អត្ថបទ៖លោក ប្រុញ វិធិន
ក្រចេះ៖ កម្លាំងនគរបាលនៃអធិការស្រុកព្រែកប្រសព្វបានធ្វើការឃាត់ខ្លួនជនសង្ស័យចំនួន ៣នាក់ ពាក់ពន្ធ័ក្នុងករណីឆបោកលុយប្រជាពលរដ្ឋជាច្រើនគ្រួសារ ។
ការឃាត់ខ្លួននេះ គឺត្រូវបានកម្លាំងសមត្ថកិច្ច ធ្វើឡើងកាលពីរសៀលថ្ងៃទី១០ ខែមិថុនា ឆ្នាំ២០១៦ នៅក្នុងស្រុកព្រែកប្រសព្វ ខេត្តក្រចេះ។
សមត្ថកិច្ច បានឲ្យដឹងថា ជនសង្ស័យទាំង ៣នាក់ខាងលើនេះ ទី១ មានឈ្មោះ ឈឿ សុធារី ហៅ ពៅ ភេទស្រី អាយុ ៣៥ឆ្នាំ រស់នៅភូមិបែកអន្លូង ឃុំអារក្សត្នោត ស្រុកស្ទឹងត្រង់ ខេត្តកំពង់ចាម។
ជនសង្ស័យទី២ មានឈ្មោះ លី ហេន ភេទប្រុស អាយុ ៦៣ឆ្នាំ រស់នៅឃុំទំនប់ដាច់ ស្រុកត្រពាំងប្រសាទ ខេត្តឧត្តមានជយ័ និងទី៣ មានឈ្មោះ បូ ខុន ភេទប្រុសអាយុ ៦០ឆ្នាំ រស់នៅភូមិរការធំ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ។
សមត្ថកិច្ច បានបន្ដឲ្យដឹងថា អ្នកទាំង ៣នាក់នេះ កាលពីពាក់កណ្ដាលខែមិនា ឆ្នាំ២០១៦កន្លងទៅ ធ្លាប់បានធ្វើសកម្មភាពដេីរប្រមូលលុយពីប្រជាពលរដ្ឋដែលរស់នៅភូមិជ្រោយបន្ទាយ ស្រុកព្រែកប្រសព្វ ខេត្តក្រចេះ ចំនួន៥០គ្រួសារ ដោយក្នុង ១គ្រួសារ ១០០ដុល្លា ដេីម្បីរត់ការដីសម្បទានសង្គមកិច្ចនៅភូមិអន្សោងធ្លាក់ ឃុំកំពង់ចាម ស្រុកសំបូរ ខេត្តក្រចេះ ដោយសន្យាថា នឹងប្រគល់ដីជូនប្រជាពលរដ្ឋ ក្នុងមួយគ្រួសារ នឹងទទួលបានដីចំនួន៥ហិកតា។
បច្ចប្បន្នជនសង្ស័យទាំងបីនាក់ ត្រូវបានកម្លាំងការិយាលយ័ព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តក្រចេះ កសាងសំណុំរឿងតាមនីតិវិធីបញ្ជូនទៅតុលាកានៅល្ងាចថ្ងៃទី១១ ខែមិថុនានេះហើយ៕
អត្ថបទ៖ លោក រដ្ឋា
ភ្នំពេញ ៖គិតមកដល់ថ្ងៃទី១១នេះ មានរយៈពេល៣ថ្ងៃហើយដែលតុលាការក្រុងភ្នំពេញបន្តការសាកសួរ បុរស៣នាក់នៅឡើយ បន្ទាប់ពីត្រូវបានចាប់ខ្លួនដោយក្រសួងមហាផ្ទៃ ពាក់ព័ន្ធការប្រើឈ្មោះថ្នាក់ដឹកនាំដើម្បីបោកប្រាស់អ្នកវិនិយោគបរទេស និងប្រជាពលរដ្ឋក្នុងការដើរទិញ លក់ ដី តម្លៃរាប់លានដុល្លារ។
តាមសេចក្តីរាយការណ៍ពីសមត្ថកិច្ច បានឲ្យដឹងថា បុរសទាំង៣នាក់ ដែលប៉ូលិសចាប់ខ្លួន មានដូចជាៈ ១.ឈ្មោះ សួន មាន ភេទប្រុស អាយុ៤៧ឆ្នាំ, ឈ្មោះ ហង្ស សុខា ភេទប្រុស អាយុ៤៧ឆ្នាំ និងឈ្មោះ ស៊ុន សុខហេង ភេទប្រុស អាយុ៥៨ឆ្នាំ ត្រូវប៉ូលិសចាប់ខ្លួន កាលពីថ្ងៃទី៩ ខែមិថុនា ឆ្នាំ២០១៦ ហើយបានបញ្ជូនខ្លួន មកតុលាការ កាលពីថ្ងៃទី១០ ខែមិថុនា និងរហូតមកព្រឹកថ្ងៃទី១១ មិថុនា នេះ គឺកំពុងតែស្ថិតនៅក្នុងតុលាការ ដើម្បីឲ្យព្រះរាជអាជ្ញា និងចៅក្រមសាកសួរ អំពីដំណើររឿង ឆបោកក្នុងការទិញលក់ដី ដែលមានតម្លៃ ជិត ១ លានដុល្លារអាមេរិក។
ការចាប់ខ្លួនបុរសទាំង៣នាក់នេះ បន្ទាប់ពីមានបណ្តឹងរបស់មនុស្សមួយក្រុមដែលអះអាងថាជាជនរងគ្រោះ បានដាក់ពាក្យបណ្តឹងទៅក្រសួងមហាផ្ទៃ។បុរសទាំង៣ នាក់ បានរងការចោទថា បានយក ឈ្មោះថ្នាក់ដឹកនាំក្រសួងបរិស្ថាន និងក្លែងបន្លំជាមន្ត្រីក្រសួងបរិស្ថាន ហើយបានប្រើឈ្មោះ លោក ហ៊ុន ម៉ានី ប្រធានសហភាពសម្ព័ន្ធយុវជនកម្ពុជា ក្នុងការរកស៊ីទិញលក់ដី ឲ្យអ្នកវិនិយោគបរទេស។
ប្រភពព័ត៌មានបានឲ្យដឹងថា ជនបុរសឈ្មោះ សួន មាន បានយកឈ្មោះ ថ្នាក់ដឹកនាំក្រសួងបរិស្ថាន ដើរបោកប្រាស់ទិញដីឲ្យអ្នកវិនិយោគបរទេស ដែលមានតម្លៃរាប់លានដុល្លារ (មិនមានដីឲ្យគេ) ។ចំណែកឈ្មោះ ហង្ស សុខា បានយកឈ្មោះ លោក ហ៊ុន ម៉ានី ប្រធានសហភាពសម្ព័ន្ធយុវជនកម្ពុជា និងជាតំណាងរាស្ត្រមណ្ឌលកំពង់ស្ពឺ ទៅបាំងក្នុងរឿងដើរទិញ លក់ដី និងឈ្មោះ ស៊ុន សុខហេង ដែលជាមេភូមិស្ទឹងឆាយ ដើរតួរអ្នករៀចំដី(ខ្យល់) លក់ឲ្យបរទេស ។
គេមិនទាន់ដឹងច្បាស់ថា បុរសទាំងបីនាក់នោះ បានប្រព្រឹត្តដូចការចោទប្រកាន់ពិតមែន ឬយ៉ាងណាទេ ? ប៉ុន្តែទោះជាយ៉ាងនេះក្តី នៅរសៀលថ្ងៃទី១១ ខែមិថុនា នេះ តុលាការនឹងសម្រេចថាត្រូវឃុំខ្លួន ឬទម្លាក់ចោលការចោទប្រកាន់៕
អត្ថបទ៖ លោក រដ្ឋា
ភ្នំពេញះលោក ស៊ឹង ប៊ុណ្ណា នាយកក្រុមហ៊ុន ប៊ុណ្ណា រៀលធី គ្រុប ដែលធ្វើសេវាកម្មវាយតម្លៃអចលនទ្រព្យដ៏ល្បីល្បាញនៅកម្ពុជា នៅវេលាព្រឹកនាថ្ងៃទី១០ ខែមិថុនា ឆ្នាំ២០១៦នេះ ត្រូវបានសមត្ថកិច្ចនគរបាលព្រហ្មទណ្ឌក្រសួងមហាផ្ទៃចាប់ឃាត់ខ្លួន និងត្រូវបានស្ថាប័នតុលាការសាលាដំបូងរាជធានីភ្នំពេញបើកការស៊ើបសួរ និងឃុំខ្លួនដាក់ពន្ធនាគារបណ្តោះអាសន្ននៅរសៀលថ្ងៃដដែល ពីបទមិនបំពេញកាតព្វកិច្ចចំពោះឧបករណ៍អាចជួញដូរបាន (មូលប្បទានបត្រគ្មានសាច់ប្រាក់ ឬសែកស្អុយ) ក្នុងទំហំទឹកប្រាក់ចំនួន៤០ម៉ឺនដុល្លារអាមេរិក តាមបណ្តឹងរបស់លោកឧកញ៉ា កែវ ហ៊ុន ។
មុនពេលចាកចេញពីការិយាល័យក្រុមហ៊ុន ដើម្បីឲ្យសមត្ថកិច្ចចាប់ឃាត់ខ្លួនទាំងទឹកមុខញញឹម លោក ស៊ឹង ប៊ុណ្ណា បានផ្តាំផ្ញើភរិយារបស់លោកដែលកំពុងសម្រក់ទឹកភ្នែកថា “ធ្វើការថែទាំកូនឲ្យបានល្អ ទោះជាមានស៊ី ឬអត់ស៊ី ត្រូវប្រឹងរកដោយសុចរិត និងលេបថ្នាំឲ្យបានទៀងទាត់” ។
លោក ស៊ឹង ប៊ុណ្ណា ជាអ្នកធ្លាប់ល្បាញល្បី និងត្រូវសង្គមទទួលស្គាល់ថា ជាអ្នកមានធនធាន មានមុខមានមាត់ក្នុងសង្គមមួយរូប តែពេលនេះអ្នកស្រី សំម៉ាលី បញ្ជាក់ថា អ្នកស្រី និងស្វាមី គ្មានសល់អ្វីទេ។ បើតាមអ្នកស្រី សំម៉ាលី ភាពហិនហោចនេះ មិនមែនដោយសារការលេងល្បែងអ្វីនោះឡើយ តែមកពីមានរឿងនៅពីក្រោយខ្នង ជាពិសេសការជឿទុកចិត្តលើអ្នកដទៃ។
អ្នកស្រី ស៊ន សំម៉ាលី បានរៀបរាប់ថា ស្វាមីរបស់អ្នកស្រី ធ្លាប់ជួយសង្គមខាងផ្នែកដីធ្លីនៅស្រុកខ្មែរ និងបណ្តុះបណ្តាលមនុស្សរាប់រយពាន់នាក់ ឲ្យចេះរកស៊ី និងជួយមនុស្សជាច្រើនឲ្យក្លាយជាមហាសេដ្ឋី ហើយស្វាមីរបស់អ្នកស្រីជាអ្នករកស៊ីវាយតម្លៃដីធ្លីមិនស៊ីសំណូក។
ភរិយារបស់អ្នកជំនួញអចលនទ្រព្យដ៏ល្បីល្បាញរូបនេះ បានរៀបរាប់ថា ទង្វើជាគុណធម៌ ដែលស្វាមីរបស់អ្នកស្រីប្រឹងប្រែងនេះ ត្រូវបានតបស្នងមកវិញ ដោយទង្វើរមិលគុណ។
សូមជំរាបថា លោក ស៊ឹង ប៊ុណ្ណា បានបង្កើតក្រុមហ៊ុនប៊ុណ្ណារៀលធីគ្រុបនៅរាជធានីភ្នំពេញក្នុងឆ្នាំ១៩៩៩។ លុះនៅឆ្នាំ២០១១ ធនាគារជាតិនៃកម្ពុជា បានទទួលការវាយតម្លៃផ្នែកអចនទ្រព្យកម្មសិទ្ធិរដ្ឋនៅទូទាំងប្រទេស ក្រុមហ៊ុនប៊ុណ្ណារៀលធីគ្រុប ក៏បានក្លាយជាអ្នកដេញថ្លៃ និងទទួលបានកិច្ចសន្យាវាយតម្លៃ ផ្នែកសុវត្ថិភាពជាផ្លូវការនាពេលនោះ។ អស់ជាច្រើនឆ្នាំមកនេះក្រុមហ៊ុនប៊ុណ្ណារៀលធីគ្រុប បានចាប់ដៃគូជាមួយធនាគារឈានមុខទាំងក្នុងស្រុក និងក្រៅស្រុក និងពង្រីកទំនាក់ទំនងអាជីវកម្មឱ្យកាន់តែប្រសើរឡើង។
គេមិនទាន់ដឹងរឿងរ៉ាវច្បាស់លាស់នៅឡើយទេថា តើលោក ស៊ឹង ប៊ុណ្ណា មានទំនាក់ទំនងរកស៊ីជាមួយឧកញ៉ា កែវ ហ៊ុន អ្វីខ្លះនោះទេ ហើយបានប្រព្រឹត្តល្មើសដូចការចោទប្រកាន់របស់លោកឧកញ៉ា កែវ ហ៊ុន នោះដែរឬយ៉ាងណា ? ៕
បាងកក៖ប៉ូលិសបាននិយាយថា ទាហានថៃ២នាក់ និងជនស៊ីវិល៥នាក់ផ្សេងទៀតរងរបួសបន្ទាប់ពីគ្រាប់បែកដែលគេបង្កប់ក្នុងម៉ូតូដែលចតចោលនៅក្បែរស្ពានមួយបានផ្ទុះ គ្រាដែលរថយន្តរបស់ពួកគេបានបើកកាត់តាមផ្លូវធំមួយនៅស្រុក Nong Chik ខេត្តប៉ាតានីភាគខាងត្បូងនៃប្រទេសថៃកាលពីម្សិលមិញ។
គួរបញ្ជាក់ថា ការវាយប្រហារនេះកើតឡើងបន្ទាប់ពីក្រុមអ្នកស៊ើបអង្កេតថៃបានប្រាប់ប៉ូលិស និងក្រុមមន្ត្រីយោធាកាលពីយប់ថ្ងៃពុធថា ពួកគេបានទទួលបានព័ត៌មានសម្ងាត់ថា ក្រុមឧទ្ទាមបានរៀបចំគម្រោងវាយប្រហារនៅស្រុក Nong Chik ក្នុងខេត្តនេះ៕
ខេត្តស្ទឹងត្រែង៖កម្លាំងនគរបាលខេត្តស្ទឹងត្រែងបានចាប់ខ្លួនជនសង្ស័យករណីចែកចាយគ្រឿងញៀនចំ២នាក់ព្រមទាំងដកហូតថ្នាំញៀនជាង២គីឡូក្រាម។ ការឃាត់ខ្លួនធ្វើឡើងកាលពីម្សិលមិញនៅចំណុចភូមិណាអូង ឃុំស្រែសំបូរ ស្រុកសៀមប៉ាង ខេត្តស្ទឹងត្រែង ។
ស្នងការនគរបាលខេត្តស្ទឹងត្រែង លោកឧត្តមសេនីយ៍ត្រី ម៉ៅ តារា បានឲ្យដឹងថា នៅព្រឹកថ្ងៃទី១០ ខែមិថុនា ឆ្នាំ២០១៦នេះថា ជនសង្ស័យដែលចាប់ខ្លួនមានឈ្មោះ អ៊ីន ស៊ានម៉ាលី ភេទប្រុស អាយុ៤៥ឆ្នាំ មុខរបរកសិករ និងឈ្មោះ មី ប៊ូឡាំ ភេទប្រុស អាយុ៦៧ឆ្នាំ ជាមេភូមិ នៃឃុំប៉ាក់កាឡាន់ ស្រុកវឺនសៃ ខេត្តរតនគីរី។ លោកបញ្ជាក់ថា ក្រោយពីឃាត់ខ្លួនកម្លាំងនគរបាលបានដកហូតថ្នាំញៀនមួយកញ្ចប់ធំ ប្រភេទមេតំហ្វេតាម៉ីន ICE ទម្ងន់២៤៨.៨គីឡូក្រាម។
បច្ចុប្បន្នសមត្ថកិច្ចកំពុងរៀបចំកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ចែងតាមនីតិវិធីច្បាប់៕
រាជធានីភ្នំពេញ៖ជនល្មោភកាមមិនស្គាល់មុខបានធ្វើសកម្មភាពចាប់រំលោភក្មេងស្រីអាយុ៥ឆ្នាំម្នាក់ក្នុងការដ្ឋានសំណង់មួយកន្លែងរហូតបានសម្រេច ហើយរត់គេចខ្លួនបាត់ស្រមោល។ ហេតុការណ៍នេះកើតឡើងនៅយប់ថ្ងៃទី០៩ ខែមិថុនា ឆ្នាំ២០១៦ នៅក្នុងផ្ទះកំពុងសាងសង់មួយ ស្ថិតក្នុងភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ។
សមត្ថកិច្ចបានឱ្យដឹងថា ក្មេងស្រីរងគ្រោះ មានឈ្មោះ ស ស គ អាយុ៥ឆ្នាំ ស្នាក់នៅក្នុងការដ្ឋានសំណង់ផ្ទះល្វែងមួយ ក្នុងភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ។ ជាមួយគ្នានោះសមត្ថកិច្ច បានប្រមូលវត្ថុតាងដែលបន្សល់ទុកនៅកន្លែងកើតហេតុ រួមមាន ខោជើងខ្លីរូបតុក្កតា១ និងស្បែកជើងម្ខាង ពណ៌បៃតង។ សមត្ថកិច្ចបញ្ជាក់ថា ក្រោយពេលកើតហេតុកុមារីរងគ្រោះត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យគន្ធបុប្ផាទាំងយប់ផងដែរ។
បច្ចុប្បន្ន សត្ថកិច្ចមូលដ្ឋានកំពុងធ្វើការស្រាវជ្រាវវែករកមុខជនសង្ស័យ ដើម្បីយកមកផ្តន្ទាទោស តាមច្បាប់៕
ខេត្តកោះកុង៖កម្លាំងអធិការស្រុកមណ្ឌលសីមាតាមប្រមាញ់ និងចាប់វាយខ្នោះភ្លាមៗជនល្មោភកាមតណ្ហាម្នាក់ បន្ទាប់ពីធ្វើសកម្មភាពចាប់រំលោភក្មេងស្រីអាយុ៤ឆ្នាំម្នាក់រហូតបានសម្រេច កាលពីនៅថ្ងៃទី០៩ ខែមិថុនា ឆ្នាំ២០១៦ ស្ថិតនៅភូមិចាំយាម ឃុំបាក់ខ្លង ស្រុកមណ្ឌលសីមា ខេត្តកោះកុង។
ស្នងការនគរបាលខេត្តកោះកុង លោក សំ ឃិតវៀន បានឱ្យដឹងថា ជនសង្ស័យមាន ឈ្មោះ ឈឹម រ៉ាឌី អាយុ២៥ឆ្នាំ មុខរបរកម្មករ ទីលំនៅមិនពិតប្រាកដ។ ចំណែកក្មេងស្រីរងគ្រោះ ឈ្មោះ រ.ប.ស.ន អាយុ៤ឆ្នាំ ជាសិស្សសាលា មានទីលំនៅភូមិចាំយាម ឃុំបាក់ខ្លង ស្រុកមណ្ឌលសីមា ខេត្តកោះកុង។
លោកស្នងការបញ្ជាក់ថា ក្រោយពីទទួលបានពាក្យបណ្តឹងពី ក្រុមគ្រួសារក្មេងស្រីរងគ្រោះភ្លាម លោកបានបញ្ជកម្លាំងនគរបាលគ្រប់មូលដ្ឋានទាំងអស់ តាមស្រាវជ្រាវរហូតឈានដល់ការឃាត់ខ្លួនជនសង្ស័យបាន នៅម៉ោង១៣ និង១៥នាទី ថ្ងៃទី០៩ ខែមិថុនាតែម្តង។
បច្ចុប្បន្ន ជនសង្ស័យ ត្រូវបានសមត្ថកិច្ចកំពុងកសាងសំណុំរឿង បញ្ជូនខ្លួនទៅតុលាការ ដើម្បីចាត់ការផ្ដន្ទាទោស ទៅតាមនីតិវិធីច្បាប់។ ចំណែកឯក្មេងស្រីរងគ្រោះ ក្រោយពីបានធ្វើកោសល្យវិច័យរួចមក អ្នកគ្រូពេទ្យបានបញ្ជាក់ថា គាត់ពិតជាបានបាត់បង់ធាតុដើមអស់មែន (ព្រហ្មចារី) ដោយសារជនគំរកនេះ៕
រាជធានីភ្នំពេញ៖ជនសង្ស័យម្នាក់ត្រូវបានកម្លាំងសមត្ថកិច្ចប៉ុស្តិ៍ទួលសង្កែ ឃាត់ខ្លួន បន្ទាប់ពីខ្លួនគេបានធ្វើសកម្មភាពលួចកាច់កម៉ូតូ កាលពីវេលាម៉ោង ៧និង៤០នាទីព្រឹក ថ្ងៃទី១០ ខែមិថុនា ឆ្នាំ២០១៦ ដែលស្ថិតនៅចំណុចផ្ទះលេខ៧៤២ ផ្លូវលេខ៦២ ក្រុមទី៤ ភូមិផ្សារតូច សង្កាត់ទួលសង្កែ ខណ្ឌឫស្សីកែវ ។
សមត្ថកិច្ចបានឲ្យដឹងថាជនសង្ស័យ ឈ្មោះ ឡា សុខឡេង ភេទប្រុស អាយុ ១៨ឆ្នាំ មុខរបរ មិនពិតប្រាកដ ស្នាក់នៅសង្កាត់ផ្សារកណ្តាល២ ខណ្ឌដូនពេញ មានស្រុកកំណើតនៅភូមិស្ពឺ ឃុំស្ពឺ ស្រុកចំការលើ ខេត្តកណ្តាល ។ ចំណែកឯជនរងគ្រោះឈ្មោះ អ៊ឹង ថង ភេទប្រុស អាយុ ៣៩ឆ្នាំ មុខរបរ ជួសជុលនាឡឹការ ស្នាក់ផ្ទះកើតហេតុខាងលើ ។
ប្រភពព័ត៌មានពីសមត្ថកិច្ចបានប្រាប់ឲ្យដឹងថា នៅមុនពេលកើតហេតុ ជនរងគ្រោះបានទុកម៉ូតូនៅក្នុងផ្ទះ ហើយកំពុងតែរៀបចំងូតទឹក ខណៈពេលនោះ ជនរងគ្រោះបានមើលនៅក្នុងកាមេរ៉ាសុវត្ថិភាព ក៏បានឃើញជនសង្ស័យ យកកូនសោរម៉ូតូពីក្នុងខោប៉ាវយកមកចាក់កាច់កម៉ូតូម៉ាក HONDA C125 ពណ៌ខ្មៅ ភ្នំពេញ 1AP-5450 ខណះនោះជនរងគ្រោះដឹងទាន់រត់ចេញពីក្នុងផ្ទះដេញតាមចាប់ឃាត់ខ្លួនជនសង្ស័យ ស្របពេលពេលនោះ សមត្ថកិច្ចបានមកដល់ ហើយបានជួយអន្តរាគមន៍ឃាត់ខ្លួនសង្ស័យរួមនិងវត្ថុតាងនាំមកកាន់ប៉ុស្តិ៍ ដើម្បីធ្វើការសួរនាំ។
បច្ចុប្បន្នជនសង្ស័យ ត្រូវកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿង បញ្ជូនទៅកាន់តុលាការ ចាត់ការបន្ត៕
អាមេរិក៖នាយករដ្ឋមន្ត្រីឥណ្ឌាលោក ណារ៉េនដ្រា ម៉ូឌី បានប្រកាសកាលពីថ្ងៃម្សិលមិញថា ឥណ្ឌានិងសហរដ្ឋអាមេរិក គួរធ្វើការរួមគ្នាឲ្យបានជិតស្និទ្ធថែមទៀត ដើម្បីផ្ចាញ់ចលនាភេរវកម្មនិងកាត់ផ្ដាច់អស្ថេរភាពតំបន់។
លោក ម៉ូឌី បានថ្លែងដូច្នេះនៅក្នុងសម័យប្រជុំមួយរបស់សភាអាមេរិកនៅអំឡុងដំណើរទស្សនកិច្ចទៅកាន់ក្រុងវ៉ាស៊ីងតោនដែលរៀបចំឡើងដើម្បីកសាងទំនាក់ទំនងរវាងមហាអំណាចប្រជាធិបតេយ្យទាំងពីរនេះ។ ទន្ទឹមនោះលោក ម៉ូឌី បានជំរុញឲ្យសមាជិកសភាអាមេរិកជួយហ៊ុមព័ទ្ធអ្នកទាំងឡាយដែលគាំទ្រចលនាភេរវកម្មនៅបណ្ដាប្រទេសជិតខាងឥណ្ឌា។
លោក ម៉ូឌី បញ្ជាក់ថា ភាពជាដៃគូអាមេរិក-ឥណ្ឌានឹងជួយធានាសន្តិសុខនៃផ្លូវពាណិជ្ជកម្ម និងសេរីភាពនាវាចរណ៍នៅដែនសមុទ្រ៕
ខេតុ្តកណ្តាល៖បុរសម្នាក់បានស្លាប់បាត់បង់ជីវិតខណះដើរមើលខ្សែលួសដែលខ្លួនតចរន្ត័ភ្លើងដាក់ឆក់កណ្តុរកុំឲ្យចូលស៊ីស្រូវក៏ភ្លាត់ស្នៀតរអិលជឿងដួលទៅលើខ្សែលួសបណ្តាលឲ្យឆក់ស្លាប់តែម្តង ។ ហេតុការណ៍នេះបង្កឲ្យមានការភ្ញាក់ផ្អើល នៅវេលាម៉ោង២០និង៣០នាទីយប់ ថ្ងៃទី០៩ ខែមិថុនា ឆ្នាំ២០១៦ ត្រង់ចំណុចកែងទំនប់តាម៉ូវ ស្ថិតក្នុងភូមិបឹងគ្រុំក្រោម ឃុំបឹងគ្រុំ ស្រុកល្វាឯម ខេត្តកណ្តាល ។ ជនរងគ្រោះឈ្មោះនុតថនភេទប្រុសអាយុ៥៣ឆ្នាំ ជនជាតិខ្មែរ មុខរបរកសិករ រស់នៅភូមិឃុំ កើតហេតុ ។
តាមប្រភពនិយាយថានៅវេលាម៉ោង៥ល្ងាច ថ្ងៃដដែល ជនរងគ្រោះបានយកអាគុយដែលមានកម្លាំង៤០អំពែ១គ្រឿង ដុំឆក់ឆ្នៃ១និងខ្សែលួសប្រវែង៣៤០ម៉ែត្រ ចេញពីផ្ទះទៅរាយតចរន្តភ្លើងអាគុយពទ័ជំវិញដីស្រែរបស់ខ្លួននៅខាងក្រោយផ្ទះដូចសព្វដង ដើម្បីការពារឆក់កណ្តុរកុំឲ្យចូលស៊ីស្រូវ ។ លុះដល់វេលាម៉ោង២០និង៣០នាទីយប់ ថ្ងៃដដែល ជនរងគ្រោះបានដើរមើលស្រាប់តែដើរបានប្រហែល២០ម៉ែត្រចម្ងាយពីរោងក៏រអិលជើងដួលផ្កាប់មុខទៅលើខ្សែលួសបណ្តាលឲ្យឆក់ស្លាប់នៅនិងកន្លែងគ្មានអ្នកណាដឹង ។ លុះដល់វេលាម៉ោងខាងលើប្អូនប្រុសបង្កើតរបស់(ជនរងគ្រោះ)ឈ្មោះនុតថាយាមដីស្រូវប្រាំងក្បែរនោះមើលមកឃើញភ្លើងពិលរបស់ជនរងគ្រោះចាញ់បំភ្លឺឡើងទៅលើក៍រត់មកស្រែកហៅបងមិនឮឆ្លើយពេលមកដល់ស្រាប់តែឃើញបងប្រុសដួលផ្កាប់មុខដោយដៃកាន់ខ្សែលួសក៍រត់ទៅដោះអាគុយចាប់លើកបងឡើងតែហួសពេលព្រោះជនរងគ្រោះបានដាច់ខ្យល់ស្លាប់បាត់បង់ជីវិតទៅហើយ ។ ក្រោយទទួលបានព័ត៌មាននេះភ្លាមសមត្ថកិច្ចជំនាញសហការជាមួយគ្រូពេទ្យអាជ្ញាធរនិងប៉ូលិសមូលដ្ឋានចុះទៅធ្វើកោសល្យវិច្ចយ័ពិនិត្យសាកសព ។
បន្ទាប់ពិនិត្យរួចបញ្ជាក់ថាជនរងគ្រោះពិតជាស្លាប់ក្នុងករណីរអិលដួលទៅលើខ្សែលួសឆក់ខ្លួនឯកប្រាកដមែនមិនមានពាក់ពន្ធករណីឃាតកម្មទេហើយសាច់ញាតិក្រុមគ្រួសារក៏ទទួលស្គាល់ទើបសមត្ថកិច្ចធ្វើកំណត់ហេតុប្រគល់សាកសពជូនក្រុមគ្រួសាររៀបចំធ្វើបុណ្យតាមប្រពៃណី៕
រាជធានីភ្នំពេញ៖សាលារាជធានីភ្នំពេញ ដែលកំពុងធ្វើការសម្របសម្រួល រវាងម្ចាស់រថយន្តនិងក្រុមហ៊ុន OCIC ក្នុងករណីបាក់ស្រុតដីធ្លាក់រថយន្ត កាលពីរសៀលថ្ងៃទី០៨ ខែមិថុនា ឆ្នាំ២០១៦ ដោយតម្រូវឲ្យក្រុមហ៊ុន OCIC ទទួលខុសត្រូវ។
សូមបញ្ជាក់ថា អំឡុងពេលភ្លៀងធ្លាក់ខ្លាំងកាលពីម៉ោងជាង១រសៀលថ្ងៃទី០៨ មិថុនា បានបណ្តាលឲ្យស្រុតដីធ្លាក់រថយន្ត៣គ្រឿងនៅជ្រុងខាងកើតពហុកីឡដ្ឋានជាតិអូឡាំពិក ។ រថយន្តដែលគេចតទុកលក់ទាំង៣គ្រឿងនិងធ្លាក់ដោយសារការស្រុតដីពេលភ្លៀងនោះម៉ាក CRV ២គ្រឿង (ព៌ណទឹកប្រាក់និងព៌ណស្លែ) និងរថយន្តម៉ាកកាមរីបាឡែន០១គ្រឿង៕
សៀមរាប៖នៅដើមសប្តាហ៍នេះ លោក ម៉ម រិទ្ធី ប្រធានសហព័ន្ធសហជីពកម្មករ និយោជិតវិស័យទេសចរណ៍ និងសេវាកម្មកម្ពុជា(CTSWF) ត្រូវបាននាយកសណ្ឋាគារ Victoria Angkor Resort & Spa ជាសណ្ឋាគារលំដាប់ផ្កាយ៥ ឋិតនៅក្រុងសៀមរាប ខេត្តសៀមរាប ដាក់ពាក្យបណ្តឹងចុះថ្ងៃទី០៦ ខែមិថុនា ឆ្នាំ២០១៦កន្លងទៅថ្មីៗ ទៅស្ថាប័នអយ្យការអមសាលាដំបូងខេត្តសៀមរាប ដោយប្តឹងចោទប្រកាន់ពីបទ ញុះញង់ឲ្យប្រព្រឹត្តអំពើហិង្សា ប្រព្រឹត្តកាលពីថ្ងៃទី០៤ ខែមិថុនា ឆ្នាំ២០១៦ នៅមុខបរិវេណសណ្ឋាគារ ក្នុងហេតុការណ៍កូដកម្ម-បាតុកម្មដែលផ្ទុះចេញពីវិវាទការងាររវាង ភាគីនិយោជក និងភាគីបុគ្គលិក និយោជិតសណ្ឋាគារ ។
ប្រភពព័ត៌មាន បានរាយការណ៍ថា វិវាទការងារបានកើតមានឡើងរវាងភាគីនិយោជក និងភាគីបុគ្គលិក និយោជិតសណ្ឋាគារ Victoria Angkor Resort & Spa ដែលគេដឹងថា ដឹកនាំដោយលោក ម៉ម រិទ្ធី នៅពីក្រោយខ្នង ហើយករណីខ្លះ ត្រូវបានតាំងពីអំឡុងខែកញ្ញា ឆ្នាំ២០១៥ រហូតដោះស្រាយដល់ក្រុមប្រឹក្សាអាជ្ញាកណ្តាលផង និងមានសំណុំរឿងដល់ស្ថាប័នតុលាការផង ។
ប្រភពបានបន្តថា កាលពីថ្ងៃទី២៩ ខែធ្នូ ឆ្នាំ២០១៥រហូតដល់ថ្ងៃទី០៦ ខែមករា ឆ្នាំ២០១៦ ភាគីបុគ្គលិក និយោជិតសណ្ឋាគារមួយចំនួនតូច ធ្លាប់បានធ្វើកូដកម្ម-បាតុកម្មប្រឆាំងនឹងអ្នកគ្រប់គ្រងសណ្ឋាគារ រួចម្តងមកហើយ បន្ទាប់ពីភាគីនិយោជកសណ្ឋាគារបានប្តឹងជំទាស់នឹងសេចក្តីបង្គាប់ របស់ក្រុមប្រឹក្សាអាជ្ញាកណ្តាល និងក៏ត្រូវបានសាលាដំបូងខេត្តសៀមរាបចេញដីកាសម្រេចរក្សាការពារ បង្គាប់ឲ្យភាគីកូដករ-បាតុករបញ្ឈប់ការធ្វើកូដកម្ម-បាតុកម្ម ។
ប្រភពបានបញ្ជាក់ថា ក្រោយមកនៅក្នុងសេចក្តីបង្គាប់លេខ០៤២/១៦ ចុះថ្ងៃទី៣១ ខែមីនា ឆ្នាំ២០១៦ របស់ក្រុមប្រឹក្សាអាជ្ញាកណ្តាល ត្រូវបានខាងភាគីនិយោជកសណ្ឋាគារបង្ហាញនូវជំហរចូលរួមអនុវត្តន៍បើក ផ្តល់ប្រាក់ឈ្នួល និងប្រាក់បំណាច់ផ្សេងៗជូនបុគ្គលិក និយោជិត តាមសេចក្តីបង្គាប់របស់ក្រុមប្រឹក្សាអាជ្ញាកណ្តាល តែត្រូវខាងភាគីបុគ្គលិក និយោជិតមួយចំនួនដឹកនាំដោយលោក ម៉ម រិទ្ធី ប្តឹងជំទាស់ រួចហើយប្រើប្រាស់សិទ្ធិធ្វើកូដកម្ម-បាតុកម្មប្រឆាំងនឹងភាគី និយោជកសណ្ឋាគារថែមទៀត ជាហេតុធ្វើឲ្យខាងភាគីនិយោជកសម្រេចប្តឹងពីករណីនេះទៅស្ថាប័នតុលាការ តែម្តង ។
គួរជម្រាបថា លោក ម៉ម រិទ្ធី ប្រធានសហព័ន្ធសហជីពកម្មករ និយោជិតវិស័យទេសចរណ៍ និងសេវាកម្មកម្ពុជា(CTSWF) ជាអ្នកដែលមានសម្ព័ន្ធភាពជាមួយលោក អាត់ ធន់ ប្រធានសហភាពការងារកម្ពុជា(CLC) ៕
សិល្បៈ៖ក្រោយពីជួបរឿងបរាជ័យ ស្នេហាពីរលើកផ្ទួនៗគ្នា តារាចម្រៀង និងសម្តែងរូបស្រស់មេម៉ាយកូនមួយ អ្នកនាង គង់ សូនីតា បានសរសេរបើកចំហជាសាធារណៈនៅលើបណ្តាញ សង្គមហ្វេសប៊ុកផ្ទាល់ខ្លួនថា នាងខ្លាចហើយមនុស្សប្រុស ហើយចាប់ពីពេលនេះទៅ នាងចង់ស្រឡាញ់តែមនុស្សស្រីវិញស្រួលចិត្ត។
អ្នកនាង គង់ សូនីតា ថ្មីៗនេះ បានសរសេរបង្ហោះមានភ្ជាប់រូបថត មួយសន្លឹកនៅលើហ្វេសប៊ុកថា «ចង់បានសង្សារជាមនុស្សស្រី បែបស្រួលចិត្តជាង ព្រោះមនុស្សស្រី ងាយយល់ចិត្តមនុស្សស្រីដូចគ្នា ជាងមនុស្សប្រុស ដែលចេះតែបំផ្លាញទឹកចិត្តមនុស្សស្រី!»។
តាមរយៈការបង្ហោះសារដូច្នេះ បានធ្វើឲ្យទស្សនិកជន អ្នកគាំទ្រនៅលើហ្វេសប៊ុកជាច្រើន មានការភ្ញាក់ផ្អើល និងសរសេរ Comment បែបចំអកលេងសើចឲ្យថា «បើដូចនេះមែន គឺខុសធម្មជាតិហើយ »។
ជាមួយគ្នានេះដែរ ក៏មានអ្នកគាំទ្រខ្លះទៀតសួរនាំថា «តើវាជាការពិតទេ ដែលចង់ស្រឡាញ់ ស្រីដូចគ្នា ឬគ្រាន់តែនិយាយលេងទេ ?» ជាចម្លើយមិនទាន់ត្រូវបានសាមីខ្លួន អ្នកមេម៉ាយចាយរាង គង់ សូនីតា បញ្ជាក់នៅឡើយទេ ចំពោះរឿងនេះ៕
រាជធានីភ្នំពេញ៖តំណាងរាស្ត្រគណបក្សសង្គ្រោះជាតិ មណ្ឌលកំពង់ធំ លោក ជាម ចន្នី បានថ្លែងកាលពីរសៀលម្សិលមិញថា គណបក្សនឹងមិនឲ្យលោក កឹម សុខា ប្រធានស្តីទីគណបក្សចូលបំភ្លឺតុលាការនៅថ្ងៃទី១៤ ខែមិថុនា តាមការកោះហៅនោះទេ ។ ប៉ុន្តែហ្វូងមហាជនគាំទ្រ CNRP រាប់ពាន់នាក់នឹងមកជួបជុំគ្នានៅទីស្នាក់ការកណ្តាលគណបក្សរាជធានីភ្នំពេញ ដើម្បីឃ្លាំមើលស្ថានភាពនយោបាយ សំខាន់ទាក់ទងករណីលោក កឹម សុខា។
លោក ជាម ចន្នី បានលើកឡើងថា មូលហេតុដែលយើងមិនឲ្យលោក កឹម សុខា ចូលបំភ្លឺតុលាការ ព្រោះតែលោក កឹម សុខា មានអភ័យឯកសិទ្ធិតំណាងរាស្ត្រ ហើយតុលាការកំពុងរំលោភបំពានសិទ្ធិអ្នកតំណាងរាស្ត្រ និងរំលោភមាត្រ៨០នៃរដ្ឋធម្មនុញ្ញ នៃព្រះរាជាណាចក្រកម្ពុជា ។ ដូច្នេះបើលោក កឹម សុខា ចូលបំភ្លឺនៅតុលាការនោះគឺមានន័យថា យើងបានរំលោភរដ្ឋធម្មនុញ្ញ មាត្រា៨០ ដែលចែងនូវការការពារអភ័យឯកសិទ្ធិតំណាងរាស្ត្រ។
គួរបញ្ជាក់ថា តុលាការរាជធានីភ្នំពេញ បានចេញដីកាកោះហៅលោក កឹម សុខា ប្រធានស្តីទី CNRP ចូលបំភ្លឺនៅថ្ងៃទី១៤ ខែមិថុនា ឆ្នាំ២០១៦នេះ ដើម្បីសាកសួរអំពីមូលហេតុដែលលោកមិនចូលបំភ្លឺតុលាការ តាមការកោះហៅ កាលពីលើកមុន ៕
ស៊ីដនី៖រដ្ឋាភិបាលអូស្ត្រាលី និងឥណ្ឌូណេស៊ីបានបានព្រមព្រៀងគ្នាក្នុងការពង្រឹងលើកិច្ចសហប្រតិបត្តិការបន្ថែមដើម្បីទប់ស្កាត់អំពើភេរវកម្ម។ នេះបើយោងតាមសារព័ត៌មាន Channel News Asia។
ប្រមុខសន្តិសុខឥណ្ឌូណេស៊ី លោក Luhut Pandjaitan បានបង្ហាញទំនុកចិត្តទៅលើកិច្ចសហប្រតិបត្តិការបន្ថែមជាមួយអូស្ត្រាលីលើការដោះស្រាយបញ្ហាភេរវកម្ម នៅអំឡុងកិច្ចប្រជុំក្រុមប្រឹក្សារដ្ឋមន្ត្រីលើកទីពីរស្ដីពីច្បាប់និងសន្តិសុខនៅទីក្រុងស៊ីដនី។
លោក Luhut និយាយថា លោកជឿជាក់ថាកិច្ចសហប្រតិបត្តិការនេះនឹងល្អប្រសើរថែមទៀតនៅពេលខាងមុខ ហើយប្រទេសទាំងពីរនឹងបន្តចែករំលែកព័ត៌មានចារកម្មនិងជួយគ្នាទៅវិញទៅមកក្នុងការកសាងសមត្ថភាពក្នុងវិស័យមួយចំនួន។
លោក Luhut បាននិយាយថាឥណ្ឌូណេស៊ីបានកំណត់បានថាជនជាតិឥណ្ឌូណេស៊ីប្រហែល៥០០នាក់នៅស៊ីរី ចង់បង្កើតក្រុមភេរវកម្មនៅតំបន់អាស៊ីអាគ្នេយ៍។ ព័ត៌មាននេះត្រូវបានគេចែករំលែកជាមួយអូស្ត្រាលី ហើយលោកជឿជាក់ថាអូស្ត្រាលីអាចដោះស្រាយការគំរាមកំហែងនេះបាន។
គួរបញ្ជាក់ថា កិច្ចប្រជុំនេះគឺជាវេទិកាសម្របសម្រួលកិច្ចសហប្រតិបត្តិការនិងតួនាទីដែលប្រទេសទាំងពីរត្រូវដើរធ្វើទាក់ទងនឹងសន្តិសុខអន្តរជាតិជាពិសេសនៅពេលដោះស្រាយបញ្ហាភេរវកម្ម៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
