រាជធានីភ្នំពេញ៖ប្រធានក្រុមប្រឹក្សាជំនុំជម្រះនៃសាលាឧទ្ធរណ៍លោកចៅក្រម ឃុន លាងម៉េង បានសម្រេចនិងប្រកាសមិនអនុញ្ញតឲ្យមន្ត្រីអង្គការអាដហុក៤រូបនិងមន្ត្រីគ.ជ.ប ០១រូបនៅក្រៅឃុំឡើយ។ ការប្រកាសនេះធ្វើឡើងបន្ទាប់ពីបើកសវនាការជាអសាធារណៈជាច្រើនម៉ោងនាព្រឹកមិញនេះ។
គួរបញ្ជាក់ថា មន្ត្រីអាដហុកទាំង៤រូបរួមមាន លោក នី សុខា ប្រធានផ្នែកស៊ើបអង្កេត សមាគមអាដហុក, លោក យី សុខសាន្ត អនុប្រធានផ្នែកស៊ើបអង្កេតសមាគមអាដហុក, លោក ណៃ វ៉ងដា អនុប្រធានផ្នែកស៊ើបអង្កេត សមាគមអាដហុក, លោកស្រី លឹម មុនី មន្ត្រីអង្កេតជាន់ខ្ពស់អាដហុក និងលោក នី ចរិយា អគ្គលេខាធិការរង គ.ជ.ប៕
បាល់ទាត់៖សេចក្តីរាយការណ៍បានឲ្យដឹងថា ក្តីសង្ឃឹមរបស់ក្រុមតោខៀវ Chelsea ក្នុងការចុះហត្ថលេខានាំកីឡាករ Miralem Pjanic ត្រូវបានរលាយទៅវិញខណៈពេលកីឡាកររួបនេះបានសម្រេចចិត្តទៅចូលរួមជាក្រុមសេះបង្កង់ Juventus របស់អ៊ីតាលី នៅរដូចកាលក្រោយនេះ។
ក្រុមតោខៀវបាននិយាយបញ្ជាក់ថា ពីកាលពីមុនក្រុមមានទំនុកចិត្តក្នុងការក្រុមតោខៀវត្រូវបានគេនិយាយថានឹងមានទំនុកចិត្តលើខ្សែបម្រើរុបនេះមកកាន់ទឹកដី Stamford Bridge ជាមួយនឹងតម្លៃពលកម្ម ប្រាំមួយម៉ឺនប្រាំពាន់ផោនក្នុងមួយសប្តាហ៍ក្នុងកិច្ចព្រមព្រៀងចំនួនបីឆ្នាំ។
ទោះជាយ៉ាងណាអ្នកចាតការទូទៅរបស់ក្រុម Roma, លោក Mauro Baldissoni បានបង្ហាញថា កីឡាករ Pjanic បានសរសេរសំបុត្រមួយដែលសម្តែងនូវបំណងរបស់គាត់ដើម្បីចូលរួមជាក្រុមសេះបង្កង់មួយនេះ។
គួរបញ្ជាក់ដែរថា Pjanic បានចាកចេញពីក្រុម Lyon ផ្លាស់មកកាន់ក្រុម Roma កាលពីឆ្នាំ ២០១១ ៕
រាជធានីភ្នំពេញ៖មន្ត្រីជាន់ខ្ពស់ក្រសួងមហាផ្ទៃ ត្រូវបានកាសែតក្នុងស្រុកដកស្រង់សំដីដែលបានអះអាងថា ក្រសួងមហាផ្ទៃ នឹងធ្វើការផ្លាស់ប្តូរស្នងការនគរបាលខេត្តចំនួន៥ នៅពេលឆាប់ៗ នេះ ។
ស្នងការនគរបាលខេត្តទាំង៥ ដែលត្រូវផ្លាស់ប្តូររួមមាន ៖ ស្នងការខេត្តព្រះសីហនុ លោកឧត្តមសេនីយ៍ទោ ជួន ណារិន្ទ នឹងត្រូវទៅកាន់ស្នងការខេត្តសៀមរាប ជំនួសលោកឧត្តមសេនីយ៍ទោ សត ណាឌី ដែលត្រូវចូលនិវត្តន៍ ។ ស្នងការខេត្តតាកែវ លោកឧត្តមសេនីយ៍ អ៊ុក សំណាង នឹងត្រូវទៅកាន់ស្នងការខេត្តព្រះសីហនុវិញ ខណដែលលោកឧត្តមសេនីយ៍ត្រី សុខ សំណាង ដែលជាអនុប្រធាននាយកដ្ឋានច្រកទ្វារទី២ នៃអគ្គនាយកដ្ឋានអន្តោប្រវេសន៍ ត្រូវជំនួសលោកឧត្តមសេនីយ៍ អ៊ុក សំណាង។
ចំណែកខេត្តកំពង់ស្ពឺគឺ លោកឧត្តមសេនីយ៍ត្រី សម សាមួន ស្នងការរងទទួលផែនអន្តោប្រវេសន៍ ទៅជាស្នងការនគរបាលខេត្តកំពង់ស្ពឺ នឹងត្រូវតែងតាំងជាស្នងការខេត្ត ជំនួសលោកឧត្តមសេនីយ៍ កែវ ពិសី ដែលត្រូវចូលនិវត្តន៍ ខណ:ដែលខេត្តកំពង់ឆ្នាំងវិញ លោកវរសេនីយ៍ឯក ឡុច វណ្ណរ៉ា ស្នងការរង ទៅជាស្នងការនគរបាលខេត្តកំពង់ឆ្នាំង នឹងត្រូវតែងតាំងជាស្នងការ ជំនួសលោកឧត្តមសេនីយ៍ត្រី ប្រាក់ វុទ្ធី ដែលត្រូវចូលនិវត្តន៍ ៕
ស៊ីរី៖ការវាយប្រហារផ្លូវអាកាសលើទីផ្សារមួយក្នុងទីក្រុងគ្រប់គ្រងដោយក្រុមអាល់កៃដា Idlib របស់ប្រទេសស៊ីរីដែលបណ្តាលឲ្យជនស៊ីវិលយ៉ាងហោចណាស់២១នាក់បានស្លាប់ កាលពីថ្ងៃអាទិត្យខណៈដែលមនុស្សរាប់រយនាក់បានរត់គេចខ្លួនចេញពីបន្ទាយរបស់ក្រុមរដ្ឋឥស្លាមដែលត្រូវឡោមព័ទ្ធជិតព្រំដែនទួរគី។
ក្រុមសង្កេតការណ៍សិទ្ធិមនុស្សស៊ីរីបានឲ្យដឹងថា កុមារប្រាំនាក់គឺស្ថិតក្នុងចំណោមអ្នកដែលបានស្លាប់ក្នុងការវាយឆ្មក់ផ្លូវអាកាសនៅទីក្រុង Idlib នេះដែលជាកន្លែងគ្រប់គ្រងដោយសម្ព័ន្ធក្រុមអាល់កៃដាគឺរណសិរ្ស Al-Nusra និងសម្ព័ន្ធមិត្តរបស់ខ្លួន។
ទោះបីជាយ៉ាងណាក៏ដោយ វាមិនច្បាស់ទេថាតើអ្នកណាដែលបានធ្វើការវាយប្រហារនៅ Idlib នេះប៉ុន្តែក្រុមអ្នកអង្កេតការណ៍បានរាយការណ៍ថា ការវាយឆ្មក់តាមអាកាសកាលពីលើកមុនៗគឺធ្វើដោយរបបនិងសម្ព័ន្ធមិត្តរុស្ស៊ីរបស់ខ្លួននៅ Idlib ។
អ្នកអង្កេតការណ៍បាននិយាយថា នៅក្នុងតំបន់ Maaret al-Numan ដែលជាតំបន់មួយនៅភាគខាងត្បូងនៃរដ្ឋធានីខេត្ត យន្តហោះចម្បាំងមិនស្គាល់អត្តសញ្ញាណបានសម្លាប់ជនស៊ីវិលយ៉ាងហោចណាស់ប្រាំមួយនាក់ដោយរួមទាំងស្ត្រីម្នាក់និងកូនបួននាក់របស់នាងផងដែរ។
ប្រទេសរុស្ស៊ីបានចាប់ផ្ដើមការវាយប្រហារអាកាសដើម្បីគាំទ្ររដ្ឋាភិបាលក្រុងដាម៉ាសនៅក្នុងខែកញ្ញាដោយអនុញ្ញាតឲ្យកងកម្លាំងស្មោះត្រង់នឹងលោកប្រធានាធិបតីបាសារអាល់អាសាដ វាយលុកប្រឆាំងនឹងពួកឧទ្ទាមនិងក្រុម IS ។
ក្រុមអង្កេតការណ៍បានបញ្ជាក់ថា ការវាយប្រហារតាមអាកាសរបស់ប្រទេសរុស្ស៊ីបានសម្លាប់ជនស៊ីវិល២៣នាក់នៅក្នុងទីក្រុង Idlib នៅថ្ងៃទី៣១ ខែឧសភាប៉ុន្តែរុស្ស៊ីបានបដិសេធថាមិនបានបើកការវាយប្រហារនៅថ្ងៃនោះទេ៕
ហ្វីលីពីន៖ក្រុមឈ្មួញគ្រឿងញៀនបាននិងកំពុងរៀបគម្រោងធ្វើឃាតប្រធានាធិបតីថ្មីរបស់ប្រទេសហ្វីលីពីន លោក Rodrigo Duterte ដោយចំណាយប្រាក់១លានដុល្លារ។ នេះបើតាមលើកឡើងរបស់អគ្គស្នងការនគរបាលជាតិហ្វីលីពីន Ronald dela Rosa ។
ការប្រការគម្រោងខាងលើត្រូវបានគេដឹងថា ជាការឆ្លើយតបទៅនឹងចំណាត់ការដ៏កក្រើករបស់លោក Duterte ចំពោះបទល្មើសគ្រឿងញៀនញៀនត្រឹមរយៈពេល ៦ខែនៃអាណត្តិរបស់លោកប្រធានាធិបតីរូបនេះ។
សារព័ត៌មាន Kea Times បានផ្សាយថា ស្ដេចគ្រឿងញៀនបានផ្ដល់ប្រាក់ ១លានដុល្លារ ចំពោះការសម្លាប់ប្រធានាធិបតីថ្មីរបស់ប្រទេសហ្វីលីពីននេះ។ ទឹកប្រាក់នេះបានកើនឡើងខ្លាំង បើធៀបនឹងការជះលុយដំបូងត្រឹម ២១៤០០០ដុល្លារ ព្រោះមិនអាចរកបានជនដៃដល់។ ទន្ទឹមនោះសារព័ត៌មានដដែលបានបញ្ជាក់ថា គម្រោងនេះគឺជាការផ្ដួចផ្ដើមគំនិតដោយមេគ្រឿងញៀននៅក្នុងពន្ធនាគារ Bilibid ។
គួរបញ្ជាក់ថា លោក Rodrigo Duterte បានឡើងកាន់តំណែងប្រធានាធិបតីហ្វីលីពីនជាផ្លូវការ កាលពីថ្ងៃទី៣០ ខែមិថុនា ដោយមានរហស្សនាមថា “The Punisher” ។ ប្រធានាធិបតីរូបនេះ បានប្ដេជ្ញាថានឹងបំបាត់រាល់បទល្មើសឧក្រិដ្ឋគ្រឿងញៀនត្រឹមរយៈពេល ៦ខែនៃអាណត្តិរបស់លោក៕
រាជធានីភ្នំពេញ៖សកម្មជនគណបក្សសង្គ្រោះជាតិ៣នាក់ ត្រូវបានតុលាការដំបូងរាជធានីភ្នំពេញ សម្រេចផ្តន្ទាទោសឲ្យជាប់ពន្ធនាគារម្នាក់៧ឆ្នាំ រឿងចូលរួមធ្វើកុបកម្ម នៅទីលានប្រជាធិបតេយ្យ កាលពីឆ្នាំ២០១៤ កន្លងទៅ ។
អ្នកគាំទ្រ CNRP ទាំង៣នាក់នោះ រួមមានទី១/ រឿង ចិត្រា អាយុ ៣៣ឆ្នាំ ។ ទី២/ ឈ្មោះ យន់ គឹនហួរ អាយុ ២៨ឆ្នាំ និងទី៣/ ឈ្មោះ យា ថុង អាយុ៣៣ឆ្នាំ ត្រូវបានតុលាការចោទប្រកាន់ពីបទ ចូលរួមធ្វើកុបកម្មបទប្រឆាំងនឹងអ្នករាជការសាធារណៈ មានស្ថានទម្ងន់ទោស និងបទហិង្សាដោយចេតនា មានស្ថានទម្ងន់ទោស ប្រព្រឹត្តនៅចំណុចទីលានប្រជាធិបតេយ្យ សង្កាត់វត្តភ្នំខណ្ឌដូនពេញ រាជធានីភ្នំពេញ កាលពីព្រឹកថ្ងៃទី១៥ ខែកក្កដា ឆ្នាំ២០១៤កន្លងទៅ បទល្មើសដែលមានចែងឱ្យផ្តន្ទាទោសតាមមាត្រា៤៥៦ មាត្រ៤៥៧ និងមាត្រា២១៨នៃក្រមព្រហ្មទណ្ឌ ៕
ខេត្តបន្ទាយមានជ័យ៖ពលករខ្មែរម្នាក់ បានរងគ្រោះដោយធ្លាក់ពីលើអគារការដ្ឋានសំណង់ជាន់ទី២០ក្នុងទឹកដីថៃស្លាប់ភ្លាមៗនៅនឹងកន្លែង ហើយត្រូវគេបញ្ជូនប្រគល់ឱ្យសាច់ញាតិ តាមច្រកទ្វារអន្តរជាតិប៉ោយប៉ែត កាលពីវេលាម៉ោងជាង០៤រសៀលថ្ងៃទី១១ មិថុនា ឆ្នាំ២០១៦។
ប្រភពឱ្យដឹងថា ជនរងគ្រោះដែលស្លាប់មានឈ្មោះដំពុច ហៅទីលៀន ភេទប្រុស អាយុ៣០ឆ្នាំ ជាកម្មករសំណង់ មានទីលំនៅក្នុងភូមិពង្រ ឃុំតាផូ ស្រុកស្វាយចេក ខេត្តបន្ទាយមានជ័យ ។
បើតាមសាច់ញាតិបានឱ្យដឹងថា ជនរងគ្រោះចូលទៅប្រទេសថៃធ្វើជាកម្មករសំណង់នៅខេត្តប៉ាធុមថានី ស្រាប់តែវេលាម៉ោងជាង០៤រសៀលថ្ងៃទី០៩ មិថុនា ២០១៦ ភ្លាត់ធ្លាក់ពីលើជាន់ទី២០ នៃអគារការដ្ឋានសំណង់នោះ ខណៈគាត់ឈរដំជញ្ជាំងខ្វះដោយការប្រុងប្រយ័ត្ន ហើយចំណុចបង្អួចមិនទាន់មានចំរឹងទេ ក៏ធ្លាក់មកដីបែកក្បាលខ្ទេចស្លាប់យ៉ាងអាណោចអាធ័មក្នុងថ្លុកឈាមតែម្តង៕
ផ្លូរីដា៖ហេតុការណ៍បាញ់ប្រហារក្លឹបរាត្រីរបស់ក្រុមមនុស្សស្រឡាញ់ភេទដូចគ្នានៅក្នុងទីក្រុង អូឡាន់ដូ រដ្ឋផ្លូរីដា ភាគខាងត្បូងសហរដ្ឋអាមេរិកបណ្តាលឲ្យមនុស្សស្លាប់៥០នាក់ និង៥៣នាក់ទៀតរងរបួស ។ នេះបើតាមការចេញផ្សាយមុននេះបន្តិច ដោយសារព័ត៌មាន BBC។
ខ្មាន់កាំភ្លើងម្នាក់ បានកាន់កាំភ្លើងវែងរ៉ាហ្វាល់ បាញ់រះក្នុងក្លឹបពេលមនុស្សជាច្រើនកំពុងរាំកម្សាន្តនៅប្រហែលម៉ោង០២យប់ម្សិលមិញ ខណៈដែលនៅនឹងខ្លួនរបស់ជនដៃដល់ម្នាក់នោះ មានឧបករណ៍ម្យ៉ាងទៀត ដែលគេមិនអាចសន្និដ្ឋានបានជាអ្វី ប៉ុន្តែសង្ស័យថាជាគ្រាប់បែក។
អភិបាលក្រុងអូឡាន់ដូ លោក Buddy Dyer បានថ្លែងឲ្យដឹងថា ចំនួនមនុស្សស្លាប់ពេលនេះមាន រហូតដល់ ៥០នាក់ហើយ និង ជាង៥០នាក់ទៀតរងរបួស បន្ទាប់ពីក្លឹបកម្សាន្តឈ្មោះថា Pulse រងការវាយប្រហារដោយខ្មាន់កាំភ្លើងម្នាក់ កាលពីវេលាម៉ោង ២ និង០២ នាទីយប់ថ្ងៃសៅរ៍ ស្ថិតនៅជាយក្រុងភាគខាងត្បូង។ បន្ទាប់ពីការចាប់មនុស្សជាច្រើននាក់ជាចំណាប់ខ្មាំង ទើបប៉ូលិស សម្រេចសម្រុកចូលក្លឹបនោះតែម្តងនៅវេលាម៉ោង ៥ និង០០នាទីព្រឹក។
បច្ចុប្បន្ន មនុស្ស ៤២នាក់កំពុងសម្រាកព្យាបាលនៅមន្ទីរពេទ្យ ហើយដោយឡែកមនុស្ស ៣០នាក់ទៀត ត្រូវបានសង្គ្រោះចេញពីក្លឹបដោយសុវត្ថិភាព៕
ប៉ារីស៖សហព័ន្ធកីឡាបាល់ទាត់អឺរ៉ុប UEFA គំរាមចាត់វិធានការក្តៅទៅលើក្រុមជម្រើសជាតិអង់គ្លេស និងរុស្ស៊ី បន្ទាប់ពីមានករណីផ្ទុះអំពើហិង្សារវាងក្រុមអ្នកគាំទ្រប្រទេសទាំងពីរចំពោះលទ្ធផលក្រុមជម្រើសជាតិរបស់ខ្លួនទទួលបាននោះ។ នេះបើយោងតាមសារព័ត៌មាន Dailymail។
សារព័ត៌មានដដែលបន្តថា UEFA ឲ្យដឹងថា ការខកចិត្តនឹងកើតឡើង ចំពោះក្រុមបាល់ទាត់ជម្រើសជាតិអង់គ្លេស និងរុស្ស៊ី ប្រសិនបើអ្នកគាំទ្រនៅតែមិនអាចគ្រប់គ្រងស្ថានការណ៍ចំពោះ លទ្ធផលក្រុមជម្រើសជាតិរបស់ខ្លួនទទួលបាននោះ ហើយបេសកកម្មរបស់អង់គ្លេស និងរុស្ស៊ី នឹងត្រូវបានបញ្ចប់ភ្លាមៗ ករណីណាមានផ្ទុះហិង្សាជាលើកទី២ទៀតនោះ។
សូមបញ្ជាក់ផងដែរ ការគំរាមចាត់វិធាការណ៍ក្តៅបែបនេះ គឺបានកើតឡើងនៅក្រោយពេលក្រុមអ្នកគាំទ្រក្រុមបាល់ទាត់ ជម្រើសជាតិរុស្ស៊ី បានបង្កហិង្សាទៅលើក្រុមអ្នកគាំទ្រអង់គ្លេស ដែលបណ្តាលឲ្យមានមនុស្ស ២០នាក់ចូលពេទ្យ ក្នុងនោះមាន២នាក់រងរបួសធ្ងន់ ក្រោយពេលក្រុមទាំងពីរបញ្ចប់ក្នុងលទ្ធផលស្មើ ១-១ កាលពីរាត្រីថ្ងៃសៅរ៍ ទី១១ មិថុនា ប្រកួតសន្សំពិន្ទុក្នុងពូល B ហើយមិនត្រឹមតែប៉ុណ្ណោះ អ្នកគាំទ្រទាំងនេះបានប៉ះទង្គិចគ្នារយៈពេល៣ថ្ងៃមកហើយ ក្នុងទីក្រុង Marseille មុនការប្រកួតមកដល់ទៀត៕
រាជធានីភ្នំពេញ៖នៅព្រឹកថ្ងៃទី១៣ ខែមិថុនា ឆ្នាំ២០១៦ នេះ សភាស៊ើបសួរសាលាឧទ្ធរណ៍បើកសវនាការជាអសាធារណៈ ចំពោះបណ្តឹងសុំនៅក្រៅឃុំបណ្តោះអាសន្ន របស់មន្ត្រីសមាគមសិទ្ធិមនុស្សអាដហុក៤រូប និង អគ្គលេខាធិការរងគណៈកម្មាធិការជាតិ រៀបចំការបោះឆ្នោត (គជប) មួយរូប។
គួរម្លឹកថា មន្ត្រីសមាគមសិទ្ធិមនុស្សអាដហុក៤រូប និង អគ្គលេខាធិការរងគណៈកម្មាធិការជាតិ រៀបចំការបោះឆ្នោត (គជប) មួយរូប ត្រូវបានលោក ជា សុខចាន់ដេត ចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីល្ងាចថ្ងៃទី២ ខែឧសភា ឆ្នាំ២០១៦ ឃុំខ្លួនដាក់ពន្ធនាគារ ដើម្បីរង់ចាំការស៊ើបអង្កេតបន្តទៀត។
គួរបញ្ជាក់ថា លោក នី សុខា ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក និង លោកស្រី លឹម មុន្នី មន្ត្រី ជាន់ខ្ពស់សមាគមអាដហុក ត្រូវបានលោកព្រះរាជអាជ្ញារង គុជ គឹមឡុង ចោទពីបទ សូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ។ ដោយឡែកលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ត្រូវបានតុលាការចោទប្រកាន់ពីបទសមគំនិត ក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ៕
រាជធានីភ្នំពេញ៖យោងតាមរបាយការណ៍របស់នាយកដ្ឋាននគរបាលចរាចរណ៍បានឲ្យដឹងថា នៅថ្ងៃទី១១ ខែមិថុនា ឆ្នាំ២០១៦ ម្សិលមិញមានករណីគ្រោះថ្នាក់ចរាចរណ៍ នៅទូទាំងប្រទេស កើតឡើងចំនួន ១៥លើក (យប់ ៦លើក) បណ្តាលឲ្យមនុស្សស្លាប់ ៧នាក់ ( ស្រី ៣នាក់ ) រងរបួសធ្ងន់ ១៤នាក់ ( ស្រី ១នាក់ ) និងរបួសស្រាល ៧នាក់ ( ស្រី ១នាក់ ) ។
របាយការណ៍ដដែលបន្តថា ក្នុងគ្រោះថ្នាក់ចរាចរណ៍ទាំង១៥លើកនេះ បណ្តាលឲ្យខូចខាត យានយន្ត សរុប ចំនួន ២៦គ្រឿង រួមមាន ម៉ូតូចំនួន ១៥គ្រឿង រថយន្តធុនតូច ចំនួន ៦គ្រឿង រថយន្តធុនធំ ចំនួន ៣គ្រឿង និងយានផ្សេងៗ ៣គ្រឿង ។ ប្រភពបញ្ជាក់ថា មូលហេតុដែលបណ្តាលឲ្យកើតមានករណីគ្រោះថ្នាក់ចរាចរណ៍ រួមមាន ល្មើសល្បឿន ៨លើក ( ស្លាប់ ៤នាក់ ), មិនគោរពសិទ្ធិ ៣លើក, ស្រវឹង ២លើក (ស្លាប់ ៣នាក់), មិនប្រកាន់ ស្តាំ ១លើក និងប្រជែងគ្រោះថ្នាក់ ១លើក ។ ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍១៧នាក់ ( យប់ ៧នាក់ ) ។
ជាមួយគ្នានោះម្សិលមិញនេះលទ្ធិផលត្រួតពិនិត្យ អនុវត្តច្បាប់ចរាចរណ៍ ផ្លូវគោក ឃើញថា យានយន្តដែលល្មើស សរុបទូទាំងប្រទេស មាន ចំនួន ២.៥៧៧គ្រឿង ក្នុងនោះ បានធ្វើការអប់រំចំនួន ៨៩៥គ្រឿង និងពិន័យសរុប ១.៦៨២គ្រឿង ៕
សិល្បៈ៖បេក្ខនារី រ៉េ ស៊ូហ្សាណា ដែលនិយមច្រៀងបទចម្រៀង ជាភាសាអង់គ្លេសបានជ្រុះចេញពីកម្មវិធី The Voice Cambodia 2 នៅយប់មិញនេះក្នុងពាក់កណ្តាលផ្តាច់ព្រ័ត្របន្ទាប់ពីមិនអាចយកឈ្នះគូប្រជែងរួមក្រុមគឺបេក្ខជន ថែល ថៃ បាន។
ការបរាជ័យរបស់កូនក្រុម Coach តារាចម្រៀង ឱក សុគន្ធកញ្ញា គឺបេក្ខនារី រ៉េត ស៊ូហ្សាណា គឺជាការបិទបញ្ចប់រាល់ការរិះគន់ ខណៈដែលមុនការប្រកាសលទ្ធផល គឺការផុសផុលយ៉ាងខ្លាំង វាយសន្ធាប់ថា កម្មវិធីបានរៀបចំឲ្យ រ៉េត ស៊ូហ្សាណា ទៅកាន់វគ្គផ្ដាច់ព្រ័ត្រ ដើម្បីឲ្យមានប្រៀបលើ ថែល ថៃ នោះ។
គួរបញ្ជាក់ថា ការប្រកួតវគ្គផ្តាច់ព្រ័ត្រកម្មវិធី The Voice Cambodia 2 នឹងរៀបចំឡើងនៅយប់ថ្ងៃអាទិត្យ ទី១៩ ខែមិថុនា ឆ្នាំ២០១៦ខាងុមុខនេះ៕
រាជធានីភ្នំពេញ៖មានករណីគ្រោះថ្នាក់ចរាចរណ៍មួយកើតឡើងនាម៉ោង១០ និង៥០នាទី យប់ថ្ងៃទី១២ ខែមិថុនាឆ្នាំ ២០១៦ ស្ថិតនៅជិតរង្វង់មូលចោមចៅ ខណ្ឌពោធិ៍សែនជ័យ រវាងរថយន្តទួរីសបើកបុករ៉ឺម៉កម៉ូតូកង់បីបណ្តាលឲ្យមនុស្សស្រីប្រុស១២នាក់ស្លាប់ និងរបួស៕
រាជធានីភ្នំពេញ៖នៅថ្ងៃទី១២ មិថុនា ឆ្នាំ២០១៦ម្សិលមិញកម្លាំអនគរបាលជាតិបានបង្ក្រាបករណីជួញដូរ និងប្រើប្រាស់គ្រឿងញៀនចំនួន៤ករណី ដោយបានឃាត់ខ្លួនជនសង្ស័យចំនួន១២នាក់។ នេះបើយោងតាមរបាយការណ៍របស់អគ្គស្នងការនគរបាលជាតិ។
របាយការណ៍បន្តថា ជនសង្ស័យ១២នាក់ ត្រូវបាននគរបាលឃាត់ខ្លួន ក្នុងនោះមានមុខសញ្ញាជួញដូរ៨នាក់ និងមុខសញ្ញាប្រើប្រាស់គ្រឿងញៀន៤នាក់ ដកហូតថ្នាំញៀន មេតំហ្វេតាមីន (ice) ១២.៩២ក្រាម ១កញ្ចប់ធំ និង១៣កញ្ចប់តូច។
របាយការណ៍បញ្ជាក់ថា ជនសង្ស័យទាំង១២នាក់ ត្រូវបានឃាត់ខ្លួន ក្នុងករណីបង្ក្រាបគ្រឿងញៀន ៤ករណីនៅរាជធានីខេត្តក្នុងនោះរួមមាន៖ ភ្នំពេញ បង្ក្រាប១ករណី ឃាត់ខ្លួនម្នាក់, ខេត្តកែប បង្ក្រាប១ករណី ឃាត់ខ្លួន២នាក់, ខេត្តបាត់ដំបង បង្ក្រាប១ករណី ឃាត់ខ្លួន២នាក់, ខេត្តព្រៃវែង បង្ក្រាប១ករណី ឃាត់ខ្លួន៣នាក់ និងខេត្តស្វាយរៀង បង្ក្រាប១ករណី ឃាត់ខ្លួន៤នាក់៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
