ខេត្តសៀមរាប ៖ នៅព្រឹកថ្ងៃទី២៧ កក្កដា ឆ្នាំ២០២០ នៅសាលសន្និសីទអង្គរនៃអាជ្ញាធរជាតិអប្សរា បានរៀបចំបាឋកថាស្ដីពី «ព្រះពុទ្ធបដិមានៅអង្គរវត្ត» ដើម្បីចែករំលែកជុំវិញការងារដែលក្រុមអ្នកជំនាញអាជ្ញាធរជាតិអប្សរា បានប្រទះឃើញព្រះពុទ្ធបដិមាច្រើនអង្គ ក្នុងរណ្ដៅដីនៅជ្រុងនិរតីនៃប្រាសាទអង្គរវត្ត។ តាមបទបង្ហាញរបស់ក្រុមអ្នកជំនាញ បានបង្ហាញឱ្យឃើញច្បាស់ថា ការកប់នេះមិនមែនជាការកប់ចោលលេងៗនោះទេ តែជាការរៀបចំត្រឹមត្រូវ និងដោយការគោរពចំពោះបដិមាទាំងនោះ។

បុរាណវិទូ លោកស្រី ភិន វិជ្ជាសច្ចរ៉ា អំឡុងពេលធ្វើបាឋកថាបានរៀបរាប់ថា តាមការសិក្សាយ៉ាងលម្អិត និងត្រួតពិនិត្យនៅក្នុងរណ្ដៅកប់បំណែកព្រះពុទ្ធបដិមា ឃើញថាការកប់នេះមិនមែនជាការកប់បោះចោលនោះទេ។ លោកស្រីពន្យល់ថា ការកប់នេះគឺមានការយកចិត្តទុកដាក់បំផុត ដោយមានការកប់ជាដំណាក់ៗនិងដោយព្រឹត្តព្រៀងបំផុតដើម្បីចំណេញទីតាំង។

លោក អ៊ឹម សុខរិទ្ធី ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ ពន្យល់បន្ថែមថា ជាទូទៅសម្រាប់អ្នកមានជំនឿដែលជឿលើបដិមាដែលស័ក្ដិសិទ្ធិទាំងនោះ គឺតែងរៀបចំរូបដែលបាក់បែកនៅកន្លែងទីតាំងសមរម្យ តែមិនមែនមានន័យថាបោះចោលទេ។ តួយ៉ាងករណីនៅប្រាសាទអង្គរវត្តនេះ គឺចាស់បុរាណសម័យមុនទុកដាក់រៀបចំកប់ត្រឹមត្រូវ និងដោយការគោរពវត្ថុទាំងនោះ។

គួររំលឹកថា នៅពាក់កណ្ដាលខែមេសា ឆ្នាំ២០២០ ក្រុមការងាររបស់អាជ្ញាធរជាតិអប្សរានៃនាយកដ្ឋានគ្រប់គ្រងទឹក ក្នុងគម្រោងរៀបចំប្រព័ន្ធស្រោចស្រពស្មៅនៅបរិវេណប្រាសាទអង្គរវត្ត បានប្រទះឃើញបំណែកព្រះពុទ្ធបដិមាច្រើនអង្គក្នុងរណ្ដៅរួមមួយ។ បំណែកទាំងនោះមាន ដងខ្លួនព្រះពុទ្ធបដិមាសម័យក្រោយអង្គរ បំណែករូបសិល្បៈ សម្ភារប្រើប្រាស់ កាំបិទ ដប។ល។ ដែលតាមការសន្និដ្ឋានរូបទាំងនោះត្រូវបាននាំយកពីរូតព្រះពាន់ និងតាមការសន្និដ្ឋាន ការកប់នេះអាចធ្វើឡើងនៅអំឡុងឆ្នាំ១៩៨០ប៉ុណ្ណោះ៕

ភ្នំពេញ ៖ ក្រសួងសុខាភិបាល នៅថ្ងៃទី២៧ ខែកក្កដា ឆ្នាំ២០២០នេះ បានចេញសេចក្តីណែនាំមួយ ឱ្យប្រជាពលរដ្ឋខ្មែរទាំងអស់ បន្តអនុវត្តការការពារការចម្លងវីរុសកូវីដ-១៩ ឱ្យបានខ្ជាប់ខ្ជួន នៅក្នុងអំឡុងពេលឈប់សម្រាករយៈពេល៥ថ្ងៃ ចាប់ពីថ្ងៃទី១៧ ដល់២១ ខែសីហា ឆ្នាំ២០២០ ខាងមុខនេះ ដើម្បីសងថ្ងៃឈប់សម្រាកសម្រាប់ឱកាសបុណ្យចូលឆ្នាំថ្មី ប្រពៃណីខ្មែរ។

ក្នុងសេចក្តីណែនាំរបស់ខ្លួន ក្រសួងសុខាភិបាល បានបញ្ជាក់ថា៖ «ការអនុញ្ញាតឱ្យឈប់សម្រាកក្នុងរយៈពេលយូរនេះ បងប្អូនប្រជាពលរដ្ឋ នឹងអាចមានការធ្វើដំណើរទៅជួប ជុំក្រុមគ្រួសារនៅស្រុកកំណើត ឬក៏អាចមានការដើរលេងកម្សាន្តផងដែរ។ ក្នុងករណីនេះ សូមបងប្អូនប្រជាពលរដ្ឋទាំងអស់ បន្តអនុវត្តការការពារការចម្លងវីរុសកូវីដ-១៩ ឱ្យបានខ្ជាប់ខ្ជួន»។

ក្រសួងសុខាភិបាល បានបញ្ជាក់បន្តថា បើទោះបីជាប្រទេសកម្ពុជា មិនទាន់មានការចម្លងជំងឺកូវីដ-១៩ នៅក្នុងសហគមន៍ក៏ដោយ ក៏វីរុសកូវីដ-១៩ នេះ នៅតែកំពុងបន្តរាតត្បាតយ៉ាងខ្លាំងនៅលើពិភពលោក និងនៅក្នុងតំបន់ ហើយការរកឃើញវិជ្ជមានវីរុសកូវីដ-១៩ លើអ្នកដំណើរជាបន្តបន្ទាប់កន្លងមកនេះ បានមកពញ្ញាក់ស្មារតីបុគ្គលគ្រប់រូបកុំឱ្យភ្លេចខ្លួន ដោយបានបង្ហាញថា ការចម្លងវីរុសកូវីដ-១៩ នៅតែមាននៅឡើយ និងនៅតែជាហានិភ័យសម្រាប់មនុស្សគ្រប់រូប ទោះជាក្នុងរូបភាពនាំចូលមកក្នុងប្រទេសក៏ដោយ ក៏យើងមិនត្រូវមានការធ្វេសប្រហែស ដោយត្រូវការពារខ្លួន តាមការណែនាំឱ្យបានត្រឹមត្រូវ ហើយមិនត្រូវមើលរំលងនូវលទ្ធភាពនៃការចម្លងរហ័សនៃវីរុសដ៏កាចសាហាវនេះ ដែលនឹងអាចកើតមានគ្រប់ពេលវេលា គ្រប់កាលៈទេសៈ និងគ្រប់ទីកន្លែងទាំងអស់។

ដើម្បីការពារការចម្លងវីរុសកូវីដ-១៩ មកបុគ្គល និងចូលក្នុងសហគមន៍ ក្រសួងសុខាភិបាល សូមធ្វើការ ណែនាំក្រើនរំលឹកដល់សាធារណជនទាំងអស់ឱ្យប្រកាន់យកនូវការរស់នៅតាមបែបគន្លងថ្មី ដោយចេះកែប្រែទម្លាប់ និងឥរិយាបថ ប្រកបដោយការប្រុងប្រយ័ត្នខ្ពស់ និងនៅតែបន្តការការពារការចម្លងជំងឺកូវីដ-១៩នេះ ទោះជាក្នុងពេលវេលាណាទៅទីណា និងនៅកន្លែងណាក៏ដោយ៕

ភ្នំពេញ ៖ ក្រសួងព័ត៌មាន ក្រសួងប្រៃសណីយ៍ និងទូរគមនាគមន៍ និងរដ្ឋលេខាធិការដ្ឋាន អាកាសចរណ៍ស៊ីវិល បានចុះហត្ថលេខាព្រមព្រៀងគ្នាស្ដីអំពី «វិធានការទប់ស្កាត់ និងលុបបំបាត់ការឆ្លងរំខានចូលហ្វ្រេកង់ស៍ ប្រព័ន្ធឧបករណ៍នាំផ្លូវអាកាស នៅក្នុងដែនអាកាសនៃកម្ពុជា»។

ពិធីចុះហត្ថលេខា បានធ្វើឡើងដោយស្ថាប័នទាំងបី នាថ្ងៃទី២៧ ខែកក្កដា ឆ្នាំ២០២០ ក្រោមអធិបតីភាពលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន, លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នៅសាលប្រជុំព្រះវិហារ ទីស្ដីការក្រសួងព័ត៌មាន។

កិច្ចព្រមពៀងនេះ ធ្វើឡើងដោយសាតែកន្លងមកហ្រ្វេកង់ក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍ បានឆ្លងរំខានចូលហ្រ្វេកង់ស៍ ប្រព័ន្ធឧបករណ៍នាំផ្លូវអាកាសកម្ពុជា ដែលនាំឱ្យរំខានដល់បញ្ជាការហោះហើក្នុងផ្លូវអាកាស ឬធ្វើឱ្យមានការភាន់ច្រឡំ ដែលនឹងអាចមានបញ្ហាក្នុងការចុះចតយន្តហោះបង្កជាហានិភ័យខ្ពស់ផងដែរ។ ចំពោះបង្ហានេះ ក្រសួងព័ត៌មាន មានតួនាទីញែកហ្រ្វេកង់ស៍កុំឱ្យមានការរំខានគ្នា៕

ភ្នំពេញ ៖ ក្រសួងសុខាភិបាលបានឱ្យដឹងថា អ្នកជំងឺកូវីដ១៩ ចំនួន ៤នាក់ទៀតហើយ ត្រូវបានព្យាបាលឱ្យជាសះស្បើយ និងអនុញ្ញាតឱ្យត្រឡប់ទៅកាន់ផ្ទះរបស់ពួកគេ។

យោងតាមសេចក្តីជូនព័ត៌មានរបស់ក្រសួងសុខាភិបាល បានឱ្យដឹងថា អ្នកជំងឺទាំង ៤នាក់នេះរួមមាន ៖

– បុរសជនជាតិខ្មែរ អាយុ ២៣ឆ្នាំ មានអាស័យដ្ឋាននៅភូមិបន្ទាយព្រៃឃុំអណ្ដូងថ្ម ស្រុកព្រៃនប់ ខេត្តព្រះសីហនុ ជាអ្នកធ្វើដំណើរមកពីប្រទេសឥណ្ឌូណេស៊ី។ បុរសរូបនេះ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន ០២ដង និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។

– បុរសជនជាតិខ្មែរអាយុ ២៤ឆ្នាំ មានអាស័យដ្ឋាននៅភូមិ១ សង្កាត់ច្រាំងចំរើ ខណ្ឌឫស្សីកែវ រាជធានីភ្នំពេញ
– បុរសជនជាតិខ្មែរអាយុ ២៩ឆ្នាំ មានអាស័យដ្ឋាននៅភូមិទួលទោកឃុំកំពង់ហ្លួង ស្រុកពញ្ញាឮ ខេត្តកណ្ដាល
– បុរសជនជាតិខ្មែរអាយុ ៣០ឆ្នាំ មានអាស័យដ្ឋាននៅភូមិវិហារសម្បូរឃុំរកាពប្រាំកឃ្មុំ ខេត្តត្បូងឃ្មុំ។

អ្នកជំងឺទាំងបីខាងលើ ជាអ្នកដំណើរដែលបានវិលត្រឡប់មកពីប្រទេសអារ៉ាប់ប៊ីសាអូឌីត ត្រូវបានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសថ្លាដ-១៩ ចំនួន២ដង និងត្រូវបានអនុញ្ញាតឱ្យចេញពីមណ្ឌលសុខភាពចាក់អង្រែ រាជធានីភ្នំពេញ។

ក្រសួងសុខាភិបាល បានឱ្យដឹងថា គិតត្រឹមព្រឹកថ្ងៃទី២៧ ខែកក្កដា ឆ្នាំ២០២០នេះ កម្ពុជា មានរកឃើញអ្នកកើតជំងឺកូវីដ១៩ សរុបចំនួន ២២៥នាក់ (ស្ត្រី ៤៦នាក់ និងបុរស ១៧៩នាក់)។ ក្នុងនោះអ្នកព្យាបាលជាសះស្បើយមានចំនួន ១៤៧នាក់ មានស្រី ៣៩នាក់ និងបុរស ១០៨នាក់។

ដោយឡែកអ្នកកំពុងសម្រាកព្យាបាលមានចំនួន ៧៨នាក់ កំពុងសម្រាក់ព្យាបាលនៅមន្ទីរពេទ្យមិត្តភាពខ្មែរ-សូវៀតចំនួន ៥នាក់, នៅមណ្ឌលសុខភាពចាក់អង្រែចំនួន ៥៦នាក់ និងនៅមន្ទីរពេទ្យបង្អែកខេត្តកំពង់ស្ពឺចំនួន ១៥នាក់។ រីឯអ្នកជំងឺជាស្ត្រីជនជាតិអាមេរិក ២នាក់ សម្រាក់ព្យាបាលនៅស្ថានទូតអាមេរិក៕

ភ្នំពេញ ៖ ក្រសួងធនធានទឹក និងឧតុនិយម នៅព្រឹកថ្ងៃទី២៥ ខែកក្កដា ឆ្នាំ២០២០នេះ បានបង្ហាញស្ថានភាពកម្ពស់ទឹក នៅតាមបណ្តាស្ថានីយជលសាស្ត្រទាំង៨ រួមមានស្ថានីយ៖

១- ទន្លេមេគង្គ-ស្ទឹងត្រែង
២- ទន្លេមេគង្គ-ក្រចេះ
៣- ទន្លេមេគង្គ-កំពង់ចាម
៤- ទន្លេបាសាក់-ចតុមុខ
៥- ទន្លេមេគង្គ-អ្នកលឿង
៦- ទន្លេបាសាក់-កោះខែល
៧- ទន្លេសាប-ព្រែកក្តាម
៨- ទន្លេសាប-កំពង់លួង៕

ភ្នំពេញ ៖ បច្ចុប្បន្ននេះចំការចេកក្នុងប្រទេសកម្ពុជា រហូតដល់១៥ក្រុមហ៊ុន ដែលមានការដាំដុះដំណាំចេកមានចំនួនជាង៨០០០ហិកតា និងមានរោងចក្រវេចខ្ចប់ចំនួន២១កន្លែង ត្រូវបានរដ្ឋាភិបាលចិន អនុញ្ញាតឲ្យនាំចេញទៅប្រទេសចិន។ នេះបើយោងតាមការហ្វេសប៊ុកស្ថានទូតចិនប្រចាំនៅកម្ពុជា។

ស្ថានទូតចិនបញ្ជាក់នៅថ្ងៃទី២៥ ខែកក្កដា ឆ្នាំ២០២០នេះ បានបញ្ជាក់ឲ្យដឹងថា នាពេលថ្មីៗនេះរដ្ឋបាលគយប្រទេសចិនទើបអនុញ្ញាតឲ្យក្រុមហ៊ុនចំនួន៥ទៀត អាចវេចខ្ចប់ នាំចេញផ្លែចេករបស់ប្រទេសកម្ពុជា ទៅកាន់ប្រទេសចិន លើកទី៤ ទើបធ្វើឲ្យចំនួនក្រុមហ៊ុនកើនឡើងដល់១៥ក្រុមហ៊ុន។

Facebook ផ្លូវការរបស់ស្ថានទូតចិននៅកម្ពុជា បានចុះផ្សាយយ៉ាងដូច្នេះថា «កាលពីពេលថ្មីៗនេះ រដ្ឋបាលគយប្រទេសចិន បានសម្រេចអនុញ្ញាតក្រុមហ៊ុន Sing He Yi Agriculture Co., Ltd និង ក្រុមហ៊ុនកសិកម្មផ្សេងទៀតសរុបចំនួន៥ ជាសហគ្រាសចំការ និង រោងចក្រវេចខ្ចប់នាំចេញផ្លែចេក នៃប្រទេសកម្ពុជាទៅកាន់ប្រទេសចិនលើកទី៤។ រហូតមកដល់បច្ចុប្បន្ននេះ ចម្ការចេកក្នុងប្រទេសកម្ពុជា ដែលបានចុះឈ្មោះមានចំនួនរហូតដល់១៥ ក្រុមហ៊ុន ការដាំដុះដំណាំចេកមានចំនួនជាង ៨០០០ ហិកតា និងមានរោងចក្រវេចខ្ចប់ចំនួន ២១កន្លែង បានជួយលើកកម្ពស់យ៉ាងល្អប្រសើរ លើសមត្ថភាពកែច្នៃផលិតកម្ម ទម្រង់នៃការនាំចេញ និងការប្រកួតប្រជែងរបស់ដំណាំចេកនៅក្នុងប្រទេសកម្ពុជា»៕

ភ្នំពេញ ៖ នាយឧត្តមសេនីយ៍​ កែ​ គឹមយ៉ាន​ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន​អំពាវនាវដល់មន្រ្តីជួរមុខប្រឆាំងកូវីដ-១៩​ និងព្រះសង្ឃបន្តជួយផ្សព្វផ្សាយបង្ការបញ្ហាគ្រឿងញៀន។ ការអំពាវនាវបែបនេះ​ ខណៈដែលលោកអញ្ជើញជាអធិបតី​ដឹកនាំកិច្ចប្រជុំពេញអង្គអាជ្ញាធរជាតិប្រយុទ្ធប្រឆាំងគ្រឿងញៀន​នៅថ្ងៃទី​២៤​ ខែកក្កដា​ ឆ្នាំ​២០២០​ ដែលមានការអញ្ជើញចូលរួមពីលោក លោកស្រី​តំណាងក្រសួង-ស្ថាប័នជាអនុប្រធាន​ សមាជិកអាជ្ញាធរជាតិប្រយុទ្ធប្រឆាំងគ្រឿងញៀន​ និងឯកឧត្តម​ លោកជំទាវ​ ជាតំណាងស្ថាប័ន​ អង្គភាពអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន​ និងគណ:កម្មការផ្សព្វផ្សាយអប់រំ​ នៃគណ:កម្មការចម្រុះនិងលេខាធិការដ្ឋានយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាល។

ក្នុងឱកាសនោះ​ នាយឧត្តមសេនីយ៍​ កែ​ គឹមយ៉ាន​ បានមានប្រសាសន៍ថា​ ក្រសួងសុខាភិបាល​ ក្រសួងផែនការ​ ក្រសួងសង្គមកិច្ច​ ប៉ុស្តិ៍​នគរបាលរដ្ឋបាល​ និងព្រះសង្ឃ​ ដែលជាសកម្មជនជួរមុខក្នុងការផ្សព្វផ្សាយបង្ការជំងឺកូវីដ-១៩​ សូ​មបន្តយកចិត្តទុកដាក់បញ្រ្ជាបខ្លឹមសារប្រយុទ្ធប្រឆាំងគ្រឿងញៀនឱ្យបានសកម្មថែមទៀត​ ដេីម្បីបង្ការការរីករាលដាលជំងឺកូវីដ-១៩​ និងបញ្ហាគ្រឿងញៀន​ចូលទៅក្នុងសហគមន៍។

ក្នុងឱកាសនោះ​ដែរ​ នាយឧត្តមសេនីយ៍​ក៏បានជំរុញដល់ក្រសួងសាធារណការ និងដឹកជញ្ជូន ត្រូវពិនិត្យ និងរឹតបន្តឹងបន្ថែមទៀត ដល់ក្រុមអ្នកបើកបររថយន្តដឹកជញ្ជូនធំៗ បន្ទាប់ពីពិនិត្យឃើញថា អ្នកបើកបរទាំងនោះមានសារធាតុញៀនគ្រឿងញៀន រហូតដល់២៥ ទៅ៣០ភាគរយក្នុងរយៈពេល០៦ខែ ដើមឆ្នាំនេះ គឺមានអ្នកបើកបររថយន្ត រហូតដល់ជាង ២,០០០នាក់ ហើយក្នុងនោះប្រហែលជិត៧០០នាក់ ពិនិត្យឃើញនូវសារធាតុញៀន ។

ជាមួយនេះ​នាយឧត្តមសេនីយ៍​ កែ​ គឹមយ៉ាន​ បានណែនាំដល់ឱ្យគ្រប់ក្រសួងស្ថាប័នទាំងអស់បង្កើនសកម្មភាពផ្សព្វផ្សាយអប់រំ​តាមផេកថ្នាក់ដឹកនាំ​បោះពុម្ពឯកសារ​ផ្សព្វផ្សាយ​ អង្គភាពពាក់ព័ន្ធនៅមូលដ្ឋានត្រូវចុះអង្កេត​ អប់រំ​ ដល់គោលដៅងាយរងគ្រោះ​ ធ្វើកាតបណ្តុះបណ្តាល​ដល់ម្ចាស់អាជីវកម្ម​ រោងចក្រ​ ពង្រឹងប្រសិទ្ធភាពការងារព្យាបាលអ្នកញៀនគ្រឿងញៀននៅតាមមណ្ឌលសុខភាពឃុំ​សង្កាត់ទាំង៣៥០កន្លែង​ បង្កើតក្រុមការងារសម្របសម្រួលអ្នកញៀនគ្រឿងញៀនទៅទទួលយកសេវា​ព្យាបាល​ និងពង្រឹងយន្តការភូមិ​ ឃុំ​ សង្កាត់សគ្មានគ្រឿងញៀន​នៅតាមព្រំដែន៕