ខេត្តព្រះសីហនុ ៖ លោក គួច ចំរើន នាព្រឹកថ្ងៃទី២៩ ខែមិថុនា ឆ្នាំ ២០១៩ ត្រូវបានប្រកាស តែងតាំងជាអភិបាលខេត្ត ព្រះសីហនុជាផ្លូវការ ជំនួសលោក យន្ត មីន អតីតអភិបាល នៃគណៈ អភិបាលខេត្តព្រះសីហនុ ដែលត្រូវបានផ្លាស់ប្ដូរតំណែងដំឡើងឋាវៈទៅជារដ្ឋលេខាធិការក្រសួង ការពារជាតិ។

ក្នុងពិធិនេះ លោក គួច ចំរើន មានប្រសាសន៍ថា “ដើម្បីជាសក្ខីភាពឆ្លើយតប នឹងការផ្តល់នូវការ គាំទ្រ និងជំនឿជឿជាក់ ប្រកបដោយទំនុកចិត្តពីប្រមុខរាជរដ្ឋាភិបាលកម្ពុជា និងសម្តេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ លោកបានឡើងប្តេជ្ញាចិត្តនូវចំណុច សំខាន់ ១៣ចំណុច”។

លោក គួច ចំរើន អភិបាលនៃគណ:អភិបាលខេត្តព្រះសីហនុ ប្រកាសប្រើយន្តការ ១៣ចំណុច ដើម្បីអភិវឌ្ឍន៍ខេត្តព្រះសីហនុ រួមមានអនុវត្តយ៉ាងម៉ឺងម៉ាត់នូវរដ្ឋធម្មនុញ្ញ អនុវត្តឱ្យបានខ្ជាប់ ខ្ជួន នូវកម្មវិធីនយោបាយ, ខិតខំគោរព ពង្រឹងការគ្រប់គ្រងដឹកនាំ ប្រកបដោយប្រសិទ្ធភាព តម្លាភាព ក្នុងការបំពេញភារកិច្ច នៅរដ្ឋបាលថ្នាក់ក្រោមជាតិ លុបបំបាត់រាល់បាតុភាពអសកម្មនានា ដែលធ្វើ ឲ្យប៉ះពាល់ បង្កការថ្នាំងថ្នាក់ដល់ប្រជាពលរដ្ឋ , អភិវឌ្ឍន៍លើវិស័យនានាក្នុងខេត្ត ពិសេសការ រៀប ចំកែលំអ សោភ័ណភាពទីក្រុងឆ្នេរសមុទ្រ ,ជំរុញការអនុវត្តគោលនយោបាយភូមិ-ឃុំ មានសុវត្ថិភាព ឲ្យកាន់តែមានប្រសិទ្ធភាពខ្ពស់,ពង្រឹងការគ្រប់គ្រងស្ថិតិប្រជាពលរដ្ឋ គ្រប់គ្រងស្ថិតិជនអន្តោប្រវេស ន៍ កម្មករចំណាកស្រុកឱ្យបានច្បាស់លាស់។

ឱកាសនោះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានលើក ឡើងអំពីបញ្ហាប្រឈមមួយចំនួនរួមមាន ៖ ១-ទំនាស់ដីធ្លី ការគ្រប់គ្រងដីធ្លី ២-គុណ ភាពសំណង់ ៣-សន្ដិសុខនៅកោះរ៉ុង និងបណ្ដាកោះដែលចំណុះក្រុងព្រះសីហនុ ៤-ហេដ្ឋារចនា សម្ព័ន្ធផ្លូវ គមនាគមន៍ និងទី៥-រួមគ្នាដោះស្រាយបញ្ហាលូ ទឹកកខ្វក់ ទឹកភ្លៀង ដែលខេត្តព្រះសីហនុ កំពុងជួបប្រទះ នៅតំបន់ប៉ូលសេដ្ឋកិច្ចដ៏សំខាន់មួយនេះ ហើយទាមទារឲ្យដោះស្រាយជាបន្ទាន់៕

ដោយ ៖ សុត្ថារ៉ា

​ភ្នំពេញ ៖ សម្តេចតេជោនាយក​រដ្ឋមន្ត្រី ហ៊ុន សែន នឹង​ដឹកនាំ​គណៈប្រតិភូ​ជាន់ខ្ពស់ អញ្ជើញ​ទៅ​ចូលរួម​កិច្ចប្រជុំនៅ​អង្គការ​ពាណិជ្ជកម្ម​ពិភពលោក ( WTO ) នាទីក្រុង​ហ្សឺ​ណែ​វ ប្រទេស​ស្វីស ស្តីពី«​ត្រួតពិនិត្យ​ឡើងវិញ ជា​សកល​លើ​ជំនួយ​សម្រាប់​ពាណិជ្ជកម្ម ឆ្នាំ​២០១៩» ដែល​នឹង​ប្រព្រឹត្តទៅពីថ្ងៃទី​៣ ដល់​ថ្ងៃ​ទី​៥ ខែកក្កដា ឆ្នាំ​២០១៩ ខាងមុខ។

(​ រូបតំណាង )

​សេចក្តីប្រកាស​ព័ត៌មាន របស់​ក្រសួងការបរទេស និង​សហប្រតិបត្តិការ​អន្តរជាតិ ចុះ​ថ្ងៃ​ទី​២៨ មិថុនា បានឱ្យដឹងថា តប​តាម​ការអញ្ជើញ​របស់​លោក រ៉ូបឺតូ អា​ហ្សេ​វេដូ អគ្គនាយក​អង្គការ​ពាណិជ្ជកម្ម​ពិភពលោក (WTO)  សម្តេចនាយក​រដ្ឋមន្ត្រី ហ៊ុន សែន នឹងអញ្ជើញទៅចូលរួមក្នុងកិច្ចប្រជុំខាងលើនេះ និងត្រូវបាន​អញ្ជើញឡើង​ថ្លែង​សុន្ទរកថា​គន្លឹះ ដែល​ក្នុង​ឱកាស​នោះ សម្តេចនឹង​គូសបញ្ជាក់​ពី​បទ​ពិសោធន៍ក្នុងកិច្ចខិតខំប្រឹងប្រែង និង​យុទ្ធសាស្ត្រ​របស់​កម្ពុជា ក្នុងការ​ជម្នះ​ឧបស័គ្គ​នានាដែល​នាំមក​នូវ​កំណើន​សេដ្ឋកិច្ច​គួរឱ្យ​កោតសរសើរ​របស់ប្រទេស​កម្ពុជា ។​

​សេចក្តីប្រកាសដដែលបញ្ជាក់ថា ​នាយករដ្ឋមន្ត្រី ហ៊ុន សែន នឹងឡើងថ្លែង​សុន្ទរកថា នៅក្នុង​កិច្ចប្រជុំ​ជា​ទៀងទាត់​លើក​ទី​៤១ នៃ​ក្រុមប្រឹក្សា​សិទ្ធិមនុស្ស​អង្គការសហប្រជាជាតិ ដែល​នឹង​ផ្តល់​សារសំខាន់ និង​ច្បាស់លាស់​មួយ ដែលឆ្លុះបញ្ចាំង​ពី​ការប្តេជ្ញាចិត្ត​ដ៏​មោះមុត របស់​រាជរដ្ឋាភិបាល​កម្ពុជា ក្នុង​ការគោរព​សិទ្ធិមនុស្ស និង​លទ្ធិប្រជាធិបតេយ្យ​នៅ​កម្ពុជា។

សម្តេចតេជោ នឹង​ប្រកាស​ជា​ផ្លូវការ​នូវ​យុទ្ធសាស្ត្រ​សមាហរណកម្ម​ពាណិជ្ជកម្ម​របស់​កម្ពុជា ឆ្នាំ​២០១៩-២០២៣ ហើយក្រៅពីនោះ សម្តេចតេជោ ក៏នឹង​ថ្លែង​សុន្ទរកថា នៅក្នុង​កម្មវិធី​សង្គមដែល​រៀបចំ​ដោយអង្គការ​ពាណិជ្ជកម្ម​ពិភពលោកផងដែរ។

គួរជម្រាបថា អញ្ជើញអមដំណើរសម្តេចតេជោនាយករដ្ឋមន្រ្តី រួមមាន ឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីសេដ្ឋកិច្ច និងហិរញ្ញវត្ថុ  លោក ប៉ាន សូរស័ក្តិ រដ្ឋមន្រ្តីពាណិជ្ជកម្ម និងឥស្សរជនជាន់ខ្ពស់មួយចំនួនទៀត ក្នុងរាជរដ្ឋាភិបាលផងដែរ៕

ដោយ ៖ សុត្ថារ៉ា

ភ្នំពេញ ៖ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ហៅកាត់ថា ACU នៅថ្ងៃទី ២៨ ខែមិថុនា នេះ បានបញ្ជាក់ប្រាប់ក្រុមអ្នកសារព័ត៌មានថា ករណីលោក គឹម រស្មី អតីតមេប៉េអឹម ខេត្តរតនគិរី នៅជាប់ការស៊ើបអង្កេតមួយករណីផ្សេងទៀត គឺពាក់ព័ន្ធបទល្មើសព្រៃឈើ ក្រៅពីរឿង សំញ៉ែងទ្រព្យដែលលោកចែកសែកឱ្យកូន៥នាក់ ម្នាក់ៗ ១០ម៉ឺនដុល្លារ។

លោក ឱម យ៉ិនទៀង បានឱ្យដឹងថា អង្គភាពប្រឆាំងអំពើពុករលួយ កំពុងបន្តស៊ើបអង្កេតលើអតីត មេប៉េអឹមខេត្តរតនគិរី លោក គឹម រស្មី ដែលត្រូវបានបណ្តេញចេញពីក្របខណ្ឌកម្លាំងប្រដាប់ បន្ទាប់ ពីលោកបានសំញ៉ែងទ្រព្យសម្បត្តិ ដោយចែកសែក៥សន្លឹក ស្មើនឹង៥០ម៉ឺនដុល្លារ ដល់កូនៗចំនួន ៥នាក់ កាលពីអំឡុងខែកម្ភៈ ដើមឆ្នាំនេះ គឺពាក់ព័ន្ធនឹងករណីបទល្មើសព្រៃឈើ។

គួររំឭកថា ឧត្តមសេនីយ៍ត្រី គឹម រស្មី មេបញ្ជាការអាវុធហត្ថខេត្តរតនគិរី ត្រូវបានលុបឈ្មោះចេញ ពី ក្របខណ្ឌ នៃកងយោធពលខេមរភូមិន្ទ បន្ទាប់ពីធ្លាយវីដេអូចែកប្រាក់ដល់កូនៗ ចំនួន៥នាក់ ដោយ ម្នាក់ៗទទួលបាន១០ម៉ឺនដុល្លារអាមេរិក នៅក្នុងពិធីខួបកំណើត កាលពីយប់ថ្ងៃទី៥ ខែកុម្ភៈ ឆ្នាំ ២០១៩។

លោក ឱម យ៉ិនទៀង បានបញ្ជាក់ថា ឯកសាររបស់លោក គឹម រស្មី ត្រូវបានអង្គភាពប្រឆាំងអំពើពុក រលួយ បង្កើតក្រុមការងារស៊ើបអង្កេតចំនួន ៦ក្រុម និងបានស៊ើបលើប្រពន្ធ និងកូនរបស់លោក គឹម រស្មី តែរកមិនឃើញបទល្មើសអ្វី ក្រៅពីការសំញ៉ែងទ្រព្យសម្បត្តិនោះឡើយ តែអង្គភាព ACU នៅបន្តស៊ើបអង្កេតមួយផ្សេងទៀត លើលោក គឹម រស្មី គឺពាក់ព័ន្ធនឹងបទល្មើសព្រៃឈើ៕

ភ្នំពេញ ៖ លោកទេសរដ្ឋមន្ដ្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានថ្លែងនៅគ្នុង សន្និសីទកាសែតថា នៅថ្ងៃទី២៨ ខែមិថុនានេះ លោកឧកញ៉ា សុខ ប៊ុន អគ្គនាយកក្រុមហ៊ុន សុខ ប៊ុនគ្រុប និងមនុស្សមួយចំនួនទៀតបានទទួលស្គាល់ការក្លែងបន្លំឯកសាររំលោភយកដីរដ្ឋនៅ សង្កាត់ កោះរ៉ុង ក្រុងកោះរ៉ុង ខេត្តព្រះសីហនុ កាលពីអំឡុងឆ្នាំ២០១៦ ដល់ឆ្នាំ២០១៩។

លោកទេសរដ្ឋមន្រ្តី ឱម យ៉ិនទៀង បានបញ្ជាក់ថា ការរំលោភយកដីរដ្ឋដោយខុសច្បាប់នៅកោះរ៉ុង គឺមានការឃុបឃិតគ្នាជាប្រព័ន្ធ ហើយករណីនេះ ACU បានរកឃើញដោយការស៊ើបអង្កេត។ ក្នុង នោះដីដែលលោក សុខ ប៊ុន រំលោភយក គឺមានទំហំ ៥២៥ ហិកតា ដោយមានជាប់ពាក់ព័ន្ធនឹង ប្រធានក្រុមប្រឹក្សាក្រុងកោះរ៉ុង ចៅសង្កាត់ ចៅសង្កាត់រង មេភូមិ និងសមាជិកក្រុមប្រឹក្សាផងដែរ។

ថ្លែងក្នុងសន្និសីទសារព័ត៌មាន នៅរសៀលថ្ងៃទី២៨ ខែមិថុនា ឆ្នាំ២០១៩ នេះ លោក ទេសរដ្ឋមន្ដ្រី ឱម យ៉ិនទៀង បានពន្យល់យ៉ាងលម្អិត និងបានបង្ហាញឯកសារចំនូន៥ ជូនសាធារណដល់ក្រុម អ្នកសារេព័ត៌មានផងដែរ។

សូមជម្រាបថា ថ្ងៃទី២៤ ខែមិថុនា ឆ្នាំ២០១៩ លោក រស់ ពិសិដ្ឋ ចៅក្រមស៊ើបសួរសាលាដំបូងរាជ ធានីភ្នំពេញ បានចេញដីកាសម្រេចឃុំខ្លួនលោកឧកញ៉ា សុខ ប៊ុន និងមន្ដ្រីអាជ្ញាធរសង្កាត់កោះរ៉ុង ចំនួន៥នាក់ផ្សេងទៀត ក្រោយអង្គភាពប្រឆាំងអំពើពុករលួយ (ACU) ឃាត់ខ្លួនពាក់ព័ន្ធការរំលោភ ដីខុសច្បាប់ នៅសង្កាត់កោះរ៉ុង ក្រុងកោះរ៉ុង ខេត្តព្រះសីហនុ ដែលដើមចមរឿងហេតុដែលឈាន ដល់ការឃាត់ខ្លួនមនុស្សទាំងឡាយាំង៦នាក់នេះ គឺផ្តើមចេញពីជម្លោះរវាងប្រជាពលរដ្ឋចំនួន ៤២គ្រួសារជាមួយលោក សុខ ប៊ុន រឿងដីចំនួន ៥២៥ហិកតា។

រីឯមនុស្សចំនួន៥នាក់រួមមាន លោក អ៊ុង និត ជាប្រធានក្រុមប្រឹក្សាក្រុងកោះរ៉ុង, លោក សេង ហូលាង ជាចៅសង្កាត់កោះរ៉ុង, លោក ហែម សាឡេះ ជាសមាជិកក្រុមប្រឹក្សាសង្កាត់កោះរ៉ុង, លោក កែ សោម ជាចៅសង្កាត់រងទី២ និងលោក កែវ ពៅ មេភូមិព្រែកស្វាយ សង្កាត់កោះរ៉ុង ក្រុង កោះរ៉ុង ខេត្តព្រះសីហនុ ត្រូវបានចោទប្រកាន់ពីបទ បំផ្លាញដោយចេតនា និងគៃបំបាត់ដោយទុច្ចរិត , វីតិក្រម, ក្លែងបន្លំឯកសារសាធារណៈ និងប្រើប្រាស់ឯកសារសាធារណៈក្លែង ប្រព្រឹត្តនៅសង្កាត់ កោះរ៉ុង កាលពីអំឡុងឆ្នាំ២០១៦ ដល់ឆ្នាំ២០១៩ យោងតាមមាត្រា ៥៩២, មាត្រា ៥៩៣, មាត្រា ៦០១, មាត្រា ៦២៩ និងមាត្រា ៦៣០ នៃក្រមព្រហ្មទណ្ឌ៕

ភ្នំពេញ៖ លោក ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ កាលពីថ្ងៃទី២៧ ខែមិថុនា ឆ្នាំ២០១៩ បានចេញលិខិតមួយច្បាប់ជូនសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយស្នើសុំគោលការណ៍សម្រេចលើវិធានការចាំបាច់សំដៅទប់ស្កាត់ការដ្ឋានសំណង់ខុសច្បាប់ ដើម្បីធានាអាយុជីវិតមនុស្សទ្រព្យសម្បត្តិ សុវត្ថិភាព និងគុណភាពសំណង់ ទូទាំងប្រទេស។

យោងតាមលិខិតនោះ លោក ជា សុផារ៉ា បានជម្រាបជូនសម្ដេចតេជោ ហ៊ុន សែន ថា ដើម្បីការពារអាយុជីវិត និងទ្រព្យសម្បត្តិ របស់ប្រជាពលរដ្ឋ ធានាសុវត្ថិភាពនិងគុណភាពសំណង់នៅទូទាំងប្រទេស និងធានាការអភិវឌ្ឍប្រទេសជាតិប្រកបដោយចីរភាព ក្រសួងរៀបចំដែនដីនគរូបនីយកម្ម និងសំណង់ គោរពសូមការសម្រេចដ៏ខ្ពង់ខ្ពស់ ពីសម្ដេចតេជោនាយករដ្ឋមន្ត្រី ដើម្បីដាក់ចេញ នូវវិធានការចាំបាច់មួយចំនួន ចំពោះការដ្ឋានសំណង់ សណ្ឋាគារ អគារស្នាក់នៅរួម អគារពាណិជ្ជកម្ម អគាររោងចក្រ អគារសិប្បកម្ម និងសំណង់ផ្សេងទៀត បើគ្មានលិខិតអនុញ្ញាត និងសាងសង់ខុសលក្ខណៈបច្ចេកទេស លើកលែងសំណង់លំនៅដ្ឋានផ្ទាល់ខ្លួនរបស់ប្រជាពលរដ្ឋ ដូចជា ៖ ក្រសួងរ៉ែ និងថាមពល វិធានការមិនឱ្យមានការផ្គត់ផ្គង់ថាមពលអគ្គិសនី ដល់ការដ្ឋានសំណង់។ ក្រសួងឧស្សាហកម្ម និងសិប្បកម្ម ចាត់វិធានការមិនឱ្យមានការផ្គត់ផ្គង់ទឹកស្អាត ដល់ការដ្ឋានសំណង់នោះឡើយ។

ក្នុងលិខិតដដែល ក៏បានបញ្ជាក់ផងដែរថា ក្រសួងសាធារណការ និងដឹកជញ្ជូន មិនត្រូវអនុញ្ញាតឲ្យតភ្ជាប់លូចូលបណ្ដាញលូសាធារណៈ។ ក្រសួង ស្ថាប័ន និងអង្គភាព មានសមត្ថកិច្ច មិនត្រូវផ្ដល់លិខិតអនុញ្ញាតឲប្រកបអាជីវកម្ម។ ក្រសួងព័ត៌មាន និងអង្គភាពមានសមត្ថកិច្ច មិនត្រូវអនុញ្ញាតឲផ្សព្វផ្សាយពាណិជ្ជកម្ម។

យ៉ាងណាក៏ដោយ នៅរសៀលថ្ងៃទី២៨ ខែមិថុនា ម្សិលមិញនេះ ប្រមុខរាជរដ្ឋាភិបាល មិនទាន់បានឆ្លើយតបបែបណានៅឡើយទេ ចំពោះសេចក្តីស្នើរបស់រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ដូចខាងលើនេះ៕

ខេត្តបន្ទាយមានជ័យ ៖ រថយន្តជាច្រើនម៉ាកសរុបជាង៣០គ្រឿងត្រូវបានកម្លាំងតម្រួតថៃសហការ ជាមួយទាហានព្រំដែនគោកធ្វើការរឹបអូសជាបណ្តោះអាសន្នដើម្បីស្រាវជ្រាវ បន្ទាប់ពីគេសង្ស័យថា អាចមានការពាក់ព័ន្ធទៅនឹងអំពើចោរកម្ម ឬក៏ទាក់ទិននឹងរឿងអ្វីមួយដែលមិនស្របច្បាប់នៅក្នុងប្រទេសថៃ។

កិច្ចប្រតិបត្តិការនេះបានធ្វើឡើងកាលពីវេលាម៉ោង៥ និង៣០នាទីល្ងាចថ្ងៃទី២៤ ខែមិថុនា ឆ្នាំ២០១៩នៅចំណុចក្នុងឃ្លាំងនៃរោងម៉ាសីនកិនស្រូវដ៏ទ្រុឌទ្រោម មួយកន្លែងតាមបណ្តោយផ្លូវលេខ៣៤៨ (អារញ្ញប្រាថេត-គោកឃ្យូង-តាផៈយ៉ា) ស្ថិតក្នុងភូមិ៤ឃុំ បានម៉ៃណងសៃ ស្រុកអារញ្ញប្រាថេត ខេត្តស្រះកែវប្រទេសថៃជាប់នឹងខ្សែបន្ទាត់ព្រំដែនកម្ពុជា ដោយក្នុងនោះមានកម្លាំងស្នងការតម្រួតខេត្តស្រះកែវសហការជាមួយ កម្លាំងតម្រួតខេត្ត ប្រាជីនបុរី និងទាហានព្រំដែនគោកលេខ១៩ ការត្រួតពិនិត្យជារួមគឺ ក្នុងនោះមានត្រាក់ទ័រ២គ្រឿង រថយន្តហុកឡចំនួន២គ្រឿង និងរថយន្តតូចចម្រុះមានចំនួន២៨គ្រឿងសរុបទាំងអស់គឺ៣២គ្រឿងក្រោម ការគ្រប់គ្រងរបស់ម្ចាស់ឈ្មោះ លិខិតថង ណាក់ ភេទប្រុស អាយុ៤៧ឆ្នាំរស់នៅត្រង់ចំណុចខាងលើ។

ក្រោយការឃាត់ខ្លួនយកទៅសាកសួរអ្នកគ្រប់គ្រងរូបនេះបានអះអាងថា ភាគច្រើនគឺជារថយន្តគេយកមកបញ្ចាំដែលមកពីខាងកាស៊ីណូ ប៉ោយប៉ែត ប៉ុន្តែមិនឃើញមកលោះវិញ បើទោះបីជាបែបនេះក្តី ក៏កម្លាំងជំនាញបានសម្រេចដកហូតដើម្បីពិនិត្យ និងស្រាវជ្រាវសិនដោយចង់ដឹងថា ជារថយន្តបានមកពីអំពើចោរកម្ម ឬក៏ជារថយន្តដែលត្រៀមបម្រុងនាំឆ្លងដែនទៅកាន់ប្រទេសជិតខាង ហើយបើពិតជារថយន្តបញ្ចាំមែនក៏ត្រូវពិនិត្យទៅលើអត្រាការប្រាក់ដែរ ថាតើអាចលើសពីគោលការដែលបានកំណត់ដែរ ឬទេបើយ៉ាងដូច្នេះមែនគឺម្ចាស់ក៏ត្រូវមានទោសតាមច្បាប់៕

ព្រៃវែង ៖ កម្លាំងនគរបាលខេត្តព្រៃវែង ឃាត់ខ្លួនជនសង្ស័យ២នាក់ ប្តីប្រពន្ធ ពាក់ព័នន្ធករណីចោរកម្ម(កេងបន្លំលុយនៅគ្រឹះស្ថានមីក្រូហិរញ្ញវត្ថុ AMK សាខាព្រៃវែង ) កាលពីថ្ងៃទី២៧ ខែមិថុនា ឆ្នាំ២០១៩ នៅភូមិលេខ៤ សង្កាត់កំពង់លាវ ក្រុងព្រៃវែង។

សមត្ថកិច្ចបានឱ្យដឹងថា ការឃាត់ខ្លួនជនសង្ស័យទាំង២នាក់ខាងលើនេះ ដោយយោងតាមពាក្យបណ្តឹងរបស់ដើមបណ្ដឹងឈ្មោះ ប៉ុក គង្គារិទ្ធ ភេទប្រុស អាយុ៣៤ឆ្នាំ ជាប្រធានសាខា AMK ព្រៃវែង។

ជនសង្ស័យឈ្មោះ សោម អង្គា ភេទស្រី អាយុ២៨ឆ្នាំ( ប្រធានហេរញ្ញិក AMK) ប្ដីឈ្មោះ សុខ សុភារ៉ា អាយុ៣០ឆ្នាំ មុខរបរលក់គ្រឿងម៉ាស៊ីន នៅភ្នំពេញ ជាអ្នករៀបចំគំរោង ឲ្យប្រពន្ធយកលុយ ពីមីក្រូហិរវត្ថុ AMK។ ចំនួនទឹកប្រាក់ដែលជនសង្ស័យទាំង២នាក់ប្តីប្រពន្ធលួចបានចំនួន ១១៥.៤០០ ដុល្លារ (ដប់មួយម៉ឺនប្រាំពាន់បួនរយ ដុល្លារអាមេរិក)។
យោងតាមការ សាកសួរបង្ហាញថា ការលួចបន្លំនេះ ផ្តើមចេញប្ដីចាញ់ល្បែង នៅភ្នំពេញក៏រៀបគំរោងឲ្យប្រពន្ធលួចតែម្ដង។

បច្ចុប្បន្នជនសង្ស័យទាំង២នាក់ប្តីប្រពន្ធ ត្រូវសមត្ថកិច្ចឃាត់ខ្លួនបណ្តោះអាសន្ន នៅអធិការក្រុងព្រៃវែង ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី៕

​ដោយ ៖ សុត្ថារ៉ា

ភ្នំពេញ ៖ កាលពីយប់ថ្ងៃទី២៧ ខែមិថុនា ឆ្នាំ២០១៩ ម្សិលមិញនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចឈប់ទទួលជំនួយពីសប្បុរសជនសម្រាប់ជួយដល់ជនរងគ្រោះក្នុងឧបទ្ទវហេតុដួលរលំអគារនៅក្នុងខេត្តព្រះសីហនុហើយ ដែលបូកសរុបថវិកាពីសប្បុរសជនចាប់តាំងពីយប់ថ្ងៃទី២៣ ខែមិថុនា មកដល់ថ្ងៃបិទបញ្ចប់នេះ មានចំនួនជាង ២,៥លានដុល្លារអាមេរិក។

សម្តេចនាយករដ្ឋមន្ត្រីកម្ពុជា បានបញ្ជាក់នៅលើ Facebook យប់មិញនេះ ថា ក្នុងស្មារតីអាណិតស្រឡាញ់សម្រាប់បងប្អូនជនរងគ្រោះដែលបណ្តាលមកពីការរលំអាគារ៧ជាន់នៅខេត្តព្រះសីហនុ សប្បុរសជនបានបន្តចូលរួមដោយគិតត្រឹមម៉ោង ៦ល្ងាចថ្ងៃ២៧ ខែមិថុនានេះ ថវិកាបានកើនឡើងពី ២,៣៦៨,៤០០ដុល្លារ ដល់ ២,៥១២,៨២១ដុល្លារ។

សម្តេចតេជោប្រមុខរាជរដ្ឋាភិបាលកម្ពុជា បានបញ្ជាក់ថា ថវិកាទាំងអស់នេះ ៣០ម៉ឺនដុល្លារ ត្រូវបានឧបត្ថម្ភទៅជនរងគ្រោះដែលរងរបួស។ ថវិកាសល់ពីឧបត្ថម្ភដល់អ្នករងរបួស ត្រូវបានយកទៅឧបត្ថម្ភដល់គ្រួសារជនរងគ្រោះដែលស្លាប់បាត់បង់ជីវិត។ ថវិកាសប្បុរសជនដែលចូលរួមតាមការអំពាវនាវរបស់សម្តេចតេជោ ឧបត្ថម្ភដល់ក្រុមគ្រួសារសពទាំង២៨ ក្នុងមួយសព ៧៩,០០១ដុល្លារ (នៅសល់ ៣២សេន)។

សម្តេចតេជោនាយករដ្ឋមន្ត្រី បានឱ្យដឹងថា បូករួមទាំងថវិកាដែលជាព្រះរាជនូបត្ថម្ភរបស់ព្រះមាហាក្សត្រ និងព្រះមហាក្សត្រីយ៍ជាទីគោរពសក្តារៈ, ថវិកាឧបត្ថម្ភពីរដ្ឋសភា, ព្រឹទ្ធសភា, រាជរដ្ឋាភិបាល, កាកបាទក្រហម និងសប្បុសជនចូលផ្ទាល់ផងនោះ អ្នកស្លាប់មួយនាក់ទទួលបានថវិកាឧបត្ថម្ភជាង ៩មុឺនដុល្លារ ឬជិត ៤០០លានរៀល។

សម្តេចតេជោ ហ៊ុន សែន បានថ្លែងអំណរគុណដល់សប្បុរសជនទាំងអស់ដែលបានចូលរួមតាមការអំពាវនាវរបស់សម្តេច ដើម្បីជួយដោះស្រាយការលំបាករបស់ជនរងគ្រោះ ក៏ដូចជាគ្រួសារជនរងគ្រោះ ដែលស្លាប់បាត់បង់ជីវិត។

សម្តេចតេជោ ហ៊ុន សែន ក៏បានបញ្ជាក់ផងដែរថា សម្រាប់កម្លាំងចូលរួមប្រតិបត្តិការរុករក និងសង្គ្រោះក្រោមការបញ្ជាផ្ទាល់នៅហ្នឹងកន្លែងពីសំណាក់លោក យន្ត មីន ត្រូវបានវាយតម្លៃខ្ពស់និងកោតសរសើរពីគ្រប់ទិសទី។ ក្រៅពីផ្តល់នូវមេដាយមាសមួយគ្រឿងម្នាក់ហើយនោះ សម្តេចឧបត្ថម្ភថវិកាប្រមាណ ២០០ដុល្លារសម្រាប់អ្នកជួយសង្គ្រោះជាបុរស និង២០០ដុល្លារសម្រាប់នារី។

សម្តេចតេជោប្រមុខរាជរដ្ឋាភិបាលកម្ពុជា ដែលបានដឹកនាំកម្លាំងជួយសង្គ្រោះជនរងគ្រោះទាំងយប់ក្នុងហេតុការណ៍បាក់រលំអគារនៅខេត្តព្រះសីហនុ បានបញ្ចប់សាររបស់សម្តេចថា «ស្រឡាញ់គ្នាក្នុងគ្រាក្រស្គាល់មិត្តល្អក្នុងគ្រាលំបាក»៕

ភ្នំពេញ ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា សំណង់ដែលគ្មានច្បាប់ត្រឹមត្រូវនៅខេត្តព្រះសីហនុ គឺមិនអនុញ្ញាតឱ្យចូលស្នាក់នៅ មិនអនុញ្ញាតឱ្យធ្វើអាជីវកម្ម មិនតទឹកនិងតភ្លើងជូនឡើយ ក្នុងករណីមិនសហការជាមួយក្រុមការងារ។

ការថ្លែងបញ្ជាក់នេះ បានធ្វើឡើងនៅក្នុងជំនួបសំណេះសំណាលជាមួយម្ចាស់សំណង់ និងក្រុមហ៊ុនទទួលម៉ៅការសាងសង់ប្រមាណ ១៦៥ក្រុមហ៊ុន កាលពីថ្ងៃទី២៥ ខែមិថុនា ឆ្នាំ២០១៩ នៅខេត្តព្រះសីហនុ។

ការដាក់កំហិតបែបនេះ គឺបន្ទាប់ពីកើតមានឧប្បត្តិហេតុបាក់រលំអគារកម្ពស់៧ជាន់ នៅខេត្តព្រះសីហនុ កាលពីថ្ងៃទី២២ ខែមិថុនា ឆ្នាំ២០១៩ ដែលបានបណ្តាលឲ្យមនុស្សចំនួន២៨នាក់ស្លាប់ និងរងរបួសចំនួន២៦នាក់។ អគារដែលបាក់រលំនេះ ត្រូវបានអាជ្ញាធរខេត្តព្រះសីហនុអះអាងថា គ្មានច្បាប់អនុញ្ញាត។

នៅក្នុងជំនួបសំណេះសំណាល លោកឧបនាយករដ្ឋមន្រ្តី ជា សុផារ៉ា ក៏បានស្នើសុំឱ្យក្រុមហ៊ុននិងនចិត្តបង្កើនការវិនិយោគ សហការជាមួយក្រុមការងារចុះពិនិត្យ ដែលមានភារកិច្ចជួយគាំទ្រដល់ពួកគាត់ គោរពច្បាប់ក្នុងការសាងសង់ និងលើកកម្ពស់គុណភាពសំណង់ ដើម្បីនាំមកនូវប្រយោជន៍ផ្ទាល់ខ្លួន និងសេដ្ឋកិច្ចជាតិ។

រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានសង្កត់ធ្ងន់ថា សំណង់គ្មានច្បាប់ មិនអនុញ្ញាតឱ្យចូលស្នាក់នៅ មិនអនុញ្ញាតឱ្យធ្វើអាជីវកម្ម មិនតទឹកនិងតភ្លើងជូនឡើយ ក្នុងករណីមិនសហការជាមួយក្រុមការងារ។

ដោយឡែកលោកឧបនាយករដ្ឋមន្រ្តី ជា សុផារ៉ា ក៏បានដឹកនាំកិច្ចប្រជុំស្តីពីការប្រកាសគណៈកម្មការត្រួតពិនិត្យគុណភាពសំណង់ និងពិភាក្សាអំពីការគ្រប់គ្រងសំណង់នៅខេត្តព្រះសីហនុ កាលពីថ្ងៃទី២៥ ខែមិថុនា ឆ្នាំ២០១៩ នៅសាលាខេត្តព្រះសីហនុ។

កិច្ចប្រជុំនេះ មានការចូលរួមពីលោកគន់ គីម ទេសរដ្ឋមន្រ្តីមន្ត្រីទទួលបន្ទុកបេសកកម្មពិសេស ជាអនុប្រធានទី១ នៃគណៈកម្មការជាតិគ្រប់គ្រងគ្រោះមហន្តរាយ លោកថោង ខុន រដ្ឋមន្ត្រីក្រសួង ទេសចរណ៍ លោកសាយ សំអាល់ រដ្ឋមន្ត្រីក្រសួងបរិស្ថាន និងអង្គភាពពាក់ព័ន្ធ។
ជាលទ្ធផល នៃកិច្ចប្រជុំនេះទទួលបានលទ្ធផលដូចខាងក្រោមៈ ប្រកាសសមាសភាពគណៈកម្មការត្រួតពិនិត្យគុណភាពសំណង់ខេត្តព្រះសីនុ និងក្រុមការងារបច្ចេកទេស បានអនុម័ត និងដាក់អោយអនុវត្ត check list ក្នុងការចុះពិនិត្យសំណង់ ដើម្បីមានមូលដ្ឋានវាយតម្លៃអំពីគុណភាពសំណង់។ ស្នើគណៈកម្មការ និងក្រុមការងារបច្ចេកទេស ចាប់ផ្តើអនុវត្តការងារពេលមួយសប្តាហ៍ក្នុងជំហានដំបូងដោយត្រូវប្រតិ្តបត្តិឱ្យបានម៉ងចត់ សុក្រឹត្យ និងគោរពក្រមសីលធម៏ វិជ្ជាជិវៈ។

ផ្អែកលើលទ្ធផលទទួលបានក្រសួងរៀបចំដែនដី នគរូបនីយកម្ម និងសំណង់ បូកសរុបរបាយការណ៍ព្រមទាំងពិគ្រោះយោបល់ជាមួយសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ ដើម្បីរាយការណ៍ និងសូមការសម្រេចដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងផ្អាកជាបន្ទាន់នូវការដ្ឋានសំណង់ដែលគ្មានច្បាប់ និងមិនគោរពតាមបទដ្ឋានបច្ចេកទេស។

ក្រសួងរៀបចំដែនដី នគរូបនីយកម្ម និងសំណង់ រៀបចំឱ្យមានរថយន្តពន្លត់អគ្គិភ័យសម្រាប់ខេត្តព្រះសីហនុ ដែលមានសមត្ថភាពប្រតិបត្តិការដល់កម្ពស់ ៥៧ជាន់ ចំនួន ២គ្រឿង សម្រាប់បង្កើនសមត្ថភាពសង្គ្រោះ ក្នុងករណីមានគ្រោះថ្នាក់ជាយថាហេតុ៕

ភ្នំពេញ ៖ កម្លាំងនគរបាលការិយាល័យ ព្រហ្មទណ្ឌកម្រិតស្រាលរាជធានីភ្នំពេញ នៅព្រឹកថ្ងៃទី២៧ ខែមិថុនា ឆ្នាំ ២០១៩ នេះ បានបញ្ជូនជនសង្ស័យម្នាក់ទៅសាលាដំបូងរាជធានីភ្នំពេញ ពាក់ព័ន្ធការប្រព្រឹត្តបទល្មើសក្នុងអំពើលួចយករថយន្តមួយគ្រឿងម៉ាក FORD RANGER PICK UPពណ៌ ទឹកប្រាក់ ឆ្នាំផលិត២០១៨។

សមត្ថកិច្ចបានឲ្យដឹងថា ជនសង្ស័យ ឈ្មោះ ផាន់ ឌីណា អាយុ៣៨ឆ្នាំ ជនជាតិ ខ្មែរ មុខរបរ ជាងដែកស្នាក់នៅ ផ្ទះជួល ផ្លូវបេតុង សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ។

លោកវរសេនីយ៍ឯកឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានឱ្យដឹងថា ជនសង្ស័យខាងលើ ត្រូវបានកម្លាំងជំនាញធ្វើការស្រាវជ្រាវឃាត់ខ្លួនបាន កាលពីថ្ងៃទី២៥ ខែមិថុនា ឆ្នាំ២០១៩ វេលាម៉ោង ៣ និង ៣០នាទីរសៀល នៅចំណុចផ្លូវបេតុង សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ។

គួររំលឹកថា កាលពីថ្ងៃទី២៤ ខែមិថុនា ឆ្នាំ២០១៩ វេលាម៉ោងប្រហែល ៤រសៀល មានករណីជនសង្ស័យបានធ្វើសកម្មភាពលួចរថយន្តមួយគ្រឿងម៉ាក FORD RANGER ពណ៌ទឹកប្រាក់ ស៊េរីឆ្នាំ២០១៨ ពាក់ស្លាកលេខ ភ្នំពេញ 2AV 0100 នៅចំណុចផ្ទះលេខ១២ បូរីប៉េងហួត ផ្លូវលេខ១៥ សង្កាត់ទួលសង្កែទី២ ខណ្ឌឫស្សីកែវ។ ក្រោយពីម្ចាស់រថយន្តមកដាក់ពាក្យបណ្តឹង ទើបកម្លាំងការិយាល័យព្រហ្មទណ្ឌកម្រិតស្រាលរាជធានីភ្នំពេញ ធ្វើការស្រាវជ្រាវ និងឈានទៅឃាត់ខ្លួនជនសង្ស័យខាងលើនាំយកទៅឲ្យតុលាការចាត់ការតែម្តង៕

កំពង់ឆ្នាំង ៖ នៅព្រឹកថ្ងៃទី២៦ ខែមិថុនា ឆ្នាំ២០១៩ វេលាម៉ោង៨ និង១៥នាទីព្រឹក រដ្ឋបាលស្រុកសាមគ្គីមានជ័យ បានទទួលបដិសណ្ឋារកិច្ចក្រុមប្រតិភូរបស់ក្រុមការងារគម្រោងអាហារូបត្ថម្ភនៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) និងធនាគាពិភពលោក នៅសាលប្រជុំសាលាស្រុក ក្រោមអធិបតី លោក វន ស៉ីផា អភិបាលស្រុកសាមគ្គីមានជ័យ។

លោក ជ័យ សម្បត្តិផល្លា ប្រធានក្រុមប្រតិភូរបស់ក្រុមការងារគម្រោងអាហារូបត្ថម្ភនៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) និងក្រុមការងារធនាគារពិភពលោក បានបញ្ជាក់ពីគោលបំណងនៃការធ្វើទស្សនកិច្ចសិក្សាគឺ ដើម្បីសិក្សារៀនសូត្រអំពីប្រព័ន្ធ បែបបទ និងនីតិវិធីនៃការអនុវត្តការងារនៅរដ្ឋបាលថ្នាក់ក្រោមជាតិ ដើម្បីរៀបចំកម្មវិធីឃុំសម្រាប់ស្ត្រី និងកុមារ នៃគម្រោងអាហាររូបត្ថម្ភនៅកម្ពុជា។

កិច្ចពិភាក្សា និងពិគ្រោះយោបល់ក្នុងការរៀបចំគម្រោងមូលនិធិនៃការផ្តល់សេវានៅរដ្ឋបាលឃុំ និងពិនិត្យមើលការរៀបចំស្ថាប័នថ្នាក់ក្រោមជាតិ ដើម្បីរៀបចំប្រព័ន្ធមូលនិធិនៃការផ្តល់សេវាសហគមន៍ ដើម្បីប្រមូលធាតុចូល សម្រាប់ពិនិត្យកែសម្រួលចុងក្រោយនៃ”សៀវភៅណែនាំបច្ចេកទេសអំពីការអនុវត្តសមាសភាគទី២ នៃគម្រោងអាហារូបត្ថម្ភកម្ពុជា” នៅរដ្ឋបាលស្រុក និងឃុំពាម ក្នុងស្រុកសាមគ្គីមានជ័យ។

ក្នុងឱកាលនោះ លោក វន ស៉ីផា អភិបាលស្រុក បានសម្តែងនូវការស្វាគមន៍ដោយក្តីរីករាយ និងបានបង្ហាញអំពីស្ថានភាពទូទៅ និងរចនាសម្ព័ន្ធរដ្ឋបាលស្រុក ដោយបានបញ្ជាក់អំពីសកម្មភាពដែលរដ្ឋបាលស្រុកបានអនុវត្តគម្រោងអាហាររូបត្ថម្ភ ដៃគូសហការដែលបានជួយឧបត្ថម្ភគាំទ្រ និងសហការ រួមទាំងបញ្ហាប្រឈម និងទិដៅការងារបន្តការងារអាហាររូបត្ថម្ភនៅស្រុកសាមគ្គីមានជ័យ។

ក្រុមប្រតិភូរបស់ក្រុមការងារគម្រោងអាហារូបត្ថម្ភនៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) និងក្រុមការងារធនាគារពិភពលោក ក៏បានពិភាក្សាពិគ្រោះយោបល់ជាមួយអភិបាល និងអភិបាលរងស្រុកទទួលបន្ទុកផែនការ និងគាំទ្រឃុំ , ក្រុមប្រឹក្សាស្រុក , ប្រធាន គ.ក.ស.ក ស្រុក , ការិ.ផែនការ និងគាំទ្រឃុំ , ការិ.កិច្ចការនារី , ការិ.ផែនការ , ការិ. អ.យ.ក ស្រុក , ការិ. ប្រតិបត្តិសុខាភិបាលស្រុក ដោយផ្តោតសំខាន់ក្នុងការរៀបចំគម្រោងមូលនិធិនៃការផ្តល់សេវានៅរដ្ឋបាលឃុំ និងពិនិត្យមើលការរៀបចំស្ថាប័នថ្នាក់ក្រោមជាតិ ដើម្បីរៀបចំប្រព័ន្ធមូលនិធិនៃការផ្តល់សេវាសហគមន៍ ដើម្បីប្រមូលធាតុចូល សម្រាប់ពិនិត្យកែសម្រួលចុងក្រោយនៃ”សៀវភៅណែនាំបច្ចេកទេសអំពីការអនុវត្តសមាសភាគទី២ នៃគម្រោងអាហារូបត្ថម្ភកម្ពុជា” ៕