ខេត្តកំពង់ចាម ៖ គ្រោះធម្មជាតិបង្ករដោយខ្យល់កន្ត្រាក់កាលពីរសៀលថ្ងៃទី២៦ ខែឧសភា ឆ្នាំ២០១៨ បានធ្វើអោយលំនៅដ្ឋានរបស់់ប្រជាពលរដ្ឋចំនួន៤៩៦ខ្នងនៅស្រុកបាធាយ ខេត្តកំពង់ចាម បានរលំនិងជនរងគ្រោះមួយចំនួនបានរងរបួស ទាំងធ្ងន់ទាំងស្រាល។
លោក សំ ណាល់ អធិការ នគរបាល ស្រុកបាធាយ បានអោយដឹងថា នៅព្រឹកថ្ងៃទី២៧ ខែឧសភា ឆ្នាំ២០១៨ លោក នាយឧត្តមសេនីយ៍ សន្តិបណ្ឌិតអគ្គស្នងការ នគរបាលជាតិ និងលោក កួច ចំរើន អភិបាល នៃគណៈអភិបាលខេត្តកំពង់ចាម ព្រមទាំងលោកឧត្តមសេនីយ៍ទោ ឯម កុសល ស្នងការនគរបាលខេត្ត ចាត់តាំង និងដឹកនាំកម្លាំងផ្ទាល់សរុបចំនួន២០៤នាក់ក្នុងនោះមាន (កម្លាំងនគរបាលអន្តរាគមន៍ ខេត្ត ចំំនួន ៨០នាក់, ស្រុកបាធាយ ៧៤នាក់,ស្រុកជើងព្រៃចំនួន៣០នាក់ និងស្រុកព្រៃឈរចំនួន ២០នាក់) បានចុះទៅកន្លែងកើតហេតុជួយរុះរើ-ជួសជុល និងសាងសង់ផ្ទះជំរក បណ្តោះអាសន្នជូនដល់ប្រជាពលរដ្ឋនៅឃុំសណ្តែក និងឃុំត្រប់ ក្នុងស្រុកបាធាយ ដែលជួបគ្រោះមហន្តរាយ ខ្យល់កន្ត្រាក់ ដែលបណ្តាលអោយខូចខាតផ្ទះសម្បែង សរុបចំនួន ៤៩៦ខ្នង (ធ្ងន់ ៣១ខ្នង)។
ក្នុងនោះ នៅឃុំសណ្តែកមានចំនួន ៣៨៥ខ្នង (ធ្ងន់ ២០ខ្នង របួសមនុស្ស ចំនួន០៣នាក់ប្រុស ធ្ងន់០១នាក់) និងនៅឃុំត្រប់ចំនួន ១១១ខ្នង (ធ្ងន់ ១១ខ្នង)។
លោក សំ ណាល់ អធិការនគរបាល ស្រុកបាធាយបានបញ្ជាក់ថា នៅពេលរសៀលថ្ងៃទី២៧ខែឩសភាឆ្នាំ២០១៨ នេះ ឯកឧត្តម គួច ចំរើន អភិបាល នៃគណ:អភិបាលខេត្ត និងសហការី បាននាំយកអំណោយរបស់កាកបាទ ក្រហមកម្ពុជា សាខាខេត្តកំពង់ចាម ទៅជួយឧបត្ថម្ភដល់ប្រជាពលរដ្ឋដែលជួបគ្រោះមហន្តរាយទាំង ៤៩៦គ្រូសារ ដើម្បីជួយសម្រួល ជីវភាពរស់នៅរបស់ពួកគាត់ពេលជួបគ្រោះមហន្តរាយ។
ទន្ទឹមនោះ លោកឧត្តមសេនីយ៍ ទោ ឯម កុសល ស្នងការនគរបាលខេត្តកំពង់ចាម និងសហការីបាននាំយកថវិកា និងភេសជ្ជៈសួរសុខទុក្ខបងប្អូនរងគ្រោះនៅមន្ទីរពេទ្យបន្តទៀតនឹងបានចាត់ តាំងកម្លាំងការពារសន្តិសុខ សុវត្ថិភាព និងសណ្តាប់ ធ្នាប់់ ជូនដល់ប្រជាពលរដ្ឋជួបគ្រោះមហន្តរាយ ទាំងអស់នោះរហូតដល់ពួកគាត់មានជីវភាពរស់នៅ ដូចធម្មតាវិញ៕
