ភ្នំពេញ៖ឃាត់ខ្លួនក្រុមជនស្ទាវបាន៩នាក់ជាបន្តបន្ទាប់ ក្នុងចំណោមបក្សពួកប្រមាណ១៥នាក់ដែលបានធ្វើសកម្មភាពកាប់ប្រហារទៅលើយុវជនម្នាក់ បណ្ដាលឲ្យរងរបួសដាច់ដៃម្ខាង បញ្ជូមទៅកាន់មន្ទរពេទ្យដើម្បីសង្គ្រោះបន្ទាន់ភ្លាមៗ។
ចំណែកក្រុមជនដៃដល់បាននាំគ្នារត់គេចខ្លួនបាត់ស្រមោលអស់ ហេតុការណ៍ដែលកាប់ប្រហារទៅលើជនរងគ្រោះគឺបានកើតឡើងកាលពីវេលាម៉ោង៣ទៀបភ្លឺ ថ្ងៃទី៥ ខែមិនា ឆ្នាំ២០១៧ ក្រោយពេលពួកគេមានទំនាស់រាំប៉ះគ្នានៅក្នុង ក្លឹបឌីស្កូយីហោ “ហ្វាន់ក្លឹប” ស្ថិតនៅក្នុងភូមិជ្រៃកោង សង្កាត់ចោមចៅ ខណ្ឌពោធិ៍ សែនជ័យ ហើយក្រោយពេលចេញពីក្លឹបវិញ ក៏ត្រូវបានក្រុមស្ទាវទាំងនោះដេញតាមកាប់តែម្ដង។
ក្រោយមកកម្លាំងនគរបាលប៉ុស្ដិ៍ ចោមចៅបានធ្វើការស្រាវជ្រាវ យ៉ាងដុតដៃដុតជើងរហូត ដល់វេលាម៉ោង១២ថ្ងៃត្រង់ ថ្ងៃទី៥ ខែមិនា ឆ្នាំ២០១៧ ឃាត់ខ្លួនជនសង្ស័យបាន ចំនួន៥នាក់នៅតាមផ្លូវវ៉េងស្រេង ត្រង់ចំណុច ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ។ និងរហូតដល់ម៉ោង៥និង៤០នាទីល្ងាចថ្ងៃទី៦ ខែមិនា នគរបាលដដែលឃាត់បា២នាក់ទៀត ដោយម្នាក់ឃាត់នៅក្នុងភូមិថ្មគោល សង្កាត់ចោមចៅ និងម្នាក់ទៀតឃាត់បាននៅម្ដុំផ្សារជម្ពូវ័ន្ត សង្កាត់ចោមចៅ។
ជាមួយគ្នានេះបានធ្វើការឡោមព័ទ្ធចាប់ខ្លួនបាន និងបាននាំទៅធ្វើ ការសាកសួរនៅប៉ុស្ដិ៍ភ្លាមៗ និងកំពុងបន្តតាមចាប់ខ្លួនបក្សពួកផ្សេងទៀត៕
សុខភាព៖តាមការសិក្សាស្រាវជ្រាវថ្មីមួយបានបង្ហាញថា ការប្រើប្រាស់សារជាតិកាហ្វេអ៊ីនក៏អាចប៉ះពាល់ដល់លទ្ធភាពមានកូនរបស់ស្ត្រី។ក្រៅ ពីនេះអាចបណ្តាលឲ្យមានបញ្ហាធ្លាក់ទឹក ចិត្ត ថប់បារម្ភ ចង់ក្អួត និង មានចង្វាក់បេះដូងដើរញាប់ផងដែរ។
ក្រុមអ្នកវិទ្យាសាស្ត្របានបន្ថែមថា ស្ត្រីដែលទទួលទានកាហ្វេដែលមានជាតិកាហ្វេអ៊ីនច្រើនអាចនឹងចំណាយពេលច្រើនក្នុងការមានគភ៌ បើប្រៀបធៀបនឹងស្ត្រីដែលមិនទទួលយកជាតិកាហ្វេអ៊ីននេះ។សម្រាប់ប្រភេទអាហារជាទូទៅដែលមានសារជាតិកាហ្វេអ៊ីនរួម មានដូចជា ស៊ុកកូឡា កូកាកូឡា តែ និងកាហ្វេ ។
តាមការសិក្សាស្រាវជ្រាវក៏បានបង្ហាញផងដែរជួយផងដែរពីមូលហេតុដែលនាំឲ្យកើតមានកូននៅក្រៅស្បូន។ គភ៌នៅក្រៅស្បូន គឺមានការឈឺចាប់ជាខ្លាំង និង អាចកើតមាននូវការគំរាមកំហែងដល់អាយុជីវិតទៀតផង ដោយសារតែអំប្រ៊ីយុង ត្រូវជាប់គាំងនៅក្នុងដៃស្បូន និងចាប់ផ្តើមលូតលាស់នៅទីនោះ៕
សេអ៊ូល៖មេដឹកនាំកូរ៉េខាងជើងលោក គីម ជុងអ៊ុន បានអះអាងថា ការបាញ់សាកល្បងមីស៊ីលផ្លោង ចំនួន០៤គ្រាប់កាលពីថ្ងៃចន្ទម្សិលមិញ គឺទុកសម្រាប់វាយប្រហារមូលដ្ឋានទ័ពអាមេរិកនៅក្នុងប្រទេសជប៉ុនតែម្តងក្នុងករណីចាំបាច់ណាមួយ។ នេះបើតាមការចេញផ្សាយដោយទីភ្នាក់ងារសារព័ត៌មានយ៉ុនហាប់។
កូរ៉េខាងជើងបានបាញ់សាកល្បងមីស៊ីលផ្លោងចំនួនបួនគ្រាប់ ដែលគេជឿជាក់ថា ហោះបានចំងាយ១,០០០គីឡូ ម៉ែត្រហើយក្នុងចំណោមមីស៊ីលទាំងនេះមានបីគ្រាប់ធ្លាក់ចូលក្នុងតំបន់សេដ្ឋកិច្ចផ្ដាច់មុខជប៉ុន នៅឯតំបន់សមុទ្រខាងកើត។
ទោះយ៉ាងណាប្រភេទមីស៊ីលមិនទាន់ត្រូវបានគេបញ្ជាក់ឱ្យច្បាស់នៅឡើយទេ ខណៈកងទ័ពកូរ៉េខាងត្បូងវាយតម្លៃថា មីស៊ីលផ្លោងទាំងបួនគ្រាប់នេះអាចត្រូវបានអភិវឌ្ឍន៍ចេញ ចេញពីប្រភេទមីស៊ីលបាញ់ចេញពីនាវាមុជទឹក SLBM។
គួរបញ្ជាក់ថា ការបាញ់សាកល្បងគ្រាប់មីស៊ីលចំនួនបួនគ្រាប់របស់កូរ៉េខាងជើងទៅកាន់សមុទ្រជប៉ុន ដើម្បីបង្ហាញការមិនពេញចិត្តចំពោះសមយុទ្ធយោធាប្រចាំឆ្នាំទ្រង់ទ្រាយធំ រវាងកូរ៉េខាងត្បូងនិងអាមេរិកដែលបាននិងកំពុងប្រព្រឹត្តទៅ៕
សុខភាព៖ជំងឺឈឺក្បាលប្រកាំងនិងឈឺក្បាលតែងតែកើកមានសម្រាប់មនុស្សរាប់លាននាក់ជុំវិញពិភពលោក។ ការឈឺចាប់គឺមានកម្រិតរបស់វា ហើយនិងមានរយៈពេលដែលត្រូវបាត់ទៅវិញផងដែរ។ ប៉ុន្ដែមានអារម្មណ៍ចង់ក្អួត វិលមុខ ក្អួត និងរោគសញ្ញាផ្សេងទៀត ត្រូវទៅមន្ទីរពេទ្យជាបន្ទាន់។
យ៉ាងណាមិញតាមការស្រាវជ្រាវ ប្រសិនបើឈឺក្បាលប្រកាំងនិងឈឺក្បាល រូបមន្តខាងក្រោមនឹងដោះស្រាយឱ្យអ្នកត្រឹមតែប៉ុន្មាននាទីប៉ុណ្ណោះ។
* គ្រឿងផ្សំ ៖ ក្រូចឆ្មា ២ គ្រាប់ អំបិល ២ ស្លាបព្រាកាហ្វេ ទឹកសុទ្ធ ១ កែវវែង។
* របៀបធ្វើនិងប្រើប្រាស់៖ ច្របាច់ក្រូចឆ្មាចូលក្នុងកែវហើយលាយអំបិល រួចពិសាវាជាការស្រេច៕
រាជធានីភ្នំពេញ៖ផ្ទះសំណាក់យីហោ «ស៊ុន សេន» បានក្លាយជាកន្លែងជួញដូរគ្រឿងយ៉ាងសកម្ម ខណៈដែលជនសង្ស័យជាមុខសញ្ញាជួញដូរគ្រឿងញៀនម្នាក់ ត្រូវបានកម្លាំងនគរបាលប៉ុស្តិ៍ស្រះចក ចាប់ឃាត់ខ្លួន ក្នុងប្រតិបត្តិការបង្ក្រាបគ្រឿងញៀនមួយ ឡើងកាលពីវេលាម៉ោង០៤ និង៤៥នាទីល្ងាច ថ្ងៃទី០៦ មីនា ស្ថិតលើផ្លូវលេខ៩៣ ភូមិ១៩ ក្នុងសង្កាត់ស្រះចក ខណ្ឌដូនពេញ។
ជនសង្ស័យឈ្មោះសុខ ដន ហៅអយ អាយុ៣៥ឆ្នាំ ជាអ្នកហៅម៉ូយរថយន្ត ស្នាក់នៅក្នុងផ្ទះសំណាក់ខាងលើ មានស្រុកកំណើតនៅភូមិតាសែន ឃុំស៊ីទិព្វ ស្រុកជើងព្រៃ ខេត្តកំពង់ចាម ។ ដោយមានការសហការល្អពីប្រជាពលរដ្ឋនៅក្នុងមូលដ្ឋាននោះ ដោយបានដឹងថា បុរសជាជនស្ស័យខាងលើ កំពុងតែយកផ្ទះសំណាក់នេះ ដើម្បីធ្វើសកម្មភាពជួញដូរគ្រឿងញៀន៕
រាជានីភ្នំពេញ៖គណបក្សប្រជាជនកម្ពុជា បានចេញសេចក្តីថ្លែងការណ៍មួយ ដោយប្រតិកម្មទៅនឹងគោលនយោបាយរបស់គណបក្សសង្គ្រោះជាតិ ដែលលើកឡើងថា ដូរមេឃុំបម្រើបក្ស ដាក់មេឃុំបម្រើរាស្ត្រ ខណដែលគណបក្សកាន់អំណាចចាត់ទុកគោលនយោបាយនោះគឺជាការប្រមាថមើលងាយយ៉ាងធ្ងន់ធ្ងរដល់មន្ត្រីឃុំសង្កាត់នៅទាំងប្រទេស ដែលបានខិតខំបម្រើប្រជាជនស្របតាមតួនាទី ដោយមិនមានការរើសអើងនិន្នាការនយោបាយ៕
ខេត្តបាត់ដំបង៖ក្រុមហ៊ុនវិនិយោគក្នុងស្រុកធំមួយ ឈ្មោះ Goodways Agri Cooperative Limited បានប្រកាសចេញមុខទទួលទិញដំឡូងមីទាំងអស់ដើម្បីនាំចេញទៅប្រទេសចិន និងប្រទេសផ្សេងទៀត។
ដំណឹងដ៏ប្រសើរនេះ ត្រូវបានលើកឡើងក្នុងឱកាសប្រារព្ធទិវាដំឡូងមី នារៀលថ្ងៃទី០៦ ខែមីនា ឆ្នាំ២០១៧នេះ ក្រោមប្រធានបទ «លើកកម្ពស់ផលិតផលដំឡូងមីកម្ពុជា» នៅទីតាំងរបស់ក្រុមហ៊ុន Goodways ស្ថិតក្នុងភូមិភ្នំតូច ឃុំពេជ្រាចិន្តា ស្រុកភ្នំព្រឹក ខេត្តបាត់ដំបង។ ក្រោមវត្តមាន លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ដោយមានការចូលរួមពី លោកស្រី ម៉ម ផានី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សុផល អភិបាលខេត្តបាត់ដំបង លោកឧកញ៉ា ឈរ ម៉ារិទ្ធ នាយកក្រុមហ៊ុន Goodways Agri Cooperative Limitedអភិបាលរងខេត្តពោធិ៍សាត់ បន្ទាយមានជ័យ ប៉ៃលិន តំណាងឯកអគ្គរដ្ឋទូតចិន និងប្រជាកសិករ នៅតាមសហគមន៍នានាជាង១ពាន់នាក់៕
ព្យុងយ៉ាង៖កូរ៉េខាងជើងគ្រោងនឹងបណ្តេញឯកអគ្គរដ្ឋទូតម៉ាឡេស៊ី ប្រចាំទីក្រុងព្យុងយ៉ាងវិញ ដើម្បីជាការសងសឹក ដល់ម៉ាឡេស៊ីដែលបានបណ្តេញឯកអគ្គរដ្ឋកូរ៉េខាងជើងចេញពីម៉ាឡេស៊ី ។ ការគំរាមនេះធ្វើឡើងបន្ទាប់ពីមន្ត្រីទូតកូរ៉េខាងជើង លោក កាង ចុល បានចាកចេញពីប្រទេសម៉ាឡេស៊ីនៅប្រមាណ០៦ល្ងាចថ្ងៃចន្ទ ទី០៦ ខែមីនា ឆ្នាំ២១០៧ម្សិលមិញនេះ។នេះបើតាមការចេញផ្សាយរបស់ព័ត៌មានស៊ិនហួរ។
គួរបញ្ជាក់ថា ឯកអគ្គរដ្ឋទូតកូរ៉េខាងជើងប្រចាំនៅម៉ាឡេស៊ី លោក កាង ចុល ត្រូវបានបណ្តេញចេញពីម៉ាឡេស៊ី នៅថ្ងៃទី០៤ ខែមីនា ឆ្នាំ២០១៧ សប្តាហ៍មុននេះ ក្នុងរយៈពេល៤៨ម៉ោងឲ្យលោករៀបចំចេញ ដោយចាត់ទុកលោក កាង ចុល ថាជាមនុស្សដែលលោកមិនទទួលស្វាគមន៍ទៀតឡើយ៕
រាជធានីភ្នំពេញ៖ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មាន ស្តីពីការព្យាករណ៍អាកាសធាតុ ប្រចាំសប្តាហ៍ ហើយបានបញ្ជាក់ថា ចាប់ពីថ្ងៃទី០៧ ដល់ ០៨ ខែមីនា ឆ្នាំ២០១៧ ភ្លៀងកក់ខែអាចធ្លាក់តិចតួច នៅខេត្តជាប់ព្រំដែនថៃ និងតំបន់មាត់សមុទ្រ ខណៈចាប់ពី ថ្ងៃទី១២-១៣ ខែមីនា ភ្លៀងកក់ខែអាចនឹងធ្លាក់ស្ទើរទូទាំងប្រទេស ៕
រាជធានីភ្នំពេញ៖សម្តេច ហ៊ុន សែន នៅថ្ងៃនេះ បានព្រមានលោក សម រង្ស៊ី អតីតប្រធានបក្សប្រឆាំងករណីដែលលោក សម រង្ស៊ី ស្រែកពីក្រៅប្រទេសឲ្យនាយករដ្ឋមន្ត្រីចេញលុយសងជំនួសពលរដ្ឋពេលដែលពួកគេខ្ចីពីធនាគារឯកជន។
សម្តេចព្រមានដូច្នេះនៅ ក្នុងឱកាសពិធីបើកការដ្ឋានសាងសង់ ផ្លូវក្រវាត់ក្រុងខ្សែទី២ កំណាត់ទី២ និងសម្ពោធដាក់ឲ្យប្រើប្រាស់ ផ្លូវក្រវាត់ក្រុងខ្សែទី២ កំណាត់ទី១ នៅព្រឹកថ្ងៃទី៧ ខែមីនា ឆ្នាំ២០១៧ ។ ដោយ សម្តេចបានបញ្ជាក់ថា អ្នកនយោបាយ១រូប ដែលបានលាលែងចេញពីដំណែងហើយ នៅតែស្រែកឲ្យនាយករដ្ឋមន្ត្រីចេញលុយ សងជំនួសពលរដ្ឋ ពេលពួកគេខ្ចីពីធនាគារ។
សម្តេចថ្លែងអះអាងថា ប្រសិនបើអ្នកណានិយាយថា សងលុយជំនួសពលរដ្ឋ នឹងចាប់វាយខ្នោះ នៅនឹងកន្លែង។ សម្តេចបានបញ្ជាក់ថា “បក្សនយោបាយនានា កុំតាំងខ្លួនជាតួឯក អត់បក្សមួយក៏អត់បញ្ហា ប្រជាធិបតេយ្យស្រុកខ្មែរ មិនមែនមានតែ២បក្សទេ ។ អ្នកណាលុបបំណុល ចាប់វាយខ្នោះនៅហ្នឹងកន្លែង។ ត្រូវសងគេទាំងការទាំងដើម ។ សម្តេចបន្តថា អាមួយស្រែកពីប៉ារីស បើវាអត់ធ្វើនយោបាយទេ ចេះតែស្រែក វាចង្រៃចឹង។ ស្រែកឲ្យហ៊ុន សែន សងលុយ រស់នៅមិនសុខទេ រស់នៅវិលវល់ អាមួយហ្នឹងមិនទេ កុំជ្រុលហួស៕
រាជធានីភ្នំពេញ៖មានការភ្ញាក់ផ្អើលមួយ ខណៈបុរសសរសៃប្រសាទម្នាក់ឈ្លោះប្រកែកជាមួយប្រពន្ធ ហើយបានផ្តួលម៉ូតូចាក់សាំងដុតផ្ទះឆេះសន្ធោសន្ធៅ និងទាញប្រពន្ធរុញចូលភ្នក់ភ្លើងបណ្តាលឲ្យឆេះរលេះរលួយស្បែកពេញខ្លួន។ ករណីនេះកើតឡើងនៅវេលាម៉ោង៤ និង១០នាទីទាបភ្លឺថ្ងៃទី៦ ខែមីនា ឆ្នាំ២០១៧ នៅផ្ទះតាមផ្លូវបេតុង ប្លុកសំបុកចាបក្បែរស្ពានដែក ក្នុងភូមិម័ល សង្កាត់ដង្កោ ខណ្ឌដង្កោ។
ជនរងគ្រោះជាប្រពន្ធមានឈ្មោះ សឹម សុថាវី អាយុ២៨ឆ្នាំ មុខរបរលក់ដូរក្នុងសាលារៀនភូមិ៦ សង្កាត់ទួលទំពូង២ ខណ្ឌចំការមន មានទីលំនៅភូមិកើតហេតុខាងលើ ចំណែកប្តីឈ្មោះ អ៊ុជ ធួនវីរៈ អាយុ៣០ឆ្នាំ ស្នាក់នៅជាមួយគ្នា មានស្រុកកំណើតនៅភូមិ៦ សង្កាត់ទួលទំពូង២ ខណ្ឌចំការមន មានកូនស្រីម្នាក់ឈ្មោះ វិរ: ពេជ្ររូហ្សា អាយុ៦ឆ្នាំ។
ក្រោយពេលកើតហេតុក្រុមគ្រួសាររបស់ជនរងគ្រោះបានផ្តល់ដំណឹងទៅដល់សមត្ថកិច្ចហៅរថយន្តសង្គ្រោះបានមកដឹកជនរងគ្រោះយកទៅសង្គ្រោះនៅមន្ទីរពេទ្យព្រះកុសុមៈ។ ចំណែកជនបង្កជាប្តីបានរត់គេចខ្លួនសមត្ថកិច្ចកំពុងតែស្រាវជ្រាវតាមចាប់យកមកផ្តន្ទាទោសតាមច្បាប់។
ដោយឡែកបើតាមវេជ្ជបណ្ឌិតប្រចាំនៅមន្ទីរពេទ្យព្រះកុសុមៈបានឲ្យដឹងថា ស្ថានភាពជនរងគ្រោះធ្ងន់គឺកម្រិតរលាកដំណាក់កាលទីពីរ៕
ខេត្តតាកែវ៖សេចក្តីរាយការណ៍បានឱ្យដឹងថា លោក អ៊ីវ សុខុម ភេទប្រុស អាយុ៤៩ឆ្នាំ ជាមន្ត្រីចល័តប្រចាំការនៅភូមិត្រើយទន្លាប់ ឃុំព្រះបាទជាន់ឃុំ ស្រុកគិរីវង់ ដែលមានអត្តលេខ៦២៥ បានស្លាប់ក្នុងគ្រោះថ្នាក់ចរាចរណ៍។ ករណីគ្រោះថ្នាក់ចរាចរន៍នេះកើតឡើងកាលពីវេលាម៉ោង០៥ និង៥០នាទីព្រឹកថ្ងៃទី០៦ មីនា នេះ ត្រង់ចំណុចបង្គោលគីឡូម៉ែត្រលេខ១១៤៕
បាល់ទាត់៖ខ្សែប្រយុទ្ធរបស់ក្លិបកាំភ្លើងធំ Arsenal កីឡាករ Alexis Sanchez មិនសម្រេចចិត្តបន្តកិច្ចសន្យាថ្មីជាមួយនឹងក្រុមនេះឡើង ហើយត្រៀម ចាកចេញពី Emirate Stadium នៅមុនរដូវកាលក្រោយចាប់ផ្ដើម បន្ទាប់ពីធា្លក់មកជាកីឡាករបម្រុងពេលប៉ះជាមួយ Liverpool នោះ។
តាមប្រភពពី BBC បានអះអាងថា ការទុកកីឡាករសញ្ជាតិឈីលីវ័យ២៨ឆ្នាំរូបនេះជាកីឡាករបម្រុងគឺជាយុទ្ធសាស្ត្ររបស់លោក Arsene Wenger ប៉ុន្តែរបាយការណ៍ដដែលបានបញ្ជាក់ថា Sanchez មានជម្លោះជាមួយមិត្តរួមក្រុមអំឡុងពេលហ្វឹកហាត់ ។
ក្រោយពីលេចឮដំណឹងនេះមានក្រុមនៅក្នុងតំបន់អ៊ីរ៉ុបជាច្រើនដូចជា Paris St Germain និង Juventus ត្រៀមខ្លួនរួចជាស្រេចដើម្បីដេញថ្លៃទិញ Sanchez ដែលបានបដិសេធមិនស៊ីញេលើកិច្ចសន្យាថ្មីមានតម្លៃ១៨០,០០០ផោនក្នុងមួយសប្ដាហ៍នៅ Arsenal ហើយ PSG ត្រៀមផ្តល់តម្លៃក្នុងមួយសប្ដាហ៍ទៅដល់៣០០,០០០ផោនឯណោះ៕
វ៉ាស៊ីនតោន៖អតីតប្រធានាធិបតីអាមេរិក លោក បារ៉ាក់ អូបាម៉ា បានច្រានចោលនូវការចោទប្រកាន់ ពីលោក ដូណាល់ ត្រាំ ដែលថា រូបលោកបានបញ្ជាឱ្យគេលួចស្ដាប់កិច្ចសន្ទនាតាមទូរស័ព្ទរបស់អតីតមហាសេដ្ឋីអចលនទ្រព្យរូបនេះ នៅអំឡុងយុទ្ធនាការឃោសនាបោះឆ្នោតកាលពីឆ្នាំ២០១៦។ នេះបើតាមអ្នកនាំពាក្យលោក អូបាម៉ា ដកស្រង់ដោយសារព័ត៌មាន Sputnik។
ប្រតិកម្មរបស់លោក អូបាម៉ាធ្វើឡើងបន្ទាប់ពីលោក ត្រាំ បានសរសេរនៅលើ Twitter ថាលោកអូបាម៉ា បានបញ្ជាឱ្យគេលួចស្ដាប់កិច្ចសន្ទនាតាម ទូរសព្ទរបស់លោក នៅឯអាគារ Trump Tower ដោយបានប្រៀបធៀបសកម្មភាពនេះ ទៅនឹងរឿងអាស្រូវ McCarthyism និង Watergate ទៀត ផង។ ក៏ប៉ុន្តែ លោក ត្រាំ មិនបានបង្ហាញភស្ដុតាងណាមួយមកបញ្ជាក់នោះទេ។
ជាមួយគ្នានេះនាយក FBI លោក ជែម ខូមី ក៏បានច្រានចោលការអះអាងរបស់ប្រធានាធិបតីអាមេរិក លោក ដូណាល់ ត្រាំ ដែលបានចោទប្រកាន់ថា អតីតប្រធានាធិបតីអាមេរិក លោក បារ៉ាក់ អូបាម៉ា បានបញ្ជាឱ្យក្រុមមន្ត្រីសេតវិមានលួចស្ដាប់កិច្ចសន្ទនា តាមទូរសព្ទរបស់លោកផងដែរ។
ទោះបីយ៉ាងណាក្រសួងយុត្តិធម៌អាមេរិក មិនទាន់ចេញសេចក្ដីថ្លែងការណ៍ណាមួយណាឡើយទេ ខណៈលោកត្រាំខ្លួនឯងក៏ពុំទាន់បានបង្ហាញភស្ដុតាងអ្វីដែរ បន្ទាប់ ពីអតីតអ្នកនាំពាក្យលោក អូបាម៉ា ចាត់ទុកថាការលើកឡើងរបស់លោក ដូណាល់ ត្រាំ គឺជារឿងមិនពិត។
គួរបញ្ជាក់ថា ការចោទរបស់លោកត្រាំចំពោះលោកអូបាម៉ានេះត្រូវបានធ្វើឡើងនាថ្ងៃសៅរ៍ ទី៤ មីនាតាមរយៈបណ្តាញសង្គម Tweeter របស់លោក៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
