ចាប់ចោរ​មុខសញ្ញា​ចាស់​នៅ​ផ្សារ​ថ្មី​ចេញ​ឆក់​កាបូប​ជនបរទេស​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 20 March, 2018 ក+ ក-

ភ្នំពេញ ៖ ជនសង្ស័យ​ម្នាក់ បាន​ប្រជាពលរដ្ឋ​នាំគ្នា​ដេញចាប់បាន រួច​ព្រួត​វាយ​ឡើង​ទ្រមខ្លួន​បែក​ឈាម​ពេញ​ខ្លួន ទើប​ប្រគល់​ឲ្យ​សមត្ថកិច្ច កាលពី​វេលា​ម៉ោង​៨ និង​១៥​នាទី​យប់ ថ្ងៃទី​១៩ មីនា ឆ្នាំ​២០១៨ នៅ​ចំណុច​នៅក្បែ​ផ្សារ​ថ្មី តាម​បណ្ដោយ​ផ្លូវ​៥៣ កែង​និង​ផ្លូវ​១២៦ ស្ថិតក្នុង​សង្កាត់​ផ្សារ​ថ្មី​១ ខណ្ឌដូនពេញ ក្រោយពី​ជនសង្ស័យ​រូបនេះ ធ្វើ​សកម្មភាព​ឆក់​កាបូប​ពី​ប្ដី​ប្រពន្ធ​ជា​ជនជាតិ​បរទេស​បានសម្រេច ។​

ជនសង្ស័យ​ខាងលើ​ដែល​ប្រជាពលរដ្ឋ​ចាប់បាន​ព្រួត​គ្នា​វាយ​ឡើង​ទ្រមខ្លួន​នោះ មានឈ្មោះ ទូច ចាន់ថា ភេទ​ប្រុស អាយុ​៣០​ឆ្នាំ មុខរបរ​ដឹក​ប្រពន្ធ​លក់​ត្រី ស្នាក់​នៅផ្ទះ​លេខ​១៨ ផ្លូវ​លេខ​៥៣ សង្កាត់​ផ្សារ​ថ្មី​១ ខណ្ឌដូនពេញ ។​

យោងតាម​ប្រភពព័ត៌មាន​ពី​ប្រជាពលរដ្ឋ​បាន​ឲ្យ​ដឹងថា មុនពេល​កើតហេតុ គេ​ឃើញ​ជនសង្ស័យ​ខាងលើ​បាន​ជិះ​ម៉ូតូ​មួយគ្រឿង​ម៉ាក ស្មា​ក់វី ពណ៌​ខ្មៅ ពាក់​ស្លាក​លេខ ភ្នំពេញ 1BB -4126 តែម្នាក់ឯង បានធ្វើ​សកម្មភាព​ឆក់​កាបូប​ពី​ស្ត្រី​ម្នាក់​ដើរ​ជាមួយ​ប្ដី ដែល​ជនរងគ្រោះ​ជា​ជនជាតិ​បរទេស បានសម្រេច​នៅតាម​ដងផ្លូវ​ព្រះ​ន​រោ​ត្ដម ក្បែរ​រោងកុន​លុច ។ ភ្លាមនោះ ប្រជាពលរដ្ឋ​ដែល​ឃើញ​សកម្មភាព​ជាក់ស្ដែង​បែបនេះ ក៏​ស្រែកថា ចោរៗ​ៗ ទើប​បង្ក​ការភ្ញាក់ផ្អើល​ដល់​ប្រជាពលរដ្ឋ​ជាច្រើន​នាំគ្នា​ជិះ​ម៉ូតូ​ដេញតាម ហើយ​ជនសង្ស័យ​ភ័យ​ស្លន់ស្លោ បាន​ជិះ​ម៉ូតូ​ព្យាយាម​គេចខ្លួន​រហូត​ទៅដល់​ចំណុចកើតហេតុ​ខាងលើ ក៏ត្រូវ​បាន​ប្រពល​រដ្ឋ​ព័ទ្ធ​ចាប់បាន និង​ព្រួត​គ្នា​វាយ​ឡើង​បែក​មុខ​បែក​មាត់ ហូរឈាម​ជោក​ខ្លួន ទើប​សមត្ថកិច្ច​មូលដ្ឋាន​ចុះទៅ​ដល់ ដាក់​ខ្នោះ​ជនសង្ស័យ និង​នាំយក​ម៉ូតូ​ដែល​ធ្វើ​សកម្មភាព ព្រមទាំង​វត្ថុតាង និង​ជនរងគ្រោះ យកមក​ប៉ុស្ដិ៍នគរបាល​រដ្ឋបាល​ផ្សារ​ថ្មី​១ ។​

បន្ទាប់​ក្រោយមក សមត្ថកិច្ច​បាន​ពិនិត្យមើល​វត្ថុតាង​(​កាបូប​ជនរងគ្រោះ​)​ពុំមាន​បាត់បង់​ទ្រព្យសម្បត្តិ​អ្វី​ក្នុង​កាបូប​នោះឡើយ ទើប​សមត្ថកិច្ច​ធ្វើឯកសារ​ប្រគល់​វត្ថុតាង​ឲ្យ​ទៅ​ជនរងគ្រោះ​វិញ ។ ដោយឡែក​ជនសង្ស័យ​ខាងលើ រួម​និង​ម៉ូតូ​ដែល​ជិះ​ធ្វើ​សកម្មភាព ត្រូវបាន​សមត្ថកិច្ច​ធ្វើឯកសារ និង​កសាង​សា​ណុំ​រឿង​ប​ញ្ចូ​ន​បន្តទៅ​អធិការដ្ឋាន​នគរបាល​ខណ្ឌដូនពេញ ដើម្បី​ចាត់ការ​បន្ត​តាមផ្លូវ​ច្បាប់ ។​

សូម​បញ្ចាក់​ផងដែរ​ថា ជនសង្ស័យ​ខាងលើ ត្រូវបាន​ប្រជាពលរដ្ឋ​បង្ហើប​ប្រាប់ថា ជា​មុខសញ្ញា​យ៉ាងសកម្ម ខាង​ជិះ​ម៉ូតូ​ឆក់ លួច​គាស់​ផ្ទះ​ប្រជាពលរដ្ឋ និង​លួច​ទ្រព្យសម្បត្តិ​ប្រជាពលរដ្ឋ​ផ្សែងៗ​ជាច្រើន​ទៀត ហើយ​ជនសង្ស័យ​រូបនេះ ធ្លាប់​ជាប់ពន្ធ​ធានា​គា​២​ដង​មកហើយ ៕​