ដោយ ៖ សហការី

ខេត្តកំពង់ឆ្នាំង ៖ វេជ្ជបណ្ឌិតឯកទេស ត្រចៀក បំពង់ ក ម្នាក់ ត្រូវបានតុលាការសម្រេចឃុំខ្លួនពាក់ព័ន្ធ ពីបទប្រទូស្តកេរ លើអ្នកគ្រូពេទឆ្មបម្នាក់នៅកន្លែងធ្វើការជាមួយគ្នា ដែលអាចជាប់ពន្ឋនាគារ ពី១ឆ្នាំទៅ៣ឆ្នាំ ។

សាលាដំបូងខេត្តកំពង់ឆ្នាំងបានសម្រេចឃុំខ្លួនវេជ្ជបណ្ឌិត ឈ្មោះ ហេង សេងហ៊ ហើយនៅល្ងាចថ្ងៃទី ២៦ ខែមិថុនា ម្សិលម៉ិញនេះ ដោយចោទប្រកាន់ពីបទប្រទូស្តកេរ្តិ៍ខ្មាស់ ដែលបានប្រព្រឹត្តឡើងកាលពីយប់ថ្ងៃទី ២៣ខែមិថុនាឆ្នាំ ២០១៩ នៅក្នុងមន្ទីរពេទ្យខេត្តកំពង់ឆ្នាំង។

លោក- ស្រី សុដា ប្រធានការិយាល័យប្រឆាំងការជួញដូរមនុស្សនិងអនីតិជននៃស្នងការដ្ឋាននគរ បាលខេត្តកំពង់ឆ្នាំង បានឲ្យដឹងថាលោកវេជ្ជបណ្ឌិត ហេង សេងហ៊ ត្រូវបានសាលាដំបូងខេត្តកំពង់ឆ្នាំង ក្នុងនោះមាន៖ ព្រះរាជអាជ្ញា អមសាលាដំបូង គឺលោក ទី មុនិន្ទ និងចៅក្រម លោក សុខ ឧត្តម បានចោទប្រកាន់ព្រមគ្នា លើវេជ្ជបណ្ឌិត រូបនោះ ក្នុងបទ ប្រព្រឹត្តអំពើប្រទូស្តកេរ្តិ៍ខ្មាស់ លើអ្នកគ្រូពេទ្យឆ្មបមធ្យម ម្នាក់កាលពីយប់ថ្ងៃទី 23 ខែមិថុនា។

ប្រភពដដែលបានបន្តថាក្រោយពីមានពាក្យបណ្ដឹងរបស់ អ្នកគ្រូពេទ្យឆ្មបមធ្យម នៃមន្ទីរពេទ្យខេត្តកំពង់ឆ្នាំង ប្តឹងចោទប្រកាន់លោកវេជ្ជបណ្ឌិត ហេង សេងហ៊ ពីបទប៉ុនប៉ងរំលោភមិនបានសម្រេច រួចមក សមត្ថកិច្ចក៏បានធ្វើការស្រាវជ្រាវដល់កន្លែងកើតហេតុ ដោយផ្អែកតាមសាក្សី វត្ថុតាងមានកាមេរ៉ាសុវត្ថិភាពដែលបានបង្ហាញថា៖ នៅពេលដែលអ្នកគ្រូពេទ្យរងគ្រោះ បើកទ្វាចេញពីបន្ទប់ទឹក ត្រូវបានវេជ្ជបណ្ឌិត ចាប់ ឱបនាងពីមុខហើយនារីរងគ្រោះបានប្រឹងរះបំរះរហូតរួចខ្លួន ។

ក្រោយពីបានសាក្សី និងវត្ថុតាង សមត្ថកិច្ចក៏បានកសាងសំណុំរឿងបញ្ជូនជនសង្ស័យជាវិជ្ជបណ្ឌិត ទៅតុលាការ តាមនិតិវិធី ហើយក្រោយពីធ្វើការសាកសួរ របស់ព្រះរាជអាជ្ញា និង ចៅក្រម សាលាដំបូងខេត្តហើយ ទើបសម្រេចចេញដិការឃុំខ្លួន លោកវិជ្ជបណ្ឌិតរូបនោះ ជាបណ្តោះអាសន្ន ដើម្បីបើកការស៊ើបអង្កេតជាបន្ត ។

សូមរំឭកថា យោងតាមពាក្យបណ្តឹងអ្នកគ្រួពេទ្យឆ្មបមធ្យម បានប្តឹងថា៖ កាលពីយប់ថ្ងៃទី 23 ខែ មិថុនា ឆ្នាំ២០១៩ លោកវេជ្ជបណ្ឌិត ហេង សេងហ៊ ឯកទេសជំនាញ ត្រចៀក បំពង់ ក បានចាប់រូបនាង ប៉ុនប៉ងរំលោភ នៅបន្ទប់ទឹក ក្នុងមន្ទីរពេទ្យខេត្តកំពង់ឆ្នាំង ប៉ុន្តែត្រូវរូបនាងរើរួចខ្លួន ហើយបានរត់មកដល់បន្ទប់ដែលនាងប្រចាំការវិញ។ នៅទីនោះ មិនមានអ្នកជំងឺ និងមិនមានគ្រូពេទ្យ ណាទៀតទេពេលនោះ លោកវេជ្ជបណ្ឌិត ក៏មកតាមដល់បន្ទប់ ហើយក៏បានចាប់អង្អែលភ្លៅ និងស្ទាបលើរាងកាយនាង ។ ឃើញសភាពកាន់តែមិនស្រួលនាងក៏បានរត់ចេញពីបន្ទប់នោះ រួចទៅដេកនៅជាមួយមិត្តភក្កិជាអ្នកគ្រូពេទ្យដូចគ្នា។

ក្រោយមកនាងក៏ដាក់ពាក្យបណ្ដឹងលោកវេជ្ជបណ្ឌិត រូបនោះទើបឈានដល់ការចាប់ និងឃុំខ្លួនតែម្ដង។ តាមអ្នកច្បាប់ ដែលដឹងរឿងនេះបានអោយដឹងថា៖ បទប្រទូស្តកេខ្មាស់ ជាបទល្មើស មជ្ឈឹម អាចជាប់ពន្ឋនាគារ ពី១ឆ្នាំទៅ៣ឆ្នាំ ៕

ដោយ ៖ ផល្លា

ខេត្តក្រចេះ ៖ ករណីឃាតកម្មមួយបានកើតឡើងយ៉ាងអាថ៌កំបាំង នៅក្នុងចំការកៅស៊ូ ស្ថិតក្នុងឃុំស្រែចារ ស្រុកស្នួល ខេត្តក្រចេះ ដោយជនរងគ្រោះត្រូវបានគេដុតទាំងរស់ ជាមួយនឹងម៉ូតូមួយគ្រឿង ឆេះខ្ទេចមើលមិនស្គាល់ជានរណាឡើយ នៅរសៀលថ្ងៃទី២៦ ខែមិថុនា ឆ្នាំ២០១៩ ។

តាមប្រភពពីប្រជាពលរដ្ឋ គ្រាន់តែឲ្យដឹងថា ជនរងគ្រោះមិនទាន់ស្គាល់អត្តសញ្ញាណនៅឡើយ គ្រាន់តែដឹងថា ជាអ្នកមករកអុស នៅក្នុងចំការកៅស៊ូ ចំណុចខាងលើ
ពាក់ព័ន្ធនឹងមូលហេតុនេះ អត្តសញ្ញាណរបស់ជនរងគ្រោះ គឺពុំទាន់បានដឹងនៅឡើយ សមត្ថកិច្ចកំពុងបន្តស្រាវជ្រាវ ៕

ខេត្តកំពង់ស្ពឺ ៖ កាលពីរសៀលថ្ងៃទី២៥ ខែមិថុនា ឆ្នាំ២០១៩ នេះ រថយន្តស៊េរីទំនើបចំនួន៥គ្រឿង ត្រូវបានសាខាគយ និងរដ្ឋាករខេត្តកំពង់ស្ពឺ សហការណ៏ជាកម្លាំងកងរាជអាវុធហត្ថខេត្តកំពង់ស្ពឺ ធ្វើការស្រាវជ្រាវ និងឈានទៅបង្ក្រាបបាននៅចំណុចភូមិសាស្ត្រក្រុងច្បារមន ខេត្តកំពង់ស្ពឺ ដែលមានភាពមិនប្រក្រតី។

យោងតាមរបាយការណ៍សាខាគយ និងរដ្ឋាករខេត្តកំពង់ស្ពឺបានឲ្យដឹងថា រថយន្តដែលស្រាវជ្រាវបង្ក្រាបបានមានចំនួន០៥គ្រឿង។

ទី១ ម៉ាក Lexus 350 ផលិតឆ្នាំ2012 ពាក់ស្លាកលេខភ្នំពេញ 2AS-2244 ,ទី២ម៉ាក TOYOTA Vellfire ផលិតឆ្នាំ2013 ពាក់ស្លាកលេខខេមរភូមិន្ទ ខម 01-2-2547, ទី៣ម៉ាក Lexus GS300 ផលិតឆ្នាំ2006 ពាក់ស្លាកលេខ ភ្នំពេញ2AG-3893,ទី៤ម៉ាក TOYOTA Land Cruiser ផលិតឆ្នាំ2011 ពាក់ស្លាកលេខភ្នំពេញ 2AO-9313, និងទី៥ ម៉ាក Rang Rover ផលិតឆ្នាំ2006 ពាក់ស្លាកលេខខេមរភូមិន្ទ ខម02-2-1528 ។

បើទោះបីរថយន្តទាំង០៥គ្រឿងមានបំពាក់ស្លាកលេខពិតមែន តែតាមការស្រាវជ្រាវរបស់សាខាគយ និងរដ្ឋាករខេត្តកំពង់ស្ពឺបានរកឃើញថារថយន្តទាំងអស់នេះមិនទាន់បានបំពេញកាតព្វកិច្ច ពន្ធ និងអាករ នាំចូលឲ្យបានត្រឹមត្រូវនៅឡើយ ទើបឈានទៅបង្ក្រាបឃាត់ទុកបែបនេះសិន ។

សាខាគយបានស្នើសុំឲ្យប្រជាពលរដ្ឋទាំងអស់មេត្តាចូលរួមបំពេញកាតព្វកិច្ច ពន្ធគយ និងរដ្ឋាករឲ្យបានត្រឹមត្រូវ ហើយរាល់ការទិញឬលក់រថយន្តត្រូវពិនិត្យផ្ទៀងផ្ទាត់គ្រប់ឯកសារគយច្បាស់លាស់ផងដែរ ។

សូមបញ្ជាក់ថា ករណីនៃបង្ក្រាបបទល្មើសគយទាមទាឲ្យមន្ត្រីគយ បើកការស្រាវជ្រាវប្រមូលព័ត៌មានឲ្យបានច្បាស់លាស់ និងប្រកបដោយវិជ្ជាជីវៈនិងច្បាប់ ។

បច្ចុប្បន្នសាខាគយ និងរដ្ឋាករខេត្តកំពង់ស្ពឺ ធ្វើកំណត់ហេតុបទល្មើសគយបញ្ជូនទៅអគ្គនាយកដ្ឋានគយ និងរដ្ឋាករសុំសេចក្តីសម្រេច៕

ភ្នំពេញ ៖ ក្រសួងសាធារណការ និងដឹកជញ្ជូន នៅរសៀលថ្ងៃទី២៥ ខែមិថុនា នេះ បានចុះហត្ថលេខាជាមួយក្រុមហ៊ុន Hanshin Engineering and Construction Co., Ltd ដើម្បីធ្វើឲ្យប្រសើរឡើងផ្លូវជាតិលេខ២ និងលេខ២២ ចាប់ពីក្រុងតាខ្មៅ ខេត្តកណ្តាល រហូតដល់ខេត្តតាកែវ ក្រោមកម្ចីឥណទានសម្បទានរបស់សាធារណៈរដ្ឋកូរ៉ ក្នុងទំហំទឹកប្រាក់ចំនួន ៥៦លានដុល្លារអាមេរិក។

គម្រោងធ្វើឱ្យប្រសើរឡើងវិញផ្លូវជាតិលេខ២ និងលេខ២២គឺជាគម្រោងក្រោមឥណទានសម្បទានពីធនាគារនីហរ័ណអាហរ័ណកូរ៉េ (Export-Import Bank of Korea) នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច ត្រូវបានចុះហត្ថលេខាសាងសង់ជាផ្លូវការហើយ នៅរសៀលថ្ងៃទី២៥ ខែមិថុនា ក្រោមវត្តមាន លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធាណៈការ និងដឹកជញ្ជូន។

ថ្លែងនៅក្នុងពិធីចុះហត្ថលេខានេះ លោក ទេសរដ្ឋមន្ត្រី ស៊ុន ចាន់ថុល បានរំលឹកដល់ក្រុមហ៊ុនសាងសង់ធ្វើផ្លូវប្រកបដោយគុណភាព និងការ ទទួលខុសត្រូវខ្ពស់បំផុត ពោលគឺមិនមែនធ្វើផ្លូវជាប់រហូតទេ គឺត្រូវផ្លូវឲ្យមានគុណភាព និងមាំ។ លោក រដ្ឋមន្ត្រីបានបញ្ជាក់ដែរថា ផ្លូវជាតិលេខ ២នេះ នឹងត្រូវ បើកការដ្ឋានសាងសង់នៅអំឡុងខែវិច្ឆិកា រឺខែធ្នូខាងមុខនេះ។ ជាមួយគ្នានេះ រាជរដ្ឋាភិបាលក៏មានគណៈកម្មការដោះស្រាយផលប៉ះពាល់លំនៅដ្ឋានរបស់ប្រជាពលរដ្ឋនៅតាមដងផ្លូវ ទៅតម្លៃទីផ្សារ ដោយមិនមែនធ្វើវាយកម្ទេចដោយ គ្មានសំណងនោះទេ។

គម្រោងនេះឆ្លងកាត់រាជធានី/ខេត្ត ចំនួនបីក្នុងនោះមាន ខេត្តកណ្តាល រាជធានីភ្នំពេញ និងខេត្តតាកែវ មានប្រវែងផ្លូវសរុបជាង៧២ គីឡូម៉ែត្រ។ គម្រោងផ្លូវជាតិលេខ២ ចាប់ផ្ដើមពីរង្វង់មូលតាខ្មៅ (ស្ថិតក្នុងក្រុងតាខ្មៅ ខេត្តកណ្តាល) ដល់រង្វង់មូលអូរចំបក់ (ស្ថិតក្នុងក្រុងដូនកែវ ខេត្តតាកែវ) និងផ្លូវជាតិលេខ២២ ពីរង្វង់មូលអូរចំបក់ដល់ផ្លូវជាតិលេខ៣ ត្រង់ផ្សារអង្គតាសោម។

គម្រោងខាងលើធ្វើការពង្រីកលើផ្លូវចាស់ដោយក្រាលកៅស៊ូAC (Asphalt Concrete) សាងសង់ស្ពានថ្មី ចំនួន១១។ ការស្ថាបនាគ្រោងនឹងប្រើរយៈពេល ៣០ខែ (ប្រហែល ២ឆ្នាំកន្លះ)។ បើតាមរដ្ឋមន្ត្រីសាធារណៈការឲ្យដឹងថា គម្រោងនេះបែងចែកជាបីកំណាត់ផ្លូវធំៗ មានដូចជា៖ កំណាត់ទី១៖ ចាប់ផ្តើមចេញពីរង្វង់មូលតាខ្មៅ ដល់រង្វង់មូលកួរស្រូវ ដែលមានប្រវែង ៨គ.ម ដោយពង្រីកពី ២ គន្លង ទៅ ៤ គន្លង។ កំណាត់ទី២៖ ចាប់ផ្តើមចេញពីរង្វង់មូលកួរស្រូវ ដល់រង្វង់មូលអូរចំបក់ ដែលមានប្រវែង ៥៣គ.មស្ថិតក្នុងតំបន់ជនបទ និងកំណាត់ទី៣៖ ចាប់ផ្តើមពីរង្វង់មូលអូរចំបក់ ដល់ផ្សារអង្គតាសោម (ផ្លូវជាតិលេខ២២) ដែលមានប្រវែងជាង៩គ.ម ស្ថិតក្នុងតំបន់ជនបទ៕

ដោយ ៖ សុត្ថារ៉ា

ភ្នំពេញ៖ តែពីរថ្ងៃប៉ុណ្ណោះ នៅក្រោយពេលមានករណីបាក់រលំអគារកម្ពស់៧ជាន់ នៅខេត្តព្រះសីហនុ ដោយបង្កឲ្យមានមនុស្សស្លាប់ និងរបួសជាច្រើននាក់រួចមក នៅថ្ងៃទី២៤ មិថុនា នេះ ប្រមុខរាជរដ្ឋាភិបាល ប្រកាសផ្លាស់ប្តូរ និងតែងតងអភិបាលខេត្តចំនួន៤ ដើម្បីរក្សានិរន្តរភាពនៃស្ថានភានសន្តិសុខ សុវត្ថិភាព សម្រាប់ខេត្តព្រះសីហនុ ដែលជាខេត្តដែលមានសក្តានុពលបំផុតលើវិស័យទេសចរណ៍របស់កម្ពុជា។

សូមជម្រាបថា តុល្យការចុងក្រោយ នៃឧបទ្ទវហេតុរលំអគារនេះ បានបណ្តាលឱ្យមនុស្សស្លាប់ និងរងរបួសចំនួន៥៤នាក់ ក្នុងនោះស្លាប់ចំនួន២៨នាក់ (ស្រី៤នាក់) ហើយអ្នករងរបួសចំនួន២៦រូប (ស្រី២នាក់)។ ក្រុមសង្គ្រោះនៅតែបន្តបេសកកម្មស្វែងរកមនុស្ស ដែលសង្ស័យថា អាចមាននៅក្នុងគំនរអគារដួលរលំនេះបន្តទៀត។

តាមព័ត៌មានដែលត្រូវបានផ្សព្វ ផ្សាយនៅថ្ងៃនេះ លោក គួច ចំរើន ពីអភិបាលខេត្តកំពង់ចាម ត្រូវបានតែងតាំងឲ្យទៅជាអភិបាលខេត្តព្រះសីហនុ ជាមួយគ្នានេះ លោក ប្រាក់ សុវណ្ណ ពីអភិបាលរងខេត្តស្វាយរៀង ក៏ត្រូវបានតែងតាំងឲ្យទៅជាអភិបាលខេត្តព្រះវិហារ ឯលោក អ៊ុន ចាន់ដា ពីអភិបាលខេត្តព្រះវិហារ ត្រូវបានតែងតាំងជាអភិបាលខេត្តកំពង់ចាម វិញ។

លោក ខៀវ សុភ័គ ប្រធានខុទ្ទការល័យ  និងជាអ្នកនាំពាក្យក្រសួងមហាផ្ទៃ បានមានប្រសាសន៍បញ្ជាក់ ថា តាមពាក្យស្នើសុំរបស់សម្តេចក្រឡាហោម ស ខេង កាលពីថ្ងៃទី២៤ ខែមិថុនា ឆ្នាំ២០១៩ នេះ គឺបានដាក់ជូនសម្តេចតេជោ ហ៊ុន សែន នាយករដ្ឋមន្ត្រី ដើម្បីស្នើសុំផ្ទេរភារកិច្ចខាងលើនេះ។

លោក ខៀវ សុភ័គ បានបញ្ជាក់ថា «សម្តេចក្រឡាហោម បានសុំការយល់ព្រមជាគោលការណ៍ ពីសម្តេចតេជោរួចហើយ ហើយសម្តេចនាយករដ្ឋមន្ត្រី ក៏បានឯកភាពដែរ»​។

ស្របពេលគ្នានេះ  តាមរយៈសំណើរបស់សម្តេចនាយករដ្ឋមន្រ្តី ហ៊ុន សែន ព្រះមហាក្សត្រ បានចេញព្រះរាជក្រឹត្យពីរ នៅថ្ងៃទី២៤ ខែមិថុនា ឆ្នាំ២០១៩នេះ ដោយព្រះរាជក្រឹត្យមួយ ដកលោក ញឹក វណ្ណដា ចេញពីតំណែងទេសរដ្ឋមន្រ្តីទទួលបន្ទុកបេសកកម្មពិសេស ហើយព្រះរាជក្រឹត្យមួយទៀត តែងតាំងលោក ជាទីប្រឹក្សារដ្ឋាភិបាល ដែលមានឋានៈស្មើទេសរដ្ឋមន្រ្តី ហើយការងារគ្រប់គ្រងគ្រោះមហន្តរាយ ត្រូវបានប្រគល់ទៅលោក គន់ គឺំម វិញ៕

​ដោយ ៖ សុត្ថារ៉ា

ភ្នំពេញ ៖ គណៈកម្មាធិការអចិន្ត្រៃយ៍ ព្រឹទ្ធសភា នៃព្រះរាជាណាចក្រកម្ពុជា នៅថ្ងៃទី២៤ ខែមិថុនា ឆ្នាំ២០១៩ បានបើកកិច្ចប្រជុំ ពិនិត្យ និង ពិភាក្សាគ្នា ទៅសេចក្តីព្រាងច្បាប់សំខាន់ៗចំនួន៥ ដើម្បីដាក់ជូនកិច្ចប្រជុំពេញអង្គពិនិត្យ និងអនុម័តនៅក្នុងសម័យប្រជុំលើកទី៣ និតិកាលទី៤ នៅថ្ងៃស្អែកនេះ ជាពិសេស សេចក្តីព្រាងច្បាប់ ស្តីពី ការគ្រប់គ្រងប្រេងកាត និង ការផលិតប្រេងកាត។

អ្នកនាំពាក្សព្រឹទ្ធសភា លោក ម៉ម ប៊ុននាង បានមានប្រសាសន៍ ឲ្យដឹងនៅក្រោយ កិច្ចប្រជុំនេះថា កិច្ចប្រជុំគណៈកម្មាធិការអចិន្ត្រៃយ៍ព្រឹកនេះ បានកំណត់យក ថ្ងៃទី២៥ ខែមិថុនា ឆ្នាំ២០១៩ បន្តសម័យប្រជុំរបស់ខ្លួន ដើម្បី ពិនិត្យ និងសម្រេច ទៅលើសេចក្តីព្រាងច្បាប់សំខាន់ៗ ដែល គណៈកម្មាធិការ ព្រឹទ្ធសភាបានស្នើឡើង។

លោក ម៉ម ប៊ុននាង បញ្ជាក់ថា សេចក្តីព្រាងច្បាប់ ស្តីពីការគ្រប់គ្រងប្រេងកាតនិងការផលិតប្រេងកាតនេះ ពិតជាមានសារសំខាន់ណាស់ ក្នុងការផ្តល់ផលប្រយោជន៍ជូនសង្គមជាតិ ជាពិសេស នៅពេលដែលកម្ពុជាទទួលបានប្រេងកាត វានឹងធ្វើឱ្យមានកំណើនសេដ្ឋកិច្ចបន្ថែមទៀត។

លោកបន្តថាកិច្ចប្រជុំលើកទី៣នោះដែរ ក៏នឹងពិនិត្យ ពិភាក្សា និងអនុម័ត ទៅលើសេចក្តី ព្រាងច្បាប់ ស្តីពី ការអនុម័តយល់ព្រម លើកិច្ចព្រមព្រៀង រវាង រាជរដ្ឋាភិបាល នៃព្រះរាជាណាចក្រកម្ពុជា និង រដ្ឋាភិបាល នៃសាធារណរដ្ឋប្រជាមានិតបង់ក្លាដេស សហភាពអារ៉ាប់អេមីរ៉េត និងរដ្ឋាភិបាលនៃសាធារណរដ្ឋតួកគីដើម្បីការជំរុញនិងការការពារទៅវិញទៅមកនៃវិនិយោគ។

ក្រៅពីនេះ កិច្ចប្រជុំព្រឹទ្ធសភា ក៏នឹងអនុម័ត ទៅលើកិច្ចព្រមព្រៀង ស្តីពី ការបង្កើត អង្គការ បណ្តាញ អន្តរជាតិ សម្រាប់ ឬស្សី និង ផ្តៅ របស់កម្ពុជាផងដែរ៕

ភ្នំពេញ ៖ អភិបាលខេត្តព្រះសីហនុ លោក យន្ត មីន បានប្រកាសលាលែងចេញពីតំណែងពីអភិបាលខេត្តព្រះសីហនុ ហើយ ក្រោយពីឧបទ្ទវហេតុរលំបាក់អគារកម្ពស់ ៧ជាន់ បណ្តាលឲ្យមនុស្សជាច្រើននាក់បានបាត់បង់ជីវិត និងេបួស។ ទន្ទឹមនឹងនេះ សម្តេចតេជោ នាយរដ្ឋមន្ត្រី ក៏បានប្រកាសដកតំណែងទេសរដ្ឋមន្ត្រី និងពីអនុប្រធានទី១ គណៈកម្មាធិការជាតិគ្រប់គ្រង គ្រោះមហន្តរាយ លោក ញឹម វណ្ណដា ដោយសារខ្វះការ ទទួលខុសត្រូវ និងភូតភរ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានយល់ព្រមឲ្យ លោក យន្ត មីន អភិបាលខេត្តព្រះសីហនុ លាលែងចេញពីតំណែង ក្រោយពីលោក បានស្នើសុំទៅសម្តេចតេជោ។ ការឈានទៅដល់ការលាលែងពីតំណែងជា ភិបាលខេត្តព្រះសីហនុ នៅពេលនេះ គឺពាក់ព័ន្ធទៅនឹងរឿងរលំបាក់អគារកម្ពស់៧ជាន់ សម្លាប់មនុស្សចំនួនជាង ២០នាក់ និងរបួសជាង ២០នាក់កាលពីថ្ងៃទី២២ ខែមិថុនា។

បើតាមសំណេរនៅលើហ្វេសប៊ុកផេកផ្លូវការរបស់សម្តេចតេជោ ហ៊ុន សែន នៅរសៀលថ្ងៃទី២៤ មិថុនានេះ បានបញ្ជាក់ថា លោក យន្ត មីន អភិបាលខេត្តព្រះសីហនុ បានទទួលស្គាល់កំហុសលើការគ្រប់គ្រងក្នុងដែនសមត្ថកិច្ចរបស់ខ្លួនដែលបណ្តាលអោយមានរឿងឈឺចាប់កើតឡើង។

សម្តេចបានបញ្ជាក់ថា «ខ្ញុំបានយល់ព្រមអោយគាត់លាលែងនិង បានពិភាក្សាជាមួយ សម្តេច ស ខេង យកឯកឧត្តម គួច ចំរើន ពីអភិបាលខេត្តកំពង់ចាម មកធ្វើជាអភិបាលខេត្តព្រះសីហនុវិញ»។ ទោះជាមានការរៀបចំបែបនេះក៏ដោយ ក៏ លោក យន្ត មីន នៅបន្តដឹកនាំយុទ្ធនាការរុករកនិងសង្រ្គោះតទៅទៀត រហូតចប់កិច្ចការនិងអភិបាលខេត្តថ្មីចូលកាន់តំណែង។ នេះបើតាមប្រសាសន៍របស់សម្តេចតេជោ។

សម្តេចតេជោ នាយករដ្ឋមន្ត្រី ក៏បានសម្រេចចិត្តដក លោក ញឹម វណ្ណដា ចេញពីតំណែងជាទេសរដ្ឋមន្ត្រី និងជាអនុប្រធានទី១ នៃគណៈកម្មាធិការជាតិគ្រប់គ្រង គ្រោះមហន្តរាយ ផងដែរ ដោយមូលហេតុថា លោកខ្វះការទទួលខុសត្រូវ និងភូតភរ៕

ដោយ ៖​ សុត្ថារ៉ា

ភ្នំពេញ ៖ រដ្ឋាភិបាលនៃសាធារណរដ្ឋប្រជាមានិតចិននៅព្រឹកថ្ងៃទី២៤ មិថុនា នេះ បានផ្តល់នូវសំភារៈ សម្រាប់ការបោសសំអាតមីននៅកម្ពុជាជាច្រើនមុខ ក្នុងនោះមាន រថយន្ត ម៉ូតូ ឧបករណ៍រាវលោហៈ ធាតុ ប្រអប់សំភារៈ សម្លៀកបំពាក់ការពារ មួកការពារ ម៉ាស៊ីនបំផ្ទុះ ឯកសណ្ឋាន ស្បែកជើង ខ្សែក្រវ៉ាត់ជាដើមជូនដល់អាជ្ញាធរមីនដើម្បីធ្វើសកម្មភាពបោសសំអាតមីន និងគ្រាប់មិនទាន់ផ្ទុះនៅ កម្ពុជា ក្នុងន័យចូលរួមចំណែកជួយកម្ពុជាឱ្យសម្រេចបាននូវផែនការរំដោះផ្ទៃដីឱ្យរួចផុតពីគ្រាប់មីន ទាំងស្រុងត្រឹមឆ្នាំ ២០២៥។

ក្នុងពិធីប្រគល់ និងទទួល ជំនួយនេះ លោក លី ធុជ ទេសរដ្ឋមន្ត្រី អនុប្រធានទី១ អាជ្ញាធរ មីន និង លោក Wang Wentian ឯកអគ្គរដ្ឋទូតចិនប្រចាំកម្ពុជាសុទ្ធតែបានចាត់ទុកទំនាក់ទំនងរវាង ប្រទេសទាំងពីរកម្ពុជា ចិន ថាមានសារៈសំខាន់ ហើយថាការផ្តល់ជំនួយរបស់ប្រទេសចិនពិតជាបាន រួមចំណែកយ៉ាងសំខាន់បំផុតនៅក្នុងកិច្ចការអភិវឌ្ឍនៅកម្ពុជា។

សម្រាប់វិស័យសកម្មភាពមីន លោក ទេសរដ្ឋមន្ត្រី លី ធុជ មានប្រសាសន៍ថា រយៈពេល២៧ ឆ្នាំមកនេះ កម្ពុជាបានបោសសំអាតមីន និងសំណល់ជាតិផ្ទុះពីសង្គ្រាមបានផ្ទៃដីចំនួន ១៨៦៩ គីឡូ ម៉ែត្រក្រឡា យកមកប្រើប្រាស់សម្រាប់សាងសង់លំនៅដ្ឋាន ការបង្កបង្កើនផល និងគាំទ្រដល់ការ អភិវឌ្ឍ ក្នុងនោះយើងបានរកឃើញ និងបំផ្លាញចោលមីនប្រឆាំងមនុស្សជាង ១លានគ្រាប់ មីនប្រឆាំង រថក្រោះជាង ២ម៉ឺនគ្រាប់ និងសំណល់ជាតិផ្ទុះពីសង្គ្រាមជិត ៣លានគ្រាប់ ព្រមទាំងមានអ្នកទទួល ផលសរុបជិត ៦លាននាក់។

លោក នោះដីចំការមីនជាង ៩០០គីឡូម៉ែត្រក្រឡា ដីចំការគ្រាប់បែកចង្កោមជាង ៧០០គីឡូម៉ែត្រក្រឡា និង ដីចំការគ្រាប់ជិត ៥០០គីឡូម៉ែត្រក្រឡាទៀតដែលកំពុងគំរាមកំហែងដល់ការរស់នៅ ការប្រកបមុខរបរ ចិញ្ចឹមជីវិតប្រចាំថ្ងៃរបស់បងប្អូនប្រជាពលរដ្ឋ និងបានរារាំងដល់ការអភិវឌ្ឍប្រទេសជាតិផងដែរ។

គួរជម្រាបជូនថា ឆ្លៀតក្នុងឱកាសនៃពិធីប្រគល់ និងទទួលសំភារៈបំរើការបោសសំអាតមីន កាលពីព្រឹកនេះ ឯកអគ្គរដ្ឋទូតចិនប្រចាំកម្ពុជា ឯកឧត្តម Wang Wentian ក៏បានបញ្ជាក់អំពីការគាំទ្រឱ្យ មានចំណាត់ការតាមផ្លូវច្បាប់ចំពោះជនជាតិចិនទាំងឡាយណា ដែលមានការជាប់ពាក់ព័ន្ធនៅក្នុងការ ដ្ឋានសំណង់អគារដែលបានបាក់រលំនៅខេត្តព្រះសីហនុដែលនាំឱ្យមានកម្មករស្លាប់ និងរបួសជាច្រើន នាក់ ហើយជាមួយគ្នានេះឯកឧត្តមទូតបានសម្តែងនូវអារម្មណ៍ក្តុកក្តួលជាពន់ពេកចំពោះឧបទ្ទហេតុ
នេះ៕

ដោយ ៖ សហការី

ព្រះសីហនុ ៖ ក្រោយចូលរួមបេសកកម្មរុករកអ្នករងគ្រោះដោយសារបាក់រលំអគារ ព្រឹកថ្ងៃទ២៤ ខែមិថុនា នេះ អ្នកស្លាប់កើនដល់ ២៤នាក់ហើយ ខណៈក្រុមសង្គ្រោះនកំពុងបន្តការស្វែងមនុស្សដែលសង្ស័យថា នៅមានជនរងគ្រោះនៅសេសសលនៅឡើយ។

នៅវេលាទៀបភ្លឺឈានចូលថ្ងៃទី២៤ ខែមិថុនា នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអញ្ជើញទៅសម្រាកហើយ បន្ទាប់ពីបានធ្វើដំណើរតាមរថយន្តមកកាន់ទីតាំងអគារ៧ជាន់ នៅខេត្តព្រះសីហនុ ទាំងយប់ ក្រោយពីបានវិលត្រឡប់មកពីចូលរួមកិច្ចប្រជុំកំពូលអាស៊ានលើកទី៣៤ នៅទីក្រុងបាងកក ប្រទេសថៃ កាលពីរសៀលថ្ងៃទី២៣ មិថុនា នេះ។

ការអញ្ជើញមកទាំងយប់របស់ សម្តេចតេជោ ហ៊ុន សែន នាពេលនេះ គឺដើម្បីផ្តល់កម្លាំងចិត្តដល់ក្រុមគ្រួសារជនរងគ្រោះនិងលើកទឹកចិត្តដល់បងប្អូនដែលកំពុងចូលរួមនៅក្នុងបេសកកម្មរុករកអ្នករងគ្រោះដោយសារអាគារបាក់រលំសង្កត់កាលពីថ្ងៃទី២២ មិថុនា កន្លងទៅនេះ នៅក្នុងខេត្តព្រះសីហនុ។

សម្តេចតេជោ មានប្រសាសន៍តាមរយៈហ្វេសប៊ុកផេកថា “ក្នុងនាម សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា គឺសម្តេចមានការសោកស្តាយយ៉ាងខ្លាំងចំពោះគ្រោះថ្នាក់នេះ ហើយក៏បានចូលរួមរំលែកទុក្ខជាមួយគ្រួសារជនរងគ្រោះ និងគ្រួសារនៃសព ។ ទន្ទឹមនឹងនេះ សម្តេចតេជោ បានអំពាវនាវដល់សប្បុរសជនចូលរួមវិភាគទានជួយដល់គ្រួសារជនរងគ្រោះផងដែរ” ។

សូមបញ្ជាក់ថា ក្រុមប្រតិបត្តិការសង្គ្រោះ បានឲ្យដឹងថា គិតត្រឹមម៉ោង ៦៖៣០នាទី ព្រឹកថ្ងៃទី២៤ ខែមិថុនា នេះ ចំនួនអ្នកស្លាប់កើនដល់ ២៤នាក់ និងអ្នករបួស២៤នាក់ ក្រោយក្រុមសង្គ្រោះបានរកឃើញសាកសពបុរស ២នាក់ទៀត ដែលជាអ្នករស់នៅឯខេត្តព្រៃវែង បានស្លាប់ក្នុងគំនរបាក់បែកនៃអគារនោះ។

តុល្យការចុងក្រោយនៃឧបទ្ទវហេតុរលំអគារនេះ បានបណ្តាលឱ្យមនុស្សស្លាប់ និងរងរបួសចំនួន៤៩នាក់ ហើយក្នុងនោះស្លាប់ចំនួន២៥នាក់ (ស្រី ៤ នាក់)ហើយអ្នករងរបួសចំនួន២៤រូប(ស្រី ២ នាក់)គិតត្រឹមម៉ោងព្រឹក ថ្ងៃទី ២៤ ខែមិថុនា នេះ។ ក្រុមសង្គ្រោះនៅតែបន្តបេសកកម្មស្វែងរកមនុស្សដែលសង្ស័យថាអាចមាននៅក្នុងគំនរអគារដួលរលំនេះបន្តទៀត ៕

​ដោយ ៖ សុផល 

ខេត្តកំពង់ចាម ៖ ជម្លោះក្នុងគ្រួសារមួយបានក្លាយជាវិបត្តិដោះស្រាយមិនរួច ធ្វើអោយបុរសជាប្តីសំរេចចិត្តធ្វើអត្តឃាតដោយយកឧបករណ៍ឆក់ត្រី ឆក់សម្លាប់ខ្លួនឯងបង្កអោយមានការភ្ញាក់ផ្អើល នៅថ្ងៃទី២៣ ខែមិថុនា ឆ្នាំ២០១៩ វេលាម៉ោង ១២ នៅភូមិព្រែកបារាំង ឃុំព្រែកកក់ ស្រុកស្ទឹងត្រង់ ខេត្តកំពង់ចាម។

មន្ត្រីប៉ូលិសបានអោយដឹងថា ជនសម្រេចចិត្តធ្វើអត្តឃាតនេះ បង្កដោយឈ្មោះ ឃុន សុខកង ភេទប្រុស អាយុ ២៧ឆ្នាំ ជនជាតិខ្មែរ មុខរបរកសិករមានទីលំនៅភូមិឃុំកើតហេតុខាងលើ បានយកឧបករណ៍ឆក់ត្រី ឆក់ខ្លួនឯងបណ្តាលអោយស្លាប់នៅលើផ្ទះរបស់ខ្លួន។ ប៉ូលិសបានបន្តថា ក្រោយពេលទទួលព័ត៌មានកំលាំងជំនាញអធិការដ្ឋាននគរបាលស្រុកស្ទឹងត្រង់ បានចុះទៅដល់កន្លែងកើតហេតុបង្កើតគណ:កម្មការចំរុះ ដើម្បីពិនិត្យសាកសពជនរងគ្រោះឈ្មោះ ឃុន សុខគង់ ឃើញមានស្លាកស្នាម ដូចខាងក្រោម÷-នៅត្រង់ពោះមានស្នាមរោលខ្លោច ទំហំ័៨×០.៥ស.ម។-នៅត្រង់ក្រោយខ្នងចខាងស្ដាំ ក្រោមស្លាបត្រចៀវ ក្រៅពីនេះ ពុំឃើញមានស្លាកស្នាមអ្វីផ្សេងៗទៀតទេ ។គណៈកម្មការចំរុះបានសន្និដ្ឋានថា សពជនរងគ្រោះ ឈ្មោះ ឃុន សុខកង គឺពិតជាស្លាប់ដោយសារឧបករណ៍ឆក់ត្រី ប្រាកដមែន។

តាមប្រភពព័ត៌មាននៅកន្លែងកើតហេតុបានអោយដឹងថា ជនរងគ្រោះ និងប្រពន្ធមានកូនម្នាក់ រៀងរាល់ថ្ងៃគ្រួសារនេះ មានជម្លោះពាក្យសំដីគ្នាជារឿយៗ រហូតបុរសប្តីបានសុំលែងលះជាមួយប្រពន្ធរបស់ខ្លួន តែគេមិនដឹងថា ជម្លោះនេះផ្តើមចេញពីអ្វីឡើយ ហើយអ្នកខ្លះសង្ស័យថា មកពីការប្រចណ្ឌ ឬស្នេហាត្រីកោណ។

ប្រភពដដែលបានបន្តថា នៅថ្ងៃកើតហេតុ លោកមេភូមិ បានធ្វើការសំរបសំរួលអោយប្តី ប្រពន្ធមួយគូរនេះត្រូវគ្នាវិញ។ ក្នុងនោះបុរសជាប្តីមិនបានប្រកែកអ្វីឡើយ គឺបានយល់ព្រមតាមការផ្សះផ្សាររបស់លោកមេភូមិ ហើយក៏ដើរមកផ្ទះវិញ។ នៅពេលដែលប្រពន្ធមកតាមក្រោយ ឡើងដល់លើផ្ទះក៏ឃើញប្តីចងកស្លាប់បាត់ទៅហើយ ដោយមានលិខិតចំនួន ២សន្លឹកនៅក្បែរខ្លួន។ សពជនរងគ្រោះ ត្រូវបានប្រគល់អោយក្រុមគ្រួសារ ដើម្បីរៀបចំធ្វើបុណ្យតាមប្រពៃណី ៕

កំពង់ចាម ៖លោកវរសេនីយ៍ឯក ហេង ប៊ុនថន នាយប៉ុស្តិ៍រដ្ឋបាលឃុំពាមប្រធ្នោះ ស្រុកកោះសូទិន ខេត្តកំពង់ចាម ក្រោយពីដឹកនាំកម្លាំងប៉ុស្ត៍ចុះទៅរារាំង ការប្រមូលផ្តុំរបស់បងប្អូនប្រជាពលរដ្ឋហូបនំបញ្ចុក នៅភូមិទួលធាតុ ឃុំពាមប្រធ្នោះ បានបង្កភ្ញាក់ផ្អើល ក្នុងបណ្តាញសង្គម មានមតិរិះគន់ មានមតិស្រប ហើយត្រូវបានលោក គួច ចំរើន អភិបាលខេត្តកំពង់ចាម ដកតំណែងមេប៉ុស្តិ៍ទៅបញ្ឈរជើងនៅស្នងការខេត្ត។

ខណៈដែលមានការដកតំណែងនេះ លោក ហេង ប៊ុនថន មេប៉ុស្តិ៍ពាមប្រធ្នោះ ស្រែកថា ជារឿងអយុត្តិធម៌ ខណៈដែលលោកចុះទៅពិនិត្យ និងរារាំងពលរដ្ឋរឿងហូបនំបញ្ចុកនោះ គឺធ្វើតាមបញ្ជារបស់លោកវរសេនីយ៍ឯក អ៊ឺម ឃឿន អធិការស្រុកកោះសូទិន ជាអ្នកបញ្ជាឲ្យលោកចុះទៅ មិនមែនលោកចុះទៅស្រេចតែអំពើចិត្តលោកឡើយ ចុះហេតុអ្វី អ្នកបញ្ជាអត់មានកំហុស បែរជាមកខុសអ្នកទទួលបទបញ្ជាទៅវិញ? ។

គួរជម្រាបថា អនុសេនីយ៍ឯក ហេង ប៊ុនថន អត្តលេខ៤៨៣០២ នាយប៉ុស្តិ៍នគរបាលរដ្ឋបាល ពាមប្រធ្នោះ ស្រុកកោះសូទិន ខេត្តកំពង់ចាម ចូលបម្រើការងារជានគរបាលជាតិនៅឆ្នាំ១៩៩៣ ។

មជ្ឈដ្ឋានដែលបានដឹងរឿងនេះ បានលើកឡើងថា លោកមេប៉ុស្តិ៍ ហេង ប៊ុនថន គ្រាន់តែអនុវត្តន៍ តាមបទបញ្ជារបស់លោក អ៊ឺម ឃឿន អធិការស្រុកកោះសូទិន ទោះជាប្រកែកក៏មិនបានព្រោះជាបទបញ្ជារបស់ថ្នាក់លើ លុះដល់ពេលផ្ទុះរឿង កំហុសធ្លាក់មកលើ រូបលោកទៅវិញ ឯអ្នកបញ្ជារួចខ្លួនស្ងាត់ឈឹង នេះជាមេរៀនមួយសម្រាប់មេប៉ុស្តិ៍រដ្ឋបាលទាំងឡាយ ៕        (រូបលើ ៖លោក ហេង ប៊ុនថន  រូបខាងក្រោម លោក អ៊ឺម ឃឿន អធិការស្រុកកោះសូទិន)

ដោយ ៖ សុត្ថារ៉ា

ខេត្តព្រះសីហនុ ៖ ក្រុមសង្គ្រោះបានរកឃើញសាកសពបុរស ម្នាក់ទៀតហើយនៅក្នុងគំនរបាក់បែកនៃអគារដែលរលំនៅខេត្តព្រះសីហុន នៅវេលាម៉ោង ១១ និង ៣៥នាទីព្រឹកថ្ងៃទី២៣ ខែមិថុនា ឆ្នាំ២០១៩ នេះ។

ក្រុមប្រតិបត្តិការសង្គ្រោះជនរងគ្រោះ ដែលអគារសំណង់រលំសង្កត់លើ បានឲ្យដឹងថា គិតត្រឹមម៉ោង១១៖៣០នាទីព្រឹកថ្ងៃទី២៣ ខែមិថុនាឆ្នាំ ២០១៩នេះ ចំនួនអ្នកស្លាប់ដែលត្រូបានរកឃើញ កើនដល់១៨នាក់ហើយ និងអ្នករបួសចំនួន ២៤នាក់ ។ ក្រុមសង្គ្រោះនៅតែបន្តបេសកកម្មស្វែងរកមុនស្សដែលសង្ស័យថា អាចមាននៅក្នុងគំនរផ្ទាំងថ្មនៃបំណែកអគារដួលរលំនេះបន្តទៀតនៅឡើយ។

ឧបទ្ទវហេតុនៃការរលំអគារនេះ បានបណ្តាលឱ្យមនុស្សស្លាប់ និងរងរបួសចំនួន៤២រូប ក្នុងនោះស្លាប់ចំនួន១៨នាក់ (ស្រី៤នាក់) ហើយអ្នករងរបួសចំនួន ២៤នាក់ (ស្រី២នាក់)។ សាច់ញាតិជនរងគ្រោះដែលស្លាប់បានបំពេញបែបបទ ដើម្បីយកសពទៅធ្វើបុណ្យតាមប្រពៃណីបណ្តើរៗហើយ ។

សូមជម្រាបថា ប្រមុខរាជរដ្ឋាភិបាលបាន និងស្ថាប័នមួយចំនួន បានប្រកាសឧបត្ថម្ភថវិកាដល់ជនរងគ្រោះថ្នាក់ដល់ស្លាប់បាត់បង់ជីវិតដែលគ្រួសារសពនីមួយៗ ទទួលបានជាង៤០លានរៀល ចំណែកអ្នករងរបួសទទួលបានជាង៧លានរៀន និងទទួលការព្យាបាលដោយឥតគិតថ្លៃផងដែរ៕

ភ្នំពេញ ៖ គិតត្រឹមថ្ងៃនេះ ប្រមុខរាជរដ្ឋាភិបាលបាន និងស្ថាប័នមួយចំនួន បានប្រកាសឧបត្ថម្ភប្រាក់ ដល់ជនរងគ្រោះថ្នាក់ដល់ស្លាប់បាត់បង់ជីវិតដែលគ្រួសារសពនីមួយៗទទួលបានជាង៤០លានរៀល ចំណែកជនរងរបួសទទួលបានជាង៧លានរៀល។

តាមរបាយការណ៍បឋម ឲ្យដឹងថា អ្នករងរបួសនឹងទទួលបានថវិកាសរុប 7.200.000 ក្នុងម្នាក់ ក្នុងនោះ មានថវិការាជរដ្ឋាភិបាលកម្ពុជា សម្រេចផ្តល់ដោយសម្តេចតេជោ ហ៊ុន សែនចំនួន ៥លានរៀល ថវិកាក្រុមការងារថ្នាក់ជាតិ ១លានរៀល កាកបាទក្រហម១លានរៀល និងថវិកាសាលាខេត្ត២០ម៉ឺនរៀល) រួមទាំងការព្យាបាលដោយមិនបាច់បង់ប្រាក់ផងដែរ។

ចំពោះអ្នកស្លាប់ ទទួលបានសរុប ៤៩លានរៀល ក្នុងម្នាក់ៗ ក្នុងថវិការាជរដ្ឋាភិបាលកម្ពុជាសម្រេចផ្តល់ដោយសម្តេចតេជោ ហ៊ុន សែន ចំនួន ៤០លានរៀល ក្រុមការងារថ្នាក់ជាតិ១លាន រៀលកាកបាទក្រហម១លាន សាលាខេត្ត២លានរៀល ព្រះរាជអាជ្ញា៥០ម៉ឺនរៀល តំណាងរាស្រ្តខេត្តព្រះសីហនុ ៥០ម៉ឺនរៀល និងក្រសួងការងាខាងបសស៤លានរៀល។

ដោយឡែកថវិកាសព សាលាខេត្ត បានចាត់លោកស្រីអភិបាលរងខេត្តចាំប្រគល់ជូនគ្រួសារដោយផ្ទាល់ចំនួន ៤៥លាន ចំណែក៤លានទៀត ខាងក្រសួងការងារនឹងប្រគល់ជូនគ្រួសារសពដោយឡែក។

មន្ត្រីរដ្ឋបាលខេត្តព្រះសីហនុ បានឲ្យដឹងថា នៅមិនទាន់បញ្ចប់ទេ អាចនឹងមានសប្បុរសជនផ្សេងទៀតនឹងចូលរួមជាបន្តបន្ទាប់ទៀត ខណៈដែលក្រុមសង្គ្រោះកំពុងបន្តស្វះស្វែងរុករកយ៉ាងមមាញឹក ដើម្បីជួយអ្នកដែលសង្ស័យថា នៅមានសេសសល់ក្រោមគំនរថ្មនៅឡើយ៕

ដោយ ៖ សុត្ថារ៉ា

ព្រះសីហនុ ៖ ប្រតិបត្តិការក្រុមអ្នកសង្គ្រោះជនរងគ្រោះដែលអគារសំណង់រលំសង្កត់លើនៅតែបន្តរហូតដល់រំលងអធ្រាត្រថ្ងៃទី២២ ឈានចូលដល់ថ្ងៃទី២៣ ខែមិថុនា នេះ ដោយក្រុមសង្គ្រោះបានរកឃើញមនុស្ស ៣នាក់ទៀត ដែលក្នុងនោះ២នាក់បានស្លាប់ ហើយក្មេងស្រី១នាក់ នៅរស់រានមានជីវិត ឈ្មោះ អ៊ុន ណេង អាយុ១៦ឆ្នាំ ជាអ្នកស្រុកសំបូរ ខេត្តក្រចះ ហើយត្រូវបានទៅសង្គ្រោះនៅមន្ទីរពេទ្យខេត្ត។

គិតត្រឹមម៉ោង ១ រំលងអាធ្រាត្រ ឈនចូលថ្ងៃទី ២៣ ខែមិថុនា នេះ ក្រុមសង្គ្រោះបានរកឃើញ អ្នក ស្លាប់ចំនួន ១៧នាក់ ក្នុងនោះមានប្រុស១២នាក់ ស្រី៥នាក់។ ចំណែកជនរងរបួសកើនដល់ ២៤នាក់ ក្នុងនោះមានប្រុស២២នាក់ និងស្រី២នាក់ ។

រហូតមកទល់វេលាទៀបភ្លឺថ្ងៃទ២៣ មិថុនា នេះ កម្លាំងសង្គ្រោះបានធ្វើការស្វះស្វែងរកជនរងគ្រោះបន្តទៀត ទោះបីនៅតំបន់នោះមានភ្លៀងធ្លាក់ បង្កការលំបាកបែបណាក៏ដោយ។

តាមលិខិតប្រកាសពត៌មានរបស់រដ្ឋបាលខេត្តព្រះសីហនុបានបញ្ជាក់ថា ម្ចាស់ការដ្ឋានមានឈ្មោះ CHEN KHUN ភេទប្រុសអាយុ៣៩ឆ្នាំ បានជួលដីសម្រាប់សាងសង់ពីឈ្មោះ ញឹក ហ៊ុយ ភេទប្រុសអាយុ ៦៥ឆ្នាំជន ជាតិខ្មែរ ដែលម៉ៅការសាងសង់ដោយក្រុមហ៊ុន ឈ្មោះ XI GANG TANG GONG YOU JI HAISAO មានថៅកែម៉ៅការសាងសង់ ឈ្មោះ DENG XING GUI ភេទប្រុសអាយុ៤៨ឆ្នាំ និងអ្នកម៉ៅការបូកជញ្ជាំងអគារ ឈ្មោះ AGO YU ភេទប្រុស អាយុ២៩ឆ្នាំ អ្នកទាំង៤ ជាជនជាតិចិន បច្ចុប្បន្នត្រូវបានសមត្ដកិច្ចនាំខ្លួនទៅស្នងការដ្ឋាននគរបាលខេត្ត ដើម្បីសួរនាំលម្អិតពីករណី នេះ ហើយដែរ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសតាមរយៈ Facebook ផេក ផ្លូវការ ថា៖ «បងប្អូនជនរួមជាតិជាទីគោរពស្រឡាញ់។ សោដនាដកម្មបាក់អគារនៅខេត្ត ព្រះសីហនុ គឺ ជារឿងឈឺចាប់របស់ជាតិយើង ពិសេសក្រុមគ្រួសារនៃអ្នកដែលបានបាត់បង់ជិវិតដែលជាភរិយា ឬ ស្វាមី ឬកូន ឬឪពុកម្តាយ។ល។ ដើម្បីចូលរួមមរណទុក្ខ និងជួយដល់ជីវភាពក្រុមគ្រួសារក្នុងនាម រាជរដ្ឋាភិបាលខ្ញុំសម្រេចបញ្ចេញថវិការជាតិជួយដល់ក្រុមគ្រួសារ អ្នកស្លាប់ក្នុងមួយនាក់ ៤០លាន រៀល (សែសិបលានរៀល) ឬ១ម៉ឺនដុល្លា (10.000$)។ សម្រាប់អ្នកត្រូវរបួសទាំងអស់ ត្រូវទទួល បានការព្យាបាលដោយឥតគិតថ្លៃ នៅតាមមន្ទីរពេទ្យរដ្ឋ និងទទួលបានជំនួយក្នុងមួយនាក់ចំនួន ៥ លានរៀល (ប្រាំលានរៀល)»។

ជាមគ្នានេះ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ក៏បានបញ្ជាក់ថា «ឯកឧត្តម ប៊ិន ឈិន ឧបនាយរដ្ឋមន្ត្រីប្រចាំការ និងជារដ្ឋមន្រ្តីទីស្តីការគណៈរដ្ឋមន្ត្រីទទួលចាត់ចែង ថវិការនេះ ជូនបងប្អូន។ សម្តេចតេជោ បានបញ្ជាក់ថា «យប់នេះខ្ញុំនៅបន្តតាមដានការងាររុករក និងសង្រ្គោះ ជាមួយបងប្អូនតទៅទៀត»៕ĵ