​ដោយ ៖​ នូ វី  – 

បន្ទាយមានជ័យ ៖ មានហេតុការណ៍ភ្ញាក់ផ្អើលមួយបានកើតឡើង ខណ:ដែលមានជម្លោះពាក្យសម្តីរវាងមន្ត្រីនគរបាលការិយាល័យព្រហ្មទណ្ឌកំរិតស្រាល-កំរិតធ្ងន់នៃស្នងការដ្ឋាននគរបាលខេត្តបន្ទាយមានជ័យ ជាមួយនិងមន្ត្រីអាវុធហត្ថខេត្តបន្ទាយមានជ័យ ស្ទើរតែក្លាយជាហិង្សា។ហេតុការណ៍ភ្ញាក់ផ្អើលនេះកើតឡើងនៅវេលាម៉ោងប្រមាណ ៨និង ៣០នាទីព្រឹកថ្ងៃទី០៣ ខែកក្កដា ឆ្នាំ២០១៩ មុខភូមិគ្រិះលោក វរសេនីយឯក ស ប៊ុនសឿង មេបញ្ជាការរងកងរាជអាវុធហត្ថខេត្ត ស្ថិតក្នុងភូមិគោរដ្ឋានសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។

អ្នកឃើញហេតុការណ៍បាននិយាយថា នៅមុនកើតហេតុគេបានឃើញក្រុមមន្ត្រីនគរបាលជាច្រើននាក់បានចុះមកធ្វើការត្រួតពិនិត្យទីតាំងផ្ទុះអាវុធចំនួនបីគ្រាប់កាលពីវេលាម៉ោង១០យប់ថ្ងៃទី០២ ខែកក្កដា ឆ្នាំ២០១៩ ដែលខ្មាន់កាំភ្លើងបាញ់នៅមុខភូមិគ្រឹះរបស់លោកមេបញ្ជាការរងខាងលើ។ ក្រោយមកគេឃើញមន្តី្រអាវុធហត្ថដឹកនាំដោយលោក យ៉ាន់ សុវណ្ណ មេបញ្ជាការកងរាជអាវុធហត្ថមូលដ្ឋានក្រុងសិរីសោភ័ណ បានចុះទៅដល់ ហើយក៏កើតមានជាជម្លោះពាក្យសម្តីឈានជិតក្លាយជាហិង្សា។

លោក ខែម សោភ័ណ នាយការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តបន្ទាយមានជ័យ បាននិយាយថា កម្លាំងជំនាញនៃការិយាល័យព្រហ្មទណ្ឌកម្រិតធ្ងន់-ស្រាលបានចុះពិនិត្យទីតាំងផ្ទុះអាវុធរបស់ជនអនាមិកនៅមុខភូមិគ្រឹះលោកមេបញ្ជាការរងអាវុធហត្ថខេត្ត។ក្រោយធ្វើការពិនិត្យកម្លាំងជំនាញបានរកឃើញសំបកកាទុះចំនួនបីគ្រាប់ ដែលស្ថិតនៅទីតាំងផ្សេងគ្នាក្បែរ និងមុខភូមិគ្រឹះខាងលើ។

លោកនាយការិយាល័យរូបនេះបន្តទៀតថាកំពុងប្រតិបត្តិការក៏កើតមានជាជម្លោះឡើងក្រោមការចោទប្រកាន់ថាប៉ូលីសពទ្ធ័ផ្ទះមេបញ្ជាការរងប៉េអឹម។លោកថា មិនមែនជាការពទ្ធ័នោះទេ ការចោទប្រកាន់នេះបានធ្វើអោយមានការភាន់ច្រឡំបង្កជាសង្គ្រាមពាក្យសម្តីលើទីសាធារណ: គ្រាដែលជំនាញកំពុងស្វែងរកជនសង្ស័យ។

ចំពោះជម្លោះនេះដែរ ពលរដ្ឋដែលឃើញហេតុកាណ៍បានសម្តែងការហួសចិត្តយ៉ាងខ្លាំង គ្រាដែលសមត្ថកិច្ចពីរមិនត្រូវគ្នា ។មួយវិញទៀត ចំពោះករណីបាញ់នេះ ចំពោះសមត្ថកិច្ចប៉ូលីស មិនពិបាករកមុខសញ្ញាបាញ់នោះទេ ដោយគ្រាន់តែឆែកមើលកាមេរ៉ាសុវត្ថិភាព ដែលដាក់នៅមុខផ្ទះលោកមេបញ្ជាការរងខាងលើឃើញហើយ គ្រាន់តែថា មេបញ្ជាការរងរូបនេះ អោយឆែក ឬអត់ តែបើមិនអោយឆែក…មិនបាច់ឆ្ងល់ទេ៕

ដោយ ៖ សុត្ថារ៉ា

ភ្នំពេញ ៖ អាជ្ញាធររាជធានីភ្នំពេញ បានស្នើឱ្យភាគីពាក់ព័ន្ធ ពិសេស អាជ្ញាធរអគ្គិសនីកម្ពុជា (EDC) ត្រូវបន្តសហការគ្នា ឱ្យកាន់តែស្អិតរមួតថែមទៀត ដោយស្នើនូវរាល់ការជីកផ្លូវ កប់បណ្ដាញ ខ្សែកាបអគ្គិសនី តភ្ជាប់ខ្សែកាបអគ្គិសនី ឬបណ្តាញក្រោមដី ត្រូវតែជូនដំណឹង មកសាលារាធានីនូវគ្រប់ដំណាក់កាល ដើម្បីអាជ្ញាធរ ជូនដំណឹង និងសុំការយោគយល់ពីប្រជាពលរដ្ឋ។ ជាមួយគ្នានោះ ចំពោះក្រុមហ៊ុនដែលទទួលម៉ៅការជួសជួលផ្លូវ ក្រោយពីជីកកាយបណ្តាញក្រោមដីទាំងអស់ ត្រូវតែធ្វើឡើងវិញ ផ្តោតលើគុណភាព ដោយគ្មានលក្ខខណ្ឌ។

ទាក់ទិននិងការងារនេះ ត្រូវបាន លោក ឃួង ស្រេង អភិបាលរាជធានីភ្នំពេញ លើកឡើងនៅក្នុងកិច្ចប្រជុំ ជាមួយ តំណាងអាជ្ញាធរអគ្គិសនីកម្ពុជា អង្គការ ចាយការ និង តំណាងក្រុមហ៊ុនម៉ៅការជួសជុលផ្លូវឡើងវិញ ក្រោយពេលជីកកាយ ដោយមានការចូលរួមពីអាជ្ញាធរខណ្ឌ និងមន្រ្តីពាក់ព័ន្ធជុំវិញសាលារាជធានីភ្នំពេញ នារសៀលថ្ងៃទី៣ ខែកក្កដា ឆ្នាំ២០១៩នៅសាលារាជធានីភ្នំពេញ។

ឯកឧត្តម អភិបាលបញ្ជាក់ថា ដោយមើលឃើញពីការតភ្ជាប់ខ្សែបណ្តាញអគ្គិសនី កន្លងមក មិនមានលក្ខណៈបច្ចេកទេស ធ្លាក់រយីងរយោង ធ្វើឱ្យប៉ះពាល់ សោភណ្ឌភាព ឬ បង្ករបញ្ហាជាយថាហេតុក្នុងរាជធានី ទើបអាជ្ញាធររាជធានីភ្នំពេញ និង EDC ក៏ដូចជាភាគីពាក់ព័ន្ធបានតភ្ជាប់បណ្តាញមួយចំនួននៅក្រោមដីរួចមកហើយ ដោយទទួលបានការគាំទ្រពីប្រជាពលរដ្ឋក្នុងរាជធានីភ្នំពេញ។ សម្រាប់ការជីកតបណ្តាញក្រោមដីនេះ អាជ្ញាធររាជធានី មិនអនុញ្ញាឱ្យជីកកាយលើផ្លូវទាំងឡាយណា ដែលបានជីកដាក់រួចមកហើយនោះទៀតទេ។

សូមបញ្ជាក់ថា រដ្ឋបាលរាជធានីភ្នំពេញ បានអនុញ្ញាត ឱ្យអគ្គិសនីកម្ពុជា សហការជាមួយ jica ធ្វើការជីកផ្លូវកប់បណ្ដាញ ខ្សែកាបអគ្គិសនី ដើម្បីតភ្ជាប់ខ្សែកាបអគ្គិសនីពីអនុស្ថានីយអូរបែកក្អម GIS NCCទៅ អនុស្ថានីយ៍GS1 ទួលសង្កែ ដោយឆ្លងកាត់កំណាត់ផ្លូវ ចំនួន២៤ ខ្សែ ។ដូច្នេះទេរដ្ឋបាលរាជធានីភ្នំពេញ សូមប្រជាពលរដ្ឋយោគយល់ និងបង្វៀងចរាចរណ៍ចេញពីកំណាត់ផ្លូវទាំងនេះ ខណៈដែលការដ្ឋានចាប់ផ្តើមដំណើរការ។

បើយោងតាមសេចក្តីជូនដំណឹង របស់រដ្ឋបាលរាជធានីភ្នំពេញ ទៅប្រជាពលរដ្ឋបញ្ជាក់ថា កំណាត់ផ្លូវចំនួន២៤ខ្សែ រួមមាន៖ អនុស្ថានីយអូរបែកក្អម GIS NCC ផ្លូវលេខ២៦៥ ផ្លូវ ២១៨ ផ្លូវលេខ២៥៣ផ្លូវលេខ ២៣៩ វិថីនេរុហ៍មហាវិថីព្រះសីហនុ ផ្លូវលេខ ១៦៣ ផ្លូវលេខ ២៧៨ ផ្លូវលេខ ៥៧ ផ្លូវលេខ ២៩៤ វិថីសុធារស ផ្លូវខាងជើងជាប់ស្ថានទូតរុស្ស៊ី វិថីឧបាសិកាសំ ប៊ិត ផ្លូវខាងជើងសួនសម្ដេចតេជោហ៊ុនសែន វិថីសុរាម្រិត វិថីឧកញ៉ាស៊ួ ស្រ៊ុន ២៤៤ ផ្លូវលេខ១៩ ផ្លូវលេខ២០២ ផ្លូវលេខ ១៣ ផ្លូវលេខ ៩៤ ផ្លូវរង្វង់មូលវត្តភ្នំ ផ្លូវលេខ៩៣ និងអនុស្ថានីយ៍GS1 ទួលសង្កែ។ ដូចបានបង្ហាញជូនក្នុងឧបសម្ព័ន្ធតម្រាយផ្លូវ និងផែនទីផ្លូវចាប់ពីដើមខែកក្កដា រហូតដល់បំណាច់ខែកក្កដាឆ្នាំ២០១៩៕

ខេត្តព្រះសីហនុ ៖ ប្រភពព័ត៌មានពីមន្ត្រីបំរើការងារ នៅអាកាសយានដ្ឋានអន្តរជាតិ កងកេង ខេត្តព្រះសីហនុ បានឲ្យដឹងថា បច្ចុប្បន្ននេះ មានជើងហោះហើរត្រង់ ចេញពីព្រលានយន្តហោះដនមឿង ប្រទេសថៃ ឆ្ពោះមកកាន់អាកាសយាដ្ឋានអន្តរជាតិ កងកេង ខេត្តព្រះសីហនុ ជាផ្លូវការ និងជាកលដំបូងហើយ ដោយបាននាំយកភ្ញៀវ ចំនួន១៨០នាក់មកជាមួយផងដែរ។

មន្ត្រីអាកាសយានដ្ឋានអន្តរជាតិខេត្តព្រះសីហនុ បានបញ្ជាក់ថា ការហោះហើរជាលើកដំបូង គឺត្រូវបានចុះចតដោយសុវត្ថិភាព កាលពីវេលាម៉ោង ៣ និង ២០នាទីរសៀលថ្ងៃចន្ទ ទី១ ខែកក្កដា ឆ្នាំ ២០១៩នេះ។ ជើងហោះហើរជាលើកដំបូងនេះ គឺបាននាំភ្ញៀវចំរុះជាតិសាសន៍ចំនួន ១៨០នាក់ ចេញពីប្រទេសថៃ ចូលមកខេត្តព្រះសីហនុ។ ទន្ទឹមគ្នានេះ ក៏មានភ្ញៀវទិញសំបុត្រជិះយន្តហោះដដែលនេះ ចេញពីអាកាសយានដ្ឋានខេត្តព្រះសីហនុ ហោះឆ្ពោះទៅកាន់ប្រទេសថៃវិញមានចំនួន១៧០នាក់ដែរ។

ទាក់ទិនការហោះត្រង់នេះ បើតាមមន្រ្តីក្រុមហ៊ុនអាកាសចរណ៍ បញ្ជាក់ថា ជារៀងរាល់សប្តាហ៍មានការហោះហើរត្រង់ចេញពីប្រទេសថៃ ឆ្ពោះមកអាកាសយានដ្ឋាន ខេត្តព្រះសីហនុ និងពីខេត្តព្រះសីហនុ ឆ្ពោះទៅកាន់ប្រទេសថៃ មានចំនួន ៤ថ្ងៃ គឺនៅថ្ងៃ ច័ន្ទ ពុធ សុក្រ និងថ្ងៃអាទិត្យ៕

ដោយ ៖ ផានូរ៉ាត់

ភ្នំពេញ ៖ សមាគមដ៏ធំមួយរបស់សាធារណរដ្ឋកូរ៉េ បានបង្ហាញពីគោលបំណងបង្កើតមជ្ឈមណ្ឌល ផ្នែកវិទ្យាសាស្ត្រសម្ផស្ស កម្រិតស្ដង់ដាជាតិដំបូងគេនៅកម្ពុជា ដើម្បីផ្ដល់ការអប់រំ បណ្ដុះបណ្ដាលជំនាញ កែសម្ផស្ស ដល់យុវជន ប្រកបដោយគុណភាព ប្រសិទ្ធភាព ធានានូវសុវត្ថិភាព ដល់អតិថិជននៅកម្ពុជា ក៏ដូចជាក្នុងតំបន់។

គម្រោងនេះ ត្រូវបានស្នើឡើងនៅក្នុងជំនួបពិភាក្សា ការងារ រវាង លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជាមួយគណៈប្រតិភូ សមាគមអន្តរជាតិអប់រំ ក្នុងវិស័យសម្ផស្សរបស់ប្រទេសកូរ៉េខាងត្បូង ដឹកនាំដោយ លោក Harry Hwang នៅទីស្តីការក្រសួង នាព្រឹកថ្ងៃទី០១ ខែកក្កដា ឆ្នាំ២០១៩។

លោក ឡៅ ហ៊ីម អនុរដ្ឋលេខាធិការ ក្រសួងការងារបានប្រាប់អ្នកសារព័ត៌មាននៅក្រោយជំនួបនោះថា សមាគមអន្តរជាតិអប់រំ ក្នុងវិស័យសម្ផស្សរបស់ប្រទេសកូរ៉េខាងត្បូង ចង់វិនិយោគលើការបង្កើត មជ្ឈមណ្ឌលស្ដង់ដាជាតិ ផ្នែកវិទ្យាសាស្ត្រសម្ផស្ស ដោយសារ តែលោកបានមើលឃើញ សក្ដានុពលលើវិស័យសម្ផស្សនៅកម្ពុជា កំពុងមានភាពផុសផុល ដែលអាចបង្កើតនូវកិច្ចសហប្រតិបត្តិការ ជាលក្ខណៈអន្តរជាតិ លើវិស័យនេះ។

លោក Harry Hwang អះអាងថា សមាគមរបស់លោក បាននិងកំពុងដំណើរការ ប្រកបដោយភាពជោគជ័យលើវិស័យកែសម្ផស្សនេះ នៅជុំវិញពិភពលោក ដោយក្នុងនោះ សមាគមមានស្ថាប័នជាសមាជិក ជាច្រើននៅតាមបណ្ដាប្រទេសមួយចំនួន ដូចជាកូរ៉េខាងត្បូង ជប៉ុន ហុងកុង អូស្ត្រាលី នូវែលសេឡង់ កាណាដា អាមេរិកជាដើម។

យ៉ាងណាលោកសុំការអនុញ្ញាតពីសំណាក់ ឯកឧត្តមរដ្ឋមន្ត្រី ដើម្បីបង្កើតឱ្យមានគម្រោងវិនិយោគខាងលើនេះ ដោយលោកបានសន្យាថា នៅពេលគម្រោងនេះ អាចដំណើរការទៅបានពិតមែន ប្រជាពលរដ្ឋកម្ពុជានិងប្រជាជនក្នុងតំបន់ នឹងទទួលបានសេវាកម្មកែសម្ផស្ស ប្រកបដោយគុណភាព ប្រសិទ្ធភាព និងសុវត្ថិភាពខ្ពស់ ជាពិសេស ផ្តល់ការបណ្ដុះបណ្ដាលដល់ ដល់យុវជនកម្ពុជាឱ្យមានចំណេះនិងជំនាញនេះ ពិតប្រាកដ និងទទួលស្គាល់ជាលក្ខណៈអន្តរជាតិ។

ជាមួយគ្នានោះ លោក បណ្ឌិត អ៊ិត សំហេង បានបង្ហាញនូវការស្វាគមន៍ និងគាំទ្រគម្រោង នៃការបង្កើតមជ្ឈមណ្ឌលនេះយ៉ាងពេញទំហឹង ដោយឯកឧត្តមរដ្ឋមន្ត្រី ធានានូវការផ្ដល់អាជ្ញាបណ្ណ ជូនមជ្ឈមណ្ឌល ដើម្បីប្រតិបត្តិការការងារនេះដោយស្របច្បាប់នៅកម្ពុជា។

លោករដ្ឋមន្ត្រី បានលើកទឹកចិត្តឱ្យការបើកដំណើរការ មជ្ឈមណ្ឌលស្ដង់ដាជាតិ ផ្នែកវិទ្យាសាស្ត្រសម្ផស្សនៅកម្ពុជា នឹងទទួលបាននូវការចាប់អារម្មណ៍ ព្រមទាំងឆ្លើយតប នឹងទីផ្សារសេវាកម្មកែសម្ផស្ស នាពេលបច្ចុប្បន្ន ពីព្រោះសេដ្ឋកិច្ចកម្ពុជា នៅតែមានភាពរីកចម្រើន កំណើនជីវភាពរបស់ប្រជាពលរដ្ឋកាន់តែធូរធា ដូច្នេះការស្វែងរកសេវាកម្មកែសម្ផស្សក៏ចេះតែមានតម្រូវការជាលំដាប់ផងដែរ។

​លោកបញ្ជាក់ថា បើគម្រោងនេះ អាចដំណើរការទៅបានពិតមែនកម្ពុជានិងសាធារណរដ្ឋកូរ៉េ នឹងសម្រេចបាននូវកិច្ចសហប្រតិបត្តិការថ្មីមួយទៀត រួមចំណែក ក្នុងការពង្រឹងទំនាក់ទំនងរវាង ប្រជាជន និងរដ្ឋាភិបាលនៃប្រទេសទាំងពីរ៕

​ដោយ ៖ សំអាន

ភ្នំពេញ ៖ ក្រោយពីទទួលបានទំនុកចិត្តពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា និងជាប្រធានគណៈកម្មាធិកាជាតិគ្រប់គ្រងគ្រោះមហន្តរាយ ឱ្យធ្វើជាអនុ ប្រធានថ្មីនៃគណៈកម្មាធិកាជាតិគ្រប់គ្រងគ្រោះមហន្តរាយ លោកទេសរដ្ឋមន្ត្រី គន់ គីម ក្នុងពិធី សំណេះសំណាលជាមួយមន្ត្រីក្រោមឱវាទ នាព្រឹកថ្ងៃទី១ កក្កដានេះ បានស្នើសុំឱ្យមានសាមគ្គីភាពផ្ទៃ ក្នុងខ្ពស់ដើម្បីប្រសិទ្ធភាពការងារ។

លោកទេសរដ្ឋមន្ត្រី គន់ គីម មានប្រសាសន៍ថា ឯកឧត្តម លោកជំទាវ អស់លោក លោកស្រី ដែលកំពុងបំរើការងារនៅក្នុងស្ថាប័នគណៈកម្មាធិកាជាតិគ្រប់គ្រងគ្រោះមហន្តរាយនាពេលបច្ចុប្បន្ននេះសុទ្ធតែជាអ្នកមានជំនាញ និងមានបទពិសោធន៍គ្រប់គ្រាន់នៅក្នុងការងារគ្រោះមហន្តរាយ ហើយ ថាការដែលឯកឧត្តមមកធ្វើជាអ្នកដឹកនាំនៅទីនេះ គឺជាមេបញ្ជាការដឹកនាំបញ្ជាការងារ ដូច្នេះឯកឧត្តម លោកជំទាវ អស់លោក លោកស្រី តោងតែបំពេញការងារទៅតាមតួនាទី ភារកិច្ច ដែលស្ថាប័នបាន ប្រគល់ជូនក្នុងស្មារតីទទួលខុសត្រូវខ្ពស់បំផុតក្នុងនាមយើងជាអ្នកបំរើជាតិ មាតុភូមិ និងប្រជាជន និងទទួលបានប្រាក់ខែពីរដ្ឋ ដែលរដ្ឋទទួលបានពីប្រជាជន។

ក្នុងឱកាសនេះលោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រង គ្រោះមហន្តរាយបានគូសបញ្ជាក់ថា ឯកឧត្តមនឹងស្នើទៅសម្តេចតេជោនាយករដ្ឋមន្ត្រី និងជាប្រធាន គណៈកម្មាធិការជាតិគ្រប់គ្រងគ្រោះមហន្តរាយសុំយកតួនាទីត្រឹមជាអនុប្រធានគណៈកម្មាធិការជាតិគ្រប់គ្រងគ្រោះមហន្តរាយ មិនមែនជាអនុប្រធានទី១ទេ ដើម្បីងាយស្រួលក្នុងការដឹកនាំការងារ។

ជាមួយគ្នានេះឯកឧត្តមក៏បានសម្តែងនូវការកោតសសើរចំពោះស្នាដៃដឹកនាំជាច្រើនឆ្នាំរបស់លោក ទេសរដ្ឋមន្ត្រី ញឹម វណ្ណដា នៅគណៈកម្មាធិការជាតិគ្រប់គ្រងគ្រោះមហន្តរាយនេះ ដែលធ្វើឱ្យសម្រេច បាននូវសមិទ្ធផលការងារច្រើនរាប់មិនអស់ នៅមុនពេលដែលឯកឧត្តមត្រូវបានប្រមុខរាជរដ្ឋាភិបាលផ្លាស់ប្តូរតួនាទីឱ្យទៅធ្វើជាទីប្រឹក្សារាជរដ្ឋាភិបាលនោះ៕

ដោយ ៖ សុត្ថារ៉ា

ភ្នំពេញ ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភាព្រឹកថ្ងៃទី១ ខែកក្កដា ឆ្នាំ២០១៩នេះបាន ដឹកនាំសម័យប្រជុំរដ្ឋសភាលើកទី២ នីតិកាលទី៦ ដើម្បីពិភាក្សាអនុម័តសេចក្តីព្រាងច្បាប់ចំនួន៥ ដោយសម័យប្រជុំនេះមានវត្តមានសមាជិក សមាជិការដ្ឋសភាចូលរួមចំនួន ១១២រូប លើចំនួនសរុប ១២៥រូប។

សេចក្តីព្រាងច្បាប់ទាំង៥ ដែលរដ្ឋសភាបានលើកយកមកពិភាក្សា និងអនុម័តរួមមាន៖ ១- សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាល នៃព្រះរាជាណា ចក្រកម្ពុជាឱ្យក្រុមហ៊ុនអេសភីអេចភី(ខេមបូឌា)ឯ.ក។

២-សេចក្តីព្រាងច្បាប់ស្តីពីការអនុម័តយល់ព្រម លើការធានាទូទាត់របស់រាជរដ្ឋាភិបាល នៃព្រះរាជាណាចក្រកម្ពុជា ឱ្យក្រុមហ៊ុនស្នេថេក រីញូវេប៊ល ឯ.ក។

៣-សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាល នៃព្រះរា ជាណាចក្រកម្ពុជាឱ្យក្រុមហ៊ុន ស្នេថេក ខូ អិលធីឌី។

៤-សេចក្តីព្រាងច្បាប់ស្តីពីការអនុម័តយល់ព្រម ឲ្យព្រះរាជាណាចក្រកម្ពុជាចូលជាសមាជិកនៃកិច្ចព្រមព្រៀងស្តីពីវិធានការរដ្ឋម្ចាស់កំពង់ផែ ដើម្បីបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញត និង៥-សេចក្តីព្រាងច្បាប់ស្តីពីការអនុម័តយល់ព្រមលើផែនការយុទ្ធសាស្ត្រអភិវឌ្ឍន៍ជាតិ២០១៩-២០២៣៕

ដោយ ៖ ស  ស

ភ្នំពេញ ៖ មនុស្សយ៉ាងតិច៩នាក់ ក្នុងនោះមានម្នាក់ជាទីប្រឹក្សាក្រសួងមហាផ្ទៃផងដែរ ត្រូវបានសមត្ថកិច្ចចាប់ខ្លួនក្នុងប្រតិបត្តិការបង្ក្រាបទីតាំងបើកល្បែងជល់មាន់ និងបាញ់អាប៉ោងធំមួយកន្លែង នៅចំណុចដីឡូតិ៍ព្រៃស្មៅ (ទុកចោល) ផ្លូវលំ ភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ កាលពីថ្ងៃទី៣០ ខែមិថុនា ឆ្នាំ២០១៩នេះ ។

មន្ត្រីនគរបាលបានរាយការណ៍ថា ដំបូងឡើយកម្លាំងផ្នែកនគរបាលយុត្តិធម៌ និងកម្លាំងផ្នែកអន្តរាគមន៍ នៃអធិការដ្ឋាននគរបាលខណ្ឌមានជ័យ បានធ្វើការល្បាតពួនស្ទាក់ក្នុងមូលដ្ឋាន ហើយនៅពេលមកដល់ចំណុចដីឡូតិ៍ព្រៃស្មៅ (ទុកចោល) ក៏ប្រទះឃើញជនសង្ស័យជាច្រើននាក់ កំពុងលេងល្បែងស៊ីសងខុសច្បាប់ ឃើញដូចនោះសមត្ថកិច្ចបានចូលទៅឡោមព័ទ្ធ ចាប់ឃាត់ខ្លួនជនសង្ស័យចំនួន០៩នាក់។

មន្ត្រីនគរបាលដដែលបានបញ្ជាក់ទៀតថា មនុស្សទាំង៩នាក់ដែលឃាត់ខ្លួននោះរួមមាន ទី១៖ឈ្មោះ ទិត វិចិត្រ អាយុ៣៨ឆ្នាំ មុខរបរបុគ្គលិកក្រុមហ៊ុន, ទី២៖ឈ្មោះ ឡុង តារ៉ា អាយុ៣៧ឆ្នាំ មុខរបរជាងកញ្ចក់, ទី៣៖ឈ្មោះ គឹម ង៉ែតសុពល អាយុ៦២ឆ្នាំ មុខរបរទីប្រឹក្សាក្រសួងមហាផ្ទៃ, ទី៤៖ឈ្មោះ ហូ ផល អាយុ៤៥ឆ្នាំ មុខរបរបុគ្គលិកក្រុមហ៊ុន, ទី៥៖ឈ្មោះ សឿន សុង អាយុ៤៨ឆ្នាំ មុខរបររត់ម៉ូតូកង់បី, ទី៦៖ឈ្មោះ មោក យ៉េន អាយុ៣៦ឆ្នាំ អ្នកកាសែតពិភពថ្មីព័ត៌មាន, ទី៧៖ឈ្មោះ ឈួន រ៉ាឈូ អាយុ៥៣ឆ្នាំ អ្នកកាសែតវីរៈសែនជ័យ, ទី៨៖ឈ្មោះ គ្រង រដ្ឋា អាយុ៤៨ឆ្នាំ អ្នកកាសែតសង្គ្រោះប្រជាពលរដ្ឋខ្មែរស្នេហាជាតិ និងទី៩៖ឈ្មោះ គឹម សាវិត អាយុ២៩ឆ្នាំ អ្នកកាសែតអំណាចខ្មែរ។ ទន្ទឹមនោះសម្ភារៈជាវត្ថុតាំងមួយចំនួនក៏ត្រូវបានរិបអូសនៅក្នុងប្រតិបត្តិការបង្ក្រាបនេះផងដែរ៕

​ដោយ ៖ សហការី

ខេត្តកោះកុង ៖ សមត្ថកិច្ចនគរបាលស្រុកស្រែអំបិល ខេត្តកោះកុង បានឲ្យដឹងនៅព្រឹកថ្ងៃទី៣០ ខែមិថុនា ឆ្នាំ២០១៩នេះថា មានករណី គ្រោះថ្នាក់ចរាចរណ៍មួយបានកើតឡើង បណ្តាលឲ្យបុរសម្នាក់ស្លាប់ និងព្រះសង្ឃចំនួន៦អង្គ រងរបួសធ្ងន់។

មន្ត្រីនគរបាលចរាចរណ៍ឲ្យដឹងថា ព្រះសង្ឃទាំង៦អង្គនោះ បានគង់នៅលើរុឺម៉ក ដើម្បីនិមន្តបិណ្ឌបាត្រ ប៉ុន្តែត្រូវបានរថយន្តដឹកដីបើកបុក បណ្តាលឲ្យស្លាប់អ្នកបើករ៉ឺម៉ក និងរងរបួសព្រះសង្ឃចំនួន៦អង្គ។ ក្នុងនោះរបួសធ្ងន់ចំនួន៣អង្គ។

សមត្ថកិច្ចនគរបាលដដែលបានបន្តថា គ្រោះថ្នាក់ចរាចរណ៍ខាងលើនេះ កើតឡើង រវាងរថយន្តបែនដឹកដី មួយគ្រឿង ពណ៌ស ពាក់ស្លាកលេខ KPS 1168 បើកបរ ក្នុងទិសដៅចេញពីរាជធានីភ្នំពេញ ឆ្ពោះទៅខេត្តព្រះសីហនុ លុះមកដល់ចំណុចកើតហេតុ រថយន្ត បានរេចង្កូត មកបុកជាមួយរុឺម៉កនៅតាមកំណាត់ផ្លូវជាតិ លេខ៤ ត្រង់ចំណុចគីឡូម៉ែត្រលេខ១៤៨-១៤៩ (ចំណែកផ្លូវខាងខេត្តកោះកុង) ស្ថិតក្នុងភូមិអូរជ្រៅ ឃុំបឹងព្រាវ ស្រុកស្រែអំបិល ខេត្តកោះកុង កាលពីវេលាម៉ោងជិត ៩ព្រឹកថ្ងៃទី៣០ ខែមិថុនា ឆ្នាំ២០១៩មិញនេះ។

សមត្ថកិច្ចនគរបាលចរាចរណ៍ស្រុកកំពង់សិលា បានឲ្យដឹងទៀតថា ក្រោយកើតហេតុ អ្នកបើកបររថយន្តបែន ដឹកដី ក៏បានចុះរត់ គេច បាត់ ពីកន្លែងកើតហេតុដោយមិនទទួលខុសត្រូវ និង ក្រោយកើតហេតុ សមត្ថកិច្ចចម្រុះ មានកម្លាំងកងរាជអាវុធហត្ថ និងកម្លាំងនគបាលមូលដ្ឋាន រួមមានទាំងខាងខេត្តកោះកុង និងខេត្តព្រះសីហនុ បានចុះមកជួយអន្តរាគមន៍សង្គ្រោះ ជនរងគ្រោះដោយបានដឹកបញ្ជូនជនរងគ្រោះ ទៅកាន់មន្ទីរពេទ្យភ្លាមៗផងដែរ។

បច្ចុប្បន្ននេះវត្ថុតាងរួមមានម៉ូតូរ៉ឺម៉ក និងរថយន្តត្រូវបានកម្លាំងនគរបាលស្រុកកំពង់សិលា ចាត់ចែកយកមករក្សាទុក នៅអធិការដ្ថាន ស្រុកកំពង់សិលា ដើម្បីបន្តនីតិវិធីដោះស្រាយតាមផ្លូវច្បាប់។

គួរបញ្ជាក់ផងដែរថា បច្ចុប្បន្ន រថយន្តបែន ដឹកដីជាច្រើនគ្រឿង បើកបរយ៉ាង អនាធិបតេយ្យ ពុំគោរព ច្បាប់ទម្លាប់ ឬ ក៏មានអាជ្ញាធរណាមួយចុះមកអប់រំដល់ ពួកគាត់ខណៈពេល ដែលកំពុងបើកបរ នៅតាមដងផ្លូវ ទោះបីជាទោះបីជាមានល្បឿនលឿនក្តី វ៉ាជែងគ្នាក្តី ឬមួយក៏បត់បែនគ្មានសណ្ដាប់ធ្នាប់និងក្តី។

បើតាមសំដី របស់ក្រុមអ្នក បើកបរ រថយន្តបែនដឹកដីជាច្រើននាក់ ពួកគាត់បានឲ្យអ្នកសារព័ត៌មានដឹងថា ថៅកែឡាន របស់ពួកគាត់បានបង់ខែឲ្យទៅសមត្ថកិច្ចទាំងអស់នោះហើយដូច្នេះពួកគាត់មិនបាច់ខ្វល់ខ្វាយឬព្រួយបារម្ភអ្វីទៀតទេ។ពួកគាត់ថា លៃយ៉ាងណាឲ្យតែ បើកដល់ គោលដៅហើយដឹកដីចាក់នៅតាមគោលដៅអោយបានទាន់ពេលវេលានិងឱ្យបានច្រើនឡានបន្ថែមទៀតទើបល្អ៕ 

ដោយ ៖ សហការី

ខេត្តព្រៃវែង ៖ កម្លាំងប៉ូលិសប្រឆាំងបទល្មើសសេដ្ធកិច្ចខេត្តព្រៃវែងហការជាមួយកម្លាំងមកពីអគ្គនៃក្រសួងមហាផ្ទៃ ចុះបង្ក្រាបបទល្មើសនេសាទប្រើអួនអួសឆក់ដុំត្រជាក់ខុសច្បាប់របស់ក្រុមជនជាតិតាមដងទន្លេមេគង្គក្រោម តែក្រុមល្មើសបម្រុងតដៃជាមួយសមត្ថកិច្ច ធ្វើអោយសមត្ថកិច្ចបង្ខំចិត្តបាញ់១គ្រាប់ចូលទៅក្នុងទឹក ដើម្បីគំរាមការពារសុវត្ថិភាព បណ្តាលអោយផ្លាតទៅត្រូវជនល្មើសម្នាក់ចំជើងរងរបួសស្រាល ខណៈបក្ខពួកជនល្មើស ៥នាក់ទៀតត្រូវកម្លាំងសមត្ថកិច្ចឃាត់ខ្លួន។

ហេតុការណ៍នេះ បានកើតឡើងកាលពីវេលាម៉ោង១១និង០០នាទីយប់ថ្ងៃទី២៨ខែមិថុនាឆ្នាំ២០១៩នៅចំណុចតាមដងទន្លេមេគង្គក្រោមស្ថិតក្នុងឃុំស្វាយភ្លោះ ស្រុកពាមជរ ខេត្តព្រៃវែង។

បើតាមលោក គឹម សាលួត ប្រធានការិយាល័យនគរបាលប្រឆាំង បទល្មើសសេដ្ធកិច្ចខេត្តព្រៃវែង បានអោយបញ្ជាក់ប្រាប់ភ្នាក់ងារព័ត៌មានដឹងតាមទូរស័ព្ទនៅរសៀលថ្ងៃទី២៩ខែមិថុនាឆ្នាំ២០១៩ នេះថា យោងតាមរបាយការណ៍ពាក្យបណ្តឹងតាមទូរស័ព្ទរបស់ប្រជាពលរដ្ឋ លោកស្នងការរង ក៍ដូចជាលោកស្នងការ និងតាមរយៈគណៈពង្រឹងក្រុមការងារថ្នាក់ជាតិ ដែលចុះជួយស្រុកពាមជរ នោះ ឃើញថា មានក្រុមជនជាតិវៀតណាម ប្រព្រឹត្តបទល្មើសនេសាទខុសច្បាប់អូសសាច់អួន ប្រើដុំឆក់ត្រជាក់ និងទូកធំៗ ប្រើសុទ្ធតែម៉ាស៊ីនតាមដងទន្លេមេគង្គក្រោម យ៉ាងគគ្រឹកគគ្រេង នៅពេលយប់ជាយូរយាណាស់ មកហើយ និងបានរំខានបំផ្លិចបំផ្លាញអូសដាច់មង សន្ទូច របស់ពលរដ្ធប្រកបមុខរបរនេសាទ ជាលក្ខណៈគ្រួសារបន្តិតបន្តួចគ្រាន់ចិញ្ចឹមជីវិតទៀតផង។ ចំពោះសកម្មភាពរបស់ក្រុមជនល្មើសខ្លាំងក្លាណាស់សមត្ថកិច្ចស្រុក ឃុំមិនហ៊ានទៅក្បែរពួកវានោះទេ ព្រោះខ្លាចមានគ្រោះថ្នាក់ដល់អាយុជីវិត។

សូមបញ្ជាក់កាលឆ្នាំកន្លងទៅនាយសង្កាត់ជលផលស្រុកពាមជរម្នាក់បានដឹកនាំកម្លាំងក្រោមឱវ៉ាតចុះទៅបង្ក្រាបក្រុមជនជាតិវៀតណាមអូសសាច់អួនប្រើឧបករណ៍ឆក់ត្រជាក់នេះត្រូវបានក្រុមជនល្មើសបើកទូកបំបុកលិចលង់ទឹកស្លាប់រហូតដល់សព្វថ្ងៃសមត្ថកិច្ចមិនទាន់ស្រាវជ្រាវរកមុខសញ្ញាជនដៃដល់បានផង។

លោកប្រធានការិយាល័យបន្តថាណាមួយយោងតាមរដូវនេះគឺជារដូវបិទនេសាទទើបកម្លាំងប្រើប្រាស់មធ្យោបាយដោយទូកអូប័រចំនួន២គ្រឿងគ្នាជាង១០នាក់ចុះប្រតិបត្តិការណ៍បង្ក្រាបតែម្តង។ប៉ុន្តែខណៈចុះបង្ក្រាក្រុមជនជាតិវៀតណាមល្មើសច្បាប់ទាំងនោះខ្លាចទេថែមទាំងបើកទូកចូលមកបំណងបំបុកទូករបស់កម្លាំងសមត្ថកិច្ចនិងទាញកាំបិតពូថៅតតាំងជាមួយសមត្ថកិច្ចទៀតផង។ឃើញសកម្មភាពរបស់ក្រុមល្មើសបែបនេះធ្វើអោយសមត្ថកិច្ចប្រើសិទ្ធការពារខ្លួនបង្ខំចិត្តបាញ់គំរាមទៅក្នុងបណ្តាលអោយផ្លាតទៅត្រូវជនល្មើសម្នាក់ឈ្មោះ ង្វៀង វ៉ាន់អ៊ុក ជនជាតិវៀតណាម មានទីលំនៅភូមិកំពង់ចម្លង ឃុំព្រែកទម្លាប់ ស្រុកលើកដែក ខេត្តកណ្តាល ចំជើងខាងស្តាំពាមគ្រាប់ជាប់នៅហ្នឹងជើងក៍ត្រូវសមត្ថកិច្ចដឹកបញ្ជូនយកទៅព្យាបាលរបួសនៅមន្ទីរពេទ្យខេត្តព្រៃវែងទាំងយប់ក្រោមការយាមកាមរបស់សមត្ថកិច្ច។ចំណែកជនល្មើស៥នាក់ទៀតសុទ្ធតែជនជាតិវៀតណាម ទាំងអស់មិនទាន់ស្គាល់ឈ្មោះ និងទូកម៉ាស៊ីនធំៗ ៣គ្រឿង រួមជាមួយឧបករណ៍ល្មើសច្បាប់ជលផល ត្រូវបានសមត្ថកិច្ចធ្វើកំណត់កសាងសំណុំរឿងហេតុប្រគល់អោយមន្ត្រីជំនាញជលផលចាត់ការបន្តតាមនីតិវិធីច្បាប់។

លោកប្រធានការិយាល័យបញ្ជាក់បន្ថែមថាទូកនេសាទខុសច្បាប់របស់ក្រុមជនល្មើសច្រើនគ្រឿងណាស់ពេញផ្ទៃទន្លេបើករត់គេចបែកទឹកសំពោង ដោយសារកម្លាំងតិច និងមធ្យោបាយទូកមានតែ២គ្រឿង ហើយណាមួយយប់ងងិតទៀតខ្លាចមានគ្រោះថ្នាក់ ទើបបង្ក្រាបបានតែ៣គ្រឿងនេះ៕

ដោយ ៖ សហការី

កណ្តាល ៖ បុរសជនជាតិបារាំងវ័យ២៩ឆ្នាំម្នាក់ មិនដឹងថា មានវិបត្តិផ្លូវអារម្មណ៍បែបណានោះទេ ខណៈដែលកំពុងដើរតាមផ្លូវសុខៗ ស្រាប់តែស្ទុះយកបានដបសាំង ពីកផ្ទះអ្នកលក់ មកចាក់ស្រោចលើខ្លួន ហើយដុតឆេះរលាក ផ្អើលប្រជាពលរដ្ឋ ពួយពន្លត់។ សមត្ថកិច្ចឃើញសភាពមិនស្រួល ជួយអន្តរាគមន៍ ចាត់បញ្ជូនទៅសង្គ្រោះនៅមន្ទីរពេទ្យ កាលពីវេលាម៉ោង ៧ព្រឹក ថ្ងៃទី២៩ ខែមិថុនា ឆ្នាំ២០១៩ តាមផ្លូវជាតិលេខ៦ ភូមិលើ ឃុំព្រែកអញ្ចាញ ស្រុកមុខកំពូល ខេត្តកណ្ដាល ។

តាមការពិនិត្យលើលិខិតឆ្លងដែន ជនរងគ្រោះមានឈ្មោះ AUDOIN YANN ភេទប្រុស ឆ្នាំកំណើតថ្ងៃទី១២ ខែកុម្ភៈ ឆ្នាំ១៩៩០ ជនជាតិបារាំង មានលិខិតឆ្លងដែនលេខ13A129466 ចុះថ្ងៃទី១២ ខែមិនា ឆ្នាំ២០១៣ ។

តាមប្រជាពលរដ្ឋបានឲ្យដឹងថាមុនកើតហេតុ គេឃើញជនរងគ្រោះដើរតាមបណ្តោយផ្លូវជាតិលេខ៦ ពីជើងទៅត្បូង លុះដើរមកដល់កន្លែងកើតហេតុ ស្រាប់តែជនរងគ្រោះបានស្ទុះទៅយកដបសាំងនៅមុខផ្ទះរបស់ពលរដ្ឋដាក់លក់ក្បែរចិញ្ចើមផ្លូវ មកចាក់ស្រោចខ្លួនឯង រួចដុត ដោយពុំដឹងជាមានមូលហេតុអ្វីនោះទេ បណ្តាលឲ្យឆេះរលាកពេញខ្លួនរងរបួសយ៉ាងធ្ងន់។ ភ្លាមៗនោះ ក៏ផ្អើលឆោឡោដល់ប្រជាពលរដ្ឋជិតខាង ស្ទុះមកនាំគ្នាជួយពន្លត់ រួចឃាត់មិនឲ្យទៅណា តែបុរសចណជាតិបារាំងនោះ មិនស្តាប់ ក៏បន្តដំណើរទៅមុខទៀត រហូតមកដល់ចំណុចមុខរោងចក្រស៊ិចផ្លើស ប្រជាពលរដ្ឋ សមត្ថកិច្ចឃើញមានសភាពមិនស្រួល ក៏ជួយអន្តរាគមន៍ ហៅរថយន្ដសង្គ្រោះ ដឹកបញ្ជូនទៅសង្គ្រោះនៅមន្ទីរពេទ្យកាល់ម៉ែតតែម្តង ៕