ភ្នំពេញ ៖ នៅត្រីមាសទី១ ឆ្នាំ២០១៨ នេះ ចំនួនគ្រោះថ្នាក់ចរាចរណ៍ និងចំនួនអ្នកស្លាប់ និងរបួស ដោយសារគ្រោះថ្នាក់ចរាចរណ៍ មានការថយចុះប្រមាណតែ១៧ % ប៉ុណ្ណោះ ។ នេះបើយោងតាម របាយការណ៍របស់នាយកដ្ឋានចរាចរណ៍ និងសណ្តាប់ធ្នាប់សាធារណនៃអគ្គស្នងការដ្ឋាននគរបាល ជាតិ។
របាយការណ៍ដដែលនេះបានបញ្ជាក់ថា ចាប់ពីខែមករាដល់ ខែមីនា ឆ្នាំ២០១៨ នេះ គ្រោះ ថ្នាក់ចរាចរណ៍នៅទូទាំងប្រទេសកម្ពុជា បានកើតឡើងចំនួន៨១៩លើក ថយចុះ១៧% បើធៀបនឹងរយៈពេលដូចគ្នា កាលពីឆ្នាំ២០១៧ ដែលមានរហូតទៅ ដល់ ៩៨៩លើក។
ក្នុងចំនួន៨១៩លើកនៃគ្រោះថ្នាក់ចរាចរណ៍នេះ បណ្តាលឲ្យមានអ្នកស្លាប់ ចំនួន៤៨០នាក់ ថយចុះចំនួន២% បើប្រៀបធៀបនឹងរយៈពេលដូចគ្នា កាលពីឆ្នាំ ២០១៧ ដែលអ្នកស្លាប់មាន រហូតទៅដល់៤៩២នាក់។
ដោយឡែក ចំពោះអ្នករបួសវិញ មានចំនួន១.២៣៤នាក់ ថយចុះចំនួន១៦% បើប្រៀបធៀប រយៈពេលដូចគ្នាកាលពីឆ្នាំ២០១៧ មានរហូតទៅដល់ ១.៤៦៨នាក់។
សូមជម្រាបថា គ្រោះថ្នាក់ចរាចរណ៍ទូទាំងប្រទេសកម្ពុជា រយៈពេល ពេញ១ឆ្នាំ ២០១៧ បានកើតឡើងចំនួន ៣.៥៣១លើក ហើយបើធៀបទៅនឹងឆ្នាំ២០១៦ មានការថយចុះចំនួន ១៦៩ ករណី បណ្តាលឲ្យមានមនុស្សស្លាប់ចំនួន១.៧៨០នាក់ កើនឡើង៦៣នាក់ និងអ្នករបួសចំនួន ៥.៥៣៩នាក់ ថយចុះចំនួន១.០៦៨នាក់ បើប្រៀបធៀបទៅនឹងឆ្នាំ២០១៦៕
