ខេត្តត្បូងឃ្មុំ ៖ ស្នូរអាវុធបានផ្ទុះ១គ្រាប់នៅត្រង់ចំណុចភូមិអូរព្រិច ឃុំកក់ ស្រុកពញាក្រែក ខេត្តត្បូងឃ្មុំ បានបង្កឲ្យមានគ្រោះថ្នាក់ចរាចរណ៍ដោយរថយន្តចំនួន៣គ្រឿងបានបុកបន្តគ្នាបណ្តាលឲ្យស្លាប់មនុស្សចំនួន៣នាក់ និងរបួស៤នាក់។
ហេតុការណ៍នេះ បានកើតឡើងនៅវេលាម៉ោង៦ និង១៥នាទី ព្រឹកថ្ងៃទី៣០ ខែមីនា ឆ្នាំ២០១៨ បណ្តាលឲ្យស្លាប់មនុស្សចំនួន៣នាក់ និងរបួស៤នាក់ ត្រូវបានគេបញ្ជូនទៅសង្គ្រោះនៅមន្ទីរពេទ្យ ។
បន្ទាប់ពីបានស៊ើបសួរនៅកន្លែងកើតហេតុ លោកឧត្តមសេនីយ៏ត្រី ឈឹម គឹមហុង ស្នងការរង នគរបាលខេត្តទទួលផែនសណ្តាប់ធ្នាប់បានបញ្ជាក់ថា រថយន្តសាំងយ៉ុង១គ្រឿង មានដឹកឈើអារបន្ទះ ហើយមិនបានបង់លុយឲ្យអង្គភាពមួយ ហើយក៏មានរថយន្ត១គ្រឿង បានបើកប្រដេញរថយន្តដឹកឈើ តាមពីខាងក្រោយ ព្រមទាំងបាញ់១គ្រាប់ គ្រានោះក៏ស្រាប់បង្កឲ្យកើតមានគ្រោះថ្នាក់ចរាចរណ៍ ដោយ សារមានរថយន្តដឹកលាមកគោមួយគ្រឿងទៅបុករថយន្តដឹកឈើនោះ និងបានបុករះបន្តទៅរថយន្ត ដឹកពងទារមួយគ្រឿងទៀតបណ្តាលឲ្យក្រឡាប់ធ្លាក់ចេញពីផ្លូវថ្នល់ជាតិលេខ៨ តែម្តង ។
លោកស្នងការរងនគរបាលខេត្តរូបនេះបន្តថា រថយន្តម៉ាកសាំងយ៉ុងពណ៌ ស ដឹកឈើមិន មាន ពាក់ស្លាកលេខ បើកបរដោយឈ្មោះ ណន ម៉ោង ភេទប្រុសអាយុ៤២ឆ្នាំ នៅភូមិស្លា ឃុំទន្លូង ស្រុក មេមត់ (របួសធ្ងន់ ) ដោយមានអ្នករួមដំណើរ២នាក់ទៀត ក្នុងនោះ ១-ឈ្មោះ ពេជ្រ ភារុណ ភេទប្រុស អាយុ៣៨ឆ្នាំ (ស្លាប់នៅកន្លែងកើតហេតុ ) ២-ឈ្មោះ វ៉េត ឌីក ភេទប្រុស អាយុ២៣ឆ្នាំ នៅភូមិឃុំជា មួយ គ្នា រងរបស់ធ្ងន់ និងបានបង្កជាមួយ នឹងរថយន្តទីតាន់ពណ៌សពាក់ ស្លាកលេខភ្នំពេញ 2M-2984 បើកបរដោយឈ្មោះ ឪក លន់ ភេទប្រុស អាយុ៤៤ឆ្នាំ នៅភូមិសេរីសុខា ឃុំក្រែក ស្រុកពញា ក្រែក ខេត្តត្បូងឃ្មុំ (របួសធ្ងន់ ) មានដឹកមនុស្ស០២នាក់ មាន ១-ឈ្មោះ សុត សម្បត្តិ ភេទប្រុស អាយុ ៣២ឆ្នាំ(របួសស្រាល ) ២-ឈ្មោះ ឡាញ់ តុល ភេទប្រុស អាយុ២៧ឆ្នាំ នៅភូមិឃុំជាមួយគ្នា ។
រថយន្ត នេះ បានទៅបុកជាមួយនឹងរថយន្តសាំងយ៉ុងពណ៌លឿង ពាក់ស្លាកលេខភ្នំពេញ 2Z-9856 បើកបរ ដោយឈ្មោះ ឆាយ ចន្ថា ភេទប្រុស អាយុ៣២ឆ្នាំ នៅភូមិព្រៃខ្លា ឃុំព្រៃខ្លា ស្រុកស្វាយ អន្ទរ ខេត្តព្រៃវែង (ស្លាប់កន្លែងកើតហេតុ ) រួមជាមួយនិងអ្នកជិះ២នាក់ទៀត មាន១-ឈ្មោះ ណាក់ រ័ត្ន ភេទប្រុស អាយុ ១៨ឆ្នាំ (ស្លាប់កន្លែងកើតហេតុ ) ២-ឈ្មោះ ឈុំ ឆុន ភេទស្រី អាយុ៣៣ឆ្នាំ (របួសធ្ងន់ )។
ករណីនេះ ត្រូវបានលោកឧត្តមសេនីយ៏ទោ បែន រ័ត្ន ស្នងការនគរបាលខេត្ត បានចាត់ឲ្យមន្ត្រី ជំនាញចុះស្រាវជ្រាវរកមុខអ្នកបាញ់បោះ ដែលជាដើមចមបង្កឲ្យមានគ្រោះថ្នាក់មានមនុស្សស្លាប់ ចំណែក វត្ថុតាងរួមមានរថយន្តទាំង៣គ្រឿងត្រូវបានស្ទូចរក្សាទុកដាក់នៅបរិវេណប៉ុស្តិ៍រដ្ឋបាលកក់ ជាបណ្តោះអាសន្នរង់ចាំចាត់ការបន្តតាមនីតិវិធីជាក្រោយទៀត៕
