រាជធានីភ្នំពេញ ៖ នៅព្រឹកថ្ងៃទី៧ ខែវិច្ឆិកា ឆ្នាំ២០១៧នេះ រដ្ឋសភាបានបើកកិច្ចប្រជុំគណៈកម្មាធិការអចិន្ត្រៃយ៍លើរបៀបវារៈចំនួន៥ ខណៈដែលកិច្ចប្រជុំនេះធ្វើឡើងក្រោមអធិបតីភាពសម្តេច ហេង សំរិន ប្រធានរដ្ឋសភា។
របៀបវារៈនៃកច្ចិប្រជុំនេះរួមមាន៖
ទី១៖ ការពិនិត្យបញ្ជីឈ្មោះតំណាយរាស្ត្រគណបក្សប្រជាជនកម្ពុជា ឈរជាបេក្ខជនសម្រាប់ជ្រើសតាំងបន្ថែមក្នុងគណៈកម្មការទាំង១០ របស់រដ្ឋសភា។
ទី២៖ ការពិនិត្យសំណើសុំអនុម័តនូវសេចក្តីព្រាងច្បាប់ស្តីពី ការអនុម័តយល់ព្រមលើ កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋសិង្ហបុរី ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
* កិច្ចព្រមព្រៀងរវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
* កិច្ចព្រមព្រៀងរវាងរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃព្រះចៅស៊ុលតង់ និងយ៉ាងឌីពើរគួននៃប្រទេសប្រ៊ុណេដារូសាឡឹម ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
* កិច្ចព្រមព្រៀងរវាងរដ្ឋាភិបាលនៃព្រះរាជាណាចក្រកម្ពុជា និងរាជរដ្ឋាភិបាលនៃព្រះរាជាចក្រថៃ ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
ទី៣៖ ការពិនិត្យសំណើសុំអនុម័តនូវសេចក្តីព្រាងច្បាប់ស្តីពី ការអនុម័តយល់ព្រមលើធម្មនុញ្ញ នៃមជ្ឈមណ្ឌត្រៀមបង្ការគ្រោះមហន្តរាយអាស៊ី។
ទី៤៖ ការពិនិត្យសំណើសុំអនុម័តនូវសេចក្តីព្រាងច្បាប់ស្តីពី ការទូទាត់ថវិការទូទៅរបស់រដ្ឋសភាសម្រាប់គ្រប់គ្រងឆ្នាំ២០១៦។
ទី៥៖ ការពិនិត្យសំណើអនុម័តនូវសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៨៕
កិច្ចប្រជុំនេះមានការចូលរួមពីតំណាងគណៈកម្មការនានារបស់រដ្ឋសភា មកពីគណបក្សប្រជាជនកម្ពុជា។ ចំណែកគណបក្សសង្គ្រោះជាតិវិញមានតែ លោក ប៉ុល ហំម ម្នាក់ប៉ុណ្ណោះ៕
យូអិន ៖ ក្រុមប្រឹក្សាសន្តិសុខសហប្រជាជាតិកាលពីថ្ងៃចន្ទម្សិលមិញបានអនុម័តជាឯកច្ឆន្ទនូវសេចក្ដីថ្លែងការណ៍មួយដោយបានរិះគន់យ៉ាងខ្លាំងចំពោះអំពើហិង្សាដែលបានធ្វើឲ្យពលរដ្ឋមូស្លីមរ៉ូហ៊ីងយ៉ាជាង៦០ម៉ឺននាក់រត់ចេញពីប្រទេសមីយ៉ាន់ម៉ាទៅប្រទេសបង់ក្លាដែស។
សេចក្ដីថ្លែងការណ៍នេះបានអំពាវនាវឲ្យរដ្ឋាភិបាលនៅប្រទេសមីយ៉ាន់ម៉ាចាត់វិធានការបន្ទាន់មួយដើម្បីគោរពតាមគោលការណ៍សិទ្ធិមនុស្ស ហើយក៏បានសម្ដែងការព្រួយបារម្ភយ៉ាងខ្លាំងចំពោះរបាយការណ៍ពីការបំពានសិទ្ធិមនុស្សនៅរដ្ឋរ៉ាក់ឃីនពីសំណាក់កងកម្លាំងសន្តិសុខប្រទេសមីយ៉ាន់ម៉ាចំពោះពលរដ្ឋរ៉ូហ៊ីងយ៉ាផងដែរ។
របាយការណ៍នេះក៏បានបង្ហាញពីការប្រើកងកម្លាំងនិងការបំភិតបំភ័យជាប្រព័ន្ធ ការកាប់សម្លាប់មនុស្សប្រុសស្រីនិងកូនក្មេង អំពើហិង្សាផ្លូវភេទ និងការដុតបំផ្លាញលំនៅឋានព្រមទាំងទ្រព្យសម្បត្តិផងដែរ។
សេចក្ដីថ្លែងការណ៍នេះត្រូវបានគាំទ្រដោយសហរដ្ឋអាមេរិក ប្រទេសបារាំង និងប្រទេសជាសមាជិកក្រុមប្រឹក្សាមួយចំនួនទៀត ប៉ុន្តែត្រូវបានជំទាស់ពីប្រទេសចិនដែលជាសម្ពន្ធមិត្ត និងជាប្រទេសជិតខាងជាមួយប្រទេសមីយ៉ាន់ម៉ា៕
រាជធានីភ្នំពេញ ៖ បុរសជាប្តីបានអារ.កសម្លាប់ប្រពន្ធខ្លួនឯងបណ្តាលឲ្យដេកស្លាប់ក្នុងថ្លុកឈាម បន្ទាប់មកប្តីតិរិច្ឆានរូបនោះបានអារ.កសម្លាប់ខ្លួនឯង តាមក្រោយតែមិនស្លាប់ ត្រឹមតែរបួសធ្ងន់។ ករណីបង្កការភ្ញាក់ផ្អើលនេះកើតឡើងទាំងព្រឹកព្រលឹមថ្ងៃទី០៧ ខែវិច្ឆិកា ឆ្នាំ២០១៧នេះនៅជិតវត្តគោកបញ្ជាន់ ក្នុងសង្កាត់ចោមចៅ ខណ្ឌពោធិ៍សែនជ័យ។
ទោះបីយ៉ាងណាមិនទាន់មានព័ត៌មានណាមួយបញ្ជាក់ពីមូលហេតុឈានដល់ការសម្រេចចិត្តអា.រក សម្លាប់ប្រពន្ធយ៉ាងដូច្នេះទេ ប៉ុន្តែគេបានដាក់ការសង្ស័យថា អាចមកបណ្តាលមកពីភ្លើងប្រច័ណ្ឌ៕
រាជធានីភ្នំពេញ ៖ គិតត្រឹមម៉ោង៦ល្ងាចថ្ងៃទី០៥ ខែតុលា ឆ្នាំ២០១៧ នៃដំណើរការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ មានប្រជាពលរដ្ឋខ្មែរចំនួន៥០០,២៧៤នាក់ហើយ បានទៅចុះឈ្មោះបោះឆ្នោត ខណៈសល់តែ៣ថ្ងៃទៀតប៉ុណ្ណោះការចុះឈ្មោះត្រូវបានបញ្ចប់។ នេះបើគណៈកម្មាធិការជាតិរៀបចំការបោះឆ្នោត (គ.ជ.ប)។
តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់។
សូមបញ្ជាក់ថា ការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ មានរយៈពេល៧០ថ្ងៃ គឺចាប់ពីថ្ងៃទី០១ ខែកញ្ញា ដល់ថ្ងៃទី០៩ ខែវិច្ឆិកា ឆ្នាំ២០១៧៕
រាជធានីភ្នំពេញ ៖ រយៈពេល៤ថ្ងៃនៃព្រះរាជពិធីបុណ្យអុំទូក បណ្តែតប្រទីប និងសំពះព្រខែ អកអំបុក នាឆ្នាំ២០១៧នេះ គ្រោះថ្នាក់ចរាចរណ៍មានការថយចុះពី៦៦លើកកាលពីឆ្នាំ២០១៦ មកត្រឹម៤៨លើក ប៉ុន្តែចំនួនស្លាប់មានការកើនឡើងទ្វេជាពីរ បើធៀបទៅនឹងរយៈពេលដូចគ្នាកាលពីឆ្នាំ២០១៦កន្លងទៅ។
យោងតាមទិន្នន័យគ្រោះថ្នាក់ចរាចរណ៍ផ្លូកគោកដែលបូកសរុបដោយ នាយកដ្ឋានសណ្តាប់ធ្នាប់និងនគរបាលចរាចណ៍បានបង្ហាញថា ក្នុងព្រះរាជពិធីបុណ្យអុំទូករយៈពេល៤ ថ្ងៃគិតចាប់ពីថ្ងៃទី០២ដល់ថ្ងៃទី០៥ ខែវិច្ឆិកា ឆ្នាំ២០១៧នេះ គ្រោះថ្នាក់ចរាចរណ៏នៅទូទាំងប្រទេសបានកើតឡើងចំនួន៤៨ លើក ដែលបណ្តាលឲ្យមនុស្ស៣០នាក់ស្លាប់ និងរបួសធ្ងន់ស្រាល៦៣នាក់។ តាមរយៈទិន្និន័យនេះបង្ហាញថា អ្នកស្លាប់ឆ្នាំ២០១៧ មាន៣០នាក់ ខណៈឆ្នាំ២០១៦មានត្រឹមតែ១៥នាក់ប៉ុណ្ណោះ គឺកើនឡើងគុណជាពីរ។
ប្រភពព័ត៌មានដដែលប្រាប់បន្តឲ្យដឹងថា មូលហេតុដែលបណ្តាលឲ្យកើតមានករណីគ្រោះថ្នាក់ចរាចរណ៍ រួមមាន ល្មើសល្បឿន, ស្រវឹង, ប្រជែងគ្រោះថ្នាក់, មិនប្រកាន់ស្តាំ, មិនគោរពសិទ្ធិ ,បត់គ្រោះថ្នាក់ រួមនឹងមូលហេតុមួយចំនួនទៀតដូចជា កត្តាយានយន្ត និងកត្តាផ្លូវ៕
រាជធានីភ្នំពេញ ៖ ស្ត្រីម៉ាស្សាម្នាក់ត្រូវបានគេប្រទះឃើញដេកស្លាប់ វេលាម៉ោង១៣និង១០នាទី ថ្ងៃទី៦ ខែវិច្ឆិកា ឆ្នាំ២០១៧ ស្ថិតនៅចំណុចផ្ទះជួលលេខ២៧ (ហាងកោសជប់ពេញចិត្តផ្លូវលូប្រាំ) ភូមិដំណាក់ធំ៥ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ខណៈដែលសមត្ថកិច្ចសង្ស័យជាអំពើរំលោភហើយសម្លាប់ចោល។
អធិការរងនគរបាលខណ្ឌមានជ័យ លោក ហួ ម៉េងវ៉ាង បានឲ្យដឹងថា ស្ត្រីរងគ្រោះឈ្មោះ ឆន ធឿន អាយុ៣៣ឆ្នាំ ជាអ្នកកោសជប់ម៉ាស្សា ស្នាក់នៅកន្លែងកើតហេតុ ត្រូវបានគេប្រទះឃើញដេកស្លាប់ដោយមានកន្សែងរំក និងដែកលួសជាប់និងក។ លោកបញ្ជាក់ថា ករណីនេះអាចរឿងរំលោភ ហើយសម្លាប់ តែនៅពេលនេះ យើងកំពុងរង់ចាំខាងសមត្ថកិច្ចកោសល្យវិច័យ ចុះមកពិនិត្យសពសិន ។
ពេលនេះ កម្លាំងសមត្ថកិច្ចបាននិងកំពុងធ្វើការស្រាវជ្រាវ ដើម្បីតាមចាប់ជនដៃដល់ យកមកផ្តន្ទាទោស តាមច្បាប់៕
ខេត្តបន្ទាយមានជ័យ ៖ ប្រជាពលរដ្ឋដែលជាអាជីវកររាប់រយនាក់ខកខានមិនបានចូលទៅលក់ដូរនៅផ្សាររោងគ្លឿប្រទេសថៃ ដោយសារអាជ្ញាធរក្រុងប៉ោយប៉ែតមិនផ្តល់សំបុត្រចូលដល់ពួកគាត់បានចូល។
ប្រជាពលរដ្ឋដែលខកខានមិនបានចូលដីថៃទាំងនោះបានប្រាប់នាម៉ោង៩ព្រឹកថ្ងៃទី០៥ ខែវិច្ឆិកា ឆ្នាំ២០១៧ ថា ពួកគាត់បានខឹងសម្បាយ៉ាងខ្លាំងដល់អាជ្ញាធរក្រុងប៉ោយប៉ែត ដែលមិនបានយកចិត្តទុកដាក់ចំពោះមុខរបរបស់ពួកគាត់។
ស្ត្រីវ័យកណ្តាលម្នាក់បានបញ្ចេញប្រតិកម្មហាក់ខឹងត្រលោត ខណៈដឹងថា គាត់ត្រូវខកខានចូលបើកអាជីវកម្មលក់ដូរនៅក្នុងផ្សារដីថៃ។ ស្ត្រីរូបនោះបានបន្តថា មូលហេតុដែលនាំឲ្យពួកគាត់ខឹងអាជ្ញាធរ ដោយសារមិនបានយកទំនិញឲ្យម៉ូយមានតម្លៃរាប់សែនបាតប្រាក់ថៃ ។
សូមរំលឹកថា កន្លងទៅសំបុត្រចូលផ្សារថៃត្រូវបានសមត្ថកិច្ចនគរបាលអន្តោប្រវេសន៍ប្រចាំច្រកទ្វារប៉ោយប៉ែតជាអ្នកលក់ឲ្យពលរដ្ឋសម្រាប់ម្នាក់តម្លៃ១០បាតចូលម្តងហើយមួយថ្ងៃៗពលរដ្ឋខ្លះប្រើសំបុត្រអស់៣ទៅ៥សំបុត្រ ប៉ុន្តែក្រោយមកនៅដើមឆ្នាំ២០១៧អាជ្ញាធរក្រុងប៉ោយប៉ែតលោកង៉ោម៉េង ជ្រូនបានចេញមុខធនារាប់រងក្នុងការបោះពុម្ពជូនពលរដ្ឋ ដើម្បីកាត់បន្ថយការចំណាយ ។ តែថាការចេញមុខដោះស្រាយរបស់អាជ្ញាធរក្រុងប៉ោយប៉ែតលើបញ្ហាសំបុត្រមិនបានធើ្វឲ្យក្រុមអាជីវករធូស្រាលបន្ទុកដូចការគិតរបស់អាជ្ញាធរទេ ព្រោះថ្ងៃខ្លះសំបុត្រមានថ្ងៃខ្លះសំបុត្រខ្វះ ដែលជាហេតុធើ្វឲ្យពួកគាត់ប្រឈម។
ទន្ទឹមនិងនេះប្រជាពលរដ្ឋស្នើដល់ប្រមុខរដ្ឋាភិបាលកម្ពុជា មេត្តាដោះស្រាយលើករណីប័ណ្ណចូលផ្សារថៃឲ្យបានល្អប្រសើរជៀសវាងធើ្វឲ្យពលរដ្ឋខកខានដូចសព្វថ្ងៃ៕
រាជធានីភ្នំពេញ ៖ រយៈពេល៣ថ្ងៃនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ ឆ្នាំនេះ ប្រជាពលរដ្ឋ ប្រមាណ៣,២លាននាក់ កើនឡើងប្រមាណ ១៥% បើប្រៀបធៀបឆ្នាំមុន ។ នេះបើយោងតាមរបាយការណ៍ក្រសួងទេសចរណ៍ រួមទាំងមន្ទីរទេសចរណ៍រាជធានីភ្នំពេញ ។
តាមរបាយការណ៍បានបញ្ជាក់ថា គោលដៅសំខាន់ៗ ដែលទទួលភ្ញៀវទេសចរណ៍ រួមមានតំបន់សៀមរាបអង្គរ ទទួលភ្ញៀវទសចរណ៍ប្រមាណ២៨១.៩៣៩នាក់ កើនឡើងជិត៤០% ក្នុងនោះភ្ញៀវអន្តរជាតិប្រមាណ៣១.៩៣៨នាក់ កើនឡើង០,៣៥% បើប្រៀបធៀបឆ្នាំមុន ។ ចំណែកខេត្តព្រះសីហនុ សរុបភ្ញៀវទេសចរណ៍មានចំនួន ៨៥.០០០នាក់ កើនឡើងជិត ៦% ក្នុងនោះភ្ញៀវអន្តរជាតិ ១១.០៥០នាក់ កើនឡើង១៤,៥០% ខណដែលខេត្តកំពត ទទួលភ្ញៀវ ទេសចរណ៍ប្រមាណ ៧៦.៦៥៨នាក់ កើនឡើង២៩,១៧% ក្នុងនោះភ្ញៀវអន្តរជាតិមានចំនួន ១.៦៨៧ កើនឡើងប្រមាណ៧,២៥% ។
ចំពោះខេត្តភូមិភាគឥសាន ភ្ញៀវទេសចរណ៍ទៅកាន់តំបន់នោះក៏មានការកើនឡើងគួរឲ្យ កត់សម្គាល់ផងដែរ ដូចជា ខេត្តរតនគីរី ទទួលបានភ្ញៀវទេសចរណ៍ ១២.៧៤៤នាក់ កើនឡើង ២៩,០៤% ក្នុងនោះភ្ញៀវអន្តរជាតិចំនួន៣៣១នាក់ កើនឡើង១៥,៣៣% ។ ចំណែកខេត្តមណ្ឌល គីរី ទទួលបានភ្ញៀវទេសចរណ៍ចំនួន១៣.៣៧២នាក់ កើនឡើង២២,៨៣% ក្នុងនោះភ្ញៀវអន្តរជាតិ ចំនួន២៩៦នាក់ កើនឡើងប្រមាណ៣៤,៥៤% ៕
រាជធានីភ្នំពេញ ៖ តាមគម្រោងលោក គី តិច មេធាវីតំណាងដោយ អាណត្តិរបស់សម្តេច ហ៊ុន សែន នឹងចូលបំភ្លឺតុលាការនៅរសៀលថ្ងៃទី០៦ ខែវិច្ឆិកានេះករណីប្តឹងលោក លឺ ឡាយស្រេង អតីតមន្ត្រីជាន់ខ្ពស់ គណបក្សហ្វ៊ុនស៊ិនប៉ិច ដែលប្រមាថ ព្រះចេស្តាព្រះមហាក្សត្រ និងបរិហាកេរ្តិ៍ជាសាធារណៈ ។
សូមបញ្ជាក់ថា តាមបណ្តឹងរបស់សម្តេច ហ៊ុន សែន គឺប្តឹងឲ្យតុលាការផ្តន្ទាទោសលោក លឺ ឡាយស្រេង តាមច្បាប់ និងទាមទារសំណងជំងឺចិត្ត ចំនួន ៥០០លានរៀល ៕
ឥណ្ឌា ៖ ក្រុមគ្រូពេទ្យនៅមហាវិទ្យាល័យវេជ្ជសាស្ត្របានបញ្ជាក់ពីថ្ងៃអាទិត្យថា កូនក្មេងទើបនឹងកើតចំនួន៣០នាក់បានស្លាប់ក្នុងរយៈពេល២ថ្ងៃជាប់ៗគ្នានៅមន្ទីរពេទ្យរដ្ឋមួយកន្លែងនៅរដ្ឋអ៊ូតាប្រាដិសនៅភាគខាងជើងប្រទេសឥណ្ឌា។
លោកសាស្ត្រាចារ្យវេជ្ជបណ្ឌិត ឌីខេ ស្រីវ៉ាស្តាវ៉ា (DK Shrivastava) មកពីមហាវិទ្យាល័យវេជ្ជសាស្ត្របាននិយាយថា កូនក្មេងចំនួន១៥នាក់បានស្លាប់នៅផ្នែកថែទាំទារក ហើយចំនួន១៥នាក់ទៀតបានស្លាប់នៅផ្នែកថែទាំកូនក្មេងនៅមន្ទីរពេទ្យរដ្ឋនៅក្នុងរដ្ឋនេះ។ លោក ស្រីវ៉ាស្តាវ៉ា បានបន្ថែមថា ក្នុងចំណោមក្មេងដែលស្លាប់ទាំងនេះគឺមានក្មេងចំនួន៦នាក់បានស្លាប់ដោយសារជំងឺរលាកស្រោមខួរក្បាល ហើយទារកផ្សេងទៀតបានស្លាប់ដោយសារមូលហេតុមួយចំនួនទៀត។
សូមបញ្ជាក់ថា គ្រោះថ្នាក់នេះបានកើតឡើងរយៈពេល២ខែមកហើយក្រោយពីមានមនុស្សយ៉ាងតិច១០៥នាក់ភាគច្រើនជាទារក និងកូនក្មេងបានស្លាប់នៅមន្ទីរពេទ្យដដែលនេះ ខណៈមន្ទីរពេទ្យនេះគ្មានការផ្គត់ផ្គង់វេជ្ជសាស្ត្រដោយសារគ្មានចំណូលដែលជាហេតុធ្វើឲ្យប្រជាពលរដ្ឋមូលដ្ឋានខឹងសម្បាពីបញ្ហានេះ៕
អាមេរិក ៖ ខ្មាន់កាំភ្លើងដែលបាញ់ប្រហារនៅព្រះវិហារគ្រឹស្តមួយកន្លែង (Sutherland Springs) នៅរដ្ឋតិចសាស់សហរដ្ឋអាមេរិកកាលពីថ្ងៃអាទិត្យត្រូវបានបាញ់សម្លាប់ ក្រោយពីប៉ូលិសបានដេញតាមនៅពេលជនល្មើសបានរត់ចូលទៅក្នុងស្រុកមួយនៅជាប់នឹងតំបន់កើតហេតុនេះ។
មន្ត្រីមូលដ្ឋានបានប្រាប់ប្រព័ន្ធផ្សព្វផ្សាយ CNN ថា មនុស្សយ៉ាងតិច២៦នាក់ត្រូវបានសម្លាប់ ហើយជាង២០នាក់ទៀតបានរងរបួសនៅក្នុងហេតុការណ៍បាញ់ប្រហារនេះ។ ប៉ូលិសបានបញ្ជាក់ថា ស៊ូឌឺឡេនស្ព្រីងគឺជាសហគមន៍មួយដែលមានប្រជាពលរដ្ឋរស់នៅទីនោះប្រហែល៤០០នាក់ ហើយស្ថិតនៅចម្ងាយប្រហែល៤៨គីឡូម៉ែត្រនៅភាគអាគ្នេយ៍នៅទីក្រុងសានអង់តូនីញ៉ូ (San Antonio) រដ្ឋតិចសាស់សហរដ្ឋអាមេរិក។ ប៉ុន្តែគេនៅមិនទាន់ច្បាស់ថា តើជនល្មើសបានស្លាប់ដោយសារប៉ូលិសបាញ់ប្រហារ ឬក៏ស្លាប់ដោយសារការធ្វើអត្តឃាតនោះទេ។
មន្ត្រីប៉ូលិសបាននិយាយថា បុរសម្នាក់បានដើរចូលទៅក្នុងព្រះវិហារមួយកន្លែងនៅតំបន់ស៊ូឌឺឡេនស្ព្រីង ទោះបីយ៉ាងណារហូតមកដល់ពេលនេះគេមិនទាន់ដឹងពីមូលហេតុនៃការបាញ់ប្រហារនេះនៅឡើយទេ ខណៈមន្ត្រីពាក់ព័ន្ធកំពុងធ្វើការស៊ើបអង្កេតនៅឡើយ៕
ភ្នំពេញ ៖ លោក ជា ប៉ូច តំណាងរាស្ត្រម្នាក់របស់គណបក្សសង្គ្រោះជាតិ ត្រូវបានសមត្ថកិច្ចបង្អាក់ ដំណើរជាងមួយម៉ោង មុនពេលអនុញ្ញាតឱ្យបន្តចាកចេញពីកម្ពុជា នៅព្រលានយន្តហោះយន្ត អន្តរ ជាតិភ្នំពេញ។
បើតាមការបញ្ជាក់នៅលើបណ្តាញសង្គម Facebook របស់លោក អេង ឆៃអ៊ាង អនុប្រធានគណបក្សសង្គ្រោះជាតិ ដែលកំពុងនៅឯក្រៅប្រទេសដែរនោះបានឲ្យដឹងថា លោក ជា ប៉ូច តំណាង រាស្ត្រគណបក្សសង្គ្រោះជាតិទី៣ហើយ ដែលអាជ្ញាធរច្រកទ្វារព្រំដែន បង្អាក់ដំណើរមិនឲ្យចាក ចេញ បន្ទាប់ពីលោក ងឹម ញេង និងលោក អ៊ុច សេរីយុទ្ធ។
ការចេញដំណើរទៅក្រៅប្រទេសរបស់លោក ជា ប៉ូច ពេលនេះ ធ្វើឡើងក្រោយពេល លោក សម ង្ស៊ី ធ្វើការអំពាវនាវឲ្យសមាជិកបក្សនេះ ពីថ្នាក់មូលដ្ឋានដល់ថ្នាក់ជាតិ គេចខ្លួនទៅក្រៅប្រទេស ប្រសិនបើទ្រាំនឹងគំនាបមិនបាន។
សូមរំលឹកថា កាលពីថ្ងៃទី៣ វិច្ឆិកា ឆ្នាំ២០១៧ នេះ លោក ជា ប៉ូច ជាអ្នកតំណាងរាស្ត្រ របស់គណបក្សប្រឆាំង បានចេញទៅក្រៅប្រទេសតាមអាកាសយាន្តដ្ឋានអន្តរជាតិភ្នំពេញ។ប៉ុន្តែលោកត្រូវបានសមត្ថកិច្ចនគរបាលព្រលានយន្តហោះអន្តរជាតិភ្នំពេញ បង្អាក់ដំណើររយៈពេលជាងមួយម៉ោង ដើម្បីសាកសួរព័ត៌មានផ្សេងៗហើយរួចរាល់ ទើបអនុញ្ញាតឲ្យចាកចេញពីកម្ពុជា៕
ហាណូយ ៖ ទីភ្នាក់ងារព័ត៌មានចិន ស៊ីនហួរ ចេញផ្សាយថា ព្យុះទីហ្វុងដ៏កំណាចមួយដែលមានឈ្មោះថា ដំរី បានវាយប្រហារភាគកណ្តាលប្រទេសវៀតណាមសម្លាប់មនុស្ស២៧នាក់ ខណៈដែលមនុស្ស ២២នាក់ទៀត នៅក្នុងខេត្ត Khanh Hoa, Phu Yen, Dak Lak និង Binh Dinh កំពុងបាត់ខ្លួន។
អាជ្ញាធរវៀតណាមបានឲ្យដឹងថា ក្រៅពីមនុស្សស្លាប់ និងបាត់ខ្លួនជាច្រើននាក់ នៅក្នុងខេត្តភាគកណ្តាលទាំងបួនខាងលើនេះ នាវាដឹកទំនិញតូច-ធំ និងទូកនេសាទប្រមាណ ២២៨គ្រឿង ក៏ត្រូវបានព្យុះដំរីមួយនេះ បោកពន្លិចទៅក្នុងសមុទ្រដោយរលកធំៗ និងខ្យល់បោកបក់ខ្លាំងក្លាផងដែរ។
ជាមួយគ្នានោះព្យុះនេះក៏បានបំផ្លាញផលដំណាំ ៣០,០០០ហិកតា ត្រូវបានលិចលង់ទៅក្នុងជំនន់ទឹកភ្លៀងយ៉ាងគំហុក ខណៈផ្ទះ ៦២៦ខ្នង បានដួលរលំទាំងស្រុង ឬរងការបំផ្លាញ និងប្រជាជន ៣៣,០០០នាក់ ត្រូវបានជម្លៀស។
គួរបញ្ជាក់ថា សម្រាប់តំបន់ដែលកំពុងទទួលរងគ្រោះធ្ងន់ជាងគេនោះ គឺស្ថិតនៅភាគកណ្តាលប្រទេស៕
អាមេរិក ៖ ទីភ្នាក់ងារសារព័ត៌មាន Reuters បានរាយការណ៍នៅមុននេះបន្តិចថា មានបាញ់ប្រហារករណីដ៏សាហាវមួយទៀតបានកើតឡើងនៅលើទឹកដីសហរដ្ឋអាមេរិក ដោយខ្មាន់កាំភ្លើងបានចូលទៅក្នុងវិហារសាសនាគ្រឹស្តមួយកន្លែង ក្នុងរដ្ឋតិចសាស់ បើកការបាញ់ប្រហារសម្លាប់មនុស្សជាង២០នាក់ និងរបួសជាង២០នាក់ផងដែរ។
ទោះជាយ៉ាងណានៅមិនទាន់មានព័ត៌មានលម្អិតជុំវិញហេតុការន៍ខាងលើនៅឡើយទេ៕
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសផ្ដល់ជូនជនរួមជាតិនាឱកាសព្រះរាជពិធីបុណ្យអុំទូក គឺរាជរដ្ឋាភិបាលបានប្រកាសទិញ ស្ពានឆ្លងកាត់ដៃ សមុទ្រឆ្ពោះទៅកាន់ប្រទេសថៃ នៅខេត្តកោះកុង ពីក្រុមហ៊ុន លី យ៉ុងផាត់ មកគ្រប់គ្រងវិញ ដោយអនុញ្ញាតឲ្យប្រជាពលរដ្ឋធ្វើដំណើរដោយមិនបាច់បង់ប្រាក់ទៀតឡើយ។ នេះជាការបញ្ជាក់របស់ប្រមុខនៃរាជរដ្ឋាភិបាល សម្ដេចតេជោ ហ៊ុន សែន នៅលើទំព័រ Facebook របស់សម្ដេចនាប៉ុន្មាននាទីមុននេះ នាព្រឹកថ្ងៃទី០១ ខែវិច្ឆិកា ឆ្នាំ២០១៧នេះ។
សម្ដេចតេជោ ហ៊ុន សែន បានមានប្រសាសន៍ទៀតថា ការធ្វើដំណើរឆ្លងកាត់ដោយពុំចាំបាច់បង់ប្រាក់ នឹងធ្វើឡើងនៅវេលា ម៉ោង០០៖០០នាទីពាក់កណ្ដាលអធ្រាត្រ ថ្ងៃទី០២ ខែវិច្ឆិកា ឆ្នាំ២០១៧នេះ។
សម្តេចតេជោ ហ៊ុន សែន បានថ្លែងយ៉ាងដូច្នេះថា ដើម្បីសម្រួលដល់បងប្អូនប្រជាពលរដ្ឋ ដែលធ្វើដំណើរនិយាយជារួម និងនិយាយដោយឡែក បងប្អូនប្រជាពលរដ្ឋនៅខេត្តកោះកុង ក្នុងនាមរាជរដ្ឋាភិបាល ខ្ញុំព្រះករុណាខ្ញុំ បានសម្រេចទិញយកត្រឡប់មកវិញ ស្ពានឆ្លងកាត់ដៃសមុទ្រខេត្តកោះកុង ទៅប្រទេសថៃដែលវិនិយោគដោយ ក្រុមហ៊ុន លី យ៉ុងផាត់ ដើម្បីឲ្យបងប្អូនប្រជាពលរដ្ឋធ្វើដំណើរឆ្លងកាត់ ដោយពុំចាំបាច់បង់ថ្លៃ ចាប់ពីម៉ោង០០៖០០នាទី ថ្ងៃទី០២ ខែវិច្ឆិកា ឆ្នាំ២០១៧ ដើម្បីអបអរព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអុំបុក។
ចំពោះកិច្ចការដែលនៅសេសសល់ សូមឲ្យក្រសួងសាធារណការ និងដឹកជញ្ជូន ក្រសួងសេដ្ធកិច្ច និងហិរញ្ញវត្ថុ និងសាលាខេត្តកោះកុង ពិភាក្សាជាមួយក្រុមហ៊ុន លី យ៉ុងផាត់ ដោះស្រាយនៅពេលក្រោយ។
ខ្ញុំព្រះករុណា ខ្ញុំសង្ឃឹមថា បងប្អូនប្រជាពលរដ្ឋនឹងទទួលបានផលប្រយោជន៏ពីការសម្រេចនេះ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
