ភ្នំពេញ ៖ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ បានទទួលជួបពិភាក្សាជាមួយតំណាងក្រុមហ៊ុន Accutor អំពីគម្រោងវិនិយោគសាធារណៈ ពាក់ព័ន្ធនឹងការអភិវឌ្ឍប្រព័ន្ធអេឡិចត្រូនិច និងវិស័យបច្ចេកវិទ្យាព័ត៌មាន តាមរយៈយន្តការភាពជាដៃគូរវាងរដ្ឋ និងឯកជន។

ជំនួបពិភាក្សាជាមួយតំណាងក្រុមហ៊ុននេះ គឺជាការបន្តកិច្ចពិភាក្សាការងារ ដែលសម្តេចតេជោ នាយករដ្ឋមន្រ្តីបានណែនាំក្នុងជំនួបជាមួយវិស័យឯកជន ក្នុងអំឡុងដំណើរទស្សនៈកិច្ចទៅកាន់ប្រទេសស្វីស កាលពីខែកក្កដា ឆ្នាំ២០១៩ កន្លងទៅ។ ក្នុងកិច្ចពិភាក្សានេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានជម្រាបតំណាងក្រុមហ៊ុនអំពីស្ថានភាពបច្ចុប្បន្ន និងវឌ្ឍនភាពនៃកិច្ចខិតខំប្រឹងប្រែងរបស់ រាជរដ្ឋាភិបាល ក្នុងការអភិវឌ្ឍវិស័យទូរគមនាគមន៍ និងបច្ចេកវិទ្យាគមនាគមន៍ និងព័ត៌មាននៅកម្ពុជា ដោយបច្ចុប្បន្នរាជរដ្ឋាភិបាលបានកំពុងនឹងរៀបចំ (១) ក្របខ័ណ្ឌគោលនយោបាយស្តីពីសេដ្ឋកិច្ចឌីជីថល កម្ពុជា និង ទី(២) ក្របខ័ណ្ឌគោលនយោបាយស្តីពីរដ្ឋាភិបាលឌីជីថល ដែលជាក្របខ័ណ្ឌឯកសារ ចាំបាច់ដែលពិនិត្យ និងវាយតម្លៃលើស្ថានបច្ចុប្បន្ននៃវិស័យ និងតម្រូវការជារួមរបស់ប្រទេស ព្រមទាំង កំណត់ពីក្របខ័ណ្ឌ និងគោលការណ៍ណែនាំសំខាន់ៗមុននឹងឈានដល់ការរៀបចំផែនការមេ និងផែនការ វិនិយោគលើវិស័យសេដ្ឋកិច្ចឌីជីថលទាំងមូល.

តាមរយៈកិច្ចពិភាក្សានេះតំណាងក្រុមហ៊ុន Accutor បានស្នើសុំចូលរួមក្នុងក្រុមការងារបច្ចេក
ទេសនៃការរៀបចំក្របខ័ណ្ឌគោលនយោបាយទាំង២នេះ ដើម្បីផ្តល់ការគាំទ្រផ្នែកបច្ចេកទេស ក្នុងករណី មានតម្រូវការពីរាជរដ្ឋាភិបាល ហើយជាការឆ្លើយតប ឯកឧត្តមអគ្គបណ្ឌិតសភាចារ្យបានថ្លែងអំណរគុណ និងសូមស្វាគមន៍ចំពោះសំណើនេះ និងស្នើឱ្យតំណាងក្រុមហ៊ុនធ្វើជាទីប្រឹក្សាឱ្យក្រុមការងារបច្ចេកទេស នេះតែម្តង។

ដោយពិតឃើញថា ក្រុមហ៊ុន Accutor មានឯកទេសខាងសេវាកម្មព័ត៌មានវិទ្យានៅក្នុងផ្នែក អប់រំ និងសុខាភិបាល ឯកឧត្តមអគ្គបណ្ឌិតសភាចារ្យបានលើកទឹកចិត្តឱ្យក្រុមហ៊ុនបន្តពិភាក្សាការងារ លម្អិតជាបណ្តើរៗជាមួយក្រសួងបច្ចេកទេសផ្ទាល់តែម្តងលើសំណើអភិវឌ្ឍន៍គម្រោងព័ត៌មានវិទ្យាសម្រាប់វិស័យអប់រំ និងសុខាភិបាល ដើម្បីមានមូលដ្ឋានគ្រប់គ្រាន់សម្រាប់រៀបចំសំណើគម្រោង ដែលអាចជា ចំណុចចាប់ផ្តើមនៅពេលដែលគោលនយោបាយស្តីពីសេដ្ឋកិច្ចឌីជីថលកម្ពុជា និងរដ្ឋាភិបាលឌីជីថល ព្រមទាំងផែនការនៃការអភិវឌ្ឍន៍វិស័យត្រូវបានអនុម័ត និង ដាក់ឱ្យប្រើប្រាស់៕

ភ្នំពេញ ៖ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកអគ្គនាយកអគ្គិសនីកម្ពុជា ឯ. ឧ កែវ រតនៈ បានបញ្ជាក់ឲ្យដឹងថា មកដល់ពេលនេះ អគ្គិសនីកម្ពុជាបានធ្វើការ តបណ្តាញផ្គត់ផ្គង់អគ្គិសនីដល់ភូមិឋានប្រជាពលរដ្ឋ បានចំនួន៩៣ភាគរយហើយ។ បើតាមអគ្គិសនីកម្ពុជា ការផ្គត់ផ្គង់អគ្គិសនីឲ្យគ្រប់ភូមិឋានប្រជាពលរដ្ឋ នឹងសម្រេចឲ្យ១០០ភាគរយនៅត្រឹមឆ្នាំ២០២០។

នៅក្នុងសន្និសីទកាសែតកាលពីម្សិលម៉ិញ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកអគ្គនាយកអគ្គិសនីកម្ពុជា ឯ. ឧ កែវ រតនៈ បានបញ្ជាក់ថា គិតមកដល់ពេលនេះ អគ្គិសនីកម្ពុជា បានធ្វើការតបណ្តាញអគ្គិសនីទៅដល់ភូមិដ្ឋានរបស់ពលរដ្ឋសម្រេចបាន៩៣ភាគរយហើយ ហើយតបណ្តាញចូលដល់ ខ្នងផ្ទះរបស់ពលរដ្ឋបាន៧៣ភាគរយ។ អគ្គិសនីកម្ពុជា នឹងបន្តពន្លឿនការត បណ្តាញឲ្យដល់លំនៅដ្ឋានរបស់ពលរដ្ឋឲ្យបាន១០០ភាគរយនៅត្រឹម២០២០ ។ បើតាម ឯ.ឧ កែវ រតនៈ កម្ពុជា ជាប្រទេសតបណ្តាញអគ្គិសនីទៅដល់ភូមិ ប្រជាពលរដ្ឋលឿនជាងគេបំផុតនៅក្នុងតំបន់។ ជាការកត់សំគាល់ តម្រូវការ នៃការប្រើប្រាស់អគ្គិសនី បានកើនឡើងយ៉ាងគំហុកក្នុងរយៈពេលចុងក្រោយ នេះ ដែលបរិមាណប្រើប្រាស់បានកើនឡើងជាង២០ដងធៀបទៅនឹង១៩ឆ្នាំមុន។ មកដល់ពេលនេះ កម្ពុជា ត្រូវការអគ្គិសនីដល់ទៅជាង២០០០មេហ្គាវ៉ាត់ ត្បិតវិស័យសំណង់ និងការកើនឡើងនៃអ្នកវិនិយោគមានច្រើនសន្ធឹកសន្ធាប់។

បើតាម ឯ.ឧ កែវ រតនៈ នៅពេលខាងមុខនេះ កម្ពុជា នឹងមានឯករាជ្យភាពខាងអគ្គិសនីប្រើប្រាស់ដោយមិនចាំបាច់ទិញអគ្គិសនីពីប្រទេសជិតខាងនោះទេ។ បច្ចុប្បន្បនេះ ប្រភពអគ្គិសនីពីប្រទេសជិតខាងមានតិចតួច គឺកម្ពុជា ទិញពីវៀតណាមប្រមាណ១០ភាគរយ ពីប្រទេសថៃ៦ភាគរយ និងពីប្រទេសឡាវ ចំនួនមិនដល់២ភាគរយផងនោះទេ។ កម្ពុជាកំពុងពង្រីកការផលិតអគ្គិសនី តាមរយៈការសាងសង់វារីអគ្គិសនីបន្ថែម សាងសង់រោងចក្រផលិតអគ្គិសនី ដើរដោយធ្យូងថ្ម រោងចក្រផលិតអគ្គិសនីដើរដោយពន្លឺព្រះអាទិត្យ រឺប្រព័ន្ធ សូឡាជាដើម៕

កំពង់ចាម ៖ គម្រោង សាងសង់ ឡេីង វិញ សំណង់ខឿនច្រាំងទន្លេដែលជារបាំងការពារទឹកជំនន់លិចលង់ក្រុងកំពង់ចាម ដែលរាជរដ្ឋាភិបាលសម្រេចផ្តល់នូវទឹកប្រាក់ប្រមាណ១,៦លានដុល្លារ តាមរយៈក្រសួងធនធានទឹកនិងឧតុនិយម ដោយការសាងសង់ មានប្រវែង១៧០ម៉ែត្រ ជម្រៅ២១ម៉ែត្រ សាងសង់ដោយក្រុមបច្ចេកទេសក្រសួង ធនធានទឹក និងឧតុនិយម មកដល់ពេលនេះសម្រេចបាន ប្រមាណ ជាង៧០ភាគរយហេីយ ដែលអាច ធានាបាន ក្នុង រង្វង់ កម្ពស់ ទឹកជំនន់ ទន្លេមេគង្គ ប្រមាណ ជាង១០ម៉ែត្រ ដោយ ផ្អែកលើ ប្រវែង កម្ពស់ ជើងទេរ ចំនួន ពីរ កង់ ខាងក្រោម នៅតែខឿនបង្កាន់ដៃការពារទឹកឡើងហួសពីចំណុចប្រកាសអាសន្ន ។ នេះបើតាមការបញ្ជាក់ឲ្យដឹង របស់ លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម ។

ក្នុងឱកាសអញ្ជើញចុះពិនិត្យការដ្ឋានស្ថាបនាគម្រោងខាងលើ នាល្ងាចថ្ងៃទី០៨ ខែសីហា ឆ្នាំ២០១៩ នេះដែរ លោក អ៊ុន ចាន់ដា អភិបាល នៃគណៈអភិបាល ខេត្តកំពង់ចាម បានជំរុញឲ្យអ្នកទទួលការគម្រោង យកចិត្តទុកដាក់លើកិច្ចការរបស់ខ្លួន ដើម្បី ឲ្យរួចរាល់ ទាន់មុនរដូវទឹកឡេីងឈានមកដល់ ។

សូមបញ្ជាក់ផងដែរថា បន្ទាប់ពីរងការបាក់ស្រុតដោយសារទឹកជំនន់ ទន្លេមេគង្គកាលពីឆ្នាំ២០១៨ កន្លងទៅ អាជ្ញាធរខេត្តក៏បានស្នើសុំជួយអន្តរាគមន៍ពីរាជរដ្ឋាភិបាល ដើម្បី សាងសង់គម្រោងរបាំងការពារច្រាំងទន្លេប្រវែង ១៧០ម៉ែត្រនេះឡើងវិញ ដើម្បី បញ្ចៀសការបាក់ស្រុតច្រាំង ដែលនាំឲ្យបាក់ដាច់ខូចខាត ប៉ះពាល់ដល់ផ្លូវថ្នល់ ។

ជាមួយនឹងការសាងសង់គម្រោងការពារច្រាំងទន្លេនេះដែរ អាជ្ញាធរខេត្ត ក៏គ្រោងនឹងជួសជុលកែលម្អសួនច្បារ ដែលបានបាក់ស្រុតជាមួយនឹងច្រាំង ឲ្យបានប្រសើរឡើងវិញ ផងដែរ។

បេីយោងតាម របាយការណ៍ របស់មន្ទីរធនធានទឹក និងឧត្តុនិយមខេត្តកំពង់ចាម បាន បញ្ជាក់ ថា សម្រាប់ខេត្តកំពង់ចាម ចាប់ គិតត្រឹមថ្ងៃទី៩ ខែសីហា ឆ្នាំ២០១៩នេះ ទឹកទន្លេ មេគង្គកេីនឡេីង កម្ពស់ ៧.៣២ម៉ែត្រ បេី ប្រៀបធៀប នឹង ថ្ងៃ ម្សិលមិញ ទឹក កេីនឡេីង ០.២៥ម៉ែត្រ ដោយ ឡែក ឆ្នាំ ២០១៨កន្លងទៅ ទឹក មាន កម្ពស់ រហូត ១៥.២២ម៉ែត្រ ឯណោះ ខណៈកម្ពស់ទឹក ដែល ត្រូវ ប្រកាស អាសន្ន ១៥.២០ម៉ែត្រ ៕ សុផល

បន្ទាយមានជ័យ ៖ អភិបាលក្រុង សិរីសោភ័ណ លោក ហ៊ឹល រ៉ាយ៉ា បានប្រកាសថា នឹងចាត់ការក្តៅលើសំណង់ អ្នកពុះដីល្វែង និងអ្នកចាក់ដីលុបបឹងបួរ ប្រឡាយនិងចំណីស្ទឹងអត់ច្បាប់ ។លោកប្រកាសឡើងបែបនេះ ខណ:ដែលលោក រួមនឹងមន្ត្រីជំនាញ សមាជិក ក្រុមប្រឹក្សា ក្រុង ចុះពិនិត្យមេីលដោយផ្ទាល់ទីតាំងចាក់ដីរំលោភលុបហាតស្ទឹងសិរីសោភ័ណ នៅចំនុចស្ពានទឹកថ្លា ក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ កាលពីព្រឹកថ្ងៃទី០៨ ខែសីហា ឆ្នាំ ២០១៩ ។

នៅពេលចុះពិនិត្យនោះដែរលោក ហ៊ឹល រ៉ាយ៉ា អភិបាលក្រុង ក៏បានចាត់វិធានការក្តៅមិនឲ្យមានការចាក់ដីលុបមាត់ស្ទឹងនៅចំនុចទៅខាងលេីដែលជាដីចំណីស្ទឹង ទៀតទេ ដែលកន្លងទៅអ្នកដែលកាយដីចាក់នៅចំនុចខាងលេីត្រូវបានគេស្គាល់ឈ្មោះ ផេង ហ៊ួ រ ដែលបានកាយដីចាក់លុបបំរ៉ុងធ្វេីជាកម្មសិទ្ធរបស់ខ្លួន ដែលជាដីចំណីមាត់ស្ទឹងរបស់រដ្ឋ ដោយគ្មានខ្លាចរអាអាជ្ញាធរ នឹងច្បាប់ទាល់តែសោះ ដោយបានយកឈ្មោះថ្នាក់ដឹកនាំមកប្រេី ។
តែដោយទទួលបានអនុសាសន៍ណែនាំពីគណៈអភិបាលខេត្តបន្ទាយមានជ័យ ឯកឧត្តម អ៊ុ រាត្រី លោកអភិបាលក្រុងក៏បានចាត់វិធានការយកគ្រឿងចក្រ អេស្កាវ៉ាទ័រ ដេីម្បីកាយដីនោះចេញបេីកមុខទឹក នឹងស្តារដីដែលចាកលុបចេញផងដែរ។

លោក ហ៊ឹល រ៉ាយ៉ា អភិបាលក្រុង បានបញ្ជាក់ថា ៖ ការចុះអនុវត្ត នឹងចាត់វិធានការនេះមិនមែនធ្វេីតែមួយកន្លែងនោះទេ គឺធ្វេីទាំងអស់នៅក្នុងក្រុង នៅទីតាំងណាដែលរំលោភយកដីរដ្ឋ ចាក់ដីលុបស្ទឹងជាដេីម ពិសេសដោយអនុវត្តតាមសេចក្តីសម្រេចរបស់រដ្ឋបាលខេត្ត លេខ២៨៦/១៩ សសរ ស្តីពីការបង្កេីនគណៈកម្មការដេីម្បីត្រួតពិនិត្យទីតាំងពុះបំបែកដីល្វែង និងទប់ស្កាត់ការចាក់ដីបំពេញអាចម៍ដីពុំមានលិខិតអនុញ្ញាត នៅក្នុងក្រុង/ស្រុកនៅក្នុងខេត្តបន្ទាយមានជ័យ ។ ពោលគឺចាប់ពីពេលនេះតទៅលោកនឹងចុះអនុវត្តទាំងអស់ដោយមិនមានការលេីកលែងឡេីយ ដោយក្នុងនោះចំពោះសំណង់ ទីតាំងចាក់ដី ទីតាំងបុរី ទីតាំងពុះបំបែកដីល្វែង ដែលមាននៅក្នុងក្រុងដែលគ្មានច្បាប់លោកនឹងចាត់វិធានការ បេីនៅតែរឹងរូសមិនស្តាប់ នឹងមានវិធានការក្តៅដោយមិនលេីកលែងជាដាច់ខាត គឺត្រូវតែអនុវត្តតាមនីតិវិធីច្បាប់ ៕

ភ្នំពេញ៖រឿងរ៉ាវដែលមន្រ្តីយោធា ម្នាក់ដែលបាញ់ប្រហារប្រពន្ធ ចំនួន ៧គ្រាប់ បណ្តាលអោយរងរបួសធ្ងន់កាលពីយប់មិញ បន្ទាប់ពីសាកសួរ គឺផ្តើមចេញពីភ្លើងប្រចណ្ឌ ដោយសារតែបុរសជាប្តីមានការសង្ស័យថា ប្រពន្ធទៅផឹកជាមួយប្រុសស្នេហ៍ មិនមកផឹកជាមួយខ្លួន។

ហេតុការណ៍ហឹង្សារនេះបង្កអោយមានការភ្ញាក់ផ្អើលកកាលពីវេលាម៉ោង១១និង៤០នាទីយប់ ថ្ងៃទី០៧ខែសីហា ឆ្នាំ ២០១៩ នៅហាងបាយយីហោ«ទីរ៉ានី»ដែលស្ថិតនៅតាមផ្លូវរថភ្លើង ក្នុងភូមិ ចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ។

មន្រ្តីយោធា ដែលបាញ់សម្លាប់ត្រូវចាប់ខ្លួន ឈ្មោះឆោម ចំណានអាយុ៣៩ឆ្នាំ ថានន្តរស័កថ្នាក់ព្រឹនបាលឯក នៅភូមិភាគ៥ មានលំនៅស្នាក់នៅភូមិសាលាដែង ឃុំឬស្សីក្រោក ស្រុកមង្គល់បូរី ខេត្តបន្ទាយមានជ័យ។ចំណែកស្រ្តីជាប្រពន្ធ ឈ្មោះ ជា បតី ហៅជា គឹមឡាង អាយុ៣៥ឆ្នាំ មុខរបរលក់ខោអាវនៅផ្សារចិនណាន់ ស្នាក់នៅផ្ទះគ្មានលេខ ផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខបានរងរបួសចំនួន៤គ្រាប់ត្រូវដើមដៃខាងឆ្វេង , ពោះទឹកខាងឆ្វេង , លើស្មាខាងស្តាំ , និងលើពោះទឹកខាងស្តាំ កំពុងតែសម្រាកព្យាបាលនៅមន្ទីរពេទ្យកាលម៉ែត ។

លោកវរះសេនីយ៍ ឯក ហួរ ម៉េងវ៉ាង អធិការនគរបាលខណ្ឌសែនសុខ បានអោយដឹងថា ការបាញ់ប្រហារនេះ ផ្អើមចេញពីភ្លើងប្រចណ្ឌ ហើយ បុរសជាប្តី ដែលជាមន្រ្តីយោធា ក៍បានទៅយកកាំភ្លើងខ្លីពី ក្នុងរថយន្តបាញ់ប្រមាណទៅលើស្រ្តីជាប្រពន្ធចំនួន៧គ្រាប់បណ្តាលអោយត្រូវចំនួន៤គ្រាប់រងរបួសធ្ងន់កំពុងតែសង្គ្រោះបន្ទាន់។

តាមព័ត៌មានបន្ទាប់ពីបង្កហឹង្សា បាញ់សម្លាប់ប្រពន្ធ មន្រ្តីយោធាក៍បានបើករថយន្តគោលបំណង់ទៅបន្ទាយ តែត្រូវបានកម្លាំងនគរបាលខណ្ឌសែនសុខ សហការណ៍ជាមួយកម្លាំងនគរបាលប៉ុស្តិ៍ នានា ស្ទាក់ចាប់បាននៅតាមផ្លូវ ភ្នំពេញហាណូយ នៅមុខ ហ្គែនភ្នំពេញក្នងសង្កាត់ឃ្មួញដោយដកហូតបានកាំភ្លើង ខ្លីម៉ាកK៥៩មួយដើម ។នៅចំពោះមុខ នគរបាលមន្រ្តីយោធារូបនោះ បានសារភាព អោយដឹងថា មូលហេតុ ដែលបាញ់សម្លាប់ប្រពន្ធ ដោយសារតែខឹងប្រពន្ធមានទំនាក់ទង់ជាមួយប្រុសផ្សេងនិងនិយាយភូត កុហក់ច្រើន។ម្យ៉ាងទៀត នៅមុនពេលកើតហេតុគាត់បានហៅប្រពន្ធមកផឹកជាមួយតាំងពីវេលាម៉ោង២រសៀល ហើយប្រពន្ធចេះតែដោះសាររហូត។

តាមមន្រ្តីយោធារូបនោះ បានអោយដឹងទៀតថា នៅវេលាម៉ោងប្រមាណ២រសៀល ថ្ងៃទី០៧ខែសីហា គាត់បានហៅប្រពន្ធ ទៅញ៉ាំអីនៅហាងខាងលើ តែប្រកែក ថា ជាប់ទៅធ្វើសក់ ។លុះនៅវេលាម៉ោងប្រមាណ១០យប់ ក៍បានទូរស័ព្ទហៅម្តងទៀតហើយ ប្រពន្ធថា នៅហូមអីមុខសាលាប៊ែធីគាត់ក៍មានការសង្ស័យក៍បានជិះម៉ូតូចេញទៅមើលស្រាប់តែឃើញប្រពន្ធជិះម៉ូតូត្រឡប់មកពីផ្សារដីហុយវិញ ។ នៅពេលទៅដល់ហាង ប្រពន្ធមិនបានផឹកនោះទេហើយក្រហឺតក្រទម ហើយគាត់ក៍បានសួរនាំនិងអោយហៅប្រុសម្នាក់នោះមកជួបនិយាយគ្នាបន្តិចក៍មានការឈ្លោះប្រកែកគ្នា គាត់ក៍ទ្រាំងលែងបានក៍ទៅយកកាំភ្លើង ក្នុងរថយន្តមកបាញ់ប្រពន្ធតែម្តង។

បុរសជាប្តីបានអោយដឹងទៀងថា កន្លងមក ប្រពន្ធលួចមានប្រុសថ្មីហើយកាលពី៣ខែមុន ខ្លួនលួចមកលេងភ្នំពេញឃើញប្រពន្ធនៅជាមួយប្រុសគាត់ខឹងវាយប្រុសនោះម្តងមកហើយ លុះលើកនោះហៅមកផឹកជុំគ្នា បែរជាមិនមកហើយបែរជាផឹកកន្លែងផ្សេងទៅវិញ៕

ភ្នំពេញ ៖ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកអគ្គិសនីកម្ពុជា លោក កែវ រតនៈ បានបញ្ជាក់ឲ្យដឹងថា អគ្គិសនីកម្ពុជា នឹងធ្វើការផ្លាស់ប្តូរវិក័យបត្រអគ្គិសនី ទៅជាភាសាខ្មែរទាំងស្រុង នៅឆ្នាំក្រោយនេះ ដើម្បីបង្កលក្ខណៈងាយស្រួលដល់ប្រជាពលរដ្ឋទូទៅ។

នៅក្នុងសន្និសីទកាសែតប្រចាំសប្តាហ៏ នាទីស្តីការគណៈរដ្ឋមន្ត្រី នៅព្រឹកថ្ងៃទី០៨ សីហា ស្តីពី“ចម្ងល់ពាក់ព័ន្ធនឹងកុងទ័រភ្លើង” ឯ.ឧ កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី ទទួលអគ្គិសនីកម្ពុជា បានបញ្ជាក់ប្រាប់អ្នកកាសែតថា អគ្គិសនីកម្ពុជា នឹងធ្វើការកែសម្រួលវិក័យបត្រភ្លើងប្រចាំខែ ឲ្យទៅជាភាសាខ្មែរទាំងស្រុង អមដោយលេខទូរស័ព្ទទំនាក់ទំនង និងហ្វេសប៊ុកផេកផ្លូវការនៅ ខាងលើ ដើម្បីអាចឲ្យបងប្អូនងាយស្រួលមើល និងងាយស្រួលក្នុងការតវ៉ា និង សួរទៅមន្ត្រីអគ្គិសនីកម្ពុជា ពាក់ព័ន្ធនឹងរឿងកុងទ័រភ្លើង។ ការបញ្ជាក់របស់មេអគ្គិសនីនាពេលនេះ គឺនៅគ្រាដែលមានប្រជាពលរដ្ឋរិះគន់ថា វិក័យបត្រភ្លើង សុទ្ធតែភាសាបរទេស គាត់មើលមិនសូវយល់ ហើយភ័ន្តច្រលំជាច្រើនលើក ចំពោះការទូទាត់ប្រាក់ថ្លៃអគ្គិសនី។ បើតាម ឯ.ឧ កែវ រតនៈ អាចនៅឆ្នាំក្រោយនេះ អគ្គិសនីកម្ពុជា នឹងធ្វើការកែសម្រួលវិក័យបត្រថ្មី ប៉ុន្តែត្រូវការពេលវេលា ដើម្បីអ្នកបច្ចេកទេសកែសម្រួល និងធ្វើការផ្តាច់កុងត្រាចាស់ជាមួយប្រទេសណូវែលហ្សេឡង់ ត្បិតប្រព័ន្ធទាំងនោះកម្ពុជាទិញពីណូវែលហ្សេឡង់។

ឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា បានលើកឡើងថា នាទិការស្ទង់ រឺកុងទ័រអគ្គិសនីមានបញ្ហា និងមិនត្រឹមត្រូវ។ ឯ.ឧពន្យល់ថា គីឡូវ៉ាត់ភ្លើងឡើងខ្លាំងមិនមែនមកពីបញ្ហានាទ្បិកាស្ទង់នោះទេ ប៉ុន្តែអាចមកកត្តាផ្សេងទៀត ដូចជាខ្សែភ្លើងមានបញ្ហានៅក្នុងផ្ទះ រឺការប្រើប្រាស់ភ្លើងមិនបានត្រឹមត្រូវ រឺប្រើប្រាស់ច្រើន។ ទោះយ៉ាងណា អាជ្ញាធរអគ្គិសនីកម្ពុជាលើកទឹកចិត្តដល់ប្រជាពលរដ្ឋស្នើសុំឲ្យអ្នកផ្គត់ផ្គង់ជួយពិនិត្យកុងទ័ររបស់ពលរដ្ឋដោយផ្ទាល់។
បើតាមរដ្ឋមន្ត្រីប្រតិភូអមនាយករដ្ឋមន្ត្រី ឯ.ឧ កែវ រតនៈ អគ្គិសនីកម្ពុជា នឹងធ្វើ ការទិញនាឡិកាស្ទង់មេកានិចពីប្រទេសជប៉ុន ដើម្បីជំនួសដូរកុងទ័រចាស់ដែលជាកុងទ័រអេឡិចត្រូនិក បង្កើតឲ្យប្រជាពលរដ្ឋកាន់តែមានទំនុកចិត្តចំពោះនាឡិកាស្ទង់គីឡូវ៉ាត់របស់ប្រជាពលរដ្ឋ។

គួរជម្រាបដែរថា មកដល់ពេលនេះ ការផ្គត់ផ្គង់អគ្គិសនីសម្រាប់ការប្រើប្រាស់ ទូទាំងប្រទេស មិនមានការខ្វះខាត និងដាច់ចរន្តអគ្គិសនីទៀតទេ ដោយសារ វារីអគ្គិសនីដែលជាប្រភពអគ្គិសនីដ៏សំខាន់ បានបញ្ចេញថាមពលគ្រប់ចំនួន ក្រោយភ្លៀងធ្លាក់គ្រប់គ្រាន់មក៕

ដោយ ៖ សុផល

ខេតកំពង់ចាម ៖ ដើម្បីត្រៀមលក្ខណៈសម្បត្តិ ក្នុងការបង្ការការទប់ស្កាត់ទឹកជំនន់ ទន្លេ មេគង្គ មិនឲ្យហូរចូល ក្នុងក្រុងនៅរដូវទឹកឡើងខាងមុខនាល្ងាចថ្ងៃទី០៧ ខែសីហា ឆ្នាំ២០១៩ នេះ លោក អ៊ុន ចាន់ដា អភិបាល នៃគណៈអភិបាល ខេត្តកំពង់ចាម អមដំណើរ ដោយថ្នាក់ដឹកនាំ នៃមន្ទីរ អង្គភាពពាក់ព័ន្ធ ជុំវិញខេត្ត និងអាជ្ញាធរមូលដ្ឋាន បានអញ្ជើញចុះពិនិត្យទ្វារប្រព័ន្ធលូ ២កន្លែង ស្ថិតនៅ ក្នុង សង្កាត់ បឹងកុក ក្រុងកំពង់ចាម ខេត្តកំពង់ចាម ។

សូមបញ្ជាក់ផងដែរថា នៅទូទាំងក្រុងកំពង់ចាម មានប្រព័ន្ធលូមេធំៗ រំដោះទឹកចំនួន ៦កន្លែង ក្នុងនោះ ២កន្លែង បានជួសជុលទ្វារទឹក ឲ្យប្រសើរឡើងវិញ បន្ទាប់ពីរងការខូចខាត នារដូវទឹកជំនន់កាលពីឆ្នាំ២០១៨ កន្លងទៅ ។

អាជ្ញាធរតែងតែប្រើប្រាស់លូមេទាំង ៦កន្លែង នេះ ដើម្បី រំដោះទឹកភ្លៀង ឬទឹកដែលប្រជាពលរដ្ឋប្រើប្រាស់ប្រចាំថ្ងៃ ចេញពីក្រុង និងទប់ស្កាត់ទឹក ទន្លេ មេគង្គ មិនឲ្យហូរចូលមក ក្នុង ក្រុង កំពង់ចាម នាពេលទឹកជំនន់ធំមកដល់នោះ ។

បេីយោងតាម របាយការណ៍ របស់ លោក អ៊ុ វិបុល ប្រធានមន្ទីរធនធានទឹក និងឧត្តុនិយមខេត្តកំពង់ចាម បាន បញ្ជាក់ ថា សម្រាប់ខេត្តកំពង់ចាម ចាប់ គិតត្រឹមថ្ងៃទី៧ ខែសីហា ឆ្នាំ២០១៩នេះ ទឹកទន្លេ មេគង្គមាន កម្ពស់ ៧.០៤ម៉ែត្រ បេី ប្រៀបធៀប នឹង ថ្ងៃ ម្សិលមិញ ទឹក ស្រកចុះ ០.២០ម៉ែត្រ ដោយ ឡែក ឆ្នាំ ២០១៨កន្លងទៅ ទឹក មាន កម្ពស់ រហូត ១៥.១៤ម៉ែត្រ ឯណោះ ខណៈកម្ពស់ទឹក ដែល ត្រូវ ប្រកាស អាសន្ន ១៥.២០ម៉ែត្រ ៕

\

ភ្នំពេញ ៖ លោកប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា នៅថ្ងៃទី៧ខែសីហានេះបានអញ្ជើញទៅកាន់ទីក្រុងហ្សាការតា ប្រទេសឥណ្ឌូនេស៊ី ដើម្បីចូលរួមជាមួយរដ្ឋមន្ត្រីការបរទេស និងអ្នកតំណាងផ្សេងទៀត របស់ប្រទេសសមាជិកអាស៊ាន ក្នុងពិធីសម្ពោធជាផ្លូវការនូវអគារថ្មី របស់លេខាធិការដ្ឋានអាស៊ាន តបតាមការអញ្ជើញរបស់លោកជំទាវ រ៉េតណូ ម៉ារស៊ូឌី_(Retno Marsudi) រដ្ឋមន្ត្រីការបរទេសឥណ្ឌូនេស៊ីដែលនឹងប្រារពធ្វើនៅថ្ងៃទី៨ ខែសីហា ឆ្នាំ២០១៩នេះ។

យោងតាមសេចក្ដីប្រកាសព័ត៌មាន របស់ក្រសួងការបរទេសនិងសហប្រតិបត្តការអន្តរជាតិកម្ពុជា បានឲ្យដឹងថា ពិធីសម្ពោធនេះ ប្រព្រឹត្តទៅចំខួបលើកទី៥២ឆ្នាំ នៃការបង្កើតអាស៊ាន។ លើសពីនេះ ក៏នឹងមានរៀបចំការតម្លើងប្រអប់ពេលវេលា ដើម្បីរក្សាទុកនូវសារលិខិត របស់ បណ្តាថ្នាក់ដឹកនាំអាស៊ាន ដែលរៀបរាប់ពីក្តីសង្ឃឹម និងការរំពឹងទុក មកលើអាស៊ាន នៅចំពេលខួបលើកទី៧៥ឆ្នាំ នៃការបង្កើតអាស៊ាន នៅឆ្នាំ២០៤២ ខាងមុខផងដែរ។
ការសម្ពោធអគារលេខាធិការដ្ឋានអាស៊ានថ្មីនេះ បង្ហាញឲ្យឃើញនូវតួនាទីកាន់តែកើនឡើងរបស់លេខាធិការដ្ឋានអាស៊ាន និងថ្នាក់ដឹកនាំរបស់ខ្លួន ក្នុងការឆ្លើយតបទៅនឹងបញ្ហាប្រឈមនានាដែលកំពុងវិវត្ត ក្នុងសកលលោក និងក្នុងតំបន់ ក៏ដូចជាក្នុងការកសាងសហគមន៍អាស៊ាន ដែលមានសសរស្តម្ភបីគឺ៖ សហគមន៍នយោបាយ-សន្តិសុខ សហគមន៍សេដ្ឋកិច្ច និងសហគមន៍សង្គម-វប្បធម៌៕

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងឯកឧត្តម ម៉ៃទ្រីប៉ាឡា ស៊ីរីសេនា ប្រធានាធិបតីនៃសាធារណរដ្ឋសង្គមនិយមប្រជាធិបតេយ្យស្រីលង្កា បានអញ្ជើញចូលរួមក្នុងវេទិកាធុរកិច្ចកម្ពុជា-ស្រីលង្កា នៅរសៀលថ្ងៃ០៧ សីហា នាសណ្ឋាគារ សូហ្វីតេលភ្នំពេញ ដើម្បីបង្ហាញពីសក្តានុពលនៃប្រទេសនីមួយទៅកាន់ធុរជន។ 

ថ្លែងនៅក្នុងវេទិកាធុរកិច្ចកម្ពុជា-ស្រីលង្កា នៅរសៀលថ្ងៃទី០៧ សីហានេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញសក្តានុពលសំខាន់ៗចំនួន៥ ចំពោះវិនិយោគិនស្រីលង្កា គ្រាដែលកម្ពុជារក្សាបានកំណើនសេដ្ឋកិច្ច៧,៧ភាគរយ។ សម្តេចតេជោថ្លែងថា កម្ពុជាស្វាគមន៏រាល់ការវិនិយោគ គ្រប់បណ្តាប្រទេសណាទាំងអស់មកកាន់កម្ពុជា។ សម្តេចបានបញ្ជាក់ថា ភាពអំណោយផលនៃស្ថេរភាពនយោបាយនិងម៉ាក្រូសេដ្ឋកិច្ច ការបើកចំហសេដ្ឋកិច្ចសម្រាប់អ្នកវិនិយោគទាំងអស់ដោយគ្មានការរើសអើងរវាងអ្នកវិនិយោគកម្ពុជានិងអ្នកវិនិយោគបរទេស គឺជាសក្តានុពលគន្លឹះ ដែលវិនិយោគិនគួរមកបន្តាក់ទុនរកស៊ីនៅកម្ពុជា។ ជាមួយគ្នានេះ កម្លាំងពលកម្មដែលមានភាពសម្បូរបែបនិងវ័យក្មេងដែលក្នុងនោះប្រជាជនដែលមានអាយុ ៣៥ ឆ្នាំចុះមានចំនួនដល់ទៅ៧០ភាគរយ នៃចំនួនប្រជាជនសរុបគួបផ្សំនឹងប្រាក់ឈ្នួលដែលមានភាពប្រកួតប្រជែង ពិសេស កម្ពុជាស្ថិតនៅលើទីតាំងជាយុទ្ធសាស្ត្រក្នុងតំបន់អាស៊ានដែលតំបន់នេះ បាននិងកំពុងក្លាយជារោងចក្រនៃអាស៊ី ហើយ ទំនិញផលិតនៅកម្ពុជាអាចផ្គត់ផ្គង់ទីផ្សារនៅក្នុងស្រុកទីផ្សារអនុតំបន់មេគង្គនិងទីផ្សារអាស៊ាននិងទីផ្សារសំខាន់ៗដទៃទៀតក្នុងពិភពលោក។ សម្តេចតេជោ លើកទឹកចិត្តដល់អ្នកវិនិយោគស្រីលង្កា ធ្វើការពិភាក្សាបន្ថែមជាមួយ ធុរៈជនកម្ពុជា និងតំណាងក្រសួងស្ថាប័នពាក់ព័ន្ធ ដើម្បីសិក្សាស្វែងយល់ពី សក្ដានុពលនិងកាលានុវត្តភាពវិនិយោគនៅកម្ពុជាព្រមទាំងសម្រេចចិត្តបណ្ដាក់ទុនវិនិយោគនៅកម្ពុជា។

ទន្ទឹមនឹងនេះសម្តេចតេជោ ក៏សូមលើកទឹកចិត្តដល់អ្នកវិនិយោគកម្ពុជា ដែលមានបំណងចង់ពង្រីកអាជីវកម្មរបស់ខ្លួននៅក្រៅប្រទេសពិចារណាយកប្រទេសស្រីលង្កាជាប្រទេសគោលដៅរបស់ខ្លួន។ តាងនាមរាជរដ្ឋាភិបាលកម្ពុជា សម្តេចតេជោ ប្រកាសសូមស្វាគមន៍ចំពោះ រាល់ការសំរេចចិត្តដ៏ឈ្លាសវៃរបស់អ្នកវិនិយោគបរទេសទាំងអស់ជាពិសេសអ្នកវិនិយោគស្រីលង្កា ដែលមានបំណងជ្រើសរើសកម្ពុជា ជាគោលដៅវិនិយោគដ៏មានសក្ដានុពលខ្ពស់ក្នុងការចាប់ផ្ដើមឬពង្រីកអាជីវកម្មរបស់ខ្លួន។

គួរបញ្ជាក់ដែរថា កម្ពុជា និងស្រីលង្កា បានចាប់ផ្ដើមមានទំនាក់ទំនងការទូតជាមួយគ្នាតាំងពីជាង៦ទសវត្សរ៍មុនមកម្ល៉េះ ពោលគឺចាប់ពីឆ្នាំ១៩៥២ ប៉ុន្តែចំណងការទូតនេះត្រូវបានផ្អាកមួយរយៈដោយសារសង្គ្រាមស៊ីវិលនៅកម្ពុជាចាប់ពីឆ្នាំ១៩៧៥។ ប្រទេសទងពីរ បានបង្កើតទំនាក់ ទំនងការទូតជាផ្លូវការឡើងវិញកាលពីថ្ងៃទី៦ ខែសីហាឆ្នាំ១៩៩៦ ហើយទំនាក់ទំនងរវាងប្រទេសយើងទាំងពីរមានលក្ខណៈជាមិត្តភាពកាន់តែស្និទ្ធស្នាលតាមរយៈការផ្លាស់ប្ដូរទស្សនកិច្ចរបស់ថ្នាក់ដឹកនាំនៃប្រទេសយើងទាំងពីរ៕

ភ្នំពេញ ៖ រដ្ឋបាលរាជធានីភ្នំពេញប្រកាសរឹតបណ្តឹងសន្តិសុខសណ្តាប់ធ្នាប់នៅជុំវិញមណ្ឌល ប្រឡងសញ្ញាបត្រមធ្យមសិក្សាទុតិយភូមិឬបាក់ឌុបអោយបានតឹងរឹងដើម្បីធានាសុវត្ថិភាព និង គុណភាពនៃការប្រឡង។

អភិបាលរងរាជធានីភ្នំពេញបានអៈអាងថា រដ្ឋបាលរាជធានីភ្នំពេញបានត្រៀមផែនការ រួចជាស្រេចហើយក្នុងការការពារសន្តិសុខសណ្តាប់ធ្នាប់នៅជុំវិញមណ្ឌលប្រលងបាក់ឌុប សម្រាប់ឆ្នាំសិក្សា២០១៨-២០១៩នេះ ដើម្បីការពារកុំអោយកើតមានបាតុភាពមិនប្រក្រតីណា មួយកើតឡើងដែលនាំឲ្យរំខានដល់ការប្រឡង។

ថ្លែងក្នុងកិច្ចប្រជុំនៅសាលារាជធានីភ្នំពេញនៅព្រឹកថ្ងៃទី៨ ខែសីហានេះ លោក នួន ផារ័ត្ន អភិបាលរាជធានីភ្នំពេញបានឲ្យដឹងថា សាលារាជធានីភ្នំពេញបានដាក់ចេញផែនការ៤ចំនុច ដើម្បីធានាការពារសន្តិសុខសណ្តាប់ធ្នាប់និងរបៀបរៀបរយនៅជុំវិញបរិវេណមណ្ឌលប្រឡង គឺការពង្រាងកម្លាំងការពារប្រចាំការនៅជុំវិញបរិវេណមណ្ឌលប្រឡង និងការសម្រួលសណ្តាប់ ធ្នាប់ចរាចរណ៍ បុគ្គលិកសុខាភិបាល ឡានសង្គ្រោះបន្ទាន់ និងរថយន្តពន្លត់អគ្គិសភ័យជា ដើម។

លោកអភិបាលរងបានបញ្ជាក់ថា ការត្រៀមផែនការនេះគឺដើម្បីធានាឲ្យបរិយាកាសនៃ ការប្រឡងបានប្រព្រឹត្តទៅដោយរលូនគ្មានការរំខាន ពិសេសគឺធានាបានគុណភាពប្រឡង ដែលស្វែងរកអ្នកដែលចេះពិតប្រាកដ។

លោក ជា ជាតិ អនុរដ្ឋលេខាធិការក្រសួងអប់រំ យុវជននិងកីឡាបានអៈអាងថា ការត្រៀម ផែនការការពារពីគ្រប់ភាគីពាក់ព័ន្ធនេះ នឹងជួយធ្វើឲ្យដំណើរការប្រឡងបានប្រព្រឹត្តទៅដោយ ល្អប្រសើរតាមគារគ្រោងទុក ពិសេសទប់ស្កាត់ទាន់ពេលវេលាចំពោះបាតុភាពមិនប្រក្រតីណា មួយដែលរំខានដល់ដំណើរការប្រឡង។

លោកបានរំលឹកដល់បេក្ខជនប្រឡងទំាងអស់មិនត្រូវយកសំណេរឯកសារឬទូរសព្ទស្មាតហ្វូនចូលក្នុងមណ្ឌលប្រឡងឡើយ បើអនុរក្សរកឃើញនឹងត្រូវធ្លាក់ដោយស្វ័យប្រវត្ត។ ហើយការ ប្រឡងនេះនៅតែអនុវត្តវិធានយ៉ាងតឹងរឹងជាទីបំផុត គឺអ្នកចេះគឺជាប់ អ្នកមិនចេះគឺធ្លាក់ ដើម្បី ធានាតម្លាភាព និងគុណភាពធនធាមនុស្សនៅកម្ពុជា។

យោងតាមប្រកាសដែលក្រសួងអប់រំ បានផ្សព្វផ្សាយតាមរយៈហ្វេសប៊ុកកាលពីថ្មីៗនេះបានឱ្យដឹងថា បេក្ខជនដែលបានប្រព្រឹត្តនូវអ្វីដែលចាត់ទុកថា មានបំណងលួចចម្លង នឹងមិនអនុញ្ញាតឱ្យចូលប្រឡងនោះទេ ហើយត្រូវបានកំណត់ឱ្យធ្លាក់ លើកលែងតែបេក្ខជនប្រគល់រាល់សៀវភៅឯកសារឬសំណៅឯកសារឱ្យគណៈមេប្រយោគមុនចូលមណ្ឌលប្រឡងឬបន្ទប់ប្រឡង។

សូមបញ្ជាក់ថា ការប្រឡងបាក់ឌុបឆ្នាំ ២០១៩ នេះនឹងមានរយៈពេល ២ ថ្ងៃ ចាប់ពីថ្ងៃទី ១៩ ដល់ ២០ ខែសីហា។ បេក្ខជនដែលបានដាក់ពាក្យប្រឡងមានចំនួន ១១៩ ២១៧ នាក់ ស្រី ៦១ ០៣១ នាក់ កើនឡើង ៥ ៨៥២ នាក់ បើធៀបនឹងការប្រឡងឆ្នាំមុន។ មណ្ឌលប្រឡងមានចំនួន ២០២ កើនឡើង ៦ មណ្ឌលបើធៀបនឹងឆ្នាំមុន។ ដោយឡែកសម្រាប់ក្រខណ្ឌរាជធានីភ្នំពេញវិញមានមណ្ឌលប្រឡង ចំនួន២៧មណ្ឌល មានបេក្ខជនចំនួន២៣០៨៨នាក់ ស្មើនឹង១ភាគ៥នៃបេក្ខជនប្រឡងនៅទូទំាងប្រទេស៕

ភ្នំពេញ ៖ តួលេខបណ្តោះអាសន្ននៃជំរឿនស្ថិតិក្នុងឆ្នាំ២០១៩នេះ បានបង្ហាញថា មានប្រជាជនកម្ពុជាសរុបមានជាង ១៥លាននាក់ នៅទូទាំងប្រទេស គិតត្រឹមថ្ងៃទី៣ ខែមីនា ឆ្នាំ២០១៩ ហើយក្នុងនោះ ស្រ្តីមានច្រើនជាងបុរសរហូតដល់ជាង ៤ម៉ឺននាក់។

សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិជំរឿនទូទៅប្រជាជនកម្ពុជា បានថ្លែងថា ប្រជានកម្ពុជាមានចំនួន ១៥លាន ២សែន ៨ម៉ឺន ៨.៤៨៩នាក់ គិតត្រឹមថ្ងៃទី៣ ខែមីនា ឆ្នាំ២០១៩ ក្នុងនោះប្រុសមាន ៧លាន៤សែន១ម៉ឺន៨.៥៧៧នាក់ ហើយស្រី ៧លាន ៨សែន ៦ម៉ឺន ៩.៩១២ នាក់ (ស្រីច្រើនជាងប្រុស) ។ នេះបើតាមលទ្ធផលបឋម ក្នុងពិធីប្រកាសតួលេខនៃការជំរឿនប្រជាជនកម្ពុជាលើកទី៣ ក្រោមអធិបតីភាពសម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅព្រឹកថ្ងៃទី៧ ខែសីហា ឆ្នាំ២០១៩ នៅសណ្ឋាគារភ្នំពេញ។

សម្តេចក្រឡាហោម ស ខេង បានបញ្ជាក់ថា តាមតួលេខបណ្តោះអាសន្ននេះ ពិនិត្យឃើញថា ចំនួនប្រជាជនកម្រិតថ្នាក់ជាតិមាននិន្នាការកើនឡើងយឺត ដោយសារអត្រាផ្តល់កំណើត និងអត្រាកំណើនប្រជាជនបានថយចុះស្របតាមការព្យាករណ៍ដែលបានរំពឹងទុក។ សម្តេចក្រឡាហោម បានបន្ថែមថា អត្រាកំណើនប្រជាជនប្រចាំឆ្នាំបានថយចុះពី១,៥ភាគរយ ក្នុងចន្លោះឆ្នាំ១៩៩៨ និង២០០៨មក១,២ភាគរយ ក្នុងចន្លោះឆ្នាំ២០០៨ និង២០១៩ ហើយអត្រាកំណើនប្រចាំឆ្នាំរបស់កម្ពុជាក្នុងទសវត្សចុងក្រោយនេះ ពិនិត្យឃើញថា ខ្ពស់ជាង អត្រាកំណើនមធ្យមនៅអាស៊ីអាគ្នេយ៍ដែលមានតែ១,០ភាគរយ។ តាមតួរលេខ រាជធានីភ្នំពេញមានប្រជាជនច្រើនជាងគេ គឺមាន២លាន ១សែន ២ម៉ឺន៩,៣៧១នាក់ ហើយខេត្តកែបមានប្រជាជនតិចជាងគេបំផុត៤ម៉ឺន១,៧៩៨នាក់ ប៉ុណ្ណោះ។

ដង់ស៊ីតេប្រជាជនស្មើនឹង៨៦នាក់ ក្នុងផ្ទៃដីមួយគីឡូម៉ែត្រការ៉េ នៅឆ្នាំ២០១៩។ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានលើកឡើងថា ការជំរឿនក្នុងឆ្នាំ២០១៩នៅកម្ពុជានេះ នឹងផ្តល់ទិន្នន័យច្បាស់លាស់អំពីទំហំប្រជាជន និងចរិកលក្ខណៈប្រជាជនបន្ទាប់ពីជំរឿនប្រជាជនឆ្នាំ២០០៨។ ទិន្នន័យទាំងអស់នេះគឺ មានសារៈសំខាន់ណាស់សម្រាប់រាជរដ្ឋាភិបាលកម្ពុជា ដៃគូអភិវឌ្ឍន៍ និងអ្នកប្រើប្រាស់ទាំងឡាយធ្វើសេកច្តីសម្រេចប្រកបដោយប្រសិទ្ធភាពក្នុងការកសាងផែនការឆ្ពោះទៅរកការអភិវឌ្ឍន៍ជាតិប្រកបដោយចីរភាព។

បើតាមឯកឧត្តម ឆាយ ថន ទេសរដ្ឋមន្រ្តី រដ្ឋមន្រ្តីក្រសួងផែនការ បានថែ្លងថា ការធ្វើជំរឿនឆ្នាំ២០១៩នេះ វាមានលក្ខណៈទំនើបជាងការធ្វើជំរឿនក្នុងឆ្នាំ១៩៩៨ និងឆ្នាំ២០០៨កន្លងទៅ ដោយក្រុមការងារបានដាក់ប្រព័ន្ធសម្រាប់វាយតម្លៃភាពសុក្រឹត្យនៃការធ្វើជំរឿន ដោយប្រើប្រាស់ប្រព័ន្ធ Tablet PDA និងបច្ចេកទេស NBS។ ឯកឧត្តម ឆាយ ថន បានឲ្យដឹងផងដែរថា ការធ្វើជំរឿនឆ្នាំនេះ គឺមានដៃគូអភិវឌ្ឍន៍មួយចំនួនបានចូលរួមប្រឹក្សាជំនួយបច្ចេកទេស ដែលក្នុងនោះមានប្រទេសចិន បានផ្តល់នូវ រថយន្ត ម៉ូតូ កុំព្យូទ័រ ម៉ាស៊ីនថតចម្លងជាដើម។
សូមបញ្ជាក់ថា រាជរដ្ឋាភិបាលបានចាប់ផ្តើមជំរឿនប្រជាជនរបស់ខ្លួន ជាលើកទីបី គឺមានរយៈពេល១១ថ្ងៃ ចាប់ពីថ្ងៃទី៣ ដល់១៣ ខែមីនា ឆ្នាំ២០១៩កន្លងទៅ ហើយសម្រាប់ការធ្វើជំរឿននៅកម្ពុជាក្នុងឆ្នាំ២០១៩ រដ្ឋាភិបាលកម្ពុជាបានចំណាយថវិកាសរុបចំនួនជាង ៨លានដុល្លារ និងប្រើប្រាស់មន្ដ្រីជំរឿន៥ម៉ឺននាក់៕

ខេត្តបាត់ដំបង ៖ តាមការបញ្ជាក់ពីអភិបាលស្រុកភ្នំព្រឹក លោក សុង សុភក្ត្រ័ ស្រដៀងគ្នានិងលោកអធិការស្រុកព្រឹកដែរ នៅព្រឹកថ្ងៃទី៨ ខែសីហាឆ្នាំ២០១៩ នេះថា ជនរងគ្រោះឈ្មោះ សំ បូរ៉ា ភេទប្រុសអាយុ២៨ឆ្នាំ នៅភូមិទឹកថ្លាឃុំអង្គរបាន ស្រុកខាងលើ ដែលជាប់គាំងក្នុងរួងភ្នំរយៈពេល៤ថ្ងៃ ដោយសារតែចូលកើបអាចម៌ប្រចៀវនោះ បានធូរស្រាលវិញហើយ។

សូមបញ្ជាក់ថា បុរសខាងលើ បន្ទាប់ពីជួយសង្គ្រោះពីសំណាក់ក្រុមសង្រ្គោះ នៃអង្គភាព៧១១របស់កងពលតូចលេខ៧០ ធ្វើដំណើរតាមយន្តហោះពីភ្នំពេញនៅរសៀលថ្ងៃនេះ ដឹកនាំដោយអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ទេសរដ្ឋមន្រ្តី នាយឧត្តមសេនីយ៍ គន់ គីម ទៅដល់ទីតាំងកើតហេតុ សហការជាមួយអាជ្ញាធរមូលដ្ឋាន ដើម្បីរកវិធីសាស្រ្តសង្រ្គោះនាំបុរសនោះចេញពីរូងភ្នំ ហើយបានដឹកសង្គ្រោះទៅដល់មន្ទីរពេទ្យបង្អែកក្រុងបាត់ដំបង នៅម៉ោង ៩យប់ថ្ងៃទី៧ ខែឆ្នាំ ដដែល ។ លោកបញ្ជាក់ថា ជនរងគ្រោះដោយមានការយកចិត្តទុដាក់ពីសំណាក់គ្រូរពេទ្យរហូតដល់ម៉ោងម៉ោង១និង៣៧នាទីថ្ងៃទី៨ខែឆ្នាំដដែលនេះ ជនរងគ្រោះមានសភាពជិតដូចដើមហើយ តែកាហួបចុកបានតែទឹកផ្លែឈើទឹកដោះគោឆៅជាដើម តែមិនទាន់ហ៊ានហួបបាយព្រោះមានអារៈចុកឆ្អល់ពោះ តែគ្រូពេទ្យមិនទាន់ឲ្យចេញត្រឡប់ទៅផ្ទះនៅឡើយ ឲ្យបន្តសំរាកព្យាបាលមួយរយៈទៀតសិន។
តាមការរៀបរាបរបស់ប្រពន្ធឈ្មោះធឿន សុភា អាយុ២៩ឆ្នាំ មានកូនស្រី២នាក់នៅក្នុងបន្ទុកគ្រួសារ បានឲ្យអ្នកសារព័ត៌មានថាៈ មុនកើតហេតុប្ដីរបស់ខ្លួន ក្នុងរយៈពេល១៤ថ្ងៃកន្លងមកហើយ បានចូលទៅកើបអាចម៍ប្រចៀវនៅរូងភ្នំចក្រី ខាងកើតសាលារៀនហុងទឹក ភូមិហុងទឹក ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង ជាកន្លែងកើតហេតុ ដូចធម្មតាយកមកលក់ឲ្យគេក្នុងតម្លៃមួយគីឡូ៦រយរៀល បន្ទាប់ពីកើបអាចម៍ប្រចៀវរួចគាត់(ប្ដី)បានយកទៅរែង គ្រានោះបានឃើញកងបុរាណចំនួន១០កង និងឆ្អឹងដែលសង្ស័យជាឆ្អឹងមនុស្សនៅក្នុងថង់ ក៌បានយកមកផ្ទះ។

ស្ត្រីដដែលបន្តថាៈលុះនៅថ្ងៃទី៤ ខែឆ្នាំវេលាម៉ោង ៥ខែឆ្នាំ ដដែល បានទៅកើបអាចម៌ប្រចៀវធម្មតាទៀត គ្រានោះពិលកែវបានធ្លាក់ពីលើក្បាលចូលក្នុងរន្ធ គាត់ក៏ចុះតាមយកមកវិញ ពេលចុះនោះស្រាប់តែគៀបជាប់នៅគំលាតភ្នំបាត់ខ្លួនមិនឃើញមកផ្ទះវិញ។ ពេលបាត់ដំណឺង ក្រុមសាច់ញ្ញាតិដើររកលុះដល់ម៉ោង១០យប់ ថ្ងៃទី៧ខែ ឆ្នាំដដែល ទើបរកឃើញនៅចំណុចខាងលើ ធ្វើឲ្យមានការភ្ញាក់ផ្អើលដល់សមត្ថកិច្ច និងអាជ្ញាធររួមទាំងក្រុមសង្រ្គោះនៃអង្គភាព៧១១របស់កងពលតូចលេខ៧០ ធ្វើដំណើរតាមយន្តហោះពីភ្នំពេញ នៅរសៀលថ្ងៃនេះ ដឹកនាំដោយអនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ ទេសរដ្ឋមន្រ្តី នាយឧត្តមសេនីយ៍គន់ គីម ទៅដល់ទីតាំងកើតហេតុសហការជាមួយអាជ្ញាធរមូលដ្ឋានដើម្បីរកវិធីជួយសង្គ្រោះនិងរៀបចំបែបជំនឿអរួបិយដោយក្រុមគ្រួសាសាច់ញ្ញាត់យកវត្ថទាំអស់មកដាក់នៅទីទាំងវិញនោះ ទើបអាចសង្គ្រោះបុរសជនរងគ្រោះបាននៅវេលាម៉ោង៦និង៥៨នាទីយប់ ថ្ងៃទី៧ ខែឆ្នាំដដែល និងដឹកបញ្ជូនទៅមន្ទីពេទ្យបង្អែកក្រុងបាត់ដំបង ទាំងយប់តែម្ដង។

ស្ត្រីជាប្រពន្ធបញ្ជាក់ថានៅក្នុងហេតុការនេះដែរដោយមានកាយកចិត្តទុក្ខដាក់ពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានឧបត្ថម្ភដល់គ្រួសារគាត់ចំនួន ១០លានរៀល ក្នុងនោះមន្ត្រីកាកបាទក្រហម កម្ពុជា ចំនួន២លានរៀល រួមទាំងភេសជ្ជៈមួយចំនួន ជាងនេះសប្បុរជន និងម្ចាស់ផ្ទះសំណាក់ក្នុងខេត្តបាត់ដំបង សរុបជិត៣០រៀលផងដែរ៕

នំពេញ ៖ រាជរដ្ឋាភិបាលកម្ពុជាបានចេញអនុក្រឹត្យ ស្ដីពី ប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ២០២០ ដោយបានកាត់បន្ថយថ្ងៃឈប់សម្រាកជាសាធារណៈប្រចាំឆ្នាំ២០២០ មកនៅត្រឹម ២២ថ្ងៃ ពោលកាត់បន្ថយអស់ចំនួន ៦ថ្ងៃបើប្រៀបធៀបនឹងឆ្នាំ២០១៩។

នៅក្នុងអនុក្រឹត្យដែលចុះហត្ថលេខាដោយប្រមុខរាជរដ្ឋាភិបាល នៃព្រះរាជាណាចក្រកម្ពុជា សម្ដេចអគ្គមហាសេនាបតីតេជោ ហ៊ុន សែន ចុះនៅថ្ងៃទី២ ខែសីហា ឆ្នាំ២០១៩ រាជរដ្ឋាភិបាលកម្ពុជាបានសម្រេចកាត់បន្ថយថ្ងៃឈប់សម្រាកក្នុងព្រះរាជពិធីបុណ្យចម្រើន ព្រះជន្មព្រះមហាក្សត្រខ្មែរ ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី មកនៅត្រឹមចំនួន១ថ្ងៃ និងបាន ប្រកាសលែងឱ្យឈប់សម្រាកក្នុងពិធីបុណ្យនិងទិវាចំនួន ៥ គឺ៖

១. ពិធីបុណ្យមាឃបូជា ដែលតែងតែប្រារព្ធឡើងនៅថ្ងៃ១៥ កើត ខែមាឃ ជារៀងរាល់ឆ្នាំ
២. ទិវាជាតិនៃការចងចាំ ដែលតែងតែប្រារព្ធឡើងនៅថ្ងៃទី២០ ខែឧសភា ជារៀងរាល់ឆ្នាំ
៣. ទិវាកុមារអន្តរជាតិ ដែលតែងតែប្រារព្ធឡើងនៅថ្ងៃទី២០ ខែឧសភា ជារៀងរាល់ឆ្នាំ
៤. ទិវារំឭកខួប នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា
៥. ទិវាសិទ្ធិមនុស្ស១០ ធ្នូ

ចំណែកឯថ្ងៃឈប់សម្រាកសម្រាប់ពិធីបុណ្យចូលឆ្នាំថ្មីប្រពៃណីជាតិខ្មែរវិញ នៅឆ្នាំ២០២០ ខាងមុខ ប្រជាពលរដ្ឋខ្មែរ មិនថាមន្ត្រីរាជការ និយោជិត ឬកម្មករនោះទេ នឹងត្រូវបានអនុញ្ញាតឱ្យឈប់សម្រាកបន្ថែមមុនពិធីបុណ្យនេះមួយថ្ងៃ គឺនៅថ្ងៃចន្ទ ទី១៣ ខែមេសា ឆ្នាំ២០២០។

គួរបញ្ជាក់ផងដែរថា ក្នុងកិច្ចខិតខំប្រឹងប្រែងដើម្បីជំរុញនូវកំណើននៃការវិនិយោគ និងធានាឱ្យបាននូវលទ្ធភាពប្រកួតប្រជែងរបស់កម្ពុជា នៅក្នុងទីផ្សារអន្តរជាតិ ក្រៅតែពីការកាត់បន្ថយថ្ងៃឈប់សម្រាកសាធារណៈ រាជរដ្ឋាភិបាលបានសម្រេចចាត់វិធានការជាយុទ្ធសាស្ត្រប្រកបដោយប្រសិទ្ធភាពចំនួន៥ រួចមកហើយគឺ ១. ការលុបបំបាត់ចោលនូវស្ថាប័នដែលមានតួនាទីសាំញ៉ាំច្រើនលើករណីតែមួយនៅតាមព្រំដែន, ២. ការលុបបំបាត់ស្ថាប័នដែលលែងដើរតួនាទីសំខាន់ក្នុងបរិបទសង្គមបច្ចុប្បន្ន «កាំងសាប», ៣. ការបង្កើតនូវតំបន់សេដ្ឋកិច្ចពិសេស ៤. ការផ្ដល់ឱកាសឱ្យកម្មករទាំងប្រាក់បៀវត្សរ៍ ការថែទាំសុខភាពពិសេសស្ត្រីមានផ្ទៃពោះ និង ៥. ការពង្រឹងលើវិស័យអប់រំនិងបណ្ដុះបណ្ដាល។ ហើយចុងក្រោយនេះ ការកាត់បន្ថយថ្ងៃឈប់សម្រាកសាធារណៈ នឹងក្លាយទៅជាយុទ្ធសាស្ត្រសំខាន់មួយ ក្នុងចំណោមយុទ្ធសាស្ត្រដ៏មានប្រសិទ្ធភាពដទៃផ្សេងទៀត សម្រាប់ជំរុញ និងលើកទឹកចិត្តដល់វិនិយោគិនជាតិនិងអន្តរជាតិ ក៏ដូចជាសហគ្រិនក្នុងស្រុកទាំងឡាយ ឱ្យមានទស្សនទានប្រកបដោយភាពវិជ្ជមានសម្រាប់ការរីកចម្រើន និរន្តរភាពនៃដំណើរការអាជីវកម្ម ក៏ដូចជាលទ្ធភាពបង្កើនប្រាក់ចំណេញរបស់ខ្លួននៅកម្ពុជា៕

RAC Media