ភ្នំពេញ ៖ អ្នកនាំពាក្យគ្រប់ក្រសួង ស្ថាប័ន ក្នុងរាជធានី ខេត្ត ចំនួន ៥៤ស្ថាប័ន បានមកជួបជុំគ្នានៅព្រឹកថ្ងៃទី២១ ខែតុលា នេះ ដើម្បីពិភាក្សា ចែករំលែក រកវិធីសាស្ត្រទប់ស្កាត់ និងបន្សាបព័ត៌មានក្លែងក្លាយ ដែលមានគោលដៅបំភ្លៃ វិទ្ធង្សនា និងវិច្ឆេទកម្មបំផ្លាញសន្តិភាព និងសមិទ្ធផលរបស់រាជរដ្ឋាភិបាល។

ថ្លែងនៅក្នុងសិក្ខាសាលាស្តីពី«អភិបាលកិច្ចល្អ នៅក្នុងបរិបទលំហូរព័ត៌មាន នាយុគសម័យបច្ចេកវិទ្យាឌីជីថល» នៅស្តីការគណៈរដ្ឋមន្ត្រី ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានបញ្ជាក់ថា ភាពទូលំទូលាយ នៃវិថីព័ត៌មានដែលធ្វើចរាចរណ៏ដោយសំបូរបែប ទាំងរូបភាព ទាំងសម្លេង ទាំងទិន្នន័យ បានផ្តល់នូវឱកាស និងការប្រឈម ដល់មនុស្សជាតិគ្រប់ជាតិសាសន៏។ ព័ត៌មានចម្រុះ និងសំបូរបែប ជាមួយនឹងនិន្នាការបានធ្វើឲ្យអ្នកប្រើប្រាស់ត្រូវតែមានសមត្ថភាព ក្នុងកិច្ចធ្វើអត្តសញ្ញាណកម្ម ដើម្បីជ្រើសរើស និងប្រើប្រាស់ប្រយោជន៏របស់ខ្លួនជាដើម។

គួរកត់សំគាល់ដែរថា នៅកម្ពុជាអ្នកប្រើប្រាស់ប្រព័ន្ធទូរស័ព្ទបច្ចុប្បន្នមានជាង២០លានស៊ីមកាត បាននឹងកំពុងដំណើរការ និងចំនួនអ្នកប្រើប្រាស់ប្រព័ន្ធបណ្តាញសង្គមមានចំនួនជាង១១លានគណនី ដែលកំពុងប្រតិបត្តិការយ៉ាងសកម្ម។ រីឯក្រសួង ស្ថាប័នផ្លូវការរបស់ជាតិមានចំនួនត្រឹម២៩ និងរាជធានីខេត្តក្រុង មានចំនួន២៥ ដូច្នោះត្រូវទាមទារឲ្យមន្ត្រីធ្វើការយ៉ាងសកម្ម និងប្រសិទ្ធភាព ក្នុងការឆ្លើយតបជាមួយនឹងអ្នកប្រើប្រាស់ជាមធ្យមយ៉ាងហោចណាស់ជាង១០លាននាក់។

សាស្ត្រាចារ្យសារព័ត៌មាន លោក ឆាយ សុផល បានបញ្ជាក់ថា អ្នកនាំពាក្យ ត្រូវមានជំនាញច្បាស់លាស់ និងបត់បែន ដើម្បីឆ្លើយតបទៅនឹងសំណួររបស់ មហាជន ពិសេសអ្នកសារព័ត៌មាន។ អ្នកនាំពាក្យ និងអ្នកកាសែត គឺជាដៃគូមិនអាចខ្វះបាន ដែលរួមសហការគ្នាដោះស្រាយបញ្ហា។ លោកសាស្ត្រាចារ្យ ថា ធ្វើជាអ្នកនាំពាក្យកុំឲ្យខ្លាចអ្នកកាសែត តែត្រូវផ្តល់ព័ត៌មានដែលពិត និងច្បាស់លាស់ដល់ពួកគេ តែបើអ្នកកាសែតធ្វើខុសវិជ្ជាជីវៈ មន្ត្រីអាចប្តឹងអ្នកកាសែត ទៅតាមច្បាប់ស្តីពីសារព័ត៌មាន។

លោក ផាត់ សាលីន ប្រធានលេខាធិការដ្ឋាន អង្គភាពអ្នកនាំពាក្យរាជរដ្ឋាភិបាលកម្ពុជា បានឲ្យដឹងថា នេះគឺជាសិក្ខាសាលាលើកទី២ គោលបំណងដើម្បីទប់ស្កាត់ និងបន្សាបព័ត៌មានក្លែងក្លាយទាំងឡាយណា ដែលមានគោលដៅបំភ្លៃ វិទ្ធង្សនា និងវិច្ឆេទកម្មបំផ្លាញសន្តិភាព និងសមិទ្ធផលនានា ពិសេសមានទិសដៅពង្រឹងកម្លាំងសរុប គ្រប់ស្ថាប័ន គ្រប់អង្គភាព ក្នុងការគ្រប់គ្រង និងប្រើប្រាស់ព័ត៌មាន ដើម្បីពង្រឹងការយល់ដឹងដ៏ត្រឹមត្រូវ របស់សាធារណជន ដែលជាចំណែកមួយក្នុងភាពជាដៃគូ នៃកិច្ចថែរក្សាការពារជាតិ សាសនា ព្រះមហាក្សត្រ និងការអភិវឌ្ឍប្រកបដោយចីរភាព អភិបាលកិច្ចល្អ៕

ភ្នំពេញ ៖ តុលាការរាជធានីភ្នំពេញ សម្រេចផ្ដន្ទាទោសលោក សម រង្ស៊ី ក្នុងសំណុំរឿងថ្មីមួយទៀត ជាមួយមន្ត្រីបក្សប្រឆាំង ៣នាក់ គឺលោក ហូ វ៉ាន់ និងលោក កាក់ កុម្ភារ នៅថ្ងៃទី១៨ ខែតុលា ពាក់ព័ន្ធនឹងករណីបង្ហោះសារប្រមាថលោក ហ៊ុន សែន និងញុះញង់ឱ្យប្រព្រឹត្តបទឧក្រិដ្ឋជាអាទិ៍។

ចៅក្រមជំនុំជម្រះសាលាដំបូងរាជធានីភ្នំពេញ លោក ពេជ្រ វិជ្ជាធរ បានប្រកាសសាលក្រមផ្ដន្ទា ទោស លោក សម រង្ស៊ី អតីតតំណាងរាស្ត្របក្សប្រឆាំង លោក ហូ វ៉ាន់ និងអតីតសមាជិកប្រតិបត្តិបក្សសង្គ្រោះជាតិប្រចាំក្រុងភ្នំពេញ លោក កាក់ កុម្ភារ ឱ្យជាប់ពន្ធនាគារ ម្នាក់ៗ ១ឆ្នាំ ៨ខែ ពីបទផ្ដើមគំនិតក្នុងអំពើប្រមាថ និងញុះញង់ឱ្យប្រព្រឹត្តបទឧក្រិដ្ឋជាអាទិ៍។

ជាមួយគ្នានេះដែរ នៅរសៀលថ្ងៃទី១៨ ខែតុលា ដដែលនេះ សាលាដំបូងរាជធានីភ្នំពេញ ក៏បាន ចេញសាលក្រមដាច់ដោយឡែកមួយផ្សេទៀត ដោយផ្តន្ទាទោសឈ្មោះ គង់ ម៉ាស់ និងឈ្មោះ វឿន គឹមលន់ ដាក់ពន្ធនាគារម្នាក់ៗ ១ឆ្នាំ ៦ខែ ពីបទប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ដោយផ្អែកតាមបញ្ញតិ្តមាត្រា ៤៩៥ និងមាត្រា ៥០២ នៃក្រមព្រហ្មទណ្ឌ ដូចគ្នា។

បើតាមរបាយការណ៍របស់សមត្ថកិច្ច បង្ហាញថា ក្រោយការចាប់ខ្លួនក្រុមឧទ្ទាមទាំងនេះ សមត្ថកិច្ច បានរកឃើញមានឯកសារសំខាន់ៗជាច្រើន ដែលទាក់ទងនឹងផែនការប៉ុនប៉ងផ្តួលរំលំ រាជរដ្ឋាភិ បាល កម្ពុជា តាមបញ្ជារបស់លោក សម រង្សី។

គួរជម្រាបជូនផងដែរថា ក្នុងចំណោមជនជាប់ចោទទាំងនោះ គឺមានតែឈ្មោះ គង់ ម៉ាស់ ជាសកម្ម ជននៃអតីតគណបក្សសង្គ្រោះជាតិក្នុងខេត្តស្វាយរៀង ម្នាក់ប៉ុណ្ណោះ ដែលត្រូវបានសមត្ថកិច្ចឃាត់ ខ្លួនបាន នៅថ្ងៃទី១៦ ខែមករា ឆ្នាំ២០១៩ ហើយត្រូវបានតុលាការឃុំខ្លួនបណ្តោះអាសន្ននៅពន្ធនា គារ ព្រៃ ស ក្រោមការចោទប្រកាន់ពីបទប្រមាថ និងបទញុះញង់ឲ្យបង្កចលាចល កាលពីថ្ងៃទី១៩ ខែមករា ឆ្នាំ២០១៩។ ចំណែក លោក សម រង្ស៊ី វិញ កំពុងជាប់បណ្ដឹងនៅតុលាការចំនួន ១៥ បទ ល្មើសហើយ ដោយក្នុងនោះ ៩សំណុំរឿង មានសាលក្រមស្ថាពរ៕

ភ្នំពេញ ៖ គណៈប្រតិភូជាន់ខ្ពស់សភា នៃព្រះរាជាណាចក្រកម្ពុជា ដឹកនាំដោយលោកជំទាវកិត្តិសង្គហ បណ្ឌិត ឃួន សុដារី អនុប្រធានទី២ នៃរដ្ឋសភា និងជាប្រធានក្រុមសភាជាតិកម្ពុជា នៃអ្នកនយោ បាយ សភាស្រ្តី នាព្រឹកថ្ងៃទី១៩ តុលា បាននិវត្តន៍មកដល់មាតុប្រទេសវិញហើយ បន្ទាប់ពីបាន អញ្ជើញទៅចូលរួមហាសន្និបាតសហភាព អន្តរសភា (IPU) លើកទី១៤១ នៅទីក្រុងប៊ែលក្រាត សាធារណរដ្ឋស៊ែប៊ី ពីថ្ងៃទី១៣- ដល់១៧ ខែតុលា ឆ្នាំ២០១៩ ដោយគណៈប្រតិភូសភា កម្ពុជាបាន ហៅវេទិកាមហាសន្និបាតសហភាពអន្តរសភា (IPU) លើកទី១៤១ នេះថា ជា ជោគជ័យដ៏ធំធេង របស់សភាកម្ពុជា និងការបរាជ័យយ៉ាងអាម៉ាស់បំផុតរបស់លោក សម រង្ស៊ី។

សូមជម្រាបជូនថា មហាសន្និបាតសហភាពអន្តរសភា (IPU) លើកទី១៤១ នៅទីក្រុងប៊ែលក្រាត សាធារណរដ្ឋស៊ែប៊ី នេះ មានសមាជិកចូលរួមចំនួនជាង ២០០០នាក់ មកពី១៤៩ប្រទេស ក្នុងនោះ មានប្រធានសភាចំនួន ៧០នាក់ និងអនុប្រធានសភាចំនួន៤០ និងសមាជិក សមាជិកាសភា ក្នុងនោះសមាជិក សភាវ័យក្មេងប្រមាណ១៧% និងសមាជិកសភាជាស្រ្តី មានចំនួន៣០% រួមទាំង សមាជិកសង្កេតការណ៍ និងអង្គការដៃគូមួយចំនួន ដោយមហាសន្និបាតប្រព្រឹត្តទៅក្រោមមូលបទ ការពង្រឹងច្បាប់អន្តរជាតិ៖ តួនាទី យន្តការសភា និងការចូលរួមចំណែកកិច្ចសហប្រតិបត្តិការ ក្នុង តំបន់។ ថ្លែងក្នុងមហាសន្និបាតនេះលោកជំទាវ ឃួន សុដារី ប្រធានគណៈប្រតិភូសភាកម្ពុជា បាន សង្កត់ធ្ងន់ទៅលើសារៈសំខាន់នៃច្បាប់អន្តរជាតិ ក្នុងការថែ រក្សាសន្តិសុខ សន្តិភាព និងការអភិវឌ្ឍ ជាពិសេសការពង្រឹងយន្តការពហុភាគី ដែលមានលក្ខណៈទូលំទូលាយ ប្រកបដោយបរិយាប័ន្ន និងមានប្រសិទ្ធភាព ហើយជាមួយគ្នានេះលោកជំទាវក៏បានលើកឡើងពីភាពចាំបាច់ នៃការគោរព គោលការណ៍មិនជ្រៀតជ្រែកកិច្ចការផ្ទៃក្នុងរបស់រដ្ឋណាមួយ ការគោរពអធិបតេយ្យគ្នា ទៅវិញទៅ មក ការពឹងពាក់គ្នាទៅវិញទៅមកជាវិជ្ជមាន ដើម្បីកសាងសណ្តាប់ធ្នាប់ពិភពលោកមួយ ដែលផ្អែក លើវិធានច្បាប់ និងតួនាទីរបស់សភានៅក្នុងការជំរុញកិច្ចពិភាក្សា និងកិច្ចសហប្រតិបត្តិការអន្តរជាតិ ដោយសភាកម្ពុជាបាន ប្តេជ្ញាបន្តចូលរួមយ៉ាងសកម្មថែមទៀតក្នុងការគោរពសមភាព បរិយាប័ន្ន គោរពគ្នាទៅវិញទៅមក ភាពថ្លៃថ្នូរ និងសាមគ្គីភាពជាពិសេសកម្ពុជាបានស្នើបន្ថែមនូវគោលការណ៍ ពីរទៀត គឺពិពិធកម្ម និងការគោរពអធិបតេយ្យភាព ដែលជាសសរស្តម្ភដ៏សំខាន់នៃសន្តិភាព និងវិបុលភាពសកលលោក៕

ខេត្តកំពង់ស្ពឺ ៖ បន្ទាប់ពីប្រពន្ធ័ផ្សព្វផ្សាយជាច្រើន បានផ្សាយរឿងក្រុមជនខិលខូច ឃុបឃិតគ្នាលក់ ដីរបស់រដ្ឋជាច្រើនកន្លែងមកនោះ ហើយបានដឹងដល់ប្រមុខថ្នាក់ដឹកនាំកំពូលនោះ ទីស្ដីការគណៈ រដ្ឋមន្ដ្រី នៅថ្ងៃទី១៧ ខែតុលា ឆ្នាំ២០១៩កន្លងទៅនេះ បាននិរាករណ៍លិខិតអនុញ្ញាត ឲ្យមានការ លក់ដីមន្ទីរកសិកម្ម រុក្ខាប្រមាញ់ និងនេសាទ ខេត្ដកំពង់ស្ពឺ ដែលមានទំហំជាង ១០ហិកតា ទៅឲ្យ ក្រុមហ៊ុនឯកជនមួយកាលពីពេលកន្លងទៅ។

កាលពីថ្ងៃទី២៦ ខែមិថុនា ឆ្នាំ២០១៩ ទីស្ដីការគណៈរដ្ឋមន្ដ្រី បានចេញលិខិតឲ្យក្រុមហ៊ុន ទូច សារិន ធ្វើការអភិវឌ្ឍនៅនឹងកន្លែង ដោយកាត់យកដីមន្ទីរកសិកម្មខេត្ដកំពង់ស្ពឺ ទំហំជាង១០ហិកតា ស្ថិតនៅភូមិចំការដូង ផ្លូវលេខ៤៤ សង្កាត់ច្បារមន ក្រុងច្បារមន ជាថ្នូរការសាងសង់អគារថ្មី នៅលើ ដីដែលនៅសេសសល់ជាង១២ហិកតា។

ក្រោយចេញសេចក្ដីសម្រេចខាងលើនេះ បាននាំឲ្យផ្ទុះការតវ៉ាពីមន្ដ្រីរដ្ឋបាលព្រៃឈើ និងមន្ដ្រី កសិកម្ម នៅក្នុងអង្គភាពរដ្ឋមួយនេះជាច្រើននាក់ ស្នើសុំកិច្ចអន្ដរាគមន៍ទៅថ្នាក់ដឹកនាំ ជាពិសេស សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា កុំឲ្យមានការលក់ទីតាំងមន្ទីរកសិកម្ម ទៅក្រុម ហ៊ុនឯកជន ដែលមានតម្លៃរាប់សិបម៉ឺនដុល្លារ។

យោងតាមលិខិតរបស់លោក ហ៉ីង ថូរ៉ាក់ស៊ី ដែលបណ្ដាញសារព័ត៌មាន ទទួលបាននៅថ្ងៃទី១៨ ខែតុលា ឆ្នាំ២០១៩ នេះ បានបញ្ជាក់ថា យោងតាមប្រសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន រាជរដ្ឋាភិបាលសម្រេចនិរាករណ៍ លិខិតលេខ៨៩៦ ស.ជ.ណ. កធ ចុះថ្ងៃទី២៦ ខែមិថុនា ឆ្នាំ២០១៩ របស់ទីស្ដីការគណៈរដ្ឋមន្ដ្រី។

សូមបញ្ជាក់ថា កាលពីពេលកន្លងទៅ មន្ត្រីរាជការស្ថិតក្នុងមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ បានភ្ញាក់ផ្អើលយ៉ាងខ្លាំង នៅគ្រាដែលបុគ្គលមួយចំនួន បានដើរទទួលលុយកក់ ពីក្រុមអ្នកទិញក្នុងខេត្តកំពង់ស្ពឺ និងមានអ្នកពីចម្ងាយរាប់សិបម៉ឺនដុល្លារ ដោយសន្យាកាត់ដីរដ្ឋមកឲ្យអ្នកទិញស្របច្បាប់ នាពេលដ៏ខ្លីខាងមុខ ហើយដីដែលគេគ្រោងលក់នោះ មានទីតាំងក្នុងខណ្ឌរដ្ឋបាលព្រៃឈើកំពង់ស្ពឺ ដីចំការប្រេងខ្យល់ ស្ថិតក្នុងភូមិព្រៃផ្តៅ ឃុំត្រពាំងគង ស្រុកសំរោងទង ដីសង្កាត់រដ្ឋបាលព្រៃឈើសំរោងទង ក្នុងភូមិ ផ្គង់ ស្រុកសំរោងទង រួមទាំងដីរបស់មន្ទីរកសិកម្មខេត្តផងដែរ ដែលគិតជាទឹកលុយរាប់លានដុល្លារ ឯណោះ។

ការបែកធ្លាយរឿងលក់ដីរបស់រដ្ឋជាច្រើនកន្លែង ហើយគ្មានអ្នកណាម្នាក់ដឹងសោះនោះ បានធ្វើឲ្យ មន្ត្រីកសិកម្ម និងមន្រ្តីរដ្ឋបាលព្រៃឈើ មានការហួសចិត្តយ៉ាងខ្លាំងរហូតប្រកាសនាំគ្នាតវ៉ាដល់ ឯកឧត្តម វ៉ី សំណាង អភិបាលនៃគណ:អភិបាលខេត្តកំពង់ស្ពឺ។

មានការលើកឡើងថា ដីរបស់រដ្ឋ នៃមន្ទីរកសិកម្មខេត្តដ៏ធំល្វឹងល្វើយ ពេលនេះ ត្រូវបានគេអង្កន់ពុះ ជាដីឡូត៍លក់ ហើយទទួលលុយកក់រាប់សិបម៉ឺនដុល្លាររួចហើយដោយគ្មាននរណាដឹងឡើយ ក្នុងនោះឲ្យតែដីរបស់កសិកម្ម ត្រូវក្រុមឈ្មួញដាក់តម្លៃរួចជាស្រេចក្នុងការចរចាលក់ ពិតជាមិនធម្មតា ! ។

តាមសេចក្តីរាយការណ៍ពីក្រុមមន្រ្តីទាំងនោះ ដីដែលគេកំពុងត្រៀមរត់ការលក់ទាំងអស់មាន ចំនួន៤កន្លែងរួមមាន៖
*ទី១៖ ដីទីតាំងខណ្ឌរដ្ឋបាលព្រៃឈើកំពង់ស្ពឺ
*ទី២៖ ដីស្នាក់ការសង្កាត់រដ្ឋបាលព្រៃឈើផ្គង់
*ទី៣៖ ដីចំការប្រេងខ្យល់ព្រៃផ្តៅ
*ទី៤៖ ដីមន្ទីរកសិកម្មមួយផ្នែក (បានទទួលលុយកក់មួយចំនួនហើយ) សរុបតម្លៃរាប់លានដុល្លារ ដែលមានក្រុមហ៊ុន ទូច សារិន ឌីវេឡុបម៉ិន ឯ.ក ជាអ្នកដេញថ្លៃ។

មន្ត្រីខាងលើមួយចំនួន បានលើកឡើងថា ដីទាំងនោះ បើសិនជាលក់មានតម្លៃរាប់សិបលានដុល្លារឯណោះ ដែលទាមទាត្រូវបង្កើតឲ្យមានគណៈកម្មាធិការត្រឹមត្រូវ ប្រជុំវាយតម្លៃ ព្រមទាំងមានការយល់ព្រមពីមន្ត្រីបម្រើក្នុងអង្គភាពគ្រប់គ្រងដីទាំងនោះជាមុន មិនគួរមករៀបចំលក់ដោយគ្មានការពិភាក្សាគ្នាបែបនេះឡើយ៕

ភ្នំពេញ ៖ ស្ថានទូតជប៉ុនប្រចាំនៅកម្ពុជា កាលពីរសៀលថ្ងៃទី១៧ ខែតុលាកន្លងទៅនេះ បានរៀបចំ ការប្រកួតដំណាក់ចុងក្រោយ ជ្រើសរើសបេក្ខជន បេក្ខនារីកម្ពុជា ចូលរួមកម្មវិធីផ្លាស់ប្តូរយុវជន Jeneseys ឆ្នាំ២០១៩។ នៅក្នុងការប្រកួតនេះ ស្ថានទូតជប៉ុន ប្រចាំនៅកម្ពុជា បានសម្រេចជ្រើស រើសបេក្ខជនបេក្ខនារីពីកម្ពុជា ចំនួន៦ក្រុម សរុប២៤រូប ចូលរួមប្រកួតប្រជែង និងបង្ហាញសមត្ថភាព ការច្រៀងរាំ សំដែងរឿង ក្រោមប្រធានបទ«ស្រុកកំណើតខ្ញុំ» ជាមួយបណ្តាយុវជនអាស៊ាន នៅ ប្រទេស ជប៉ុននៅដើមឆ្នាំ២០២០។

ថ្លែងនៅក្នុងពិធីនោះ លោកស្រី កាអូរិ តាណាបេ លេខាទី១ ប្រចាំស្ថានទូតជប៉ុន ប្រចាំនៅកម្ពុជា បានថ្លែងថា នៅក្នុងកម្មវិធីប្រកួតជ្រើសរើសបេក្ខជនបេក្ខនារីកម្ពុជា ចូលរួមកម្មវិធីផ្លាស់ប្តូរយុវជន Jeneseys ឆ្នាំ២០១៩ នេះ មានសិស្សនិស្សិតកម្ពុជា ប្រមាណជិត ៥០០នាក់ ដែលមាន១២២ ក្រុម បានតាក់តែងច្នៃប្រឌិតរឿងរ៉ាវពិតនៅក្នុងសង្គមខ្មែរ ក្រោមប្រធានបទ«ស្រុកកំណើតខ្ញុំ» មកធ្វើការប្រកួតប្រជែងដណ្តើមជ័យលាភី។

លោកស្រីបន្តថា នៅក្នុងការប្រកួតនេះ ចុងក្រោយគណៈកម្មការបានសម្រេចជ្រើសរើសក្រុមឆ្នើមចំនួន ៦ក្រុម សរុបបេក្ខជន ២៤រូប យកទៅចូលរួមប្រកួតប្រជែង និងបង្ហាញសមត្ថភាពរាំច្រៀង និងសំដែងសាច់រឿងនៅប្រទេសជប៉ុន ជាមួយបណ្តាបេក្ខជនយុវជន មកពីបណ្តាប្រទេសនានានៅ ក្នុងតំបន់អាស៊ាន នៅចុងខែមករា ដើមឆ្នាំ២០២០ខាងមុខនេះ។

លោក ស៊ឺ ទ្រី អនុប្រធាននាយកដ្ឋានយុវជន នៃក្រសួងអប់រំយុវជន និងកីឡា បានថ្លែងថា គ្រប់ការ បង្ហាញដែលមានការច្រៀងផង រាំផង និងសំដែងផងពីសំណាក់បេក្ខជនទាំងអស់ គឺសុទ្ធតែល្អទាំង អស់ ពិសេសគឺការសំដែងបង្ហាញអត្ថន័យជាប្រវត្តិសាស្ត្រ និងការរីកចំរើននៃតំបន់វប្បធម៌ទេស ចរណ៍នានា នៅតាមមូលដ្ឋាននានារបស់ប្រទេសកម្ពុជា។

លោក បន្តថា សម្រាប់បេក្ខជនឆ្នើមដែលជាប់ជ័យលាភីចុងក្រោយនេះ គឺក្រុមបេក្ខជនដែលមាន គំនិតការច្នៃរប្រឌិតខ្ពស់ជាងគេ ហើយការសំដែងគឺមានភាពទាក់ទាញ និងមានសាមគី្គភាពគ្នាល្អ ។

សូមបញ្ជាក់ថា កម្មវិធី JENESYS ២០១៩ មានគោលបំណងជំរុញការយល់ដឹង និងការកសាង ទំនុក ចិត្តទៅវិញទៅមក ក្នុងចំណោមប្រជាជនជប៉ុន និងបណ្ដាប្រទេសចូលរួម ដើម្បីកសាង មូល ដ្ឋាន គ្រឹះនៃកិច្ចសហប្រតិបត្តិការ និងចំណងមិត្តភាពនាពេលអនាគត៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដឹកនាំគណៈប្រតិភូជាន់ខ្ពស់កម្ពុជា ធ្វើដំណើរទៅកាន់ប្រទេសឥណ្ឌូនេស៊ីនៅរសៀលថ្ងៃទី១៩ ខែតុលា នេះ ដើម្បីចូលរួមពិធីស្បថ ចូលកាន់តំណែងថ្មីរបស់លោក ចូកូ វីដូដូ (Joko Widodo) ជាប្រធានាធិបតីឥណ្ឌូនេស៊ី។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដឹកនាំគណៈប្រតិភូជាន់ខ្ពស់ចាកចេញពីកម្ពុជា ហើយនៅរសៀលថ្ងៃសៅរ៏ ទី១៩ ខែតុលា នេះ ដើម្បីអញ្ជើញទៅចូលរួមជាភ្ញៀវកិត្តិយសក្នុងពិធីស្បថចូលកាន់តំណែងថ្មីរបស់ ឯកឧត្តមចូកូ វីដូដូ (Joko Widodo) ជាប្រធានាធិបតី និង លោក ម៉ារូហ្វ អាម៉ីន (Marut Amin) ជាអនុប្រធានាធិបតីនៃសាធារណរដ្ឋឥណ្ឌូនេស៊ី សម្រាប់ អាណត្តិ ២០១៩-២០២៤ ដែលនឹងប្រព្រឹត្តទៅនៅថ្ងៃទី២០ ខែតុលា ឆ្នាំ២០១៩ នៅទីក្រុង ហ្សាការតា ។ ប្រមុខរដ្ឋ/រដ្ឋាភិបាល និងតំណាងប្រទេសសមាជិកអាស៊ានឯទៀត ក៏នឹងមានវត្តមាន នៅក្នុងពិធីនោះផងដែរ។បើតាមរដ្ឋមន្ត្រីប្រតិភូនាយករដ្ឋមន្ត្រីបានឲ្យដឹងថា គណៈប្រតិភូអមដំណើរ សម្តេចតេជោ នាយករដ្ឋមន្ត្រី រួមមាន លោក ប្រាក់ សុខុន ឧបនាយករដ្ឋមន្ត្រីរដ្ឋមន្ត្រីការបរទេស និងសហប្រតិបត្តិការអន្តរជាតិ លោក អូស្មាន ហាស្សាន់ ទេសរដ្ឋមន្ត្រីទទួលបន្ទុក បេសកកម្ម ពិសេស ព្រមទាំងឥស្សរៈជនជាន់ខ្ពស់នៃរាជរដ្ឋាភិបាលមួយចំនួនផងដែរ។ តាមការគ្រោងទុក សម្តេចតេជោនាយករដ្ឋមន្រ្តី នឹងជួបដោយឡែកជាមួយឯកឧត្តម ចូកូ វីដូដូ ដើម្បីជូនពរជ័យដល់ លោកប្រធានាធិបតីឥណ្ឌូនេស៊ី ហើយនិងធ្វើការផ្លាស់ប្តូរយោបល់ អំពីកិច្ចសហប្រតិបត្តិការទ្វេ ភាគី និងពហុភាគី និងបញ្ហានានាដែលមានការចាប់អារម្មណ៍ដូចគ្នា​៕