ភ្នំពេញ ៖ កម្ពុជាត្រូវបានគេដឹងថា បានត្រៀមរួចជាស្រេចហើយនូវក្រុមមន្ត្រីឆ្លើយតបរហ័សជិត៥ម៉ឺននាក់ ដើម្បីប្រយុទ្ធនឹងជំងឺ COVID-19 បើទោះបីជាបច្ចុប្បន្ននេះស្ថានភាពនៃជំងឺរាតត្បាតមួយនេះនៅស្រួចស្រាលនៅឡើយក៏ដោយចុះ។
នេះបើយោងតាមការថ្លែងឲ្យដឹងរបស់លោកស្រីវេជ្ជបណ្ឌិត យក់ សម្បត្ដិ រដ្ឋលេខាធិការក្រសួងសុខាភិបាល ដែលបានធ្វើឡើងនៅក្នុងកិច្ចប្រជុំគណៈកម្មការអន្តរក្រសួងលើកទី៣លើការងារឆ្លើយតបការរាតត្បាតនៃជំងឺ COVID-19 កាលពីម្សិលមិញនៅទីស្តីការក្រសួង។
លោកស្រីបញ្ជាក់ថា ក្រសួងសុខាភិបាល នៅតែបន្ដបណ្ដុះបណ្ដាល និងពង្រឹងក្រុមមន្ដ្រីឆ្លើយតបរហ័សប្រមាណ៤-៥ម៉ឺននាក់ សម្រាប់ត្រៀមឆ្លើយតបទៅនឹងជំងឺកូវីដ១៩ (COVID-19) ទោះបច្ចុប្បន្ន ស្ថានភាពជំងឺនេះនៅស្រួចស្រាលនៅឡើយ។
លោកស្រីរដ្ឋលេខាធិការ បានបញ្ជាក់បន្ថែមថា ខណនេះគណៈកម្មការអន្ដរក្រសួង ដើម្បីប្រយុទ្ធនឹងជំងឺកូវីដ១៩ (COVID-19) បានលើកយកនូវផែនការយុទ្ធសាស្ដ្រជាបន្ដបន្ទាប់ និងត្រៀមនូវសម្ភារបរិក្ខារពេទ្យឱ្យគ្រប់គ្រាន់ជានិច្ច ដោយបច្ចុប្បន្ន មានម៉ាសចំនួន១១លានម៉ាស, ម៉ាសN95 ចំនួន៥០ម៉ឺន (បច្ចុប្បន្នមានជាង៣០ម៉ឺនម៉ាសហើយ), សម្លៀកបំពាក់សុវត្ថិភាពររបស់មន្ដ្រីសុខាភិបាល៥ពាន់សម្រាប់ និងមុងភួយកន្ទេលខ្នើយ សម្រាប់ អ្នកជំងឺមកសម្រាកព្យាបាលនៅតាមមន្ទីរពេទ្យ។
ប៉ុន្តែបើសិនជាមានការរាតត្បាតនៃជំងឺកូវីដ១៩ ទ្រង់ទ្រាយធំដ៏ធ្ងន់ធ្ងរបំផុត រហូតដល់ប្រកាសដាក់ប្រទេសក្នុងភាពអាសន្ននោះ កម្លាំងពេទ្យរបស់បច្ចុប្បន្នចំនួន៦ពាន់នាក់ គឺមិនគ្រប់គ្រាន់នោះឡើយ យើងនឹងអាចបញ្ចេញកម្លាំងយ៉ាងហោចក៏ជាង១ម៉ឺននាក់ សម្រាប់កម្លាំងពេទ្យនៅក្នុងក្រសួងសុខាភិបាល កម្លាំងយោធា៥ពាន់ នាក់ និងប៉ូលីសរាប់ពាន់នាក់ទៀត ដែលសរុបទូទាំងប្រទេសប្រមាណ ៤-៥ម៉ឺននាក់ ដែលបានបណ្ដុះបណ្ដាល នឹងរួមគ្នាប្រយុទ្ធនឹងជំងឺរាតត្បាតមួយនេះ៕
