ឧត្តរមានជ័យ ៖ មនុស្សមួយគ្រួសារមានឪពុកម្តាយរួមនឹងកូនតូចប្រុសស្រីសរុបចំនួន ៤នាក់ បានស្លាប់នៅនឹងកន្លែងកើតហេតុក្នុងករណីគ្រោះថ្នាក់ចរាចរណ៍មួយរវាងរថយន្តកាមរីបាឡែនបុកជាមួយម៉ូតូ កាលពីវេលាម៉ោង ១រសៀល ថ្ងៃទី១៤ ខែឧសភា ឆ្នាំ២០១៨ ស្ថិតនៅត្រង់ចំណុចផ្លូវកោងគល់ស្ពានកណ្តែក ក្នុងភូមិកណ្តែក សង្កាត់សំរោង ក្រុងសំរោង ខេត្តឧត្តរមានជ័យ។
ជនរងគ្រោះដែលស្លាប់ចំនួន ៤នាក់ ដោយគេសន្និដ្ឋានថា មួយគ្រួសារ រួមមានបុរសម្នាក់ និងស្ត្រីម្នាក់ ជាប្តីប្រពន្ធ ចំណែកក្មេងប្រុសស្រី២នាក់ទៀតកូនបង្កើត ដែលពុំស្គាល់អត្តសញ្ញាណនោះទេ ដោយជិះម៉ូតូម៉ាកហុងដាឌ្រីមពណ៌ខ្មៅ សេរីឆ្នាំ២០១៨ ពាក់ស្លាក់លេខឧត្តរមានជ័យ ១D ៥២០២ ចំណែកភាគីអ្នកបើកបររថយន្តកាមរីបាឡែន ពណ៌ខ្មៅពាក់ស្លាក់លេខ ភ្នំពេញ ២K ៦៤៦២ អ្នកបើកបរត្រូវបានសមត្ថកិច្ចឃាត់ខ្លួនបញ្ជូនទៅស្នងការនគរបាលខេត្តឧត្តរមានជ័យ បន្ទាប់ពីកើតហេតុ។
ប្រភពនៅកន្លែងកើតហេតុបានអោយដឹងថា នៅមុនពេលកើតហេតុ គេឃើញរថយន្តកាមរីបាឡែន បានបើកក្នុងល្បឿនលឿនក្នុងគោលដៅពីជើងទៅត្បូងលុះមកដល់ផ្លូវកោងគល់ស្ពាន ជាកន្លែងកើតហេតុខាងលើ ក៏បានជ្រុលចូលផ្លូវខាងឆ្វេងដៃដែលជាចំណែកផ្លូវម្ខាងទៀត ក៏បុកជាមួយម៉ូតូហុងដាឌ្រីមដែលជនរងគ្រោះ ជាឪពុកដឹកម្តាយ និងកូនប្រុសស្រីសរុបចំនួន៤នាក់ បណ្តាលអោយប៉ើងធ្លាក់ពីលើផ្លូវខ្ទាតជាច្រើនម៉ែត្រពីកន្លែងកើតហេតុ និងបានស្លាប់ភ្លាមៗទាំងអស់គ្នាតែម្តង។
ប្រភពខាងលើបន្តថា ភ្លាមៗនោះ ជនរងគ្រោះមួយគ្រួសារនេះ មិនមានអ្នកណាម្នាក់ស្គាល់អត្តសញ្ញាណ ឬអាសយដ្ឋានជនរងគ្រោះនៅឡើយទេ សមត្ថកិច្ចបន្តធ្វើការស្រាវជ្រាវអាសយដ្ឋាន ចំណែកម្ចាស់រថយន្តបង្កបានសមត្ថឃាត់ខ្លួនភ្លាមៗយកមកស្នងការដ្ឋាននគរបាលខេត្តឧត្តរមានជ័យ បណ្តោះអាសន្នរងចាំការដោះស្រាយ៕
