ដោយ៖ប្រុញ វិធិន
ក្រចេះ៖ប្រជាកសិករនៅក្នុងស្រុកចិត្របុរី បានអនុវត្តការងារបង្កបង្កើនផលស្រូវរដូវវស្សានៅឆ្នាំនេះ បានទាន់ពេលវេលា ដោយសារភាពអំណោយផលដ៏ល្អប្រសើរនៃកត្តាធម្មជាតិ ដែលមានភ្លៀងធ្លាក់គ្រប់គ្រាន់ និងនៅគ្រប់កន្លែង ។
លោក ហង្ស ចាន់ឌី អភិបាលនៃគណៈអភិបាលស្រុកចិត្របុរី បានឲ្យដឹងថា នៅក្នុងរដូវវស្សាឆ្នាំនេះ ប្រជាពលរដ្ឋនៅក្នុងស្រុកចិត្របុរី បានធ្វើស្រែស្រូវសន្ទូង និងស្រូវពង្រោះ សរុបបានចំនួន ៨៧០០ហិកតា ក្នុងនោះស្រូវពង្រោះបានចំនួន ៨៦៤ហិកតា បើធៀបទៅនឹងការបង្កបង្កើនផលប្រចាំឆ្នាំ គឺឆ្នាំនេះ សម្រេចបាន ១០០ភាគរយ ។ ដោយឡែកបើប្រៀបធៀបទៅនឹងឆ្នាំ២០១៥វិញនោះ ឃើញថាមានការកើនឡើងចំនួន ១៧៤ហិកតា ស្មើនឹង២ភាគរយ ។
ជាមួយគ្នានោះ សត្វគោ ក្របី ដែលជាកម្លាំងអូសទាញដ៏សំខាន់របស់ប្រជាកសិករក្នុងការភ្ជួររ៉ាសធ្វើស្រែចម្ការអស់រយៈពេលជាយូរឆ្នាំកន្លងមកនោះ ។ បច្ចុប្បន្ន គេសង្កេតឃើញថា ត្រូវបានប្រជាពលរដ្ឋធ្វើការផ្លាស់ប្ដូរ ទំនៀមទំលាប់ចាស់ចោលជាបណ្ដើរៗ ដោយងាក់មកប្រើប្រាស់នូវគ្រឿងយន្តកសិកម្ម ដូចជា គោយន្តកន្ត្រៃ ជាដើម ជំនួសសត្វគោ ក្របី ក្នុងការធ្វើស្រែចម្ការ ។
ចំណុចនេះហើយ ដែលឆ្លុះបញ្ចាំងឲ្យឃើញកាន់តែច្បាស់ពីជីវភាពរស់នៅប្រចាំថ្ងៃរបស់ប្រជាពលរដ្ឋ មានភាពធូរធារប្រសើឡើង និងបានឆ្លុះបញ្ចាំងឲ្យឃើញកាន់តែច្បាស់ពីការដឹកនាំដ៏ត្រឹមត្រូវប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្វើប្រទេសជាតិ មានសុខសន្តិភាព និងការអភិវឌ្ឍន៍រីកច្រើនលើគ្រប់វិស័យ ។
លោក ហង្ស ចាន់ឌី បានមានប្រសាសន៍បញ្ជាក់ថា រដូវវស្សាឆ្នាំនេះ គឺពុំមានបញ្ហាប្រឈមសម្រាប់ប្រជាកសិករ ក្នុងការបង្កបង្កើនផលកសិកម្មនោះទេ ដោយសារកត្តាធម្មជាតិឆ្នាំនេះ មានភាពអំណោយផលច្រើនសម្រាប់ការដាំដុះ និងធ្វើស្រែចម្ការបានទាន់រដូវ ។ ដោយឡែក សម្រាប់រដូវវស្សាឆ្នាំមុន គឺប្រជាកសិករ មានបញ្ហាប្រឈមច្រើន ដោយសាររបាយទឹកភ្លៀងធ្លាក់មិនគ្រប់គ្រាន់ និងដោយដុំៗ តាមកន្លែងនីមួយៗ ។
លោក បានបញ្ជាក់បន្ថែមថា ក្រៅពីស្រូវ ដែលជាដំណាំយុទ្ធសាស្ត្រនោះ ក៏នៅមានដំណាំរួមផ្សំជាច្រើនទៀត ដូចជា ដំឡូមី ពោត អំពៅ ល្ង សណ្ដែក ជាដើម ដែលពួកគាត់តែងតែធ្វើចារៀងរាល់ឆ្នាំកន្លងមក ប៉ុន្តែវាមានផលលំបាក នៅក្រោយពេលប្រមូលផលរួច គឺកត្តាទីផ្សារ គឺវាមានភាពមិនអំណោយផលសម្រាប់ប្រជាកសិករនោះទេ ដោយសារការប្រែប្រួសនូវតម្លៃ ។ លោក សង្ឃឹមថា នៅឆ្នាំនេះ តាមរយៈយុទ្ធសាស្ត្ររបស់រាជរដ្ឋាភិបាលកម្ពុជា តម្លៃទីផ្សារដំណាំទាំងនោះ និងមានភាពល្អប្រសើរស្រាប់ពួកគាត់ ។
ស្រុកចិត្របុរី គឺជាស្រុកមួយក្នុងចំណោម ស្រុក៥ និងក្រុង១ ក្នុងខេត្តក្រចេះ ដែលមានឃុំចំនួន១០ ក្នុងនោះមានឃុំចំនួន ៤ នៅជាប់នឹងដងទន្លេមេគង្គ និងឃុំចំនួន ៦ទៀតថ្វីត្បិតមិននៅជាប់នឹងដងទន្លេក៏ពិតមែន តែក៏នៅមានប្រព័ន្ធធារាសាស្ត្រគ្រប់គ្រាន់សម្រាប់ស្រោចស្រពផងដែរ ៕
