បន្ទាយមានជ័យ ៖ យុវជនមួយក្រុមត្រូវបានបញ្ជូនទៅតុលាការខេត្តបន្ទាយមានជ័យដោយកម្លាំងជំនាញនគរបាលប្រឆាំងគ្រឿងញៀននៃអធិការដ្ឋាននគរបាលក្រុងប៉ោយប៉ែតបន្ទាប់ពីឆែកឆេររកឃើញគ្រឿងញៀនប្រភេទមេតំហ្វេតាមីនទឹកកកនិងគ្រាប់ដែលលាក់ទុកនៅក្នុងបន្ទប់ជាច្រើនថង់។

លោក វរសេនីយ៍ឯក ធិន ស៊ិនដេត អធិការនៃអធិការដ្ឋានក្រុងប៉ោយប៉ែតបានអោយដឹងថានៅព្រឹកថ្ងៃទី២៦ខែឧសភាឆ្នាំ២០១៩កម្លាំងបានឃាត់ធ្វើការឃាត់ខ្លួនមុខសញ្ញាសង្ស័យម្នាក់ឈ្មោៈ សៃ វ៉ាន់ ណាន់ ភេទ ប្រុស អាយុ ១៨ ឆ្នាំ ដែលសំងំលាក់ខ្លួនក្នុងបន្ទប់លេខ៤នៃផ្ទះសំណាក់មួយកន្លែងយីហោ ស្រេងល្អ ដែលស្ថិតភូមិ អូរជ្រៅ សង្កាត់ក្រុងប៉ោយប៉ែត។ក្រោយឃាត់ខ្លួនកម្លាំងជំនាញបានឆែកឆេររកឃើញវត្ថុតាងម្សៅក្រាមពណ៌សថ្លាចំនួន ១២កូនថង់តូច និង ១២កូនថង់តូចទៀតកិបនិងលុយក្រដាស១០០ៗរៀលហើយថ្នាំគ្រាប់ WY ចំនួន៣៧គ្រាប់ និងជញ្ជីងសំរាប់ថ្លឹងថ្នាំញៀន១គ្រឿង ដបកែឆ្នៃចំនួន០១។អធិការក្រុងប៉ោយប៉ែត លោក ធិន ស៊ិនដេត បានបន្តទៀតថា ក្រោយធ្វើការសាកសួរមុខសញ្ញាសង្ស័យសមត្ថកិច្ចបានបន្តឃាត់ខ្លួនជនសង្ស័យប្រើប្រាស់ថ្នាំញៀនចំនួន០៨នាក់បន្ថែមទៀតដកហូតវត្ថុតាងម្សៅក្រាមពណ៌សថ្លាចំនួន០៤កូនថង់តូច និងដបកែឆ្នៃសំរាប់ជក់ថ្នំាញៀនចំនួន០១ផងដែរ។ លុះដល់ម៉ោង ១៧និង៤៥ នាទី ថ្ងៃខែឆ្នាំដដែលបានបន្តឃាត់ខ្លួនជនសង្ស័យឈ្មោៈ រឿន សារុន ហៅ ប៊ីនៅចំណុចផ្លូវសុខភាពស្ថិតនៅភូមិ បាលិលេយ្យ២ សង្កាត់/ក្រុង ប៉ោយប៉ែត ខេត្ត បន្ទាយមានជ័យចាប់យកវត្ថុតាងរួមមាន ម្សៅក្រាមសថ្លា ចំនួន១កូនថង់ធំល្មមដែលជនសង្សយ័ វេចខ្ចប់ និងថង់ខ្មៅ។ពេលឃាត់ខ្លួនជនសង្ស័យបានប្រតាយប្រតប់គ្នារួចក៏គ្រវែងលើស្មៅ។

ក្នុងហេតុការណ៍ឃាត់ខ្លួនជនសង្ស័យចុងក្រោយនេះសមត្ថកិច្ចក៏ឈានទៅឃាត់ខ្លួនជនសង្ស័យយម្នាក់ទៀតឈ្មោះ ឆៃ កុសល់ (ហៅម៉ៅ) ភេទប្រុស អាយុ ២២ ឆ្នាំ ស្នាក់នៅភូមិក្បាលកោះ សង្កាត់/ក្រុងប៉ោយប៉ែតខេត្តបន្ទាយមានជយ័ពីបទប្រើប្រាស់៕ ​ដោយ ៖ ន.វ.

ភ្នំពេញ ៖បុរសវ័យ ២៩ឆ្នាំម្នាក់ ជាបុគ្គលិកក្រុមហ៊ុនលក់អចលនៈទ្រព្យ KH Land ត្រូវស្ត្រីជាប្រពន្ធ រួមទាំងម្តាយក្មេកកាប់ និងចាក់បណ្តាលឲ្យស្លាប់ ក្នុងពេលប្រតាយប្រតប់គ្នា ដោយសារមានទំនាស់ ក្នុងគ្រួសារ រឿងប្រពន្ធសុំលុយមួយម៉ឺនរៀល តែប្តី(ជនរងគ្រោះដែលស្លាប់) មិនអោយ ។

ស្ត្រីជាប្រពន្ធ និងស្ត្រីជាម្តាយក្មេក ត្រូវបាននគរបាលខណ្ឌសែនសុខ បានឃាត់ខ្លួន ខណៈដែលអ្នក ទាំងពីរនាក់ ម្តាយកូនបានចូលសារភាព កាលពីវេលាម៉ោង ប្រមាណ ៨យប់ថ្ងៃទី២៤ ខែឧសភា ឆ្នាំ២០១៩ បន្ទាប់រួមគ្នាសម្លាប់ប្តី និងជាកូនប្រសាររបស់ខ្លួន កាលពីវេលាម៉ោងប្រមាណ ៩ព្រឹក ថ្ងៃទី២៤ ខែឧសភា នៅចំណុចក្នុងបន្ទប់ជួលមួយកន្លែង តាមផ្លូវបេតុង ក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ។

ស្ត្រីសង្ស័យទាំងពីរនាក់ មាន ១-ឈ្មោះ គង់ ធីតា អាយុ៤៩ឆ្នាំ ជាម្តាយ ជនជាតិខ្មែរ មុខរបរនៅផ្ទះ ស្នាក់នៅផ្ទះលេខ ២៣J ផ្លូវបេតុង ក្រុម៧៦ ភូមិ១៣ សង្កាត់ទន្លេរបាសក់ ខណ្ឌចំការមន និង២-ឈ្មោះ ង៉ូយ សុម៉ារី អាយុ២០ឆ្នាំ ជាប្រពន្ធ ស្នាក់នៅបន្ទប់ជួលកន្លែងកើតហេតុខាងលើ។ ចំណែក បុរសរងគ្រោះឈ្មោះ គឹម យ៉ត ភេទប្រុស អាយុ ២៩ឆ្នាំ ជនជាតិខ្មែរ មុខរបរបុគ្គលិកក្រុមហ៊ុន អចលនទ្រព្យ KH Land បានស្លាប់នៅក្នុងបន្ទប់ជួលខាងលើជាមួយគ្នា។

តាមព័ត៌មានបានអោយដឹងថា ជនសង្ស័យ និង ជនរងគ្រោះបានរៀបការនឹងគ្នានៅថ្ងៃទី២៦ ខែ មករា ឆ្នាំ ២០១៩ ហើយ បាននាំគ្នាមកស្នាក់នោះផ្ទះកើតហេតុ ។ នៅវេលាម៉ោងប្រមាណ ៩ព្រឹក ថ្ងៃទី២៤ ខែឧសភា ជនសង្ស័យឈ្មោះ ង៉ូយ សុម៉ារី បានសុំលុយប្តីចំនួនមួយម៉ឺនរៀល តែប្តីមិនព្រម ឲ្យ ក៍កើតមានទំនាស់គ្នាបែកផ្សែង។ ខណៈនោះបុរសជាប្តីក៍បានច្របាប់ស្ត្រីជាប្រព្ធឈ្មោះ ង៉ូយ សុម៉ារី ហើយនាងក៍បានស្រែកអោយម្តាយជួយ។

ប្រភពបន្តទៀតថា ភ្លាមនោះ ជនសង្ស័យជាម្តាយឈ្មោះ គឹម ធីតា ក៍ទាញកាន់កាំបិតតាំងបុ័ងតោ មកកាប់លើជនរងគ្រោះជាកូនប្រសារចំកញ្ចឹងក បណ្តាលឲ្យដួល។ ដោយសារតែខ្លាចតដៃស្រ្តីជា ប្រពន្ធឈ្មោះ ង៉ូយ សុម៉ារី បានខ្សែភ្លើង និងស្កុតចងរុំដៃនិងជើងរួច យកកូនកាំបិតចាក់ចំនួន ២ កាំបិតទៅលើប្តី បណ្តាលអោយស្លាប់តែម្តង។

តាមព័ត៌មានអោយដឹងទៀតថា បន្ទាប់ពីរួមដៃគ្នាកាប់ និងចាក់សម្លាប់ប្តីរួចហើយ ក៍បានចាក់សោរ បន្ទប់ និងបាននាំគ្នាទៅប្រាប់ឪពុក ដែលជាមន្ត្រីនគរបាល គាត់ក៏បានណែនាំអោយចូលសារភាព ហើយត្រូវនគរបាលចាប់ឃាត់ខ្លួនតែម្តង ។

តាមព័ត៌មានបានអោយដឹងថា កន្លងមកបន្ទាប់ពីរៀបការរួច ២នាក់ប្តីប្រពន្ធតែមានទំនាស់គ្នា ក្នុង គ្រួសាររឿងប្រចណ្ឌ បន្ទាប់ពីប្រពន្ធសុំប្តីទៅចុះសំបុត្រអាពាហ៍ពិហាហ៍ តែប្តីមិនព្រមទៅសោះ ដោយចេះតែគេចវេសថា ចាំ ២ឆ្នាំទៀតសិន ។ លុះនៅថ្ងៃទី២៣ ខែឧសភា នេះ ស្រ្តីជាប្រពន្ធ បាន ហៅម្តាយរបស់ខ្លួន ឲ្យមកជួយមើលប្តីដែលមានជំងឺ មិននឹកស្មានថា មានទំនាស់គ្នា ឈានទៅកាប់ សម្លាប់បែបនេះសោះ៕

ខេត្តពោធិ៍សាត់ ៖ មន្រ្ដីជំនាញរដ្ឋបាលព្រៃឈើរួមមាន អធិការដ្ឋានខាងត្បូងបឹងទន្លេសាប ខណ្ឌសង្កាត់ នៃមន្ទីរកសិកម្ម រុក្ខាប្រម៉ាញ់ និងនេសាទ ខេត្តពោធិ៍សាត់ បានចុះប្រតិបត្តិការបង្រ្កាប ឃាត់ចាប់រថយន្ត ១គ្រឿង ឆែកឆេរឃើញសត្វពស់ចំនួន ៥ស្បោង ដាក់ក្នុងកេសបិទស្កុតជិត ចំនួន ៥កេស មានទម្ងន់ ប្រមាណជិត ១០០គីឡូក្រាម។

ប្រតិបត្តិការខាងលើធ្វើឡើងនៅ ថ្ងៃទី២៤ ខែឧសភា ឆ្នាំ២០១៩ នៅលើកំណាត់ផ្លូវជាតិលេខ៥ ស្ថិត ក្នុងភូមិទួលម្កាក់ សង្កាត់រលាប ក្រុងពោធិ៍សាត់ ខេត្តពោធិ៍សាត់។អាជ្ញាធរជំនាញបានឲ្យដឹងថា អ្នក បើកបរ និងជាម្ចាស់រថយន្តម៉ាកសាំយ៉ុង ពណ៌ស្លែ ពាក់ស្លាកលេខ បាត់ដំបង 2B-1410 មានប្រពន្ធ និងកូនស្រីតូចម្នាក់ផង ក្នុងរថយន្តមានកេសក្រដាសចំនួន ៥កេស បង្កប់សត្វពស់ជាច្រើនក្បាល។

សេចក្តីរាយការណ៍បន្តថា ពួកគាត់ស៊ីឈ្មួលដឹកឲ្យគេចេញពីចំណុចឃុំព្រៃស្វាយ ស្រុកមោងឫស្សី ខេត្តបាត់ដំបង ដោយមិនដឹងថា កេសទាំងនោះ ជាកេសដាក់សត្វពស់នោះទេ។

ប្រភពព័ត៌មានពីមន្រ្ដីជំនាញ ក្នុងប្រតិបត្តិការចុះបង្ក្រាបបានឲ្យដឹងដែរ ថា ក្រោយពីបានបកស្កុតដែល បិទលើកេសក្រដាសចំនួន០៥កេស ឃើញថា ក្នុង១កេស មានសត្វពស់ចំនួន១ស្បោង ដោយមិនទាន់ បានកំណត់ចំនួនសត្វពស់ច្បាស់លាស់នៅឡើយទេ តែគ្រាន់តែដឹងថាទាំងអស់មានទម្ងន់ប្រមាណ ជិត ១០០គីឡូក្រាម។ មន្រ្ដីជំនាញបន្តទៀតថា សត្វពស់ទាំងអស់មានច្រើនក្បាល មិនបានរាប់នោះឡើយ ហើយក៏មិនទាន់បានដឹងប្រភេទអ្វីខ្លះនោះដែរ ខណៈកំពុងមមាញឹកបន្តនីតិវិធីនៅឡើយ៕

ខេត្តពោធិ៍សាត់ ៖ សត្វគោញី ឈ្មោលសរុបចំនួន ៧ក្បាល ត្រូវបានរន្ទះបាញ់ងាប់ភ្លាមៗ នៅលើទី ទួល ពីមុខខ្ទមអ្នកតាមួយកន្លែង ស្ថិតនៅក្នុងភូមិសានសរ ឃុំអន្សាចំបក់ ស្រុកក្រគរ ខេត្តពោធិសាត់ នៅ រសៀលថ្ងៃទី២៤ ខែឧសភា ឆ្នាំ២០១៩ នេះ។

ប្រភពពីសមត្ថកិច្ចមូលដ្ឋានបានអោយដឹងថា នៅពេលវេលាដូចខាងលើ ពិតជាមានករណីរន្ទះបាញ់ បណ្ដាលឲ្យងាប់សត្វគោ១ហ្វូង សរុបចំនួន ៧ក្បាល ដែលកំពុងស៊ីស្មៅនៅលើទីទួល អ្នកតាមួយ កន្លែង ខណៈមេឃកំពុងមានភ្លៀងមួយមេយ៉ាងធំ លាយឡំទៅដោយខ្យល់កន្រ្តាក់ និងផ្គររន្ទះផ្ទួនៗ ផង។

សេចក្ដីរាយការណ៍ បានឲ្យដឹងទៀតថា ក្នុងពេលកើតហេតុភ្លាមៗ សត្វគោញី និងឈ្មោល ដែល ត្រូវរន្ទះបាញ់ងាប់នោះ សមត្ថកិច្ចនៅមិនទាន់ដឹងថា ជារបស់អ្នកណាខ្លះនោះទេ។

សូមបញ្ជាក់ផងដែរថា កន្លងទៅថ្មីៗនេះ ធ្លាប់កើតមានករណីរន្ទះបាញ់បណ្តាល អោយមនុស្សប្រុស ស្រី ពីរនាក់ប្តីប្រពន្ធ បានស្លាប់ និង៣នាក់ផ្សេងទៀតបានរងរបួស នៅពេលដែលពួគគាត់ត្រឡប់ មកពីដកផ្សិត ហើយដើរទៅផ្ទះវិញ ស្ថិតនៅក្នុងស្រុកក្រគ ខេត្តពោធិសាត់ ផងដែរ ។

ពាក់ព័ន្ធនឹងករណីខាងលើនេះ សមត្ថកិច្ចបានអំពាវនាវដល់បងប្អូនប្រជាពលរដ្ឋ ត្រូវតែមានការប្រុង ប្រយ័ត្នខ្ពស់ ខណៈមានភ្លៀងធ្លាក់ ពិសេសត្រូវស្វែងយល់អំពីការការពារសុវត្ថិភាព ក្នុងពេលមាន ភ្លៀងធ្លាក់ និងផ្ទររន្ទះ៕

ខេត្តកំពង់ឆ្នាំង ៖ កាលពីពេលថ្មីៗនេះ មានជនល្មើសមួយក្រុមជិះឡានទំនើប ប្រដាប់ដោយកាំភ្លើង បាញ់សត្វ បានលួចចូលទៅបាញ់សត្វក្ងោក នៅព្រៃសហគមន៍ ក្បែរវត្តភ្នំព្រះធាតុស្ថិត ក្នុងភូមិច្រក កូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង។ នេះបើតាមការអះអាងរបស់ គណៈកម្មការវត្ត ភ្នំព្រះធាតុ។

លោកតា ចន្ទ័ ពន្លឺ ប្រធានគណៈកម្មការវត្ត ភ្នំប្រធាតុ បានមានប្រសាសន៍ប្រាប់ភ្នាក់ងារព័ត៌មាន នៅ រសៀលថ្ងៃទី២៥ ខែឧសភា នេះថា កាលពីថ្ងៃទី២៤ ខែឧសភា កន្លងទៅនេះ មាន ជនល្មើសមួយ ក្រុមជិះឡានយ៉ាងទំនើប មានគ្នីគ្នា ៣នាក់ ប្រដាប់ដោយកាំភ្លើងបាញ់សត្វមួយដើម បានមកលួច បាញ់សត្វក្ងោកមួយក្បាល នៅក្នុងព្រៃសហគមន៍ ដែលមានទីតាំងស្ថិតជាប់នឹងវត្តភ្នំប្រធាតុ ។

ខណៈកូនសិស្សគណរបស់វត្ត បានលួចថតរូបភាពពីសកម្មភាពនៃការបាញ់សត្វក្ងោកខាងលើនេះ ទៀតផង បន្ទាប់មកពួកក្រុមល្មើសទាំងនោះ បានរត់ឡើងរថយន្តចេញអស់ទៅ។ លោកបានបញ្ជាក់ថា កាលពីបួនប្រាំថ្ងៃមុន ក៏មាន ការលួចបរបាញ់សត្វក្ងោកនេះដែរ ប៉ុន្តែសត្វក្ងោក ត្រូវគ្រាប់បានធ្លាក់ចូលមកងាប់នៅក្នុងវត្ត ហើយត្រូវបានគណៈកម្មការរើសយកទៅ ឆ្កាងដើម្បីរក្សា ទុក។

គណៈកម្មការវត្តបានបញ្ជាក់ថា នៅក្នុងព្រៃសហគមន៍ ដែលជាប់នឹងភ្នំប្រធាតុ មានសត្វក្ងោក ជាច្រើនក្បាល ជាមួយគ្នានោះ ក៍មានសត្វឈ្លូស ទន្សាយ ជ្រូកព្រៃ និងសត្វព្រៃ ជាច្រើនទៀត ហេតុ នេះហើយ លោកសូមអំពាវនាវដល់អាជ្ញាធរ មានសមត្ថកិច្ចគ្រប់ជាន់ថ្នាក់ មេត្តាជួយការពារថែរក្សា សត្វព្រៃ ទាំងនោះផង ជាពិសេសសត្វក្ងោក ដែលជាសត្វយ៉ាងកម្រ។ ម៉្យាងវិញទៀតនៅតំបន់ខាងលើនេះ ជាតំបន់ទេសចរណ៍ផង ប្រសិនបើមានសត្វព្រៃ ទាំងនោះ សម្រាប់ការទស្សនាកម្សាន្ត នោះភ្ញៀវទេសចរនឹងកាន់តែកើនឡើងជាមិនខាន៕

ភ្នំពេញ៖ រថយន្តដឹកខ្សាច់មួយគ្រឿងបើកលឿនពេកដល់ចំណុចផ្លូវកោង បួងចង្កូតខ្លាំងបានក្រឡាប់ផ្ងារជើងមួយចំហៀង ចាក់ខ្សាច់រាយពេញផ្លូវ និងរបួសបាក់ដៃតៃកុងរថយន្ដម្នាក់។ ហេតុការណ៍នេះកើតឡើងនៅវេលាម៉ោង៩ និង៣០នាទីព្រឹក នៅថ្ងៃទី២៤ ខែឧសាភា ឆ្នាំ២០១៩ ស្ថិតតាមបណ្ដោយផ្លូវ ៦០ម៉ែត្រទល់មុខ ក្រុមហ៊ុនរថយន្ដសាដេន ក្នុងសង្កាត់ចាក់អង្រែកលើ ខណ្ឌមានជ័យ។

បេីតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនពេលកើតហេតុគេឃើញរថយន្ដដឹកខ្សាច់មួយគ្រឿងក្បាលពណ៌ខៀវខ្ចី ពាក់ស្លាកលេខកណ្ដាល 3A-0335 បើកបរដោយបុរសម្នាក់បើកបរក្នុងទិសដៅពីជើង មកត្បូង ក្នុងល្បឿនលឿន ខណៈមកដល់នឹងចំណុចផ្លូវកោង ជាកន្លែងកើតហេតុ តែកុងបានបួងចង្កូតកាច់ ក៏ក្រឡាប់ផ្ងារជើងមួយចំហៀងតែម្ដង ហើយចាក់ខ្សាច់រាយពេញផ្លូវ និងបណ្ដាលឲ្យបាក់ដៃតៃកុងរថយន្ដម្នាក់បានបញ្ជូនទៅសង្គ្រោះនៅមន្ទីពេទ្យភ្លាមៗ ហេតុការណ៍ខាងលើនេះមិនបង្កគ្រោះថ្នាក់អ្នកដទៃទេ។

ក្រោយពេលកើតហេតុសមត្ថកិច្ចក៏បានមកដល់ចំណុចកើតហេតុ បានទំនាក់ទំនងខាងរថយន្ដស្ទូចមក ដើម្បីស្ទូចរថយន្ដចេញពីកន្លែងកើតហេតុ ចំពោះម្ចាស់រថយន្ដបង្កហេតុ រង់ចាំសមត្ថកិច្ចដោះស្រាយនៅពេលក្រោយ៕

ភ្នំពេញ ៖ បន្ទាប់ពីបានបញ្ចប់នីតិវិធីនៃការសុំចុះឈ្មោះភ្នាក់ងារគណបក្សនយោបាយ ដើម្បីចូលរួមសង្កេតមើលការបោះឆ្នោតជ្រើសរើសក្រុមប្រឹក្សា អាណត្តិទី៣ ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០១៩ គ.ជ.ប បានទទួលស្គាល់ជាផ្លូវការភ្នាក់ងារគណបក្សនយោបាយ សរុបចំនួន ៧០៤ នាក់ មកពីគណបក្សនយោបាយចំនួន ៥ ។

គណបក្សនយោបាយទាំងនោះ បានដាក់ភ្នាក់ងាររបស់ខ្លួនមានចំនួនដូចខាងក្រោយ ៖
– គណបក្សប្រជាជនកម្ពុជា បានដាក់ភ្នាក់ងារទាំងពេញសិទ្ធិ និងបម្រុង ចំនួន ៤០៦ នាក់
– គណបក្សហ៊្វុនស៊ិនប៉ិច បានដាក់ភ្នាក់ងារទាំងពេញសិទ្ធិ និងបម្រុង ចំនួន ១០៩ នាក់
– គណបក្សខ្មែររួបរួមជាតិ បានដាក់ភ្នាក់ងារទាំងពេញសិទ្ធិ និងបម្រុង ចំនួន ៩៧ នាក់
– គណបក្សឆន្ទៈខ្មែរ បានដាក់ភ្នាក់ងារទាំងពេញសិទ្ធិ និងបម្រុង ចំនួន ៦៤ នាក់
– គណបក្សយុវជនកម្ពុជា បានដាក់ភ្នាក់ងារទាំងពេញសិទ្ធិ និងបម្រុង ចំនួន ២៨ នាក់
ការសុំចុះឈ្មោះភ្នាក់ងារគណបក្សនយោបាយ ត្រូវបានបញ្ចប់កាលពីថ្ងៃទី២ ខែឧសភា ឆ្នាំ២០១៩។
សូមជម្រាបជូនថា គណបក្សនយោបាយ ចំនួន ៧ បានចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សា អាណត្តិទី៣។ ការដាក់ភ្នាក់ងារគណបក្សនយោបាយ ដើម្បីចូលរួមសង្កេតមើលដំណើរការបោះឆ្នោតនៅតាមការិយាល័យបោះឆ្នោត និងការិយាល័យរាប់សន្លឹកឆ្នោត គឺជាសិទ្ធិរបស់គណបក្សនយោបាយ។ ការសម្រេចដាក់ ឬមិនដាក់ភ្នាក់ងារគណបក្សនយោបាយ គឺអាស្រ័យទៅលើលទ្ធភាពរបស់គណបក្សនយោបាយនីមួយៗ ៕

( ​ការពិនិត្យដំណើរការ ការបោះពុម្ពសន្លឹកឆ្នោត របស់ គ ជ ប)

ខេត្ដកំពង់ចាម ៖ នៅថ្ងៃទី២៤ ខែឧសភា ឆ្នាំ២០១៩ នៅប៉ុស្តិ៍រដ្ឋបាលខ្នុរដំបង បានរៀបចំពិធីផ្តល់អំណោយមនុស្សធម៌ ចែកសៀវភៅ និងថវិកាដល់សិស្សានុសិស្ស និងលោកគ្រួ អ្នកគ្រួ នៅសាលាបឋមសិក្សាខ្នុរដំបង ដែលមានសិស្សចំនួន ២៥០នាក់ និងលោកគ្រូ អ្នកគ្រូចំនួន ១០ នាក់ ស្ថិតក្នុងភូមិខ្នុរដំបង ឃុំខ្នុរដំបង ស្រុកជើងព្រៃ ខេត្ដកំពង់ចាម។

មន្ត្រីក្នុងក្រុមការងារផ្តល់អំណោយមនុស្សធម៌នេះ បានឲ្យដឹងថា ពិធីនេះ ដឹកនាំដោយលោក ប្រាក់ សុគុណ អធិការនគរបាលស្រុកជើងព្រៃ និងតំណាងប៉ុស្តិ៍ ខ្នុរដំបង រួមទាំងសប្បុរសជននានានៅក្នុងមូលដ្ឋាន ដែលមានឈ្មោះដូចខាងក្រោម៖
១-លោកអធិការ ប្រាក់ សុគុណ ថវិកាចំនួន ២០ម៉ឺនរៀល។
២-លោក អនុសេនីយ៍ឯកកៅ គឹមឃននាយប៉ុស្តិ៍ខ្នុរដំបង ថវិកាចំនួន ២៥ម៉ឺនរៀល។
៣-លោកអនុសេនីយ៍ឯកស្រ៊ុន ខេងនាយរងប៉ុស្តិ៍ខ្នុរដំបងថវិកាចំនួន ១០មឺុនរៀល។
៤-លោកអនុសេនីយ៍ឯកហ៊ូ ហឿនងនាយរងប៉ុស្តិ៍ខ្នុរដំបង ថវិកាចំនួន ៥មឺុនរៀល។
៥-លោកអនុសេនីយ៍ទោចន ភាពមន្រ្ដីប៉ុស្តិ៍ខ្នុរដំបងថវិកាចំនួន ២មឺុនរៀល។
៦-លោកអនុសេនីយ៍ឯកឡេង សីហានាយប៉ុស្តិ៍គោករវៀងថវិកាចំនួន ២០មឺុនរៀល។
៧-ចៅអធិការវត្ដរវៀងកេីត សៀវភៅចំនួន ២៥០ក្បាល ថវិកាចំនួន ៦២មុឺនរៀល ក្រមាចំនួន០៦ និងសារុងចំនួន០៤។
៨-ចៅអធិការវត្ដសេរីខ្នុរដំបង ថវិកាចំនួន ១២៥.០០០មុឺនរៀល។
៩-លោក យិន យ៉ុម គណៈកម្មាវត្ដសេរីខ្នុរដំបង ក្រមាចំនួន១២ ថវិកាចំនួន ១២មុឺនរៀល។
១០-លោក ប៉ែន សុផល បុគ្គលិកកាសែតមេគង្គប៉ុស្ដិ៍ ប្រចាំខេត្តកំពង់ចាម ថវិកាចំនួន ១០មុឺនរៀល។
១១- លោក មំុ អូន គុណ ជ្រួក ផេង ប្រជាពលរដ្ឋរស់នៅភូមិរវៀង និងលោក ទូច (ផ្អាវ) សៀវភៅចំនួន ២៣០ ក្បាល និងប៊ិចចំនួន ៤៦០ដេីម។
១២-លោក កុយ ស៊ុយមេភូមិឈូកនិងភរិយាថវិការចំនួន១០៦០០០មុឺនរៀល។
១៣-លោក សួស សំនាងសហជីពប្រចាំរោងចក្រលីងគុនថវិការចំនួន ២០ម៉ឺនរៀល។
១៤-លោក សាយ វុធនិងភរិយានៅភូមិខ្នុរដំបងថវិការចំនួន០៩មុឺនរៀល។
១៥-លោក ជិន ចាវ នៅភ្នំពេញ ថវិកាចំនួន ០២ម៉ឺនរៀល។

ថវិកាទាំងអស់ដែលបងប្អូនចូលរួមសរុប ចំនួន ២.១១១.០០០រៀល សៀវភៅចំនួន ៥០០ក្បាល និងប៊ិចចំនួន៤៦០ដេីម។ ក្នុងនោះដែរ ចែកឲ្យសិស្សចំនួន ២៥១ នាក់ ក្នុងម្នាក់ៗទទួលបានសៀវភៅ ០២ក្បាល ចំពោះលោកគ្រូ អ្នកគ្រូ វិញ មានចំនួន ១០នាក់ ក្នុងម្នាក់ៗទទួលបានក្រមាចំនួន ១ សារុង ១ និងថវិកាចំនួន ២ម៉ឺនរៀល។ ក្រៅពីនេះ ថវិកាដែលនៅសល់ ត្រូវបានរៀបចំទិញអង្ករចែកជូនជនចាស់ជរា ទីទាល់ក្រចំនួន ២គ្រួសារផងដែរ។

ក្នុងពិធីចែកអំណោយនេះដែរ លោកគ្រូ អ្នកគ្រូ និងសិស្សានុសិស្សទាំងអស់ បានសម្ដែងការត្រេកអរ និងអរគុណដល់លោកអធិការនគរបាលស្រុកជើងព្រៃ ដែលរៀបចំឲ្យពិធីនេះ ដោយ បានកៀងគរបងប្អូនសប្បុរសជននានាចូលរួមបរិច្ចាគថវិកា សម្ភារៈ និងចំណាយពេលវេលា នាំយកនូវអំណោយដ៏ថ្លៃថ្លាទាំងអស់ មកចែកដល់សិស្សានុសិស្សក្នុងសាលាបឋមសិក្សាខ្នុរដំង ដែលបង្ហាញឲ្យឃើញពីការយកចិត្តទុកដាក់ពីសំណាក់ថ្នាក់ដឹកនាំក្នុងមូលដ្ឋាន ក៏ដូចជាសាមគ្គីភាព មិនប្រកាន់វណ្ណៈ ចេះជួយគ្នាក្នុងគ្រាក្រ។

លោក ប្រាក់ សុគុណ អធិការនគរបាលស្រុកជើងព្រៃ បានមានប្រសាសន៍ក្នុងឱកាសនោះថា ទោះបីជា អំណោយទាំងនេះ មានបរិមាណតិចតួចក្តី តែបង្ហាញឲ្យឃើញថា បងប្អូនប្រជាពលរដ្ឋ បានរួមចំណែកលើស្ទួយវិស័យអប់រំយ៉ាងខ្លាំង ហើយលោកក៏បានថ្លែងដោយជំនួសមុខឲ្យលោកគ្រូ អ្នកគ្រូ និសិស្សានុសិស្សថ្លែងអំណរគុណដល់សប្បុរសជនដែលបានចូលរួមក្នុងសកម្មភាពមនុស្សធម៌នាថ្ងៃនេះ។

លោក ប្រាក់ សុគុណ ក៏បានផ្តាំផ្ញើដល់ក្មួយៗសិស្សានុសិស្ស ឲ្យខិតខំសិក្សារៀនសូត្រ ក្រេបយកចំណេះវិជ្ជា ត្រងត្រាប់ស្តាប់ការបង្រៀនរបស់លោកគ្រូ អ្នកគ្រូ ដើម្បីក្លាយខ្លួនជាសិស្សល្អ ជាសិស្សពូកែក្នុងសាលា ជាពលរដ្ឋល្អក្នុងសង្គម ក៏ដូជា សម្រាប់ជីវិតដ៏ថ្លៃថ្លារបស់ខ្លួននាពេលអនាគតផងដែរ៕ ដោយ ៖ សុផល

ភ្នំពេញ ៖ សម្រាប់យុទ្ធនាការឃោសនាបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៣ រយៈពេល ៨ថ្ងៃ ដែលបានចាប់ផ្តើមកាលពីថ្ងៃទី១៧ ខែឧសភា ឆ្នាំ ២០១៩ កន្លងទៅ នៅទូទាំងប្រទេស ត្រូវបិទបញ្ចប់នៅថ្ងៃទី២៤ ខែឧសភា ឆ្នាំ២០១៩ នេះ ដោយជាទូទៅ យុទ្ធនាការ ក្នុងរយៈពេលប៉ុន្មានថ្ងៃកន្លងទៅនេះ បានប្រព្រឹត្តិទៅក្រោមបរិយាកាសល្អប្រសើរ គ្មាន អំពើហិង្សាកើតឡើងនោះឡើយ។

ក្នុងពិធីបិទយុទ្ធនាការនេះ ប្រធានក្រុមការងារថ្នាក់កណ្តាលចុះជួយស្រុកពញាក្រែក ខេត្តត្បូងឃ្មុំ នាព្រឹកថ្ងៃទី២៤ ឧសភានេះ លោក វង សូត មានប្រសាសន៍ថា យុទ្ធនាការពិត ជាបានប្រព្រឹត្តិ ទៅដោយរលូន និងអាចទទួលយកបានទាំងអស់គ្នា ដោយយុទ្ធនាការ ឃោសនាបោះឆ្នោត ជ្រើស រើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៣ នេះ ត្រូវបិទបញ្ចប់ទៅតាមប្រតិទិន របស់គណៈកម្មាធិការជាតិរៀបចំការបោះឆ្នោត (គជប) នៅថ្ងៃ នេះ ហើយថ្ងៃស្អែកទី២៥ ឧសភា ជាថ្ងៃត្រូវស្ងប់ស្ងាត់ រួចហើយនៅថ្ងៃទី២៦ ខែឧសភា ឆ្នាំ២០១៩ គឺជាថ្ងៃបោះឆ្នោត។

ដូច្នេះ ចំពោះអ្នកមានសិទ្ធិបោះឆ្នោតទាំងអស់ដែលជាសមាជិកក្រុមប្រឹក្សា ឃុំ សង្កាត់ សូមត្រៀម លក្ខណៈឱ្យបានគ្រប់គ្រាន់ដូចជា ការរក្សាសុខភាពឱ្យបានល្អ ដើម្បី ធានាថាអាចទៅបោះឆ្នោតបាន នៅថ្ងៃបោះឆ្នោត ហើយជាពិសេសសូមកុំភ្លេចយកទៅជាមួយ នូវឯកសារនានាដែលជាតម្រូវ ការ សម្រាប់ការបោះឆ្នោតនេះ។

សូមជម្រាបជូនថា សម្រាប់ស្រុកពញាក្រែក ខេត្តត្បូងឃ្មុំ មានអ្នកបោះឆ្នោតដែលជា សមាជិក ក្រុមប្រឹក្សាឃុំសរុបចំនួន ៨០នាក់ ក្នុងនោះមកពីគណបក្សប្រជាជនកម្ពុជាចំនួន ៧៨ នាក់ មកពី គណបក្សហ៊្វុនស៊ីនប៉ិចចំនួន ១នាក់ និងមកពីគណបក្សខ្មែររួបរួមជាតិចំនួន ១នាក់ និងមានគណ បក្សនយោបាយចំនួន ៤ ចូលរួមនៅក្នុងការបោះឆ្នោតនេះ ដើម្បីជ្រើសរើសក្រុម ប្រឹក្សាស្រុក ពញា ក្រែកចំនួន ២១រូប រួមនិងការបោះឆ្នោតជ្រើសរើសសមាជិកក្រុមប្រឹក្សាខេត្ត ត្បូងឃ្មុំផងដែរ ដោយ អ្នកបោះឆ្នោតម្នាក់ត្រូវបោះឆ្នោតចំនួន ២សន្លឹក គឺ ១សន្លឹកសម្រាប់ការ ជ្រើសរើសសមាជិក ក្រុម ប្រឹក្សា ក្រុង ឬ ស្រុក ឬ ខណ្ឌ និង ១សន្លឹកទៀតសម្រាប់ការជ្រើស រើសក្រុមប្រឹក្សារាជធានី ឬ ក្រុម ប្រឹក្សាខេត្ត ហើយក្នុងពិធីបិទយុទ្ធនាការនេះដែរ លោក វង សូត បានស្នើសុំឱ្យអ្នកបោះឆ្នោតទាំង អស់របស់គណបក្សប្រជាជនកម្ពុជាបោះឆ្នោតដោយ ត្រឹមត្រូវ មានន័យថា បានបោះឆ្នោតជូនគណ បក្សប្រជាជនកម្ពុជាដោយពិតប្រាកដ គឺមិនគូសច្រឡំឡើយ៕