ខេត្តប៉ៃលិន៖ បន្ទាប់ពីភ្លៀងធ្លាក់មួយមេធំ នៅទូទាំងខេត្តប៉ៃលិន គេសង្កេតឃើញថា ប្រព័ន្ធហេចដ្ឋារចនាសម្ព័ន្ធផ្លូវថ្នល់ជាច្រើន បានរងការខូចខាត់ជាអន្លើរៗ ព្រមទាំងជន់លិច បណ្តាលឲ្យការដឹកកសិផល របស់បងប្អួនប្រជាពលរដ្ឋ មានភាពលំបាកខ្លាំង ពិសេសនៅច្រកទ្វាអន្តរជាតិព្រំ តែម្តង ។ ការធ្លាក់ភ្លៀង បង្កជាទឹកជំនន់នេះ បានកើតឡើងកាលពីវេលាម៉ោង៥ និង០០នាទីព្រឹកថ្ងៃទី២៨ ខែមេសា ឆ្នាំ២០១៨ ហើយរហូតមកដល់ម៉ោង២និង៣០នាទីរសៀលនេះ ផ្ទៃមេឃនៅតែមានភាពអួរអប់ រលឹមជាបណ្តើរៗផងដែរ ។
តាមប្រភពព័ត៌មានពីមន្ត្រីសមត្ថកិច្ច ដែលប្រចាំការច្រកទ្វាអន្តរជាតិព្រំ កន្លែងតំបន់ដែលរងជំនន់ទឹកភ្លៀង បានឲ្យដឹងថា៖ នៅច្រកទ្វាអន្តរជាតិព្រំ គឺភ្លៀងបានធ្លាក់ចាប់ពីម៉ោង៥ ថ្ងៃទី២៨ ខែមេសានេះ ហើយបានបង្កជាទឹកជំនន់លិចផ្លូវជាតិលេខ៥៧ ចាប់ពីប៉ារ៉ាស របស់សមត្ថកិច្ចឈរជើង រហូតដល់ស្ពានបាឡេ ឆ្លងព្រំដែន មានប្រវែងជាង២០០ម៉ែត្រ បណ្តាលប្រជាពលរដ្ឋ និងរថយន្តដឹកទំនិញជាច្រើនគ្រឿង ពិបាកធ្វើដំណើរចេញ ចូលទៅប្រទេសថៃផងដែរ ។ប្រភពព័ត៌មាន បានបន្តថា៖ ការលិចផ្លូវជាតិខាងលើនេះ គឺមិនយូរនោះទេ ប្រហែលជា៤ម៉ោងទឹកក៍បានស្រកទឹកវិញ អាចឲ្យអ្នកធ្វើដំណើរ និងរថយន្តដឹកទំនិញចេញ ចូល បានជាធម្មតាឡើងវិញ ដោយក្នុងហេតុការនេះដែរ ក៍មិនបណ្តាលឲ្យមានគ្រោះថ្នាក់ដល់អាយុជីវិតមនុស្សឡើយ ។
បើតាមលោក ង៉ា លីហុង ប្រធានមន្ទីរធនធានទឹក និងឧតុនិយមខេត្តប៉ៃលិន មានប្រសាសន៍ឲ្យដឹងថា៖ការធ្លាក់ភ្លៀងនៅទូទាំងខេត្តប៉ៃលិន គឺមិនសូវជាច្រើនប៉ុន្មានទេ ហើយការដែលខេត្តយើងទទួលជំនន់ទឹកភ្លៀង គឺដោយសារតែខេត្តប៉ៃលិន នៅជិតព្រំដែនប្រទេសថៃ ដូច្នោះវាមានជួរភ្នំជាច្រើន ហើយភ្លៀងបានធ្លាក់នៅតំនប់ជួរភ្នំទាំងនោះ បណ្តាលឲ្យមានជំនន់ទឹកភ្លៀងពីប្រទេសថៃ ចូលមកស្ទឹងប៉ៃលិន ស្ទឹងកុយ ជាដើម បណ្តាលឲ្យមានការជន់លិចលើផ្លូវ ពិសេសគឺក្បែរច្រកទ្វាអន្តរជាតិព្រំ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ តែម្តង ។
លោក បានបន្តថា៖បញ្ហាទាំងនេះគឺមន្ត្រី របស់មន្ទីរ បាននិងកំពុងចុះតាមដានមើលអំពីស្ថានភាពជំនន់ទឹកភ្លៀងនេះដែរ ហើយប្រសិនជាប្រទេសថៃ នៅតែបន្តភ្លៀងទៀតនោះ ខេត្តប៉ៃលិនយើង នៅតំបន់ខ្លះ ដូចជាកោះកែវ ,ស្រែអន្ទាក់ ក្នុងស្រុកសាលាក្រៅ ពិតជាជន់លិចមិនខាន ជាមួយនិងការធ្លាក់ភ្លៀងកក់ខែនេះ បើតាមក្រសួងឧតុនិយម គឺមានរហូតដល់ថ្ងៃទី០២ ខែឧសភា ឆ្នាំ២០១៨ ដូច្នោះសូមបងប្អួនប្រជាពលរដ្ឋ ក្នុងខេត្តប៉ៃលិន មេត្តាប្រុងប្រយ័ត្ន ចំពោះបញ្ហាខ្យល់កន្ទាក់ ភ្លៀង ផ្ទររន្ទុះផងដែរ ៕
