អាមេរិក ៖ ប្រធានាធិបតីអាមេរិកលោក ដូណាល់ ត្រាំ បានព្រមានដល់ របបផ្តាច់ការដ៏សាហាវឃោរឃៅ របស់កូរ៉េខាងជើងប្រឆាំងនឹងការមើលងាយសហរដ្ឋអាមេរិកប៉ុន្តែបានលើកឡើងថា មេដឹកនាំ គីម ជុងអ៊ុន នឹងមានអនាគតដ៏ល្អប្រសើរប្រសិនបើគាត់បោះបង់ចោលមហិច្ឆតានុយក្លេអ៊ែររបស់គាត់។
នៅក្នុងសុន្ទរកថាមួយទៅកាន់សភាកូរ៉េខាងត្បូងដែលនេះជាលើកដំបូងសម្រាប់ប្រធានាធិបតីអាមេរិកក្នុងរយៈពេល២៤ឆ្នាំមកនេះ, លោក ត្រាំ បានហៅក្រុងព្យុងយ៉ាងថាជារបបសង្កត់សង្កិននិងជិះជាន់។
គាត់បានអំពាវនាវឲ្យពិភពលោកធ្វើសកម្មភាពដូចជាប្រទេសរុស្ស៊ីជាដើមនិងជាពិសេសគឺសម្ព័ន្ធមិត្តរបស់កូរ៉េខាងជើងគឺប្រទេសចិនដែលជាកន្លែងគាត់នឹងធ្វើដំណើរទៅនៅថ្ងៃពុធ។
មេដឹកនាំអាមេរិករូបនេះបានប្រកាសថា “កូរ៉េខាងជើងគឺជាប្រទេសមួយដែលគ្រប់គ្រងដូចជាសាសនាមួយ”។ នៅចំកណ្តាលនៃការគោរពផ្នែកយោធានេះគឺជាជំនឿដែលរារាំងដល់ជោគវាសនារបស់មេដឹកនាំក្នុងការគ្រប់គ្រងដូចជាអ្នកការពារឪពុកម្តាយលើឧបទ្វីបកូរ៉េ”។
ក្រុមអ្នកវិភាគបាននិយាយថា ការរិះគន់នេះអាចបង្កឲ្យមានប្រតិកម្មពីប្រទេសកូរ៉េខាងជើង។ប៉ុន្តែអ្នកតាក់តែងច្បាប់កូរ៉េខាងត្បូងបានអបអរសាទរនៅពេលដែលប្រធានាធិបតីអាមេរិករូបនេះបានប្តេជ្ញាមិនបំភិតបំភ័យនិងបានព្រមានទីក្រុងព្យុងយ៉ាងថា ខ្លួនមិនគួរសាកល្បងជាមួយដំណោះស្រាយរបស់អាមេរិកឡើយ។
កូរ៉េខាងជើងបានធ្វើការសាកល្បងនុយក្លេអ៊ែរលើកទី៦របស់ខ្លួនដែលមានឥទ្ធិពលបំផុតនៅក្នុងខែកញ្ញាហើយបានបាញ់មីស៊ីលរាប់សិបគ្រាប់ក្នុងរយៈពេលប៉ុន្មានខែថ្មីៗនេះ។ក្នុងនោះមានពីរគ្រាប់បានហោះលើប្រទេសជប៉ុនដែលជាសម្ព័ន្ធមិត្តរបស់អាមេរិកហើយក្រុងព្យុងយ៉ាងបាននិយាយថា ខ្លួនអាចដាក់ក្បាលគ្រាប់នុយក្លេអ៊ែរមួយលើគ្រាប់រ៉ុក្កែតដែលអាចឈានដល់ដីគោកអាមេរិក។
មុននោះ លោក ត្រាំ ត្រូវបង្ខំចិត្តលុបចោលដំណើរទស្សនកិច្ចដ៏គួរឲ្យភ្ញាក់ផ្អើលមួយទៅកាន់តំបន់គ្មានយោធា (DMZ) ដែលបែងចែកកូរ៉េទាំងពីរដោយសារតែអាកាសធាតុមិនល្អដែលធ្វើឲ្យគាត់មានការខកចិត្តយ៉ាងខ្លាំង។ នេះបើយោងតាមការឲ្យដឹងពីសេតវិមាន។
ប្រធានាធិបតីកូរ៉េខាងត្បូងលោក មូន ចេអ៊ីន ដែលបានហោះហើរមុនពេលចុះអ័ព្ទគឺបានរង់ចាំគាត់នៅឯប៉ុស្តិ៍យាមព្រំដែនមួយដែលមានព័ទ្ធដោយរបងអគ្គីសនី ចម្ការមីននិងរបាំងប្រឆាំងរថក្រោះ។
នៅក្នុងសុន្ទរកថារបស់គាត់, លោក ត្រាំ បានហៅ DMZ ថាជា “បន្ទាត់មួយដែលបែងចែករវាងការជិះជាន់និងសេរីភាព” នាពេលបច្ចុប្បន្ន៕
រាជធានីភ្នំពេញ ៖ សមេចតេជោ ហ៊ុន សែន បានប្រកាសនិងអះអាងជាថ្មីម្តងទៀតថា កម្ពុជានឹង ធ្វើជាម្ចាស់ផ្ទះកីឡាស៊ីហ្គេមនៅឆ្នាំ២០២៣ខាងមុខ ហើយគម្រោងនេះមិនត្រូវបានផ្លាស់ប្តូរនោះ ទេ ។ ការថ្លែងបែបនោះធ្វើឡើងក្នុងពិធីជួបសំណេះសំណាលជាមួយកម្មករ កម្មការិនី ប្រមាណ ១៥០០០នាក់ កាលពីព្រឹកមិញ នៅតំបន់ចំការដូង ។
សម្តេច ហ៊ុន សែន បានថ្លែងថា មូលហេតុដែលសម្តេចមិនសម្រេចទទួលធ្វើជាម្ចាស់ផ្ទះ ស៊ីហ្គេមមុនឆ្នាំ២០២៣នោះ ដោយសារតែកម្ពុជាត្រូវការពេលវេលា ត្រូវការថវិកា ដើម្បីសាងសង់ ហេដ្ឋានរចនាសម្ព័ន្ធសំខាន់ៗ មួយចំនួន ។ សម្តេចថា ការចំណាយលើការរៀបចំស៊ីហ្គេមម្តងៗ គឺមានប្រមាណ៥០០លានដុល្លារឯណោះ ។ ដូច្នេះយើងត្រូវការថវិកាទាំងនោះ ដើម្បីសាងសង់ ប្រទេសជាតិសិន ។
យ៉ាងណាក៏ដោយ សម្តេចថ្លែងអះអាងថា កម្ពុជានឹងធ្វើជាម្ចាស់ផ្ទះកីឡាស៊ីហ្គេមឆ្នាំ ២០២៣ ដោយមិនផ្លាស់ប្តូរទេ ហើយសង្ឃឹមថា សម្តេចនឹងមានវត្តមានក្នុងពិធីបើកកីឡាស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះនេះផងដែរ ។
សូមជម្រាបថា កន្លងទៅនេះមានលេចឮព័ត៌មានក្រៅផ្លូវថា សម្តេចបានសម្រេចលុប ចោលគម្រោងធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣ នោះហើយ ។ ប៉ុន្តែឥឡូវច្បាស់លាស់ ហើយថា កីឡាស៊ីហ្គេមឆ្នាំ២០២៣ គឺកម្ពុជានឹងធ្វើជាម្ចាស់ផ្ទះ ៕
កូរ៉េខាងត្បូង ៖ ស្ត្រីអ្នកនាំពាក្យម្នាក់បាននិយាយថា ដំណើរបំពេញទស្សនកិច្ចដែលមិនបានប្រកាសជាមុនរបស់ប្រធានាធិបតីអាមេរិកលោក ដូណាល់ ត្រាំ ទៅកាន់តំបន់គ្មានយោធាក្នុងប្រទេសកូរ៉េខាងត្បូងនៅថ្ងៃពុធនេះត្រូវបានខកខានដោយសារតែអាកាសធាតុមិនអំណោយផល។ ដំណើរបំពេញទស្សនកិច្ចដែលខកខាននេះបានធ្វើឡើងក្នុងរយៈពេលមួយថ្ងៃបន្ទាប់ពីលោក ត្រាំ បានជំរុញឲ្យប្រទេសកូរ៉េខាងជើងងាកមករកតុចរចាវិញ។
ស្ត្រីអ្នកនាំពាក្យបានប្រាប់ក្រុមអ្នកសារព័ត៌មានថា ប្រធានាធិបតីកូរ៉េខាងត្បូងលោក មូន ជេអ៊ីន (Moon Jae-in) ក៏បានធ្វើដំណើរទៅកាន់តំបន់គ្មានយោធានោះជាមួយលោក ត្រាំ ផងដែរ ប៉ុន្តែដោយសារតែមានការចុះអ័ព្ទខ្លាំងទើបបង្ខំឲ្យវិលត្រឡប់មកវិញ។
សូមបញ្ជាក់ថា ថ្ងៃពុធនេះគឺជាថ្ងៃចុងក្រោយនៃដំណើរបំពេញទស្សនកិច្ចរបស់លោក ត្រាំ នៅក្នុងប្រទេសកូរ៉េខាងត្បូងដែលជាផ្នែកមួយនៃដំណើរបំពេញទស្សនកិច្ចរយៈពេល១២ថ្ងៃរបស់លោកនៅក្នុងតំបន់អាស៊ីដើម្បីពិភាក្សាអំពីពាណិជ្ជកម្ម និងបញ្ហាប្រទេសកូរ៉េខាងជើង៕
ហាណូយ ៖ ចំនួនមនុស្សស្លាប់បានកើនដល់ ៨៩នាក់ហើយ និងប្រមាណ១៨ផ្សេងទៀតនៅតែបន្តបាត់ខ្លួនដដែល ខណៈដែលមនុស្ស១៧៤នាក់រងរបួសដោយសារព្យុះទីហ្វុងដំរីដែលបានវាយលុកយ៉ាងចាស់ដៃ នៅតាមបណ្តាញឆ្នេរភាគកណ្តាល និងភាគខាងត្បូងប្រទេសវៀតណាមកាលពីថ្ងៃសៅរ៍ចុងសប្តាហ៍មុន។ នេះបើតាមសារព័ត៌មាន Channel News Asia ចេញផ្សាយនៅព្រឹកនេះ។
រដ្ឋាភិបាលវៀតណាម គិតចាប់តាំងតែពីព្យុះកំណាចខាងលើ បានធ្វើដំណើរមកដល់កាលពីថ្ងៃសៅរ៍ចុងសប្តាហ៍មុនមក មនុស្សសរុបកើនដល់៨៩នាក់ បានបាត់បង់ជីវិត នៅក្នុងគ្រោះទឹកជំនន់ និងរអិលបាក់ដី ព្រមទាំងក្នុងហេតុការណ៍លិចទូក នៅឯនាយសមុទ្រ ខណៈមនុស្សប្រមាណ១៨ផ្សេងទៀត នៅតែបន្តបាត់ខ្លួនដដែល និង១៧៤នាក់រងរបួស។ ក្រៅពីនេះ លំនៅឋានជាង២,០០០ខ្នងត្រូវបានបំផ្លិចបំផ្លាញទាំងស្រុង និងច្រើនជាង១១០,០០០ខ្នងទៀត រងការខូចខាត ហើយសត្វចិញ្ចឹមជិត ១០,០០០ក្បាលបានងាប់។
ព្យុះទីហ្វុងដំរី គឺជាព្យុះដ៏កំណាចចុងក្រោយគេបង្អស់ ដែលបានបោកបក់មកលើបណ្តោយឆ្នេរប្រទេសវៀតណាម ក្នុងឆ្នាំ២០១៧នេះ ខណៈមនុស្សយ៉ាងតិច ២៤០នាក់ ត្រូវបានគេរាយការណ៍ថា បានស្លាប់ ឬក៏បាត់ខ្លួន នៅក្នុងគ្រោះទឹកជំនន់ និងរអិលបាក់ដី ចាប់តាំងពីដើមឆ្នាំនេះ។
សូមបញ្ជាក់ថា ព្យុះទីហ្វុងដំរីនេះ បានវាយប្រហារមកលើប្រទេសអាស៊ានមួយនេះ នៅមុនប្រទេសនេះ គ្រោងរៀបចំធ្វើជាម្ចាស់ផ្ទះ សម្រាប់សន្និសីទស្តីពីកិច្ចសហប្រតិបត្តិការផ្នែកសេដ្ឋកិច្ច នៃតំបន់អាស៊ីប៉ាស៊ីហ្វិកហៅកាត់ថា APEC នៅឯទីក្រុងដាណាង នាសប្តាហ៍ក្រោយ។ កិច្ចប្រជុំកំពូលនេះ នឹងមានការចូលរួមពីសំណាក់ ប្រធានាធិបតីអាមេរិក លោក ដូណាល់ ត្រាំ, ប្រធានាធិបតីចិន លោក ស៊ី ជិនពីង, និងប្រធានាធិបតីរុស្ស៊ី លោក វ្ល៉ាឌីមៀ ពូទីន ផងដែរ៕
ខេត្តកណ្ដាល ៖ ជនសង្ស័យ២នាក់ត្រូវបានសមត្ថកិច្ចនគរបាលស្រុកពញាឮធ្វើការចាប់ខ្លួន ខណៈដែល ធ្វើសកម្មភាពដឹកឈើប្រណីតដោយខុសច្បាប់តាមម៉ូតូសណ្ដោងរ៉ឺម៉កមួយគ្រឿង កាលពីថ្ងៃទី៧ ខែវិច្ឆិកា ឆ្នាំ២០១៧ វេលាម៉ោង១១ និង៤៥នាទី ស្ថិតក្នុងភូមិចេតិយថ្មី ឃុំវិហារលួង ស្រុកពញាឮ ខេត្តកណ្តាល ។
តាមនគរបាលបានឲ្យដឹងថា នៅមុនពេលកើតហេតុ កម្លាំងសមត្ថកិច្ចបានធ្វើការចុះល្បាតក្នុងដែនសមត្ថកិច្ចរបស់ខ្លួន ខណៈមកដល់ចំណុចកើតហេតុស្រាប់តែឃើញម៉ូតូសណ្ដោងរ៉ឺម៉កមួយគ្រឿងកំពុងបើកតាមបណ្ដោយផ្លូវដោយមានដឹកឈើផងដែរ ដោយមានការសង្ស័យ កម្លាំងសមត្ថកិច្ចក៏បានហៅឲ្យឈប់ រួចសុំធ្វើការឆែកឆេរបានរកឃើញឈើប្រណិតជាប្រភេទឈើធ្នុងចំនួន២៤ដុំ ឈានដល់ធ្វើការចាប់ខ្លួនជនសង្ស័យទាំង២នាក់។
ប្រភពបន្តថា ជនសង្ស័យដែលត្រូវចាប់ខ្លួនមាន២នាក់ ទី១-ឈ្មោះ ភិន សុខហេង ភេទប្រុស អាយុ៣៧ឆ្នាំ មានទីលំនៅភូមិទោង ឃុំរលួសមានជ័យ ស្រុកសំបូរ ខេត្តក្រចេះ និងទី២-ឈ្មោះ សៅ ដានី ហៅច្រែង ភេទប្រុស អាយុ៤៥ឆ្នាំ មានទីលំនៅភូមិទោង ឃុំសណ្តាន់ ស្រុកសំបូរ ខេត្តក្រចេះ។ ចំណែកវត្ថុតាងដែលដកហូតរួមមាន ៖ ឈើប្រណិតប្រភេធ្នុងចំនួន២៤ដុំ និងម៉ូតូសណ្ដោងរ៉ឺម៉កចំនួនមួយគ្រឿង ។
បច្ចុប្បន្នជនសង្ស័យទាំង២នាក់ រួមនឹងវត្ថុតាងត្រូវបានយកមកអធិការដ្ឋាននគរបាលស្រុកដើម្បីសួរនាំចាត់ការតាមនីតិវិធីច្បាប់៕
អាមេរិក ៖ តាមសេចក្ដីរាយការណ៍របស់ទូរទស្សន៍ ABC តាមរយៈរបាយការណ៍ស្ទង់មតិមួយថា ពលរដ្ឋអាមេរិកដល់ទៅ៦៥ភាគរយបាននិយាយថា ប្រធានាធិបតីអាមេរិក លោក ដូណាល់ ត្រាំ សម្រេចការងារបានតិចតួចប៉ុណ្ណោះ នៅក្នុងអំឡុងពេលកាន់អំណាចរយៈពេលជិតមួយឆ្នាំមកនេះ។
ផ្ទុយទៅវិញ អ្នកឆ្លើយតបតែ៣៧ភាគរយប៉ុណ្ណោះ យល់ស្របទៅនឹងប្រសិទ្ធភាពការងាររបស់លោក ត្រាំ ដែលនេះគឺជាតួលេខទាបបំផុតនៅក្នុងប្រវត្តិសាស្ត្រអាមេរិក បើធៀបនឹងប្រធានាធិបតីដទៃទៀតគិតចាប់តាំងពីឆ្នាំ១៩៤៦មក បន្ទាប់ពីលោក ត្រាំ បានឡើងកាន់តំណែងបានរយៈពេល៩ខែដំបូង។
ការស្ទង់មតិនោះ បានរកឃើញទៀតថា អ្នកឆ្លើយតបដល់ទៅ៥៥ភាគរយ និយាយថា លោក ត្រាំ នឹងមិនធ្វើតាមការសន្យាដែលលោកបានប្ដេជ្ញានៅអំឡុងយុទ្ធនាការឃោសនាបោះឆ្នោតនោះទេ ដែលតួលេខនេះបង្ហាញនូវការកើនឡើងពីអត្រា៤១ភាគរយ នៅក្នុងការស្ទង់មតិមួយកាលពីខែមេសាកន្លងមក ពោលគឺ ១០០ថ្ងៃក្រោយលោក ត្រាំ ឡើងកាន់តំណែង។
ការស្ទង់មតិក៏បានចោទសួរផងដែរថា តើលោក ត្រាំ ជាមេដឹកនាំខ្លាំងម្នាក់ឬទេ។ ជាការឆ្លើយតប ពលរដ្ឋ ៤០ភាគរយប៉ុណ្ណោះយល់ស្រប ប៉ុន្តែ តួលេខនេះបង្ហាញពីការធ្លាក់ចុះពីចំនួន ៥៣ភាគរយ នៅក្នុងការស្ទង់មតិកាលពីខែមេសាកន្លងមក។
សូមបញ្ជាក់ថា លោក ត្រាំ បានឡើងដឹកនាំអាមេរិកបន្តពីអតីតប្រធានាធិបតី បារ៉ាក់ អូបាម៉ា កាលពីថ្ងៃទី២០ ខែមករាក្នុងឆ្នាំនេះ បន្ទាប់ពីលោកឈ្នះការបោះឆ្នោតប្រធានាធិបតីកាលពីខែវិច្ឆិកាឆ្នាំមុន៕
អាហ្វហ្គានីស្ថាន ៖ ក្រុមមន្ត្រីមូលដ្ឋានបាននិយាយថា មនុស្សយ៉ាងតិច៥នាក់បានស្លាប់ក្នុងនោះមានអ្នកវាយប្រហារចំនួន២នាក់ និងចំនួន២១នាក់ទៀតបានរងរបួសក្នុងការវាយប្រហារភេរវកម្មមួយនៅស្ថានីយទូរទស្សន៍សាមសាដ (Shamshad) នៅក្នុងទីក្រុងកាប៊ូលប្រទេសអាហ្វហ្គានីស្ថាន។
គ្រោះថ្នាក់នេះបានកើតឡើងនៅព្រឹកថ្ងៃម្សិលមិញនៅពេលក្រុមភេរវករចំនួន២នាក់បានវាយប្រហារស្ថានីយទូរទស្សន៍នេះដោយចោលគ្រឿងផ្ទុះនៅច្រកចូលស្ថានីយបន្ទាប់មកដើរចូលក្នុងអគារការិយាល័យក្នុងម៉ោងធ្វើការធ្វើឲ្យបុគ្គលិកមួយចំនួនវាយកញ្ចក់លោតតាមបង្អួចគេចពីគ្រោះថ្នាក់នេះ។
ក្រោយមក អ្នកវាយប្រហារបានក្លែងខ្លួនជាមន្ត្រីប៉ូលិសចូលជ្រកក្នុងអគារមួយនៅក្នុងស្ថានីយ៍នេះ ហើយក៏មានការប៉ះទង្គិចគ្នារវាងអ្នកវាយប្រហារនិងកងកម្លាំងពិសេសដែលបានទៅដល់ទីនោះក្រោយពីកើតហេតុដោយបានបាញ់សម្លាប់អ្នកវាយប្រហារទាំង២នាក់នេះនៅកន្លែងកើតហេតុ។
គណៈកម្មាធិការសុវត្ថិភាពអ្នកកាសែតនៅប្រទេសអាហ្វហ្គានីស្ថានបាននិយាយថា ប្រព័ន្ធផ្សព្វផ្សាយនិងអ្នកកាសែតតែងរងការវាយប្រហារពីក្រុមបះបោរដោយគ្រាន់តែរយៈពេល៦ខែដំបូងក្នុងឆ្នាំនេះគឺមានបុគ្គលិកផ្នែកព័ត៌មាននិងអ្នកកាសែតចំនួន១០នាក់ត្រូវបានសម្លាប់នៅប្រទេសនេះ៕
រាជធានីភ្នំពេញ ៖ អគ្គិសនីកម្ពុជាប្រកាសផ្អាកផ្គត់ផ្គង់ចរន្ដអគ្គិសនីចំនួន៣ថ្ងៃនៅតាមតំបន់មួយចំនួន ក្នុងរាជធានីភ្នំពេញ និងខេត្តកណ្ដាល ចាប់ពីថ្ងៃទី១០ ដល់ថ្ងៃទី១២ ខែវិច្ឆិកា ឆ្នាំ២០១៧ ដោយមូលហេតុ ជួសជុល ផ្លាស់ប្ដូរ ដំឡើងបរិក្ខារ និងរុះរើគន្លងខ្សែបណ្ដាញ៕
សម្រាប់ព័ត៌មានលម្អិត សូមអានសេចក្ដីជូនដំណឹង របស់អគ្គិសនីកម្ពុជាទាំងស្រុង៖
ខេត្តបន្ទាយមានជ័យ ៖ ពលរដ្ឋខ្មែរ៣នាក់ទៀតហើយ ត្រូវបានសមត្ថកិច្ចថៃចាប់ខ្លួន ខណៈចូលទៅកាប់ឈើគ្រញូង ក្នុងតំបន់នួនកិនដែងកាលពីថ្ងៃទី៤ វិច្ឆិកា ស្ថិតក្នុងខេត្តបុរីរ៉ាំ ប្រទេសថៃ ។
តាមព័ត៌មានបានឱ្យដឹងថា ពលរដ្ឋខ្មែរទាំង៣នាក់ត្រូវបានកម្លាំងសមត្តកិច្ចថៃចាប់ខ្លួន ខណៈពេលដែលលួចកាប់ឈើគ្រញូងនៅក្នុងតំបន់នួនកិនដែង ដែលឈមនឹងខេត្តឧត្តរមានជ័យ ហើយពេលចាប់ក៏មានឈើគ្រញូងជាច្រើនដុំ និងរណារដៃធំ១គ្រឿងសម្រាប់លួចកាត់ឈើគ្រញូងផងដែរ ។ ប្រភពដដែលបានបញ្ជាក់ពលករខ្មែរទាំង៣នាក់ ទី១-ឈ្មោះសាំង ជា ទី២-ជា ចួន ទី៣-រួម រើត។
គួររំលឹកថា កាលពីកន្លងទៅថ្មីៗនេះ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃបានមានប្រសាសន៍ថា បញ្ហាច្រករបៀងខុសច្បាប់ត្រូវតែបិទឱ្យអស់ មិនឱ្យមានបើសិនមានអ្នកដែលទទួលខុសត្រូវ គឺកម្លាំងនគរបាលការពារព្រំដែនគោក និងយោធាការពារព្រំដែន ។ បញ្ហាច្រករបៀងខុសច្បាប់តែងកើតមាន ដោយសារកងកម្លាំងឈរជើងតាមបន្ទាត់ព្រំដែន បានលួចបើកឃុបឃឹតជាមួយមេខ្យល់ នាំពលរដ្ឋខ្មែរលួចចូលកាប់ឈើប្រទេសជិតខាងដោយខុសច្បាប់ ។
រឿងពលរដ្ឋខ្មែរលួចឆ្លងដែនទៅកាប់គ្រញូងក្នុងទឹកដីថៃ ជារឿងចាស់ដដែល នៅដដែល មិនអាចលុបបំបាត់បានឡើយ ទោះបីត្រូវថៃបាញ់ស្លាប់និងរបួសរាប់មិនអស់ និងចាប់ដាក់ច្រវាក់ ដាក់គុកជាបន្តបន្ទាប់យ៉ាងណាក៏ដោយ។ រឿងពិតនោះគឺ វាមានអ្នកប្រគល់ប្រាក់ឱ្យទៅកាប់ និងអ្នកចាំទិញ ។ សុទ្ធតែជារឿងផលប្រយោជន៍ ទាំងអ្នកបើកផ្លូវ ទាំងអ្នកធ្វើចោរ និងទាំងអ្នកចាំទិញផលចោរកម្ម ៕
រាជធានីភ្នំពេញ ៖ គិតត្រឹមថ្ងៃទី០៦ ខែវិច្ឆិកា ឆ្នាំ២០១៧ មានប្រជាពលរដ្ឋខ្មែរចំនួន៥០៧,៤៣៨នាក់ បានទៅចុះឈ្មោះបោះឆ្នោតថ្មី ខណៈអ្នកត្រូវលុបឈ្មោះចោលមានចំនួនជាង១.៧ម៉ឺននាក់ និងអ្នកសុំកែតម្រូវឈ្មោះមានចំនួនជាង៥ពាន់នាក់។ នេះបើតាមការបញ្ជាក់ពីគណៈកម្មាធិការជាតិរៀបចំការបោះឆ្នោត (គ.ជ.ប)។
ជាមួយគ្នានេះ គ.ជ.ប ក៏សូមអំពាវនាវបងប្អូនដែលគ្រប់អាយុបោះឆ្នោត, បងប្អូនផ្លាស់ប្តូរទីលំនៅ និងអ្នកគ្រប់អាយុបោះឆ្នោតហើយ តែមិនទាន់ចុះឈ្មោះ សូមរួសរាន់ទៅចុះឈ្មោះឲ្យបានគ្រប់ៗគ្នា ខណៈថ្ងៃទី០៩ ខែវិច្ឆិកា ឆ្នាំ២០១៧ស្អែកនេះ គឺជាថ្ងៃចុងក្រោយនៃដំណើរការចុះឈ្មោះបោះឆ្នោត ក្នុងបញ្ជីបោះឆ្នោតថ្មី ឆ្នាំ២០១៧ និងធ្វើបច្ចុប្បន្នភាពបញ្ជីបោះឆ្នោតឆ្នាំ២០១៦។
តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោត ក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង១.៦លាននាក់ ខណៈប្រជាពលរដ្ឋខ្មែរដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩.៨លាននាក់។
សូមបញ្ជាក់ថា ការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោត ឆ្នាំ២០១៧ មានរយៈពេល៧០ថ្ងៃ គឺចាប់ពីថ្ងៃទី០១ ខែកញ្ញា ដល់ថ្ងៃទី០៩ ខែវិច្ឆិកា ឆ្នាំ២០១៧៕
សៀមរាប ៖ តាមការគ្រោងទុក ខេត្តសៀមរាប នឹងមានព្រលានយន្តហោះអន្តរជាតិថ្មី ស្ថិតក្នុងស្រុកសូទ្រ និគម ដែលនឹងចាប់ផ្តើមសាងសង់ជាផ្លូវការ នៅដើមឆ្នាំ២០១៨ ខាងមុខនេះ ។
លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានថ្លែងឲ្យ ដឹងកាលពីព្រឹកថ្ងៃទី៧ វិច្ឆិកានេះ ថា បច្ចុប្បន្នក្រុមហ៊ុនវិនិយោគព្រលានយន្តហោះនេះ កំពុងដុតដៃដុតជើងសាងសង់ផ្ទះស្នាក់នៅសម្រាប់វិស្វករ ស្ថាបត្យករ និងកម្មករ នៅក្បែរព្រលានយន្តហោះនេះ មុនពេលចាប់ផ្តើមបើកការដ្ឋានសាងសង់ជាផ្លូវការនៅពេលខាងមុខ។ លោកបន្តថា បច្ចុប្បន្នគ្រឿងចក្រនានាបានយកទៅរៀបចំរួចរាល់ហើយ ដើម្បីចាប់ផ្តើមសាងសង់ព្រលានយន្តហោះថ្មី និងដ៏ទំនើបមួយនេះ។
សូមជម្រាបថា ក្រុមហ៊ុន YUNAN Development Group ដែលទទួលបានសិទ្ធិធ្វើវិនិយោគលើព្រលានយន្ត ហោះនេះ គ្រោងបោះទុនប្រមាណ៩០០លានដុល្លារ អាមេរិក ដើម្បីសាងសង់ ព្រលានយន្តហោះដ៏ទំនើបនេះជា៣ដំណាក់កាល និងប្រើប្រាស់រយៈពេល៣ឆ្នាំ។
លោក សិរីវុត្ថា បានបន្តទៀតថា ព្រលានយន្តហោះថ្មីនៅខេត្តសៀមរាបនេះ នឹងសាងសង់ជាពីរដំណាក់កាល គឺដំណាក់កាលទី១គ្រោងចំណាយថវិកា៥០០លានដុល្លារ ដែលអាចបម្រើដល់ ការ ចុះចតយន្តហោះខ្នាតមធ្យម សម្រាប់យន្តហោះខ្នាត4E និងដំណាក់កាលទី២ទើបអាចចុះចតយន្តហោះខ្នាតយក្សបាន ហើយដំណាក់កាលចុងក្រោយនេះ គ្រោងចំណាយថវិកាជាង៣០០លានដុល្លារបន្ថែមទៀត។ លោកបន្តថា ការសាងសង់ព្រលានយន្តហោះនេះ អាចចំណាយពេលពី៣ទៅ៥ឆ្នាំ ដើម្បីបញ្ចប់ទាំងដំណាក់កាលទី១និងដំណាក់កាលទី២៕
ភ្នំពេញ ៖ រថយន្តធុនធំ និងរថយន្តវែងគ្រប់ប្រភេទ ត្រូវបានហាមឃាត់មិនអនុញ្ញាត ឲ្យបត់ ឆ្វេងត្រង់ចំណុចផ្លូវខ្វែង នៅភ្លើងស្តុប ស្ពានអាកាសផ្សារដីហុយ ខណៈដែលកំពុងដំឡើង ពុម្ពចាក់ ត ភ្ជាប់កម្រាលស្ពាន។
រដ្ឋបាលរាជធានីភ្នំពេញ បានប្រកាសនៅថ្ងៃអង្គារ ទី៧ ខែវិច្ឆិកា ឆ្នាំ២០១៧នេះ ថា រថយន្តធុនធំ និងរថយន្តវែងគ្រប់ប្រភេទ នឹងត្រូវហាមឃាត់ បត់ឆ្វេងទាំង ៤ទិស នៅទីតាំងភ្លើងស្តុបស្ពានអាកាសផ្សារដីហុយ ដោយសារស្ថានភាពទីតាំងបត់តូចចង្អៀត និងចៀសវាងបង្កការប៉ះពាល់ដល់សសរទម្រ ដែលត្រូវបាន និងកំពុងដំឡើងពុម្ពសសរទម្រ និងពុម្ពកម្រាលដែលកំពុងដំណើរការ ត ភ្ជាប់តួស្ពានផ្នែកកណ្តាល នៅចំណុចទីតាំងភ្លើងស្តុប ។
ជាមួយគ្នានោះដែរ សាលារាជធានីភ្នំពេញ ក៏បានអំពាវនាវដល់ប្រជាពលរដ្ឋ និងអ្នកធ្វើដំណើរ តាមចំណុចហាមឃាត់ខាងលើ ចូលរួមសហការឲ្យមានប្រសិទ្ធិភាពខ្ពស់បំផុត និងប្រុងប្រយ័ត្នខ្ពស់ ក្នុងពេលធ្វើដំណើរជិតការដ្ឋានសំណង់ស្ពានអាកាសខាងលើនេះ។
សូមរំឭកថា ស្ពានអាកាសផ្សារដីហុយ បានសាងសង់សម្រេចបាន ៧០ភាគរយហើយ គិតមកទល់ពេលនេះ បន្ទាប់ពីបើកការដ្ឋានសាងសង់កាលពីខែសីហា ឆ្នាំ២០១៦។ ស្ពាននេះ មានប្រវែង ៩០៥ម៉ែត្រ ទទឹង ១៦,៦ម៉ែត្រ។ យោងតាមគម្រោង ស្ពានអាកាសផ្សារដីហុយ នឹងបញ្ចប់ការសាងសង់ទាំងស្រុង នៅខែធ្នូ ឆ្នាំ២០១៧៕
សេអ៊ូល ៖ ក្រុមអ្នកប្រឆាំងលោក ត្រាំ រាប់សិបនាក់បានប្រមូលផ្ដុំគ្នានៅក្នុងទីក្រុងសេអ៊ូល ប្រទេសកូរ៉េខាងត្បូងនៅថ្ងៃអង្គារនេះដើម្បីតវ៉ាប្រឆាំងនឹងដំណើរបំពេញទស្សនកិច្ចរបស់ប្រធានាធិបតីអាមេរិកលោក ដូណាល់ ត្រាំ (Donald Trump) មកកាន់ប្រទេសកូរ៉េខាងត្បូង។
ក្រុមអ្នកតវ៉ាបានថ្កោលទោសលោក ត្រាំ ចំពោះសង្គ្រាមពាក្យសម្ដីរបស់លោកប្រឆាំងប្រទេសកូរ៉េខាងជើងដោយបាននិយាយថាពាក្យសម្ដីរបស់លោក ត្រាំ អាចនាំអោយកើតមានសង្គ្រាមម្ដងទៀតនៅលើឧបទ្វីបកូរ៉េ។ ទន្ទឹមនោះក្រុមអ្នកតវ៉ាក៏បានរិះគន់លោក ត្រាំ ចំពោះការដាក់សម្ពាធសេដ្ឋកិច្ចមកលើប្រទេសកូរ៉េខាងត្បូងផងដែរ។
សូមបញ្ជាក់ថា លោក ត្រាំ នឹងជួបជាមួយប្រធានាធិបតីកូរ៉េខាងត្បូង លោក មូន ជេអ៊ីន (Moon Jae-in) នៅថ្ងៃអង្គារនេះដើម្បីពិភាក្សាអំពីបញ្ហាជាច្រើនក្នុងនោះរួមមានទាំងការគំរាមកំហែងដោយអាវុធនុយក្លេអ៊ែរពីសំណាក់ប្រទេសកូរ៉េខាងជើង និងកិច្ចព្រមព្រៀងពាណិជ្ជកម្មសេរី៕
រាជធានីភ្នំពេញ ៖ នៅព្រឹកថ្ងៃទី៧ ខែវិច្ឆិកា ឆ្នាំ២០១៧នេះ គេសង្កេតឃើញលោក មឿន តុលា ប្រធានកម្មវិធីសិទ្ធិការងារ នៃមជ្ឈមណ្ឌលអប់រំច្បាប់ សម្រាប់សហគមន៍ និងជាគណៈកម្មការបុណ្យសពបណ្ឌិត កែម ឡី បានចូលបំភ្លឺនៅតុលាការ ពាក់ព័ន្ធបណ្តឹងបាត់បច្ច័យបុណ្យសពលោកបណ្ឌិត កែម ឡី ។
ការចូលបំភ្លឺនេះ ពាក់ព័ន្ធការគ្រប់គ្រងបច្ច័យបុណ្យសពលោកបណ្ឌិត កែម ឡី និងបទរំលោភលើទំនុកចិត្ត ក្រោយពីមានបណ្ដឹងរបស់លោក ពេជ្រ ស្រស់ ប្រធានគណបក្សយុវជនកម្ពុជា ដែលបានរៃអង្គាសថវិកា ដើម្បីជួយចូលរួម សាងសង់ចេតីយ៍ លោកបណ្ឌិត កែម ឡី កន្លងទៅនេះ។
ចំណែកព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ត្រូវបានកោះហៅចូលបំភ្លឺក្នុងនាមជនសង្ស័យ នៅថ្ងៃទី០៨ ខែវិច្ឆិកា ឆ្នាំ២០១៧ ៕
រាជធានីភ្នំពេញ ៖ ថ្លែងប្រាប់ក្រុមអ្នកសារព័ត៌មាន នៅឯវិមានរដ្ឋសភាក្រោយកិច្ចប្រជុំគណៈកម្មាធិការអចិន្ត្រៃយ៍ នៅព្រឹកថ្ងៃទី០៧ ខែវិច្ឆិកា ឆ្នាំ២០១៧នេះ លោក ប៉ុល ហំម អនុប្រធានគណបក្សសង្គ្រោះជាតិ បានបញ្ជាក់ថា លោកមិនខ្វល់ពីការរំលាយគណបក្សសង្គ្រោះជាតិនោះទេ ប៉ុន្តែលោកអះអាង យ៉ាងច្បាស់ថា លោកនឹងលាឈប់ពីនយោបាយ ហើយចូលនិវត្តន៍ពីនយោបាយក្រោយគណបក្សសង្គ្រោះជាតិត្រូវបានរំលាយនាពេលខាងមុខ។
បើតាមអនុប្រធានគណបក្សសង្គ្រោះជាតិខាងលើបានបន្ថែមរហូតមកដល់ពេលនេះថ្នាក់ដឹកនាំគណបក្សសង្គ្រោះជាតិ មិនទាន់បានប្រជុំគ្នាពិភាក្សាអំពីការរំលាយគណបក្សសង្គ្រោះជាតិនៅឡើយទេ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
