ភ្នំពេញ ៖ លោក Patrick Murphy ឯកអគ្គរដ្ឋទូតថ្មី របស់សហរដ្ឋអាមេរិកប្រចាំព្រះរាជាណាចក្រកម្ពុជា បានប្តេជ្ញាថា នឹងធ្វើឲ្យទំនាក់ទំនង កិច្ចសហប្រតិបត្តិការទ្វេភាគីកម្ពុជា និងអាមេរិកកាន់តែល្អប្រសើរថែមទៀត។ សម្តេចតេជោ ក៏ស្នើឲ្យភាគីទាំងពីរ ស្វែងយល់ពីគ្នាទៅវិញទៅមក ដើម្បីរឹតបន្តឹងមិត្តភាព និងពង្រីកកិច្ចសហប្រតិបត្តិការ។

នៅក្នុងជំនួប នាវិមានសន្តិភាព នៅរសៀលថ្ងៃទី២៣ តុលា នេះ សម្ដេចនាយករដ្ឋមន្ត្រីតេជោ ហ៊ុន សែន បានស្វាគមន៍ចំពោះលោកអគ្គរដ្ឋទូតអាមេរិកដែលទើបតែងតាំងថ្មីប្រចាំនៅកម្ពុជា។ សម្ដេចបានគូសបញ្ជាក់ថា អ្វីដែលភាគីទាំងពីរបន្តធ្វើនោះ គឺបន្តពង្រឹងពង្រីកទំនាក់ទំនងទ្វេភាគី ដោយសារតែកម្ពុជា និងអាមេរិកបានសហការគ្នាជាច្រើនវិស័យ។

សម្តេចបញ្ជាក់ថា វាជារឿងធម្មតាទេនៅក្នុងទំនាក់ទំនងទ្វេភាគី ដែលមានចំណុចខ្លះត្រូវការពេលវេលា ដើម្បីបន្តសហការគ្នា និងស្វែងយល់ពីគ្នាបន្ថែមទៀត។ជំនួបនាពេលនេះ ជាសញ្ញាមួយដ៏ល្អក្នុងការធ្វើការជាមួយគ្នាបន្តបន្ទាប់ទៀត រវាងមន្ត្រី និងសមាជិករាជរដ្ឋាភិបាល ជាមួយនឹងអាមេរិក ដោយធ្វើយ៉ាងណាពង្រីកនៅការស្វែងយល់ពីគ្នាទៅវិញទៅមក ពិសេសធ្វើយ៉ាងណារឹតបន្តឹងមិត្តភាព និងកិច្ចសហប្រតិបត្តិការលើវិស័យមួយចំនួនដែលមានស្រាប់ និងពង្រីកវិស័យមួយចំនួនថែមទៀត។ នេះគឺជាការបើកទំព័រថ្មីមួយទៀតក្នុងការពង្រីកនិងពង្រឹងកិច្ចសហប្រតិបត្តិការរវាងអាមេរិកនិងកម្ពុជា។ឆ្នាំក្រោយនេះគឺជាខួប៧០ ឆ្នាំនៃការបង្កើតទំនាក់ទំនងការទូតរវាងកម្ពុជាអាមេរិក សម្ដេចតេជោ និងអគ្គរដ្ឋទូត នឹងសហការគ្នាធ្វើសកម្មភាពមួយចំនួនដើម្បីអបអរសាទរនៃការភ្ជាប់ទំនាក់ទំនងការទូត៧០ឆ្នាំនេះ ផងដែរ។

គួរបញ្ជាក់ដែរថា កម្ពុជា នឹងសហរដ្ឋអាមេរិក មានកិច្ចសហប្រតិបត្តិការជាច្រើនជាមួយគ្នា ជាពិសេសគឺការរុករកអដ្ឋិធាតុរបស់ទាហានអាមេរិកដែលបានបាត់បង់ជីវិតនៅលើទឹកដីកម្ពុជា។ ក្នុងនោះក៏មានកិច្ចសហប្រតិបត្តិកាសម្រាប់អ្នកស្ម័គ្រចិត្តដើម្បីសន្តិភាព Peace Corp និងសហការលើវិស័យសុខាភិបាល វិស័យអប់រំជាដើម។ កន្លងទៅនេះអាមេរិក បានបញ្ជូនអ្នកស្ម័គ្រចិត្តរបស់ខ្លួនជាង៧០០នាក់តាមរយៈ Peace Corp ដើម្បីធ្វើការងារដូចជាការបង្រៀនការជួយដល់សហគមន៍ដើម្បីពង្រឹងទំនាក់ទំនងទ្វេភាគីរវាងប្រទេសទាំងពីរ។
នៅក្នុងឱកាសព្រះរាជពិធីបុណ្យអុំទូកខាងមុខ សម្ដេចតេជោស្នើឲ្យអគ្គរដ្ឋទូតអាមេរិក រៀបចំក្រុមប្រណាំងទូករបស់ក្រុមអ្នកស្ម័គ្រចិត្ត ដើម្បីសន្តិភាពចូលរួមប្រណាំងទូក ដើម្បីរឹតបន្តឹងចំណងមិត្តភាពរវាងប្រទេសទាំងពីរបន្ថែមទៀត និងការបន្តស្វែងយល់ពីគ្នាទៅវិញទៅមក លើផ្នែកវប្បធម៌។

លោកអគ្គរដ្ឋទូត បានបញ្ជាក់ដែរថា ខ្លួននឹងពាំនាំទៅដល់ក្រុមអ្នកស្ម័គ្រចិត្តដើម្បីសន្តិភាព ហើយថាឆ្នាំនេះ ឬឆ្នាំក្រោយ នឹងចូលរួមក្នុងការប្រណាំងទូក។

សម្តេចបញ្ជាក់ថា ការអុំទូកនេះមិនមែនដើម្បីចាញ់ឈ្នះទេក៏ប៉ុន្តែគឺដើម្បីពង្រឹងទំនាក់ទំនងកិច្ចសហប្រតិបត្តិការរវាងប្រទេសទាំងពីរ៕

ភ្នំពេញ ៖ សាធារណៈរដ្ឋប្រជាមានិត្យចិន បានសន្យាផ្តល់ចំនួនជាង ៦០០លានយ័ន ឬប្រហាក់ប្រហែលនឹង ៨៤លានដុល្លារអាមេរិគ ដល់កម្ពុជា ដើម្បីអភិវឌ្ឍន៍ និងបង្កើនសមត្ថភាពវិស័យការពារជាតិកម្ពុជា។ នេះជាការបញ្ជាក់របស់សម្តេចពិជ័យសេនា ទៀ បាញ់ ប្រមុខយោធាកម្ពុជា នៅអាកាសយានដ្ឋានអន្តរជាតិភ្នំពេញ។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងមន្ត្រីជាន់ខ្ពស់ក្រសួងការពារជាតិកម្ពុជា បានមកដល់កម្ពុជាវិញហើយនៅថ្ងៃនេះ ក្រោយបំពេញទស្សនកិច្ច៣ថ្ងៃ នៅប្រទេសចិន។ សម្តេចពិជ័យសេនា ទៀ បាញ់ បានបញ្ជាក់ថា កម្ពុជា-ចិនបានឈានដល់ការចុះកិច្ចព្រមព្រៀង ស្តីពីកិច្ចសហប្រតិបត្តិការរវាងកងទ័ពកម្ពុជា-ចិន។

តាមរយៈកិច្ចព្រមព្រៀងនេះ ចិនបានផ្តល់ជំនួយឥតសំណងជាង៦០០លានយ័ន ឬប្រហាក់ប្រហែលនឹង៨៤លានដុល្លារអាមេរិក ដល់កងយោធពលខេមរភូមិន្ទ ដើម្បីពង្រឹងសមត្ថភាពរបស់ខ្លួន។ ការចុះកិច្ចព្រមព្រៀងនេះ ត្រូវបានចុះហត្ថលេខារវាងរដ្ឋមន្រ្តីក្រសួងការពារជាតិ សម្តេចពិជ័យ ទៀ បាញ់ និងសមភាគីចិន គឺ លោកឧត្តមសេនីយ Wei Fenghe នៅទីក្រុងប៉េកាំង។

បើតាម លោក នាយឧត្តមសេនីយ៏ ឈុំ សុជាតិ អ្នកនាំពាក្យក្រសួងការពារជាតិ បានបញ្ជាក់ថា កិច្ចសហប្រតិបត្តិការរវាងកងទ័ពប្រទេសទាំងពីរ បានក្លាយទៅជាយន្តការមួយ ដែលបានជួយជំរុញដល់ការអភិវឌ្ឍទំនាក់ទំនងរវាងប្រទេសទាំងពីរកម្ពុជា និងចិន។ សម្តេចពិជ័យសេនាបានវាយតម្លៃខ្ពស់ និង មានជំនឿជឿជាក់ជាមួយតួនាទីដ៏សំខាន់មិនអាចខ្វះបានរបស់ប្រទេសចិន ជាពិសេសតួនាទីរបស់កងទ័ពរំដោះប្រជាជនចិន ដែលបានចូលរួមយ៉ាងស្វាហាប់ និង យ៉ាងមោះមុតក្នុងការកសាង និងអភិវឌ្ឍ ចំពោះសន្តិភាព និង ការអភិវឌ្ឍក្នុងតំបន់ ក៏ដូចជាក្នុងពិភពលោក។

សម្តេចពិជ័យសេនា បានថ្លែងអំណរគុណចំពោះការជួយជ្រោមជ្រែង ផ្តល់ការជួយឧបត្ថម្ភក្នុងការអនុវត្តកិច្ចសហប្រតិបត្តិការទ្វេរភាគី រវាងកងទ័ពទាំងពីរកម្ពុជា-ចិន ដូចជាការផ្លាស់ប្តូរគណៈប្រតិភូ ការបង្កើនកម្រិតនៃការធ្វើលំហាត់ហ្វឹកហ្វឺន បង្កើនប្រសិទ្ធភាពនៃការបណ្តុះបណ្តាលធនធានមនុស្ស រួមទាំងកិច្ចសហប្រតិបត្តិការកម្រិតតំបន់ និង អន្តរជាតិផងដែរ ដែលបានធ្វើឱ្យទំនាក់ទំនងកងទ័ពទាំងពីរកាន់តែរឹងមាំ៕

ភ្នំពេញ ៖ អភិបាលរាជធានីភ្នំពេញ លោក ឃួង ស្រេង បានដាក់កំហិត ដល់មន្ត្រីក្រោមឧិវាទ រដ្ឋ បាលរាជធានីភ្នំពេញកាត់បន្ថយការធ្វើដំណើរទៅក្រៅប្រទេស ក្នុងដំណាក់កាល ដែលរាជធានីភ្នំពេញ កំពុងត្រៀមខ្លួនធ្វើជាម្ចាស់ផ្ទះ ពិធីបុណ្យធំៗ នាពេលដ៏ខ្លីខាងមុខនេះ ដើម្បីរួមគ្នាបំពេញភារកិច្ច ឲ្យទទួលបានលទ្ធផលល្អ ក្នុងនោះមានបុណ្យឯករាជ្យជាតិ ៩វិច្ឆិកា ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ក្នុងខែវិច្ឆិកាខាងមុខនេះ។

លើសពីនេះ រាជធានីភ្នំពេញ ក៏បានត្រៀមខ្លួនធ្វើជាម្ចាស់ផ្ទះ នៃមហាសន្និបាតសមាគមអន្តរជាតិ នៃអភិបាលក្រុង ប្រើប្រាស់ភាសាបារាំង (AIMF) លើកទី៣៩ ដែលនឹងមានបណ្តាទីក្រុងជាសមាជិករបស់ AIMF ប្រមាណ ៣០០ទីក្រុង មកពីគ្រប់ទ្វីប ចូលរួមដែលនឹងប្រព្រឹត្តទៅនៅដើមខែធ្នូ ឆ្នាំ២០១៩ ខាងមុខនេះ ផងដែរ។

ការងារនេះ ត្រូវបានលោកអភិបាលរាជធានីភ្នំពេញ លើកឡើងនៅក្នុងកិច្ចប្រជុំត្រួតពិនិត្យវឌ្ឍនៈភាព របស់គណៈកម្មការ និងអនុគណៈកម្មការ រៀបចំមហាសន្និបាតកាលពីរសៀលថ្ងៃទី២២ខែតុលានៅសាលារាជធានីភ្នំពេញ។

លោកឃួង ស្រេងបានថ្លែងថា មហាសន្និបាតរបស់ AIMF ប្រព្រឹត្តទៅត្រូវនឹងខួបកំណើតលើកទី៤០ ថ្ងៃបង្កើតសមាគម AIMF និងខួប៤០ឆ្នាំ របស់កម្ពុជា ក្រោយថ្ងៃរំដោះពីរបបប្រល័យពូជសាសន៏ ក្រោមប្រធានបទ “ទីក្រុងដែលមានភាពធន់ ការគិតគូពីបញ្ហាប្រឈមនិងការស្ថាបនាទីក្រុងឡើងវិញ”។

លោកបានបន្តថា នេះជាកិត្តិយសធំធេងណាស់ សំរាប់រាជធានីភ្នំពេញ ក៏ដូចកិត្តិយសជាតិទាំងមូល ដែលទទួលបានប្រតិភូជាង៣០០ទីក្រុង ក្នុងពិភពលោក ធ្វើឲ្យកម្ពុជាពិសេសរាជធានីភ្នំពេញ កាន់តែល្បីល្បាញថែមទៀតលើឆាកអន្តរជាតិ៕

ភ្នំពេញ ៖ លោក គ្រីស្ទាន បឺហ្គឺ (Christian Berger) ឯកអគ្គរដ្ឋទូតថ្មីអាល្លឺម៉ង់ ប្រចាំកម្ពុជា នៅព្រឹកថ្ងៃទី២៣ ខែតុលា នេះ បានជម្រាបជូនសម្តេចនាយករដ្ឋមន្ត្រីកម្ពុជា នៅវិមានសន្តិភាពថា អាឡឺម៉ង់ នឹងបើកសភាពាណិជកម្មរបស់ខ្លួន ជាលើកដំបូងនៅក្នុងប្រទេសកម្ពុជា។

លោកបណ្ឌិត កៅ កឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឲ្យដឹងថា នៅក្នុងជំនួបនេះ សម្ដេចសង្ឃឹមថា ក្នុងពេលដែលឯកឧត្តមបំពេញបេសកម្មកាទូត នៅកម្ពុជានេះ ឯកឧត្តមខិតខំជួយជំរុញ ក្នុងការពង្រឹងពង្រីកទំនាក់ទំនង កិច្ចសហប្រតិបត្តិការទ្វេភាគី រវាងកម្ពុជានិងអាល្លឺម៉ង់ ឲ្យបានកាន់តែល្អប្រសើរថែមទៀត។ លោកឯកអគ្គរដ្ឋទូត បានសន្យាថា នឹងព្យាយាមឲ្យអស់លទ្ធភាព ក្នុងការចូលរួមចំណែក ក្នុងការបន្តពង្រីកពង្រឹងកិច្ចសហប្រតិបត្តិការ ទំនាក់ទំនងទ្វេភាគី រវាងអាល្លឺម៉ង់និងកម្ពុជា។ លោកបានគូសបញ្ជាក់ថា អាល្លឺម៉ង់ និងកម្ពុជា មានលក្ខណៈស្រដៀងគ្នា ក្នុងការអនុវត្តន៍ច្បាប់អន្តរជាតិ។ លោកអរគុណរដ្ឋាភិបាលកម្ពុជា ដែលគាំទ្របេក្ខភាពរបស់អាល្លឺម៉ង់ នៅអង្គការសហប្រជាជាតិ កន្លងទៅ។ លោក បានឲ្យដឹងថា ប្រទេសទាំងពីរ នៅមានសក្កានុពលជាច្រើនទៀត ក្នុងការជំរុញកិច្ចសហប្រតិបត្តិការជាមួយគ្នា។ ជាងនេះ លោកក៏បានជម្រាបជូនសម្ដេចផងដែរ ពាក់ព័ន្ធនឹងអ្វី ដែលជាការចាប់អារម្មណ៍បំផុតនោះ ឥឡូវនេះសភាពាណិជកម្មអាល្លឺម៉ង់ ចង់បើកការិយាល័យសភាពាណិជ្ជកម្ម ជាលើកដំបូង នៅកម្ពុជា ដោយសារក្រុមហ៊ុមអាល្លឺម៉ង់ធំៗ មានការចាប់អារម្មណ៍ទៅលើការរីកចម្រើន នៃសេដ្ឋកិច្ចកម្ពុជា ហើយមានបំណងចង់មកវិនិយោគបណ្ដាក់ទុន នៅកម្ពុជា ដូច្នេះអាល្លឺម៉ង់ និងគ្រោងបើកការិយាល័យ លើកដំបូងនៅកម្ពុជា។

ជាការឆ្លើយ តបសម្ដេចតេជោនាយករដ្ឋមន្ត្រី បានជម្រាបជូនថា ឥឡូវនេះបើមើលវិស័យសេដ្ឋកិច្ច និងពាណិជ្ជកម្មរវាងប្រទេសទាំងពីរ កំពុងតែមានការរីកចំរើនច្រើនហើយយើងក៏នាំចូលពីអាល្លឺម៉ង់ ច្រើនដែរ ដូចជារថយន្តជាដើម ហើយកម្ពុជាក៏នាំទំនិញ ទៅកាន់ប្រទេសអាល្លឺម៉ង់ក៏ច្រើនដែរ ដូចជាស្បែកជើង និងសម្លៀកបំពាក់។

សម្ដេចបន្ថែមថា កន្លងមកនេះ នៅកម្ពុជាបានសម្រេច ទិញម៉ាស៊ីនភ្លើង២គ្រឿង ក្នុងចំណោមពីរគ្រឿងនេះ មួយគ្រឿងបានទិញពីប្រទេសអាល្លឺម៉ង់ ហើយមិនត្រឹមតែប៉ុណ្ណោះ មានក្រុមហ៊ុនស្រាបៀរ ដែលប្រើប្រាស់បច្ចេកវិទ្យាអាឡឺម៉ង់ ក្នុងការផលិតស្រាបៀរនៅកម្ពុជា។ ដូច្នេះបើយើងពិនិត្យទៅលើវិស័យធុរកិច្ច និងពាណិជ្ជកម្ម រវាងប្រទេសទាំងពីរ មានទំនាក់ទំនងកាន់តែស៊ីជម្រៅ។

សម្តេចបន្តថា ដូច្នេះបំណងក្នុងការបើក ការិយាល័យសភាពាណិជ្ជកម្មអាល្លឺម៉ង់នៅកម្ពុជា គឺជារឿងល្អអាចចូលរួមចំណែកយ៉ាងសំខាន់ ក្នុងការជំរុញពាណិជ្ជកម្ម ដូចជាសេដ្ឋកិច្ចរវាងប្រទេសទាំងពីរ។
សម្ដេចតេជោ ក៏បានជម្រាបជូនផងដែរថា កម្ពុជាត្រៀមធ្វើជាម្ចាស់ផ្ទះ នៃកិច្ចប្រជុំកំពូលអាស៊ី-អឺរ៉ុប នៅឆ្នាំ២០ ២០ខាងមុខនេះស្របពេលដែលអាល្លឺម៉ង់ នឹងធ្វើជាប្រធានសហភាពអឺរុប៕