ភ្នំពេញ ៖ សម្ដេចតេជោហ៊ុន សែន នាយករដ្ឋមន្ត្រីនៃព្រះរា ជាណាចក្រកម្ពុជា នៅព្រឹកថ្ងៃទី១៣ ខែសីហា ឆ្នាំ ២០១៩នេះ បានទទួលជួបពិភាក្សាការងារជាមួយ លោក ហ៊ីដេហ៊ីសា អូរីណូអ៊ូជី(Hidehisa Hironouchi) ឯកអគ្គរាជទូតជប៉ុន ដែលត្រូវចប់បេសកកម្មការទូតនៅព្រះរាជាណាចក្រកម្ពុជា។ សម្ដេចតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ថា ឯកឧត្តមអគ្គរាជទូតជប៉ុននៅព្រះរាជាណាចក្រកម្ពុជា ចូលរួមចំណែកយ៉ាងធំ សម្រាប់កិច្ចអភិវឌ្ឍរាជាណាចក្រកម្ពុជា។

​លោក ហ៊ីដេហ៊ីសា អូរីណូអ៊ូជីដេហ៊ីហ្សា បានគោរពជម្រាបជូនសម្ដេចតេជោនាយករដ្ឋមន្ត្រីថា ​លោកនឹងចាកចេញពីរាជធានីភ្នំពេញនៅពីរសប្តាហ៍ទៀត ហើយឆ្ពោះទៅកាន់ប្រទេសហូឡង់ ដើម្បីទទួលតួនាទីថ្មីជា ឯកអគ្គរាជទូតជប៉ុនប្រចាំប្រទេសហូឡង់។ លោកបានសម្តែងនូវសេចក្ដីសោមនស្សរីករាយយ៉ាងខ្លាំង ដែលឯកឧត្តមបានសង្កេតឃើញថា ក្នុងរយៈពេល ៣ឆ្នាំ ក្នុងការបំពេញបេសកកម្មការទូត នៅរាជាណាចក្រកម្ពុជា សេដ្ឋកិច្ចកម្ពុជា បានរីកចម្រើន និងអភិវឌ្ឍយ៉ាងឆាប់រហ័សជាទីបំផុតក្នុងនោះមានកំណើនយ៉ាងខ្លាំងលើវិស័យវិនិយោគ ពាណិជ្ជកម្ម និងទេសចរណ៍។ ក្នុងន័យនេះលោកបានសូមគោរពសំដែងនូវការគោរពនិងកោត សរសើរដល់វីរភាពនៃការដឹកនាំរបស់សម្ដេចតេជោ។

សម្ដេចតេជោបានថ្លែងអំណរគុណចំពោះឯកឧត្តម ហ៊ីដេហ៊ីហ្សា ចំពោះកិច្ចប្រឹងប្រែងរបស់លោក ក្នុងការពង្រឹងទំនាក់ទំនងរវាងប្រទេសទាំងពីរនារយៈពេលកន្លងមកនេះ។ សម្ដេចបានមានប្រសាសន៍ថា ជាការពិតការវិនិយោគ ពាណិជ្ជកម្ម ក៏ដូចជាទេសចរណ៍ដែរ បានកើនឡើងយ៉ាងខ្លាំងនោះសោតគឺទទួលបានអំពីការប្រឹងប្រែងរបស់ លោកអគ្គរាជទូតជប៉ុននៅព្រះរាជា ណាចក្រកម្ពុជា ចូលរួមចំណែកយ៉ាងធំ នៅក្នុងបញ្ហានេះ ជាក់ស្ដែងជាលទ្ធផលនៃការវិនិយោគនិងពាណិជ្ជកម្មរវាងប្រទេសទាំងពីរកាលពីឆ្នាំ ២០១៨ , ជប៉ុននាំចូលមកកម្ពុជា មានទំហំទឹកប្រាក់ប៉ុន្មាន ៤៤០លានដុល្លារតែប៉ុណ្ណោះប៉ុន្តែនៅឆ្នាំ២០១៩នេះ ក្នុងរយៈពេលត្រឹមតែ៥ខែប៉ុណ្ណោះ ជប៉ុនបាននាំចូលមកកម្ពុជាយើងចំនួន ៤៤០លានដុល្លារស្រេចទៅហើយ។

ដោយឡែកនៅឆ្នាំ ២០១៨កម្ពុជាបាននាំចេញទៅប្រទេសជប៉ុនមានទំហំទឹកប្រាក់ប្រមាណ ១៦០០លានដុល្លាអាមេរិក។ នៅក្នុងឆ្នាំ ២០១៩នេះវិញ រយៈពេលត្រឹមតែ ៥ខែប៉ុណ្ណោះ ទំហំពាណិជ្ជកម្មកម្ពុជានាំចេញទៅជប៉ុនបានកើនឡើងដល់ ១៧០០លានដុល្លារសហរដ្ឋអាមេរិក នេះគឺជាជោគជ័យដ៏ធំនៅក្នុងបេសកកម្មការទូតរបស់លោកឯកអគ្គរាជទូតក្នុងការពង្រឹងទំនាក់ទំនង ហើយជំរុញពាណិជ្ជកម្ម វិនិយោគ និងទេសចរណ៍ ដែលជាមូលដ្ឋានគ្រឹះ នៃទំនាក់ទំនងរវាងប្រទេសទាំងពីរ។ ក្នុងន័យនេះសម្ដេចតេជោបានថ្លែងអំណរគុណសារជាថ្មីជូនចំពោះ ឯកអគ្គរាជទូត ហើយក៏បានជូនពរ ឯកអគ្គរាជទូត ក្នុងបេសកកម្មថ្មី របស់លោកទៅកាន់ប្រទេសហូឡង់បានទទួលជោគជ័យបន្តទៀត៕

ក្រុងព្រះសីហនុ ៖ ក្រុមហ៊ុនរបស់ចិន មួយឈ្មោះក្រុមហ៊ុន Yunnan មានបំណងវិនិយោគ លើប្រព័ន្ធលូទឹកភ្លៀង និងទឹកកខ្វក់ក្នុងក្រុងព្រះសីហនុ ហើយលោកអភិបាលខេត្តព្រះសីហនុ បានស្នើឱ្យក្រុមហ៊ុននោះ ត្រូវសិក្សាឱ្យបានចប់មុនថ្ងៃ២៧ ខែសីហា ឆ្នាំ២០១៩នេះ។ នេះបើតាមការបញ្ជាក់ពីមន្ត្រីរដ្ឋបាលសាលាខេត្ត។

ប្រភពដដែល បានបញ្ជាក់ថា បំណងនេះ ធ្វើឡើងក្នុងជំនួប រវាងលោក Lu Guo Bing អគ្គនាយកក្រុមហ៊ុន Yunnan ជាមួយលោក គួច ចំរើន អភិបាលខេត្តព្រះសីហនុ កាលពីថ្ងៃទី១២ ខែសីហា ឆ្នាំ២០១៩ ។

ការប្រកាសពីគោលបំណងវិនិយោគលើប្រព័ន្ធលូទឹកភ្លៀង និងលូទឹកកខ្វក់ក្នុងក្រុងព្រះសីហនុ នេះ ស្របពេលដែលខេត្តព្រះសីហនុកំពុងមានការអភិវឌ្ឍយ៉ាងឆាប់រហ័ស ដែលទាមទារនូវហេដ្ឋារចនាសម្ពន្ធជាច្រើន ពិសេសប្រព័ន្ធលូទឹកភ្លៀង និងលូទឹកកខ្វក់ ដើម្បីលើកកម្ពស់សោភណ័ភាព បរិស្ថានទីក្រុងពាណិជ្ជកម្ម ឧស្សាហកម្ម កសិកម្ម និងទេសចរណ៍។

លោក គួច ចំរើន បានស្វាគមន៍គម្រោងវិនិយោគប្រព័ន្ធលូទឹកភ្លៀង និងទឹកកខ្វក់ក្នុងក្រុងព្រះសីហនុ ពេលនេះ ប៉ុន្តែលោកស្នើឲ្យក្រុមហ៊ុនត្រូវមានផែនការ គម្រោងប្លង់គោល លម្អិតរាប់ទាំងទុនវិនិយោគ និងរយៈពេលសាងសង់ ដើម្បីឲ្យរដ្ឋបាលខេត្ត ដាក់ជូនទៅក្រសួងសេដ្ឋកិច្ច និងហិរញ្ញវត្ថុពិនិត្យ វាយតម្លៃអនុម័ត៕

ក្រុងព្រះសីហនុ ៖ ម្ចាស់អគារកម្ពស់៩ជាន់ជាជនជាតិចិន ដែលទ្រេត និងប្រេះ បានស្ម័គ្រចិត្តវាយកម្ទេចចោលដោយខ្លួនឯង បន្ទាប់ពីត្រូវអាជ្ញាធរប្រកាសពីការរកឃើញថា បានស្រុត និងមានស្នាមប្រេះ បង្កឲ្យមានគ្រោះថ្នាក់។ នេះបើតាមការបញ្ជាក់របស់លោក ឃាង ភារម្យ អ្នកនាំពាក្យសាលាខេត្តព្រះសីហនុ។

សូមជម្រាបថា ក្រោយពេលមានការផ្សព្វផ្សាយពីករណីអគារទ្រេត និងប្រេះរួចមកភ្លាមៗ អភិបាលខេត្តព្រះសីហនុ លោក គួច ចំរើន បានហៅជនជាតិចិនជាម្ចាស់អគារនោះ ទៅជួបពិភាក្សា ហើយបានបង្គាប់ឲ្យកម្ទេចវាយចោលជាបន្ទាន់ ដើម្បីចៀសវាងការកើតឧបទ្ទវហេតុ ដូចធ្លាប់ជួបកន្លងមក។ ក្នុងឱកាសនោះ ម្ចាស់អគារនោះ បានយល់ព្រមហើយ ថានឹងរុះរើអគាររបស់គាត់ដោយខ្លួនឯង ក្នុងពេលឆាប់ៗនេះ។

អ្នកនាំពាក្យ ពុំទាន់បានទទួលព័ត៌មានលម្អិតឡើយថា អគារនោះ មានកម្ពស់ប៉ុន្មានម៉ែត្រ និងចំណាយថវិកាអស់ប៉ុន្មាន។ ប៉ុន្តែ លោក បញ្ជាក់ថា អគារនោះ ត្រូវបានសាងសង់រួចរាល់ហើយ នឹងបានជួលឲ្យគេបណ្តើរៗ ក្នុងការបើកអាជីវកម្ម និង ហាងលក់ដូរផ្សេងៗ រួមទាំងមានបន្ទប់ស្នាក់នៅផងដែរ។

ចំពោះចំណាត់ការផ្លូវច្បាប់លើម្ចាស់អគារ លោក ឃាង ភារុំ មិនអត្ថាធិប្បាយ។ លោក បកស្រាយថា៖«យើងគ្រាន់តែណែនាំគាត់ឲ្យរុះរើអគារ ចំណែកនីតិវិធីបន្ត គឺអាស្រ័យលើស្ថាប័នមានសមត្ថកិច្ច»។

គួររំឭកថា កាលពីថ្ងៃទី៩ ខែសីហា ឆ្នាំ២០១៩ មន្ទីររៀបចំដែនដី បានចេញសេចក្តីប្រកាសព័ត៌មាន ដោយបង្ហាញថា អគារ៩ជាន់នោះ ត្រូវបានក្រុមហ៊ុនឈ្មោះ ឈួនរិន ខនស្រ្តាក់សិន អេនជីនារីង (ខេមបូឌា) សាងសង់ឡើង ដោយគ្មានលិខិតអនុញ្ញាត និងខុសបទដ្ឋានបច្ចេកទេស៕

កំពង់ចាម ៖ ថ្ងៃទី១២ ខែសីហា ឆ្នាំ២០១៩ លោក អូត ឈាងលី អភិបាល នៃ គណៈអភិបាលស្រុកជើងព្រៃ អមដំណើរដោយលោក មាន សម័យ ប្រធានការិយាល័យកសិកម្មស្រុក លោក ឯក គឹមអ៊ន មេឃុំស្រម៉របាន ចុះពិនិត្យមើលទីតាំងដែលជាសំណូមពររបស់បងប្អូនប្រជាពលរដ្ឋ កាលពីរសៀលថ្ងៃទី៧ ខែសីហា នៅក្នុងកម្មវិធីវេទិកាសាធារណៈ នៅ វត្តគុកពង្រ ហៅវត្តស្រាម ក្រោមអធិបតីភាពលោក វ៉េង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និង នេ សាទ និងជាប្រធានក្រុមការងារថ្នាក់ ជាតិចុះជួយស្រុកជើងព្រៃ។

សូមជំរាបថា នៅក្នុងវេទិកាសាធារណៈនាពេលនោះ ប្រជាពលរដ្ឋសំណូមពរលោកអោយជួយអណ្ដូងមួយសម្រប់ដាក់នៅសាលាបុុណ្យភូមិប្រធាតុ បង្គោលអូសខ្សែភ្លើង ៥ទៅ ១០ដើម និងសូមចាក់សាបបំពេញទីធ្លាមាត់អណ្ដូងលូចំនួន ១៣៣ម៉ែត្រការេ គិតជាទឹកប្រាក់ចំនួន ៣.២៥០.០០០រៀល លោក វ៉េង សាខុន ក៏បានផ្តល់ជូនតាមសំណូមពររបស់ប្រជាពលរដ្ឋ ។

ចំពោះបង្គោលខ្សែភ្លើង លោក អូត ឈាងលី អភិបាល នៃគណះអភិបាលស្រុក បានអោយសេវាករអគ្គីសនីដាក់ជូនបងប្អូនប្រជាពលរដ្ឋ សេវាករក៏បានឯកភាពធ្វើជូន ចំពោះអណ្តូងទឹកនៅសាលាបុណ្យ លោកអភិបាលស្រុកបង្វែមកតបណ្តាញទឹកស្អាតជំនួសវិញ ប្រជាពលរដ្ឋក៏បានយល់ព្រម ៕ ដោយ : សុផល

ភ្នំពេញ ៖ លោកឧត្តមសេនីយ៍ទោ អ៊ាវ ចំរើន ស្នងការនគរបាល ខេត្តកណ្តាល រដ្ឋមន្ត្រីក្រសួងមហាផ្ទៃលោក ស ខេង សម្រេចដាក់វិន័យ “ព្រមានលើកទី១” ដោយអះអាងថា ខ្វះការយកចិត្តទុកដាក់លើការគ្រប់គ្រង និងដឹកនាំ។ លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ បានបញ្ជាក់ថា ការសម្រេចដាក់វិន័យនេះ ធ្វើឡើងបន្ទាប់ពីមានពាក្យបណ្ដឹងពីសំណាក់ជនដែលអះអាងថា ជាមន្ត្រីក្របខណ្ឌនគរបាលខេត្តកណ្ដាលចំនួន៥០រូប បានផ្ដិតមេដៃប្តឹងទៅក្រសួងមហាផ្ទៃ ដោយបានចោទថា លោក អ៊ាវ ចំរើន បានប្រើអំណាចផ្តាច់ការ ធ្វើបាបកូនចៅថ្នាក់ក្រោម និងប្រព្រឹត្តអំពើពុករលួយ។

អ្នកនាំពាក្យរូបនេះបានបញ្ជាក់ថា ៖ «គាត់ (លោក អ៊ាវ ចំរើន) មិនមែនអាក្រក់ទាំងអស់ទេ គាត់ក៏មានគុណសម្បត្តិរបស់គាត់ដែរ តែដោយសារមានការធ្វេសប្រហែស ធ្វើឲ្យមានបញ្ហាខ្លះក្នុងការបញ្ជាដឹកនាំ ដូច្នេះហើយត្រូវតែពិន័យ និងព្រមានគាត់ខ្លះ»។

លោក ឆាយ គឹមខឿន បានឆ្លើយប្តាប់បណ្តាញព័ត៌មានក្នុងស្រុកថា ៖ « បន្ទាប់ពីការព្រមានមក យើងតាមអង្កេតមើលថាតើ គាត់កែប្រែ ឬអត់? ហើយបើគាត់មិនកែប្រែ ចូលដំណាក់កាលទី២ ត្រូវដកហូតតំណែង ឬយ៉ាងម៉េចទៅតាមកំហុសរបស់គាត់»។

សូមជម្រាបថា ការសម្រេចដាក់វិន័យនេះ បានធ្វើឡើងនៅថ្ងៃទី២៥ ខែកក្កដា របស់លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ គឺនៅក្រោយពីនាយឧត្តមសេនីយ៍ នេត សាវឿន អគ្គស្នងការនគរបាលជាតិបានស្នើឲ្យអនុវត្តវិន័យក្រោមរូបភាព “ព្រមានលើកទី១” ចំពោះឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល ដោយមូលហេតុ “ខ្វះការយកចិត្តទុកដាក់លើការគ្រប់គ្រង និងដឹកនាំ”។

គួររំឭកថា កាលពីចុងខែឧសភា ក្រសួងមហាផ្ទៃបានកោះហៅស្នងការរងនគរបាលខេត្តកណ្តាលចំនួន៦រូបឲ្យចូលទៅបំភ្លឺ រួមមានលោក រឿន ណារ៉ា លោក វ៉ែន សុវិន លោក ចាន់ សាវឿន លោក តុប សុវណ្ណ លោក សេង គីមឃន និងលោក ឈឿន សុចិត្ត ពាក់ព័ន្ធនឹងការចោទប្រកាន់ថា លោកស្នងការរូបនេះ បានប្រើអំណាចផ្ដាច់ការ ធ្វើបាបកូនចៅ និងប្រព្រឹត្តអំពើពុករលួយក្នុងរូបភាពផ្សេងៗរហូតដល់១៦ករណី៕

ភ្នំពេញ ៖ អង្គភាពប្រឆាំងអំពើពុករលួយ (ACU) បានប្រកាសពីការរកឃើញថា លោក លៀម ប៊ុនរឿន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តពោធិ៍សាត់ ប្រព្រឹត្តអំពើពុករលួយ និងយកលុយក្រៅសេវាច្បាប់ចំនួន ១៤០ករណី សរុបជាលុយជិត ៤០ម៉ឺនដុល្លារ (៣៧២ ៧៤៧ដុល្លារ) តាំងពីលោកចូលកាន់តំណែងក្នុងឆ្នាំ២០១៦ រហូតមកដល់ថ្ងៃចាប់ខ្លួនកាលពីថ្ងៃទី២៧ ខែកក្កដា ឆ្នាំ២០១៩។

យោងតាមរបាយការណ៍អំពីលទ្ធផលនៃកិច្ចប្រជុំលើកទី៤៨ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ នៅថ្ងៃទី១២ ខែសីហា នេះ បានបញ្ជាក់ថា តាមការស្រាវជ្រាវ រកបានភស្តុតាងរបស់អង្គភាពប្រឆាំងអំពើពុករលួយ និងតាមការសារភាពរបស់សាម៉ីខ្លួន តាំងពីឆ្នាំ២០១៦មក លោកលៀម ប៊ុនរឿន បានយកលុយសេវាក្រៅច្បាប់ចំនួន ១៤០ករណី បានប្រាក់ ៣៧២.៧៤៧ដុល្លារ (សាមសិបប្រាំពីរម៉ឺន ពីរពាន់ប្រាំពីររយសែសិបប្រាំពីរដុល្លារ) និងជាង ៤៩លានរៀល នោះមិនទាន់រាប់ករណ៍ ខ ទ ដែល លោកលឿម ប៊ុនរឿន បានទទួលប្រាក់ ២០ ០០០ដុល្លារ (ពីរម៉ឺនដុល្លារ) ដូចពាក្យប្តឹងដែលអង្គភាពប្រឆាំងអំពោពើករលួយ បានទទួលនោះផង ។

អង្គភាពប្រឆាំងអំពើពុករលួយបានរកឃើញលុយចំនួន ១៧ ៥២៩ដុល្លារ និង ១៦ ២៥០ ០០០រៀល ក្នុងនោះមានលុយដែលដាក់ក្នុងស្រោមសំបុត្រ ចំនួន០៦ស្រោមសំបុត្រ និងឯកសារមួយចំនួន ត្រូវបានរកឃើញនៅក្នុងការិយាល័យរបស់លោក លឿម ប៊ុនរឿន នៅថ្ងៃទី២៧ ខែកក្កដា ឆ្នាំ២០១៩ ដែលសាម៉ីខ្លួន លឿម ប៊ុនរឿន ទទួលស្គាល់ថា ជាលុយបានដោយខុសច្បាប់មួយចំនួន ។

រតបាយការណ៍ដដែល បញ្ជាក់ថា អំពីសកម្មភាពប្រព្រឹត្តអំពើពុករលួយរបស់ប្រធានមន្ទីរសុរិយោដីខេត្តពោធិ៍សាត់ ដែលបានចាប់ខ្លួនកាលពីចុងខែកក្កដា ។ អង្គភាពប្រឆាំងអំពើពុករលួយបានឱ្យដឹងថា ប្រធានមន្ទីរសុរិយោដីខេត្តពោធិ៍សាត់បានកិបកេងលុយល្មើសច្បាប់ប្រមាណ១៤០ករណី ស្មើនឹងជិត ៤០ម៉ឺនដុល្លារ។

អង្គភាពប្រឆាំងអំពើពុករលួយរកឃើញថា លោក លៀម ប៊ុនរឿន ប្រធានមន្ទីរសុរិយោដីខេត្តពោធិ៍សាត់ ដែលត្រូវបានចាប់ឃាត់ខ្លួនពាក់ព័ន្ធនឹងករណីប្រព្រឹត្តអំពើពុករលួយនាពេលថ្មីៗនេះ បានយកលុយសេវាក្រៅច្បាប់ចំនួន១៤០ករណី សរុបជាទឹកប្រាក់ជិត៤០ម៉ឺនដុល្លារអាមេរិក ក្នុងរយៈពេលកាន់តំណែង ៣ឆ្នាំមកនេះ ។

តាមរបាយការណ៍របស់អង្គភាពប្រឆាំងអំពើពុករលួយចុះថ្ងៃទី៣០ កក្កដា បង្ហាញឱ្យដឹងថា ក្រោយទទួលតំណែងជាប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តពោធិ៍សាត់ តាំងពីឆ្នាំ២០១៦មកដល់ថ្ងៃឃាត់ខ្លួន លៀម ប៊ុនរឿន បានប្រើប្រាស់ប្រាក់ដែលជាផលនៃបទល្មើសក្នុងការជួសជុលផ្ទះ៤ម៉ឺនដុល្លារ និងទិញផ្ទះពីរកន្លែង មួយកន្លែងតម្លៃ ១៦៨.០០០ដុល្លារ និងមួយកន្លែងទៀត ៧២.០០០ដុល្លារ, ទិញដីមួយកន្លែង ៤៤.០០០ដុល្លារ ហើយសាងសង់ផ្ទះត្រចៀកកាំអស់ ៤០.០០០ដុល្លារទៀត, ដូរឡាន LEXUS 570 ទិញឡាន KIA PICANTO ដើម្បីទុកដាក់ប្រាក់ពីផលបទល្មើសរបស់ខ្លួន ។

គូសបញ្ជាក់ថា ថ្នាក់ដឹកនាំមន្ទីររៀបចំដែនដីខេត្តពោធិ៍សាត់ ក្នុងនោះ ប្រធាន អនុប្រធាន និងមន្ត្រីមន្ទីរសុរិយោដី សរុប៣នាក់ ត្រូវបានអង្គភាពប្រឆាំងអំពើពុករលួយចុះទៅឃាត់ខ្លួននៅខេត្តពោធិ៍សាត់ កាលពីថ្ងៃទី២៧ កក្កដា ដោយសង្ស័យប្រព្រឹត្តអំពើពុករលួយ គប់គិតទារលុយពីម្ចាស់ដីដោយខុសច្បាប់ចំនួន១០ម៉ឺនដុល្លារជាថ្នូរនឹងការចេញច្បាប់ឱ្យសាងសង់ ។ មន្ត្រីទាំងបីរូប រួមមាន ឈ្មោះ លៀម ប៊ុនរឿន ប្រធានមន្ទីរសុរិយោដីខេត្តពោធិ៍សាត់, ជាង វុទ្ធី អនុប្រធានមន្ទីរទទួលការងារសំណង់ និងឈ្មោះ តែ ប៊ុនថេង មន្ត្រីសុរិយោដីខេត្តទទួលបន្ទុកច្រក ៕

ភ្នំពេញ ៖ ដូចកាលកំណត់ព្រឹទ្ធសភា នៃព្រះរាជាណាចក្រកម្ពុជា នៅព្រឹកថ្ងៃទី១២ ខែសីហា នេះ បានបើកសម័យប្រជុំវិសាមញ្ញព្រឹទ្ធសភា នីតិកាលទី៤ របស់ខ្លួន ក្រោមអធិបតីភាពដ៏ខ្ពង់ខ្ពស់ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងមានសមាជិកចូលរួមប្រជុំចំនួន៥៦រូប។ សមាជិកព្រឹទ្ធសភា បានគាំទ្របោះឆ្នោតជ្រើសតាំង ឯកឧត្តម អ៊ុ សារិទ្ធ ជាសមាជិកឧត្តមក្រុមប្រឹក្សានៃអង្គចៅក្រមជាថ្មី។

លោក ម៉ម ប៊ុននាង អ្នកនាំពាក្សព្រឹទ្ធសភា បានថ្លែងបា្រប់ អ្នកសារព័ត៌មាន នៅក្រោយកិច្ចប្រជុំនេះថា អនុលោមតាមមាត្រា៤ និងមាត្រា៥ នៃច្បាប់ ស្តីពី ការរៀបចំ និងការប្រព្រឹត្តទៅ នៃឧត្តមក្រុមប្រឹក្សា នៃអង្គចៅក្រម និងយោងលិខិតលេខ៖ ១៣៥៩ កយ.រប/១៩ចុះថ្ងៃទី១៩ ខែកក្កដា ឆ្នាំ២០១៩ រដ្ឋមន្ត្រីក្រសួងយុត្តិធម៌ បានស្នើសុំឱ្យព្រឹទ្ធសភា ជ្រើសរើសសមាជិកឧត្តមក្រុមប្រឹក្សានៃអង្គចៅក្រមចំនួន០១រូប ជំនួស លោក អ៊ុ សារិទ្ធ សមាជិកឧត្តមក្រុមប្រឹក្សានៃ អង្គចៅក្រម ដែលនឹងត្រូវបញ្ចប់អាណត្តិ។
អង្គប្រជុំព្រឹទ្ធសភា បានបោះឆ្នោតជ្រើសតាំង លោក អ៊ុ សារិទ្ធ ជាសមាជិកឧត្តមក្រុមប្រឹក្សានៃអង្គចៅក្រម ដោយមានសំឡេងគាំទ្រចំនួន៥០សំឡេង នៃចំនួនសមាជិកព្រឹទ្ធសភាទាំងមូល ចំណែក ឯកឧត្តម គង់ សារិទ្ធ ទទួលបានសម្លេងគាំទ្រចំនួន៦សំឡេង។

លោក ម៉ម ប៊ុននាង ក៏បានបញ្ជាក់ទៀតថា សម័យប្រជុំវិសាមញ្ញព្រឹទ្ធសភា ក៏បានទទួលស្គាល់សមាជិកព្រឹទ្ធសភាថ្មី សម្រាប់នីតិកាលទី៤ ចំនួន០៣រូប ក្នុងនោះមាន៖ ព្រះអង្គម្ចាស់ នរោត្តម ប្រីយសោភ័ណ្ឌ ជាសមាជិកព្រឹទ្ធសភា ចាត់តាំងដោយព្រះមហាក្សត្រ ជំនួសសម្តេចរាជបុត្រី ព្រះអនុជ នរោត្តម អរុណរស្មី ដែលបានសុំលាឈប់។

លោក ញ៉ូវ សុង ជាសមាជិកព្រឹទ្ធសភា មណ្ឌលភូមិភាគទី៧ ខេត្តកំពង់ស្ពឺ ខេត្តកំពង់ឆ្នាំង ខេត្តពោធិ៍សាត់ ខេត្តកោះកុងនិងខេត្តព្រះសីហនុ ជំនួស លោក ឡាយ អ៊ីពិសិទ្ធ ដែលបានទទួលមរណភាព និង លោក ឡៅ ឆន ជាសមាជិកព្រឹទ្ធសភា មណ្ឌលភូមិភាគទី៤ ខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តឧត្តរមានជ័យ និងខេត្តប៉ៃលិនជំនួស លោកជំទាវ ស៊ឹង ស៊ីយុត ដែលបានទទួលមរណភាពកាលពីពេលកន្លងទៅនេះ៕

ភ្នំពេញ ៖ ព្រឹកថ្ងៃទី១២ ខែសីហា ឆ្នាំ២០១៩ នេះ រដ្ឋសភា នៃព្រះរាជាណាចក្រកម្ពុជា បានបើកសម័យប្រជុំរដ្ឋសភា ជាវិសាមញ្ញ នីតិកាលទី៦ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ដោយមានវត្តមានសមាជិកសមាជិការដ្ឋសភាចូលរួមចំនួន ១១១រូប ដើម្បីបោះឆ្នោតជ្រើសតំាងលោក អ៊ិត រ៉ាឌី ជាសមាជិកឧត្តមក្រុមប្រឹក្សានៃអង្គចៅក្រម សម្រាប់អាណត្តិថ្មី ជ្រើសតំាងដោយរដ្ឋសភា នីតិកាលទី៦។

ជាលទ្ធផល អង្គសភាបានបោះឆ្នោតជ្រើសតំាង ឯកឧត្តម អ៊ិត រ៉ាឌី ឱ្យជាប់ជាសមាជិកឧត្តមក្រុមប្រឹក្សា នៃអង្គចៅក្រម សម្រាប់អាណត្តិថ្មី ដោយទទួលបានសន្លឹកឆ្នោតយល់ព្រមចំនួន ១០៩សំឡេង៕

ពោធិ៍សាត់ ៖ យោងតាមការចុះផ្សាយរបស់ក្រសួងសាធារណការ និងដឹកជញ្ជូននៅថ្ងៃទី០៩ និង១០ ខែសីហា ឆ្នាំ២០១៩ ផ្លូវជាតិលេខ៥៥ បានរងគ្រោះដោយ ដីបាក់ធ្លាក់មកលើតួផ្លូវចន្លោះគីឡូម៉ែត្រលេខ១៤៣ ដល់គីឡូម៉ែត្រ១៦០ (តំបន់លើភ្នំ ១៥០០) បណ្តាលឲ្យមានការកាត់ផ្តាច់ចរាចណ៍ ដោយសារភ្លៀងធ្លាក់ជោគជាំ ជាច្រើនថ្ងៃជាប់ៗគ្នា។

ក្រសួងសាធារណការ និងដឹកជញ្ជូន រួមទាំងអាជ្ញាធរខេត្ត បានសហការណ៍គ្នាយកគ្រឿងចក្រ កៀរ និងចូកដី និងដើមឈើចេញពីផ្លូវជាតិដើម្បីបញ្ចៀសការស្ទះចរាចរណ៍ ។ឥឡូវនេះផ្លូវជាតិលេខ៥៥ អាចដំណើរការបានវិញ ក៏ប៉ុន្តែភ្លៀងនៅតែបន្តធ្លាក់មកទៀត។

អាស្រ័យដូចបានជម្រាបជូនខាងលើនេះ សូមបងប្អូនប្រជាពលរដ្ឋមេត្តាជ្រាបជាព័ត៌មាន និងប្រុងប្រយ័ត្នទាំងអស់គ្នា ដើម្បីសុខសុវត្ថិភាពក្នុងការធ្វើដំណើរ៕

ខេត្តកំពត : ទំនប់អាងទឹកប្រឡាក់ក្រឡាដ៏ធំមួយដែលជាកន្លែងរមណីយដ្ឋានទេសចរណ៍ស្ថិតនៅភូមិកូនសត្វ ឃុំកូនសត្វ ស្រុកទឹកឈូ ខេត្តកំពត ត្រូវបានបាក់កាលពីវេលាម៉ោង8ព្រឹកថ្ងៃទី11ខសីហា2019។បន្ទាប់ពីមានការបាក់ទំនប់ទឹកនេះភ្លាមទឹកបានហូរបាចសាចធ្វើអោយលំនៅដ្ឋានប្រជាពលរដ្ឋនិងផ្លូវលំមួយចំនួនត្រូវបានលិចលង់ ហើយអាជ្ញាធរខេត្តកំពត និងស្រុកទឹកឈូូបានចុះមកពិនិត្យជាក់ស្ដែងនៅកន្លែងកើតហេតុនិងចាត់ចែងកម្លាំងដើម្បីជួយអន្តរាគមន៍ ។

លោក នាក់ សុវណ្ណារី អភិបាលស្រុកទឹកឈូបាននិយាយប្រប់អោយដឹងកាលពីថ្ងៃអាទិត្យនេះថាបន្ទាប់ពីមានទំនប់នេះបាក់លោកបានប្រកាសប្រាប់ដល់ពលរដ្ឋដែលមានលំនៅកៀកកឹតនិងទំនប់អោយមានការប្រុងប្រយ័ត្នបង្កាគ្រែងមានគ្រោះថ្នាក់។ លោក នាក់ សុវណ្ណារី បានប្រាប់អោយដឹងថាទំនប់ដែលចាក់បេតុងទំទប់ទកនោះប្រវែងជាប់100ម៉ែត្រតែបាក់ដីត្រឹមតែ7/ទៅ8ម៉ែត្រទេប៉ុន្តែវាអាចនិងបាក់បន្ថែមទៀត។ឯកឧត្តមជឹងផល្លាប្រធានក្រុមប្រឹក្សាខេត្តកំពតបានចុះពិនិត្យផងដែរ។ឯកឪត្តមជឹងផល្លានិយាយប្រាប់អ្នកយកពត៏មានថាការបាក់ទំនប់នេះធ្វើអោយប្រជាពលរដ្ឋមានផលប៉ះពាល់ច្រើនដូចជាផ្ទះសម្បែងនិងផ្លូវនានាត្រូវបានខូច។

លោក ជឹង ផល្លា បាននិយាយថា ឥឡូវនេះក្រុមការងារមានធនធានទឹកមនមន្ទីរសាធរណះការខេត្តកំពតកំពង់យកគ្រឿងចក្រមកកាន់ទីនេះដើម្បីទប់ទំនប់នេះឡើងវិញ។លោកក៍បានប្រាប់ទៅនគរបាលស្រុកជួយការពារកុំអោយប្រជាពលរដ្ឋទៅកាន់តំបន់គ្រោះថ្នាក់៕

ដោយ : សុផល

បាត់ដំបង ៖ នាវេលាម៉ោង១០និង០០នាទីព្រឹកថ្ងៃទី១១ខែសីហាឆ្នាំ២០១៩នេះ ទឹកស្ទឹងសង្កែក្រុងបាត់ដំបងបានកំពុងហក់ឡើងបន្តិចម្តងៗដល់កម្ពស់១៣ម៉ែត្រហើយ ខណ:ដែលកម្ពស់ទឹកឡើងដល់កម្ពស់១៣,៨០ម៉ែត្រជាចំណុចប្រកាសជូនដំណឹងរបស់មន្ទីរជំនាញ។

ទោះជាយ៉ាងណាទឹកស្ទឹងសង្កែដែលកំពុងហក់ឡើងដូច្នេះ ហើយពុំទាន់ដល់ចំណុចដែលត្រូវប្រកាសជូនដំណឹងជាសាធារណ:នោះ looនៅឡើយទេ ។

បើតាមលោក ឡុង ផលគុណ ប្រធានមន្ទីរធនធានទឹកនិងឧតុនិយមខេត្តបានបញ្ជាក់តាមទូរស័ព្ទនៅវេលាម៉ោង១០និង៤០នាទីថ្ងៃដដែលថា ទឹកស្ទឹងសង្កែពិតជាហក់ឡើងខ្ពស់មែនហើយទើបតែបាន១៣ម៉ែត្រគឺមិនទាន់ដល់ពេលត្រូវប្រកាសជូនដំណឹងជាសាធារណ:នោះទេ ហើយ
ក៏មិនមែនជាការប្រកាសអាសន្ននោះដែរ។

លោក ឡុង ផលគុណ បានបន្តថា បើល្ងាចនេះនៅចំណុចខាងលើក្បាលស្ទឹងមិនមានភ្លៀងធ្លាក់បន្តទៀតទេ នោះទឹកស្ទឹងសង្កែក្រុងបាត់ដំបងនឹងមានការស្រកចុះវិញដែរ សូមប្រជាពលរដ្ឋកុំទាន់មានការព្រួយបារម្មណ៍អី ៕ សុុ

ភ្នំពេញ៖នារីម្នាក់ម៉ៅរថយន្តតាក់ស៊ីសេរីទំនើបពីភ្នំពេញទៅក្រុងបាវិតលុះដល់ពាក់កណ្តាលផ្លូវស្រាប់តែនារីខាងលើយកខ្សែរកាបូបរិតកអ្នកបើកបរបង្កអោយមានការប្រតាយប្រតបគ្នាផ្អើលដល់ប្រជាពលរដ្ឋនិងសមត្ថកិច្ច។

ហេតុកាណ៍ភ្ញាក់ផ្អើលខាងលើនេះបានកើតឡើងកាលពីវេលាម៉ោង១២ថ្ងៃទី១០ខែសីហាឆ្នាំ២០១៩ស្ថិតនៅជាប់ព្រំប្រទល់រាជធានីភ្នំពេញនិងខេត្តកណ្តាលចន្លោះគីឡូម៉ែត្រលេខ៣៦តាមបណ្តោយផ្លូវជាតិលេខ១ភូមិសំរោងធំស្រុកកៀនស្វាយខេត្តកណ្តាល។នារីខាងលើមានឈ្មោះសុខស្រីមុំអាយុប្រហែល៣០ឆ្នាំ។

តាមសំដីបុរសម្ចាស់រថយន្តបានអោយដឹងថាមុនពេលកើតហេតុនារីខាងលើបានហៅរថយន្តរបស់គាត់ចេញពីបេនឡានអូឡាំពិចដោយម៉ៅជិះទៅក្រុងបាវិតក្នុងតម្លៃ៣០ម៉ឺនរៀលខណះពេលតថ្លៃគ្នាត្រូវរូវនារីខាងលើនេះបានឡើងលើរថយន្តជិះកៅអីខាងក្រោយ។

លុះដល់ចំនុចកើតហេតុខាងលើស្រាប់តែរួបនាងយកខ្សែកាបូបរិតពីក្រោយម្ចាស់រថយន្តធ្វើអោយអ្នកបើកបរមានការភិតភ័យយ៉ាងខ្លាំងបានរើបំរាស់ប្រតាយប្រតបគ្នារួចក៏បានបើកទ្ចាររថយន្តចុះមកខាងក្រៅស្រែកឆោឡោផ្អើលអស់អ្នកភូមិនិងសមត្ថកិច្ចចេញមកជួយអន្តរាគមន៏ដល់កន្លែងកើតហេតុ។

ក្រោយពេលកើតហេតុសមត្ថកិច្ចមូលដ្ឋានបានចុះមកឃាត់ខ្លួននារីខាងលើយកទៅកាន់ប៉ុស្តិនគរបាលរដ្ឋបាលឃុំសំរោងក្រោមដើម្បីធ្វើការសាកសួតាមនីតិវិធីខណះពេលដែលសមត្ថកិច្ចទំនាក់ទំនងតាមទូរសព្ទ័ដៃទៅកាន់ម្តាយបង្កើតនារីខាងលើដោយម្តាយនាងប្រាប់ថាកូនស្រីគាត់មិនគ្រប់ទឹកទេសតិមិនសូវល្អធ្វើអោយសមត្ថកិច្ចចិត្តស្ទើដាច់ផ្ងាផ្ទុះសំណើចហួសចិត្តសើចកាច់កគ្រប់ៗគ្នា៕

ភ្នំពេញ ៖ លោក នេត សាវឿន អគ្គស្នងការនគរបាលជាតិបានប្រកាសថា ប្រឡងសញ្ញាប័ត្រមធ្យមសិក្សាទុតិយភូមិឆ្នាំ២០១៩នេះនឹងមានការចាប់មួកចំនួន២ថ្ងៃ ដើម្បីជាការសម្រួលដល់សិស្សានុសិស្ស។លោកសន្តិបណ្ឌិត នេត សាវឿន អគ្គស្នងការនគរបាលជាតិ បានណែនាំដល់មន្រ្តីស្នងការនរបាលជាតិទាំង២៥រាជធានីនីខេត្តថា ប្រឡងសញ្ញាប័ត្រមធ្យមសិក្សាទុតិយភូមិឆ្នាំ២០១៩ដែលនឹងធ្វើនៅថ្ងៃទី១៩និង២០សីហាខាងមុននេះ មន្រ្តីនគរបាលចរាចរណ៍គ្រប់មូលដ្ឋានត្រូវផ្អាកការចាប់មួករយៈពេល២ថ្ងៃ គ្រាន់តែជួយសម្រួលចរាចរណ៍ទៅបានហើយ ដើម្បីសម្រួលដល់សិស្សានុសិស្សបង្កលក្ខណៈឲ្យការប្រឡងសញ្ញាប័ត្រមធ្យមសិក្សាទុតិយភូមិឆ្នាំ២០១៩បញ្ចប់ទៅដោយភាពល្អប្រសើរ។

លោកសន្តិបណ្ឌិត នេត សាវឿន បានថ្លែងលើកឡើងបែបនេះ ក្នុងកិច្ចប្រជុំរៀបចំយន្តការសម្របសម្រួលការប្រឡងសញ្ញាប័ត្រមធ្យមសិក្សាទុតិយភូមិឆ្នាំ២០១៩ កាលពីថ្ងៃ សុក្រម្សិលមិញ ក្នុងពហុកីឡដ្ឋានជាតិ។

សន្តិបណ្ឌិត នេត សាវឿនថា ការធ្វើបែបនេះ គឺជាការជួយសម្រួលធ្វើឲ្យសិស្សានុសិស្សបានទៅដល់កន្លែងប្រឡងទាន់ពេលវេលា នឹងមិនអកខាន់ខាត់ពេលដោយសាការឃាត់ពីសំណាក់នគរបាលចរាចរណ៍នៅតាមមូលដ្ឋាន។ ឯកឧត្តម បានណែនាំបន្ថែមថា សម្រាប់កិច្ចចូលរួមសហការក្នុងកិច្ចការការពារសណ្តាប់ធ្នាប់អំឡុងពេលប្រឡងរយៈពេល២ថ្ងៃមន្រ្តីនគរបាលទាំងអស់ត្រូវប្រើប្រាស់តែកម្លាំងស្រុកបានហើយ ហើយធ្វើយ៉ាងឲ្យកិចសហការចូលរួមនេះមានភាពស៊ីសង្វាក់គ្នា ដើម្បីបង្កលក្ខណៈឲ្យការប្រឡងបានប្រព្រឹត្តិទៅដោយភាពរលូន និងជោគជ័យ។ លោក នេត សាវឿន បញ្ជាក់ទៀតថា ចំពោះកងកម្លាំងមិនត្រូវចូលរួមឆែកឆេរលើបេក្ខជនឡើយ គឺផ្ទៃក្នុងក្រសួងអប់រំត្រូវធ្វើដោយអាចសហការជាមួយក្រុមកាយរិទ្ធបានហើយ។

លោកស សុខា រដ្ឋលេខាធិការក្រសួងអប់រំយុវជន និងកីឡា មានប្រសាសន៍ថា ឆ្នាំនេះមិនមានការចូលរួមពិនិត្យពីអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជាស្ថិតនៅក្នុងបណ្ឌលត្រួតពិនិត្យដូចមុនឡើយ ពោលគឺមួយរាជធានី ខេត្តនឹងមានមន្ត្រីអង្គភាពប្រឆាំងអំពើពុករលួយមួយរូបប្រចាំការ រីឯកម្លាំងសហភាពសហព័ន្ធយុវជនកម្ពុជានឹងជួយឆែកឆេរនៅតាមមាត់ច្រកចូលដើរចូលឆេកឯកសារ ឬគ្រឿងអេឡិចត្រូនិកដែលសិស្សយកមកតាមខ្លួនតែប៉ុណ្ណោះ។

លោកបញ្ជាក់ទៀតថា ក្រសួងអប់រំយុវជន និងកីឡាបានកំណត់ហើយថា បុគ្គលដែលមានសិទ្ធយកចូលនិងប្រើប្រាស់គ្រឿង អេឡិចត្រូនិកក្នុងមណ្ឌលប្រឡងមានគណៈមេប្រយោគទូទាំងប្រទេស ប្រធានអប្បមាទទូទាំងប្រទេសប្រចាំមណ្ឌលប្រធានមណ្ឌលនិងប្រធានសន្តិសុខប្រចាំមណ្ឌល ។បុគ្គលដែលមិនអនុញ្ញាតឲ្យយកចូល និង ប្រើប្រាស់មានបេក្ខប្រឡង អនុប្រធាន សមាជិកអប្បមាទ និង ជំនួយការអប្បមាទ អនុប្រធានមណ្ឌល គណៈកម្មការកណ្ដាល អ្នកត្រួតពិនិត្យអគារ អនុរក្ស សមាជិកសន្តិសុខ និងបុគ្គលិក។ ជាមួយគ្នានេះ រដ្ឋលេខាធិការសុំឲ្យពិនិត្យឡើងវិញពីតម្លៃផ្ញើម៉ូតូកុំឆ្លៀតយកឳកាសប្រឡងដើម្បីតម្លើងថ្លៃសេវា ផ្ញើរម៉ូតូ។

សូមញ្ជាក់ថា ឆ្នាំនេះការប្រឡងសញ្ញាប័ត្រមធ្យមសិក្សាទុតិយភូមិនឹងធ្វើនៅថ្ងៃទី១៩និង២០សីហាហើយឆ្នាំនេះមិនមានការចូលរួមត្រួតពិនិត្យពីអង្គភាពប្រឆាំងអំពើរពុករលួយដូច៤-៥ឆ្នាំកន្លងមកឡើយ។ឆ្នាំនេះក្រសួងអប់រំយុវជន និងកីឡាសហការជាមួយក្រសួងមហាផ្ទៃ កងរាជអាវុធហត្ថ កម្លាំងសឹករងរាជធានី ខេត្តទាំង២៥ កម្លាំងប្រជាការពារនិងសន្ដិសុខឯកជនដើម្បីរក្សាសន្តិសុខ សណ្ដាប់ធ្នាប់នាពេលប្រឡង ៕