មុខរបរ​បណ្ដុះ​ផ្សិត​អំបោះ​លក់​របស់​អ្នកភូមិ​កំពង់​ឆ្លង​ ​រក​ចំណូល​ខ្ទង់ពាន់​ដុល្លារ ក្នុង​មួយឆ្នាំៗ​
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 17 May, 2018 ក+ ក-

​បាត់ដំបង : ប្រជាពលរដ្ឋ​មួយចំនួន​
​រស់នៅ​ភូមិ​កំពង់ចម្លង ឃុំ​ឈើទាល ស្រុក​បាណន់ ខេត្តបាត់ដំបង​
​ដែល​ប្រកប​របរ​បណ្ដុះ​ផ្សិត​អំបោះ​លក់ បានទទួល​ចំណូល​ក្នុង​ខ្ទង់ពាន់​ដុល្លារ​អាមេរិក​
​ក្នុង​មួយឆ្នាំៗ ហើយ​បានធ្វើ​ឲ្យ​ជីវភាព​គ្រួសារ​របស់​ពួកគាត់​កាន់តែ​សមរម្យ មិនបាន​ចំណាកស្រុក​ទៅធ្វើ​ការ​នៅ​ទី​ឆ្ងាយៗ​
​។​
លោក ពូន វីរៈ រស់នៅ​ភូមិ​កំពង់ចម្លង ឃុំ​ឈើទាល បាន​ប្រាប់​សា​ព័ត​មាន​មេគង្គ​ប៉ុស្តិ៍​អោយដឹង ថា​៖ គ្រួសារ​របស់គាត់​បាន​ចាប់ផ្ដើម​បណ្ដុះ​ផ្សិត​នេះ​
​ទើបបាន​រយៈពេល​២​ឆ្នាំ តែមាន​អ្នកភូមិ​ខ្លះ​បាន​ប្រកប​របរ​នេះ​ច្រើន​ឆ្នាំ​ហើយ ចំពោះ​ការបណ្ដុះ​វិញ​មិនសូវ​វិបាក​
​ឬ​ជួប​ឧបសគ្គ​ច្រើន​នោះទេ ហើយ​សម្រាប់​គ្រឿងផ្សំ​បណ្ដុះ​ផ្សិត​នេះ​ឲ្យ​ចេញ​បាន មានដូចជា កន្ទក់​
​អង្ករដំណើប ម្សៅពោត កំបោ និង​ស្នូលពោត ។​

លោក​បាន​បន្តថា មុននឹង​ឲ្យ​ផល ត្រូវយក​គ្រឿងផ្សំ​ទាំងអស់​លាយ​គ្នា ហើយ​យកទៅ​ចំហុយ​
​រួច​ផ្អាប់​ទុក​រយៈពេល​មួយខែ​ល្មម​អាច​ផុត​ហើយ ទើប​ដាក់​មេ​ច្រក​បាន ២០ ទៅ​២៥​ថ្ងៃ នឹង​ឲ្យ​ផល​
​ហើយ​ការប្រមូល​ផល​នេះ​បាន​រហូតដល់ ៧ ទៅ​៨​ខែ ទើប​ចាប់ផ្ដើម​លាយ​គ្រឿងផ្សំ​ផ្អាប់​សារជាថ្មី ។​

លោក វីរៈ បាន​បន្ថែមថា គ្រួសារ​លោក​បានដាក់​ផ្សិត​បណ្ដុះ​ប្រមាណ​
១២០០០​កំ​ប៉ុ​ស ចំនួន​ប៉ុណ្ណេះ​បើ​អាកាសធាតុ​ល្អ អាច​ដុះ​ដក់​លក់បាន​ក្នុង​មួយថ្ងៃ​ជាង​
១០០​គីឡូក្រាម តែ​ជា​មធ្យម​ដក់​បានត្រឹមតែ ៥០ ទៅ​៦០​គីឡូក្រាម ។​

អ្នកស្រី ផុន ផល្លា បាន​លើកឡើងថា បច្ចុប្បន្ន​ផ្សិត​តម្លៃ ៣០០០
​ទៅ​៤០០០​រៀល ឡើង​ចុះ​មិន​ទៀង តែ​ធ្លា​ក់ទាប​បំផុត​ដល់ ១០០០​រៀល​
​តែ​តម្លៃ​នេះ​មិន​ងាយ​ធ្លាក់​ដល់​ហ្នឹង​ទេ ហើយ​ពេល​ប្រមូលបាន​
​មាន​ម៉ូ​យមក​ទិញ​ដល់ផ្ទះ​អស់ៗ​មិនដែល​មាន​សល់​នោះទេ ។​

អ្នកស្រី បាន​បន្តថា បើ​យើង​បាន​បណ្ដុះ​ត្រឹម ១២០០០​កំ​ប៉ុ​ស​នេះ​
​ក្នុង​មួយខែៗ អាច​លក់បាន​ចាប់ពី ១​លាន ទៅ​២​លាន​រៀល ហើយ​ចាប់តាំងពី​ប្រកប​របរ​បណ្ដុះ​ផ្សិត​អំបោះ​មក​
​គ្រួសារ​របស់​អ្នកស្រី មាន​ជីវភាព​ធូរធារ​គ្រាន់បើ ។​

គួរ​បញ្ជាក់ថា បើ​ធ្វើដំណើរ​ពី​ខេត្តបាត់ដំបង ឆ្ពោះទៅ​ប្រាសាទ​បាណន់​
​គឺ​ត្រូវ​ឆ្លងកាត់​ភូមិ​កំពង់ចម្លង​នេះដែរ ក្រៅពី​បណ្ដុះ​ផ្សិត​អំបោះ​លក់​
​ប្រជាពលរដ្ឋ​ក្នុងភូមិ​មាន​អ្នកខ្លះ​ធ្វើស្រែ ដាំ​ស្វាយ បណ្ដុះ​កូនឈើ​លក់​
​ឬ​ដាំ​ដំណាំ​វិលជុំ​ជាច្រើន​មុខ​ទៀត ៕ សុផល​