ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ និងទីភ្នាក់ងារស្វីស សម្រាប់ការអភិវឌ្ឍន៍ និងកិច្ចសហប្រតិបត្តិការ (SDC) បានប្តេជ្ញារួមគ្នាអភិវឌ្ឍន៍ទៅលើប្រព័ន្ធបណ្តុះបណ្តាល បច្ចេកទេស និងវិជ្ជាជីវៈ(TVET) ក្នុងដំណាក់កាលទី២ ស្របពេលដែលគម្រោងទី១ នៃគម្រោងនេះ បានរង ផលប៉ះពាល់ពីជំងឺផ្លូវដង្ហើម កូវីដ-១៩។ គម្រោងទី២នេះ ជាការបណ្តុះបណ្តាលជំនាញដល់យុវជនក្រីក្រ នៅក្នុងសហគមន៍ នៃខេត្តគោលដៅចំនួន៥ នៅភាគឥសាន្តប្រទេសកម្ពុជា រួមមានខេត្តព្រះវិហារ ស្ទឹងត្រែង ក្រចេះ មណ្ឌលគិរី និងរតនគិរី។

ការលើកឡើងដូច្នេះ ធ្វើឡើងក្នុងជំនួបពិភាក្សាការងារ រវាងលោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈជាមួយ គណៈប្រតិភូនៃទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) ដឹកនាំដោយ លោកស្រី Nadia Ottiger នាយិការង ទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការប្រចាំកម្ពុជា នៅទីស្តីការក្រសួងការងារ ព្រឹកថ្ងៃទី១០ ខែមិថុនា ឆ្នាំ២០២០។

មានប្រសាសន៍នាឱកាសនោះ លោកបណ្ឌិត អ៊ិត សំហេង បានសម្តែងនូវអំណរគុណយ៉ាងជ្រៀលជ្រៅចំពោះរដ្ឋាភិបាលស្វីស ដែលតែងតែគាំទ្រនូវគ្រប់សកម្មភាពក្នុងការលើកកម្ពស់ធនធានមនុស្សក្នុងវិស័យការងារ និងបណ្តុះបណ្តាលវិជ្ជាជីវៈនៅកម្ពុជា។ លោកលើកឡើងថា គម្រោងអភិវឌ្ឍជំនាញនេះ ជាគំនិតផ្តួចផ្តើមដ៏ល្អប្រសើរមួយ ក្នុងការធ្វើសមាហរណកម្មជំនាញ នៅប៉ែកឥសានប្រទេស ក្នុងការកសាងធនធានមនុស្សសម្រាប់កម្ពុជា លើវិស័យមួយនេះ។ លោកបញ្ជាក់ថា គោលដៅនៃគម្រោងនេះគឺ ទាក់ទាញយុវជនក្រីក្រក្នុងសហគមន៍ ឱ្យចាប់អារម្មណ៍ទទួលយកការបណ្តុះបណ្តាលជំនាញ ដើម្បីបង្កើនធនធានមនុស្ស ក៏ដូចជាបង្កើនប្រាក់ចំណូល សម្រាប់ប្រជាជនកម្ពុជាផងដែរ។

លោកស្រី Nadia Ottiger បានលើកឡើងថា គម្រោងទី២នេះ នឹងធ្វើឱ្យប្រសើរឡើង ទាំងធនធានមនុស្ស និងជីវភាពរបស់ប្រជាពលរដ្ឋ ដែលកំពុងរស់នៅក្នុងសហគមន៍នៃខេត្តទាំង៥ ភាគឥសាន្តប្រទេសកម្ពុជា តាមរយៈទទួលបានបានជំនាញ និងបង្កើនប្រាក់ចំណូល សម្រាប់ទ្រទ្រង់ជីវភាពបានល្អប្រសើរ។

លោកស្រីបញ្ជាក់ថា រាល់សកម្មភាពគម្រោងទាំងមូលត្រូវបានគាំទ្រយ៉ាងជិតស្និទ្ធពីក្រសួងការងារ និងបណ្តុះបណ្តាលវិជ្ជាជីវៈ ក៏ដូចជាដៃគូនានាទៀត ដើម្បីអភិវឌ្ឍន៍ជំនាញ កាត់បន្ថយការធ្វើទេសន្តប្រវេសន៍។ ទន្ទឹមនេះកិច្ចដំណើរការគម្រោង គឺស្របទៅយន្តការ ក៏ដូចជាកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ហើយក៏ជាការឆ្លើយតបទៅនឹងតម្រូវការទីផ្សារការងារ និងអ្វីដែលនិយោជកចង់បាននាពេលបច្ចុប្បន្ននេះផងដែរ។

គួរបញ្ជាក់ថា ដំណាក់កាលទី២របស់គម្រោងមួយនេះ ត្រូវចាប់ផ្តើមអនុវត្តចាប់ពីថ្ងៃទី០១ ខែកក្កដា ឆ្នាំ២០២០ រហូតដល់ ខែមិថុនា ឆ្នាំ២០២៤ ដែលមានថវិកាសរុបចំនួនប្រមាណ៩លានដុល្លារអាមេរិក។ ចំពោះលទ្ធផលនៃគម្រោងនឹងទទួលបាន ១.នូវប្រព័ន្ធ TVET កម្ពុជាមានប្រសិទ្ធភាពជាងមុន នៅតាមខេត្តគោលដៅ ក្នុងតំបន់ និងសហគ្រាស និង ២.យុវជន បុរស ស្ត្រី និងកម្មករ ដែលមានជំនាញទាបបានបង្កើនលទ្ធភាពទទួលបានការងារ៕

ខេត្តសៀមរាប ៖ លោក សូប្លាតុង អភិបាលស្រុកបាគងបានឱ្យដឹងថា អាជ្ញាធរស្រុកប្រាសាទបាគង និងអាជ្ញាធរជាតិអប្សរាបានស្នើសុំរថយន្តពន្លត់អគ្គិភ័យចំនួន៥គ្រឿង ដឹកទឹកយកមកបញ្ចូលក្នុងកសិន្ធុប្រាសាទបាគង នៅរសៀលថ្ងៃទី១០ ខែមិថុនា ឆ្នាំ២០២០នេះ ដើម្បីសង្រ្គោះត្រីដែលនៅសេសសល់។

លោក សូប្លាតុង បានបញ្ជាក់ថា ដើម្បីសង្គ្រោះត្រី ដែលនៅសេសសល់អាជ្ញាធរបានដាក់ចេញនូវវិធានការចំនួន៣គឺ ៖ ទី១. សមត្ថកិច្ចបានយករថយន្តដឹកទឹកពីក្រៅ មកបញ្ចូលក្នុងកសិន្ធុដើម្បីឱ្យត្រីនៅសេសសល់អាចបន្តរស់បាន, ទី២.ការបុកអណ្តូងទឹកដើម្បី បូមបញ្ចូលទៅក្នុងកសិន្ធុនេះ និងទី៣.កម្លាំងប្រជាការពារ ពី៥០ទៅ៦០នាក់ បន្តកាយភក់ចេញ ដើម្បីឱ្យជ្រៅបន្តិច ហើយនៅថ្ងៃស្អែក នឹងមានកម្លាំងពីអាជ្ញាធរអប្សរាចូលរួមបន្ថែមទៀត។

សូមបញ្ជាក់ថា កាលពីថ្ងៃទី០៨ ខែមិថុនា ប្រជាពលរដ្ឋរួមជាមួយព្រះសង្ឃ បានឃើញត្រីប្រាប្រមាណជា១៣ក្បាលបានងាប់ជាបន្តបន្ទាប់ ដោយសារតែទឹកកសិន្ធុប្រាសាទបាគងរីង។ ក្នុងនោះមានត្រី មួយចំនួនត្រូវបានយកទៅដាក់នៅស្រះផ្សេង និងបានយកកន្ទាយ ដ៏ធំមួយទៅប្រោះទុកនៅ អាងក្នុងវត្តផងដែរ៕

ខេត្តព្រះវិហារ ៖ ខេត្តពក្រសួងបរិស្ថាន បានសហការជាមួយអង្គការសមាគមអភិរក្សសត្វព្រៃ (WSC) ប្រចាំកម្ពុជា ចុះជំរឿនសត្វត្មាត ក្នុងភូមិសាស្ត្រនៃដែនជម្រកសត្វព្រៃក្នុងប្រទេសកម្ពុជា ដើម្បីបានដឹង ចំនួនពិតនៃសត្វត្មាតនៅកម្ពុជា និងស្ថានភាពនៃការវិវត្តជុំវិញចំនួនសត្វត្មាតនៅកម្ពុជា។ 

ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន បានឲ្យដឹងថា ការជំរឿនសត្វត្មាតនេះធ្វើឡើងនៅទីតាំង ចំនួន៥ទផ្សេងគ្នាមានដូចជា ៖ ក្នុងដែនជម្រកសត្វព្រៃ សៀមប៉ាងក្នុងខេត្តស្ទឹងត្រែង នៅអាហារដ្ឋានត្មាតចំណុចវាលបឹងទាល់ ស្ថិតនៅសហគមន៍ព្រៃអណ្តូងដងផ្លិត ក្នុងដែនជម្រកសត្វព្រៃឆែបក្នុងខេត្តព្រះវិហារ នៅដែនជម្រកសត្វព្រៃស្រែពក ខេត្តមណ្ឌលគិរី នៅស្រែអង្ក្រងក្នុងតំបន់សេសាននៅស្ទឹងត្រែង និងដែនជម្រកសត្វព្រៃលំផាត់នៅក្នុងភូមិសាស្ត្រខេត្តរតនគិរី។

ឯកឧត្តម នេត្រ ភក្ត្រា ដែលបានចូលរួមសង្កេតដោយផ្ទាល់នៅនៅអាហារដ្ឋានត្មាតចំណុចវាលបឹងទាល់ ស្ថិតនៅសហគមន៍ព្រៃអណ្តូងដងផ្លិត ក្នុងដែនជម្រកសត្វព្រៃឆែបក្នុងខេត្តព្រះវិហារ នៅព្រឹកថ្ងៃទី១០ ខែមិថុនា បានថ្លែងថា សត្វត្មាតចំនួន ៣៤ ក្បាលបានចុះមកស៊ីសត្វគោងាប់ដែលជាចំណីរៀបចំបន្ថែមដោយអង្គការ WCS ក្រោម ការឧបត្ថម្ភគាំទ្ររបស់គម្រោងព្រៃឡង់បៃតង ក្នុងនោះសត្វត្មាតផេះចំនួន ៩ ក្បាល ត្មាតភ្លើងចំនួន ៣ ក្បាលនិងត្មាតត្មោតចំនួន ២២ក្បាល។ ចំនួននេះមិនទាន់រាប់បញ្ចូលពីលទ្ធផលជំរឿននៅតំបន់ផ្សេងទៀតនៅឡើយទេ។ ឯកឧត្តម បានឲ្យដឹងថា ការជំរឿនកាលខែធ្នូឆ្នាំ២០១៩កន្លងទៅ នៅទីតាំងដដែលនេះ មានសត្វត្មាតចំនួន ៤៤ ក្បាល។

បើតាមការឲ្យដឹងរបស់ឯកឧត្តម នេត្រ ភក្ត្រា លទ្ធផលជំរឿនសត្វត្មាតនៅឆ្នាំ២០១៩កន្លងទៅ បង្ហាញថា កម្ពុជាមានសត្វត្មាតទាំង ៣ ប្រភេទ មានចំនួន ១៣៧ ក្បាលហើយតំបន់ដែលមានសត្វត្មាតច្រើនជាងគេគឺនៅដែនជម្រកសត្វព្រៃ សៀមប៉ាងក្នុងខេត្តស្ទឹងត្រែង និងដែនជម្រកសត្វព្រៃឆែបក្នុងខេត្តព្រះវិហារ។

សត្វត្មាតជាប្រភេទសត្វកម្រ និងកំពុងស្ថិតក្នុងហានិភ័យខ្ពស់ក្នុងការបាត់ពូជនៅលើសកលលោក ខណៈចំនួន សត្វត្មាតនៅតែបន្តមានការធ្លាក់ចុះជារៀងរាល់ឆ្នាំ និងក្នុងកម្រិតមួយគួរព្រួយបារម្ភ ទោះបីជារាជរដ្ឋាភិបាលតាមរយៈក្រសួងបរិស្ថានដោយ សហការជាមួយអង្គការដៃគូនានាខិតខំប្រឹងប្រែងការពារនិងអភិរក្សក៏ដោយ។

ឯកឧត្តម នេត្រ ភក្ត្រា បានឲ្យដឹងថា មូលហេតុដែលនាំឲ្យសត្វត្មាតនៅក្នុងប្រទេសកម្ពុជាមានការធ្លាក់ចុះខ្លាំង ដោយសារការគំរាមកំហែងខ្លាំងបំផុតពីការបំពុលរបស់មនុស្ស ការបាត់បង់ជម្រក ការខ្វះខាតចំណីអាហារ ការបរបាញ់តាមរយៈការដាក់អន្ទាក់ និងការបំពុល។

ឯកឧត្តម នេត្រ ភក្ត្រា បានថ្លែងថា ប្រជាសហគមន៍នៅតាមតំបន់មួយចំនួនបាន ប្រើប្រាស់ថ្នាំពុលដាក់ទៅក្នុង ឬជុំវិញត្រពាំងដើម្បី ចាប់សត្វស្លាប និងថនិកសត្វផ្សេងៗ ហើយការបំពុល នេះក៏ជាមូលហេតុចម្បងដែលបណ្ដាលឲ្យសត្វត្មាតស្លាប់ដែរដោយសារតែសត្វត្មាតទាំងនោះស៊ីសាលសពសត្វស្លាប់ដោយសារតែថ្នាំពុល។

ឯកឧត្តម អំពាវនាវដល់ប្រជាពលរដ្ឋទាំងអស់ចូលរួម អភិរក្ស និងការពារសត្វត្មាត ដោយបញ្ឈប់សកម្មភាពបរបាញ់ ឬការជួញដូរសត្វព្រៃ និងឈប់ប្រើប្រាស់ថ្នាំពុលនៅជុំវិញដែកជម្រកសត្វព្រៃ៕

ភ្នំពេញ ៖ នាព្រឹកថ្ងៃទី១០ ខែមិថុនា ឆ្នាំ២០២០ លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានអនុញ្ញាតឱ្យលោក Nick Beresford អ្នកតំណាង UNDP ប្រចាំនៅកម្ពុជាចូលជួបសំដែងការគួរសម និងពិភាក្សាការងារក្នុងគម្រោងបោសសំអាតមីនដើម្បីលទ្ធផល។

ក្នុងឱកាសនោះលោកទេសរដ្ឋមន្ត្រី ក្នុងនាមសម្តេចតេជោ នាយករដ្ឋមន្ត្រី ដែលជាប្រធានអាជ្ញាធរមីន បានកោតសរសើរ និងវាយតម្លៃខ្ពស់ចំពោះអង្គការ UNDP ក្នុងភាពជាដៃគូក្នុងវិស័យសកម្មភាពមីនឱ្យទទួលបាននូវភាពជោគជ័យនាពេលកន្លងមក។ លោកក៏បានស្នើសុំឲ្យ UNDP បន្តជួយកៀរគរថវិកាបន្ថែមជួយដល់វិស័យបោសសម្អាតមីន ដើម្បីកម្ពុជាសម្រេចបាននូវគោលដៅកម្ពុជាគ្មានមីននៅឆ្នាំ២០២៥ខាងមុខ។

លោក Nick Beresford បានមានប្រសាសន៍ថា UNDP ចាត់ទុកសកម្មភាពមីនជាវិស័យអាទិភាព និង បានសំដែងសុឆន្ទៈបន្តគាំទ្រជាមួយរាជរដ្ឋាភិបាលកម្ពុជា ដែលមានគោលនយោបាយ និងយុទ្ធសាស្ត្រវិស័យមីនច្បាស់លាស់ ហើយលោកបានសន្យានឹងបន្តជួយកៀរគរធនធានបន្ថែមទៀតសម្រាប់ការបោសសម្អាតមីនដើម្បីផ្តល់ដីសុវត្ថិភាពជូនដល់ពលរដ្ឋក្រីក្រ និងកាត់បន្ថយគ្រោះថ្នាក់ជូនប្រជាពលរដ្ឋកម្ពុជាផងដែរ៕

ភ្នំពេញ ៖ ក្រសួងសុខាភិបាល នៅព្រឹកថ្ងៃទី១០ ខែមិថុនា ឆ្នាំ២០២០នេះ បានសេចក្ដីជូនព័ត៌មានបញ្ជាក់ពីករណីព្យាបាលជាសះស្បើយអ្នកជំងឺកូវីដ១៩ម្នាក់ និងមិនមានករណីវិជ្ជមានកូវីដ-១៩ថ្មីឡើយ។

អ្នកជំងឺដែលជាសះស្បើយ គឺជាបុរសជនជាតិខ្មែរ-បារាំង អាយុ៣០ឆ្នាំ ស្នាក់នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានវិលត្រឡប់មកពីប្រទេសបារាំងកាលពីថ្ងៃទី២៤ ខែឧសភា ឆ្នាំ២០២០ ដែលត្រូវបានព្យាបាលបានជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ-១៩ ចំនួន០២ដង។ បច្ចុប្បន្ន បុរសរូបនេះ ត្រូវបានអនុញ្ញាតឱ្យចេញពីមន្ទីរពេទ្យខេត្តខ្មែរ-សូវៀត។

សូមជម្រាបថា គិតត្រឹមថ្ងៃទី១០ ខែមិថុនា ឆ្នាំ២០២០ អ្នកមានវីរុសកូវីដ-១៩ ដែលបានរកឃើញទាំងអស់នៅទូទាំងប្រទេស សរុបចំនួន១២៦នាក់ (ស្ត្រី ៣៩នាក់ និងបុរស ៨៧នាក់) ក្នុងនោះអ្នកព្យាបាលជាសះស្បើយមានចំនួន១២៥នាក់ ខណៈអ្នកកំពុងសម្រាកព្យាបាលនៅក្នុងមន្ទីរពេទ្យមិត្តភាពខ្មែរ-សូវៀត មានចំនួន១នាក់ គឺបុរសជនជាតិខ្មែរម្នាក់ ដែលបានវិលត្រឡប់មកពីប្រទេសហ្វីលីពីន៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅតែព្រួយបារម្ភចំពោះការរីករាលដាល និងរាតត្បាតនៃជំងឺកូវីដ១៩។ សម្តេចតេជោ បន្តក្រើនរំលឹកប្រជាពលរដ្ឋឱ្យបន្តយកចិត្តទុកដាក់អនុវត្តន៍វិធានអនាម័យរបស់ក្រសួងសុខាភិបាល ដើម្បីបង្ការ និងទប់ស្កាត់កុំឱ្យឆ្លងជំងឺកូវីដ១៩នេះ។

នៅលើ Facebook នាព្រឹកថ្ងៃទី១០ ខែមិថុនា ឆ្នាំ២០២០នេះ សម្តេចតេជោ ហ៊ុន សែន បានរំលឹកថា ទោះបីកម្ពុជាចំនួនអ្នកបានព្យាបាលជាមានចំនួនច្រើន ហើយអត្រាឆ្លងរោគក៏មិនបានកើនឡើងខ្លាំងក៏ពិតមែន ប៉ុន្តែមិនត្រូវធ្វេសប្រហែសមើលស្រាលបណ្តែតបណ្តោយខ្លួនឱ្យងាយរងគ្រោះថ្នាក់ដែរ។

សម្តេចតេជោ បានរំលឹកយ៉ាងដូច្នេះថា «ជារៀងរាល់ថ្ងៃសូមបងប្អូនជនរួមជាតិមានការប្រុងប្រយ័ត្នថែរក្សាសុខភាពឱ្យបានល្អចូលរួមទប់ស្កាត់កុំឱ្យឆ្លងរោគកូវីដ១៩ ទាំងពីយើងទៅគេ និងពីគេមកយើង។ ជំងឺឆ្លងរលាកផ្លូវដង្ហើមកូវីដ១៩នេះ គឺឆ្លងរាតត្បាតលឿនសាហាវខ្លាំងណាស់។ ដូចបងប្អូនបានឃើញស្រាប់ហើយមានប្រទេសជាច្រើននៅលើពិភពលោកកំពុងបិទប្រទេស បិទព្រលានយន្តហោះ បិទសាលារៀនរួមទាំងនៅកម្ពុជាយើងផងដែរ»។

ដើម្បីទប់ស្កាត់ការឆ្លងរាលដាលជំងឺកូវីដ១៩ សម្តេចតេជោប្រមុខរាជរដ្ឋាភិបាល បន្តសូមឱ្យប្រជាពលរដ្ឋឧស្សាហ៍ដុសលាងសម្អាតដៃជាមួយសាប៊ូ ជែលឬទឹកអាល់កុល ហើយពាក់ម៉ាសការពារដោយមិនត្រូវខ្មាស់អៀន ឬស្មានៗគិតថាមិនមានអ្វីឆ្លងទេ ឬគិតថាកម្ពុជាមានសីតុណ្ហភាពក្តៅខ្លាំងអាចសម្លាប់មេរោគកូវីដនេះបាននោះឡើយ។

សូមបញ្ជាក់ថា មកដល់ត្រឹមថ្ងៃទី១០ ខែមិថុនា កម្ពុជាមានអ្នកឆ្លងជំងឺកូវីដ១៩ ចំនួន ១២៦នាក់។ ក្នុងនោះអ្នកជំងឺ ១២៤នាក់ ត្រូវបានព្យាបាលឱ្យជាសះស្បើយ នៅសល់តែពីរនាក់ទៀតប៉ុណ្ណោះកំពុងសម្រាកព្យាបាលនៅមន្ទីរពេទ្យ៕

ភ្នំពេញ ៖ រដ្ឋមន្ត្រីក្រសួងការងារកម្ពុជា និងឯកអគ្គរដ្ឋទូតសាធារណរដ្ឋប្រជាធិបតេយ្យទីម័រខាងកើត បានសន្យាអភិវឌ្ឍន៍វិស័យការងាររវាងប្រទេសទាំងពីរ ឲ្យកាន់តែប្រសើរបន្តទៀត ក្រោយចប់ជំងឺកូវីដ-១៩។

ការបញ្ជាក់ជំហរយ៉ាងដូច្នេះធ្វើឡើង ក្នុងជំនួបពិភាក្សាការងាររវាង ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជាមួយឯកអគ្គរដ្ឋទូតនៃសាធារណរដ្ឋប្រជាធិបតេយ្យទីម័រខាងកើតប្រចាំកម្ពុជា ដែលទើបតែងតាំងថ្មី ឯកឧត្តម Ermenegildo Kupa Lopes (អើម៉ីនីហ្គីដូ គូប៉ា ឡូប៉េស) នៅទីស្ដីការក្រសួងការងារ នាព្រឹកថ្ងៃទី០៩ ខែមិថុនា ឆ្នាំ២០២០។

ជំនួបពិភាក្សានេះផ្តោតសំខាន់លើកិច្ចសហប្រតិបត្តិការលើវិស័យការងារ ដែលព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យទីម័រខាងកើត បានសហការជាមួយគ្នាយ៉ាងល្អកន្លងមក ហើយបាននិងកំពុងបន្តពង្រឹងពង្រីកបន្ថែមទៀត។

ឯកឧត្តមបណ្ឌិតរដ្ឋមន្ត្រី អ៊ិត សំហេង បានទទួលស្វាគមន៍ចំពោះឯកឧត្តមឯកអគ្គរាជទូត នៃសាធារដ្ឋប្រជាធិបតេយ្យទីម័រខាងកើត យ៉ាងកក់ក្ដៅ និងបានបញ្ជាក់ពីទំនាក់ទំនងល្អរវាងប្រទេស និងប្រជាជនយើងទាំងពីរ ដែលមានធម្មជាតិដ៏ស្រស់ត្រកាល និងប្រវិត្តសាស្ត្រប្រហាក់ប្រហែលគ្នា។

ឯកឧត្តមឯកអគ្គរាជទូត បានវាយតម្លៃខ្ពស់ចំពោះគោលនយោបាយឈ្នះ-ឈ្នះ របស់ សម្តេចតេជោនាយករដ្ឋមន្ត្រី ដែលបានបង្រួបបង្រួមជាតិ នាំមកនូវសន្តិភាព និងការអភិវឌ្ឍន៍នៅគ្រប់វិស័យ ដែលអនុញ្ញាតឱ្យប្រជាជនកម្ពុជាមកពីគ្រប់និន្នាការនយោបាយអាចរួមរស់ ប្រកបដោយសុខដុមរមនាជាមួយគ្នា។ ឯកឧត្តម Ermenegildo បានថ្លែងអំណរគុណដល់រាជរដ្ឋាភិបាលកម្ពុជា ដែលតែងតែគាំទ្រដល់បេក្ខភាពរបស់ប្រទេសទីម័រខាងកើត នៅក្នុងក្របខណ្ឌអាស៊ាន។

ឯកឧត្តមអគ្គរដ្ឋទូត បានសន្យាថា នឹងខិតខំបំពេញបេសកកម្មការទូតឲ្យទទួលបានជោគជ័យ នៅក្នុងការពង្រឹងពង្រីកទំនាក់ទំនងប្រទេសទំាងពីរឲ្យកាន់តែរឹងមាំឡើង។ ឯកឧត្តមបានចាត់ទុកកម្ពុជាជាគេហដ្ឋានទី២ របស់ខ្លួន និងមានភាពកក់ក្តៅយ៉ាងខ្លំាង ទោះបីពេលនេះ ពិភពលោកមានបញ្ហាកូវីដ-១៩ តែកម្ពុជាបានគ្រប់គ្រងស្ថានការណ៍ជំងឺនេះ ប្រកបដោយប្រសិទ្ធភាពខ្ពស់។

គួរបញ្ជាក់ថា ចំពោះកិច្ចសហប្រតិបត្តិការនាពេលកន្លងមកដែលប្រទេសទាំងពីរបានចុះកិច្ចព្រមព្រៀងជាមួយគ្នាស្តីពី “កិច្ចសហប្រតិបត្តិការលើវិស័យការងារ” កាលពីថ្ងៃទី១៩ ខែសីហា ឆ្នាំ២០១៦ រួមមាន ៖ ការផ្លាស់ប្តូរប្រព័ន្ធកម្មវិធីការសិក្សា ជំនាញឯកទេស ការស្រាវជ្រាវ ការសិក្សានិងព័ត៌មានពាក់ព័ន្ធវិស័យនានា រួមទាំងការសិក្សាប្រៀបធៀបលើវិស័យការងារ មុខរបរ ការបណ្តុះបណ្តាលវិជ្ជាជីវៈ និងរដ្ឋបាលការងារ ដូចជា ៖ ការចរចារជាសមូហភាព ការដាក់ឱ្យអនុវត្ត និងការអនុវត្តច្បាប់ ការដោះស្រាយវិវាទការងារ សន្តិសុខសង្គម ការគាំពារពលកម្ម សេរីភាពខាងសមាគម សុវត្ថិភាព និងសុខភាពការងារ ការគ្រប់គ្រងហត្ថពលកម្មបរទេស និងការផ្លាស់ប្តូរព័ត៌មានទៅលើការពង្រឹងផលិតភាពការងារ។ ការលើកទឹកចិត្តការផ្លាស់ប្តូរទស្សនៈកិច្ចរវាងមន្ត្រីទទួលបន្ទុក និងមន្ត្រីជំនាញ។ ការគ្រប់គ្រងទេសន្តរប្រវេសន៍ការងាររវាងប្រទេសទាំងពីរ និងការផ្លាស់ប្តូរព័ត៌មាន ដើម្បីទប់ស្កាត់ការជ្រើសរើស និងប្រើប្រាស់ពលករខុសច្បាប់ ក៏ដូចជាការបង្ការ និងប្រយុទ្ធប្រឆាំងការកេងប្រវ័ញ្ចកម្លាំងពលកម្ម និងការជួញដូរមនុស្ស៕

ភ្នំពេញ ៖ រាជរដ្ឋាភិបាល​កម្ពុជា បាន​សម្រេច​ប្រគល់​ភារកិច្ច​ឱ្យ​ក្រសួង​មហាផ្ទៃ ក្រសួងការពារជាតិ និងក្រសួង​ការបរទេស និង​សហប្រតិបត្តិការ​អន្តរជាតិ​ ធ្វើការ​ចរចា​ជាមួយ​ភាគី​ថៃ ដើម្បី​សហការ​ដំឡើង​ច្រកទ្វារ​តំបន់​ព្រំដែន​ថ្មដា ខេត្ត​ពោធិ៍សាត់ ទៅជាច្រក​ទ្វារ​ព្រំដែន​អន្តរជាតិ។

គម្រោង​ដំឡើង​ច្រកទ្វារ​ព្រំដែននេះ ធ្វើឡើង​បន្ទាប់ពី​កម្ពុជា បាន​សម្ពោធ​ដាក់ឱ្យប្រើប្រាស់​ផ្លូវជាតិ​លេខ៥៥ តភ្ជាប់ពី​ផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែន​ថ្មដា ជាប់ជាមួយខេត្តត្រាត ប្រទេសថៃ កាលពីខែមីនា​កន្លងទៅ៕