បន្ទាយមានជ័យ ៖ តូបមួយខ្នងដែលស្ថិតនៅក្នុងផ្សារចំការគ(ផ្សារថ្មី)នៃខេត្តបន្ទាយមានជ័យត្រូវបានរងនូវការឆាបឆេះបង្កជាការភ្ញាក់ផ្អើល។ហេតុការណ៍នៃការឆាបឆេះនេះកើតឡើងនៅម៉ោង៤និង៣០នាទីព្រឹកថ្ងៃទី០១ខែមេសាឆ្នាំ២០១៩ចំនុចផ្សារចំការគហៅផ្សារថ្មីស្ថិតក្នុងសង្កាត់កំពង់ស្វាយក្រុងសិរីសោភ័ណខេត្តបន្ទាយមានជ័យ។

លោក ស៊ី ឌី អធិការនៃអធិការដ្ឋាននគរបាលក្រុងសិរីសោភ័ណបានអោយដឹងថាតូបដែលរងការឆាបឆេះនោះជាតូបដែលលក់គ្រឿងជ័រ។លោកថាគ្មានសម្ភារៈណាមួយដែលនៅសេសសល់ពីការឆេះនេះទេតែវាសំណាងល្អបំផុតដែលអគ្គីសភ័យមានរីករាលដាលនិងឆ្លងទៅតូបដទៃដែលនៅក្បែរនោះ។អ្វីដែលមិនរីករាលដាលគឺបណ្តាលមកពីតូបមានឃ្លប់បិទជិតភ្លើងឆេះតែក្នុងរង្វង់ឃ្លប់ហើយពិសេសជាងនេះនោះគឺមានអ្នកឃើញនិងរាយការណ៍ទាន់ពេលវេលានិងជួយអន្តរាគមន៍ទាន់ហេតុការណ៍។

ក្រោយការជួយអន្តរាគមន៍បាញ់ពន្លត់ទាន់ពេលវេលាបានធ្វើអោយអគ្គីសភ័យរលត់ទៅវិញទាំងស្រុងនៅម៉ោងប្រមាណជា៥ទៀបភ្លឺព្រឹកថ្ងៃដដែល៕ ដោយ ​៖​ ស.រ

ព្រះវិហារ ៖ កាលពីព្រឹកថ្ងៃទី ៣១ ខែមីនា ឆ្នាំ២០១៩ លោក អ៊ុន ចាន់ ដាស មា ជិ ល គណកម្មាធិការកណ្តាល និងជា ប្រធានគណកម្មាធិការ គណប្រជាជនកម្ពុជា ខេត្តព្រះវិហារ អញ្ជើញចុះប្រគល់ផ្ទះឈើ មួយខ្នង ប្រក ស័ង្កសីទំហំ ៤ ម៉ែត្រ គុណ ៦ ម៉ែត្រ ជូនគ្រួសារក្រីក្រ ខ្វះខាត ។ ប្តី ឈ្មោះ ខិត ខេម អាយុ ៣៥ ឆ្នាំ និង ប្រពន្ធឈ្មោះ ម៉ៅ រដ្ឋ អាយុ ៣៨ ឆ្នាំមានកូន ៦ នាក់ រស់នៅ ឃុំ បុស្ស ធំស្រុក ត្បែងមានជ័យខេត្តព្រះវិហារ ។

លោក ប្រធាន មានប្រសាសន៍ថា ទីណា មានការ លំបាក ទីនោះ តែងមាន គណបក្ស ប្រជាជន កម្ពុជារួមសុខ រួមទុក្ខជាមួយ បងប្អូន ប្រជាពលរដ្ឋ យើងក្រោម គោលនយោបាយនិង មាគ៌ា ដ៏ត្រឹមត្រូវនិង ប៉ិនប្រសព្វឈ្លាសវៃប្រកបដោយគតិបណ្ឌិតសម្តេចតេជោ ហ៊ុនសែន ។

យើងទទួលបាន សុខសន្តិភាព និង ការអភិវឌ្ឍ គិតគូរ ពី ជីវភាព រស់នៅ របស់ ប្រជាពលរដ្ឋ ។ ជាក់ស្តែង មិន ត្រឹមតែ ប្រគល់ជូនពេលនេះ ទេ កន្លងមក គណបក្ស ប្រជាជនកម្ពុជា ខេត្តព្រះវិហារ បានប្រគល់ផ្ទះ ទេវតា ជាច្រើនខ្នងនៅតាមបណ្តាក្រុងស្រុកទូទាំងខេត្ត ។

លោកប្រធាន ក៏បាន ផ្តាំផ្ញើរ ឲ្យ គ្រួសារ ដែលត្រូវទទួលបានផ្ទះពីគណបក្ស ប្រជាជនកម្ពុជាខិតខំ បង្កបង្កើនផល ដើម្បី បង្កើនជីវភាពគ្រួសារ ហើយកុំជឿការញ៉ុះញ៉ ង់ផ្សេងពីជនអគតិ ។ ក្នុងឱកាស នោះដែរ ក៏បាននាំយកនូវគ្រឿងឧបភោគ បរិភោគ ថវិកា មួយចំនួនជូនគ្រួសារក្រីក្រនោះផងដែរ ៕ ដោយ ៖ ស.ស.

ភ្នំពេញ ៖ តុលាការរាជធានីភ្នំពេញបានកោះហៅលោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេស ឲ្យចូលខ្លួនបំភ្លឺនៅថ្ងៃទី២២ ខែមេសា ពីបទចោទ “ញុះញង់កុំឲ្យយោធិនស្តាប់បង្គាប់ និងធ្វើឲ្យខូចទឹកចិត្តកងទ័ព”។ នេះបើយោងតាមដីកាកោះហៅចុះថ្ងៃទី ១៤ មីនា ឆ្នាំ២០១៩ ដែល មេគង្គប៉ុស្តិ៍ ទទួលបានកាលពីម្សិលមិញ។

ដីកាកោះបានរៀបរាប់ពីសិទ្ធិទាំង ៥ របស់ជនជាប់ចោទដែលរួមមានសិទ្ធិទទួលដឹងឮនិងដីកាកោះឲ្យចូលខ្លួន សិទ្ធិបង្ហាញភ័ស្តុតាងសំអាង សាក្សី ឬធ្វើសំណូមពរផ្សេងៗ សិទ្ធិប្ដឹងបដិសេធចៅក្រមជំនុំជម្រះ សិទ្ធិការពារខ្លួនដោយខ្លួនឯង ឬសុំមេធាវីជួយការពារ ឬពឹងអ្នកដទៃណាមួយជួយការពារខ្លួន និងសិទ្ធិនិយាយសម្តី ចុងក្រោយបង្អស់។

លោក ប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកាកោះហៅលោក សម រង្ស៊ី ឲ្យចូលរួមសវនាការនៅសាលាដំបូងរាជធានីភ្នំពេញនៅថ្ងៃទី ២២ ខែមេសា ខាងមុខ ពាក់ព័ន្ធនឹងបទចោទ «ញុះញង់កុំឲ្យយោធិនស្ដាប់បង្គាប់ និងធ្វើឲ្យខូចទឹកចិត្តកងទ័ព»។

លោក សម រង្ស៊ី បានសរសេរនៅក្នុងហ្វេសប៊ុក ថា «ខ្ញុំមិនខ្វល់ពីការកោះហៅរបស់តុលាការអាយ៉ងនេះទេ ហើយខ្ញុំនៅតែអំពាវនាវកាន់តែខ្លាំងឡើងៗ ហើយកាន់តែញឹកញាប់ទៅៗ។

គួររំលឹកថា លោក សម រង្ស៊ី ធ្លាប់បានថ្លែងនៅពេលមុននោះថា «សូមកងកម្លាំងប្រដាប់អាវុធ ពលទាហាន និងនគរបាលកុំធ្វើតាមបញ្ជាពីមេដឹកនាំផ្តាច់ការ បើគេបញ្ជាឲ្យបាញ់ប្រហារ និងសម្លាប់ប្រជាពលរដ្ឋស្លូតត្រង់»។

បើតាមមាត្រាទាំង២ នៃច្បាប់នេះ លោក សម រង្ស៊ី ប្រឈមនឹងការផ្តន្ទាទោសដាក់ពន្ធនាគារចន្លោះពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៤លានរៀល ទៅ ១០លានរៀល៕

ភ្នំពេញ ៖ អ្នកទិញរថយន្តបង់រំលោះ ប្រមាណជាង៣០នាក់ អះអាងថា ក្នុងចំណោមប្រមាណជិត ១០០ នាក់ បានលើកគ្នា ទៅឃ្លាំង ទិញលក់រថយន្ត បន្ទាប់ពីពួកគេ បាន ទិញ រថយន្តបង់រំលោះ ដោយកក់ប្រាក់ម្នាក់ៗ ៣ពាន់, ៥ពាន់ និងខ្លះទៀត ១ម៉ឺនដុល្លារ រាប់ខែមកហើយ ថៅកែគ្មាន រថ យន្តប្រគល់អោយនៅឡើយទេ ដោយប្រមូលប្រាក់កក់ជិត ១លានដុលារ រត់គេចខ្លួនបាត់។

ការចាញ់បោកដោយទិញរថយន្តខ្យលបង់រំលោះនេះនបង្កអោយមានការភ្ញាក់ផ្អើលកាលពីវេលាម៉ោងប្រមាណ ៤និង៣០នាទីរសៀលថ្ងៃទី២៩ ខែមិនា ឆ្នាំ២០១៩ដោយអ្នកចាញ់បោកគេ លើកគ្នា ទៅ កាន់ឃ្លាំង លក់រថយន្តយីហោ សេង ហួត ដែលស្ថិតនៅក្នុងភូមិជ្រៃកោង សង្កាត់ចោមចៅ ២ ខណ្ឌពោធិ៍សែនជ័យ រាជធានីភ្នំពេញ។

នេះជាល្បិចបោកថ្មី ដែលថៅកែ រថយន្តធ្វើនំអត់ម្សៅ បានជួលរថយន្តគេមកដាក់តាំងក្នុងឃ្លាំង ជាការបញ្ឆោតនិងបោកប្រាស់ ដើម្បីឲ្យអ្នកទិញទុកចិត្ត យកលុយទៅកក់ប៉ុណ្ណោះ។តាមអ្នកដែល ចាញ់បោកគេ បានអោយដឹងថា មានអ្នករងគ្រោះ ប្រមាណជិត ១០០នាក់ ដែលបានចាញ់បោក នាំគ្នាទៅទិញរថយន្តបង់រំលោះពីម្ចាស់ទីតាំងនោះ ដោយអស់ប្រាក់ម្នាក់ខ្លះ ៣ពាន់ដុល្លារ ,៥ពាន់ ដុល្លារ និងខ្លះទៀតរហូតដល ១ម៉ឺនដុល្លារ ទៅតាមប្រភេទរថយន្ត រួមមានប្រភេទរថយន្ត ហាយ ឡេនឌ័រ ឡិចស៊ីស ៣៣០ និង៣៥០ តែកក់លុយខ្លះប្រមាណជាង ១ខែ ខ្លះរហូតដល់ ៣ខែ មិន ទាន់បានរថយន្តយកមកប្រើនោះទេ ដោយម្ចាស់តីតាំងបានប្រើល្បិច ពន្យារពេលជាបន្តបន្ទាប់រហូត មកដល់ថ្ងៃផ្ទុះរឿងនេះតែម្តង ។

ប្រភពព័ត៌មានអោយដឹងទៀតថា ចំណែកអ្នកខ្លះទៀត ប្រគល់លុយគ្រប់បានរថយន្តយកទៅ ជិះ រយៈពេលខ្លី ហើយត្រូវបានថៅកែឃ្លាំងនេះ យករថយន្តត្រឡប់ទៅវិញ ដោយកុហកថា រថយន្តនោះ ដាច់ប្រព័ន្ធតាមដាន GPS ហើយក្រុមហ៊ុនត្រូវយកទៅវិញ ដើម្បីតភ្ជាប់ប្រព័ន្ធតាមដាន GPS ឲ្យ បានត្រឹមត្រូវឡើងវិញ ហើយក៍យកទៅបាត់រហូតទាក់ទងលែងចូលទើបដឹងថា ឃ្លាំងលក់រថយន្ត នោះ បោកប្រាស់ ពុំមានរថយន្តលក់ពិតប្រាកដនោះទេ គឺជួលរថយន្តគេមកដាក់តាំងប្រមូលលុយ កក់ដែលសរុបតាមចំនួនអ្នកមកតវ៉ាប្រមាណជាជិត ១លានដុល្លារ ហើយរហូតមកដល់ពេលនេះ រត់ គេចបាត់ស្រមោល មិនអាចទាក់ទងបានឡើយ ចំណែក ឃ្លាំងលក់រថយន្តដែលមានទីតាំងស្ថិតនៅ ក្នុងភូមិជ្រៃកោង សង្កាត់ចោមចៅ ២ ខណ្ឌពោធិ៍សែនជ័យ គេឃើញមានតែសំបកទទេ ប៉ុណ្ណោះ ។

ប្រភពដដែលបន្តថា បច្ចុនប្បន្ននេះ ក្រុមអ្នកដែលអះអាងថា ចាញ់បោកគេ កំពុងស្វះស្វែងរក អន្តរា គមន៍ពីអាជ្ញាធរមានសមត្ថកិច្ច ដើម្បីតាមរកម្ចាស់ឃ្លាំងលក់រថយន្តខាងលើ មកដោះស្រាគ្នាតាម ផ្លូវច្បាប់៕

ភ្នំពេញ ៖ នារីឈ្មោះ យិន ឃុនម៉ី ហៅ ម៉ាណា ដែលបើករថយន្តបុកនិស្សិតឆ្នើមម្នាក់ស្លាប់ ត្រូវបានតុលាការចោទប្រកាន់ជាផ្លូវការហើយ និងសម្រេចឃុំខ្លួនជាបណ្តោះអាសន្ននៅល្ងាចថ្ងៃទី២៩ ខែមីនា ឆ្នាំ២០១៩ នេះ តែមួយបទល្មើសប៉ុណ្ណោះ គឺបើកបរធ្វេសប្រហែស ខ្ជីខ្ជារ បណ្ដាលឱ្យស្លាប់អ្នកដទៃ ផ្អែកតាមមាត្រា៨៥ ។

លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ ថ្លែងតាមបណ្ដាញសង្គម Telegram ថា “ក្រោយពីពិនិត្យសំណុំរឿងនិងបញ្ចប់ការសាកសួរលើឈ្មោះ យិន ឃុនម៉ី ហៅ ម៉ាណា តំណាងអយ្យការបានសម្រេចបើកការស៊ើបសួរដោយចោទប្រកាន់ពីបទ បើកបរ ដោយ ធ្វេសប្រហែស ខ្ជីខ្ជារ មិនប្រុងប្រយត្ន័បណ្តាលអោយស្លាប់អ្នកដទៃ តាមមាត្រា ៨៥ នៃច្បាប់ ចរាចរណ៌ផ្លូវគោកហើយបានបញ្ជូនបុគ្គលនេះ និងសំណុំរឿងទៅចៅក្រមស៊ើបសួរដើម្បីចាត់ការបន្ត”។

សូមជម្រាបថា លោកស្រី ផាត់ ពៅ អាយុ៥០ឆ្នាំ ជាម្តាយបង្កើតសពនិស្សិត ឌុំ រីដា នៅថ្ងៃទី២៩ ខែមីនា ឆ្នាំ២០១៩ នេះ ដាក់ពាក្យបណ្ដឹងផ្លូវការចូលលោកវរសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ប្តឹងជនបង្កឈ្មោះ យិន ម៉ាណា អាយុ១៧ឆ្នាំ ដោយ ទាមទារសំណងជំងឺចិត្តចំនួន២០ម៉ឺនដុល្លារអាមេរិក និង ស្នើឱ្យតុលាការចាត់ការតឹងរ៉ឹងបំផុតតាមផ្លូវច្បាប់ចំពោះជនបង្ករូបនេះ ។

កញ្ញា យិន ឃុនម៉ី ហៅ ម៉ាណា បានបើករថយន្ត ម៉ាក Range Rover ពណ៌ ខ្មៅបុកជនរងគ្រោះឈ្មោះ ឌុំ រីដា បណ្តាលឲ្យស្លាប់កាលពីថ្ងៃទី២៦ ខែមីនា ។ លោក យិន ហ្គិច ជាឪពុកជនបង្កបានព្យាយាមដោះស្រាយ និងទទួលខុសត្រូវដោយបានចូលបុណ្យសពជនរងគ្រោះចំនួន ៥.០០០ដុល្លារ។ បន្ទាប់មកលោក យិន ហ្គិច បាននាំកូនស្រីទៅប្រគល់ជូនសមត្ថកិច្ចជំនាញដើម្បីចាត់ការតាមច្បាប់ និងទទួលខុសត្រូវចំពោះសំណងជំងឺចិត្តទៅគ្រួសារជនរងគ្រោះថែមទៀតផង។

គួររំលឹកថា ហេតុការណ៍គ្រោះថ្នាក់ចរាចរណ៍ នេះបង្កឡើងដោយឡាន Range Rover ព័ណ៌ខ្មៅ ពាក់ស្លាកលេខ ភ្នំពេញ 2AF-7777 បើកលឿនទៅបុកនិស្សិតស្រីម្នាក់ដែលកំពុងជិះម៉ូតូម៉ាកហុងដាគុបជ្រុង ពីក្រោពេញទំហឹងប៉ើងដូចក្រដាស នៅចំណុចផ្លូវបំបែកជាបួនមួយកន្លែងក្នុងខណ្ឌទួលគោក បណ្តាលឲ្យស្លាប់ភ្លាមៗនៅកន្លែងកើតហេតុ។

ក្រោយបង្កហេតុភ្លាមៗ អ្នកបើករថយន្តបានព្យាយាមបើករត់គេចខ្លួន ប៉ុន្តែដោយសារមានវីដេអូកាមេរ៉ាសុវត្ថិភាពបានថតជាប់ស្លាកលេខរថយន្ត រហូតសមត្ថកិច្ចអាចកំណត់មុខសញ្ញាម្ចាស់រថយន្តនិងស្រាវជ្រាវរកឃើញនាពេលនេះ។

បើតាមមាត្រា៨៥ ដែលត្រូវបានតុលាការលើកយកមកធ្វើការចោទប្រកាន់នេះ នារី យិន ម៉ាណា នឹងប្រឈមការជាប់ពន្ធាគារពី១ឆ្នាំ ទៅ៣ឆ្នាំ និងពិន័យប្រាក់ពី៤លាន ទៅ១៥លានរៀល៕

ខេត្តកំពង់ចាម ៖ អគ្គិភ័យដ៏កំណាចមួយបានឆាបឆេះបំផ្លាញអគាររោងចក្រផលិតស្បែកជើងមួយកន្លែង យីហោ« ជូហ៊ួយ» មានទីតាំងស្ថិតក្នុងភូមិរវៀង ឃុំខ្នុរដំបង ក្នុងស្រុកជើងព្រៃ អស់ទាំងស្រុងនៅម៉ោង ៧ព្រឹក ថ្ងៃទី២៨ ខែមីនា ឆ្នាំ២០១៩។

មន្ត្រីនគរបាលបានឲ្យដឹងថា អគារ១ខ្នង និងសម្ភារមួយចំនួនរបស់រោងចក្រផលស្បែកជើងមួយកន្លែង ស្ថិតក្នុងខេត្តកំពង់ចាម ត្រូវបានអគ្គីភ័យឆាបឆេះអស់ទាំងស្រុងនៅថ្ងៃនេះ ប៉ុន្តែ គ្មានមនុស្សណាម្នាក់រងគ្រោះថ្នាក់នោះឡើយ។

លោក ប្រាក់ សុគន្ធ អធិការនគរបាលស្រុកជើងព្រៃ បានប្រាប់ឲ្យដឹងថា អគាររោងចក្រផលិតស្បែកជើង ជូហ៊ួយ ភ្លើងបានឆាបឆេះអស់នៅម៉ោង ៧ព្រឹក ថ្ងៃទី២៨ ខែមីនា ហើយត្រូវបានអន្តរាគមន៍ពន្លត់ជាស្ថាពរវិញនៅម៉ោងប្រហែល ១០ព្រឹក ក្នងថ្ងៃដដែល។

មន្ត្រីនគរបាលរូបនេះ អះអាងថា គ្មាននរណាម្នាក់រងគ្រោះថ្នាក់នោះទេ ប៉ុន្តែ លោកថា មិនទាន់អាចបញ្ជាក់ពីមូលហេតុ និងទំហំនៃខូចខាតនៃរោងចក្រនោះនៅឡើយទេ ហើយថា សមត្ថកិច្ចកំពុងស្រាវជ្រាវលម្អិតនៅឡើយ។

សមត្ថកិច្ច ឲ្យដឹងថា មូលហេតុនៃការឆេះនេះ បណ្តាលមកពីផ្ទុះសេខ្សែភ្លើង ដោយប្រើប្រាស់រថយន្តពន្លត់អគ្គីភ័យ មានចំនួន ១០គឿង នៅក្នុងនោះមានរថយន្តអគ្គីភ័យរបស់ ស្រុកបារាយណ៍ ខេត្តកំពង់ធំ ចំនួន ១គឿងផងដែរ និងបានប្រើប្រាសទឹកអស់ចំនួន ៣០រថយន្ត៕ ដោយ ៖ សុផល

ខេត្តសៀមរាប ៖ អគ្គនាយកដ្ឋានអន្តោប្រវេសន៍ បានរាយការណ៍នៅថ្ងៃនេះ បានឲ្យដឹងថា កម្លាំងស្នងការដ្ឋាននគរបាលខេត្តសៀមរាប បានចុះបង្ក្រាបទីតាំងប្រព្រឹត្តបទល្មើស ភ្នាល់ល្បែងស៊ីសងតាមប្រព័ន្ធអ៊ិនធឺណិត ដែលស្ថិតក្នុង ក្រុងសៀមរាប ខេត្តសៀមរាប បានចំនួនពីរទីតាំង។ ក្នុងកិច្ចប្រតិបត្តិការនេះ សមត្ថកិច្ចបានឃាត់ខ្លួនជនជាតិចិនសរុបចំនួន ១៦៣នាក់ ក្នុងស្រីចំនួន៤០នាក់ និងរឹបអូសកុំព្យូទ័រប្រមាណ ១៥០គ្រឿង ដែលប្រើសម្រាប់ប្រព្រឹត្តបទល្មើស ។

នៅវេលាម៉ោង៩និង៣០នាទី ថ្ងៃទី២៨ ខែមីនា ឆ្នាំ២០១៩ កម្លាំងស្នងការដ្ឋាននគរបាលខេត្ត ផែនអន្តោប្រវេសន៍ បានសហការជាមួយកម្លាំងការិយាល័យអន្តរាគមន៍ និងកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គំ ខេត្តសៀមរាប ចុះប្រត្តិការបង្រ្កាបទីតាំងប្រព្រឹត្តិបទល្មើស ភ្នាល់ល្បែងស៊ីសងតាមប្រព័ន្ធអ៉ីនធើណេត (Internet Game online) ដែលមានទីតាំងស្ថិតនៅភូមិវិហារចិន សង្កាត់ស្វាយដង្គំ ក្រុង-ខេត្តសៀមារាប ចំនួនពីរទីតាំង។

ប្រភពដដែលនេះ បានបន្តថា សមត្ថកិច្ចកំពុងសាកសួរជនសង្ស័យទាំងនោះនៅស្នងការដ្ឋាននគរបាលខេត្តសៀមរាប ដើម្បីធ្វើនិតិវិធីបន្ត។

គួររំលឹកថា គិតត្រឹមខែធ្នូ ឆ្នាំ២០១៨នេះ ជនជាតិចិនជាង ៦០០នាក់ហើយ ដែលត្រូវបានអាជ្ញាធរកម្ពុជាចាប់ និងបញ្ជូនទៅប្រទេសចិនវិញ ក្រោយពួកគេបានប្រព្រឹត្តិបទល្មើសមួយចំនួនដូចជា ល្បែងស៊ីសងតាមអនឡាញ ជំរិតយកប្រាក់ និងឆបោកតាមប្រព័ន្ធទូរគមនាគមន៍ (VOIP) ជាដើម៕
(រូបភាព ៖ ហ្វេសប៊ុក អគ្គនាយកដ្ឋានអន្តោប្រវេសន៍ – General Department of Immigration – GDI)

បន្ទាយមានជ័យ ៖ យ៉ាងហោចណាស់មនុស្សប្រុសស្រីចំនួន៤នាក់ ត្រូវបានកម្លាំងនគរបាលម៉ាឡៃធ្វើការឃាត់ខ្លួនបន្ទាប់ពីសង្ស័យថាបានរក្សាទុកនិងចរាចរជួញដូរគ្រឿងញៀនដោយខុសច្បាប់។ជនសង្ស័យត្រូវបានឃាត់ខ្លួនជាបន្តបន្ទាប់នាព្រលប់ថ្ងៃទី២៧ខែមិនាឆ្នាំ២០១៩លើកំណាត់ផ្លូវជាតិលេខ៥៩មុខវត្តរតនៈម៉ាឡៃក្នុងភូមិសាស្ត្រភូមិថ្មីឃុំ-ស្រុកម៉ាឡៃខេត្តបន្ទាយមានជ័យ។

លោក បេន សំអាត អធិការនៃអធិការដ្ឋាននគរបាលស្រុកម៉ាឡៃបានអោយដឹងថា ក្រោមបទបញ្ជារបស់ឧត្តមសេនីយ៍ស្នងការក្នុងកិច្ចការពារដល់សេចក្តីសុខរបស់ពលរដ្ឋគឺនៅរៀងរាល់យប់កម្លាំងនគរបាលស្រុកតែងតែចេញល្បាតនិងឈរនៅគ្រប់គោលដៅដើម្បីត្រៀមបង្ការនិងទប់ស្កាត់រាល់សកម្មភាពល្មើស។នៅវេលាម៉ោង០៦និង៤០នាទីព្រលប់ថ្ងៃទី២៧ខែមិនាឆ្នាំ២០១៩មុខសញ្ញាជាស្ត្រីបីនាក់បានបង្ហាញខ្លួននៅចំនុចចាប់ខ្លួនខាងលើ ដោយមានការសង្ស័យកម្លាំងល្បាតក៏បានស្ទាក់ឃាត់សួរនាំនិងឆែកឃើញមានគ្រឿងនៅក្នុងដៃ។

លោក បេន សំអាត បានបន្តថាក្រោយឆែកឆេរលើស្ត្រីទាំងបីដែលមានឈ្មោះ ១- តាំង ចន្ធូ អាយុ ៣៩ឆ្នាំ មុខរបរ កម្មករ រស់នៅ សង្កាត់់ ផ្សារកណ្ដាល ក្រុង ប៉ោយប៉ែត ខេត្តបន្ទាយមានជ័យ។ ២- សោម ច័ន្ទចំប៉ា អាយុ ៣២ ឆ្នាំ មុខរបរ កម្មករ រស់នៅភូមិ ថ្មរមៀល ឃុំ បន្ទាយឆ្មារ ស្រុក ថ្មពួក ខេត្តបន្ទាយមានជ័យនិង៣- ឈ្មោះ ទេស រ៉ូស្សា ហៅ មុំ អាយុ២៥ ឆ្នាំ មុខរបរ រៀន សំអាងការ រស់នៅភូមិ ថ្នល់បត់ ឃុំ ភ្នំតូច ស្រុក មង្គលបូរី ខេត្តបន្ទាយមានជ័យរកឃើញគ្រឿងញៀនមេតំហ្វតាមីនប្រភេទទឹកកកមួយថង់ធំច្រករុំបិទជិត គ្រឿងញៀនហ្វតាមីនគ្រាប់ចំនួន៣,៩៦៧គ្រាប់ ក្នុងនោះ ថ្នាំពណ៌លឿងចំនួន៣៩គ្រាប់។

ក្រោមការសួរនាំរបស់សមត្ថកិច្ចជំនាញនិងតាមការឆ្លើយបំភ្លឺរបស់ស្ត្រីទាំងជាជនសង្ស័យកម្លាំងជំនាញនៃអធិការដ្ឋានស្រុកម៉ាឡៃសហការជាមួយអធិការដ្ឋានក្រុងប៉ោយប៉ែតបានបន្តឃាត់ខ្លួនបុរសម្នាក់ទៀតឈ្មោះ កែ រិន អាយុ ៤១ ឆ្នាំ រស់នៅភូមិសាមគ្គីមានជ័យសង្កាត់ប៉ោយប៉ែតជាមេក្លោងនារសៀលថ្ងៃទី២៨ខែមិនាឆ្នាំ២០១៩។

អធិការស្រុកម៉ាឡៃលោក បេន សំអាត ក៏បានបញ្ជាក់បន្ថែមផងដែរថាជនសង្ស័យប្រុសស្រីទាំង០៤នាក់នេះគឺទើបតែចេញពីគុកមិនទាន់បានប៉ុន្មានខែផង ឥឡូវជួញដូរគ្រឿងញៀនត្រូវសមត្ថកិច្ចចាប់ខ្លួនបញ្ជូនចូលគុកវិញដដែល ពិតជាមិនព្រមកែខ្លួនមែន។

ជនសង្ស័យទាំង០៤នាក់បច្ចុប្បន្នត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងដើម្បីចាត់ការតាមផ្លូវរួចហើយ៕

ភ្នំពេញ ៖ តែងតែមានការលើកឡើងថា អ្នកដែលមានប័ណ្ណផ្តល់ឈាមហើយ តែបែជាមិនអាច ទទួលបានឈាមមកវិញនៅពេលដែលពួកគេត្រូវការឈាម។ ចំពោះបញ្ហានេះលោក លី សាវិត អនុប្រធានមជ្ឈមណ្ឌលជាតិផ្តល់ឈាមបានពន្យល់ថា ជាការពិតឈាមដែល សប្បុរសជនបរិច្ចាគជូនមជ្ឈមណ្ឌលជាតិផ្តល់ឈាម គឺមិនគ្រប់គ្រាន់ទៅនឹងតម្រូវការប្រចាំ ថ្ងៃនោះទេ ដែលជាហេតុបង្កឱ្យកើតមានករណីថា អ្នកធ្លាប់ផ្តល់ឈាម និងមានប័ណ្ណផ្តល់ ឈាម តែមិនអាចទទួលបានឈាមត្រឡប់មកវិញនៅពេលដែលខ្លួនត្រូវការឈាម។

ឆ្លើយតបទៅនឹងករណីនេះ លោក លី សាវិត បានលើកឡើងថា សម្រាប់កម្ពុជាចំនួន អ្នកផ្តល់ឈាមដោយស្ម័គ្រចិត្ត គឺមានតិចតួចណាស់ គឺមិនដល់ ៣០%ផង បើធៀបនឹងចំនួន ប្រជាជនកម្ពុជានៅទូទាំងប្រទេស ខណៈដែលតម្រូវការឈាមវិញមិនតិចជាង ២០០ប្លោកទេ ក្នុង ១ថ្ងៃដើម្បីសង្គ្រោះអាយុជីវិតជនរងគ្រោះ និងអ្នកជម្ងឺដែលត្រូវការការចាក់បញ្ចូលឈាម។

អនុប្រធានមជ្ឈមណ្ឌលជាតិផ្តល់ឈាម លោក លី សាវិត ក្នុងឱកាសទទួលការផ្តល់ ឈាមពីមន្ត្រីនៃអគ្គលេខាធិការដ្ឋានរដ្ឋសភា ព្រឹកថ្ងៃទី២៨ មីនានេះ មានប្រសាសន៍ថា ករណី ប័ណ្ណផ្តល់ឈាមបានក្លាយជាបញ្ហាឥតឈប់ឈរ ព្រោះយើងមានលក្ខខ័ណ្ឌថា អ្នកដែលបាន ផ្តល់ឈាម គឺត្រូវទទួលបានប័ណ្ណផ្តល់ឈាម ហើយនៅពេលត្រូវការឈាមវិញ ពួកគេនឹង ទទួលបានឈាមមកវិញដោយឥតគិតថ្លៃ តែក្នុងពេលខ្លះ គឺនៅពេលដែលយើងគ្មានឈាមក្នុង ស្តុកវិញ យើងគ្មានអ្វីផ្តល់ជូនពួកគាត់ទេ ដែលជាមូលហេតុបង្កឱ្យមានការថ្នាំងថ្នាក់ ហើយអ្នក ខ្លះរហូតលែងចូលរួមផ្តល់ឈាមថែមទៀតផង។ លោក លី សាវិត ថាការយល់ឃើញបែបនេះ គឺជាការយល់ឃើញដោយខុសឆ្គង ព្រោះថា ក្នុង១ថ្ងៃយើងត្រូវការឈាមជាង ២០០ប្លោកដើម្បី ជួយសង្គ្រោះជីវិតជនរងគ្រោះ និងអ្នកជម្ងឺដែលត្រូវការការចាក់បញ្ចូលឈាម ខណៈដែលអ្នក ផ្តល់ឈាមនៅទូទាំងប្រទេសមានមិនដល់ ៣០%ផង ហើយបើនិយាយពីប្រទេសជិតខាង យើងវិញមានអ្នកស្ម័គ្រចិត្តផ្តល់ស្ទើរតែ ១០០%ទៅហើយនោះ។

អគ្គលេខាធិការរងរដ្ឋសភា ឯកឧត្តម មិត្ត ការ៉េន មានប្រសាសន៍ថា អគ្គលេខាធិការ ដ្ឋានរដ្ឋសភាតែងតែជម្រុញឱ្យមន្ត្រីរបស់ខ្លួនស្ម័គ្រផ្តល់ឈាម ដើម្បីកិច្ចការមនុស្សធម៌ ហើយ នេះជាលើកទី៦ហើយ ដែលមន្ត្រីអគ្គលេខាធិការដ្ឋានរដ្ឋសភាបានផ្តល់ឈាមជូនមជ្ឈមណ្ឌល ជាតិផ្តល់ឈាម ដោយស្ម័គ្រចិត្ត៕

ភ្នំពេញ ៖ រថយន្តម៉ាកហ៊ីយ៉ាន់ដាយដឹកចំណីសត្វមួយគ្រឿង បានបើកបោះពួយក្នុងល្បឿន លឿនជ្រុលទៅបុករថយន្តកុងតឺន័រមួយគ្រឿងដែលកំពុងបត់ឆ្លងផ្លូវពេញទំហឹង បណ្តាលអោយ រថយន្តដឹកចំណីសត្វស្រុញមុខ ខ្ទេចកាប៊ីន រងរបួសធ្ងន់ស្រាលចំនួន៣នាក់។

គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ១២និង១៥នាទីថ្ងៃត្រង់ថ្ងៃទី២៨ ខែមិនា ឆ្នាំ២០១៩ ស្ថិតនៅតាមមហាវិថីឈ្នះ ឈ្នះ ភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ។

អ្នករងរបួសក្នុងគ្រោះថ្នាក់នេះ ១ .ឈ្មោះពេជ្រ ភេទប្រុស អាយុ២១ឆ្នាំ រស់នៅភូមិបាត់ដឹង ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ ,២. ឈ្មោះ ដា វិត ភេទប្រុស អាយុ១៨ឆ្នាំ រស់នៅភូមិត្រពាំងវែង ឃុំសំបូរ ស្រុកសំរោងទង ខេត្តកំពង់ស្ពឺ និង៣.ឈ្មោះ ច្រឹក ឈង ភេទប្រុស អាយុ២៦ឆ្នាំ ស្នាក់នៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាលជាអ្នកបើកបរ។ចំណែកអ្នកបើកបររថយន្តកុងតឺន័របានគេចខ្លួនបាត់។

តាមសាក្សីបានអោយដឹងថា នៅមុនពេលកើតហេតុគេឃើញរថយន្តកូរ៉េម៉ាកហ៊ីយ៉ានដាយ ពណ៌ស ពាក់ស្លាកលេខ ភ្នំពេញ 3D-6484 ដឹកចំណីសត្វបើកបរក្នុងទិសដៅពីជើងទៅត្បូងដោយល្បឿនលឿន។នៅពេលធ្វើដំណើរមកដល់កន្លែងកើតហេតុ មានរថយន្តកុងតឺន័រ ម៉ាក MITSUBISI ពណ៌ស ពាក់ស្លាកលេខ ព្រះសីហនុ 3A-0871 បើកចេញពីឃ្លាំងឆ្លងកាត់ទទឹងផ្លូវ បំណងបត់ទៅទិសខាងត្បូង ។ដោយសាតែល្បឿនលឿន រថយន្តដឹកចំណីសត្វ ជ្រុលចង្កូតមកបុករថយន្តកុងតឺន័រដែលនៅទទឹងផ្លូវពេញទំហឹង បណ្តាលអោយកាប៊ីនរថយន្តខ្លួន ឯងស្រុញខ្ទេចមុខ បង្កអោយអ្នកបើកបរព្រមទាំងព្រូទាំងអស់៣នាក់រងរបួស ធ្ងន់និងស្រាលបញ្ជូនទៅកាន់មន្ទីរពេទ្យ ភ្លាមៗ។ដោយឡែក អ្នកបើកបរ រថយន្ត កុងតឺន័រក៍បានរត់គេចខ្លួនបាត់។

រថយន្តទាំង២គ្រឿង ត្រូវបាននគរបាលបញ្ចូនទៅកាន់ការិយាល័យ ចរារចណ៍ផ្លូវគោកដើម្បីម្ចាស់ចូលខ្លួន ដោះស្រាយ៕ ដោយ ៖ ស. ស.

ខេត្តបាត់ដំបង ៖ ស្រុកសំពៅលូនតាមការស្នើសុំពីភាគីថៃ និងសហការ ជាមួយ កងកម្លាំង ការពារព្រំដែនកម្ពុជាប្រចាំស្រុក សំពៅលូន បានស្បើសុំឲ្យប្រជាពលរដ្ឋខ្មែរចូលទៅធ្វើការ នៅទឹកដីថៃ ព្រឹក វិលល្ងាច ក្នុងរយៈពេល១០ថ្ងៃ នៅ ខែមីនា ឆ្នាំ២០១៩ ស្តិត នៅចំណុចច្រករបៀងប៉ុស្តិ៍នគបាលវិរៈការពារព្រំដែនគោកគីឡូ៩ និងផ្នែកសឹករងកងអនុសនាតូចទី១ដែលមាន លោកអនុសេនីយ៍ឯក អ៊ួន ខុន មេប៉ុស្តិ៍នគបាលការពារព្រំដែន8១៧និងលោកអនុសេនីយ៍ទោ ឡាក ឌី ផ្នែកសឹករងស្រុកសំពៅលូន បានឯកភាពបើកច្រករបៀងអនុញ្ញាតអោយពលករខ្មែរឆ្លងដែនទៅធ្វើការ ព្រឹក វិលល្ងាច ក្នុងទឹកដីថៃ ដោយមានការស្នើសុំពីសមត្ថកិច្ចថៃ រវាងប្រទេសជិតខាង និងត្រូវបានលោកមេប៉ុស្តិ៍ទាំងពីរ ស្នើសុំ ទៅថ្នាក់លើ និងបានឯកភាពឲ្យប្រជាពលរដ្ឋទៅធ្វើការព្រឹកវិលល្ងាច និងជួយរកការងារឲ្យពួកគាត់បានធ្វើ និងបានប្រាក់កម្រៃ គ្រាន់ដោះស្រាយជីវភាពប្រចាំថ្ងៃ។

ដោយថ្មីៗ បើតាមប្រភពមច្បាស់ការ់ ពីប្រជាពលរដ្ឋបានសរសើរ និងថ្លែងអំណរគុណដល់សមត្ថកិច្ចដែល ឈរជើងនៅទីនោះ មានកិច្ចសហការល្អរវាងប្រទេសជិតខាង និងមានការយោគយល់គ្នាទៅវិញទៅមក យកចិត្តទុកដាក់ ដល់ប្រជាពលរដ្ឋឲ្យមានការងាធ្វើ ដើម្បី បានប្រាក់កម្រៃខ្លេះ ដើម្បីដោះស្រាយជីវភាពក្នុងគ្រួសារ។

គួរបញ្ជាក់ផងដែរ ប្រជាពលរដ្ឋដែលមកធ្វើការ ព្រឹកវិលល្ងាច មកពី
ស្រុកភូមិឃុំផ្សេងៗគ្នា សរុបក្នុងមួយថ្ងៃៗមានចំនួនមនុស្សទៅធ្វើការប្រមាណពី៥០០ ទៅ ៦០នាក់ក្នុងមួយថ្ងៃៗ៕ ដោយ ៖ សុផល