ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានទទួលពានរង្វាន់ «ភាពជាអ្នកដឹកនាំ និងអភិបាលកិច្ចល្អ» ពីអង្គការសហព័ន្ធសន្តិភាពសកល (UPF) ក្នុងកិច្ចប្រជុំកំពូលអាស៊ីប៉ាស៊ីហ្វិក លើកទី២ (2nd ASIA PACIFIC SUMMIT) ដែលប្រារព្ធធ្វើឡើង នៅព្រឹកថ្ងៃទី១៩ ខែវិច្ឆិកា ឆ្នាំ២០១៩ នាវិមានសន្តិភាព រាជធានីភ្នំពេញ។

ពានរង្វាន់ «ភាពជាអ្នកដឹកនាំ និងអភិបាលកិច្ចល្អ» ដែលត្រូវបានបំពាក់ជូនសម្តេចតេជោ ដោយផ្ទាល់ពីសំណាក់លោកជំទាវបណ្ឌិត Hak Ja Han Moon សហស្ថាបនិកសហព័ន្ធសន្តិភាពសកល។ នៅក្នុងសន្និសីទកាសែតក្រោយកិច្ចប្រជុំលោក រ៉ូបឺត គីថែល អ្នកនាំពាក្យអង្គការសហព័ន្ធសន្តិភាពសកល (UPF) បានបញ្ជាក់ថា ដោយសារតែសម្តេចតេជោ មានស្នាដៃនៃការដឹកនាំ ក្នុងការបិទបញ្ចប់ភ្លើងសង្គ្រាម កសាងនូវសុខសន្តិភាព ក៏ដូចជាអភិវឌ្ឍន៍មាតុភូមិកម្ពុជាឲ្យរីកចម្រើន រួមនឹងការចូលរួមចំណែក កសាងទំនាក់ទំនង និងជួយរក្សាសុខសន្តិភាពនៅក្នុងតំបន់ និងលើពិភពលោក។

ឆ្លើយតបចំពោះសំណួរអ្នកកាសែត ថាតើសហព័ន្ធសន្តិភាពសកល អាចដោះស្រាយបញ្ហាជម្លោះនានានៅក្នុងតំបន់អន្តរជាតិ បានដោយយ៉ាងរបៀបដែរ បើប្រទេសនីមួយមានអាវុធទំនើប តែងតែសង្ខើញដាក់គ្នាបែបនេះ? លោក រ៉ូបឺត គីថែល បានពន្យល់ថា មានតែការដោះស្រាយការជជែកគ្នា និងពិភាក្សាគ្នាប៉ុណ្ណោះ ទើបអាចដោះស្រាយបញ្ហាបាន។

លោក ឯក ថា អនុប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បាន បញ្ជាក់ ថា តាមរយៈសន្និសីទនេះ មេដឹកនាំទាំងស្ថាប័ននីតិប្រតិបត្តិ នីតិបញ្ញត្តិ សុទ្ធតែ បានកោតសរសើរចំពោះការខិតខំរបស់កម្ពុជា ក្នុងស្វែងរកសន្តិភាព ការបញ្ចប់សង្គ្រាម និងឈានទៅដល់ការផ្សះផ្សារជាតិនៅទូទាំងប្រទេស។ បទពិ សោធន៏របស់កម្ពុជា ជាមេរៀនដ៏ល្អបំផុតសម្រាប់ពិភពលោកយកធ្វើជាគំរូ ក្នុង ការប្រែក្លាយពិភពលោក ដែលកំពុងពុះពោរដោយជំលោះ និងសង្គ្រាមអាច ដោះស្រាយ និងស្វែងរកសន្តិភាពដោយសន្តិវិធី៕

ភ្នំពេញ ៖ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និង ឯកឧត្តម Christian Berger ឯកអគ្គរដ្ឋទូតនៃសាធារណរដ្ឋអាល្លឺម៉ង់ប្រចាំកម្ពុជាបានជួប ពិភាក្សាពិភាក្សាអំពីការបន្តពង្រឹង និង ពង្រីកកិច្ចសហប្រតិបត្តិការរវាងប្រទេសទាំងពីរ ហើយក្នុងកិច្ច ពិភាក្សានេះ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានសម្តែងនូវជំនឿចិត្តថា កិច្ចសហប្រតិបត្តិ ការទ្វេភាគីរវាងប្រទេសទាំងពីរ កម្ពុជា-អាល្លឺម៉ង់ នឹងត្រូវបានពង្រឹងពង្រីកថែមទៀតនៅលើគ្រប់វិស័យ។

លោកអគ្គបណ្ឌិតសភាចារ្យបានគូសបញ្ជាក់ថា កម្ពុជា និងអាល្លឺម៉ង់ មានប្រវត្តិនៃទំនាក់ទំនង និងកិច្ចសហប្រតិបត្តិការយូរលង់ណាស់មកហើយ។ កម្ពុជា សូមថ្លែងអំណរគុណចំពោះតួនាទីរបស់អាល្លឺម៉ង់ នៅក្នុងដំណើរការស្វែងរកសន្តិភាព និងការអភិវឌ្ឍនៅកម្ពុជាចាប់តាំងពីឆ្នាំ១៩៩២ រហូតមកដល់ បច្ចុប្បន្ន។ ជាក់ស្តែង កិច្ចសហប្រតិបត្តិការអភិវឌ្ឍន៍បានផ្តោតសំខាន់លើវិស័យអាទិភាពចំនួន៣គឺ អភិ វឌ្ឍន៍ជនបទ, ការគាំពារសង្គម និង អភិបាលកិច្ច ។

លោកឯកអគ្គរដ្ឋទូតអាល្លឺម៉ង់ បានវាយតម្លៃខ្ពស់ និងកោតសរសើរចំពោះការរីកចម្រើន និងផ្លាស់ប្តូរគួរឲ្យកត់សម្គាល់របស់កម្ពុជានាបរិការណ៍បច្ចុប្បន្នជាមួយការអភិវឌ្ឍ និងមានសុខសន្តិភាពពេញ លេញ ដែលសមិទ្ធផលទាំងនេះគឺកើតឡើងពីកិច្ចខិតខំប្រឹងប្រែងផ្ទាល់របស់រាជរដ្ឋាភិបាលកម្ពុជាតែម្តង។ ឯកឧត្តមបានបន្តថា ក្នុងរយៈពេល២០ឆ្នាំកន្លងមកនេះ កម្ពុជាសម្រេចបាននូវកំណើនសេដ្ឋកិច្ចខ្ពស់ និងរឹងមាំ ដែលកត្តាទាំងនេះបានធ្វើឱ្យកម្ពុជាផ្លាស់ប្តូរមុខមាត់យ៉ាងលឿនបំផុតលើ ឆាកអន្តរជាតិ។ ឈរលើហេតុផលពិតនៃការអភិវឌ្ឍទាំងនេះអាល្លឺម៉ង់ និងជួយគាំទ្រ និងបង្ហាញការពិតពីកិច្ចអភិវឌ្ឍន៍ នៅកម្ពុជា។

ក្នុងកិច្ចពិភាក្សានេះភាគីទាំងពីរបានសម្តែងនូវការរីករាយ និងវាយតម្លៃខ្ពស់ចំពោះកិច្ចសហប្រតិ បត្តិការហិរញ្ញប្បទាន ដែលទើបនឹងបញ្ចប់កិច្ចចរចាពាក់ព័ន្ធនឹងវិស័យថាមពល ដោយរដ្ឋាភិបាលអាល្លឺម៉ង់ តាមរយៈធនាគារអភិវឌ្ឍន៍អាល្លឺម៉ង់នឹងផ្តល់ឥណទានសម្បទានលើកទីមួយដល់កម្ពុជា ហើយភាគីទាំងពីរគ្រោងចុះហត្ថលេខាលើកិច្ចព្រមព្រៀងឥណទាននេះនៅមុនដំណាច់ឆ្នាំ២០១៩នេះ ៕

ភ្នំពេញ ៖ តាមរយៈស្ថានទូតជប៉ុនប្រចាំកម្ពុជា កាលពីល្ងាចថ្ងៃទី១៨ ខែវិច្ឆិកា នេះ បានចុះហត្ថលេខាផ្តល់ ជំនួយឥតសំណងរបស់រដ្ឋាភិបាលជប៉ុនចំនួន ១៩១.៧៤៤ដុល្លារ ដល់អង្គការ Nature Center Risen ក្រោមគ្រោងការណ៍ នៃកិច្ចសហប្រតិបត្តិការសេដ្ឋកិច្ចរបស់ជប៉ុន សម្រាប់ គម្រោងសម្រេចឱ្យបាននូវបរិស្ថានរស់នៅប្រកបដោយចីរភាពតាមរយៈការអប់រំបរិស្ថាន តាមបែបអនុវត្តជាដើម នៅវិទ្យាស្ថានគរុកោសល្យ (TEC) ឆ្នាំទី៣។

ពិធីចុះហត្ថលេខាលើជំនួយឥតសំណងនេះបានធ្វើឡើងដោយក្រោមវត្តមាន ឯកឧត្តម មិកាមិ ម៉ាសាហ៉ីរ៉ូ ឯកអគ្គរាជទូតជប៉ុនវិសាមញ្ញ និងពេញសមត្ថភាពប្រចាំកម្ពុជា និងលោកស្រី អ៊ីវ៉ាម៉ា មីយ៉ូកុ នាយិកាអង្គការ ature Center Risen នៅឯស្ថានទូតជប៉ុន។

ក្នុងគម្រោងនេះ អង្គការ Nature Center Risen នឹងបង្កើតប្រព័ន្ធបណ្តុះបណ្តាលអំពីបរិស្ថានអប់រំ ជាបន្តបន្ទាប់ចាប់ពីថ្នាក់មត្តេយ្យសិក្សា ដល់អនុវិទ្យាល័យ ក្នុងប្រទេសកម្ពុជា តាមរយៈការកែសម្រួលសៀវភៅណែនាំសម្រាប់គ្រូបោះពុម្ពសៀវភៅអប់រំ បរិស្ថាន និងផ្តល់ការគាំទ្រ ដល់មជ្ឈមណ្ឌលគរុកោសល្យមត្តេយ្យ។ វានឹងជួយធ្វើឱ្យប្រជាជនកម្ពុជា កាន់តែយល់ដឹងអំពីបញ្ហាបរិស្ថាន។

កម្មវិធីជំនួយឥតសំណង សម្រាប់គម្រោងអង្គការក្រៅរដ្ឋាភិបាលជប៉ុន បានចាប់ផ្តើមនៅប្រទេសកម្ពុជា តាំងពីឆ្នាំ២០០២ ដើម្បីគាំទ្រដល់សកម្មភាពអង្គការក្រៅរដ្ឋាភិបាលជប៉ុន ក្នុងកិច្ចខិតខំប្រឹងប្រែងដើម្បីជួយដល់ការអភិវឌ្ឍនិងស្ថាបនាប្រទេសកម្ពុជាឡើងវិញនៅតាមកម្រិតមូលដ្ឋាន។ចាប់តាំងពីឆ្នាំ២០០២មក រដ្ឋាភិបាលជប៉ុន បានផ្តល់ថវិកាជាង៣៧លានដុល្លារអាមេរិក ដល់គម្រោងចំនួន១២១ ដែលផ្តោតសំខាន់ទៅលើវិស័យអប់រំនៅកម្រិតមូលដ្ឋាន វិស័យសុខាភិបាល វិស័យកសិកម្ម និងសកម្មភាពបោសសម្អាតមីនក្នុងប្រទេសកម្ពុជា ។

តាមរយៈគម្រោងនេះយើងរំពឹងថា នឹងជួយលើកកម្ពស់ការយល់ដឹងរបស់ប្រជាជនកម្ពុជាអំពីការអភិរក្សបរិស្ថាន ដើម្បីអភិរក្សធម្មជាតិដ៏សម្បូរបែបរបស់កម្ពុជា និងកែលម្អបរិស្ថានរស់នៅរបស់ប្រជាជន៕

ភ្នំពេញ ៖ លោកបណ្ឌិត ម៉ូហាម៉េដ យូស៊ុហ្វកាឡា អតីតអនុប្រធានាធិបតីនៃសាធារណរដ្ឋឥណ្ឌូណេស៊ី ល្ងាចថ្ងៃទី១៨ ខែវិច្ឆិកា បានជួបសំណេះសំណាលជាមួយថ្នាក់ដឹកនាំឥស្លាមកម្ពុជាទូទាំងប្រទេសប្រមាណ ៤០០នាក់ នៅឯមជ្ឈមណ្ឌល់ម៉ូឌែន ៥ នារាជធានីភ្នំពេញ។ ជំនួបនេះធ្វើឡើងក្នុងឱកាសដែលលោកអញ្ជើញ ចូលរួមរួមក្នុងកិច្ចប្រជុំពូលអាស៊ី ប៉ាស៊ីហ្វិកលើកទី២ ដែលកម្ពុជាធ្វើជាម្ចាស់ផ្ទះ។

លោក អូស្មាន ហាស្សាន់ ទេសរដ្ឋមន្រ្តីទទួលបន្ទុកបេសកកម្មពិសេស ក្នុងនាមសហគមន៍ខ្មែរ-ឥស្លាមបានស្វាគមន៍យ៉ាងកក់ក្តៅចំពោះការអញ្ជើញសាកសួរសុខទុក្ខ និងសំណេះសំណាលពីសំណាក់ អតីតអនុប្រធានធិបតីសាធារណរដ្ឋឥណ្ឌូណេស៊ីដែលទើបតែបញ្ចប់អាណត្តិថ្មីៗនេះ ដែលជាការបង្ហាញពីភាពជាបងប្អូនរវាងប្រជាជនប្រទេសទាំង២ ជាពិសេសប្រជាជនឥណ្ឌូណេស៊ី និង សហគមន៍ខ្មែរឥស្លាម ដែលជានិច្ចកាលតែងតែមានទំនាក់ទំនងល្អ ដោយឥណ្ឌូណេស៊ីតែងតែ ជួយដោះស្រាយនូវតម្រូវការ ផ្សេងៗរបស់សហគមន៍ខ្មែរឥស្លាម។ ជាមួយគ្នានេះ លោកទេសរដ្ឋមន្ត្រីក៏បានជម្រាបអតីតអនុប្រធានា ធិបតីឥណ្ឌូណេស៊ី អំពីគោលនយោបាយសុខដុមបនីយកម្មក្រោមការដឹកនាំរបស់សម្តេចអគ្គមហាសេនា

បតីតេជោ ហ៊ុន សែន នាយករដ្ឋមន្រ្តីកម្ពុជា ដែលបានផ្តល់នូវតម្លៃ សិទ្ធិសេរីភាព និងដោះស្រាយរាល់ កង្វល់ និងតម្រូវការផ្សេងៗក្នុងក្របខណ្ឌជាតិ  វប្បធម៌ ប្រពៃណី ការប្រតិបត្តិសាសនា ដែលបានរួមរស់ ប្រកបដោយភាពសុខដុមរមនាជាមួយគ្នា។

ក្នុងឱកាសនេះ លោកអតីតអនុប្រធានាធិបតីឥណ្ឌូណេស៊ីបានចែករំលែកនូវបទពិសោធន៍ នានាក្នុងនាមជាថ្នាក់ដឹកនាំរបស់ប្រទេសធំមួយក្នុងតំបន់អាស៊ី ព្រមទាំងបានសម្តែងនូវការពេញចិត្ត ចំពោះជំនួបក្នុងភាពជាបងប្អូនជាមួយសហគមន៍ខ្មែរឥស្លាម។

គួរជម្រាបថា៖ លោក ម៉ូហាម៉េដ យូស៊ុហ្វកាឡា គឺជាមេដឹកនាំដែលគ្រប់គ្រងព្រះវិហារឥស្លាម ដែលមានជាង ៨០ម៉ឺនកន្លែងទូទាំងប្រទេសឥណ្ឌូណេស៊ី ហើយលោកស្វាគមន៍ជានិច្ចនូវការផ្សារភ្ជាប់ ទំនាក់ទំនងលើវិស័យសាសនា ក៏ដូចជាការផ្តល់អាហារូបករណ៍សិក្សានៅតាមសាកលវិទ្យាល័យនានាផងដែរ៕

ភ្នំពេញ ៖ មជ្ឈមណ្ឌលសកម្មភាពកំចាត់មីនកម្ពុជាហៅកាត់ថាស៊ីម៉ាក់ នៅថ្ងៃទី១៨ វិច្ឆិកា នេះ បានបន្តបើកវគ្គជំនាញ និងបណ្តុះបណ្តាលជំនាញបោសសំអាតមីន ជូនដល់កម្លាំងជំនាញរបស់កូឡុំប៊ីចំនួនជាង១០នាក់ នៅខេត្តសៀមរាប។

លោក អ៊ុ ភូមិរូ អគ្គនាយករងស៊ីម៉ាក់ បានឲ្យដឹងថា តាមរយៈគម្រោងនៃ កិច្ចសហប្រតិបត្តិការជាមួយចៃកា ស៊ីម៉ាក់បានធ្វើការងារលើការបណ្តុះបណ្តាលជំនាញបោសសំអាតយុទ្ធភ័ណ្ឌមិនទាន់ផ្ទុះជាមួយបណ្តាប្រទេសនានា ដើម្បីបង្កើនសមត្ថភាពរបស់គេ ក្នុងការ ជំរុញការអភិវឌ្ឍ និងការបោសសំអាតយុទ្ធភ័ណ្ឌ។ តាមយៈគម្រោងកិច្ចសហប្រតិបត្តិការត្បូងត្បូង ស៊ីម៉ាក់បានធ្វើការបណ្តុះបណ្តាលជំនាញជាច្រើន ដល់ប្រទេសអង់ហ្គោឡា អ៊ីរ៉ាក់ ជនជាតិ ឃឺត  ឡាវ សរុបចំនួន៥១៤ នាក់ក្នុងនោះមកពីអង់ហ្គោឡាចំនួន៦៥នាក់ កូឡុំប៊ីចំនួន១២៨នាក់ អ៊ីរ៉ាក់ និងឃឺត១៧៤នាក់។ ឯ.ឧ សង្ឃឹមថា សិក្ខាកាមរបស់ កូឡុំប៊ីទាំងអស់ នឹងខិតខំប្រឹងប្រែងរៀនសូត្រ រៀនជំនាញពីមន្ត្រីជំនាញរបស់ ស៊ីម៉ាក់ឲ្យទទួលបានចំណេះដឹង ក្នុងការយកទៅដោះស្រាយបញ្ហាមីននៅក្នុង ប្រទេសរបស់ខ្លួន។

លោក អ៊ុ សុភាវី បានឲ្យដឹងថា ការបណ្តុះបណ្តាលជំនាញបោសសំអាតយុទ្ធភ័ណ្ឌមិនទាន់ផ្ទុះ ដែលមានរយៈពេល២០ថ្ងៃនេះ នឹង ជួយពង្រឹងជំនាញបន្ថែមដល់កងកម្លាំងជំនាញរបស់កូឡុំប៊ី ឲ្យកាន់តែប្រសើរឡើងថែមទៀត តាមរយៈគម្រោង south-south cooperation ដែលគាំទ្រដោយ ចៃកា។ ឯ.ឧ អគ្គនាយករងស៊ីម៉ាក់ បញ្ជាក់ថា វគ្គបណ្តុះបណ្តាលនេះ នឹងត្រូវ ធ្វើឡើងនៅថ្ងៃទី១៨ វិច្ឆិកា ដល់ថ្ងៃទី១៣ ខែធ្នូ។

នេះជាលើកទី៥ ហើយដែលស៊ីម៉ាក់ បានធ្វើការបណ្តុះបណ្តាលជំនាញបោសសំអាតយុទ្ធភ័ណ្ឌមិនទាន់ផ្ទុះ។ គម្រោងនេះគ្រោងនឹងបញ្ចប់នៅឆ្នាំ២០២២ ក្រោមការជួយគាំទ្រពីទីភ្នាក់ ងារ។ សូមជម្រាបដែរថា កាលពីវគ្គសិក្សាចំនួន៤វគ្គកន្លងទៅ ស៊ីម៉ាក់បានធ្វើការ បណ្តុះបណ្តាលទ្រឹស្តី និងការអនុវត្តផ្ទាល់ជំនាញបោសសំអាតយុទ្ធភ័ណ្ឌមិនទាន់ផ្ទុះកំរិតបី បណ្តុះបណ្តាលជំនាញ MDD ការគ្រប់គ្រងគ្រាប់មីន ការកំណត់តំបន់អាទិភាព និងគម្រោងទៅលើដីចំការមីន៕

ភ្នំពេញ ៖ ​ថ្លែងក្នុងពិធីប្រារព្ធ​ទិវា​ជាតិ​អេកូ​ទេសចរណ៍​លើក​ទី​១​ អម​ជាមួយ​ពិធី​ប្រកាស​ដាក់​ឲ្យ​ប្រើប្រាស់​គោលនយោបាយ​ជាតិ​អេកូ​ទេសចរណ៍​ឆ្នាំ​២០១៩-២០៣០ សម្តេចក្រឡាហោម ស ខេង បាន​ជំរុញឲ្យ​ស្ថាប័ន​ចំនួន​៣បង្កើន​ការ​បញ្ជ្រាប​សកម្មភាព​ទេសចរណ៍​ទៅក្នុង​សហគមន៍​នានា​ទៀត​ដើម្បីឲ្យ​សហគមន៍​ទាំងនោះ ​ទទួល​ការ​ទាក់ទាញ​ភ្ញៀវទេសចរ​ជាតិ​អន្តរជាតិ​អញ្ជើញ​ទៅ​ទស្សនា​ ស្នាក់នៅ​កម្ពុជា​បានយូរ ​ជាពិសេស​ការទទួលបាន​ចំណូល​ទៅក្នុង​សហគមន៍ ​និង​បាន​ទទួលបាន​អត្ថប្រយោជន៍​ផ្សេងៗ​ទៀត​ ពី​វិស័យ​ទេសចរណ៍​។

ស្ថាប័នទាំង៣នោះ​រួមមាន​ ៖ ក្រសួង​​ទេសចរណ៍ ក្រសួងបរិស្ថាន និង​ក្រសួងកសិកម្ម​រុក្ខាប្រមាញ់​ និង​នេសាទ​។ បន្ថែមលើនេះសម្តេច​ក្រឡាហោម ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ ​បានស្នើ​ឲ្យ​បណ្តា​ក្រសួង​ស្ថាប័ន​ពាក់ព័ន្ធ​នានា​បន្ត​សហការ​ជាមួយ​ក្រសួងទេសចរណ៍ ​ដើម្បី​ពង្រីក​គោលដៅ​ទេសចរណ៍​នៅ​កម្ពុជា​ឲ្យបាន​ច្រើន។

សម្តេច​ក្រឡាហោម ស ខេង មានប្រសាសន៍ថា នៅពេល​បច្ចុប្បន្ននេះ ​ទូទាំងប្រទេស​សហគមន៍​មានច្បាប់​អនុញ្ញាត ​ត្រឹម​ត្រូវ​មាន​ប្រមាណ​ជាង ២៣០០​សហគមន៍ ​និង​មាន​សក្ដានុពល​ក្នុង​វិស័យ​ទេសចរណ៍ ប៉ុន្តែ​នៅពេលនេះ ​មាន​សហគមន៍​ប្រមាណ​តែ ជាង​១២៥​ប៉ុណ្ណោះ ​ដែលមាន​សកម្មភាព​ទេសចរណ៍ និង​មាន​ការ​ផ្តល់សេវា​ល្អ​ជូន​ភ្ញៀវទេសចរ​ទៅ​ទស្សនា​កំសាន្ត​។

ទន្ទឹមនឹងនេះ​ សម្តេច​ក្រឡាហោម ស ខេង ក៏បាន​ស្នើឲ្យ​វិស័យ​ឯកជន ពិសេស​បណ្តា​ធនាគារ​គ្រឹះស្ថាន​មីក្រូហិរញ្ញវត្ថុ ពិនិត្យ​ពិចារណា​បន្ធូរបន្ថយ ​អាត្រា​ការប្រាក់ ​ផ្តល់​ប្រាក់​កម្ចី​ជូន​បណ្តា​សហគមន៍​នានា ​ដើម្បីអោយ​គេ​មានលទ្ធភាព​ពង្រីក​សកម្មភាព​ទេសចរណ៍​នៅក្នុង​សហគមន៍​របស់គេ​៕

ភ្នំពេញ ៖ តាមសេចក្តីប្រកាសព័ត៌មាន នៃលទ្ធផលកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែតុលា ឆ្នាំ២០១៩បានបង្ហាញថា រយៈពេល១០ខែ ឆ្នាំ២០១៩នេះ អគ្គនាយកដ្ឋានពន្ធដារប្រមូលចំណូលពន្ធ-អាករបានចំនួន ៩ ៦១៦.៨៣ ប៊ីលានរៀល ស្មើនឹងប្រមាណ ២,៤០៤.២១ លានដុល្លារអាមេរិកកើនឡើង២៨.៣១% បើប្រៀបធៀបនឹងរយៈពេលដូចគ្នានៃឆ្នាំ២០១៨។

បើតាមប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លោក គង់ វិបុល បានបញ្ជាក់ថា កំណើននៃការប្រមូលពន្ធរបស់អគ្គនាយកដ្ឋានពន្ធដារ ព្រោះការអនុវត្តដោយជោគជ័យនូវប្រព័ន្ធស្នើសុំបង្វិលសងអាករលើតម្លៃបន្ថែម (E-VAT Refund) ដែលបច្ចុប្បន្នអ្នកជាប់ពន្ធ និងសហគ្រាស មានការយល់ដឹងច្រើន ក៏ដូចជាការខិតខំប្រឹងប្រែងប្រមូលចំណូលពន្ធរបស់ថ្នាក់ដឹកនាំ និងមន្ត្រីពន្ធដារគ្រប់ជាន់ថ្នាក់។

បន្ថេមលើសនេះ លោកបានណែនាំដល់គ្រប់អង្គភាព ឱ្យបន្តខិតខំពង្រឹងការអនុវត្តច្បាប់ វិន័យការងារ ប្រកបដោយប្រសិទ្ធភាព និងត្រូវមានភាពទន់ភ្លន់តែម៉ឺងម៉ាត់ និងគ្រប់ជ្រុងជ្រោយដោយប្រកាន់នូវទម្លាប់ហ្មត់ចត់ លើកិច្ចការតូចតាច ទើបអាចមានឱកាសទទួលកិច្ចការធំបាន ដែលនេះជាប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា៕

ភ្នំពេញ ៖ រាជរដ្ឋាភិបាលកម្ពុជានៅយប់ថ្ងៃទី១៨ ខែវិច្ឆិកា ឆ្នាំ២០១៩នេះបានចេញសារាចរណែនាំមួយស្តីពីពីការចូលរួមគោរពព្រះវិញ្ញាណក្ខន្ធព្រះបរមសព សម្តេចបុត្រី ព្រះរៀម នរោត្តម បុប្ផាទេវី ដែលបានយាងសោយទិវង្គតនៅថ្ងៃនេះក្នុងព្រះជន្មាយុ ៧៧ព្រះវស្សា កំណត់យកថ្ងៃទី២០ ខែវិច្ឆិកា ជាថ្ងៃកាន់ព្រះរាជមរណទុក្ខជាផ្លូវការ។ 

ក្នុងសារាចរនេះ រាជរដ្ឋាភិបាលបានណែនាំឱ្យគ្រប់ក្រសួង ស្ថាប័ន សាលារៀន មន្ទីរពេទ្យរបស់រដ្ឋ ឯកជនទាំងអស់ និងមន្ត្រីរាជការ កងកម្លាំងប្រដាប់អាវុធគ្រប់ប្រភេទ គ្រប់ទីវត្តអារាម ព្រមទាំងប្រជាជនទូទាំងប្រទេស ត្រូវបង្ហូតទង់ជាតិត្រឹមពាក់កណ្តាលនៃដងទង់ជាតិ ហើយគ្រប់ស្ថានីយវិទ្យុ និងទូរទស្សន៍ជាតិ និងឯកជនទាំងអស់ ត្រូវផ្អាកការសម្តែង និងការចាក់ផ្សាយនូវទស្សនីយភាពផ្សេងៗ ដែលមានលក្ខណៈសប្បាយគគ្រឹកគគ្រេងនៅថ្ងៃទី២០ ខែវិច្ឆិកា ឆ្នាំ២០១៩។

សូមជម្រាបថា សម្តេចរាជបុត្រី ព្រះរៀម នរោត្តម បុប្ផាទេវី ឧត្តមក្រុមប្រឹក្សាផ្ទាល់ព្រះមហាក្សត្រ សមាជិកក្រុមប្រឹក្សាធម្មនុញ្ញ និងជាអតីតរដ្ឋមន្ត្រីក្រសួងវប្បធម៌ និងវិចិត្រសិល្បៈ បានយាងសោយព្រះទិវង្គតនៅថ្ងៃចន្ទ ៧រោច ខែកក្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៨ ខែវិច្ឆិកា ឆ្នាំ២០១៩នេះ វេលាម៉ោង ១២៖៣០នាទីថ្ងៃត្រង់ ដោយព្រះរោគាពាធ៕