ភ្នំពេញ៖ចំណុចសំខាន់ៗនៃសេចក្តីព្រាងច្បាប់ស្តីពីការគ្រប់គ្រងគ្រឿងស្រវឹងដែលចេញដោយ ក្រសួងសុខាភិបាល ត្រូវបានដាក់ឲ្យពិភាក្សា នៅក្នុងមន្ទីរព្រឹទ្ធសភានៅព្រឹកថ្ងៃពុធនេះ មុននឹងសេចក្តីព្រាងនេះត្រូវ បានអនុម័តដោយរដ្ឋសភា និងមុនពេលបញ្ជូនទៅឲ្យ ស្ថាប័ននីតិបញ្ញតិនៅពេលខាងមុខនេះ ។
ប្រភពព័ត៌មានបានរាយការណ៍ថា ការតម្លើងពន្ធលើគ្រឿងស្រវឹង ការកំណត់ផ្សាយពាណិជ្ជកម្មគ្រឿងស្រវឹង ឬការកំណត់អាយុដែលអាចផឹកគ្រឿងស្រវឹងសុទ្ធសឹងជាប្រធានបទសំខាន់ៗដែលត្រូវលើកយកក្នុងឱកាសនោះយ៉ាងផុតលផុសដែរ។
ប្រភពព័ត៌មានបានបន្តថា ការពិភាក្សាបានលើកយកបញ្ហាគ្រោះថ្នាក់ចរាចរណ៍ដែលមើលទៅហាក់ដូចជាក្តៅគគុកនៅទូទាំងប្រទេសពាក់ព័ន្ធនឹងគ្រឿងស្រវឹងមកដាក់ជាប្រធានបទសំខាន់ផ្សារភ្ជាប់គ្នាទៅនឹងគ្រោះថ្នាក់ចរាចរណ៍ដែលជាកត្តាដ៏ព្រួយបារម្ភបំផុត។
ប្រធានមជ្ឈមណ្ឌលប្រជាពលរដ្ឋដើម្បីសន្តិភាព និងអភិវឌ្ឍន៍លោក យង់ គឹមអេង ដែលបានចូលរួមក្នុងកិច្ចពិភាក្សានេះដែរ បានលើកឡើងថា ការលើកពីបញ្ហាគ្រឿងស្រវឹងមកជជែក ដែលមានការចូលរួមពីតំណាងរដ្ឋសភា ព្រឹទ្ធសភា ក្រសួងសុខាភិបាល និងអង្គការក្រៅរដ្ឋាភិបាល គឺចង់ឲ្យមានការចូលរួមមតិបន្ថែម និងបង្ហាញប្រជាពលរដ្ឋឲ្យបានយល់ដឹងពីគ្រោះថ្នាក់ និងការវិវត្តទាក់ទងទៅនឹងបញ្ញតិច្បាប់ផ្សេងៗស្តីពីគ្រឿងស្រវឹង ។
ចំណុចសំខាន់ចំនួន៤ ត្រូវបានលើកយកមកពិភាក្សាលម្អិត និងផ្តល់មតិបន្ថែម រួមមានទី១ ការតម្លើងពន្ធលើគ្រឿងស្រវឹង ទី២ កម្រិតដល់កន្លែងលក់គ្រឿងស្រវឹងត្រូវមានអាជ្ញាប័ណ្ឌត្រឹមត្រូវ ហើយចៀសវាងលក់ដូរនៅទីកន្លែងមួយចំនួន ដូចជាក្បែរសាលារៀន វត្តអារ៉ាម មន្ទីរពេទ្យ ឬកន្លែងធ្វើការរបស់រដ្ឋជាដើម។
រីឯចំណុចទីបីនោះគឺទាក់ទងទៅនឹងការផ្សាយពាណិជ្ជកម្ម គឺគេពុំគួរផ្សាយពីសកម្មភាពផឹកស៊ីការបង្កើតភាពសប្បាយរីករាយ និងផ្សាយពីអត្ថប្រយោជន៍របស់គ្រឿងស្រវឹងនោះទេ។ ផ្ទុយទៅវិញគឺស្នើឲ្យផ្សាយតែម៉ាក ឬឡូហ្គូ តែប៉ុណ្ណោះ។ ដោយឡែកចំណុចចុងក្រោយ គឺការកំណត់អាយុបុគ្គលដែលអាចសេពគ្រឿងស្រវឹងចាប់អាយុចាប់ពី២១ឆ្នាំឡើងទៅ។
គួរលើកឡើងផងដែរថា គ្រឿងស្រវឹងមិនត្រឹមតែបង្កឲ្យមានគ្រោះថ្នាក់ចរាចរណ៍ប៉ុណ្ណោះទេ គឺបានបង្កើតឲ្យមានអំពើហិង្សា និងអំពើពាលា បាត់សណ្តាប់ធ្នាប់ក្នុងសង្គមជាច្រើនទៀត៕
