ខេត្តរតនគិរី៖ឈើប្រណីតប្រភេទធ្នង់ ពេញ១រថយន្តសាំងយុង ត្រូវបានបង្ក្រាបដោយនគបាលប្រឆាំងបទល្មើសសេដ្ឋកិច្ចស្នងការខេត្ត សហការជាមួយជំនាញរដ្ឋបាលព្រឈើស្រុកវើនសៃនិង កម្លាំងកងរាជអាវធហត្ថស្រុកវើនសៃផងទៀត។
នគរបាលប្រឆាំងបទល្មើសសេដ្ឋកិច្ចខេត្តឲ្យដឹងថា កិច្ចសហការណ៍បង្ក្រាបឈើប្រណិតខុសច្បាប់នេះ គឺបានធ្វើឡើងនៅវេលាម៉ោង៩ និង៤៥នាទីព្រឹក ថ្ងៃទី១៦ ខែមករា ឆ្នាំ២០១៧នេះ។ លោកបានបញ្ជាក់ថា នគរបាលប្រឆាំងបទល្មើសសេដ្ឋកិច្ច កម្លាំងមេព្រៃស្រុកវើនសៃ និងកម្លាំងកងរាជអាវុធហត្ថស្រុកវើនសៃ បានស្ទាក់ចាប់រថយន្តសាំយុង ពាក់ស្លាកលេខ ភ្នំពេញ 2U.1080 ពណ៌សំបកឪឡឹក នៅចំណុចភូមិវង ឃុំកាចូន ស្រុកវើនសៃ ខេត្តរតនគិរី ខណៈពេលដែលមានសេចក្តីរាយការណ៍ថា រថយន្តនោះមានដឹកឈើប្រណីតខុសច្បាប់។
យោងតាមសេចក្ដីរាយការណ៍ពីក្រុមសមត្ថកិច្ចបានឲ្យដឹងថា ខណៈពេលមានការបង្ក្រាប អ្នកបើកបររថយន្ត បានចុះរត់គេចខ្លួន នៅមុនពេលមានការណ៍បង្ក្រាបនោះ ដែលធ្វើអោយសមត្ថកិច្ចបាត់អត្តសញ្ញាណ។ ប៉ុន្តែ បើតាមប្រភពខ្លះនិយាយថា រថយន្ត 2U.1080 នេះ តែងតែរកស៊ីដឹកឈើពីស្រុកវើនសៃទៅវៀតណាមបែបនេះយូរមកហើយ ដែលអ្នកខ្លះបង្ហើបថា ម្ចាស់រថយន្តនេះមានឈ្មោះ ចិត្ត ។
គេកំពុងសង្ស័យថា ឈ្មោះ ចិត្ត ដែលគេមិនស្គាល់អត្តសញ្ញាណនេះ ទំនងមានខ្នងបង្អែក ទើបហ៊ានដឹកឈើប្រណិត ឆ្លងកាត់រដ្ឋបាលស្រុកអូរជុំ ដែលមានលោក ជា កុណារ៉ា ជានាយផ្នែករដ្ឋបាលព្រៃឈើអូរជុំ បានដោយរលូនបែបនេះ។
ព័ត៌មានពីខណ្ឌរដ្ឋបាលព្រៃឈើ បានឲ្យដឹងនៅល្ងាចថ្ងៃទី១៦ ខែមករា នេះថា ឈើដែលបង្ក្រាបនៅក្នុងរថយន្តសាំយុងខាងលើមានចំនួន១២២សន្លឹក ស្មើរនិង ២៧៥៨គីឡូក្រាម ដែលស្មើនឹង២.២០៦៤ ម៉ែត្រត្រីគុណ ជាឈើប្រណិត ប្រភេទធ្នង់សុទ្ធ។
លោក ជា កុណារ៉ា នាយផ្នែករដ្ឋបាលព្រៃឈើអូរជុំ ក្រុមអ្នកយកព័ត៌មានមិនអាចស្វែងរកការបំភ្លឺ ជុំវិញចំណោទថា រថយន្តដឹកឈើនេះ តែងបានដឹកឈើឆ្លងកាត់ក្នុងដែនគ្រងរបស់លោក បានទេនៅល្ងាចថ្ងៃដដែលនេះ៕
