ភ្នំពេញ ៖ មជ្ឈមណ្ឌលសូត្រខ្មែរ ដំបូងបង្អស់ នៃសាកលវិទ្យាល័យភូមិន្ទភ្នំពេញ ត្រូវបានសម្ពោធដាក់ឲ្យប្រើប្រាស់ជាផ្លូវការ នាថ្ងៃពុធទី៥ ខែមិថុនា ឆ្នាំ២០១៩ នេះ ក្រោមវត្តមាន លោកបណ្ឌិត សភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំយុវជននិងកីឡា និង លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតនៃប្រទេសជប៉ុនប្រចាំនៅកម្ពុជា។

មជ្ឈមណ្ឌលសូត្រខ្មែរដំបូងបង្អស់នេះ ត្រូវបានសាងសង់ឡើងក្រោមជំនួយឥតសំណង របស់ ប្រជាជន និងរដ្ឋាភិបាលជប៉ុន ដែលគិតជាទឹកប្រាក់ចំនួន ៩០.៨៤៣ ដុល្លារអាមេរិក ហើយ ក៏មានការជួយឧបត្ថម្ភជាសម្ភារៈបរិក្ខា និងសម្ភារៈស្រាវជ្រាវ មួយចំនួនពី អង្គការ យូអិនឌីភី ដែលគិតជាថវិកាចំនួន ១៦.៣០០ ដុល្លារផងដែរ។

លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំនៅកម្ពុជា បានមានប្រសាសន៍ឱ្យដឹងថា ការផ្តល់ជូននូវជំនួយអភិវឌ្ឍន៍ផ្លូវការ ដល់សកលវិទ្យាល័យភូមិន្ទភ្នំពេញនេះ ដើម្បីផលិតពងដង្កូវនាង ដែលគ្មានជំងឺ សម្រាប់ផ្គត់ផ្គង់ទៅដល់កសិករ ព្រមទាំងផ្ទេរបច្ចេកទេសទៅដល់កសិករ ដើម្បីពួកគាត់អាចចិញ្ចឹមដង្កូវនាង ប្រកបដោយ ស្ថេរភាពនឹងអាចបង្កើតប្រាក់ចំណួលទាំងកសិករនិងភាគីពាក់ព័ន្ធនៃឧស្សាហកម្មសូត្រ ជាពិសេសជួយអភិរក្សវិស័យសូត្រខ្មែរផងដែរ។

លោកបណ្ឌិតសភាចារ្យ ហង់ជួន ណារ៉ុន បានមានប្រសាសន៍ឱ្យដឹងថា ប្រទេសកម្ពុជាធ្លាប់មានប្រវត្តិជាប់ទាក់ទងទៅនឹងវិស័យកោសេយ្យវប្បកម្ម តាំងពីយូរយារណាស់មកហើយ។ ការដាំមន ការចិញ្ចឹមដង្កូវនាង និងការត្បាញសូត្រ គឺជាផ្នែកមួយ នៃទំនៀមទំលាប់ប្រពៃណីរបស់ប្រជាជនខ្មែរ។ តែជាអកុសលប្រទេសកម្ពុជា បានជួបសង្រ្គាមជាញឹកញាប់ធ្វើឲ្យការផលិតសរសៃសូត្រនិងសកម្មភាពត្បាញ ត្រូវបានបាត់បង់ស្ទើរគ្មានសល់។ បច្ចុប្បន្នការផលិតសូត្រក្នុងស្រុកក៏កំពុងប្រឈមនឹងបញ្ហា ខ្វះខាតពូជដង្កូវនាងល្អ ដង្កូវនាងមានជំងឺ ខ្វះខាតបចេ្ចកទេស និងការស្រាវជ្រាវជាដើម។

លោក រដ្ឋមន្រ្តី បញ្ជាក់ថា វិស័យសូត្រពិតជាមានសារៈសំខាន់ណាស់ និងផ្តល់ប្រយោជន៍ជាច្រើនចំពោះប្រជាកសិករដូចជា៖ ផ្តល់ការងារ និងប្រាក់ចំណូលបន្ថែមដល់កសិករ ផ្តល់លទ្ធភាពឲ្យចាស់ជរា ស្ត្រី និងជនពិការ អាចចូលរួមបាន កាត់បន្ថយការធ្វើចំណាកស្រុក មិនប៉ះពាល់ដល់បរិស្ថាន អភិរក្ស និងលើកស្ទួយប្រពៃណីទំនៀមទំលាប់ខ្មែរ៕

កំពង់ចាម ៖ លោក គួច ចំរើន អភិបាលខេត្ត និងជាអនុប្រធានកិត្តិយសសាខាកាកបាទក្រហមកម្ពុជា ខេត្តកំពង់ចាម នៅរសៀលថ្ងៃទី៤ ខែមិថុនា ឆ្នាំ២០១៩ បានដឹកនាំប្រតិភូ នាំយកអំណោយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនប្រជាពលរដ្ឋរងគ្រោះ ដោយខ្យល់កន្ត្រាក់ធ្វើឲ្យរលំ និងប៉ើងដំបូលផ្ទះចំនួន១៩គ្រួសារ នៅក្នុងភូមិខ្នា ឃុំស្ដើងជ័យ ស្រុកជើងព្រៃ ខេត្តកំពង់ចាម ។

លោក គួច ចំរើន បានពាំនាំនូវប្រសាសន៍ផ្តាំផ្ញើ សាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងលោក ហ៊ុន ណេង ប្រធានកិត្តិយសសាខាកាកបាទក្រហមកម្ពុជា ខេត្តកំពង់ចាម រួមចំណែកចែករំលែកនូវទុក្ខលំបាក ចំពោះ បងប្អូនប្រជាពលរដ្ឋរងគ្រោះទាំង ១៩គ្រួសារ ដែលទទួលរងគ្រោះដោយសារគ្រោះធម្មជាតិ ។

សូមជម្រាបថា កាលពីវេលាម៉ោង ៦និង២០នាទីល្ងាច ថ្ងៃទី២ ខែមិថុនា ឆ្នាំ២០១៩កន្លង ទៅថ្មីៗនេះ មានខ្យល់កន្ត្រាក់បោកបក់យ៉ាងខ្លាំង បណ្ដាលឲ្យប៉ះពាល់លំនៅដ្ឋាន របស់ប្រជាពលរដ្ឋចំនួន ១៩ខ្នងផ្ទះ តែមិនបង្កឲ្យរបួសឆ្នាម និងប៉ះពាល់ដល់អាយុជីវិតប្រជាពលរដ្ឋណាម្នាក់ឡើយ ។

អំណោយត្រូវបាននាំយកមកចែកជូនប្រជាពលរដ្ឋទាំង ១៩គ្រួសារ ក្នុង ១គ្រួសារៗ ទទួលបានអង្គរ២៥គីឡូក្រាម ឃីត ១កញ្ចប់ មី ១កេស ទឹកស៊ីអ៊ីវ ៦ដប ទឹកត្រី ៦ដប ត្រីខ ១០កំប៉ុង និងថវិកា១០ម៉ឺនរៀល ។ ចំណែក គ្រួសាររងគ្រោះរលំ និងប៉ើងតំបូលផ្ទះទាំងស្រុង ១គ្រួសារ ទទួលបានថវិកា ១លានរៀល និងបន្ថែមនូវសម្ភារៈផ្ទះបាយ ដែលអំណោយបានមកពីការចូលរួមចំណែកពីព្រះសង្ឃ ផងដែរ ។

គួររំលឹកថា កាលពីព្រឹកថ្ងៃទី៣០ ខែឧសភា ឆ្នាំ ២០១៩ លោក គួច ចំរើន អភិបាលខេត្តកំពង់ចាម បាននាំយកអំណោយមនុស្សធម៌សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ទៅចែកជូនប្រជាពលរដ្ឋរងគ្រោះដោយសារខ្យល់កន្ត្រាក់ចំនួន៧៩គ្រួសារ នៅឃុំរាយប៉ាយ ស្រុកកងមាស ខេត្តកំពង់ចាម ផងដែរ៕ ដោយ ៖ សុផល

ភ្នំពេញ ៖ កន្លងមកACUធ្លាប់បានប្រកាសថា “ករណីលោកស្នងការរងឧត្ដមសេនីយ៍ ស្រេង សុខា ក្រុមការងារស៊ើបអង្កេត អាចនឹងធ្វើការសន្និដ្ឋាននៅដំណាច់ខែមេសា ឆ្នាំ២០១៩ នេះ”។ ប៉ុន្តែរហូតមកទល់ពេលនេះ នៅពុំទាន់ឃើញ ACU ប្រកាសលទ្ធផលករណីលោកផ្កាយ១ ស្រេង សុខា ស្នងការរងនគរបាលខេត្តកណ្ដាល ដែលសម្ញែងទ្រព្យសម្បត្តិយ៉ាងសន្ធឹកសន្ធាប់នោះ នៅឡើយទេ ។

រយៈពេលចុងក្រោយនេះ ឃើញថា មានមន្ត្រីជាច្រើនរូបមកហើយ ដែលបាន សម្ញែងទ្រព្យសម្បត្តិជាសាធារណៈ ដែលគេសង្ស័យថា អាចកើតចេញពីការ ប្រព្រឹត្តអំពើពុករលួយ មានជាអាទិ៍ លោក ឧត្ដមសេនីយ៍ត្រី គឹម រស្មី អតីត មេ បញ្ជាការកងរាជអាវុធហត្ថ ខេត្ត រតនគិរី អភិបាលរងខេត្តព្រះសីហនុ ២រូប ដែលពាក់ព័ន្ធបញ្ហាដីធ្លីក្នុងខេត្ត ដែលត្រូវបាន សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា សម្រេចអនុឲវត្តន៍អភិក្រមទី៥។

សូមរំលឹកថា កន្លងមក មានការបង្ហោះរូបភាជាច្រើនបង្ហាញពីលោកឧត្ដមសេនីយ៍ត្រី ស្រេង សុខា ស្នងការរងនគរបាលខេត្តកណ្ដាល សម្ញែងពីទ្រព្យសម្បត្តិក្នុងពិធីភ្ជាប់ពាក្យ ជាមួយនារីស្រស់ស្អាតម្នាក់ ដោយបង្គាប់ថ្លៃទឹកដោះរហូតដល់ ១០ម៉ឺនដុល្លារអាមេរិក និងឡានទំនើបឡិចស៊ីស៥៧០ ចំនួន១គ្រឿង ព្រមគ្រឿងអលង្ការ យ៉ាងច្រើនសន្ធឹកសន្ធាប់ ធ្វើឲ្យមានការភ្ញាក់ផ្អើលយ៉ាងខ្លាំងពេញសង្គមហ្វេសប៊ុក រហូតត្រូវបានស៊ើបអង្កេតដោយអង្គភាព ACU នាពេលនេះ៕

ភ្នំពេញ ៖ លោកស្រី Carin Salerno នាយកទីភ្នាក់ងារស្វីសសម្រាប់ការអភិវឌ្ឍន៍ និងកិច្ចសហប្រតិបត្តិការ ប្រចាំនៅកម្ពុជាបានមានប្រសាសន៍ថា ប្រទេសស្វីសនឹងបន្តផ្តល់ថវិកាប្រមាណ ៦លានដុល្លារសហរដ្ឋ អាមេរិកគាំទ្រដល់ការបោសសម្អាតមីននៅព្រះរាជា ណាចក្រកម្ពុជា ចាប់ពីឆ្នាំ២០២០ ដល់ ឆ្នាំ២០២៥ បន្តទៀត។

ការថ្លែងរបស់ស្រីបែបនេះក្នុងឱកាសដែលស្រី និងសហការី អញ្ជើញចូលជួបសំដែងការគួរសម និងពិភាក្សាការងារស្តីពីកិច្ចសហប្រតិបត្តិការក្នុងវិស័យសកម្មភាពមីននៅព្រះរាជាណាចក្រកម្ពុជាជាមួយលោកទេសរដ្ឋមន្រ្តី លី ធុជ អនុប្រធានទី១អាជ្ញាធរមីន កាលពីថ្ងៃទី០៤ ខែមិថុនា ឆ្នាំ២០១៩ម្សិលមិញ។

ក្នុងជំនួបនេះដែរ លោកទេសរដ្ឋមន្ត្រី ក្នុងនាមសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអាជ្ញាធរ មីន បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាជនស្វីស បានចូលរួមចំណែកផ្តល់ជំនួយថវិកាគាំទ្រដល់ការបោស សម្អាតមីន តាមរយៈគម្រោងបោសសម្អាតមីនដើម្បីលទ្ធផល ដែលកំពុងអនុវត្តដោយអាជ្ញាធរមីន ដោយមានការគាំទ្របច្ចេកទេសពីអង្គការ UNDP។

សូមជម្រាបថា ចាប់តាំងពីឆ្នាំ២០១៣ រហូតដល់ឆ្នាំ២០១៩នេះ ប្រទេសស្វីសបានផ្តល់ថវិកាគាំទ្រដល់ការបោសសម្អាតមីនប្រមាណជាង ៧លានដុល្លារសហរដ្ឋអាមេរិក ដែលបានផ្តល់ដីសុវត្ថិភាពជូនដល់ប្រជាពលរដ្ឋក្រីក្រនៅតាមសហគមន៍ ដើម្បីធ្វើកសិកម្ម សាងសង់លំនៅដ្ឋាន និងកសាងហេដ្ឋារចនាសម្ព័ន្ធជាច្រើន៕

ភ្នំពេញ ៖ ក្រុមអ្នកសារព័ត៌មានប្រមាណ១០នាក់ដែលរងបណ្តឹងរបស់លោក យី ថុល ប្រធានសាខាគយច្រកព្រែកចាក ដោយចោទថា បានជេរប្រមាថ និងជ្រៀតជ្រែកដោយខុសច្បាប់ទៅក្នុងការបំពេញការងារមន្រ្តីរាជការសាធារណៈនោះ បានព្រមានប្តឹងបកលើលោក យី ថុល ទៅអង្គភាពប្រឆាំងអំពើពុករលួយ។

សូមជម្រាបថា កាលពីចុងខែឧសភា នេះ ក្នុងវីដេអូឃ្លីបមួយ ដែលបានចែកចាយលើបណ្តាញសង្គមហ្វេសប៊ុកតៗគ្នា បានបង្ហាញពីសកម្មភាពមន្ត្រីគយម្នាក់ បានប៉ះទង្គិចគ្នាជាមួយអ្នកកាសែតមួយក្រុមដែលក្នុងនោះអ្នកកាសែតម្នាក់ បានរុញច្រានមន្រ្តីគយម្នាក់ដោយអះអាងថា មន្រ្តីគយនោះ បានដកហូតទូរស័ព្ទពីអ្នកកាសែត ដែលកំពុងថតសកម្មភាព នៃការដឹកទំនិញឆ្លងដែនពីប្រទេសវៀតណាមចូលមកកម្ពុជា។

អ្នកយកព័ត៌មានប្រមាណ១០នាក់នោះ រួមមានលោក ហ៊ុន សុខា ជាប្រធានសារព័ត៌មាននៃក្លឹបអ្នកកាសែតឯករាជ្យ និងជានាយកការផ្សាយព័ត៌មានប្រជាជនកម្ពុជា (CPNTV) លោក ចន យូដេត លោក ស៊ាង ប៊ុនសុង លោក ទុំ ឆោម លោក ប៉ែន រ៉ា លោក កែវ សុផាត លោក ជី ពេជ្រ លោក អ៊ុត ប៊ុនធឿន និងបក្ខពួកផ្សេងទៀត ត្រូវបានប្រធានការិយាល័យគយនៅច្រកព្រែកចាក លោក យី ថុល ប្តឹងទៅសាលាដំបូងខេត្តកំពតកាលពីថ្ងៃទី៣ ខែមិថុនា ដោយចោទថា«ជេរប្រមាថចំពោះអ្នករាជការសាធារណៈ និងជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈរបស់មន្រ្តីរដ្ឋ»។ នេះបើតាមការចុះផ្សាយរបស់សាព័ត៌មានក្នុងស្រុក។

លោក ហ៊ុន សុខា ប្រធានសារព័ត៌មាននៃក្លឹបអ្នកកាសែតឯករាជ្យ និងជានាយកការផ្សាយព័ត៌មានប្រជាជនកម្ពុជា (CPNTV) បញ្ជាក់ថា លោកនឹងចូលបំភ្លឺ ប្រសិនបើមានការកោះហៅពីតុលាការ។ ប៉ុន្តែលោកថា ក្រុមរបស់លោកនឹងរៀបចំបណ្តឹងបកលើប្រធានការិយាល័យគយនៅច្រកព្រែកចាក លោក យី ថុល ទៅអង្គភាពប្រឆាំងពំពើពុករលួយ( ACU) និងរដ្ឋាភិបាល ពាក់ព័ន្ធការប្រព្រឹត្តអំពើពុករលួយ ។ លោកថា បន្ទាប់មក លោកនឹងធ្វើសន្និសីទកាសែតដើម្បីវែកញែកលាតត្រដាងរឿងនេះឲ្យអស់ ព្រោះរឿងនេះ ជារឿងប្រទេសជាតិ។

មេគង្គប៉ុស្តិ៍ មិនទាន់អាចសុំការពន្យល់ឆ្លើយតបពីលោក យី ថុល ប្រធានការិយាល័យគយនៅច្រកព្រែកចាក ពាក់ព័ន្ធនឹងករណីនេះបាននៅឡើយទេ នៅរសៀលថ្ងៃទី៤ ខែមិថុនា នេះ៕

ភ្នំពេញ ៖ យោងតាមអនុក្រឹត្យស្ដីពី ការចុះបញ្ជីផ្ដល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ ចុះហត្ថលេខាដោយ សម្ដេចតេជោនាយករដ្ឋមន្ត្រី កាលពីថ្ងៃទី៣ ខែមិថុនា ឆ្នាំ២០១៩ បានបង្ហាញថា ម្ចាស់កម្មសិទ្ធិយានជំនិះ មានសិទ្ធិស្នើសុំរក្សាលេខចុះបញ្ជីយានជំនិះ ដែលកំពុងប្រើប្រាស់ សម្រាប់ចុះបញ្ជីលើយានជំនិះថ្មីរបស់ខ្លួនបាន ស្របតាមបែបបទ និងនីតិវិធីនៃការចុះបញ្ជីយានជំនិះ ការផ្តល់ផ្លាកលេខសម្គាល់ យានជំនិះ និងការលុបចេញពីបញ្ជីយានជំនិះ និងត្រូវបង់កម្រៃសេវាសាធារណៈ ដែលកំណត់ដោយប្រកាសអន្តរក្រសួង រវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណការ និងដឹកជញ្ជូន។

ស្លា្កកលេខសម្គាល់យានជំនិះមាន ៩ប្រភេទដូចខាងក្រោម៖

-ប្រភេទទី១៖ ផ្លាកលេខ មានផ្ទៃពណ៌បៃតងចាស់ អក្សរនិងលេខពណ៌ទឹកមាស សម្រាប់យានជំនិះរបស់ព្រះបរមរាជវាំង។
-ប្រភេទទី២៖ ផ្លាកលេខមានផ្ទៃពណ៌បៃតងចាស់ អក្សរនិងលេខពណ៌ស សម្រាប់យានជំនិះរបស់ស្ថាប័នកំពូល។
-ប្រភេទទី៣៖ ផ្លាកលេខមានផ្ទៃពណ៌បៃតងខ្ចី អក្សរ និងលេខពណ៌ស សម្រាប់យានជំនិះ ជាសម្បត្តិរដ្ឋ។

-ប្រភេទទី៤៖ ផ្លាកលេខមានផ្ទៃពណ៌ខៀវខាងលើ និងពណ៌ក្រហមខាងក្រោមចែកពាក់កណ្តាលស្មើ អក្សរ និងលេខពណ៌ស សម្រាប់យានជំនិះរបស់កងយោធពលខេមរភូមិន្ទ។

-ប្រភេទទី៥៖ ផ្លាកលេខមានផ្ទៃពណ៌ស អក្សរ និងលេខពណ៌ក្រហម សម្រាប់យានជំនិះរបស់កងកម្លាំងនគរបាលជាតិ។

-ប្រភេទទី៦៖ ផ្លាកលេខមានផ្ទៃពណ៌ស អក្សរ និងលេខពណ៌បៃតងចាស់ សម្រាប់យានជំនិះរបស់គណៈកម្មាធិការជាតិរៀបចំការបោះឆ្នោត។

-ប្រភេទទី៧៖ ផ្លាកលេខមានផ្ទៃពណ៌លឿង អក្សរ និងលេខពណ៌ខៀវចាស់ សម្រាប់យានជំនិះរបស់ស្ថានទូត និងផ្លាកលេខមានផ្ទៃពណ៌ខៀវផ្ទៃមេឃ អក្សរ និងលេខពណ៌ស សម្រាប់អង្គការសហប្រជាជាតិ អង្គការអន្តរជាតិ និងអង្គការមិនមែនរដ្ឋាភិបាល។
-ប្រភេទទី៨៖ ផ្លាកលេខមានផ្ទៃពណ៌ស អក្សរ និងលេខពណ៌ខៀវចាស់ សម្រាប់យានជំនិះ ជារបស់ម្ចាស់កម្មសិទ្ធិយានជំនិះជារូបវន្តបុគ្គល នីតិបុគ្គល ឬសហកម្មសិទ្ធិយានជំនះ។

-ប្រភេទទី៩៖ ផ្លាកលេខមានផ្ទៃពណ៌លឿងទុំ អក្សរ និងលេខពណ៌ស សម្រាប់យានជំនិះ នាំចូលបណ្តោះអាសន្នតាមរបបព្យួរពន្ធ ឬក្រោមរបបគយនាំចូលបណ្តោះអាសន្ន៕

ខេត្តត្បូងឃ្មុំ ៖ ផ្ទះប្រជាពលរដ្ឋទំហំ៩ម៉ែត្រគុណ១០ម៉ែត្រ មាន៣ច្រក សាងសង់ពីថ្ម ប្រក់ដែកស័ង្កសី (ផ្ទះលក់ឥវ៉ាន់ចាប់ហួយ) ត្រូវបានអគ្គិភ័យភ្លើងឆេះបំផ្លាញបណ្តាលអោយខូចខាតទ្រព្យសម្ភារៈសរុបជាទឹកប្រាក់ប្រមាណ ៣ម៉ឺនដុល្លារ ។

នគរបាលស្រុកក្រូចឆ្មារ អោយដឹងថា ករណីអគ្គិភ័យនេះ កើតឡើងនៅយប់ថ្ងៃទី៣ ខែមិថុនា ឆ្នាំ២០១៩ វេលាម៉ោង ៩នាទី ឋិតនៅភូមិតាប៉ាវ ឃុំទួលស្នួល ស្រុកក្រូចឆ្មារ ។

ម្ចាស់ផ្ទះឈ្មោះ សេង ស្រីភាព ភេទស្រី អាយុ ២៥ឆ្នាំ ផ្ទះមានទំហំ ៩គុណ ១០ម៉ែត្រ មាន ៣ច្រក សង់ពីថ្ម ប្រក់ដែកស័ង្កសី(ផ្ទះលក់ឥវ៉ាន់ចាប់ហួយ) ខូចខាតសរុបជាទឹកប្រាក់ប្រមាណ ៣០.០០០ ដុល្លារ ប៉ុន្តែករណីនេះមិនបណ្ដាលអោយគ្រោះថ្នាក់ដល់អាយុជីវិតមនុស្សទេ ។ ចំពោះមូលហេតុបណ្តាលមកពីទុស្សេខ្សែភ្លើង ខណៈម្ចាស់ផ្ទះមិននៅ ។

កិច្ចសហប្រតិបត្តិការនេះចូលរួមអន្តរាគមន៍ពីកម្លាំងស្នងការដ្ឋាននគរបាលខេត្តត្បូងឃ្មុំព្រមទាំងបណ្តាស្រុក ១ចំនួន ដូចជា អធិការដ្ឋានក្រុងសួង ត្បូងឃ្មុំ អូរាំងឪ ធ្វើការបាញ់ទឹកពន្លត់រលត់ទប់ស្កាត់មិនអោយរាលដាល និងរលត់ទាំង ស្រុងនៅវេលាម៉ោង ១០និង១០នាទី ដោយប្រើប្រាស់រថយន្តពន្លត់អគ្គិភ័យ ចំនួន៥គ្រឿង និងទឹកចំនួន ៧ឡាន ដោយមានការផ្ដល់កន្លែងយកទឹកពីក្រុមហ៊ុនចំការកៅស៊ូ តាប៉ាវ ។

អាជ្ញាធរមានសមត្ថកិច្ចខេត្តបានក្រើនរំឭកឲ្យបងប្អូនប្រជាពលរដ្ឋមានការប្រុងប្រយ័ត្នខ្ពស់ ចំពោះករណីអគ្គិភ័យនេះផងដែរ ពិសេសប្រុងប្រយ័ត្នបញ្ហាប្រព័ន្ធខ្សែភ្លើងចាស់ៗនៅក្នុងផ្ទះ ដែលបណ្តាអោយឆ្លងចរន្តទុស្សេក្លាយជារឿងអគ្គិភ័យពេលយើងមិននៅផ្ទះ៕ ដោយ ៖ សុផល

ភ្នំពេញ ៖ យោងតាមរបាយការណ៍របស់សមត្ថកិច្ចបានឲ្យដឹងថា៖ នៅថ្ងៃទី3 ខែមិថុនា ឆ្នាំ2019 ម៉ោង15៖00នាទី ស្ថិតនៅចំណុចតាមបណ្តោយផ្លូវ 154 សង្កាត់ផ្សាថ្មី3 មុខរោងកុនលុច្ស មានករណីគ្រោះថ្នាក់ចរាចរណ៍ បង្កឡើងដោយរថយន្តម៉ាក LEXUS ធុនកណ្តាល ពណ៌ខ្មៅ ស្លាកលេខភ្នំពេញ 2AW 4332 បានបើកទៅបុកម៉ូតូកង់បី (តុតុ)មួយគ្រឿង បណ្តាលឲ្យមនុស្សម្នាក់រងរបួសធ្ងន់ ហើយរថយន្តព្យាយាមបើករត់គេច ភ្លាមនោះ កម្លាំងសមត្ថកិច្ចបានអន្តរាគមន៍ ដោយបានធ្វើការឃាត់ខ្លួនជនបង្កជាជនជាតិចិន ឈ្មោះ អៅ មីង ភេទប្រុស អាយុ 30ឆ្នាំ ព្រមទាំងរថយន្តផងដែរ ។

ក្រោយពីបានធ្វើការត្រួតពិនិត្យ សមត្ថកិច្ចឃើញនៅក្នុងរថយន្តរបស់ជនបង្ករមានការបូបយួរមួយ ក្នុងនោះមានកញ្ចប់កាហ្វេចំនួន៦ដុំ ដោយមានការសង្ស័យសមត្ថកិច្ចបានហែកមើល ឃើញមានថ្នាំគ្រាប់ពណ៌ទឹកសមុទ្រ រូបតុក្កតា សញ្ញាក្បាលខ្មោច ច្រើនគ្រាប់ សង្ស័យជាសារធាតុញៀន។ សមត្ថកិច្ចបានបន្ទសហការណ៍ជាមួយការិយាល័យ ប្រឆាំងគ្រឿងញៀនដើម្បីធ្វើតេស្ត នឹងជាលទ្ធផលបង្ហាញអោយឃើញថា ជាថ្នាំញៀនប្រភេទ M.A /M.D (អិចស្រ្តាស៊ី) ថ្នាំគ្រវី ក្រោយមកសមត្ថកិច្ចបានសួរចម្លើយនិងបន្ត ធ្វើការឆែកឆេរដល់លំនៅឋានជនសង្ស័យស្ថិតនៅខណ្ឌច្បារអំពៅ ។

កិច្ចប្រតិបត្តិការបន្តនេះដោយ មិនមានលទ្ធផលរុករកឃើញអ្វី និងការស្តាប់ចម្លើយសារភាព ជនសង្ស័យមិនបានប្រាប់អំពីបក្សពួក សមត្ថកិច្ចក៏បានធ្វើកំណត់ហេតុនៃការឆែកឆេរ ព្រមទាំងដកហូតថ្នាំញៀនប្រភេទអិចស្តាស៊ី ចំនួន ១១.៦៨០គ្រាប់ ទម្ងន់ ៦,៥៤១គ.ក្រ។
សមត្ថកិច្ចកំពុងជំរុញនូវវិធានការជំនាញសួរចម្លើយដើម្បីបន្តយកបក្សពួក និងវត្ថុតាងបន្ថែមទៀត៕ ដោយ ៖ សុផល  

ភ្នំពេញ ៖ បើទោះជាស្ថានភាព នៃការធ្វើទំនាក់ទំនងលើផ្នែក សេដ្ឋកិច្ច ពាណិជ្ជកម្ម និងទេសចរណ៍រវាង កម្ពុជា និង ទីម័រឡេស្តេ (ទីម័រស្តេខាងកើត) នៅមានកម្រិតតិចតួចនៅឡើយក្តី ប៉ុន្តែប្រមុខដឹកនាំនៃប្រទេសទាំងពីរ បាន និងកំពុងធ្វើឱ្យទំនាក់ទំនងនេះ មានការរីកធំធាត់ជាបន្តបន្ទាប់ តាមរយៈការជម្រុញឱ្យអនុវត្តនូវកិច្ចព្រមព្រៀងទាំងឡាយ ដែលបានចុះហត្ថលេខារួមគ្នារួចមកហើយ។ នេះបើតាមការបញ្ជាក់របស់លោក កេត សោផាន់ អ្នកនាំ ពាក្យក្រសួងការបរទេស នៅក្រោយកិច្ចប្រជុំលោក ប្រាក់ សុខុន  ជាមួយ លោក ឌីយ៉ូនីស្យូ ដាកូសតា បាបូសូរេស រដ្ឋមន្ត្រី ក្រសួងការបរទេស ទីម័រ។

នេះបើតាមកិច្ចពិភាក្សារវាង លោក ប្រាក់ សុខុន រដ្ឋមន្ត្រី ក្រសួងការបរទេសនិងសហប្រតិបត្តិការអន្តរជាតិ ជាមួយ លោក ឌីយ៉ូនីស្យូ ដាកូសតា បាបូសូរេស រដ្ឋមន្រ្តីក្រសួងការបរទេស និងសហប្រតិបត្តិការ នៃសាធារណរដ្ឋប្រជាធិបតេយ្យទីម័រឡេស្តេ កាលពីល្ងាចថ្ងៃទី៣ខែមិថុនាឆ្នាំ ២០១៩ ម្សិលមិញ នៅទីស្តីការក្រសួង ។

លោក កេត សោផាន់ អ្នកនាំ ពាក្យក្រសួងការបរទេស បានមានប្រសាសន៍ប្រាប់អ្នកសារព័ត៌មាននៅក្រោយជំនួបនោះថា ឯកឧត្តមឧប នាយករដ្ឋមន្ត្រី ប្រាក់ សុខុន បានលើកឡើងថា ទំហំពាណិជ្ជកម្មរវាងប្រទេសទាំងពីរនៅតិចតួច ដែលសុំឲ្យភាគីទាំងពីរ អនុវត្តន៍លើកិច្ចព្រមព្រៀង ដែលបានចុះហត្ថលេខាជាមួយគ្នារួចហើយ លើការលើកលែងទិដ្ឋាការ សម្រាប់អ្នកកាន់លិខិតឆ្លងដែន ហើយមួយវិញទៀត កន្លងមកនេះ សភាពាណិជ្ជកម្ម នៃប្រទេសទាំងពីរ បានចុះកិច្ចព្រមព្រៀងជាមួយគ្នាទាក់ទងទៅនិងការពង្រីកវិស័យទេសចរណ៍។

ជាមួយគ្នានោះ កិច្ចពិភាក្សាទ្វេភាគី ក៏បានលើកឡើងពីកិច្ចសហប្រតិបត្តិការលើវិស័យផ្សេងៗ សំដៅពង្រឹងទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការ រវាងប្រទេសទាំងពីរ ព្រមទាំងផ្លាស់ប្តូរយោបល់ អំពីបញ្ហាតំបន់ និងអន្តរជាតិ ដែលមានផលប្រយោជន៍រួម ព្រមទាំងបញ្ហាបេក្ខភាពទីម័រខាងកើតចូលជាសមាជិកអាស៊ានផងដែរ។
ក្រៅពីនេះ សម្ដេចតេជោ ហ៊ុន សែន នាយករដ្ឋមន្ត្រី បានផ្ដល់អាហារូបករណ៍ចំនួន១០កន្លែង ដល់និស្សិតប្រទេសទីម័រខាងកើត មកសិក្សានៅប្រទេសកម្ពុជា ហើយបានត្រៀមលក្ខណៈទទួលនិស្សិតអាហារូបករណ៍ នៅខែតុលាខាងមុខនេះ។

សូមបញ្ជាក់ថា ប្រទេសទីម័រខាងកើត បានដាក់បេក្ខភាពជាសមាជិកអាស៊ានតាំងពីឆ្នាំ២០១១ រហូតមកដល់ពេលនេះ ថ្នាក់ដឹកនាំអាស៊ាន បានសម្រេចឲ្យក្រុមប្រឹក្សា សម្របសម្រួល អា ស៊ាន ប្រជុំពិនិត្យបេក្ខភាពប្រទេសនេះ។ អាស៊ាននឹងបញ្ជូន ក្រុមបេសកកម្មស្វែងរកការពិតចំនួន៣ក្រុម គឺ សហគមន៍នយោបាយ-សន្តិសុខ សេដ្ឋកិច្ចនិងសហគមន៍សង្គមវប្បធម៌ នឹងចុះទៅវាយតម្លៃ ពីស្ថានភាពពិតនៅប្រទេសទីម័រឡេស្តេក្នុងឆ្នាំ២០១៩នេះ ដើម្បីដាក់ជូនថ្នាក់ដឹកនាំអាស៊ាន ពិនិត្យសម្រេចបញ្ចូលជាសមាជិកអាស៊ាន៕

ប៉ោយប៉ែត ៖ ផ្ទះពលរដ្ឋប្រមាណ ៤៣ខ្នង ខ្លះមានទំហំ ​៤គុណនឹង ៥ម៉ែត្រ ធ្វើអំពីឈើប្រក់ស័ង្កសី ត្រូវប្រធានសហគមន៍លោក សាន់ ស៊ីម បញ្ជា និងនាំកម្លាំងប្រមាណជិត២០០នាក់មកពី ៥ភូមិក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ ចុះទៅរុះរើ និងបំផ្លាញចោល ធ្វើឲ្យពលរដ្ឋបាត់បង់ទីជម្រកគ្រប់ៗគ្នា កាលពីព្រឹកថ្ងៃទី៣ ខែមិថុនា ឆ្នាំ២០១៩ នៅចំណុច៦៧១ ឋិតក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ។

ក្នុងសកម្មភាពខាងលើនោះ គេឃើញមានសមត្ថកិច្ច និងប្រជាការពារភូមិ ចុះមកមើលដើម្បីការពារសុវត្តិភាព និងបញ្ជៀសអំពើរហិង្សាផងដែរ។ ​ជាមួយគ្នានេះ គេឃើញពលរដ្ឋប្រដាប់ដោយកាំបិត ពូថៅ និងដំបង ជាច្រើននាក់ តែមិនអាចទប់ស្កាតសកម្មភាពរុះរើនោះបានឡើយ ។

លោក សាន់ ស៊ីម ប្រធានសហគមន៍ បានបញ្ជាក់ថា ពលរដ្ឋដែលត្រូវក្រុមសហគមន៍ចុះរុះរើផ្ទះនោះ ដោយសារពួកគាត់បានមកសាងស់ង់ផ្ទះលើដីរបស់សហគមន៍ ដែលមានទំហំក្បាលដីទទឹង ១ពាន់ម៉ែត្រ ជម្រៅ ៥ពាន់ម៉ែត្រ ស្មើ៥០០ហិតា។ លោកបន្តថា ការចុះរុះរើផ្ទះរបស់ពលរដ្ឋនោះថា លោកមិនបានខ្វល់អំពីការឯកភាព ឬមិនឯកភាពពីអាជ្ញាធរនោះទេ ព្រោះថា ជាដីរបស់សហគមន៍ហេតុអ្វីក្រុមពលរដ្ឋទាំងនោះមកសង់ផ្ទះនៅ។ លោក សាន់ ស៊ីម បញ្ជាក់ថា លោកមានសិទ្ធការពារដីនេះ ព្រោះលោកត្រូវបានតែងតាំងដោយអភិបាលខេត្តបន្ទាយមានជ័យយ៉ាងត្រឹមត្រូវ ឲ្យលោកធ្វើជាប្រធានសហគមន៍ខាងលើនេះ។

ករណីរុះរើផ្ទះពលរដ្ឋអស់ជាង ៤០ខ្នង នេះលោក ហឹម យឿន តំណាងពលរដ្ឋបញ្ជាក់ថា ផ្ទះដែលពលរដ្ឋធ្វើនេះ មិនប៉ះពាល់នឹងដីរបស់សហគមន៏ដូចការលើកឡើងរបស់លោក សាន់ ស៊ីម ប្រធានសហគមន៍នោះទេ។ លោកបន្តថា កាចុះរុះរើ នេះមិនមានឯកសារលាយលក្ខអក្សរជូនដំណឹងជាមុន ឬជួបពិភាក្សាជាមួយក្រុមប្រជាពលរដ្ឋនោះ ឡើយ ហើយថា ដីព្រៃសហគមន៍មានបង្គោលព្រំត្រឹមត្រូវ ពីជ្រុងមួយទៅជ្រុងមួយ មិពាក់ព័ន្ធនឹងដីលំនៅឋានរបស់ពលរដ្ឋទេ ហេតុអីបានជាចុះរុះរើទាំងកម្រោលបែបនេះ។ តំណាងពលរដ្ឋរូបនេះ ប្រាប់ថា លោកនឹងប្តឹងតវ៉ាទៅថ្នាក់លើ ដើម្បីទាមទាររកយុត្តិធម៌ជូនម្ចាស់លំនៅដ្ឋានទាំងអស់។ មិនតែប៉ុណ្ណោះលោកថា បើទីតាំងកើតហេតុជាដីព្រៃសហគមន៌ ហេតុអ្វីមានគេលក់ដូរបាន ដោយអាជ្ញាធរចុះហត្ថលេខាទទួលស្គាល់លើឯកសាទិញលក់ ហើយលោកក៏មានឯកសារនោះក្នុងដៃរួចហើយ។

លោក ហ៊ឹម យឿន បញ្ជាក់ថា ដីចំណុច671 និងបឹងជម្រុក ជាដីរបស់អតីតយោធិនពលី ពិការ មានចំនួន631ហិកតា ធ្លាប់មានទំនាស់ប្តឹងផ្តល់គ្នាយូរឆ្នាំមកហើយ ជាមួយក្រុមហ៊ុនមួយរហូតមានចំណារជាបន្តបន្ទាប់ពីទីស្តីការគណៈរដ្ឋមន្ត្រី/រដ្ឋសភា និងក្រសួងមហាផ្ទៃ ប៉ុន្តែ ស ជ ណ របស់ថ្នាក់លើជាប់គាំងតាំងពីឆ្នាំ2011 មកទល់ពេលនេះ។

ទោះជាយ៉ាងនេះក្តី លោក សាន់ ស៊ីម ប្រធានសហគមន៍ បានលើកឡើងថា បញ្ហារុះរើសំណង់ របស់ប្រជាសហគមន៍ជារឿងត្រឹមត្រូវ ព្រោះបើទុកវាអាចទៅជាចលនាបំផុសរឿង ឈ្នះបានដីចាញ់បានលុយ។លោកបន្តថា លោកខិតខំប្រឹងបង្រួមទំនាស់ហត់នឿយចង់ជ្រុះសក់ទៅហើយ ៗថា សំណង់ទាំងអស់ជាសំណង់អនាធិបតេយ្យមិនដឹងថា ម្ចាស់សំណង់មកពីណា? អាជ្ញាធរ និងគណៈកម្មការណាបែងចែកដីឲ្យទេ ?។មិនតែប៉ុណ្ណោះលោកបញ្ជាក់ថា សម័យនេះ អ្នកណាមានដីចែកទៀត? លោកថា កន្លងមកឮក្រុមមួយអះអាងថា មានចំណាពីថ្នាក់លើ ប្រគល់ដីឲ្យពលរដ្ឋ ប៉ុន្តែពេលអាជ្ញាធរសុំមើលឯកសារបែរជាមិនដែលឃើញមានសោះ។

ប្រភពចុងក្រោយនៅរសៀលថ្ងៃទី៤ ខែមិថុនា នេះ បានឲ្យដឹងថា លោក សាន់ ស៊ីម ប្រធានសហគមន៏ ដែលបញ្ជាឲ្យពលរដ្ឋមករុះរើផ្ទះនោះ បានឲ្យមនុស្សមកហៅតំណាងប្រជាពលរដ្ឋគឺលោក ហ៊ឹម យឺន ដែលរងការរុះរើខូចខាតផ្ទះឲ្យទៅចរចា តែភាគីខាងប្រជាពលរដ្ឋមិនព្រមទៅជួប។

សូមជម្រាថា រហូតមកដល់ថ្ងៃទី៤ ខែមិថុនា នេះអាជ្ញាធរមិនទាន់បានបញ្ជាក់ ឬបកស្រាយបែបណាចំពោះវិវាទដីធ្លីខាងលើនេះនៅឡើយទេ៕ ដោយ ៖ ន.វ.   

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នាព្រឹកថ្ងៃទី៣ ខែមិថុនា នេះ បានបញ្ចេញប្រតិកម្មខ្លាំងៗដែលមិនធ្លាប់មានទាល់តែសោះ ដោយប្រើពាក្យហៅលោក សម រង្ស៊ី ថា «អាឆ្កែ កូនអាក្បត់ជាតិ»។

ប្រតិកម្មរបស់នាយករដ្ឋមន្ត្រីបែបនេះ បានធ្វើឡើងបន្ទាប់ពីលោក សម រង្ស៉ី កាលពីពេលថ្មីៗនេះ បានប្រកាសចូលចាប់សម្តេចតេជោ ហ៊ុន សែន ហើយប្រឌិតនូវព័ត៌មានញុះញង់ដោយភ្ជាប់ករណីស្លាប់របស់លោក ហុក ឡង់ឌី អតីតអគ្គស្នងការនគរបាលជាតិ ដែលជាដន្លងរបស់សម្តេច ថា សម្តេចតេជោ ហ៊ុន សែន គឺជាអ្នកសម្លាប់ ហើយថែមទាំងអះអាងថា កូនច្បងរបស់លោក ហុក ឡង់ឌី គឺលោក ឌី វិជ្ជា កំពុងរកវិធីសងសឹក តាមរយៈការសហការជាមួយសម្តេចក្រឡាហោម ស ខេង ​ទៀតផង។

សម្តេចតេជោ ហ៊ុន សែន បានបែបនេះ ថ្លែងក្នុងពិធីប្រគល់សញ្ញាបត្រ ដល់និស្សិតសាកលវិទ្យាល័យភូមិន្ទភ្នំពេញ (RUPP) នៅមជ្ឈមណ្ឌលកោះពេជ្រ នាព្រឹកថ្ងៃទី៣ ខែមិថុនា ឆ្នាំ២០១៩។ សម្តេចតេជោ ក៏បានបញ្ជាក់ផងដែរថា«…. អ្វីដែលសម្តេចបានប្រកាសធ្វើសង្គ្រាមជាមួយទណ្ឌិត សម រង្ស៉ី នៅទីក្រុងតូក្យូ មិនមែនជារឿងចៃដន្យនោះទេ ប៉ុន្តែជាចេតនារបស់សម្តេច ចង់ឱ្យពួកគេដឹង…»។

សម្តេចតេជោ បានបញ្ជាក់ថា ៖ «…ឥឡូវចេញមក វាឱ្យកូនខ្ញុំមកសងសឹកខ្ញុំទៅទៀត អាឆ្កែ១ក្បាលនេះ ប៉ុន្តែអាឆ្កែ១ក្បាលនេះ កាលពីមុនស្រួលប្រើមែនទែន ប្រើវាឱ្យជួយកែរដ្ឋធម្មនុញ្ញពី២ភាគ៣ មកត្រឹម ៥០+១ ប៉ុន្តែអាឆ្កែ១ក្បាលនេះ ក្បត់ម្ចាស់រហូត ដូចឪវាអញ្ចឹង ហ្អែងឈ្លើយម្ល៉េះ ហើយបានវិទ្យុមួយទេគ្រាន់សម្ភាស អញប្រើហ្អែង ហើយចាប់ពីថ្ងៃនេះទៅ អញហៅហ្អែងតែអាឆ្កែទេ អាឆ្កែកូនអាក្បត់ជាតិ ហ្អែងចេះជេរអញ អញក៏ចេះជេរហ្អែងដែរ..»។

គួររំឭកថា លោក សម សារី ដែលជាឪពុករបស់ លោក សម រង្ស៉ី គឺជាអ្នកនយោបាយជំនាន់សង្គមរាស្រ្តនិយម ដែលត្រូវបាន អតីតព្រះមហាក្សត្រ ហៅថា ជាជនក្បត់ជាតិ។ តាមឯកសាររបស់ « សមាគមឯកសារវិទូខ្មែរ» បានរៀបរាប់ថា លោក សម សារី ក្នុងអំឡុងឆ្នាំ១៩៥៦ បានលួចឃុបឃិតជាមួយសហរដ្ឋអាមេរិក ក្នុងចេតនាផ្តួលរំលំរបបសង្គមរាស្រ្តនិយមរបស់សម្តេច នរោត្តម សីហនុ ដែលជាប្រមុខដឹកនាំបានផ្តល់គុណូបការៈគុណជាច្រើនសម្រាប់រូបលោក។ ល្បិចកិច្ចកលរបស់លោក សម សារី ក្នុងការដណ្តើមអំណាចនេះ ធ្វើឲ្យព្រះប្រមុខរដ្ឋ សម្ត្តេច នរោត្តម សីហនុ ដឹងជាមុន ហើយបានប្រកាសដកតំណែង និងឋានន្តរស័ក្តិសព្វបែបយ៉ាង។

គួរកត់សម្គាល់ថា នេះជាលើដំបូងហើយ ដែលប្រមុខដឹកនាំរាជរដ្ឋាភិបាល និងជាប្រមុខដឹកនាំនយោបាយឈ្នះៗដ៏កំពូលរបស់កម្ពុជា បានបញ្ចេញប្រតិកម្មដោយពាក្យសំដីតិះដៀលដ៏កម្រសម្រាប់អ្នកនយោបាយ។ ប្រតិកម្មគួរឲ្យភ្ញាក់ផ្អើលម្តងនេះ ធ្វើឲ្យមានការគិតថា ជីវិតនយោបាយរបស់លោក សម រង្ស៊ី ទំនងជាត្រូវបញ្ចប់ជាស្ថាពរគ្មានឱកាសនឹងឈានជើងចូលប្រឡូកក្នុងឆាកនយោបាយនៅកម្ពុជាបានទៀតឡើយ។ គេនៅចាំបានថា កន្លងមក នាយករដ្ឋមន្ត្រីកម្ពុជាសម្តេចតេជោ ហ៊ុន សែន ក៏ធ្លាប់ប្រកាសដាច់ណាត់ម្តងជាពីរដងរួចមកហើយថា បើសម្តេចចុះហត្ថលេខាស្នើព្រះមហាក្សត្រលើកលែងទោសឲ្យលោក សម រង្ស៊ី សម្តេចនឹងកាត់ដឺម្ខាងចោល៕ ដោយ ៖ ខេមរិន្ទ

ខេត្តតាកែវ ៖ ប្រភពព័ត៌មាន បានឲហយដឹងថា មានករណីរំលោភ និងប្លន់លោកយាយអាយុ ៧៨ឆ្នាំម្នាក់ បានសម្រេចត្រង់ចំណុចបន្ទប់ក្រោមផ្ទះរបស់លោកយាយរងគ្រោះ ស្ថិតនៅភូមិស្វាយស ឃុំរាមអណ្ដើក ស្រុកគីរីវង់ ខេត្តតាតែវ កាលពីវេលាម៉ោង៣ ទៀបភ្លឺ ឈានចូលថ្ងៃទី៣ ខែមិថុនា ឆ្នាំ២០១៩ ។

តាមប្រភពពីកន្លែងកើតហេតុ បានអោយដឹងថា ជនសង្ស័យបានស្រែក ហៅជនរងគ្រោះឲ្យបើកទ្វារ ខណ:នោះ ជនរងគ្រោះបានបើកទ្វារចេញមករកមើលមិនឃើញ គាត់ក៏ចូលទៅក្នុងបន្ទប់វិញ ស្រាប់តែឃើញជនសង្ស័យនៅក្នុងទីនោះដែរ ក្រោយមកក៏ចាប់ផ្ដើមធ្វើសកម្មភាពបង្ខំរំលោភផ្លូវភេទលើលោកយាយរងគ្រោះរហូតបានសម្រេច ហើយបានគំរាមយកចញ្ចៀន ១វង់ លុយ ៥ម៉ឺនរៀល ហើយចេញទៅក្រៅបាត់។

សូមជម្រាបថា ក្នុងថ្ងៃកើតហេតុ លោកយាយស្នាក់នៅក្នងផ្ទះនោះតែម្នាក់ឯងទេ។

ក្រោយកើតហេតុសមត្ថកិច្ច ចុះត្រួតពិនិត្យជុំវិញកន្លែងកើតហេតុ ដើម្បីប្រមូលភស្ភុតាងកសាងសំណុំរឿង និងកំណត់មុខសញ្ញាជនសង្ស័យ តាមស្រាវជ្រាវចាប់ជនល្មើសមកផ្ដន្ទាទោសទៅតាមផ្លូវច្បាប់៕ ដោយ ៖ សុផល

បន្ទាយមានជ័យ ៖ រដ្ឋបាលខេត្តបន្ទាយមានជ័យ បានរៀបចំពីធីអបអរសាទរ ទិវាសប្តាហ៍ជាតិ សុវត្ថិភាពចរាចរណ៍ផ្លូវគោកលេីកទី១២ រួមគ្នាគាំទ្រ ការរឹតបន្តឹងអនុវត្តន៍ច្បាប់ ស្តីពីចរាចរណ៍ផ្លូវគោក ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់ លោក អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ រួមនឹងមានការចូលរួមពីមន្ត្រីរាជការ សមត្ថកិច្ចពាក់ព័ន្ធគ្រប់ជាន់ថ្នាក់ ប្រជាពលរដ្ឋ សិស្ស-និស្សិត បានចូលរួម ដែលប្រព្រឹត្តនៅបរិវេនសួនមានជ័យ ក្រុងសិរីសោភ័ណ នាថ្ងៃទី ០៣ ខែមិថុនា ឆ្នាំ២០១៩ ។

ក្នុងឱកាសនោះ លោក អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានផ្តល់នូវអនុសាសន៍ មួយចំនួនដូចជា ៖ ១/ត្រូវពាក់មួកសុវត្ថិភាពជានិច្ចក្នុងពេលធ្វើដំណើរតាមទោចក្រយានយន្ត ។ ២/ មិនត្រូវបើកបរលើសល្បឿនកំណត់ដាច់ខាត ។ ៣/ មិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត ។ ៤/ ត្រូវគោរពសិទ្ធិអាទិភាពគោរពសញ្ញាចរាចរណ៍និងប្រកាន់ស្ដាំជានិច្ច ។ ៥/ ត្រូវពាក់ខ្សែក្រវ៉ាត់សុវត្ថិភាពជានិច្ចក្នុងពេលធ្វើដំណើរទៅតាមរថយន្ត។ ៦/ មិនត្រូវបត់ ឬជែងក្នុងភាពប្រថុយប្រថាន ឬប្រើទូរសព្ទក្នុងដោយគ្មានឧបករណ៍ភ្ជាប់សម្លេងទំនាក់ទំនងឡេីយ។ ៧/ ត្រូវពិនិត្យលក្ខណៈបច្ចេកទេសយានយន្តជានិច្ចពិសេសពិនិត្យមើលកង់ ចង្កូត ហ្វ្រាំង និងភ្លើងបំភ្លឺ-ល- មុនពេលចេញធ្វេីដំណេីរ ។ ៨/ សូមកុំផ្ទុកអ្នកដំណើរឬទំនិញលើសច្បាប់កំណត់ ចំពោះរថយន្តដឹកអ្នកដំណើរ និងរថយន្តដឹកកម្មករ មិនត្រូវផ្ទុកអ្នកដំណើរ ឬកម្មករលើដំបូល និងសូមមេត្តាកុំដំឡើងថ្លៃធ្វើដំណើរ។ ៩/ មិនត្រូវបើកបរក្នុងស្ថានភាពងងុយដេកជាដាច់ខាត។ ១០/ ត្រូវបើកបរក្នុងស្មារតីប្រុងប្រយ័ត្នជានិច្ចប្រកបដោយសីលធម៌យោគយល់អធ្យាស្រ័យគ្នា។ ជាមួយគ្នានោះឯកឧត្តម អភិបាលខេត្តក៏បានជម្រុញដល់ក្មួយគរុកសិស្ស និស្សិត សិស្សានុសិស្ស ត្រូវចូលរួមគោរពច្បាប់ចរាចរណ៍ឲ្យបានទាំអងស់គ្នា និងត្រូវចូលរួមអប់រំ ផ្សព្វផ្សាយពីច្បាប់ចរាចរណ៍ ទៅដល់មិត្តភត្កិ បងប្អូន តាមសាលារៀន សហគមន៍ ឲ្យបានយល់ច្បាស់ពីច្បាប់ចរាចរណ៍ផ្លូវគោក ដេីម្បីចូលរួមកាត់បន្ថយគ្រោះថ្នាក់ចរាចណ៍ដែលកេីតមាននៅក្នុងប្រទេសកម្ពុជា ពិសេសអនុវត្តន៍តាមអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រ កម្ពុជា “ថ្ងៃ នេះ ថ្ងៃស្អែក សូមកុំឲ្យមានគ្រោះថ្នាក់ចរាចរណ៍ ” ។

យោងតាមរបាយការណ៍របស់ស្នងការដ្ឋាននគបាលខេត្តបានបង្ហាញថា ៖ ក្នុងឆមាសទី១ ឆ្នាំ២០១៩ គ្រោះថ្នាក់ចរាចរណ៍កេីតមានទូទាំងខេត្តបន្ទាយមានជ័យកើតឡើងមានចំនួន ១០១លើក ក្នុងនោះរួមមាន៖ គ្រោះថ្នាក់ប្រភេទធ្ងន់ចំនួន៩៥ករណី , គ្រោះថ្នាក់ប្រភេទស្រាលចំនួន០៦ករណី បណ្ដាលឲ្យមនុស្សស្លាប់៦៣នាក់/ស្រី ១៤នាក់ ,របួសធ្ងន់ចំនួន៩៣នាក់/ស្រី២០នាក់ ,របួសស្រាលចំនួន៥៧នាក់/ស្រី១១នាក់ ។

សរុបគ្រោះថ្នាក់ចរាចរណ៍ចំនួន ២១៣នាក់ ដោយក្នុងនោះមិនមានមួកសុវត្ថិភាព និងមិនពាក់ខ្សែក្រវាត់ចំនួន៩០នាក់ ។ ចំពោះ ករណីដែលបង្កឲ្យកេីតមានគ្រោះចរាចរណ៍ភាគច្រេីនបង្កឡេីងដោយកត្តាមនុស្ស ៩៨/១០១ករណី ។ ករណី ដែលគ្រោះថ្នាក់ច្រេីនជាងគេគួឲ្យកត់សំគាល់មាន បេីកបរលេីសល្បឿនកំណត់ (ល្បឿនលឿន ) ,បេីកបរក្នុងស្ថានភាពស្រវឹង, បេីកបរជែងក្នុងស្ថានភាពគ្រោះថ្នាក់ និងមិនគោរពច្បាប់ ៕ ដោយ ៖ ស.រ.