ភ្នំពេញ ៖ ថៅកែឃ្លាំងទិញលក់រថយន្តបោកប្រាស់មួយកន្លែង ដែលប្រើល្បិចលក់រថយន្ត«ខ្យល់»ហើយប្រមូលប្រាក់កក់ប្រមាណជិត ១លានដុល្លាររត់បាត់ ត្រូវបានប្រជាពលរដ្ឋដែលជាអ្នកចាញ់បោកតាមរកឃើញ និងប្តឹងនគរបាលការិយាល័យព្រហ្មទណ្ឌកំរិតស្រាលនៃនាយកដ្ឋានព្រហ្មទណ្ឌក្រសួងមហាផ្ទៃអោយជួយឃាត់ខ្លួនយកទៅដោះស្រាយគ្នាតាមច្បាប់។

ហេតុការណ៍នេះ បង្កអោយមានការភ្ញាក់ផ្អើលកាលពីវេលាម៉ោងប្រមាណ ១២និង៣០នាទីថ្ងៃត្រង់ ថ្ងៃទី២១ ខែមេសា ឆ្នាំ ២០១៩ នៅចំណុច ហាង ម៉ាស្ទើរស៊ុគីស៊ុប ហ្គោល ដែលស្ថិត នៅអតីតអធិដ្ឋាននគរបាលខណ្ឌទួលគោក តាមមហាវិថីសេនាប្រមុខ គីមអ៊ិលស៊ុង មុខទីបញ្ជាការដ្ឋានកងរាជអាវុធហត្ថលើផ្ទៃប្រទេស ក្នុងសង្កាត់បឹងកក់ទី១ ខណ្ឌទួលគោក។

ជនដែលប្រើល្បិច បោកក្រោមរូបភាពលក់រថយន្តខ្យល់បង់រំលោះ ប្រមូលប្រាក់កក់រត់នោះ ត្រូវបានគេស្គាល់ឈ្មោះ សេង សុភគ៌ ភេទប្រុស អាយុ៣២ឆ្នាំ មានលំនៅផ្ទះ៦២៧ ផ្លូវបេតុង ភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ ។

តាមព័ត៌មានអោយដឹងថា មានប្រជាពលរដ្ឋ ប្រមាណជិត១០០នាក់ ដែលបានចាញ់បោកជននោះ ដែលបានទៅទិញរថយន្តបង់រំលោះ និងបានកក់ប្រាក់ខ្លះ ៣ពាន់ ខ្លះ៥ពាន់ រហូតដល់ ១ម៉ឺនដុល្លារ រាប់ខែមកហើយ ថៅកែគ្មានរថយន្តអោយទេ ដោយក៍ប្រមូលប្រាក់ជិត១លានដុលារ រត់គេចបាត់។

តាមព័ត៌មានអោយដឹងថា បន្ទាប់ពីរត់គេចខ្លួន ប្រជាពលរដ្ឋដែលចាញ់បោកក៍បានលើកគ្នា ទៅកាន់ទីតាំងឃ្លាំងលក់រថយន្តយីហោ សេង ហួត ដែលស្ថិតនៅក្នុងភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ បង្កអោយមានការភ្ញាក់ផ្អើលកាលពីវេលាម៉ោងប្រមាណ ៤និង៣០នាទីរសៀល ថ្ងៃទី២៩ ខែមិនា ឆ្នាំ២០១៩ ម្តងទៀត និងបានលើកគ្នា ទៅសាលាសង្កាត់ ដើម្បីអោយអាជ្ញាធរជួយអន្តរាគមន៍ និងប្តឹងនគរបាលក្រសួងមហាផ្ទៃព្រមទាំងតាមរកហើយក៏ប្រទះឃើញ ជនសង្ស័យឆបោកនោះនៅទីតាំងដូចខាងលើ។

តាមព័ត៌មានបានអោយដឹងទៀតថា លុះនៅវេលាថ្ងៃត្រង់ អ្នកចាញ់បោកក៍បានតាមរកជននោះឃើញ ខណៈ ដែលជននោះព្រមទាំងស្រ្តីម្នាក់ទំនងជាជាភរិយាជិះរថយន្តមួយគ្រឿងម៉ាក TUNDRA ពណ៌ស ពាក់ស្លាកលេខភ្នំពេញ ២O.២៥៥៧ ទៅស៊ីស៊ុបនៅចំណុចហាងខាងលើ។

តាមព័ត៌មានអោយដឹងទៀតថា ខណៈប្រជាពលរដ្ឋប្រមាណជាង៣០នាក់ បានធ្វើការបាននាំគ្នាចុះទៅដល់ ហាងនោះ និងបានទាក់ទងហៅនគរបាលការិយាល័យព្រហ្មទណ្ឌកំរិស្រាល នៃនាយកដ្ឋានព្រហ្មទណ្ឌក្រសួងមហាផ្ទៃ ចុះទៅយកជនសង្ស័យ ។

គួរបញ្ជាក់ថា នេះជាល្បិចបោកថ្មី ដែលថៅកែ រថយន្តធ្វើនំអត់ម្សៅ បានជួលរថយន្តគេមកដាក់តាំងក្នុងឃ្លាំង ជាការបញ្ឆោតបោកប្រាស់ដើម្បីឲ្យអ្នកទិញទុកចិត្ត យកលុយទៅកក់ប៉ុណ្ណោះ។

តាមអ្នកដែលចាញ់បោកគេ បានអោយដឹងថា មានអ្នករងគ្រោះប្រមាណជិត១០០នាក់ ដែលបានចាញ់បោក នាំគ្នាទៅទិញរថយន្តបង់រំលោះ ដោយអស់ប្រាក់ម្នាក់ខ្លះ ៣ពាន់ដុល្លារ ,៥ពាន់ដុល្លារ និងខ្លះទៀតរហូតដល ១ម៉ឺនដុល្លារ ទៅតាមប្រភេទរថយន្ត រួមមាន រថយន្តហាយឡេនឌ័រ ឡិចស៊ីស៣៣០ និង៣៥០ តែកក់លុយខ្លះប្រមាណជាង១ខែ ខ្លះរហូតដល់ ៣ខែ មិនទាន់បានរថយន្តនោះទេ ដោយម្ចាស់បានប្រើល្បិច ដោះសាពន្យារពេលមិនចេះចប់។ដោយឡែកអ្នកខ្លះទៀតប្រគល់លុយគ្រប់បានរថយន្តយកទៅជិះរយៈពេលខ្លីហើយត្រូវបានថៅកែឃ្លាំងនេះទារយករថយន្តត្រឡប់ទៅវិញ ដោយកុហក់ថា រថយន្តដាច់ប្រព័ន្ធតាមដាន GPS ហើយក្រុមហ៊ុនត្រូវយកទៅវិញ ដើម្បីតភ្ជាប់ប្រព័ន្ធតាមដាន GPS ឲ្យបានត្រឹមត្រូវជូនឡើងវិញ ហើយក៍ទៅបាត់រហូតទាក់ទងលែងចូលទើបដឹងថា ឃ្លាំងលក់រថយន្តនោះបោកប្រាក់ពុំមានរថយន្តលក់នោះទេ គឺជួលរថយន្តគេមកដាក់តាំងប្រមូលលុយកក់ប្រមាណជិត ១លានដុល្លារ រត់គេចបាត់ស្រមោល តែគេចមិនរួចពីអ្នកស្វះស្វែងរកនោះឡើយ៕

ភ្នំពេញ ៖ ក្រសួងសុខាភិបាល បានព្រមានម្ចាស់គណនីហ្វេសប៊ុកចំនួនពីរគឺ ប៊ូ សាអែម និង Zey Neang មិនឲ្យបន្តការផ្សាយលក់ផលិតផលគ្រឿងសម្អាងរបស់ខ្លួនជាបន្តទៀតឡើយ បើមិនដូច្នេះ ទេ ក្រសួងនឹងចាត់វិធានការយ៉ាងតឹងរ៉ឹងតាមផ្លូវច្បាប់។ ការហាមឃាត់នេះ បានធ្វើឡើងនៅក្រោយ ពេលដែលក្រសួងបានចុះត្រួតពិនិត្យពីគុណភាព និងបានរកឃើញថា ផលិតផលនេះ គ្មានច្បាប់អនុញ្ញាតត្រឹមត្រូវទេ។

សូមជម្រាបថា ក្រសួងសុខាភិបាលបានព្រមានបិទគណនីហ្វេសប៊ុកឈ្មោះថា ប៊ូ សាអែម និង Zey Neang ដោយសារម្ចាស់គណនីទាំងពីរនេះ ផ្សាយលក់គ្រឿងសម្អាងដូចជា ឈុតព្យាបាលមុខ NNP សាប៊ូកំទេចមាស Swiss Gold,ឡេការពារកម្តៅថ្ងៃ NNP UV 60,ឈុតព្យាបាលសក់ NNP, ឡេលាបស្បែក Dr.White body lotion,ឡេលាបក្លៀក Dr.White armpit night cream, Dr.white armpit scrub, ឡេលាបក្លៀក Dr.White armpit day cream, ឡេលាបមុខ Dr.white skincare និងផលិតផលគ្រឿងសម្អាងដទៃ។ ផលិតផលទាំងនោះ សុទ្ធតែមិនមានការអនុញ្ញាត និងត្រួតពិនិត្យត្រឹមត្រូវ។

ក្នុងសេចក្តីជូនដំណឹងរបស់ក្រសួងសុខាភិបាល បានបញ្ជាក់ថា ដើម្បីជៀសផុតការខាតបង់ប្រាក់ កាស និងប៉ះពាល់ដល់សុខភាព ឬឈានដល់ការបាត់បង់ជីវិត ក្រសួងសុខាភិបាល បានអំពាវនាវឲ្យពលរដ្ឋឈប់ប្រើប្រាស់គ្រឿងសម្អាងរបស់ម្ចាស់គណនីទាំងនោះ។ «ក្រសួងសុខាភិបាលតម្រូវឲ្យម្ចាស់គណនីនេះបញ្ឈប់ការផ្សព្វផ្សាយ ការនាំចូល លក់ ចែកចាយ និងប្រមូលផលិតផលមកវិញដើម្បីកំទេចចោល។

ប្រសិនបើនៅតែឃើញម្ចាស់គណនីទាំងពីរនេះផ្សព្វផ្សាយបន្តទៀត ក្រសួង សុខាភិបាល នឹងចាត់វិធានការតាមច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថជាធរមាន»៕

​ខេត្តព្រះសីហនុ ៖ សំណុំរឿងជនសង្ស័យ៦នាក់ ដែលគប់ដំថ្មបណ្តាលឲ្យកម្លាំងសមត្ថកិច្ចរងរបួស នឹងត្រូវបញ្ជូនទៅតុលាការ មិនឲ្យលើសពី៤៨ម៉ោងឡើយ ក្រៅពីជនសង្ស័យ៦នាក់ នេះ នៅមាន ពលរដ្ឋ២នាក់ទៀតដែល ដែលដឹកនាំការបិទកំណាត់ផ្លូវជាតិលេខ៤ ក៏ត្រូវបញ្ជូនទៅតុលាការជាមួយគ្នានោះដែរ។ នេះបើតាម ការអះអាងបញ្ជាក់របស់លោកឧត្តមសេនីយ៍ទោ ជួន ណារិន ស្នង ការនគរបាលខេត្តព្រះសីហនុ ។

លោកឧត្តមសេនីយ៍ទោ ជួន ណារិន បានបញ្ជាក់ប្រាប់នៅរសៀលថ្ងៃទី២០ ខែមេសា ម្សិលមិញ នេះថា សមត្ថកិច្ចកំពុងពិនិត្យលើសំណុំរឿងពួកគេទាំង ៨នាក់នោះ ថាតើនឹងត្រូវទទួលការចោទប្រកាន់កម្រិតណា មុនបញ្ជូនពួកគេទៅតុលាការ ។ ការចោទប្រកាន់នេះស្ថិត នៅក្នុងសំណុំរឿង រារាំងប្រតិបត្តិការណ៍របស់សមត្ថកិច្ច និងគប់ដំថ្ម បណ្ដាលឲ្យសមត្ថកិច្ច៦នាក់រងរបួសធ្ងន់ និងស្រាល នៅក្នុងហេតុការណ៍បិទកំណាត់ផ្លូវជាតិលេខ៤ ក្នុងឃុំបិតត្រាំង ស្រុកព្រៃនប់ ខេត្តព្រះ សីហនុ ចំនួនពីរថ្ងៃជាប់ៗគ្នា។

សូមរំលឹកថា ប្រជាពលរដ្ឋជាង១០០នាក់ នៅព្រឹកថ្ងៃទី១៩ ខែមេសា បាននាំគ្នាតវ៉ាសាជាថ្មី ដោយយកដំថ្មធំៗនិងមែកឈើទៅដាក់បិទផ្លូវជាតិលេខ៤ នៅឃុំបិតត្រាំង ស្រុកព្រៃនប់ ខេត្តព្រះសីហនុ បណ្តាលឲ្យមានការកកស្ទះចរាចរណ៍។ មូលហេតុដែលពលរដ្ឋនាំគ្នាបិទផ្លូវជាតិលេខ៤ ដោយសារខឹងអាជ្ញាធរចុះទៅរុះរើខ្ទម និងសំណង់របស់ពួកគាត់ ជាង៦០០ខ្នង នៅចំណុចកើតហេតុ ស្ថិតក្នុងឃុំបិតត្រាំង ស្រុកព្រៃនប់ ជាសំណង់ដែលអាជ្ញាធរអះអាងថា សង់លើដីមានម្ចាស់កម្មសិទ្ធិពិតប្រាកដ។

យ៉ាងណាក៏ដោយ អាជ្ញាធរតត្រូវបានគេរិះគន់ថា នៅពេលដែលមានពលរដ្ឋចាប់ផ្តើមសាងសង់ខ្ទម ឬសំណង់នានាពីដំបូងទី ហេតុអ្វីក៏អាជ្ញាធរមិនចុះធ្វើការហាមឃាត់ភ្លាមៗ ទុកដល់សំណង់នោះ កើតឡើងរហូតដល់ជាង៦០០ខ្នងទើបភ្ញាក់ផ្អើល ហើយចុះរុះរើបង្កឲ្យមានអំពើហិង្សា ព្រោះមិន មែនជាលើកទីមួយទេនៅខេត្តព្រះសីហនុ ដែលមានករណីស្រដៀងគ្នានេះ៕ 

ភ្នំពេញ ៖ បន្ទាប់កិច្ចប្រជុំគណៈកម្មាធិការអចិន្រ្តៃយ៍ នៅព្រឹកថ្ងៃព្រហស្បតិ៍ ទី១៨ ខែមេសា នេះបានបញ្ចប់ គណៈកម្មាធិការអចិន្រ្តៃយ៍ព្រឹទ្ធសភា បានកំណត់យកថ្ងៃពុធ ទី២៤ ខែមេសា ឆ្នាំ ២០១៩ វេលាម៉ោង៨ ៖ ០០នាទីព្រឹក ដើម្បីបើកសម័យប្រជុំលើកទី៣ ព្រឹទ្ធសភានីតិកាលទី៤ ។

បើតាមសេចក្តីប្រកាសព័ត៌មាន ស្តីពី លទ្ធផល នៃកិច្ចប្រជុំព្រឹកម៉ិញនេះបានអោយដឹងថា កិច្ចប្រជុំបានធ្វើឡើង ក្រោមវត្តមាន ដ៏ខ្ពង់ ខ្ពស់ របស់ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា។

បន្ទាប់ពីបានពិនិត្យ និងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃពុធ ទី២៤ ខែមេសា ឆ្នាំ២០១៩ វេលាម៉ោង៨:០០នាទីព្រឹក ដើម្បីបើកសម័យប្រជុំលើកទី៣ ព្រឹទ្ធសភា នីតិកាលទី៤ ដោយមានរបៀបវារៈតែមួយគត់គឺ ស្តាប់របាយការណ៍គណៈកម្មាធិការអចិន្ត្រៃយ៍ ស្តីពី សកម្មភាពការងាររបស់ព្រឹទ្ធសភា នៅចន្លោះសម័យប្រជុំលើកទី២ និងលើកទី៣ នីតិកាលទី៤ ។

សូមបញ្ជាក់ផងដែរថា កិច្ច ប្រជុំ គណៈកម្មា ធិការ អចិន្រ្តៃយ៍ នៅព្រឹកម៉ិញនេះ បានលើក យកនូវ របៀប វារៈ ចំនួន បី មកពិនិត្ យនិង ពិភាក្សា គឺ
ទី១. ពិនិត្យ និង សម្រេច លើ របាយការណ៍ ស្តីពី សកម្មភាព ការងារ របស់ ព្រឹទ្ធ សភា នៅ ចន្លោះ សម័យ ប្រជុំលើកទី ២ និង លើក ទី៣ នីតិកាល ទី ៤ ទៅក្នុ ង របៀប វារៈ សម័យ ប្រជុំ លើក ទី៣ ព្រឹទ្ធសភា នីតិកាល ទី៤ ។

ទី២. ពិនិត្យ និង សម្រេច ជា គោលការណ៍ អំពី ការ ធ្វើ បច្ចុប្បន្ន ភាព រចនា សម្ព័ន្ធ រប ស់ អគ្គលេខា ធិការ ដ្ឋាន ព្រឹទ្ធសភា និងទី៣ . កំណត់ របៀប វារៈ កាល បរិច្ឆេទ និង សមាស ភាព លេខា ធិការ សម័យ ប្រជុំ លើក ទី ៣ ព្រឹទ្ធសភា នីតិកាលទី៤ ៕

ចិន ៖ អ្នកនាំពាក្យក្រសួងពាណិជ្ជកម្មចិន លោក Gao Feng បាននិយាយក្នុងសន្និសីទសារ ព័ត៌មាន មួយថា មានការរីកចម្រើនថ្មី ក្នុងការចរចា ស្តីពីកិច្ចព្រមព្រៀងពាណិជ្ជកម្មរវាង សហរដ្ឋអាមេរិក និងប្រទេសចិន ប៉ុន្តែនៅតែមាន ការងារជាច្រើនទៀត ដែលត្រូវធ្វើ ទាក់ទង នឹងបញ្ហានេះ។

ប្រទេសដែលមានសេដ្ឋកិច្ចធំជាងគេទាំងពីរ នៅលើពិភពលោក បានប្រឈមមុខ ដាក់គ្នា ក្នុងជំលោះពាណិជ្ជកម្ម រយៈពេល 9 ខែ ដែលធ្វើអោយខាតបង់ទឹកប្រាក់រាប់ពាន់លានដុល្លារ។
លោកប្រធានាធិបតីសហរដ្ឋអាមេរិក លោក Donald Trump បានដាក់ពន្ធលើទំនិញ តំលៃចំនួន 250 ពាន់លានដុល្លារ ដែលនាំចូលពីប្រទេសចិន ដើម្បីទាមទារឱ្យមានការបញ្ចប់គោលនយោបាយជាច្រើន រួមទាំងការឧបត្ថម្ភធនឧស្សាហកម្ម ការផ្ទេរបច្ចេកវិទ្យាដោយបង្ខំ និងឧបសគ្គដំណើរការចូលទីផ្សារ ចំណែកប្រទេសចិន បានឆ្លើយតបសងសឹក ចំពោះ ការដាក់ពន្ធលើទំនិញ របស់ខ្លួនវិញផងដែរ៕

ខេត្តព្រះសីហនុ ៖ ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានបញ្ជាក់ប្រាប់បណ្ដាញព័ត៌មាន ក្នុងស្រុកឲ្យដឹងនៅព្រឹកថ្ងៃទី១៩ ខែមេសា ឆ្នាំ២០១៩ ថា កម្លាំង នគរបាលរបស់លោក បានចាប់ខ្លូនមនុស្សចំនួន ៦នាក់ថ្មីទៀត ខណៈដែលពួកគេ បានដឹកនាំ និង ចូលរួមយកដុំថ្ម និងមែកឈើ ទៅដាក់បិទផ្លូវជាតិបង្កឲ្យកកស្ទះចរាចរណ៍ប្រហែល ១ម៉ោង នៅព្រឹក ថ្ងៃទី១៩ ខែមេសា ឆ្នាំ២០១៩ នេះ និងបានប្រើហិង្សាទៅលើមន្ដ្រីនគរបាល និង ប្រជាការពារ នៅ ពេលដែលកងកម្លាំង បានចុះទៅអន្ដរាគមន៍ស្នើពួកគេបើកផ្លូវជាតិលេខ៤នៅចំនុច ឃុំបិតត្រាំង ក្នុង ស្រុកព្រៃនប់ ខេត្តព្រះសីហនុ។

ស្នងការនគរបាលខេត្ត បញ្ជាក់ថា នៅព្រឹកថ្ងៃសុក្រនេះ សមត្ថកិច្ចបានចាប់ខ្លួនមនុស្សទាំង ៦នាក់ ខណៈមនុស្ស២នាក់ផ្សេងទៀត ត្រូវបានឃាត់ខ្លួនកាលពីថ្ងៃទី១៨ មេសា សរុបរហូតដល់ពេលនេះ ឃាត់ខ្លួនចំនួន៨នាក់ហើយ ។ លោកឧត្តមសេនីយ៍ស្នងការបានចាត់ទុកថា នេះគឺជាបទល្មើសព្រហ្ម ទណ្ឌ ដែលមិនអាចលើកលែងឲ្យបាន នឹងត្រូវចាត់វិធានការតាមផ្លូវច្បាប់។

លោកឧត្តមសេនីយ៍ទោ ជួន ណារិន្ទ បានបញ្ជាក់យ៉ាងដូច្នេះថា «ពេលដែលកម្លាំងរបស់យើង និង ប្រជាការពារចុះទៅសម្របសម្រួល និងរើសដុំថ្មចេញពីផ្លូវជាតិស្រាប់តែ ប្រជាពលរដ្ឋទាំងនោះ បាន គប់ដុំថ្មទៅលើពួកគេបណ្ដាលឲ្យមន្ដ្រីនគរបាល ៤នាក់ និងប្រជាការពារ២នាក់ រងរបួសបែកក្បាល ហើយរថយន្ដ ៣គ្រឿង បានរងការខូចខាតផងដែរ។

សូមបញ្ជាក់ថា នេះជាថ្ងៃទី២ហើយ ដែលប្រជាពលរដ្ឋទាំងនោះ បាននាំគ្នាបិទផ្លូវជាតិលេខ៤ដោយ សារខឹងអាជ្ញាធរចុះទៅរុះរើខ្ទម និងសំណង់ញជាង ៦០០ខ្នង ដែលអាជ្ញាធរអះអាងថា ជាភាពអនា ធិបតេយ្យ ខុសច្បាប់ សង់លើដីមានម្ចាស់កម្មសិទ្ធិត្រឹមត្រូវពិតប្រាកដ។

ជាមួយគ្នានេះ ចំពោះហេតុការណ៍នេះ សមត្ថកិច្ចក៏បានឃាត់ខ្លួនមនុស្ស២នាក់ផងដែរ រួមមាន ៖ ឈ្មោះ ខ្លូត តុសិតា ភេទស្រី អាយុ៣៩ឆ្នាំ មុខរបរមេផ្ទះ ស្នាក់នៅបណ្ដោះអាសក្នុងកន្លែងកើតហេតុ ដែលត្រូវឃាត់ខ្លួន ដោយសារការគប់ដុំថ្ម និងប្រើដំបងវាយលើកំលាំងសមត្ថកិច្ចចំរុះបណ្តាលឲ្យរង របួសជាច្រើននាក់ និងជនសង្ស័យម្នាក់ទៀតមានឈ្មោះ កែវ សាង ភេទប្រុស អាយុ៥៣ឆ្នាំ មានមុខ របរជាអ្នកនេសាទ នៅស្រុកព្រៃនប់ ដែលពាក់ព័ន្ធនឹងការដឹកនាំបិទផ្លូវ។

គួរជម្រាបថា នៅព្រឹកថ្ងៃទី១៩ ខែមេសា ដែលជាថ្ងៃទីពីរ នៃការតវ៉ាបិទផ្លូវជាតិលេខ៤ គេសង្កេត ឃើញក្រុមសមត្ថកិច្ចដែលចុះអន្តរាគមន៍ បានបញ្ចេញសកម្មភាពទន់ភ្លន់អត់ធ្មត់ បើទោះបីជាមាន ការវាយប្រហារហិង្សាដោយពាក្យសម្តីជេប្រមាថ គប់ដុំថ្ម បណ្តាលឲ្យរងរបួសបែកក្បាលហូរ ឈាម ជោកខ្លួនយ៉ាងណាក៏ដោយ ដែលខុសពីករណីមុនៗក្នុងស្ថានភាពស្រដៀងគ្នានេះដែរ៕

ខេត្តកណ្តាល ៖ ផ្ទុះធុងហ្គាសឆេះរថយន្ត GS470 និង RX330 រួមទាំងអ្នកបើកបរម្នាក់ រលាកពេញខ្លួនប្រាណ និងរាលដាលឆាបឆេះផ្ទះលក់គ្រឿងជ័រ មួយកនលែងទៀត ផ្អើលដល់សមត្ថកិច្ច និងឡានទឹកចេញអន្តរាគមន៍ នៅចំនុច មាត់ស្ទឹងក្រុងតាខ្មៅ ខេត្តកណ្តាល នៅវេលាម៉ោងប្រមាណ ២ រសៀលថ្ងៃទី១២ ខែមេសា នេះ នៅចំណុចផ្លូវមុខផ្សារតាខ្មៅ(ចាស់) ។

បើតាមព័ត៌មាន បឋមនៅកន្លែងកើតហេតុ មានករណីផ្ទុះធុងហ្គាសដែលបំពាក់នៅផ្នែកខាងក្រោយនៃរថយន្តស៊េរីទំនើបមួយគ្រឿង ម៉ាក LEXUS GS470 បណ្តាលអោយភ្លើងឆាបឆេះយ៉ាងសន្ធោរសន្ធៅ ធ្វើឲ្យបុរសម្នាក់ជាតៃកុងរថយន្តនេះ បានរងរបួសរលាកពេញខ្លួនយ៉ាងធ្ងន់ធ្ងរ និងឆេះរាលដាលខូចខាតរថយន្តមួយគ្រឿង ម៉ាកលុចស៊ីស RX330 ពាក់ស្លាកលេខកណ្តាល 2B-1385 និងម៉ូតូមួយគ្រឿងទៀត ព្រមទាំងរៀលដាលដល់ផ្ទះលក់សម្ភារៈក្មេងលេង(គ្រឿងជ័រ) មួយកន្លែងផងដែរ។ ភ្លាមៗនោះ ត្រូវបានសមត្ថកិច្ចក្រុងតាខ្មៅ និងរថយន្តពន្លត់អគ្គិភ័យជាច្រើនគ្រឿង រួមជាមួយប្រជាពលរដ្ឋ ចេញជួយអន្តរាគមន៍ និងជួយបញ្ជូនជនរងគ្រោះទៅមន្ទីរពេទ្យ។

យ៉ាងណាក៏ដោយ មនុស្សដែលត្រូវឆេះរលាកពេញខ្លួនប្រាណនោះ កំពុងត្រូវបានបងប្អូនប្រជាពលរដ្ឋនាំគ្នាជួយសង្គ្រោះលក្ខណៈបឋម តាមជាក់ស្តែងសិនប៉ុណ្ណោះ ដោយកំពុងរងចាំរថយន្តសង្គ្រោះដឹកបញ្ជូនទៅសង្គ្រោះនៅឯមន្ទីរពេទ្យផងដែរ៕

ភ្នំពេញ ៖ សម្តេចនាយករដ្ឋមន្ត្រីតេជោ ហ៊ុន សែន បានអនុញ្ញាតឱ្យរដ្ឋបាលរាជធានីភ្នំពេញ រៀបចំរថយន្តក្រុងចំនួន១២០គ្រឿង សម្រាប់ដឹកជញ្ជូនប្រជាពលរដ្ឋពីរាជធានីភ្នំពេញ ទៅតាមបណ្តាខេត្ត និងពីបណ្តាខេត្តត្រឡប់មកភ្នំពេញវិញ ដោយមិនគិតថ្លៃ រយៈពេល ៧ថ្ងៃ ពីថ្ងៃទី១២ ដល់ ១៨ ខែមេសា ឆ្នាំ២០១៩ ពោលគឺនៅមុន និងក្រោយចូលឆ្នាំខ្មែរ។

ពេលវេលាចេញដំណើរ គឺចាប់ពីម៉ោង ៥កន្លះព្រឹក នៅគ្រប់ទីតាំងចេញដំណើរទៅតាមបណ្តាខេត្ត នានា មានដូចជា ៖

ផ្លូវជាតិលេខ១ សម្រាប់ចំណតចេញពីភ្នំពេញ ទៅខេត្តស្វាយរៀង និងខេត្ត ព្រៃវែង មានរថយន្ត ចំនួន១០គ្រឿង ចេញដំណើរនៅផ្លូវ ៦០ម៉ែត្រ ចំណុចមុខក្រុមហ៊ុន ម៉ែកសឺដេស ។

ផ្លូវជាតិលេខ ២ ពីភ្នំពេញ ទៅខេត្តតាកែវ មានរថយន្តចំនួន ៥គ្រឿង ចេញដំណើរនៅផ្លូវ៦០ ម៉ែត្រ ចំណុចមុខក្រុមហ៊ុន ម៉ែកសឺដេស។

ផ្លូវជាតិលេខ ៣ ចេញពីភ្នំពេញ ទៅខេត្តកែប និងខេត្តកំពត មានរថយន្តចំនួន ១០គ្រឿង ចេញដំណើរនៅចំណុច មុខផ្សារ សិនជូរីផ្លាហ្សា។

ផ្លូវជាតិលេខ ៤ ចេញពីភ្នំពេញ ទៅខេត្តកំពង់ស្ពឺ និងខេត្តព្រះសីហនុ មានរថយន្ត១០ គ្រឿង ចេញដំណើរនៅចំណុច មុខផ្សារ សិនជូរីផ្លាហ្សា។

ផ្លូវជាតិលេខ ៥ ចេញពីភ្នំពេញ ទៅខេត្តកំពង់ឆ្នាំង ខេត្តពោធិសាត់ និងខេត្តបាត់ដំបង មាន រថយន្ត ៤៥ គ្រឿង ចេញដំណើរនៅចំណុច សួនច្បារ ឫស្សីកែវ។

ផ្លូវជាតិលេខ ៦ ចេញពីភ្នំពេញ ទៅខេត្តកំពង់ធំ និងខេត្តសៀមរាប មានរថយន្ត ២០គ្រឿង ចេញដំណើរនៅចំណុច រង្វង់មូលទេពមច្ឆាជ្រោយចង្វារ។

ផ្លូវជាតិលេខ ៦ និងលេខ ៧ ចេញពីភ្នំពេញ ទៅខេត្តកំពង់ចាម និងខេត្តកំពង់ធំ មានរថយន្ត ១០គ្រឿង ចេញដំណើរនៅចំណុច មុខរាជាយស្ម័យានភ្នំពេញ។

ផ្លូវជាតិលេខ ៨ ចេញពីភ្នំពេញ ទៅខេត្តក្រចេះ និងខេត្តស្ទឹងត្រែង មានរថយន្ត១០គ្រឿង ចេញដំណើរនៅចំណុច មុខរាជាយស្ម័យានភ្នំពេញ។

ជាមួយគ្នានេះ ការធ្វើដំណើរតាមកាណូតដឹកអ្នកដំណើររបស់រដ្ឋពីព្រែកព្នៅ ទៅដល់ក្រុងតាខ្មៅ ខេត្តកណ្តាល និងការធ្វើដំណើរតាមខ្សែរថភ្លើង ក៏ត្រូវបានអនុញ្ញាតឲ្យជិះដោយមិនបាច់បង់ប្រាក់ ដូចគ្នាដែរ នៅក្នុងអំឡុងថ្ងៃបុណ្យចូលឆ្នាំប្រពៃណីជាតិខ្មែរ នេះ៕

ភ្នំពេញ ៖ រដ្ឋបាលរាជធានីភ្នំពេញ បានជូនដំណឹងដោយអំពាវនាវឲ្យរៀបចំទុកដាក់សំរាមបានត្រឹម ត្រូវក្នុងទីតាំងសមស្របណាមួយ ព្រោះសេវាប្រមូលសំរាមក្នុងរាជធានីភ្នំពេញ មិនបានពេញលេញទេ ដោយសារកម្មករក្រុមហ៊ុនស៊ីនទ្រី ត្រូវបានសម្រាកក្នុងឱកាសបុណ្យចូលឆ្នាំថ្មី រយៈពេល ៤ថ្ងៃចាប់ពីថ្ងៃទី១៤ ថ្ងៃទី១៧ ខែមេសា ឆ្នាំ ២០១៩។

បើតាមសេចក្តីជូនដំណឹងរបស់រដ្ឋបាលរាជធានីភ្នំពេញ បានបញ្ជាក់ថា ដើម្បីថែរក្សាសោភ័ណភាពអនាម័យ និងបរិស្ថាននារាជធានីភ្នំពេញក្នុងឱកាសពិធីបុណ្យចូលឆ្នាំប្រពៃណីខ្មែរឆ្នាំ ២០១៩ នេះ សូមបងប្អូនប្រជាពលរដ្ឋជាម្ចាស់លំនៅឋានក្នុងរាជធានីភ្នំពេញទាំងអស់ មេត្តាយោគយល់ ដោយ កុំបញ្ចេញសំរាមមកដាក់នៅតាមផ្លូវសាធារណៈនៅក្នុងអំឡុងពេលដែលការផ្ដល់សេវាមិនបានពេញ លេញនេះ ដោយរក្សាទុកសំរាមរបស់ខ្លួនឲ្យបានត្រឹមត្រូវនៅក្នុងទីតាំងរៀងខ្លួនជាបណ្ដោះអាសន្នសិន ព្រោះកម្មករប្រមូលសំរាមក្រុមហ៊ុនស៊ិនទ្រី ក៏ត្រូវបានអនុញ្ញាតឲ្យឈប់សម្រាកក្នុងថ្ងៃ បុណ្យ ចូលឆ្នាំថ្មីនេះដែរ ហើយការប្រមូលសំរាមនឹងចាប់ផ្តើមជាថ្មីឡើងវិញនៅថ្ងៃទី១៨ ខែមេសា ក្រោយ ពេលបញ្ចប់ពិធីបុណ្យចូលឆ្នាំប្រពៃណីជាតិខ្មែរ៕