ភ្នំពេញ ៖ នាពីព្រឹកមិញនេះ សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ក៏ដូចជា បណ្តាប្រមុខរដ្ឋ ប្រមុខរដ្ឋា ភិបាលនៃប្រទេសអាស៊ានដទៃទៀត បានយាង និងអញ្ជើញទៅដល់រាជ ធានីបាងកក ព្រះរាជាណាចក្រថៃ ហើយ ដើម្បីចូលរួមកិច្ចប្រជុំកំពូលអាស៊ាន លើក ទី៣៤ និងកិច្ច ប្រជុំពាក់ព័ន្ធ ដែលគ្រោង ធ្វើឡើងនៅល្ងាចថ្ងៃទី២២ និងព្រឹកថ្ងៃទី ២៣ មិថុនា ឆ្នាំ២០១៩ នេះ។

វត្តមាននៃបណ្តាមេដឹកនាំអាស៊ាន អញ្ជើញទៅកាន់រាជធានីបាងកកនៅពេលនេះ គឺ ឆ្លើយតបតាម ការអញ្ជើញពីឯកឧត្តមសេនីយ៍ ប្រាយុទ្ធ ចាន់អូចា នាយករដ្ឋមន្រ្តីថៃ និងក្នុង នាមជាប្រធានអាស៊ាន ឆ្នាំ២០១៩។
សូមជម្រាបថា ទន្ទឹមគ្នានៃកិច្ចប្រជុំកំពូលអាស៊ានលើកទី៣៤ នេះដែរ សម្តេចតេជោនាយករដ្ឋមន្ត្រី ហ៊ុន សែន ក៏នឹងអញ្ជើញ ចូលរួមកិច្ចប្រជុំ និងកម្មវិធីមួយចំនួន ដូចខាងក្រោម ៖

* កិច្ចប្រជុំកំពូលរវាងប្រមុខរដ្ឋ/រដ្ឋាភិបាលអាស៊ាន ជាមួយតំណាងអន្តរសភាអាស៊ាន
* កិច្ចប្រជុំកំពូលរវាងប្រមុខរដ្ឋ/រដ្ឋាភិបាលអាស៊ាន ជាមួយក្រុមប្រឹក្សាផ្តល់យោបល់ធុរកិច្ចអាស៊ាន និង កិច្ចប្រជុំកំពូលរវាងប្រមុខរដ្ឋ/រដ្ឋាភិបាលអាស៊ាន ជាមួយតំណាងយុវជនអាស៊ាន។

យោងតាមសេចក្តីជូនព័ត៌មានរបស់ក្រសួងការបរទេស បានឱ្យដឹងថា កិច្ចប្រជុំកំពូលអាស៊ានលើក ទី៣៤ ធ្វើឡើងក្រោមមូលបទ «ជំរុញភាពជាដៃគូសម្រាប់ចីរភាព»។ កិច្ចប្រជុំនេះនឹងផ្តោតការ យក ចិត្តទុកដាក់ ដល់ការលើកកម្ពស់កិច្ចសហប្រតិបត្តិការ និងពង្រឹងកុងសង់ស៊ុស ក្នុងចំណោមសមា ជិក អាស៊ាន ដើម្បីដោះស្រាយការប្រឈមសកលថ្មីៗ។

សេចក្តីប្រកាសព័ត៌មានដដែល បានបញ្ជាក់ដោយរំពឹងទុកថា លទ្ធផលនៃកិច្ចប្រជុំកំពូល អាស៊ាន លើកទី៣៤ នឹងឆ្លុះបញ្ចាំងពីកិច្ចប្រឹងប្រែង របស់អាស៊ានក្នុងការជំរុញ ដំណើរការកសាងសហគមន៍ និងលើកកម្ពស់ភាពជាដៃគូ របស់អាស៊ានសម្រាប់ការអភិវឌ្ឍ ប្រកបដោយចីរភាព នៅក្នុងចំណោម បញ្ហាផ្សេងៗទៀត ដើម្បីសម្រេចឲ្យបាននូវសន្តិភាព ស្ថិរភាព និងវិបុលភាព យូរអង្វែង ក្នុងតំបន់ និងដើម្បីជាផលប្រយោជន៍ដល់ប្រជាជនអាស៊ានទាំងមូល៕

ដោយ ៖ សហការី

ព្រះសីហនុ ៖ បន្ទាប់ពីទិដ្ឋភាពនៃការបាក់អគារដែលកំពុងសាងសង់ថ្មីអស់រយៈពេលប្រមាណ៤ម៉ោងក្រោយមក សមត្ថកិច្ចជំនាញបានស្រាវជ្រាវ និងរុករកឃើញជនរងគ្រោះចំនួន ៣នាក់បានស្លាប់ និង១០នាក់ទៀតបានរងរបួស ហើយកំពុងបន្តការរុករកបន្ថែមទៀតដោយប្រើប្រាស់គ្រឿងចក្រ និងឧបករណ៍ជំនួយសម្រាប់ភ្នាក់ងារសង្គ្រោះផងដែរ។

សូមជម្រាបថាសំណង់អគារថ្មីកម្ពស់ ៧ជាន់របស់ក្រមហ៊ុនចិន មួយកន្លែងនេះ បានបាក់ស្រុតរលំរាបដល់ដី បង្កឲ្យភ្ញាក់ផ្អើលកាលពីវេលាម៉ោង ៥ព្រឹក ថ្ងៃទី២២ ខែមិថុនា ឆ្នាំ២០១៩ នៅសង្កាត់លេខ៤ ក្រុងព្រះសីហនុ ខេត្តព្រះសីហនុ ដែលភ្លាមៗនោះ របាយការណ៍ពីអ្នកស្លាប់ និងរបួសមិនទាន់ទទួលបាននៅឡើយ។

ឧបទ្ទវហេតុនៃការបាក់រលំអគារកំពុងសាងសង់ខាងលើ ភ្លាមៗកម្លាំងសមត្ថកិច្ច ក្រុងសង្គ្រោះ ក្រោមការដឹកនាំបញ្ជាផ្ទាល់ពីលោក យន់ មីន អភិបាលខេត្តព្រះសីហនុ ដោយបានបញ្ជូនគ្រឿងចក្រ រថយន្តសង្គ្រោះ និងឧបករណ៍ជំនួយសម្រាប់សង្គ្រើផងដែរ ដើម្បីរុករក និងសង្គ្រោះជីវិតមនុស្ស ដែលសង្ស័យថា នៅមានជនរងគ្រោះមួយចំនួនទៀតស្ថិតនៅក្រោមគំនរថ្មបាក់បែកនៅឡើយ។

តាមប្រភពពីអាជ្ញាធរ បានឲ្យដឹងជាបឋមថា យ៉ាងហោចណាស់មានមនុស្ស៣នាក់ ស្លាប់នៅក្នងគំនរបាក់បែក និងជនរងគ្រោះជាង១០នាក់ទៀត ត្រូវបានបញ្ជូនទៅសង្គ្រោះនៅមន្ទីរពេទ្យ ក៏ប៉ុន្តែតួរលេខជាក់លាក់ នៃចំនួនអ្នកស្លាប់ និងរបួសយ៉ាងណានោះ រង់ចាំសមត្ថកិច្ចច្រើនស្ថាប័ន អង្គភាពជំនាញ អង្គភាពសង្គ្រោះ៧១១ សហការរុករក គ្រឿងចក្រកំពុងកកាយ គំនរបាក់បែក ដើម្បីស្វែងរកជនរងគ្រោះនៅឡើយ ។

ដោយឡែកនៅក្រោយពីកើតមានករណីខាងលើ សមត្ថកិច្ចបានឃាត់នាំខ្លួន មេការ គ្រប់គ្រងសំណង់ខាងលើទៅសាកសួរ ៕

ដោយ ៖ សុផល
កំពង់ចាម : អគ្គិភ័យបានឆាប់ឆេះផ្ទះប្រជាពលរដ្ឋអស់មួយខ្នងបង្កអោយមានការផ្ងាក់ផ្អេីលដល់ប្រជាពលរដ្ឋរួមទាំងសមត្ថកិច្ចចេញជួយជួយអន្តរាគមន៍ តែសង្គ្រោះសភាពការណ៍បានឡើយ ។ កាលពីវេលាម៉ោង ១៣និង០៣នាទី ថ្ងៃទី២១ មិថុនា ២០១៩ ស្ថិតក្នុងភូមិទី២ សង្កាត់វាលវង់ ក្រុងកំពង់ចាម ខេត្តកំពង់ចាម ។

ក្នុងនេះបណ្ដាលអោយខូចខាតផ្ទះចំនួន ០១ខ្នង របស់ឈ្មោះ ហ៊ូ ហួយ ភេទស្រី អាយុ៦៣ឆ្នាំ មុខរបរលក់ដូរ ស្ថានភាព ផ្ទះឈើលើថ្មខាងក្រោម មាន៤បន្ទប់ ទំហំ ៧មx២២ម បណ្ដាលអោយខូចខាតផ្ទះទាំងស្រុង ។

បេីតាមលោកឧត្តមសេនីយ៍ទោ ឯម កុសល ស្នងការបានបញ្ជាអោយកម្លាំងនគរបាល បង្ការពន្លត់អគ្គីភ័យនិងសង្គ្រោះនៃស្នងការនគរបាលខេត្តដឹកនាំដោយលោកស្នងការរងទទួលផែន សហការជាមួយកម្លាំងអធិការដ្ឋាននគរបាលក្រុងនិងប៉ុស្តិ៍រដ្ឋបាលវាលវង់ព្រមទាំងប្រជាការពារ និងប្រជាពលរដ្ឋ សហការជួយពន្លត់ទប់ស្កាត់មិនអោយរីករាលដាលបន្តទៀត ។

បើតាមសម្តីម្ចាស់ផ្ទះបានដឹងថា ពេលនោះគាត់នៅផ្ទះម្នាក់ឯង ពេលគាត់កំពុងអង្គុយមើលក្មួយ អាយុ០៨ខែ បានឃើញអណ្ដាតភ្លើងបានឆាប់ឆេះ ពីខាងលើផ្ទះ នៅផ្នែកខាងក្រោយ ជាកន្លែងដាក់ខោអាវ ហើយគាត់បានស្រែកអោយអ្នកជិតខាងជួយ រួចភ្លើងបានជ្រុះធ្លាក់មកលើធុងហ្គាស បណ្ដាលអោយផ្ទុះឆេះខ្លាំងតែម្ដង ហើយគាត់ក៏មិនដឹងថាមូលហេតុអ្វីដែលបណ្ដាលអោយឆេះនោះទេ។

ទ្រព្យសម្បត្តិដែលបាត់បង់រួមមានផ្ទះ០១ខ្នង មាន០៤បន្ទប់ ទូឈើចំនួន០៥ សាឡុងអង្គុយចំនួន ០៦ កុំព្យូទ័រចំនួន ០១គ្រឿង តុឈើប្រវែង ១ម x ២,៥០សម ចំនួន០១ ទូរទស្សន៍ចំនួន ០៤គ្រឿងប្រាក់ដុល្លាចំនួន ៧០០ដុល្លា និងសំភារៈ មួយចំនួន ។

ក្រោយកេីតហេតុសមត្ថកិច្ចយើងបានពន្លត់រលត់អស់១០០% មិនបណ្ដាលអោយប៉ះពាល់ដល់មនុស្ស និងផ្ទះប្រជាពលរដ្ឋបន្តទៀតទេ ដោយប្រើប្រាស់រថយន្តអគី្គភ័យចំនួន០៤គ្រឿងក្នុងនោះរថយន្តពន្លត់អគ្គីភ័យស្នងការនគរបាលខេត្តចំនួន០៣គ្រឿង រថយន្តពន្លត់អគ្គីភ័យស្រុកកំពង់សៀម ចំនួន០១គ្រឿង ប្រើប្រាស់ទឹកចំនួន ១២រថយន្ត៕

ដោយ ៖ ន.រ.

ព្រះសីនុ ៖ សំណង់អគារមួយកន្លែង កម្ពស់៧ជាន់ ស្ថិតនៅក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ ត្រូវបានរលំបាក់ស្រុតបណ្តាលឲ្យរងរបួសមនុស្សជាច្រើននាក់ ហើយមួយចំនួនកំពុងជាប់ក្នុងនោះ ដែលតាមការឲ្យដឹង គឺជាកម្មករ។ ហេតុការណ៍នេះ បង្កឲ្យភ្ញាក់ផ្អើល កាលពីវេលាម៉ោង៥ព្រឹក ថ្ងៃទី២២ ខែមិថុនា ឆ្នាំ២០១៩ ។

ក្នុងនោះកន្លែងលាងរថយន្តអរុណរះតាមផ្លូវ៧មករាក៏ទទួលរងផលប៉ះពាល់និងរងការខូចខាតរថយន្តនិងទ្រព្យសម្បត្តិមួយចំនួនពីការបាក់រលំអាគារនេះដែរ ។សេចក្តីរាយការណ៏បឋមពីកន្លែងកើតហេតុមកថា មានមនុស្សមួយចំនួនជាប់ក្នុងគំនរអាគាររំបាក់នេះ ប៉ុន្តែភ្លាមៗមិនទាន់ដឹងពីចំនួនពិតប្រាកដឬមានអ្នកស្លាប់និងរបួសប៉ុន្មាននាក់ឡើយ ។

តាមប្រជាពលរដ្ឋ ក្បែងកន្លែងកើតហេតុបានឲ្យដឹងថា មិនដឹងថា បញ្ហាបច្ចេកទេសនៃសំណង់ ឬក៏យ៉ាងណានោះទេ ស្រាប់តែនៅវេលាម៉ោងខាងលើ សំណង់អគារកំពស់ ៧ជាន់នោះ រលំស្រុតតែម្តង ។

ខណៈពេលនេះ កម្លាំងសមត្ថកិច្ច កំពុងរកវិធីសាស្ត្រ ដើម្បីរុករក សង្គ្រោះជនរងគ្រោះនៅឡើយ៕

ដោយ ៖ ​សហការី

ខេត្តព្រះសីហនុ ៖ ព្រឹកថ្ងៃទី២១ ខែមិថុនា ឆ្នាំ២០១៩ ថ្មីៗនេះ ឯកឧត្តមនាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ និង ឯកឧត្តមឈិន សេងងួន អភិបាលរងខេត្តព្រះសីហនុ បានអញ្ជើញជាអធិបតី ក្នុងពិធីប្រកាសផ្ទេរភារកិច្ចតែងតាំងមុខតំណែងនិងបំពាក់ឋានន្តរសក្តិ ជូនមន្ត្រីនគរបាលជាតិ នៃស្នងការដ្ឋាននគរបាលខេត្តព្រះសីហនុ ចំនួន២១នាក់ ។

ក្នុងពិធីបដិសណ្ឋារៈកិច្ចគណៈប្រតិភូ លោកឧត្តមសេនីយ៍ត្រីជិន វិទ្យាស្នងការស្តីទី បានឡើងធ្វើរបាយការណ៍ស្វាគមន៍ រាយការណ៍ ជូនគណៈអធិបតី អំពីសភាពការណ៍ សន្តិសុខសណ្តាប់ធ្នាប់សាធារណៈក្នុងខេត្តព្រះសីហនុ ក្នុងរយៈពេល៦ខែដើមឆ្នាំ២០១៩ កន្លងមក។

យោងតាមប្រកាស របស់ក្រសួងមហាផ្ទៃ ត្រូវបានផ្ទេរភារកិច្ចតែងតាំងមុខតំណែង តម្លើងឋានន្តរស័ក្តិ ជូនមន្រ្តីនគរបាលជាតិ នៃ ស្នងការដ្ឋាននគរបាលខេត្តព្រះសីហនុ ចំនួន២១នាក់ ៖ ក្នុងនោះមានផ្ទេរសម្រួលភារកិច្ច៤នាក់ (ថ្នាក់ស្នងការរង១នាក់) តែងតាំងមុខតំណែង១៣ នាក់ (ថ្នាក់ស្នងការរង២នាក់) បំពាក់ឋានន្តរស័ក្តិ ចំនួន៨នាក់ ថ្នាក់វរសេនីយ៍ទោ ៤ នាក់ និង ថ្នាក់វរសេនីយ៍ត្រី៤នាក់។

ស្នងការរងដែលត្រូវបានសម្រួលភារកិច្ច មាន ៣រូប ៖
១,លោកឧត្តមសេនីយ៍ត្រីស៊ុន សុផាត ស្នងការរងទទួលការងារប្រឆាំងបទល្មើសសេដ្ឋកិច្ច។
២,លោកវរសេនីយ៍ទោសួស សីលា ស្នងការរង ទទួលការងារប្រឆាំងគ្រឿងញៀន។

៣,លោកវរសេនីយ៍ឯកពីង ពៅ ពីនាយការិយាល័យប្រឆាំងបទល្មើសសេដ្ឋកិច្ចខេត្តកំពង់ស្ពឺ ជាស្នងការរងនគរបាលខេត្តព្រះសីហនុ។

​លោក ឈិន សេងងួន អភិបាលរងខេត្តព្រះសីហនុ និង ឯកឧត្តមនាយឧត្តមសេនីយ៍ប៉ែន វិបុល អគ្គស្នងការរងនគរបាលជាតិ បានមានប្រសាសន៍កោតសរសើរចំពោះកងកម្លាំងនគរបាលខេត្ត ព្រះសីហនុ ដែលបានខិតខំប្រឹងប្រែងបំពេញការងារ ថែរក្សាសន្តិសុខ សណ្តាប់ធ្នាប់សាធារណៈក្នុងខេត្តព្រះសីហនុ ជូនប្រជាពលរដ្ឋ ភ្ញៀវទេសចរណ៍ជាតិ អន្តរជាតិ និង អ្នកវិនិយោគបរទេស បានល្អប្រសើរ។

លោក ប៉ែន វិបុល បានលើកឡើង អំពីការវិវឌ្ឍន៍រីកចម្រើននៃ វិស័យព័ត៌មានវិជ្ជា ដូចនេះសូមឲ្យបងប្អូនយើងទាំងអស់ត្រូវតាមដានព័ត៌មានឲ្យបានទាន់ពេលវេលា៕

ព្រះវិហារ ៖ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ នៅព្រឹកថ្ងៃទី២១ ខែមិថុនា ឆ្នាំ២០១៩ នេះ បានអញ្ជើញជាអធិបតីក្នុងពិធីប្រកាសចូលកាន់តំណែងប្រធានសាលាដំបូងខេត្តព្រះវិហារថ្មី ដោយលោក អៀង គឹមថុល អតីតប្រធានសាលាដំបូងខេត្តស្ទឹងត្រែង ត្រូវបានតែងតាំងជំនួស លោក ទៀង សុថា ត្រូវផ្ទេរតំណែងទៅកាន់ជាប្រធានសាលាដំបូងខេត្តមណ្ឌលគិរីវិញ។

ពិធីប្រកាសចូលកាន់តំណែងថ្មីនេះ ក៏មានការចូលរួមពីលោក អ៊ុន ចាន់ដា អភិបាលខេត្តព្រះវិហារ ព្រមទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងអាជ្ញាធរក្រុង ស្រុកទាំង៨ផងដែរ។

លោក អង្គ វង្សវឌ្ឍានា បានចាត់ទុកថា ការប្រកាសផ្ទេរ និងចូលកាន់មុខតំណែង ប្រធានសាលា ដំបូង ខេត្តព្រះវិហារថ្មីនៅពេលនេះ មិនមែនជារឿងចម្លែកនោះទេ ព្រោះឲ្យតែដល់ពេលវេលា ដែល បានចែង ចំពោះអាណត្តិនៃការកាន់តំណែងប្រធានសាលាដំបូងរាជធានី ខេត្តនីមួយៗ គឺត្រូវតែដូរហើយ។

រដ្ឋមន្ត្រីក្រសួងយុត្តិធម៌ ក៏បានណែនាំឲ្យប្រធានសាលាដំបូងខេត្តព្រះវិហារថ្មី ត្រូវសហការជាមួយ អាជ្ញាធរដែនដី និងសមត្ថកិច្ចពាក់ព័ន្ធអនុវត្តន៍ តួនាទី ភារកិច្ចឱ្យមានប្រសិទ្ធិភាពខ្ពស់ផងដែរ៕

​ដោយ ៖ សហការី

ភ្នំពេញ ៖ នៅព្រឹកថ្ងៃទី២១ ខែមិថុនា ឆ្នាំ២០១៩ លោកឧបនាយករដ្ឋមន្រ្តី ប្រាក់ សុខុន បានដឹកនាំគណៈប្រតិភូ អញ្ជើញទៅចូលរួមកិច្ចប្រជុំកំពូលអាស៊ានលើកទី៣៤ ដែលនឹងប្រព្រឹត្តទៅពីថ្ងៃទី២២-២៣ ខែមិថុនា ឆ្នាំ២០១៩ នៅទីក្រុងបាងកក ប្រទេសថៃ។

លោកឧបនាយករដ្ឋមន្រ្តី នឹងត្រូវអញ្ជើញចូលរួមកិច្ចប្រជុំរដ្ឋមន្រ្តីការបរទេសអាស៊ាន កិច្ចប្រជុំលើកទី១៩ របស់ក្រុមប្រឹក្សាសហគមន៍នយោបាយ-សន្តិសុខអាស៊ាន និងកិច្ចប្រជុំលើកទី២៣របស់ក្រុមប្រឹក្សាសម្របសម្រួលអាស៊ាន ដែលកិច្ចប្រជុំនេះនឹងត្រៀមរៀបចំឯកសារនានាសម្រាប់ដាក់ជូនប្រមុខរដ្ឋ/រដ្ឋាភិបាលអាស៊ានសម្រេចនៅក្នុងកិច្ចប្រជុំកំពូលអាស៊ានលើកទី៣៤៕

​ដោយ ៖ សហការី

ភ្នំពេញ ៖ អង្គភាពអ្នកនាំពាក្យរាជរដ្ឋាភិបាល ដែលទើបត្រូវបានរាជរដ្ឋាភិបាលបង្កើតកាលពីសប្តាហ៏មុននេះ បានបើកកិច្ចប្រជុំជាលើកដំបូង ដើម្បីពិភាក្សាយន្តការនានាក្នុងការផ្សារភ្ជាប់រវាងអ្នកនាំពាក្យ ជាមួយនឹងអ្នកកាសែត។ បើតាម លោក ផៃ ស៊ីផាន អង្គភាពអ្នកនាំពាក្យរាជរដ្ឋាភិបាល កំណត់ធ្វើសន្និសីទកាសែត នៅរៀងរាល់មួយសប្តាហ៏ម្តងជាទៀងទាត់ ដើម្បីផ្តល់ព័ត៌មានទៅលើប្រធានដែលក្តៅបំផុត សម្រាប់សង្គម និងអ្នកសារព័ត៌មាន។

រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការនាំពាក្យរាជរដ្ឋាភិបាល និងជាប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន បានបញ្ជាក់ប្រាប់អ្នក កាសែតថា អង្គភាពសម្រេចជាគោលការណ៏ថា នឹងរៀបចំសន្និសីទកាសែតជា ទៀងទាត់រៀងរាល់មួយសប្តាហ៏ម្តង និងរៀបចំជំនួបអ្នកនាំពាក្យ និងអ្នកកា សែតឲ្យបាន១ខែម្តង ដើម្បីផ្តល់ព័ត៌មានដល់អ្នកកាសែត និងផ្តល់ឱកាសឲ្យអ្នកកាសែតបានសួរសំណួរទៅលើប្រធានបទនានានៅតាមក្រសួង ស្ថាប័ននីមួយ។

ការបញ្ជាក់នេះ ធ្វើឡើងនៅក្នុងសម័យប្រជុំលើកដំបូងរបស់អង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី២០ មិថុនា នៅទីស្តីការគណៈរដ្ឋមន្ត្រី។ បើតាមប្រធានអង្គភាពអ្នកនាំពាក្យរាជរដ្ឋាភិបាល នឹងផ្តើមអនុវត្តយន្តការមួយ នៅខែកក្កដាខាងមុខ ដោយប្រមូលមតិ និងការចង់បានរបស់អ្នកកាសែត ទៅលើប្រធានបទជាក់លាក់ អ្នកកាសែតចង់ដឹង និងផ្តល់ព័ត៌មានទៅសាធារណៈជន។

លោក ផៃ ស៊ីផាន បានបញ្ជាក់ដែរថា អង្គភាពអ្នកនាំពាក្យរាជរដ្ឋាភិបាលនេះ គឺជាយន្តការមួយសម្រាប់ពង្រឹងសមត្ថភាពឆ្លើយឆ្លងរបស់អ្នកនាំពាក្យ ជាមួយ នឹងអ្នកសារព័ត៌មាន និងធ្វើយ៉ាងណាឲ្យព័ត៌មានដែលផ្តល់ដោយក្រសួងនីមួ យទៅដល់អ្នកសារព័ត៌មាន និងបន្តផ្តល់ជូនទៅដល់ប្រជាពលរដ្ឋទូទៅ។ អង្គ ភាពមួយនេះ ក៏ទទួលផងដែរ នូវលិខិតរបស់អ្នកកាសែត ចំពោះក្រសួង ស្ថាប័ននានាដែលមិនបានផ្តល់ព័ត៌មាន មិនឆ្លើយឆ្លងជាមួយអ្នកព័ត៌មានទៅលើប្រធានបទអ្វីមួយ រឺលំបាកក្នុងការទាក់ទងសុំព័ត៌មានពីក្រសួង ស្ថាប័នទាំងនោះ។

គួរបញ្ជាក់ថាកាលពីថ្ងៃទី១០ ខែមិថុនាកន្លងទៅ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចតែងតាំងសមាសភាពអង្គភាពអ្នកនាំពាក្យ រាជរដ្ឋាភិបាល ចំនួន៣០រូប ដែលជាមន្ត្រីនៅគ្រប់ក្រសួងទាំងអស់នៅកម្ពុជា។ នៅក្នុងសេចក្តីសម្រេចបានតែងតាំង លោក ផៃ ស៊ីផាន ជាប្រធានអង្គភាពអ្នកនាំពាក្យរាជរដ្ឋាភិបាល លោក ឯក ថា ជាអនុប្រធានប្រចាំការ អមដោយអនុប្រធានបីរូបមាន លោកនាយឧត្តមសេនីយ៏ ខៀវ សុភ័គ ដែលជាអ្នកនាំពាក្យ ក្រសួងមហាផ្ទៃ លោក ឈុំ សុជាតិ អ្នកនាំពាក្យក្រសួងការពារជាតិ និង លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ រួមនិងសមាជិកជាអ្នកនាំពាក្យគ្រប់ក្រសួងចំនួន២៥រូប ផ្សេងទៀតជាសមាជិក៕

ដោយ៖ សុត្ថារ៉ា

ភ្នំពេញ ៖ កម្ពុជា ជាប្រទេសស្ថិត នៅក្នុងចំណោមប្រទេសដែលប្រឈមហានិភ័យគ្រោះមហន្តរាយខ្ពស់ ដោយឈរនៅលំដាប់ទី៤ នៅ ទ្វីបអាស៊ី និងទី១២ នៅទូទាំងពិភពលោក។ យោងតាមរបាយការណ៍ហានិភ័យពិភពលោកឆ្នាំ២០១៨។

តាមការលើកឡើងរបស់លោកស្រី ហ៊ុន បូរមី នាយិកាប្រចាំប្រទេសនៃអង្គការអាក់សិនអេតកម្ពុជា ក្នុងសិក្ខាសាលាអន្តរវិស័យថ្នាក់ជាតិស្តីពីការ លើកកម្ពស់សុវត្ថិភាពស្ត្រី និងការបញ្ជ្រាបយេនឌ័រនៅក្នុងការកាត់បន្ថយហានិភ័យគ្រោះមហន្តរាយ និងការបន្សាំទៅនឹងការប្រែប្រួលអាកាសធាតុ ដែលរៀបចំឡើងដោយគណៈកម្មាធិការជាតិគ្រងគ្រង គ្រោះមហន្តរាយ នាព្រឹកថ្ងៃទី២០ មិថុនានេះ។

លោកស្រី ហ៊ុន បូរមី បានគូសបញ្ជាក់ថា ទឹកជំនន់ គ្រោះរាំងស្ងួត និងខ្យល់ព្យុះ ជាគ្រោះមហន្តរាយចម្បងនៅកម្ពុជា ដែលគ្រោះមហន្តរាយទាំងនេះបានធ្វើឱ្យប៉ះពាល់ទៅលើជីវភាពរស់នៅ និង ស្ថានភាពសេដ្ឋកិច្ចរបស់សហគមន៍ ជាពិសេសចំពោះស្ត្រី និងកុមារ។ លោកស្រីថា យោងតាមការ សិក្សារបស់វិទ្យាស្ថានសេដ្ឋកិច្ចទីក្រុងឡុងដ៏ ចក្រភពអង់គ្លេស បានរកឃើញថា ស្ត្រី និងកុមារងាយ រងគ្រោះពីការប្រែប្រួលអាកាសធាតុធ្ងន់ធ្ងរជាងបុរសដល់ទៅ ១៤ដង ក្រោមកត្តាអវិជ្ជមានមួយចំនួន រួមមាន គំនាបសង្គម ភាពក្រីក្រ ការពុំបានទទួលព័ត៍មានគ្រប់គ្រាន់ និងការអប់រំសម្រាប់ស្ត្រីនៅមាន កម្រិតជាដើម។

នាយិកាប្រចាំប្រទេសនៃអង្គការអាក់សិនអេតកម្ពុជា លោកស្រី ហ៊ុន បូរមី បានកត់ សម្គាល់ពីសារៈសំខាន់ ដែលរាជរដ្ឋាភិបាលកម្ពុជាបានព្យាយាមឆ្លើយតបទៅនឹងការគម្រាមកំហែងនេះ តាមរយៈការបញ្ជ្រាបយេនឌ័រទៅក្នុងផែនការយុទ្ធសាស្ត្រជាតិ គោលនយោបាយ និងកម្មវិធីអភិវឌ្ឍន៍ ផ្សេងទៀត។

លោកបណ្ឌិត ញឹម វណ្ណដា ទេសរដ្ឋមន្ត្រី អនុប្រធានប្រចាំការគណៈកម្មាធិការជាតិគ្រប់គ្រង គ្រោះមហន្តរាយមានប្រសាសន៍ថា ជាការពិតស្ត្រី និងកុមារ តែងតែជាអ្នកទទួលរងគ្រោះធ្ងន់ធ្ងរជាង បុរសពីគ្រោះមហន្តរាយដែលបង្កឡើងដោយធម្មជាតិ និងដោយមនុស្ស។ ឯកឧត្តមថា កម្ពុជាធ្លាប់ ទទួលរងគ្រោះដោយសារគ្រោះធម្មជាតិធ្ងន់ធ្ងរបំផុតកាលពីឆ្នាំ១៩៧៨ ហើយក៏ជាឆ្នាំដែលពលរដ្ឋ កម្ពុជាកំពុងរងគ្រោះមហន្តរាយដែលបង្កឡើងដោយមនុស្សផងដែរ នោះគឺការកាប់សម្លាប់មកលើពល រដ្ឋខ្មែរស្លូតត្រង់ដោយបនប្រល័យពូជសាសន៍ ប៉ុល ពត ដែលជាអ្នកទទួលខុសត្រូវចំពោះការកាប់ សម្លាប់ដ៏យង់ឃ្នងមកលើពូជសាសន៍ឯងប្រហែល ៣លាននាក់ ក្នុងអំឡុងពេលដែលពួកគេកាន់កាប់ ប្រទេសកម្ពុជាទាំងស្រុងពីឆ្នាំ១៩៧៥ ដល់ឆ្នាំ១៩៧៩ ដោយក្នុងគ្រានោះមានស្ត្រី និងកុមារបានស្លាប់ ច្រើនជាងគេ។

លោកបណ្ឌិតទេសរដ្ឋមន្ត្រី ញឹម វណ្ណដា បានបន្តថា ជាការពិត រាជរដ្ឋាភិបាលកម្ពុជាតែង បានយកចិត្តទុកដាក់ខ្ពស់ទៅលើស្ត្រី តាមរយៈការគិតគូអំពីបញ្ហាយេនឌ័រ ដែលជាការឱ្យតម្លៃស្មើគ្នា រវាងបុរស និងស្ត្រី ដោយយើងបានផ្តល់ឱកាសដល់ស្ត្រីក្នុងការកសាងសមត្ថភាពស្ត្រី ការផ្តល់តួនាទី ដល់ស្ត្រីជាដើម ដើម្បីឱ្យពួកគាត់បានចូលរួមក្នុងគ្រប់កិច្ចការរបស់សង្គម ដោយបានបិទបញ្ចប់នូវពាក្យ ថា ស្ត្រីវិលចង្ក្រានមិនជុំ៕