កំពង់ស្ពឺ ៖ ស្នងការដ្ឋាននគរបាល ខេត្ដកំពង់ស្ពឺ សូមធ្វើការប្រកាសជូនដំណឹងដល់សាធារណៈជន ទាំងអស់ដែលបានបាត់ម៉ូតូនាពេលកន្លងមក មិនថានៅទីកន្លែងណា ខេត្ដណាទេ សូមអញ្ញើញពិនិត្យភិនភាគតាមលក្ខណៈសម្គាល់ នៃប្រភេទម៉ូតូរបស់អស់លោក លោកស្រី ដែលក្រុមការងារបានផ្សព្វផ្សាយតាមបណ្ដាញសារព័ត៌មាននានា ស្នងការដ្ឋាននគរបាលខេត្ដកំពង់ស្ពឺ ជូនខាងលើ។
សូមបញ្ជាក់ថាក្រោយប្រតិបត្ដិការ បង្ក្រាបមុខសញ្ញាទទួលផលចោរកម្ម និងទីតាំងកែច្នៃម៉ូតូមិនប្រក្រតី មួយកន្លែង នៅស្រុកគងពិសី កាលពីថ្ងៃសុក្រទី២៣ ខែមីនា ឆ្នាំ២០១៨ ដោយកម្លាំងការិយាល័យជំនាញព្រហ្មទណ្ឌខេត្ដ និងកម្លាំងអធិការដ្ឋាននគរបាលស្រុកគងពិសី ប្រតិបត្តិការស្រាវជ្រាវ និងបង្ក្រាបជាលទ្ធផលរកឃើញម៉ូតូ ចំនួន ០៨ គ្រឿង ដែលមិនមានឯកសារត្រឹមត្រូវ លក្ខណៈកែច្នៃខុសប្រក្រតី ពីទម្រង់ដើមរបស់ម៉ូតូ។
សូមជូនភ្ជាប់តារាងបញ្ជីប្រភេទម៉ូតូ និងរូបភាពម៉ូតូដែលដកហូត បានចំនួន ០៨ គ្រឿង ករណីពិនិត្យឃើញថាម៉ូតូខាងលើមានលក្ខណៈសង្ស័យ ថាជាកម្មសិទ្ធិរបស់លោកអ្នក ដែលបានបាត់ដោយមូលហេតុផ្សេងៗ សូមអញ្ញើញមកធ្វើការទំនាក់ទំនងជាមួយក្រុមការងាររបស់ស្នងការដ្ឋាន នគរបាលខេត្ដ (ការិយាល័យព្រហ្មទណ្ឌកំរិតស្រាលនៃស្នងការ ដ្ឋាននគរបាលខេត្ដកំពង់ស្ពឺ)គ្រប់ពេល ម៉ោងធ្វើការ៕
