ភ្នំពេញ: សកម្មភាពលក់ទិញដីដែលកំពុងតែពុះកញ្ជ្រោល នៅក្នុងឃុំអរិយក្ស័ត្រ ឃុំសារិកា និងឃុំវិហារសួគ៌ ត្រូវបានមន្ត្រីក្រសួងធនធាន ទឹក និងឧតុនិយមធ្វើការព្រមានថា ប្រយ័ត្នប៉ះ ចំដីបឹងធម្មជាតិដូចករណី ឡុងឈិន នៅបឹងកប់ស្រូវ កាលពីឆ្នាំ២០០៧។
មន្ត្រីក្រសួងធនធានទឹក និងឧតុនិយម មួយរូប បាននិយាយឲ្យដឹង នៅថ្ងៃទី៤ ខែតុលា ឆ្នាំ២០១៤នេះថា ការទិញលក់ដី នៅក្នុងឃុំអរិយក្ស័ត្រ ឃុំសារិកា និងឃុំវិហារសួគ៌ ពេលនេះ មានសកម្មភាពខ្លាំងក្លាណាស់ ធ្វើឲ្យហាងឆេងដី ទាំងនៅលើគោក ក៏ដូចជា នៅក្នុងបឹងទឹកជ្រៅ ឡើងថ្លៃស្ទើរគ្រប់ម៉ោង។ ដីបឹងធម្មជាតិមួយចំនួនធំ កំពុងត្រូវបានគេចង្អុលទិញ និងលក់ តាមរយៈអ្នករៀបចំដីលក់ (អ្នកគួកជេ) ដែលមានការត្រូវរ៉ូវគ្នា ជាខ្សែសង្វាក់។
ប្រភពខាងលើ បានឲ្យដឹងទៀតថា ដីបឹងធម្មជាតិ ដែលគេបាននាំគ្នាទិញលក់ បន្តគ្នាពីម្នាក់ទៅម្នាក់នោះ ក្រសួងធនធានទឹក កំពុងតែរៀបចំធ្វើអនុក្រឹត្យ ដើម្បីការពារបឹងធម្មជាតិ ដែលមានវិសាលភាព ដូចជា បឹងទន្លេសាបទីពីរនេះហើយ។ អ្នកណាទិញ ប៉ះចំដីបឹង អាចនឹងមានវាសនា ដូចជា ករណីឡុងឈិន នៅបឹងកប់ស្រូវ។ បឹងដែលមានវិសាលភាព ដូចជាបឹងទន្លេសាបទីពីរនេះ មានឈ្មោះថា បឹងវាលសំណាប មានផ្ទៃដីរាប់ពាន់ហិកតា នៅជាប់នឹងក្រុមហ៊ុន សឺវេនអេនជី កំពុងត្រូវបានគេរំលោភយក តែក្រសួងមានផែនទី គ្រប់គ្រាន់ សម្រាប់ការពារបឹងនេះហើយ។
បឹងមួយចំនួនផ្សេងទៀត នៅក្នុងឃុំទាំងបី ក៏កំពុងត្រូវបានរៀបចំអនុក្រឹត្យ ដើម្បីការពារដែរ។
មន្ត្រីដដែល បានបញ្ជាក់ ដោយមិនខ្វល់ថា ដីបឹង នៅតែជាដីបឹង គេគ្រាន់តែទិញលក់តគ្នា មិនទាន់មានការអភិវឌ្ឍន៍អ្វី នៅឡើយទេ។ ក្រសួងកំពុងតែពិចារណា ដើម្បីកំណត់រក្សាទុកផ្ទៃបឹង ចៀសវាងការភ័ន្តច្រឡំ ឬបន្លំទិញលក់ដីបឹង នាំឲ្យមានការខាតបង់ នៅពេលរដ្ឋរឹបអូសយកមកវិញ។ អ្នកទិញដី នៅតំបន់ខាងលើ គួរត្រូវមានការប្រុងប្រយ័ត្ន ចំពោះលិខិតស្នាម បញ្ជាក់មួយចំនួន ដែលធ្វើត្រឹមភូមិ ឃាំ ស្រុក នោះ មិនប្រាកដថា មានប្រសិទ្ធភាពការពារដីទាំងនោះថា ជារបស់ឯកជនបានទេ។
ការទិញលក់ដី ទាំងនៅលើគោក ក៏ដូចក្នុងទឹក នៅត្រើយម្ខាងនៃ ទន្លេចតុមុខ ក្នុងឃុំអរិយក្ស័ត្រ ឃុំសារិកា និងឃុំវិហារសួគ៌ មានសកម្មភាពផុសផុលបំផុត និងឡើងថ្លៃបន្តបន្ទាប់ គឺនៅពេលបន្ទាប់ ពីរាជរដ្ឋាភិបាល បានប្រកាសឲ្យមានការសិក្សា គម្រោងសាងសង់ស្ពានថ្មី ចំនួនពីរ ឆ្លងកាត់ទន្លេមេគង្គលើ និងទន្លេមេគង្គក្រោម ក្នុងភូមិសាស្ត្ររាជធានីភ្នំពេញ រួចមក។ តម្លៃដីកាន់តែពុះកញ្ជ្រោលឡើងថែមទៀត នៅពេលសាលារាជធានីភ្នំពេញ និងក្រសួងមហាផ្ទៃ គ្រោងកាត់យកភូមិសាស្ត្រមួយចំនួន ពីខេត្តកណ្តាល នៅតំបន់អរិយក្ស័ត្រ ឲ្យមកស្ថិតនៅក្រោមរដ្ឋបាល របស់រាជធានីភ្នំពេញ នៅក្នុងរយៈពេលប៉ុន្មានឆ្នាំ ខាងមុខ។
ការរំលោភយកដីបឹង ដែលគ្រប់គ្រង ដោយក្រសួងធនធានទឹក និងឧតុនិយម ត្រូវបានមន្ត្រីក្រសួងនេះ បញ្ជាក់ថា មិនងាយអាចយកបាន ដោយស្រួលទេ ត្រូវចាំថា ករណីក្រុមហ៊ុនឡុងឈិន ដែលបានរំលោភយកដី បឹងកប់ស្រូវ ដោយធ្វើទំនប់វាត យកបឹង និងចាក់ដីលប់ ថែមមានសង់អគារ ផ្ទះវិឡារួច រាប់សិបខ្នង ក៏ត្រូវបានវាយកម្ទេចចោល វិញទាំងអស់ និងរឹបអូសយកមក ធ្វើជាសម្បត្តិរដ្ឋវិញ កាលពីពាក់កណ្តាលឆ្នាំ២០០៧។
បឹងកប់ស្រូវ សព្វថ្ងៃនេះ មានទំហំប្រមាណ ជាបីពាន់ហិកតា តែមិនទាន់មានអនុក្រឹត្យ ការពារនៅឡើយទេ៕ cen
