយនឹងការជួលម៉ាស៊ីនចំនួនពីរគ្រឿងពីអាឡឺម៉ង់ និងហ្វាំងឡង់នាពេលនេះ រាជរដ្ឋាភិបាល ក៏បានដាក់ចេញនូវផែនការក្នុងការផលិតអគ្គិសនី ដើរដោយពន្លឺព្រះអាទិត្យ ថាមពលអគ្គិសនី ដើរដោយធ្យូងថ្ម ជាដើម ជាមួយនឹងតបណ្តាញអគ្គិសនីដែលបញ្ជូនពីប្រទេសឡាវ មកកាន់កម្ពុជា ផងដែរ។

សម្តេចតេជោ ហ៊ុន សែន បានថ្លែងទៀតថា ក្នុងដំណើរទស្សនកិច្ចនៅប្រទេសកាលពីសប្តាហ៍មុននេះ សម្តេចបានពិភាក្សាជាមួយលោក អាបេ នាយករដ្ឋមន្ត្រីជប៉ុនដើម្បីឲ្យរដ្ឋាភិបាលជប៉ុនជួយដល់កម្ពុជា លើបញ្ហាខ្វះខាតអគ្គិសនី ដោយសុំឲ្យជប៉ុនផ្តល់នូវហិរញ្ញប្បទាន ដើម្បីបន្តការវិនិយោគលើបណ្តាញតង់ស្យុងខ្ពស់៥០០គីឡូវ៉ុល ចាប់ពីព្រំដែនឡាវ មកដល់រាជធានីភ្នំពេញដែលមានចម្ងាយ៣៥០គីឡូម៉ែត្រ ព្រោះកម្ពុជាបានចរចាជាមួយឡាវរួចហើយ ដោយឡាវមានអគ្គិសនីតែគ្មានទីផ្សារដើម្បីបញ្ចេញ។

គួរជម្រាបថា ដោយសារកម្ពុជារងនូវបាតុភូតអែលនីញូ បានធ្វើឲ្យកម្ពុជាបានរងនូវសម្ពាធអាកាសធាតុក្តៅហួតហែង នាំឲ្យខ្វះខាតទឹកមិនអាចផលិតជាថាមពលអគ្គីសនីបានក្នុងរយៈពេលចុងក្រោយនេះ។វារីអគ្គិសនីកម្ពុជា អាចផលិតអគ្គិសនីប្រើប្រាស់ បានប្រមាណ ១.៤០០មេហ្គាវ៉ាត់ ប៉ុន្តែដោយសារខ្វះខាតទឹក វារីអគ្គិសនី អាចផលិតថាមពលអគ្គិសនីបានត្រឹមជិង ៦០០មេហ្គាវ៉ាត់ប៉ុណ្ណោះ​៕

ភ្នំពេញ ៖ បុរសជនជាតិចិនម្នាក់ បានរងរបួសសន្លប់ដេកដួលក្នុងថ្លុកឈាម ក្រោយពេលជនជាតិចិន ៣នាក់ព្រួតគ្នាចាក់ចំនួន៣កាំបិត ដោយសារដើរប៉ះគ្នារួចជេរឌឺដងបង្កទៅជាជម្លោះ ចំណែកក្រុមជនដៃដល់២នាក់ក្នុងចំណោមគ្នីគ្នា៣នាក់ ត្រូវបានសមត្ថកិច្ចឃាត់។

ហេតុការណ៏ភ្ញាក់ផ្អើលខាងលើនេះ បានកើតឡើងកាលពីវេលាម៉ោង ១០និង៣០នាទី ព្រឹកថ្ងៃទី៣ ខែមិថុនា ឆ្នាំ២០១៩ ស្ថិតនៅក្បែររបងស្ថានទូតចិន ផ្លូវម៉ៅសេងទុង សង្កាត់ទំនប់ទឹក ខណ្ឌចំការមន រាជធានីភ្នំពេញ។

ប្រភពព័ត៍មាននៅកន្លែងកើតហេតុបានឱ្យដឹងថាមុនពេលកើតជនរងគ្រោះ និងក្រុមជនដៃដល់ បានដើរប៉ះគ្នា ខណៈនោះជនរងគ្រោះ បានជេរទៅលើជនសង្ស័យ ដែលមានគ្នា៣នាក់ ទើបក្រុមជនសង្ស័យបានដកកាំបិតចុងស្រួចចាក់ ទៅលើជនរងគ្រោះចំនួន៣កាំបិត បណ្តាលអោយដេកដួលក្នុងថ្លុកឈាមសន្លប់បាត់ស្មារតីតែម្តង ហើយភ្លាមៗនោះ ត្រូវបានគេជួយដឹកបញ្ជូនទៅកាន់មន្ទីរពេទ្យរុស្ស៊ី ដើម្បីធ្វើការសង្រ្គោះបន្ទាន់។

ក្រោយពេលកើតហេតុ សមត្ថកិច្ចនគរបាលខណ្ឌចំការមន បានដេញស្ទាក់ឃាត់ខ្លួនបានជនសង្ស័យចំនួន ២នាក់ ទី១ ៖ ឈ្មោះ HANG DONG ភេទប្រុស អាយុ៣៧ឆ្នាំ មានស្រុកកំណើតនៅខេត្តឆាំងស៊ូ ប្រទេសចិននិងជនសង្ស័យទី២ ៖ ឈ្មោះ YAN XIAO ភេទប្រុស អាយុ៣៧ឆ្នាំ មានស្រុកកំណើត នៅខេត្តឆាំងស៊ូ ប្រទេសចិន ពួកគេទាំង២នាក់ទើបតែចូលមកស្នាក់នៅប្រទេសកម្ពុជា នៅថ្ងៃទី១ ខែមិថុនា ឆ្នាំ២០១៩ ដែលជួលខុនដូ យីហោ១១២ នៅជិតកន្លែងកើតហេតុ។

ចំណែកបក្ខពួកម្នាក់ទៀត ដែលកំពុងតែរត់គេចខ្លួន ត្រូវសមត្ថកិច្ចបានធ្វើការស្រាវជ្រាវ ដើម្បីឃាត់ខ្លួនយកមកផ្តន្ទាទោសនៅពេលក្រោយ។

បច្ចប្បន្នជនសង្ស័យទាំង២នាក់ ត្រូវបានបញ្ជូនទៅកាន់អធិការដ្ឋានខណ្ឌចំការមន ដើម្បីឃុំខ្លួនបណ្តោះអាសន្ន និងចាត់ការទៅតាមនីតិវិធី៕ ដោយ ៖ ស.ស.

ខេត្តស្វាយរៀង ៖ យ៉ាងហោចណាស់មានកម្មការិនីបម្រើការនៅរោងចក្រ យូលី ប្រមាណ ៦០នាក់ បានរងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍មួយ កាលពីវេលាម៉ោង ៧៖០០ ព្រឹក ថ្ងៃទី៣ ខែមិថុនា ឆ្នាំ២០១៩ នេះ នៅភូមិលាប ឃុំប្រសូត្រ ស្រុកស្វាយទាប ខេត្តស្វាយរៀង។

គ្រោះថ្នាក់ចរាចរណ៍ខាងលើ បង្កឡើងដោយរថយន្តស្ទូច ១គ្រឿងពាក់ស្លាកលេខភ្នំពេញ 3E-6026 រថយន្តហាយលែនឌ័រ ១គ្រឿង ពាក់ស្លាកលេខភ្នំពេញ 2AR.9861 និងរថយន្តសាំយ៉ុង២គ្រឿង ដែលដឹកកម្មករទី១ពាក់ស្លាកលេខភ្នំពេញ 2Q.4946 និងទី២ ពាក់ស្លាកលេខកំពង់ស្ពឺ 2A.3239 ដែលបុកបន្ដកន្ទុយគ្នា។

ប្រភពពីកន្លែងកើតហេតុឲ្យដឹងថា មុនពេលកើតហេតុ មានរថយន្តស្ទូច១គ្រឿង បើកឡើងមកលើផ្លូវជាតិ ដោយមិនមានអ្នកធ្វើចរាចរណ៍ ស្របពេលនោះ រថយន្តហាយលែនឌ័រ និងរថយន្តសាំយ៉ុងដឹកកម្មករ២គ្រឿងទៀត បើកមកវៈអឺនឹងរថយន្តស្ទូច ហើយក៏បុកបន្តកន្ទុយគ្នាតែម្ដង។

សូមបញ្ជាក់ថា កម្មការិនីរងគ្រោះទាំងអស់ ត្រូវបានបញ្ជូនទៅសង្គ្រោះ និងសម្រាកព្យាបាលនៅមន្ទីរពេទ្យបង្អែក ជីភូ និងមន្ទីរពេទ្យនៅទីរួមខេត្តស្វាយរៀង ៕ ដោយ ៖ សុផល  

ភ្នំពេញ ៖ នៅថ្ងៃទី៣ ខែមិថុនា នេះ នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ បានបញ្ជាឲ្យសមត្ថកិច្ចកសាងសំណុំរឿងបញ្ជូនមន្ដ្រីនគរបាលពាក់ស័ក្ដិ៣ មួយរូបដែលលួច iPad គេ ទៅកាន់តុលាការ ដើម្បីចាត់វិធានការតាមផ្លូវច្បាប់ហើយ។

សូមបញ្ជាក់ថា មន្រ្តីនគរបាលរូបនេះ ឈ្មោះ ហេង ហាប់ អាយុ២៤ឆ្នាំ បម្រើការងារនៅនាយកដ្ឋានការពារព្រំដែនទឹក ហើយកាលពីព្រឹកថ្ងៃទី៣០ ខែឧសភា ឆ្នាំ២០១៩ បានចូលទៅដកលុយនៅហាងវីងមួយកន្លែងយីហោ «រស្មី សាមគ្គី» ស្ថិតនៅក្នុងខណ្ឌទួលគោក ស្រាប់តែបន្លំលួចយក iPad មួយគ្រឿងទៅបាត់ រួចក៏ត្រូវម្ចាស់ហាងយកទៅបង្ហោះល្បីពេញបណ្តាញសង្គម Facebook និងមានគេ Share រាប់ពាន់នាក់។ បន្ទាប់ពីកោះហៅទៅសាកសួររួចមក ត្រូវបាននាយកដ្ឋានព្រហ្មទណ្ឌ បានអនុញ្ញាតឲ្យត្រឡប់ទៅផ្ទះវិញ ក្រោយធ្វើកិច្ចសន្យា និងមានអ្នកធានា។

ទោះជាយ៉ាងនេះក្តី នាយឧត្តមសេនីយ៍ សន្ដិបណ្ឌិត នេត សាវឿន បានថ្លែងប្រាប់បណ្ដាញព័ត៌មានថា «ករណីនេះ លោកបានបញ្ជាឲ្យសមត្ថកិច្ចជំនាញកសាងសំណុំរឿង បញ្ជូនមន្ដ្រីនគរបាលពាក់ស័ក្ដិ៣ នៅនាយកដ្ឋានការពារព្រំដែនទឹក ទៅកាន់តុលាការ ដើម្បីបន្ដនីតិវិធីតាមផ្លូវច្បាប់នៅថ្ងៃនេះរួចហើយ។

គួរជម្រាបថា ការចេញបញ្ជាឲ្យសមត្ថកិច្ចបញ្ជូនមន្ត្រីនគរបាលរូបនេះ ទៅតុលាការ នៅបន្ទាប់ពីមានប្រតិកម្មជាបន្តបន្ទាប់ពីំមជ្ឈដ្ឋានទូទៅ ទាំងក្នុង និងក្រៅប្រព័ន្ធហ្វេសប៊ុក ដោយខ្លះបានរិះគន់លើចំណាត់របស់ក្រសួងសាមី ដោយលើកឡើងថា ហេតុអ្វីក៏បទល្មើសមួយនេះ ត្រូវសាមីក្រសួងធ្វើការវិនិច្ឆ័យទោសដោយខ្លួនឯង មិនប្រគល់សំណុំរឿងនេះទៅតុលាការ៕ ​ដោយ ៖ មុនី

ភ្នំពេញ ៖ ថ្ងៃទី ១មិថុនា នេះ គឺជាទិវាសិទ្ធិកុមារអន្តរជាតិ លើកទី៧០។ ក្រសួងអប់រំ កម្ពុជាបានប្រារព្ធទិវាសិទ្ធិកុមារអន្ដរជាតិ ក្រោមប្រធានបទ«លើកកម្ពស់សិទ្ធិកុមារតាមរយៈការលុបបំបាត់អំពើហិង្សាលើកុមារគ្រប់រូបភាព»។ ​ក្នុងឱកាសនេះ មានការលើកឡើងខុសគ្នារវាងអង្គការមិនមែនរដ្ឋាភិបាល និងស្ថាប័នពាក់ព័ន្ធរបស់រដ្ឋ។

ដោយឡែក នៅក្នុងសុន្ទរកថាមួយសម្រាប់ទិវាកុមារអន្តរជាតិ ១ មិថុនា ខួបលើកទី៧០ កន្លងទៅនេះ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុនីតិសម្បទា លោក វង សូត បានលើកឡើង ថា ចំនួនកុមារដែលបានចុះឈ្មោះចូលរៀនមានការកើនឡើងជាលំដាប់ពីមួយឆ្នាំទៅមួយឆ្នាំ ក្នុងនោះសម្រាប់ឆ្នាំសិក្សា ២០១៨-២០១៩ កម្ពុជាមានសាលាមត្តេយ្យសិក្សាគ្រប់រូបភាពចំនួន ៧ពាន់ ៧៨០កន្លែង កើនឡើងចំនួន ១៩៣កន្លែង ក្នុងនោះសាលាមត្តេយ្យសិក្សារដ្ឋមាន ចំនួន ៤ពាន់ ៣០១កន្លែង កើនឡើងចំនួន ១២៥កន្លែង មត្តេយ្យសិក្សាឯកជនមានចំនួន ៥០៩កន្លែង កើនឡើងចំនួន ៥៣កន្លែង និងមត្តេយ្យសិក្សាសហគមន៍មានចំនួន ២ពាន់ ៩៧០កន្លែង កើន ឡើង ១៥កន្លែង ហើយចំពោះកុមារដែលទទួលបានសេវាអប់រំមានចំនួន ៤សែន ២ម៉ឺន ៥ពាន់៤០៣នាក់ (ស្រី ២សែន ១ម៉ឺន ២ពាន់ ៤៥៧នាក់) ស្មើ ៤៩,៩៤%។ កុមារអាយុពី៣ ទៅ៥ឆ្នាំ បានទទួលសេវាអប់រំមានចំនួន ៣សែន ៧ម៉ឺន ៣ពាន់ ១៥៣នាក់ ស្មើ ៣៩,៩០% នៃចំនួនប្រជាជនអាយុពី៣ ទៅ៥ឆ្នាំ ស្រី ១សែន ៨ម៉ឺន ៦ពាន់ ៨៩នាក់ ស្មើ ៤០,៩០%។

ឆ្លៀតក្នុងឱកាសនៃទិវាសិទ្ធិកុមារអន្តរជាតិ នេះ អង្គការការពារសិទ្ធិមនុស្សហៅកាត់ថា លីកាដូ បានចេញរបាយការណ៍ថា ប៉ុន្មានឆ្នាំចុងក្រោយនេះ កុមារកម្ពុជាទទួលបានការគាំពារផ្នែកអប់រំ ខណៈមួយចំនួនទៀតកំពុងប្រឈមការរំលោភសេពសន្ថវៈ។ យ៉ាងណាក៏ដោយ កុមារនៅកម្ពុជា ពិសេសកុមារី នៅតែបន្តរងគ្រោះយ៉ាងធ្ងន់ធ្ងរ នៅក្នុងការរំលោភសេពសន្ថវៈ និងការបំពានផ្លូវភេទ។ បើតាមលោក អំ សំអាត នេះជាក្ដីព្រួយបារម្ភខ្លាំងមែនទែនសម្រាប់សង្គមស៊ីវិលព្រមទាំងសង្គមទាំងមូល និងទាមទារឲ្យរដ្ឋាភិបាលត្រូវយកចិត្តទុកដាក់ដោះស្រាយបញ្ហានេះជាបន្ទាន់។ ជាក់ស្ដែងថ្មីៗនេះ ករណីរំលោភសម្លាប់បានកើតមានលើកុមារីក្នុងខេត្តកំពង់ឆ្នាំង និងកំពង់ចាមជាដើម។

គួរជម្រាបផងដែរថា ក្នុងឱកាសកម្ពុជាកំពុងប្រាព្ធទិវាសិទ្ធិកុមារអន្តរជាតិ ១ មិថុនា នេះដែរ នៅក្នុងស្រុកព្រៃនប់ ខេត្តព្រះសីហនុ កុមារីអាយុ ៨ឆ្នាំម្នាក់ ត្រូវបានឃាតកររំលោភសម្លាប់ រួមនិងប្អូនប្រុសបង្កើតរបស់នាងម្នាក់ទៀតដែលមានអាយុទើបតែ២ឆ្នាំប៉ុណ្ណោះ ខណៈដែលក្មេងរងគ្រោះទាំងពី២នាក់ ត្រូវបានឪពុកម្តាយទុកចោលតាមទម្លាប់ជារៀងរាល់ថ្ងៃ ហើយចេញទៅធ្វើការនៅខាងក្រៅ។

ទោះជាយ៉ាងនេះក្តី លោករដ្ឋមន្ត្រី វង សូត ក៏បានលើកឡើងផងដែរអំពីកិច្ចខិតខំប្រឹង ប្រែងរបស់ក្រសួងសង្គមកិច្ច អតីតយុទ្ធជន និងយុវនីតសម្បទា ចំពោះការធ្វើបច្ចុប្បន្នភាព អនីតិជនទំនាស់នឹងច្បាប់នៅតាមពន្ធនាគារ និងមណ្ឌលអប់រំកែប្រែតាមរាជធានី ខេត្ត ដែល មានអនីតិជនសរុបចំនួន ១ពាន់ ៥៦៥នាក់ (ស្រី ៨៩នាក់) ដោយបានសហការជាមួយអង្គការ សម្ព័ន្ធមេត្រីភាពពន្ធនាគារផ្តល់ការគាំទ្រដល់ជនជាប់ឃុំសរុបចំនួន ១ពាន់ ២១៤នាក់ (ស្រី ៥៧៤នាក់)។ បានបណ្តុះបណ្តាលជំនាញវិជ្ជាជីវៈដល់ជនរងគ្រោះដោយសារការប្រើប្រាស់ គ្រឿងញៀនចំនួន ៨៩៨នាក់ (ស្រី ២៣២នាក់) មានជំនាញកាត់ដេរ ៥១១នាក់ សំអាងការ ៨៨ នាក់ កុំព្យូទ័រ ១៩៥នាក់ និងកាត់សក់ ១០៤នាក់៕ ដោយ ៖ នរិន្ទ្រ                            (​រូបភាព របស់ក្រសួងបរិស្ថាន)

ខេត្តព្រះសីហនុ ៖ ជនដៃដល់ដែលរំលោភសំលាប់ក្មេងស្រីម្នាក់ និងក្មេងប្រុសម្នាក់ បានសមត្ថកិច្ចបញ្ជូនមកដល់ខេត្តព្រះសីហនុហើយ នៅវេលាម៉ោង ១ ៖ ១០នាទី រំលងអធ្រាត្រ ឈានចូលថ្ងៃទី៣ ខែមិថុនា ឆ្នាំ២០១៩។

យោងតាមចម្លើយសារភាពរបស់ជនសង្ស័យជាឃាតករបានឲ្យដឹងថា មូលហេតុដែលបណ្ដាលឱ្យរូបគេសម្លាប់ក្មេងទាំងពីរនាក់នោះ មកពីគេស្រវឹងស្រាខ្លាំង ហើយមាន គ្រឿងញៀននៅក្នុងខ្លួនផងនោះ ក៏បណ្ដាលឱ្យចិត្តគេហ៊ានធ្វើអំពើឃោរឃៅសម្លាប់ក្មេងទាំងពីរនោះតែម្ដង។

ជនសង្ស័យដដែលបានឲ្យដឹងថា មុនពេលកើតហេតុរូបគេបានទៅទិញគ្រឿងញៀនពីបុរសម្នាក់ឈ្មោះ សាលា នៅឆ្នេរអូឈើទាល បន្ទាប់មករូបគេក៏ទៅទិញស្រាថ្នាំយកមកអង្គុយផឹកក្នុងបន្ទប់ជួល ពេលនោះរូបគេក៏ចេញពីក្នុងបន្ទប់ជួល ដោយដើរមកកាត់មុខផ្ទះរបស់ក្មេងស្រីរងគ្រោះ ហើយឃើញក្មេងស្រីនោះ កំពុងតែលេងម្នាក់ឯងរូបគេក៏ចូលទៅប្រលែងលេងជាមួយបន្ទាប់មកធ្វើឲ្យរូបគេមានអារម្មណ៍ផ្លូវភេទជាមួយក្មេងស្រីនោះរូបគេក៏យកខ្នើយមកខ្ទប់មុខក្មេងស្រី ហើយនឹងធ្វើសកម្មភាពចាប់រំលោភក្មេងស្រីនោះរហូតដល់សន្លប់បាត់ស្មារតីតែម្តង។ ជនដដែលនេះបន្តថា បន្ទាប់មក ប្អូនប្រុសរបស់ក្មេងស្រីនោះ បានចូលមកដល់ ហើយខ្លួនខ្លាចបែកការណ៍ក៏ស្ទុះទៅទះកំផ្លៀងក្មេងប្រុសនោះចំនួន ៦ដៃ ហើយទាត់មួយជើងទៀតទៅផ្ទប់នឹងជញ្ជាំង បណ្ដាលអោយក្មេងប្រុសនោះស្លាប់ភ្លាមនៅនឹងកន្លែងកើតហេតុ។

បន្ទាប់មករូបគេក៏រត់មកផ្ទះជួលរបស់ខ្លួនវិញ ហើយបបួលប្រពន្ធរបស់ខ្លួនទៅស្រុកកំណើតនៅឯស្រុកមេសាង ខេត្តព្រៃវែង វិញ រហូតត្រូវបានសមត្ថកិច្ចតាមចាប់ខ្លួនដល់ផ្ទះតែម្តង៕ ដោយ ៖ សុផល