ខេត្តកំពង់ស្ពឺ ៖ បន្ទាប់ពីប្រពន្ធ័ផ្សព្វផ្សាយជាច្រើន បានផ្សាយរឿងក្រុមជនខិលខូច ឃុបឃិតគ្នាលក់ ដីរបស់រដ្ឋជាច្រើនកន្លែងមកនោះ ហើយបានដឹងដល់ប្រមុខថ្នាក់ដឹកនាំកំពូលនោះ ទីស្ដីការគណៈ រដ្ឋមន្ដ្រី នៅថ្ងៃទី១៧ ខែតុលា ឆ្នាំ២០១៩កន្លងទៅនេះ បាននិរាករណ៍លិខិតអនុញ្ញាត ឲ្យមានការ លក់ដីមន្ទីរកសិកម្ម រុក្ខាប្រមាញ់ និងនេសាទ ខេត្ដកំពង់ស្ពឺ ដែលមានទំហំជាង ១០ហិកតា ទៅឲ្យ ក្រុមហ៊ុនឯកជនមួយកាលពីពេលកន្លងទៅ។

កាលពីថ្ងៃទី២៦ ខែមិថុនា ឆ្នាំ២០១៩ ទីស្ដីការគណៈរដ្ឋមន្ដ្រី បានចេញលិខិតឲ្យក្រុមហ៊ុន ទូច សារិន ធ្វើការអភិវឌ្ឍនៅនឹងកន្លែង ដោយកាត់យកដីមន្ទីរកសិកម្មខេត្ដកំពង់ស្ពឺ ទំហំជាង១០ហិកតា ស្ថិតនៅភូមិចំការដូង ផ្លូវលេខ៤៤ សង្កាត់ច្បារមន ក្រុងច្បារមន ជាថ្នូរការសាងសង់អគារថ្មី នៅលើ ដីដែលនៅសេសសល់ជាង១២ហិកតា។

ក្រោយចេញសេចក្ដីសម្រេចខាងលើនេះ បាននាំឲ្យផ្ទុះការតវ៉ាពីមន្ដ្រីរដ្ឋបាលព្រៃឈើ និងមន្ដ្រី កសិកម្ម នៅក្នុងអង្គភាពរដ្ឋមួយនេះជាច្រើននាក់ ស្នើសុំកិច្ចអន្ដរាគមន៍ទៅថ្នាក់ដឹកនាំ ជាពិសេស សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា កុំឲ្យមានការលក់ទីតាំងមន្ទីរកសិកម្ម ទៅក្រុម ហ៊ុនឯកជន ដែលមានតម្លៃរាប់សិបម៉ឺនដុល្លារ។

យោងតាមលិខិតរបស់លោក ហ៉ីង ថូរ៉ាក់ស៊ី ដែលបណ្ដាញសារព័ត៌មាន ទទួលបាននៅថ្ងៃទី១៨ ខែតុលា ឆ្នាំ២០១៩ នេះ បានបញ្ជាក់ថា យោងតាមប្រសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន រាជរដ្ឋាភិបាលសម្រេចនិរាករណ៍ លិខិតលេខ៨៩៦ ស.ជ.ណ. កធ ចុះថ្ងៃទី២៦ ខែមិថុនា ឆ្នាំ២០១៩ របស់ទីស្ដីការគណៈរដ្ឋមន្ដ្រី។

សូមបញ្ជាក់ថា កាលពីពេលកន្លងទៅ មន្ត្រីរាជការស្ថិតក្នុងមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ បានភ្ញាក់ផ្អើលយ៉ាងខ្លាំង នៅគ្រាដែលបុគ្គលមួយចំនួន បានដើរទទួលលុយកក់ ពីក្រុមអ្នកទិញក្នុងខេត្តកំពង់ស្ពឺ និងមានអ្នកពីចម្ងាយរាប់សិបម៉ឺនដុល្លារ ដោយសន្យាកាត់ដីរដ្ឋមកឲ្យអ្នកទិញស្របច្បាប់ នាពេលដ៏ខ្លីខាងមុខ ហើយដីដែលគេគ្រោងលក់នោះ មានទីតាំងក្នុងខណ្ឌរដ្ឋបាលព្រៃឈើកំពង់ស្ពឺ ដីចំការប្រេងខ្យល់ ស្ថិតក្នុងភូមិព្រៃផ្តៅ ឃុំត្រពាំងគង ស្រុកសំរោងទង ដីសង្កាត់រដ្ឋបាលព្រៃឈើសំរោងទង ក្នុងភូមិ ផ្គង់ ស្រុកសំរោងទង រួមទាំងដីរបស់មន្ទីរកសិកម្មខេត្តផងដែរ ដែលគិតជាទឹកលុយរាប់លានដុល្លារ ឯណោះ។

ការបែកធ្លាយរឿងលក់ដីរបស់រដ្ឋជាច្រើនកន្លែង ហើយគ្មានអ្នកណាម្នាក់ដឹងសោះនោះ បានធ្វើឲ្យ មន្ត្រីកសិកម្ម និងមន្រ្តីរដ្ឋបាលព្រៃឈើ មានការហួសចិត្តយ៉ាងខ្លាំងរហូតប្រកាសនាំគ្នាតវ៉ាដល់ ឯកឧត្តម វ៉ី សំណាង អភិបាលនៃគណ:អភិបាលខេត្តកំពង់ស្ពឺ។

មានការលើកឡើងថា ដីរបស់រដ្ឋ នៃមន្ទីរកសិកម្មខេត្តដ៏ធំល្វឹងល្វើយ ពេលនេះ ត្រូវបានគេអង្កន់ពុះ ជាដីឡូត៍លក់ ហើយទទួលលុយកក់រាប់សិបម៉ឺនដុល្លាររួចហើយដោយគ្មាននរណាដឹងឡើយ ក្នុងនោះឲ្យតែដីរបស់កសិកម្ម ត្រូវក្រុមឈ្មួញដាក់តម្លៃរួចជាស្រេចក្នុងការចរចាលក់ ពិតជាមិនធម្មតា ! ។

តាមសេចក្តីរាយការណ៍ពីក្រុមមន្រ្តីទាំងនោះ ដីដែលគេកំពុងត្រៀមរត់ការលក់ទាំងអស់មាន ចំនួន៤កន្លែងរួមមាន៖
*ទី១៖ ដីទីតាំងខណ្ឌរដ្ឋបាលព្រៃឈើកំពង់ស្ពឺ
*ទី២៖ ដីស្នាក់ការសង្កាត់រដ្ឋបាលព្រៃឈើផ្គង់
*ទី៣៖ ដីចំការប្រេងខ្យល់ព្រៃផ្តៅ
*ទី៤៖ ដីមន្ទីរកសិកម្មមួយផ្នែក (បានទទួលលុយកក់មួយចំនួនហើយ) សរុបតម្លៃរាប់លានដុល្លារ ដែលមានក្រុមហ៊ុន ទូច សារិន ឌីវេឡុបម៉ិន ឯ.ក ជាអ្នកដេញថ្លៃ។

មន្ត្រីខាងលើមួយចំនួន បានលើកឡើងថា ដីទាំងនោះ បើសិនជាលក់មានតម្លៃរាប់សិបលានដុល្លារឯណោះ ដែលទាមទាត្រូវបង្កើតឲ្យមានគណៈកម្មាធិការត្រឹមត្រូវ ប្រជុំវាយតម្លៃ ព្រមទាំងមានការយល់ព្រមពីមន្ត្រីបម្រើក្នុងអង្គភាពគ្រប់គ្រងដីទាំងនោះជាមុន មិនគួរមករៀបចំលក់ដោយគ្មានការពិភាក្សាគ្នាបែបនេះឡើយ៕

ភ្នំពេញ ៖ ស្ថានទូតជប៉ុនប្រចាំនៅកម្ពុជា កាលពីរសៀលថ្ងៃទី១៧ ខែតុលាកន្លងទៅនេះ បានរៀបចំ ការប្រកួតដំណាក់ចុងក្រោយ ជ្រើសរើសបេក្ខជន បេក្ខនារីកម្ពុជា ចូលរួមកម្មវិធីផ្លាស់ប្តូរយុវជន Jeneseys ឆ្នាំ២០១៩។ នៅក្នុងការប្រកួតនេះ ស្ថានទូតជប៉ុន ប្រចាំនៅកម្ពុជា បានសម្រេចជ្រើស រើសបេក្ខជនបេក្ខនារីពីកម្ពុជា ចំនួន៦ក្រុម សរុប២៤រូប ចូលរួមប្រកួតប្រជែង និងបង្ហាញសមត្ថភាព ការច្រៀងរាំ សំដែងរឿង ក្រោមប្រធានបទ«ស្រុកកំណើតខ្ញុំ» ជាមួយបណ្តាយុវជនអាស៊ាន នៅ ប្រទេស ជប៉ុននៅដើមឆ្នាំ២០២០។

ថ្លែងនៅក្នុងពិធីនោះ លោកស្រី កាអូរិ តាណាបេ លេខាទី១ ប្រចាំស្ថានទូតជប៉ុន ប្រចាំនៅកម្ពុជា បានថ្លែងថា នៅក្នុងកម្មវិធីប្រកួតជ្រើសរើសបេក្ខជនបេក្ខនារីកម្ពុជា ចូលរួមកម្មវិធីផ្លាស់ប្តូរយុវជន Jeneseys ឆ្នាំ២០១៩ នេះ មានសិស្សនិស្សិតកម្ពុជា ប្រមាណជិត ៥០០នាក់ ដែលមាន១២២ ក្រុម បានតាក់តែងច្នៃប្រឌិតរឿងរ៉ាវពិតនៅក្នុងសង្គមខ្មែរ ក្រោមប្រធានបទ«ស្រុកកំណើតខ្ញុំ» មកធ្វើការប្រកួតប្រជែងដណ្តើមជ័យលាភី។

លោកស្រីបន្តថា នៅក្នុងការប្រកួតនេះ ចុងក្រោយគណៈកម្មការបានសម្រេចជ្រើសរើសក្រុមឆ្នើមចំនួន ៦ក្រុម សរុបបេក្ខជន ២៤រូប យកទៅចូលរួមប្រកួតប្រជែង និងបង្ហាញសមត្ថភាពរាំច្រៀង និងសំដែងសាច់រឿងនៅប្រទេសជប៉ុន ជាមួយបណ្តាបេក្ខជនយុវជន មកពីបណ្តាប្រទេសនានានៅ ក្នុងតំបន់អាស៊ាន នៅចុងខែមករា ដើមឆ្នាំ២០២០ខាងមុខនេះ។

លោក ស៊ឺ ទ្រី អនុប្រធាននាយកដ្ឋានយុវជន នៃក្រសួងអប់រំយុវជន និងកីឡា បានថ្លែងថា គ្រប់ការ បង្ហាញដែលមានការច្រៀងផង រាំផង និងសំដែងផងពីសំណាក់បេក្ខជនទាំងអស់ គឺសុទ្ធតែល្អទាំង អស់ ពិសេសគឺការសំដែងបង្ហាញអត្ថន័យជាប្រវត្តិសាស្ត្រ និងការរីកចំរើននៃតំបន់វប្បធម៌ទេស ចរណ៍នានា នៅតាមមូលដ្ឋាននានារបស់ប្រទេសកម្ពុជា។

លោក បន្តថា សម្រាប់បេក្ខជនឆ្នើមដែលជាប់ជ័យលាភីចុងក្រោយនេះ គឺក្រុមបេក្ខជនដែលមាន គំនិតការច្នៃរប្រឌិតខ្ពស់ជាងគេ ហើយការសំដែងគឺមានភាពទាក់ទាញ និងមានសាមគី្គភាពគ្នាល្អ ។

សូមបញ្ជាក់ថា កម្មវិធី JENESYS ២០១៩ មានគោលបំណងជំរុញការយល់ដឹង និងការកសាង ទំនុក ចិត្តទៅវិញទៅមក ក្នុងចំណោមប្រជាជនជប៉ុន និងបណ្ដាប្រទេសចូលរួម ដើម្បីកសាង មូល ដ្ឋាន គ្រឹះនៃកិច្ចសហប្រតិបត្តិការ និងចំណងមិត្តភាពនាពេលអនាគត៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដឹកនាំគណៈប្រតិភូជាន់ខ្ពស់កម្ពុជា ធ្វើដំណើរទៅកាន់ប្រទេសឥណ្ឌូនេស៊ីនៅរសៀលថ្ងៃទី១៩ ខែតុលា នេះ ដើម្បីចូលរួមពិធីស្បថ ចូលកាន់តំណែងថ្មីរបស់លោក ចូកូ វីដូដូ (Joko Widodo) ជាប្រធានាធិបតីឥណ្ឌូនេស៊ី។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដឹកនាំគណៈប្រតិភូជាន់ខ្ពស់ចាកចេញពីកម្ពុជា ហើយនៅរសៀលថ្ងៃសៅរ៏ ទី១៩ ខែតុលា នេះ ដើម្បីអញ្ជើញទៅចូលរួមជាភ្ញៀវកិត្តិយសក្នុងពិធីស្បថចូលកាន់តំណែងថ្មីរបស់ ឯកឧត្តមចូកូ វីដូដូ (Joko Widodo) ជាប្រធានាធិបតី និង លោក ម៉ារូហ្វ អាម៉ីន (Marut Amin) ជាអនុប្រធានាធិបតីនៃសាធារណរដ្ឋឥណ្ឌូនេស៊ី សម្រាប់ អាណត្តិ ២០១៩-២០២៤ ដែលនឹងប្រព្រឹត្តទៅនៅថ្ងៃទី២០ ខែតុលា ឆ្នាំ២០១៩ នៅទីក្រុង ហ្សាការតា ។ ប្រមុខរដ្ឋ/រដ្ឋាភិបាល និងតំណាងប្រទេសសមាជិកអាស៊ានឯទៀត ក៏នឹងមានវត្តមាន នៅក្នុងពិធីនោះផងដែរ។បើតាមរដ្ឋមន្ត្រីប្រតិភូនាយករដ្ឋមន្ត្រីបានឲ្យដឹងថា គណៈប្រតិភូអមដំណើរ សម្តេចតេជោ នាយករដ្ឋមន្ត្រី រួមមាន លោក ប្រាក់ សុខុន ឧបនាយករដ្ឋមន្ត្រីរដ្ឋមន្ត្រីការបរទេស និងសហប្រតិបត្តិការអន្តរជាតិ លោក អូស្មាន ហាស្សាន់ ទេសរដ្ឋមន្ត្រីទទួលបន្ទុក បេសកកម្ម ពិសេស ព្រមទាំងឥស្សរៈជនជាន់ខ្ពស់នៃរាជរដ្ឋាភិបាលមួយចំនួនផងដែរ។ តាមការគ្រោងទុក សម្តេចតេជោនាយករដ្ឋមន្រ្តី នឹងជួបដោយឡែកជាមួយឯកឧត្តម ចូកូ វីដូដូ ដើម្បីជូនពរជ័យដល់ លោកប្រធានាធិបតីឥណ្ឌូនេស៊ី ហើយនិងធ្វើការផ្លាស់ប្តូរយោបល់ អំពីកិច្ចសហប្រតិបត្តិការទ្វេ ភាគី និងពហុភាគី និងបញ្ហានានាដែលមានការចាប់អារម្មណ៍ដូចគ្នា​៕

ភ្នំពេញ ៖ ការបើកការដ្ឋានស្ថាបនាផ្លូវបើកលំហរមហាវិថី សម្ដេចតេជោ ហ៊ុន សែន ហៅផ្លូវ៦០ម៉ែត្រតភ្ជាប់ជាមួយនឹងផ្លូវ២៧១ស្ថិតនៅក្នុងភូមិសាស្ត្រភូមិ៧ សង្កាត់ចាក់អង្រែលើ ខណ្ឌមានជ័យ គ្រោងបញ្ចប់នៅចុងឆ្នាំ២០១៩នេះ ដើម្បីសម្រួលឲ្យការធ្វើចរាចររបស់ប្រជាពលរដ្ឋធ្វើដំណើរបានស្រួល ខណៈដែលផ្លូវខាងលើនេះ មានលក្ខណៈតូចចង្អៀតដោយសារតែមានផលប៉ះពាល់ជាមួយលំនៅដ្ឋានប្រជាពលរដ្ឋមួយចំនួននៅទីនោះ។ តែមកដល់ពេលនេះផលប៉ះពាល់ទាំងនោះត្រូវបានដោះស្រាយហើយ ដោយអនុវត្តតាមរូបមន្តឈ្នះឈ្នះរបស់សម្តេចតេជោ។

ដើម្បីអោយដំណើរការនៃការបើកការដ្ឋានស្ថាបនាផ្លូវតភ្ជាប់រវាងផ្លូវមហាវិថីសម្តេចតេជោហ៊ុនសែន (ផ្លូវ៦០ម៉ែត្រ) និងផ្លូវ២៧១ ឲ្យបានជោគជ័យទៅតាមគម្រោងដែលបានគ្រោងទុក អភិបាលនៃគណៈអភិបាលរាជធានីភ្នំពេញ លោក ឃួង ស្រេង កាលពីល្ងាចថ្ងៃទី ១៧ ខែតុលាឆ្នាំ២០១៩ នេះ បានដឹកនាំមន្ត្រីជំនាញ និងមន្ទីរពាក់ព័ន្ធចុះធ្វើការត្រួតពិនិត្យទីតាំងដែលត្រូវស្ថាបនា ក្រោយពីមានការដោះស្រាយផលប៉ះពាល់ជាមួយប្រជាពលរដ្ឋដែលរស់នៅលើផ្លូវនេះរួចរាល់ ហើយគ្រឿងចក្របាន និងកំពុងរុះរើផ្ទះជាមួយ និងការចាក់ដីបំពេញ ។

ក្នុងឱកាសនៃការចុះពិនិត្យមើលជាក់ស្ដែងនោះ លោកអភិបាលនៃគណៈអភិបាលរាជធានីភ្នំពេញបានជំរុញឲ្យក្រុមហ៊ុនធ្វើយ៉ាងណា ជម្រុញការងារនេះអោយបានលឿនដើម្បីបើកការដ្ឋានផ្លូវអ៊ុតកៅស៊ូ ដាក់អោយបងប្អូនប្រជាពលរដ្ឋបានធ្វើដំណើរនៅចុងឆ្នាំ២០១៩នេះ ។

តំណាងក្រុមហ៊ុន អាយ អេន ជី ហូលឌីង (ING Holding Co., Ltd) លោកកែវ សូថា នៅក្នុងខណៈដែលចុះពិនិត្យ នោះបានបញ្ជាក់ប្រាប់អ្នកសារព័ត៌មានឲ្យដឹងថា ការដោះស្រាយផលប៉ះពាល់ជាមួយប្រជាពលរដ្ឋនេះ គឺខាងក្រុមហ៊ុនអនុវត្តទៅតាមយុទ្ធសាស្រ្តឈ្នះ ឈ្នះរបស់សម្ដេចតេជោហ៊ុនសែនគឺប្រជាពលរដ្ឋបានទទួលយកនូវសំណងរបស់ក្រុមហ៊ុនដោយសប្បាយរីករាយក្នុងចិត្ត ដោយសារតែក្រុមហ៊ុនសាងសង់លំនៅដ្ឋានជូនពួកគាត់ អភិវឌ្ឍន៍នៅនឹងកន្លែង។ ដោយឡែកសម្រាប់ប្រជាពលរដ្ឋដែលរស់នៅក្នុងបឹងដែលរងផលប៉ះពាល់ដែរនោះ ក៏ទទួលបានលំនៅដ្ឋានធ្វើអំពីថ្មដោយអភិវឌ្ឍន៍នៅនឹងកន្លែងផងដែរដោយពួកគាត់ទទួលបានផ្ទះល្វែងនៅក្នុងបុរីនៅក្បែរនឹងទីតាំងដែលទទួលរងផលប៉ះពាល់នោះដែរ ។ ជាមួយនោះប្រជាពលរដ្ឋដែលមានបើកអាជីវកម្មនៅទីតាំងនេះ ខាងក្រុមហ៊ុនបានសាងសង់ផ្ទះជូនពួកគាត់នៅក្បែរទីតាំងដដែរ ហើយពួកគាត់នៅតែបន្តការបើកអាជីវកម្មបានដូចមុនដដែរ។

អ្វីដែលជាគម្រោងរបស់ ក្រុមហ៊ុន អាយ អេន ជី ហូលឌីង គឺការសហការ ជាអាជ្ញាធររាជធានីភ្នំពេញ បើកលំហរមហាវិថី សម្ដេចតេជោ ហ៊ុន សែន ហៅផ្លូវ៦០ម៉ែត្រតភ្ជាប់ជាមួយនឹងផ្លូវ២៧១ ដើម្បីសម្រួលឲ្យការដំណើររបស់ប្រជាពលរដ្ឋ បានធ្វើដំណើរស្រួល។

គួរបញ្ជាក់ថា មហាវិថីថ្មីមួយនេះ មិនត្រឹមតែជួយសម្រួលដល់ការរស់នៅប្រកបអាជីវកម្ម និងការធ្វើដំណើរដឹកជញ្ជូនទំនិញ កសិផល និងសេវាកម្មផ្សេងៗ ក្នុងភូមិសាស្រ្តសង្កាត់ចាក់អង្រែលើ ប៉ុណ្ណោះទេ ប៉ុន្តែជាយុទ្ធសាស្រ្ត នៃការតភ្ជាប់ពីតំបន់មួយទៅតំបន់មួយ និងជាការដោះស្រាយបញ្ហាប្រឈមចំពោះមុខ គឺការកកស្ទះចរាចរ ក្នុងរាជធានីភ្នំពេញ និងជាបច្ច័យដ៏ល្អ ក្នុងការកាត់បន្ថយការចំណាយ និងជំរុញឲ្យសេដ្ឋកិច្ចទីផ្សារ ប្រព្រឹត្តិប្រកបដោយប្រសិទ្ធភាព និងប្រសិទ្ធផល៕

ភ្នំពេញ ៖ នៅទីបញ្ជាការអគ្គបញ្ជាការកងទ័ពកូរ៉េ នាយឧត្តមសេនីយ៍ ប៉ាក ហានគី (Park Han Ki) អគ្គមេបញ្ជាការ កងទ័ពកូរ៉េ បានទទួលជួបពិភាក្សាការងារជាមួយ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក។ ក្នុងជំនួបនេះ នាយឧត្តមសេនីយ៍ បានសម្តែងក្តីសប្បាយរីករាយដែលឃើញការអភិវឌ្ឍរីកចំរើនឥតឈប់ឈររបស់ប្រទេសកម្ពុជា និងការពង្រឹងទំនាក់ទំនងរវាងប្រទេសជាតិទាំងពីរ ជាពិសេសការផ្លាស់ប្តូរទស្សនកិច្ច របស់ប្រមុខរដ្ឋ និងរដ្ឋាភិបាល។ នាយឧត្តមសេនីយ៍ បានបន្តថាក្រោមការផ្តួចផ្តើមគំនិតថ្មីរបស់មេបញ្ជាការកងទ័ពជើងគោកកម្ពុជានោះទំនាក់ទំនងកងទ័ពនៃប្រទេសទាំងពីរកាន់តែជិតស្និតគ្នា ហើយកងទ័ពកូរ៉េ នឹងបន្តពង្រឹងកិច្ចសហការជាមួយកងទ័ពកម្ពុជាទៅថ្ងៃអនាគត។

លោកឧត្តមសេនីយ៍ឯក ហ៊ុន ម៉ាណែត មេបញ្ជាការកងទ័ពជើងគោកកម្ពុជា បានរំលឹកពីទំនាក់ទំនងការទូតកម្ពុជា និងកូរ៉េ ជាពិសេសចាប់ពីឆ្នាំ ១៩៩៧ មក ប្រទេស និងប្រជាជន ទាំងពីរជាតិសាសន៍ បានយោគយល់ និងជួយគ្នា ស្ទើរគ្រប់វិស័យ នៅប្រទេសកម្ពុជា មានប្រជាជន កូរ៉េរស់នៅ ឯនៅប្រទេសកូរ៉េ ក៏មានប្រជាពលរដ្ឋខ្មែររស់នៅ។ ក្នុងវិស័យការពារជាតិ ប្រទេសកូរ៉េ ក៏បានរួមចំណែកក្នុងការអភិវឌ្ឍ តាមរយៈការបណ្តុះបណ្តាល ហ្វឹកហ្វឺន និងជំនួយមធ្យោបាយ សំភារ: បចេ្ចកទេសមួយចំនួនកន្លងទៅ។ លោក ឧត្តមសេនីយ៍ឯក ហ៊ុន ម៉ាណែត ជឿជាក់ថា ប្រទេសទាំងពីរ នឹងបន្តសហការបន្ថែមទៀតនៅពេលអនាគត៕