ភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា នឹងបង្កើតឲ្យមានរបបសន្តិសុខសង្គម ផ្នែកនិកម្មភាពថ្មីមួយបន្ថែមទៀត ដើម្បីការពារ ដល់កម្មករ និយោជិត ដែលរងគ្រោះដោយសារ ម្ចាស់ក្រុមហ៊ុន ឬ ថៅកែរោងចក្រ បិទទ្វារ និងរត់ចោលរោងចក្រ។
ក្រោយពិធីបិទសន្និបាត បូកសរុបលទ្ធផល ការងារឆ្នាំ២០១៧ និង ទិសដៅការងារឆ្នាំ២០១៨ កាលពីរសៀលថ្ងៃទី១៣ ខែមីនា កន្លងទៅនេះ ឯកឧត្តម បណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានបញ្ជាក់ប្រាប់អ្នកសារព័តមានថា របបសន្តិសុខសង្គម ផ្នែកនិកម្មភាព គឺសម្រាប់ឲ្យសហគ្រាស និងគ្រឹះស្ថានទាំងអស់ ត្រូវមានកាតព្វកិច្ចបង់ភាគទាន ទៅក្នុងបេឡាជាតិ របបសន្តិសុខសង្គម (ប.ស.ស) ដើម្បីទប់ស្កាត់ហានិភ័យជាយថាហេតុណាមួយកើតឡើង ដោយបេឡាជាតិ របបសន្តិសុខសង្គម អាចនឹងទូទាត់លទ្ធភាព ជំនួសដល់បងប្អូនកម្មករ ពោលគឺ គ្រប់វិធានការណ៍ទាំងអស់ ដែលរៀបចំ ឡើង ដើម្បីធានានូវសុវត្ថិភាព ជូនដល់កម្មក និយោជិត កុំឲ្យមានការព្រួយបារម្មណ៍ និងមានកង្វល់តទៅទៀត។
លោក បណ្ឌិត អ៊ិត សំហេង បានបញ្ជាក់ឲ្យដឹងថា បន្ទាប់ទទួលបានអនុសាសន៍ របស់ប្រមុខរាជរដ្ឋាភិបាល ពីការទូទាត់ប្រាក់សំណងជូនដល់កម្មករ និយោជិត ដែលជួបបញ្ហារោងចក្រដួលរលំ (ម្ចាស់ក្រុមហ៊ុនឬថៅកែរោងចក្របិទទ្វារ និងរត់ចោល ក្រុមការងារដែលពាក់ព័ន្ធ បានចុះទៅតាមរោងចក្រទាំងអស់នោះ ដើម្បីរៀបចំផ្ទៀងផ្ទាត់ឡើងវិញ នូវប្រាក់ឈ្នួល និងប្រាក់អត្ថប្រយោជន៍នានា ដែលកម្មករនិយោជិត ត្រូវទទួលបាន ហើយនឹងពិនិត្យមើលលទ្ធភាព នៃការរឹបយក នៃសម្ភារៈ ឬ ទ្រព្យសម្បត្តិ ម្ចាស់ក្រុមហ៊ុន (ថៅកែ) បោះបង់ចោលនិង សេសសល់ ថាអាចទូទាត់សងទៅថវិការដ្ឋវិញយ៉ាងម៉េច។
លោក បណ្ឌិត រដ្ឋមន្ត្រីបានបញ្ជាក់ទៀតថា ចំពោះការទូទាត់ជាបណ្តើរៗនេះ មិនប៉ះពាល់ដល់អតីតភាពការងាររបស់បងប្អូនកម្មករ និយោជិតនោះទេ គឺនៅតែមានសម្រាប់ សោធននិវត្តន៍ ប៉ុន្តែការធ្វើបែបនេះ ដើម្បីបង្កើនជំនឿចិត្ត រវាង កម្មករនិយោជិត និងនិយោជក ដែលកំពុងបំរើការងារជាមួយ កុំឱ្យវាធ្ងន់ទៅលើភាគីម្ខាងៗ ហើយវិធីនេះ មានករណីរោងចក្រខ្លះបានធ្វើ។
គួររម្លឹកថា រោងចក្រចំនួន៩ដែលបានបិទទ្វារនាពេលកន្លងមក ក្នុងនោះនៅខេត្តកណ្តាលចំនួន០១ ខេត្តកំពង់ស្ពឺចំនួន០៣ និងរាជធានីភ្នំពេញចំនួន០៥ ហើយរាជរដ្ឋាភិបាលបានបញ្ចេញហិរញ្ញប្បទានពិសេស សរុបចំនួនជាង៤លាន៥សែនដុល្លារអាមេរិក ដើម្បីទូទាត់ប្រាក់ឈ្នួល និងប្រាក់អត្ថប្រយោជន៍ជូនកម្មករ និយោជិត ចំនួន៤.១៤៦នាក់៕
