ដោយ៖ប៉ែន សុផល
បាត់ដំបង៖ក្មេងទំនើង២៣នាក់ធ្វើសកម្មភាពវាយតប និងកាប់គ្នាទៅវិញ ទៅមកនៅតាមទីសាធារណះត្រូវបានកម្លាំងនៃអធិការដ្ឋាននគរបាលក្រុងបាត់ដំបងចុះឃាត់ខ្លួនយកមកធ្វើការអប់រំ។ ហេតុការណ៍ចុះឃាត់ខ្លួនក្រុមក្មេងទំនើងទាំង២៣នាក់បានធ្វើឡើងនៅវេលាម៉ោង៣ និង៣០នាទី ថ្ងៃទី៩ ខែមីនា ឆ្នាំ២០១៧ ខណៈដែលពួកគេកំពុងធ្វើសកម្មភាពវាយតប និងកាប់គ្នានៅចំណុចសួនច្បារសម្តេច ស ខេង ស្ថិតក្រុមទី៤២ ភូមិរំចេក៤ សង្កាត់រតនះ ក្រុង បាត់ដំបង។
ក្រុមក្មេងទំនើងត្រូវបានឃាត់ខ្លួនរួមមាន៖ទី១ឈ្មោះនឿត ស្រីមុំភេទស្រី អាយុ២០ឆ្នាំ រស់នៅសង្កាត់ចំការសំរោង ក្រុងបាត់ដំបង។ ទី២.ឈ្មោះ គៀម ផាត់ត្រា ភេទស្រីអាយុ ១៥ឆ្នាំ រស់នៅ ភូមិវត្តតាមិម ស្រុកសង្កែ ខេត្តបាត់ដំបង។ ទី៣ឈ្មោះ សឿត ចិន ភេទ ស្រីអាយុ២០ឆ្នាំរស់នៅភូមិវត្តតាមិម ស្រុកសង្កែខេត្តបាត់ដំបង។ ទី៤.ឈ្មោះ ជឿន លាងហ៊ួ ភេទប្រុស អាយុ១៩ឆ្នាំ រស់នៅ ភូមិរំចេក៤ សង្កាត់រតនៈ ក្រុងបាត់ដំបង។ ទី៥.ឈ្មោះ ភ័ណ្ឌ ផារី ភេទស្រី អាយុ១៥ឆ្នាំរស់នៅភូមិព្រៃទទឹងឃុំអូរតាគី ស្រុកថ្មគោល ខេត្តបាត់ដំបង។ ទី៦.ឈ្មោះ ណាក់ សំណាង ភេទស្រី អាយុ១៥ឆ្នាំ រស់នៅ ភូមិព្រៃទទឹង ឃុំអូរតាគី ស្រុកថ្មគោល ខេត្តបាត់ដំបង។ ទី៧.ឈ្មោះ ណាក់ វិសាល ភេទស្រី អាយុ១៦ឆ្នាំ រស់នៅ ភូមិព្រៃទទឹង ឃុំអូរតាគី ស្រុកថ្មគោល ខេត្តបាត់ដំបង។ ទី៨.ឈ្មោះវ៉ែន ឆវ៉ាន់ ភេទ ប្រុស អាយុ២២ឆ្នាំ រស់នៅភូមិ ករហាល ឃុំពាមឯក ស្រុកឯកភ្នំ ខេត្តបាត់ដំបង។ ទី៩ឈ្មោះ ខុម សុធា ភេទ ប្រុសអាយុ២៤ឆ្នាំរស់នៅភូមិករហាល ឃុំពាមឯក ស្រុកឯកភ្នំ ខេត្តបាត់ដំបង។ ទី១០.ឈ្មោះ សេន វិសាល ភេទប្រុស អាយុ ២៤ឆ្នាំរស់នៅ ភូមិអូរកំបុត ឃុំខ្ពប ស្រុកឯកភ្នំ ខេត្តបាត់ដំបង។ ទី១១.ឈ្មោះ ខុន វ៉ាន់សាក់ ភេទប្រុស អាយុ២០ឆ្នាំ រស់នៅ ភូមិករហាល ឃុំពាមឯក ស្រុកឯកភ្នំ ខេត្តបាត់ដំបង។ ទី១២.ឈ្មោះ ជាតិ វិសាល ភេទប្រុសអាយុ១៨ឆ្នាំ រស់នៅ ស្រុកឯកភ្នំ ខេត្តបាត់ដំបង។ ទី១៣.ឈ្មោះ មួន សីហា ភេទប្រុស អាយុ២៣ឆ្នាំ រស់នៅ ស្រុកឯកភ្នំ ខេត្តបាត់ដំបង។ ទី១៤.ឈ្មោះ ធួក នាវិត ភេទប្រុស អាយុ២០ឆ្នាំ។ ទី១៥ឈ្មោះ ហៀង សំណាង ភេទប្រុស អាយុ១៩ឆ្នាំ។ ទី១៦.ឈ្មោះ ដុង សុគុណ ភេទប្រុស អាយុ១៩ឆ្នាំ។ ទី១៧.ឈ្មោះ ម៉ឹង ម៉េត ភេទប្រុស អាយុ ១៩ឆ្នាំ។ ទី១៨.ឈ្មោះ ចាន់ ភ័ត្រា ភេទស្រី អាយុ១៧ឆ្នាំ។ ទី១៩ឈ្មោះ សំ វីណា ភេទស្រី អាយុ១៩ឆ្នាំ។ ទី២០.ឈ្មោះ សាយ ចាន់ណា ភេទស្រី អាយុ១៧ឆ្នាំ។ ទី២១ឈ្មោះ អ៊ួន រីណា ភេទស្រី អាយុ២០ឆ្នាំ។ ទី២២ឈ្មោះ ឌិន ចិន ភេទប្រុស អាយុ១៨ឆ្នាំ។ ទី២៣ឈ្មោះ ធឿន ផាន់ណេត ភេទប្រុស អាយុ១៩ឆ្នាំ។
បច្ចុប្បន្នក្រុមក្មេងទំនើងទាំង២៣នាក់ខាងលើក្រោយពីឃាត់ខ្លួនបញ្ជូនមកកាន់អធិការដ្ឋាននគរបាលក្រុងធ្វើការសាកសួររួចមក បានអប់រំ និងធ្វើកិច្ចសន្យា ឲ្យអាណាព្យាបាលមកធានាយកត្រឡប់ទៅផ្ទះវិញ៕
ស៊ីរី៖សហរដ្ឋអាមេរិកបានបញ្ជូនកងម៉ារីនពិសេសមួយក្រុម អមដោយកាំភ្លើងធំធុនធ្ងន់ទៅកាន់ប្រទេសស៊ីរី ដើម្បីជួយជ្រោមជ្រែងក្នុងការវាយរំដោះទីក្រុងរ៉ាកកាពីកណ្ដាប់ដៃពួក ISIS ដែលនេះគឺជាការចូលរួមចំណែកដ៏ធំ ក្នុងការប្រយុទ្ធប្រឆាំងនឹងក្រុមភេរវកររដ្ឋអ៊ីស្លាម ISIS។
យោងតាម Washington Post បានឲ្យដឹងថា កងម៉ារីនអាមេរិកខាងលើបានចាកចេញពីទីក្រុង San Diego នៃរដ្ឋ California តាំងតែពីខែតុលា ឆ្នាំ២០១៦មកម្លេះ និងបានទៅដល់ប្រទេសស៊ីរីហើយ។ ម្យ៉ាងវិញទៀត កាំភ្លើងធំប្រវែង ១៥៥មីលីម៉ែត្រក៏ត្រូវបានដាក់ពង្រាយនៅក្បែរទីក្រុងរ៉ាកកាផងដែរ ដើម្បីរៀបខ្លួនវាយលុក ក៏ដូចជាគាំទ្រដល់ក្រុមឧទ្ទាមស៊ីរី SDF ឬកងកម្លាំងប្រជាធិបតេយ្យស៊ីរី វាយរំដោះទីក្រុងមួយនេះពីពួក ISIS មកវិញស្របពេលបច្ចុប្បន្នកងទ័ពអាមេរិកជិត៥០០នាក់ កំពុងមានវត្តមានស្រាប់នៅលើទឹកដីស៊ីរី។
គួរបញ្ជាក់ថា ទីក្រុងរ៉ាកកាស្ថិតនៅចំងាយ ១៦០គីឡូម៉ែត្រពីភាគខាងជើងទីក្រុងអាឡេប៉ូ បានធ្លាក់ចូលទៅក្រោមការគ្រប់គ្រងរបស់ពួក ISIS កាលពី ឆ្នាំ២០១៣ ដោយមានសកម្មប្រយុទ្ធ ISIS ពី៣,០០០ទៅ៤,០០០នាក់ កំពុងឈរជើងក្នុងទីក្រុងរ៉ាកកានេះ និងមានប្រជាជនស៊ីរីប្រមាណ ៣០០,០០០នាក់រស់នៅ៕
បាកដាដ៖អាជ្ញាធរអ៊ីរ៉ាក់និយាយថា មនុស្សយ៉ាងហោចណាស់២៦នាក់បានស្លាប់ និង២៤នាក់ផ្សេងទៀតបានរងរបួស បន្ទាប់ពីការវាយប្រហារបំផ្ទុះគ្រាប់បែកអត្តឃាតដ៏អាក្រក់ពីរលើកនៅក្នុងពិធីមង្គលការមួយស្ថិតនៅភាគខាងជើងខេត្ត Salahudin។ នេះបើតាមទីភ្នាក់ងារសារព័ត៌មានចិនស៊ិនហួរ។
ការវាយប្រហារនេះបានកើតឡើងកាលពីថ្ងៃយប់ថ្ងៃពុធដោយក្រុមជនសកម្មប្រយុទ្ធបានបំផ្ទុះគ្រាប់បែក សម្លាប់ខ្លួនឯងនៅពិធីមង្គលការក្នុងភូមិ Hajjaj ស្ថិតនៅចំងាយ១៨៥គីឡូម៉ែត្រពីរដ្ឋធានីបាកដាដ។ ទន្ទឹមនោះជនបំផ្ទុះអត្តឃាតទីបីក៏បម្រុងសំរុកចូលក្នុងរោងការផងដែរ ក៏ប៉ុន្តែគ្រាប់បែកបែរជាផ្ទុះ មុនពេលចុចបំផ្ទុះ។
ទោះជាយ៉ាងណារហូតមកដល់ពេលនេះពុំទាន់មានក្រុមណាមួយចេញមុខទទួលខុសត្រូវនៅឡើយទេ ប៉ុន្តែក្រុមសកម្មប្រយុទ្ធ ISIS តែងតែដឹកនាំសកម្មភាពវាយប្រហារបំផ្ទុះគ្រាប់បែកប្រឆាំងនឹងកងកម្លាំងរដ្ឋាភិបាល និងប្រជាជនស៊ីវិល នៅអ៊ីរ៉ាក់៕
ដោយ៖ប៉ែន សុផល
បាត់ដំបង៖បុរសម្នាក់បានចាប់បោចសក់ស្ត្រីម្នាក់វៃទាត់បោកទៅនឹងដីបណ្តាលអោយសន្លប់ស្ដូកស្តឹងខណៈដែលស្ត្រីរងគ្រោះមកហៅប្តីមិនអោយនៅផឹកស៊ីជាមួយក្រោយមកត្រូវបានជាប់ខ្នោះប៉េអឹម។
ហេតុការណ៍ហិង្សាដោយចេតនាទៅលើស្ត្រីរងគ្រោះខាងលើបានកើតឡើងនៅវេលាម៉ោង១៧ និង០០ថ្ងៃទី៨ខែមីនាឆ្នាំ២០១៧នៅកន្លែងផឹកស៊ីចំណុចក្បែច្រកអូររំដួល ស្ថិតក្នុងភូមិអូរ ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង។
បង្កដោយជនសង្ស័យឈ្មោះណាំ ប៊ុនឈឿន ហៅជឿន ភេទប្រុសអាយុ៣៧ឆ្នាំមុខរបររត់កង់បី មានទីលំនៅ ភូមិអូរ ឃុំពេជ្រចិន្ដា ស្រុកភ្នំព្រឹក ខេត្តបាត់ដំបងបានធ្វើសកម្មភាពទៅលើឈ្មោះ ជួន វណ្ណះ ភេទ ស្រីអាយុ៣១ឆ្នាំមុខរបរជាកម្មកររស់នៅភូមិអូរ ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ដោយចាប់បោចសក់វ៉ៃទាត់បោកទៅនឹងដីបណ្តាលអោយសន្លប់ស្តូកស្តឹងនៅនឹងកន្លែងតែម្តង។
ប្រភពពីកន្លែងកើតហេតុបានប្រាប់ថា នៅមុនពេលកើតហេតុគេឃើញប្តីជនរងគ្រោះបាននៅផឹកស៊ីជាមួយឈ្មោះណាំ ប៊ុនឈឿនហៅជឿនដែលជាជនសង្ស័យខាងលើ ក្រោយមក ស្ត្រីរងគ្រោះបានមកហៅប្តីអោយទៅផ្ទះដោយមិនអោយនៅផឹកស៊ីជាមួយភ្លាមនោះជនសង្ស័យក៍មានចឹត្តខឹងហើយស្ទុះទៅចាប់បោចសក់ វៃ ទាត់ និងបោក ជនរងគ្រោះទៅនិងដីបណ្តាលអោយសន្លប់ស្តូកស្តឹងតែម្តង។
ក្រោយពីកើតហេតុភ្លាមៗកម្លាំងជំនាញនៃបញ្ជាការកងរាជអាវុធហត្ថស្រុកភ្នំព្រឹកបានចុះទៅដល់ធ្វើការសាកសួរនិងស្រាវជ្រាវរហូតដល់ម៉ោង១៨ និង០០នាទីរសៀលថ្ងៃដដែលទើបឃាត់ខ្លួនជនសង្ស័យបានបញ្ជូនមកអង្គភាពនិងកំពុងកសាងសំណុំរឿងបញ្ជូនបន្តទៅតុលាកាដើម្បីចាត់ការតាមនីតិវិធី។ចំណែកជនរងគ្រោះត្រូវបានក្រុមគ្រួសារបញ្ជូនទៅសង្គ្រោះព្យាបាលនៅមន្ទីរពេទ្យបង្អែកស្រុកសំពៅលូន៕
ខេត្តកំពង់ឆ្នាំង៖សមត្ថកិច្ចចម្រុះបានចុះរឹបអូសឈើប្រភេទធ្នង់ចំនួន៥៤កំណាត់ធំៗ ដែលជនល្មើសលាក់ទុកនៅក្នុងព្រៃក្នុងភូមិសាស្ត្រឃុំជៀប និងឃុំក្បាលទឹក ស្រុកទឹកផុស និងបានយកទៅរក្សាទុក្ខនៅស្នាក់ការដែនជម្រកសត្វព្រៃភ្នំឱរ៉ាល់ ។
ប្រតិបត្តិការនោះធ្វើឡើង បន្ទាប់ពីក្រុមចម្រុះទទួលបានការអនុញ្ញាតពីលោកព្រះរាជអាជ្ញារងអមសាលាដំបូងខេត្ត ខណដែលកម្លាំងសមត្ថកិច្ចចម្រុះរួមមាន មន្ត្រីបរិដ្ឋាន លោកស្នងការរង លោកអនុប្រធានមន្ទីរកសិកម្មខេត្ត មន្ត្រីរដ្ឋបាលព្រៃឈើ ។
បន្ទាប់មកក្រុមចម្រុះក៏បានចុះចាប់ឈើ ប្រភេទធ្នង់ទាំងនោះយកចេញពីក្នុងព្រៃដែលជនល្មើសបានលាក់ទុកក្នុងភូមិសាស្ត្រទាំងពីរឃុំខាងលើ ។ ក្រោយពីធ្វើកំណត់ហេតុវាស់វែងរួចមកឈើទាំងនោះបានយកទៅរក្សាទុកនៅស្នាក់ការដែនជម្រកសត្វព្រៃភ្នំឱរ៉ាល់ដើម្បីកសាងសំណុំរឿងតាមផ្លូវច្បាប់៕
ដោយ៖ បក្សីចាំក្រុង
នៅក្នុងព្រឹត្តិការណ៍ នៃការប្រកួតបាល់ទាត់មិត្តភាព កាលពីល្ងាចថ្ងៃទី៨ខែមិនាឆ្នាំ២០១៧ ក្នុងទីលាន WATERSIDE ដែលពោរពេញទៅដោយក្រុមមនុស្សយ៉ាងច្រើនកុះករ ណែន ណាន់តាន់តាប់ ដើម្បីរង់ចាំទស្សនាការប្រកួតបាល់ទាត់រវាងក្រុម សារព័ត៌មាន ប៉ះជាមួយ ក្រុម KBN ។
ចំពោះលទ្ធផលការប្រកួតនេះក្រុម KBN ដែលជាក្រុមខ្លាំងមួយនោះ ត្រូវបានក្រុមសារព័ត៌មានសងសឹងក្នុងលទ្ធផល ២០-១៥ ដោយបញ្ជប់ការប្រកួត។
ប៉ុន្តែអ្វីដែលគួរឲ្យចាប់អារម្មណ៍គឺ ក្រុម KBN មិនសូវមានសកម្មភាពលេងបានល្អដូចវគ្គមុននោះទេ ដោយសារក្រុមសារព័ត៌មានធ្វើការកែទម្រងថ្មី និងមានឱកាសស៊ុតបានច្រើន។
គួរបញ្ជាក់ថា សម្រាប់កម្មវិធីប្រកួតកាលពីសប្ដាហ៍ទី១ នោះដំបូងឡើយគឺ ក្រុម KBN យកឈ្នះ ក្រុមសារព័ត៌ ក្នុងលទ្ធផល ១២-៧ ដោយឡែកក្នុងសប្តាហ៍ទី២ក្រុមសារព័ត៌មានបានវាយបកវិញក្នុងលទ្ធផល ២០-១៥ នៅទីលាន WATERSIDE ។
ជ័យជំនះនេះហើយ ដែលជម្រុញ និងលើកទឹកចិត្តដល់កីឡាករ ឲ្យមានភាពសប្បាយរីករាយ និងក្តីសង្ឃឹមក្នុងការប្រកួតលើកក្រោយទៀត ។
ចូលរួមទាំងអស់គ្នាលេងកីឡាអោយបានច្រើនដើម្បីសុខភាព ចៀសឆ្ងាយពីគ្រឿងញៀន៕
កាប៊ុល៖អាជ្ញាធរអាហ្វហ្គានីស្ថាននិយាយថា មនុស្សយ៉ាងហោចណាស់ជាង៣០នាក់បានស្លាប់ និងជាង៥០នាក់ផ្សេងទៀតរងរបួស ក្នុងហេតុការណ៍វាយប្រហារទៅលើមន្ទីរពេទ្យយោធាមួយកន្លែងស្ថិតនៅក្នុងតំបន់ក្បែរស្ថានទូតអាមេរិក ប្រចាំនៅរដ្ឋធានីកាប៊ុល នៃប្រទេសអាហ្វហ្គានីស្ថាននាថ្ងៃពុធម្សិលមិញនេះ។
យោងតាមសារព័ត៌មាន BBC បានផ្សាយថា ខ្មាន់កាំភ្លើងមួយចំនួនដោយរួមបញ្ចូលទាំងម្នាក់ស្លៀកពាក់ជាវេជ្ជបណ្ឌិត ដែលអះអាងថា ជាក្រុម ISIS បានបើកការវាយប្រហារទៅលើមន្ទីរពេទ្យយោធាមួយកន្លែង ដែលស្ថិតនៅក្នុងតំបន់ក្បែរស្ថានទូតអាមេរិក ប្រចាំនៅរដ្ឋធានីកាប៊ុល នៃប្រទេសអាហ្វហ្គានី និងបានបាញ់ប្រហារគ្នាជាជាមួយកងកម្លាំងសន្តិសុខ ដែលស្ថិតនៅក្នុងអគារមន្ទីរពេទ្យនោះ។
យោងតាមសម្តីរបស់មន្ត្រីការពារសន្តិសុខម្នាក់ ការវាយប្រហារខាងលើបានចាប់ផ្តើម ជាមួយការផ្ទុះដ៏ខ្លាំងក្លាមួយនៅផ្នែកខាងក្រោយនៃមន្ទីរពេទ្យ Sardar Mohammad Daud Khan និងខ្មាន់កាំភ្លើងពីបីទៅប្រាំនាក់ជាមួយកាំភ្លើងស្វ័យប្រវត្តិ និងគ្រាប់បែកបានចូលទៅក្នុងបរិវេណនៃមន្ទីរពេទ្យ។
គួរបញ្ជាក់ថា មន្ទីរពេទ្យរងការវាយប្រហារនេះ ស្ថិតនៅមិនឆ្ងាយប៉ុន្មានពីស្ថានទូតអាមេរិក ដែលមានការពារយ៉ាងរឹងមាំបំផុតនោះឡើយ៕
អាមេរិក៖ទីភ្នាក់ងារស៊ើបការណ៍សម្ងាត់របស់អាមេរិកកំពុងប្រឈមនឹងភាពអាម៉ាស់ថ្មីបន្ទាប់ពីWikiLeaks បានចេញផ្សាយនូវអ្វីដែលខ្លួនបានរៀបរាប់ថា ជាការលេចធ្លាយធំបំផុតមិនធ្លាប់មាននៃឯកសារសម្ងាត់របស់ CIA ដែលរៀបរាប់លម្អិតអំពីឧបករណ៍ដែលខ្លួនប្រើដើម្បីបំបែកចូលទៅក្នុងទូរស័ព្ទ កម្មវិធីប្រាស្រ័យទាក់ទងនិងឧបករណ៍អេឡិចត្រូនិកផ្សេងទៀត។
ឯកសារលេចធ្លាយរាប់ពាន់គឺបានផ្តោតសំខាន់ទៅលើបច្ចេកទេសសម្រាប់ការ Hack និងបង្ហាញពីរបៀបដែល CIA បានសហការជាមួយភ្នាក់ងារស៊ើបការណ៍អង់គ្លេសដើម្បីរកវិធីប្រែក្លាយទូរទស្សន៍ទំនើបឲ្យក្លាយទៅជាឧបករណ៍យកការណ៍។ការលេចធ្លាយរបស់ Wikileaks នេះដែលមានឈ្មោះថា “Vault 7” គឺនឹងលើកជាសំណួរជាថ្មីម្តងទៀតអំពីការអសមត្ថភាពរបស់ទីភ្នាក់ងារចារកម្មអាមេរិកក្នុងការការពារឯកសារសម្ងាត់។ វាបានកើតឡើងបន្ទាប់ពីការលេចធ្លាយ។
ការបង្ហាញនៅក្នុងឯកសារនេះរួមមាន៖ ពួក Hacker CIA បានកំណត់គោលដៅលើស្មាតហ្វូននិងកុំព្យូទ័រ។ មជ្ឈមណ្ឌលស៊ើបការណ៍សម្ងាត់តាមអ៊ិនធើណិតដែលមានមូលដ្ឋាននៅឯទីស្នាក់ការកណ្តាលរបស់ CIA ក្នុងទីក្រុង Langley នៃរដ្ឋ Virginia គឺជាមូលដ្ឋានសម្ងាត់ទីពីរនៅស្ថានកុងស៊ុលអាមេរិកក្នុងទីក្រុង Frankfurt ដែលគ្របដណ្តប់តំបន់អឺរ៉ុប មជ្ឈិមបូព៌ានិងអាហ្វ្រិក។ កម្មវិធីមួយដែលមានឈ្មោះថា Weeping Angel បានរៀបរាប់អំពីរបៀបដើម្បីវាយប្រហារទូរទស្សន៍ F8000 របស់ក្រុមហ៊ុន Samsung ដូច្នេះវាហាក់ដូចជាបានបិទប៉ុន្តែវានៅតែអាចត្រូវបានប្រើសម្រាប់ការត្រួតពិនិត្យបាន។
ទោះបីជាយ៉ាងណាក៏ដោយ CIA បានបដិសេធធ្វើអត្ថាធិប្បាយលើការលេចធ្លាយនេះ។ក្នុងសេចក្តីថ្លែងការណ៍មួយ WikiLeaks គឺមិនច្បាស់អំពីប្រភពរបស់វា។ អង្គភាពនេះបាននិយាយថា ឯកសារសំខាន់ទាំងនេះហាក់ដូចជាត្រូវបានគេផ្សព្វផ្សាយនៅក្នុងចំណោមអតីតពួក Hacker របស់រដ្ឋាភិបាលអាមេរិកនិងអ្នកម៉ៅការដែលធ្លាប់ផ្តល់ឯកសារសម្ងាត់ដល់ WikiLeaks។
ការលេចធ្លាយនេះបានបន្ថែមភាពចម្រូងចម្រាស់ថ្មីដល់រដ្ឋាភិបាលទីក្រុងវ៉ាស៊ីនតោនដែលបច្ចុប្បន្នកំពុងរងការចោទប្រកាន់អំពីទំនាក់ទំនងរវាងក្រុមរបស់លោក Donald Trump ជាមួយប្រទេសរុស្ស៊ី។ ក្រុមមន្ត្រីអាមេរិកបានអះអាងថា សកម្មភាពរបស់ WikiLeaks គឺជាបណ្តាញសម្រាប់ការស៊ើបការណ៍របស់រុស្ស៊ីនិងភាគីខាងលោក Trump អំឡុងយុទ្ធនាការឃោសនាបោះឆ្នោត។
នៅពេលសាកសួរអំពីការសរសើររបស់លោក Trump សម្រាប់ WikiLeaks ក្នុងអំឡុងពេលយុទ្ធនាការឃោសនាបោះឆ្នោតកាលពីឆ្នាំមុននៅពេលដែលវាបញ្ចេញអ៊ីម៉ែលនៃប្រធានយុទ្ធនាការរបស់លោកស្រី Hillary Clinton លេខាធិការផ្នែកព័ត៌មានរបស់សេតវិមានលោក Sean Spicer បានប្រាប់ Guardian ថា “លោកប្រធានាធិបតីបានថ្លែងថា មានភាពខុសគ្នារវាងគណនេយ្យ Gmail និងព័ត៌មានសម្ងាត់”៕
ក្រចេះ៖សមត្ថកិច្ចនគរបាលស្រុកសំបូរសហការជាមួយកម្លាំងនគរបាលប៉ុស្តិ៍ក្បាលដំរីបានចុះចាប់ម្ចាស់ផ្ទះដែលផ្តល់ទីតាំងបើកលេងល្បែងអាប៉ាង និងរឹបអូសបានវត្ថុតាងមួយចំនួននៅក្នុងភូមិស្រែស្បូវឃុំក្បាលដំរីស្រុកសំបូរកាលពីយប់ថ្ងៃទី៧ ខែមីនា ឆ្នាំ២០១៧។
មន្ត្រីសមត្ថកិច្ចបានឲ្យដឹងថាកម្លាំងជំនាញស្រុកនិងកម្លាំងនគរបាលប៉ុស្តិ៍ក្បាលដំរីបានចុះបង្ក្រាបល្បែងស៊ីសងប្រភេទអាប៉ោងនិងឃាត់ខ្លួនម្ចាស់ផ្ទះម្នាក់ឈ្មោះហេនចន ភេទប្រុស អាយុ៣៨ឆ្នាំ ដែលមានទីលំនៅក្នុងភូមិស្រែស្បូវ ឃុំក្បាលដំរី ស្រុកសំបូរ។
អ្នកញៀនល្បែងក្រៅពីនេះបានរត់គេចខ្លួនបាត់អស់។ក្នុងនោះសមត្ថកិច្ចបានដកហូតវត្ថុតាងរួមមាន-អាគុយចំនួន២(40MD)-អាប៉ោងចំនួនមួយ-លុយ២៦៣.០០០រៀល-ហានតោចំនួនមួយ-ផ្តិលចំនួន០១ អំពូលភ្លើងមួយ-ម៉ូតូម៉ាកស្មាស់រេវ៉ូពណ៌ខ្មៅចំនួនមួយគ្រឿង-ម៉ូតូអាសង់គូទស្វិតចំនួនមួយគ្រឿង-ម៉ូតូវេវអេសចិនមួយគ្រឿង-និងម៉ូតូយ៉ាម៉ាហាចិនមួយគ្រឿង។
បច្ចុប្បន្នវត្ថុតាងខាងលើត្រូវបានរក្សាទុកនៅប៉ុស្តិ៍នគរបាលរដ្ឋបាលក្បាលដំរីនិងជនដែលឃាត់ខ្លួនសម្ថកិច្ចចាត់ការបន្ត៕
ខេត្តរតនគិរី៖កម្លាំងកងរាជអាវុធហត្ថលើផ្ទៃប្រទេសសហការជាមួយកម្លាំងកងរាជអាវុធខេត្ត/ស្រុក និងកម្លាំងជំនាយរដ្ឋបាលព្រៃឈើស្រុកអូរយាដាវ ចុះបង្ក្រាបទីតាំងលាក់ទុកឈើមួយកន្លែងក្នុងចម្ការស្វាយចន្ទី ស្ថិតនៅភូមិកងយុក ឃុំប៉ាតេ ស្រុកអូរយ៉ាដាវ កាលពីវេលាម៉ោង១០ និង៣នាទីព្រឹកថ្ងៃទី៨ មីនា ឆ្នាំ២០១៧។
ក្នុងប្រតិបត្តិការចុះបង្ក្រាបនេះកម្លាំងចម្រុះបានធ្វើការរឹបអូសឈើប្រណីតប្រភេទសុក្រំជាច្រើនម៉ែត្រគូប ហើយដឹកយកមករក្សាទុកនៅរដ្ឋបាលព្រៃឈើស្រុកអូរយ៉ាដាវ ដើម្បីធ្វើការវាស់វែងនៅពេលក្រោយ។ ចំណែកម្ចាស់ឈើ ត្រូវបានប្រភពខ្សឹបប្រាប់ថា មានឈ្មោះ វន ជាអ្នកមានសែស្រឡាយធំ៕
ភ្នំពេញ៖កម្លាំងនគរបាលខណ្ឌពោធិ៍សែនជ័យ ក្រោមការបញ្ជាផ្ទាល់ពីនាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ និងមានការសម្របសម្រួលពីតំណាងអយ្យការផងនោះ បានចេញប្រតិបត្តិការតាមបង្ក្រាប ក្រុមចោរកាប់ប្លន់ យកទ្រព្យសម្បត្តិពីប្រជាពលរដ្ឋ ជាញឹកញ៉ាប់បានចំនួន៩នាក់ ព្រមទាំងការដកហូតវត្ថុតាងមួយចំនួនផងដែរ។
នៅថ្ងៃទី៨ ខែមីនា ឆ្នាំ២០១៧នេះ អធិការនគរបាលខណ្ឌពោធិ៍សែនជ័យ លោក យឹម សារ៉ាន់ បានបង្ហាញមុខក្រុមជនសង្ស័យទាំង៩នាក់ មុនបញ្ជូនពួកគេទៅតុលាការដើម្បីចាត់ការបន្តទៀត។ នៅក្នុងការបង្ហាញក្រុមប្លន់ទាំងនេះ លោក យឹម សារ៉ាន់ បានបញ្ជាក់ថា ជនសង្ស័យទាំងនេះ មានការជាប់ពាក់ព័ន្ធការកាប់ជនរងគ្រោះបណ្តាលឲ្យដាច់កដៃ រហូតធ្លាក់ខ្លួនពិការ កាលពីយប់ទៀបភ្លឺ ថ្ងៃទី៣ ខែមីនា ឆ្នាំ២០១៧ ស្ថិតនៅទល់មុខបុរី លឹម ឈាងហាក់ តាមផ្លូវវេងស្រេង សង្កាត់ចោមចៅ។
លោកបានបន្តទៀតថា ជនសង្ស័យទាំងនេះ ក៏ជាប់ពាក់ព័ន្ធការកាប់ប្លន់យកម៉ូតូ ពីប្រជាពលរដ្ឋផងដែរ កាលពីថ្ងៃទី២១ ខែមករា ឆ្នាំ២០១៧កន្លងទៅ ស្ថិតនៅមុខកាហ្គាស់សាំងតេឡា សង្កាត់ចោមចៅ។
បន្ទាប់ពីមានករណីប្លន់ជាបន្តបន្ទាប់ខាងលើនេះ ស្នងការនគរបាលរាជធានីភ្នំពេញ នាយឧត្តមសេនីយ៍ ជួន សុវណ្ណ បានដាក់បទបញ្ជា ឲ្យកម្លាំងនគរបាលរបស់លោក តាមស្រាវជ្រាវជាបន្ទាន់ ដើម្បីតាមចាប់ពួកគេ។ បន្ទាប់ពីការស្រាវជ្រាវយ៉ាងយកចិត្តទុកដាក់រួចមក នៅប៉ុន្មានថ្ងៃនេះ កម្លាំងនគរបាលក៏ឈានទៅដល់ការចាប់ខ្លួនជនសង្ស័យទាំងនេះ សរុប៩នាក់ ព្រមទាំងដកហូតវត្ថុតាងមួយចំនួនដូចជា ដាវ និងម៉ូតូ ដែលពួកគេធ្វើសកម្មភាព។
យ៉ាងណាក៏ដោយ សម្រាប់បក្ខពួកផ្សេងទៀត បាននិងកំពុងរត់គេចខ្លួន តែកម្លាំងនគរបាលបន្តតាមចាប់ខ្លួនហើយ។
យោងតាមរបាយការណ៍របស់អធិការដ្ឋាននគរបាលខណ្ឌបានបង្ហាញថា ជនសង្ស័យទាំង៩នាក់រួមមាន៖ ទី១-ឈ្មោះ ប៊ូ អាសេអូ អាយុ១៨ឆ្នាំ ទី២-ឈ្មោះ វឿន ថេនរ៉ា អាយុ១៨ឆ្នាំ ទី៣-ឈ្មោះ ហុំ សំណាង អាយុ១៨ឆ្នាំ ទី៤-ឈ្មោះ លឹម រ៉ូឌី អាយុ១៨ឆ្នាំ ទី៥-ឈ្មោះ រស់ រឹម អាយុ១៨ឆ្នាំ ទី៦-ឈ្មោះ កុសល កំសាន្ត អាយុ១៩ឆ្នាំ ទី៧-ឈ្មោះ ធា ណុប អាយុ១៨ឆ្នាំ ទី៨-ឈ្មោះ យ៉ាវ យីអាយុ១៩ឆ្នាំ និងទី៩-ឈ្មោះ ឌីប៉ូ លីន អាយុ២១ឆ្នាំ។ ដោយឡែក ជនរងគ្រោះវិញមានឈ្មោះ ពិ សិដ្ឋធារ៉ា អាយុ១៩ឆ្នាំ នៅរៀនសាលាសន្ធរមុខស្នាក់នៅ ក្បែរវត្តគោកបញ្ជាន់ភូមិថ្មគោល សង្កាត់ចោមចៅ មានស្រុកកណើតភូមិវាល ឃុំស្ពឺស្រុក ចំការលើ ខេត្តកំពង់ចាម និងជនរងគ្រោះម្នាក់ទៀតឈ្មោះ ចេត ទ្រី អាយុ១៧ឆ្នាំ ស្នាក់នៅ ភូមិបឹងកក់ ឃុំព្រះនិពាន្ធ ស្រុកគងពិសី ខេត្តកំពង់ស្ពឺ៕
រាជធានីភ្នំពេញ៖យោងតាមសេចក្តីប្រកាសព័ត៌មានស្តីពីការព្យាករណ៍អាកាសធាតុប្រចាំសប្តាហ៍របស់ក្រសួងធនធានទឹក និងឧតុនិយមបានឲ្យដឹងថា ចាប់ពីថ្ងៃទី១២-១៣ ខែមីនាខាងមុខនេះភ្លៀងកក់ខែអាចនឹងធ្លាក់ស្ទើរទូទាំងប្រទេស។
ជាមួយគ្នានេះក្រសួងធនធានទឹក ក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នចំពោះ បាតុភូតផ្គរ រន្ទះ និងខ្យល់កន្ដ្រាក់ដែលអាចកើតមានឡើង នៅពេលមេឃរកកលនឹងភ្លៀង ពិសេសតំបន់វាលទំនាប់៕
ហ្គាតេម៉ាឡា៖យោងតាមសារព័ត៌មាន BBC ចេញផ្សាយថា អគ្គិភ័យបានឆាបឆេះកន្លែងថែទាំកុមារមួយកន្លែង ស្ថិតនៅចំងាយប្រមាណ២៥គីឡូម៉ែត្រ ពីទីក្រុង Guatemala ដោយបានសម្លាប់មនុស្ស១៩នាក់ និង២៥នាក់ផ្សេងទៀតរបួស។
ក្រុមអគ្គិភ័យបាននិយាយថា មានក្មេងប្រមាណ៦០នាក់ ត្រូវបានជម្រៀសចេញពីកន្លែងអគ្គិភ័យ ចំណែកអ្នករងរបួស២៥នាក់ ត្រូវបានបញ្ជូនទៅកាន់មន្ទីរពេទ្យ។ ទោះបីយ៉ាងណាមិនទាន់មានព័ត៌មានណាបញ្ជាក់ពីមូលហេតុនៃការឆាបឆេះនោះច្បាស់នៅឡើយទេ៕
រាជធានីភ្នំពេញ៖ព្រឹកមិញនេះកម្លាំងនគរបាលនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍បន្តយុទ្ធនាការចុះត្រួតពិនិត្យកន្លែងស្នាក់នៅនិងកន្លែងធ្វើការរបស់ជនជាតិវៀតណាមក្នុងរោងសិប្បកម្មឈើ ផ្លូវបេតុង ជាប់លូទឹកស្អុយ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ និងចាប់ខ្លួនជនជាតិវៀតណាមចំនួន៩នាក់ ក្រោយពីស្រាវជ្រាវឃើញថា ជនជាតិវៀតណាមទាំងនោះរស់នៅនិងធ្វើការខុសច្បាប់។
លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីបានបញ្ជាក់អោយដឹងថា ជានជាតិវៀតណាមទាំង៩នាក់នោះ បានលួចឆ្លងដែនមកស្នាក់នៅនិងប្រកបរបរខុសច្បាប់ដោយគ្មានលិខិតឆ្លងដែននិងឯកសារត្រឹមត្រូវ។ បច្ចុប្បន្នជនជាតិវៀតណាមទាំង៩នាក់នោះត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីត្រួតពិនិត្យឯកសារតាមនីតិវិធីច្បាប់៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
