រាជធានីភ្នំពេញ៖បុរសម្នាក់ត្រូវបានសមត្ថកិច្ចឃាត់ខ្លួនក្រោយយកផ្លែឡាមមកអារ.កប្រពន្ធ ព្រោះតែខឹងសុំប្រពន្ធត្រូវរ៉ូវគ្នាវិញមកព្រម។ ហេតុការណ៍នេះកើតឡើងកាលពីវេលាម៉ោង១២រសៀលថ្ងៃទី១៦ ខែមករា ឆ្នាំ២០១៧ ស្ថិតនៅចំណុចផ្ទះលេខ៤១អា ផ្លូវលេខ៤១០ សង្កាត់បឹងត្របែក ខណ្ឌចំណការមន រាជធានីភ្នំពេញ។
ស្ត្រីជាប្រពន្ធមានឈ្មោះ ស៊ូ សោភា អាយុ៤០ឆ្នាំ មុខរបរធ្វើការតាមផ្ទះ ចំណែកឯបុរសជាប្តីមានឈ្មោះ បូ សម្បត្តិ អាយុ៤២ឆ្នាំ មុខរបរកម្មកសំណង់ ហើយអ្នកទាំង២បានលែងលះគ្នាជាង២ខែមកហើយ។
ប្រភពព័ត៌មានបានឲ្យដឹងថា មុនពេលកើតហេតុគេឃើញស្ត្រីរងគ្រោះមកធ្វើតាមផ្ទះរបស់គេដូចសព្វដង លុះដល់វេលាកើតហេតុស្ត្រីរងគ្រោះបានបើកផ្ទះ ដើម្បីឲ្យកូនម្ចាស់ផ្ទះចូល ស្រាប់តែបុរសជាប្តីបានស្ទុះមកកៀកស្ត្រីរងគ្រោះ ហើយយកផ្លែឡាមមកបំរុងអារ.កសម្លាប់ តែស្ត្រីរងគ្រោះគេចទាន់ក៏ បណ្តាលឲ្យរបួសត្រចៀក និងដៃតែម្តង។ ភ្លាមៗនោះស្ត្រីរងគ្រោះបានស្រែកឆោឡោធ្វើឲ្យភ្ញាក់ផ្អើលដល់សមត្ថកិច្ច ចុះមកឃាត់ខ្លួនជនសង្ស័យបានភ្លាមៗតែម្តង។
បុរសជាប្តីបានសារភាពថា ខ្លួនយកផ្លែឡាមមកអារ.កប្រពន្ធបែបនេះ ព្រោះខឹងសុំប្រពន្ធត្រូវគ្នាវិញមិនព្រម ទើបធ្វើបែបនេះតែម្តង។ បច្ចុប្បន្នជនសង្ស័យត្រូវបានសមត្ថកិច្ចធ្វើការឃាត់ខ្លួនបណ្តោះអាសន្ន និងកសាងសំណុំរឿងបញ្ចូនទៅកាន់តុលាការ៕
