ភ្នំពេញ ៖ ក្នុងឋានៈជាមិត្តនៃប្រទេសទាំងពីរ កម្ពុជាសង្ឃឹមថា ប្រទេសប៉ាគីស្ថាន និងឥណ្ឌា រក្សាការអត់ធ្មត់ខ្ពស់បំផុត ដើម្បីជៀសវាងការប៉ះទង្គិចគ្នាដោយអាវុធបន្តនៅតំបន់កាស្មៀរ ដែលនឹងនាំឲ្យមានអរិភាពក្នុងចំណោមប្រជាជននៃប្រទេសទាំងពីរ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៨ ខែកុម្ភៈ ឆ្នាំ២០១៩។

ក្នុងសេចក្តីប្រកាសដដែលបន្តថា ប្រទេសប៉ាគីស្ថាន និងឥណ្ឌា អាចធ្វើការចរចាគ្នាដើម្បីកាត់បន្ថយភាពតានតឹងនាពេលបច្ចុប្បន្ន និងស្វែងរកដំណោះស្រាយទំនាស់តាមមធ្យោបាយសន្តិវិធី។

ជាមួយគ្នានេះ កម្ពុជាក៏បានធ្វើការថ្កោលទោសចំពោះការវាយប្រហារភេរវកម្ម កាលពីថ្ងៃទី១៤ ខែកុម្ភៈ ឆ្នាំ២០១៩ នៅតំបន់ Pulwama និងការបេ្តជ្ញាចូលរួមចំណែកក្នុងកិច្ចប្រឹងប្រែង ដើម្បីប្រយុទ្ធប្រឆាំង នឹងអំពើភេរវកម្មគ្រប់ទម្រង់ និងគ្រប់រូបភាពទាំងអស់៕

ភ្នំពេញ ៖ ឧត្តមក្រុមប្រឹក្សាពិគ្រោះ និងផ្តល់យោបល់ប្រចាំឆមាស នៅព្រឹកថ្ងៃទី២៨ ខែកុម្ភៈ នេះ បានបើកកិច្ចប្រជុំក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅទីស្តីការគណៈរដ្ឋមន្ត្រី ដោយបានប្រើពេលជាង ៦ម៉ោង ដើម្បីជជែកពិភាក្សាយ៉ាងលម្អិត និងដោះស្រាយបញ្ហានានា ពិសេសគឺបញ្ហាវិវាទដីធ្លីនៅខេត្តព្រះសីហនុ និងការរំលោភដីធ្លីនៅភ្នំដោះក្រមុំខេត្តមណ្ឌលគីរី ។

អង្គប្រជុំ បានប្រើពេលរហូតដល់ជាង ៦ម៉ោង ដើម្បីស្តាប់ការរាយការណ៍ដោយផ្ទាល់ពីសំណាក់សមាជិកទាំង១៦គណបក្ស ដែលបានចុះពិនិត្យ និងស្រាវជ្រាវករណីទំនាស់ដីធ្លី និងបញ្ហាមួយចំនួនទៀតនៅតាមមូលដ្ឋាន។ បញ្ហាទំនាស់ដីធ្លី នៅខេត្តព្រះសីហនុកាលពីថ្ងៃទី២៤ ខែមករា កន្លងទៅ ក៏ក្លាយជាប្រធានបទក្តៅសម្រាប់លើកយកមកពិភាក្សានៅក្នុងកិច្ចប្រជុំនេះដែរ ដោយមានភ្ជាប់វីដេអូ conference ជាមួយអភិបាលខេត្តទៀតផង។

លោក ឈឹម ផលវរុណ ប្រធានក្រុមប្រឹក្សាលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្តល់យោបល់ បានបញ្ជាក់នៅក្នុងសន្និសីទសារព័ត៌មាន ក្រោយបញ្ចប់កិច្ចប្រជុំ ថា ការចុះអនុវត្តសាលដីកាតុលាការកំពូលរហូតមានមានអំពើហិង្សា និងមានអ្នករង របួសបានធ្វើឲ្យសម្តេចតេជោ ខឹងសម្បារជាខ្លាំង។ ខឹងសម្បារក៏ព្រោះតែក្នុងប្រតិបត្តិការនោះ មេបញ្ជាការសឹករងខេត្តព្រះសីហនុ បានប្រើប្រាស់កម្លាំង យោធាទៅអនុវត្តសាលដីកាដោយខុសពីនីតិវិធី។

លោក ឈឹម ផលវរុណ បន្តថា សម្តេចតេជោនាយករដ្ឋមន្ត្រី បានបញ្ជាឲ្យការស៊ើបអង្កេតឲ្យបានម៉ត់ចត់បំផុតចំពោះករណីហិង្សា នៃការអនុវត្តសាលដីកានេះ និងបានបញ្ជាឲ្យរឹបអូសដីសម្បទាននោះ យកមកឲ្យគ្រប់គ្រងវិញ មុននឹងយកដីសម្បទាននោះ ទៅធ្វើជាដីសម្បទានសង្គមកិច្ចជូនប្រជាពលរដ្ឋ។

ក្រៅពីបញ្ហាទំនាស់ដីធ្លីនៅខេត្តព្រះសីហនុ ក៏មានបញ្ហានៃការរំលោភដីធ្លីនៅតំបន់ភ្នំដោះក្រមុំ ខេត្តមណ្ឌលគីរី ដែលត្រូវបានកិច្ចប្រជុំលើកមកធ្វើការពិភាក្សា និងដោះស្រាយផងដែរ។ លោក ឈឹម ផលវរុណ បន្តទៀតថា សម្តេចតេជោនាយករដ្ឋមន្ត្រីបានបញ្ជាឲ្យអភិបាលខេត្តមណ្ឌលគីរី និងស្ថាប័នពាក់ព័ន្ធត្រូវទប់ស្កាត់ជាបន្ទាន់មិនអនុញាតិឲ្យទៅទន្ទ្រានដីនៅភ្នំ ដោះក្រមុំនោះឡើយ ដោយត្រូវរឹបអូសយកមកវិញទុកជាសម្បត្តិរដ្ឋ។

សម្តេចតេជោ បានអះអាងថា ការលើកឡើងជាយោបល់របស់សមាជិកមិនត្រូវបានបន្ទុច បង្អាក់នោះឡើយ គឺត្រូវតែប្រឹងប្រែងអន្តរាគមន៏ដោះស្រាយទៅកាន់ក្រសួង ស្ថាប័នពាក់ព័ន្ធភ្លាមៗ ដើម្បីដោះស្រាយបញ្ចប់បញ្ហាជាបន្ទាន់។ សម្តេចតេជោ ហ៊ុន សែន ក៏បានបញ្ជាក់ដល់សមាជិកឧត្តម ក្រុមប្រឹក្សាពិគ្រោះ និងផ្តល់យោបល់ គួរយកចិត្តដាក់លើបញ្ហាផ្សេងទៀត មិនមែនត្រឹមតែបញ្ហាដីធ្លីតែមួយមុខនោះទេ។ សម្តេចតេជោ បានកោតសរសើរចំពោះសកម្មភាពរបស់ឧត្តមក្រុមប្រឹក្សាពិគ្រោះ និងផ្តល់យោបល់ និងបន្តលើកទឹកចិត្តសមាជិកបន្តសកម្មភាពនេះ ឲ្យបានល្អថែមទៀតផងដែរ៕

ខេត្តកំពង់ចាម ៖ លោក គួច ចំរើន អភិបាល នៃគណៈអភិបាលខេត្តកំពង់ចាម នៅរសៀល ថ្ងៃទី២៨ ខែកុម្ភៈ ឆ្នាំ២០១៩ នេះបានអញ្ជើញជាអធិបតីក្នុងពិធីប្រកាសតែងតាំង និងចូលកាន់មុខតំណែង លោក យី វណ្ណៈ ដែលជាអភិបាលរងស្រុកកំពង់សៀម ជាអភិបាលនៃគណៈអភិបាលស្រុកកោះសូទិន ជំនួសលោក ផេន សុផល ដែលត្រូវផ្ទេរភារកិច្ចទៅកាន់តំណែងជាអភិបាលស្រុកបាធាយ វិញ។

លោក គួច ចំរើន អភិបាលនៃគណៈអភិបាលខេត្តកំពង់ចាម បានមានប្រសាសន៍ដោយជំរុញឲ្យអាជ្ញាធរ ជាពិសេសលោកអភិបាលស្រុកដែលទើបឡើងកាន់តំណែងថ្មី ពីរចំនុច រួមមាន ទី១ ត្រូវពង្រឹងសុវត្ថិភាព សណ្តាប់ធ្នាប់ តាមក្នុងឃុំទាំងអស់ក្នុងស្រុកកោះសូទិន ធ្វើយ៉ាងណាអនុវត្តន៍គោលនយោបាយរបស់រាជរដ្ឋាភិបាល ភូមិឃុំមានសុវត្ថិភាព ក្រោមដំបូងសុខសន្តិភាព សុវត្ថិភាព ជូនបងប្អូនប្រជាពលរដ្ឋ។

ចំនុចទី២ លោកអភិបាលខេត្តបានជំរុញ និងស្នើដល់លោកអភិបាលស្រុកកោះសូទិន ថ្មី ត្រូវធ្វើយ៉ាងណាដឹកនាំមន្ត្រីរាជការក្រោមឱវាទ ខិតខំបម្រើសេវាសាធារណ:ដល់ប្រជាពលរដ្ឋតាមមូលដ្ឋានឲ្យបានឆាប់ និងមានប្រសិទ្ធភាព តាមតម្រូវការចាំបាច់របស់បងប្អូនប្រជាពលរដ្ឋឲ្យកាន់តែល្អប្រសើរឡើង៕ ដោយ ៖ សុផល

ភ្នំពេញ ៖ អង្គភាពប្រឆាំងអំពើពុករលួយ (ACU) បានចាប់ផ្ដើមស៊ើបអង្កេតពីទ្រព្យសម្បត្តិ និងបំណុលរបស់លោកឧត្តមសេនីយ៍ត្រី ស្រេង សុខា ស្នងការរងនគរបាលវ័យក្មេងនៅខេត្តកណ្ដាល បន្ទាប់ពីមានការផ្សព្វផ្សាយជាសាធារណៈពីការភ្ជាប់ពាក្យជាមួយនារីម្នាក់ និងបានបង្ហោះសម្ញែងរូបភាពលុយថ្លៃបណ្ដាការចំនួន ១០ម៉ឺនដុល្លារ ចិញ្ចៀនពេជ្រ និងរថយន្ដលុចស៊ីស ៥៧០ ដែលមានតម្លៃ ២២ម៉ឺនដុល្លារ ដែលបានធ្វើនៅផ្សារអ្នកលឿង (ត្រើយខាងកើត) ខេត្តព្រៃវែង កាលពីព្រឹកថ្ងៃទី២៤ ខែកុម្ភៈ ឆ្នាំ២០១៩។

យោងតាមសេចក្តីជូនដំណឹងស្ដីពីកិច្ចប្រជុំលើកទី៤៣ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ កាលពីថ្ងៃទី២៧ ខែកុម្ភៈ ឆ្នាំ២០១៩ បានឲ្យដឹងថា៖«ក្រុមប្រឹក្សាអង្គភាពប្រឆាំងអំពើពុករលួយ គាំទ្ររាល់ចំណាត់ការរបស់អង្គភាពប្រឆាំងអំពើពុករលួយ ក្នុងការពង្រឹងការអនុវត្តច្បាប់ ការបង្ការ ការទប់ស្កាត់ និងការបោសសម្អាតអំពើពុករលួយ ដើម្បីពង្រឹងអភិបាលកិច្ចល្អ»។

គួរជម្រាបថា ចំណាត់ការលើលោក ស្រេង សុខា គឺដូចគ្នាទៅនឹងចំណាត់ការលើលោក គឹម រស្មី អតីតមេបញ្ជាការកងរាជអាវុធហត្ថខេត្តរតនគិរី ដែលទើបនឹងត្រូវបានដកចេញពីតំណែង ដោយសារតែសម្ញែងទ្រព្យសម្បត្តិ។ តាមរយៈវីដេអូដែលបែកធ្លាយ ក្នុងថ្ងៃចូលឆ្នាំចិនកន្លងទៅ លោក គឹម រស្មី បានចែកលុយឲ្យកូន៥នាក់ ដោយម្នាក់ៗទទួលបាន១០ម៉ឺនដុល្លារ។

យ៉ាងណាក៏ដោយ មកដល់ពេលនេះ លោក ស្រេង សុខា ស្នងការរងនគរបាលខេត្តកណ្ដាល គ្រាន់តែប្រឈមនឹងការស៊ើបអង្កេតពីសំណាក់អង្គភាពប្រឆាំងអំពើពុករលួយប៉ុណ្ណោះ តែតំណែងរបស់លោក មិនបានប៉ះពាល់នោះទេ៕

ភ្នំពេញ ៖ នៅក្នុងផែនការយុទ្ធសាស្ត្ររបស់រាជរដ្ឋាភិបាល បានកំណ ថា ក្រោយឆ្នាំ២០២៥ កម្ពុជាដែលជារដ្ឋភាគីនៃអនុសញ្ញាអន្តរជាតិ នឹងធ្វើយ៉ាងណា លុបបំបាត់លែងឲ្យមានគ្រាប់មីនប្រឆាំងមនុស្ស។ ប៉ុន្តែចំពោះគ្រាប់បែកដែលទម្លាក់ដោយសហរដ្ឋអាមេរិក និងគ្រាប់មីនផ្សេងទៀត កម្ពុជានឹងមិនអាចរំដោះបានទាំងស្រុងនៅក្រោយឆ្នាំ២០២៥ នោះទេ។

​នៅក្នុងកិច្ចប្រជុំ ដើម្បីផ្សព្វផ្សាយលទ្ធផលការងារឆ្នាំ២០១៨ និងទិសដៅបន្ត២០១៩ ដល់មន្ត្រីរបស់ខ្លួន នៅព្រឹកថ្ងៃទី២៨ កុម្ភៈ នៅទីបញ្ជាការដ្ឋានស៊ីម៉ាក់ នៅមជ្ឈមណ្ឌលសកម្មភាពកំចាត់មីនកម្ពុជាហៅកាត់ថា ស៊ីម៉ាក់ ប្រតិភូ រាជរដ្ឋាភិបាលទទួលបន្ទុកអគ្គនាយកស៊ីម៉ាក់បានបញ្ជាក់ថា ឆ្នាំ២០១៩នេះ ស៊ីម៉ាក់នឹងបន្តធ្វើការឲ្យកាន់តែជិតស្និតជាមួយនគរបាលមូលដ្ឋាន ដើម្បីផ្សព្វផ្សាយ និងប្រមូលព័ត៌មានស្តីពីគ្រាប់មីន និងយុទ្ធភ័ណ្ឌមិនទាន់ផ្ទុះ។

លោក ហេង រតនា បានបញ្ជាក់ថា ជាមួយនឹងផែនការនេះ កម្ពុជាគ្មានគ្រាប់មីននៅឆ្នាំ ២០២៥ គឺសំដៅទៅលើគ្រាប់មីន ប្រឆាំងមនុស្ស ដើម្បីឆ្លើយតបទៅនឹងផែនការកម្ពុជាគ្មានមីននៅក្រោយឆ្នាំ ២០២៥ នេះ ស៊ីម៉ាក់បានដាក់ចេញនូវផែនការក្នុងការបោសសម្អាតប្រហែលជាង ៧០០គីឡូម៉ែត្រក្រឡា ឱស៊ីម៉ាក់អាចសម្រេចបានប្រហែលជា ៦០ទៅ៧០ភាគរយ នៃផែនការដល់ឆ្នាំ២០២៥…)។

​សូមរំឭកថា គិតពីឆ្នាំ១៩៩២ ដល់ខែធ្នូ ២០១៨ កម្ពុជាសម្រេចបានការរំដោះគ្រាប់ មីនបានចំនួនជាង ១ពាន់ ៨០០គីឡូម៉ែត្រក្រឡា សម្រាប់កសាងភូមិដ្ឋាន ធ្វើស្រែចំការ កសាងហេដ្ឋារចនាសម្ព័ន្ធសាធារណៈនានា និងបានរកឃើញនិងកម្ទេចចោលគ្រាប់មីនប្រឆាំងមនុស្សចំនួន១លាន៦ម៉ឺន២៦៦១គ្រាប់ មីនប្រឆាំងរថក្រោះ ចំនួន ២ម៉ឺន ៤ ៨៣២គ្រាប់ និងសំណល់ជាតិផ្ទុះពីសង្គ្រាមចំនួន២លាន ៧សែន ៦ម៉ឺន ៧០២០គ្រាប់។ ក្នុងនោះជនរងគ្រោះដោយសារ គ្រាប់មីនបានធ្លាក់ចុះពី ៤ ៣២០នាក់ នៅឆ្នាំ១៩៩៦ មកត្រឹម៥៨នាក់នៅឆ្នាំ ២០១៨។

បើតាមការស្រាវជ្រាវ ចម្ការមីន មូលដ្ឋានបានបង្ហាញថា កម្ពុជានៅមានផ្ទៃដីសង្ស័យថាមានគ្រាប់មីន សំណល់ជាតិផ្ទុះពីសង្គ្រាម និងគ្រាប់បែកចង្កោម ប្រមាណជាង ១ ៩៧០គីឡូម៉ែត្រទៀត ដែលត្រូវធ្វើការបោសសំអាតពីឆ្នាំ២០១៨ ដល់ឆ្នាំ២០២៥ និងត្រូវការថវិកាប្រមាណ ៤០៦លានដុល្លារអាមេរិក សម្រាប់ដំណើរការកិច្ចការដែលបង្កមហន្តរាយនេះ៕

ភ្នំពេញ៖ នៅព្រឹកថ្ងៃទី២៨ ខែកុម្ភៈ ឆ្នាំ២០១៩ ស្នងការដ្ឋាននគរបាលរាជធានីភ្នំពេញបានរៀបចំពិធីសន្និបាតបូកសរុបលទ្ធផលការងារប្រចាំឆ្នាំរបស់ខ្លួន និងលើកទិសដៅការងារបន្តឆ្នាំ២០១៩ ដែលបានប្រព្រឹត្តធ្វើឡើងពេញ១ថ្ងៃ ក្រោមអធិបតីភាពឯកឧត្តម-ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ស្នងការរងទាំងអស់ ព្រមទាំងអស់លោក-លោកស្រី អធិការ-អធិការរង នាយ-នាយរងប៉ុសិ៍តរដ្ឋបាល សរុប២៥០នាក់។

នៅក្នុងអង្គសន្និបាតនេះផងដែរ ក៏បានតម្រូវឲ្យមន្ត្រីនគរបាល និងនាយការិយាល័យជំនាញនិមួយៗឡើងរាយការណ៍អំពីបទល្មើស និងការបង្ក្រាបបទល្មើសក្នុងមូលដ្ឋាន។ ក្នុងនោះផងដែរ នាយការិយាល័យគ្រឿងញៀន នៃស្នងការដ្ឋាននគរបាលរាជធានីភ្នំពេញបានលើកឡើងនៅក្នុងអង្គសន្និបាតនេះថា បានរកឃើញស្រាវជ្រាវទីតាំងពាក់ព័ន្ធករណីប្រើប្រាស់ថ្នាំញៀនតាមបណ្តាក្លឹបកំសាន្ត និងបារបារាំងមានចំនួន១២៩៥កន្លែង។

ក្នុងនោះជាង១ពាន់កន្លែងបានធ្វើកិច្ចសន្យាបញ្ឈប់ការប្រើប្រាស់គ្រឿងញៀន។ លោកបន្តថា ដោយឡែកបញ្ហាប្រឈមទៅនឹងការ ចែកចាយនៅតាមសំណង់មិនរៀបរយ ហើយបើតាមរបាយការណ៍នៅតាមប៉ុសិ៍តរដ្ឋបាលឃើញថាមាន៥គោលដៅដូចជា៖ តំបន់បឹងឈូក និងគោលដៅផ្សេងៗទៀតក្នុងខណ្ឌទាំង១២ នៅបឹងកក់ សង្កាត់ស្រះចក ក្នុងខណ្ឌដូនពេញ ហើយមើលទៅការចែកចាយមិនជាការលក់ដូរធំដុំនោះទេ តែវាជាករណីចែកចាយយ៉ាងសកម្ម ហើយក្នុងការ លក់ជួញដូរនេះគឺភាគច្រើនគេប្រើប្រាស់លើកុមារតូចៗ ក្មេងតូចៗ ដែលមិនគ្រប់អាយុត្រឹម១២ឬ១៣ឆ្នាំប៉ុណ្ណោះឬ អាចជនពិការផងដែរក៏មាន។ មនុស្សទើបចេញពីពន្ធនាគារ គឺគេធ្វើសកម្មភាពនៅតំបន់មិនរៀបរយនេះ។ ក្នុងនោះ បានសង្កេតឃើញថា គណៈបញ្ជាការឯកភាពរដ្ឋបាលខណ្ឌដូនពេញបានចុះធ្វើរដ្ឋបាលហើយបានរុះរើផ្ទះតូចៗនៅតាមបណ្តោយផ្លូវរថភ្លើង សង្កេតឃើញថាមានការថមថយបន្តិចដែរ។

ដោយឡែកពាក់ព័ន្ធនិងករណីបទល្មើសព្រហ្មទណ្ឌ លោកឧត្តមសេនីយ៍ទោ សុង លី ស្នងការរងទទួលផែនព្រហ្មទណ្ឌក៏បានលើកឡើងឲ្យដឹងដែរថា បញ្ហាប្រឈមបទល្មើសឆក់ឃើញថាការធ្វើផែនការ និងយុទ្ធនាការឃើញថាធ្វើបានល្អ ក៏ប៉ុន្តែការធ្វើសកម្មភាពជាក់ស្តែងនៅមានកំរិតទាប។ ការទប់ស្កាត់នៅមិនទាន់បទល្មើសឆក់។

លោកឧត្តមសេនីយ៍ទោ សុង លី បានស្តីបន្ទោសថា សមត្ថកិច្ចបង្ក្រាបបានតែបទល្មើសដែលស្រាវជ្រាវ ហើយករណីជាក់ស្តែងបង្ក្រាបបានតិចតួច ភាគច្រើនប្រជាពលរដ្ឋជាអ្នកចាប់ ឬដេញចាប់ជនសង្ស័យមកប្រគល់ឲ្យសមត្ថកិច្ចទៅវិញ ឬជនសង្ស័យខ្លួនរត់គេចខ្លួនហើយជួបគ្រោះថ្នាក់ចរាចរណ៍ជាដើម។ ការរីករាយដាលគ្រឿងញៀនក៏ជាបញ្ហាកើតមានបទល្មើសឆក់កើតឡើង និងបញ្ហាល្បែងស៊ីសងក៏ជាកត្តាជម្រុញឲ្យកើតមានបទល្មើសឆក់ផងដែរ។

យោងតាមរបាយការណ៍ និងការវាយតម្លៃសន្និដ្ឋានឃើញថា កិច្ចប្រតិបតិ្តការប្រយុទ្ធប្រឆាំងបទល្មើសព្រហ្ម ទណ្ឌ ជារួមទោះបីបទល្មើសកើនឡើង៨.៩៥% ប៉ុន្តែកិច្ចប្រតិបត្តិការបង្ក្រាបបទល្មើសទទួលបានលទ្ធផលខ្ពស់រហូតដល់៩០.៨២% នឹងការបង្ក្រាបគ្រឿងញៀនខុសច្បាប់លើកទី៣ ត្រូវបានជម្រុញខ្លាំងក្លាដោយបង្ក្រាបបាន២.០២៤ករណី ឃាត់ខ្លួនបាន៣.៦៧០នាក់ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ហើយក៏ត្រូវបានក្រសួងមហាផ្ទៃលើកសសើរ និងជូនរង្វាន់ចំពោះបុគ្គលនិងអង្គភាពដែលមានស្នាដៃកិច្ចប្រតិបតិ្តការបង្ក្រាបបទល្មើសនេះ។

គួរកត់សម្គាល់ផងដែរថា បទល្មើសព្រហ្មទណ្ឌបានកើនឡើងខ្ពស់នៅក្នុងខែមករា មិថុនា កក្កដា និងខែសី ហាក្នុងពេលដែលសមត្ថកិច្ចកំពុងជាបើដៃការពារ សន្តិសុខ សុវត្ថិភាព សណ្តាប់ធ្នាប់ សម្រាប់ពិធីបុណ្យធំៗ និងក្នុងពេលដំណើរការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ក្នុងរាជធានីភ្នំពេញ៕

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជានឹងអញ្ជើញធ្វើជាអធិបតី ដឹកនាំកិច្ចប្រជុំប្រចាំឆមាស របស់ឧត្តមក្រុមប្រឹក្សាពិគ្រោះ និងផ្តល់យោបល់ ដែលនឹង ប្រព្រឹត្ត ទៅនៅទីស្តីការនាយករដ្ឋមន្ត្រី (វិមានសន្តិភាព)។ នាព្រឹកថ្ងៃព្រហស្បត្តិ៍ ទី២៨ ខែកុម្ភៈ ឆ្នាំ២០១៩ វេលាម៉ោង៨​៖៣០។

លេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់បានឲ្យដឹងថា កិច្ចប្រជុំនៅព្រឹក នេះនឹងផ្តោតទៅលើទស្សនវិស័យវិភាគទានរួមចំណែករបស់ឧត្តមក្រុមប្រឹក្សាពិគ្រោះ និងផ្តល់យោបល់ដែលនឹងត្រូវថ្លែងដោយសម្តេចតេជោនាយករដ្ឋមន្ត្រីនៃកម្ពុជា។ បានបន្ទាប់ មកនឹងមានការចូលរួមផ្តល់យោបល់និងសំណូមពរដោយតំណាងគណបក្សនីមួយៗរួមទាំង បញ្ហាផ្សេងៗទៀត។

ឧត្ដមក្រុមប្រឹក្សាពិគ្រោះ និងផ្ដល់យោបល់ត្រូវបានបង្កើតឡើងកាលពីថ្ងៃទី ១៦ ខែសីហាឆ្នាំ ២០១៨ ដោយមានសមាសភាពចូលរួមពីគណបក្សធ្លាក់ឆ្នោតចំនួន ១៦ ដោយប្រធានគណបក្សទាំងនោះត្រូវផ្តល់ឋានៈស្មើទេសរដ្ឋមន្ត្រី។ឧត្តមក្រុមប្រឹក្សានេះមានតួនាទីលើក បញ្ហា និងផ្តល់ជាមតិយោបល់ផ្សេងៗទៅរដ្ឋាភិបាល។

នៅរៀងរាល់មួយខែម្ដង សមាជិកក្រុមប្រឹក្សាពិគ្រោះ និងផ្ដល់យោបល់ត្រូវជួបជជែកគ្នាមុន លើកសំណើទៅកាន់ប្រមុខរដ្ឋាភិបាល ។ ប្រមុខរដ្ឋាភិបាលនឹងជួបជាមួយសមាសភាព នៃសមាជិកឧត្តមក្រុមប្រឹក្សា ដែលមានសមាសភាពមកពីគណបក្សនានា នៅរៀងរាល់ ៦ខែម្ដង៕

ភ្នំពេញ ៖ នារីអ្នកចំរៀងប្រចាំភោជនីដ្ឋាន បឹងមាស ម្នាក់ ត្រូវហើមមុខ ដោយសារបុរសម្នាក់ ដែលអួតអាងថា ជាយោធាផ្កាយ ៣ បានទះកំផ្លៀងនាង ចំនួន៣ដៃ ខណៈល្បួងនាងយកទៅរួមរ័កមិនបាន។

ហេតុការណ៍គួរឲ្យខ្មាស់អៀននេះ បានភ្ញាក់ផ្អើល កាលពីវេលាម៉ោង ១១យប់ថ្ងៃទី២៧ ខែកុម្ភៈ ឆ្នាំ២០១៩ស្ថិតនៅតាមបណ្តោយផ្លូវជាតិលេខ A ចំនុចក្នុងភោជនីដ្ឋាន បឹងមាស សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។

បើយោងតាមសំដីនារីជនរងគ្រោះ បានរៀបរាប់ឲ្យដឹងថា មុនពេលកើតហេតុ មន្ត្រីយោធាផ្កាយ៣ ខាងលើរួមនិងបក្ខពួកប្រហែលជា ១០នាក់ទៀត បាន ជិះរថយន្តចំនួន៣គ្រឿង ចូលមកផឹកស៊ីក្នុងភោជនីដ្ឋាន បឹងមាស ។ ខណៈដែលនាងកំពុងតែច្រៀងនៅលើឆាក លោកផ្កាយ ៣រូបនោះ បានឲ្យអ្នករត់តុ ទៅប្រាប់នាងថា ពេលនាងច្រៀងចប់ ឲ្យនាងមកអង្គុយកំដរភ្ញៀវ ដោយចង្អុលទៅតុរបស់លោកផ្កាយ៣ និងបក្ខពួក។

ពេលនោះ នាងក៏បានច្រៀងចប់ហើយបានដើរមកអង្គុយលេងជាមួយលោកយោធាខាងលើ
ហើយត្រូវលោកផ្កាយ៣ រូបនោះ និយាយប្រាប់នាងថា មិនបាច់ឡើងច្រៀងទៀតទេ នៅអង្គុយលេងជាមួយគាត់ ចាំផឹកចប់គាត់ឲ្យលុយធីប ២០ដុល្លារ។ ក្រោយមកទៀតលោកផ្កាយ៣ខាងលើ ក៏បានលួងលោមនាងជាច្រើនដងបំណងយកទៅដេកជាមួយ តែនាងបានបដិសេធថា នាងមិនមែនជាស្រីលក់ខ្លួនទេ។

បន្ទាប់មក ទំនងជាលោកផ្កាយ៣ ទ្រាំលែងបានដោយសារនាងបដិសេធមិនទៅជាមួយ ក៏ទះកំផ្លៀង៣ដៃ ដើម្បីរំសាយកំហឹងតណ្ហា រួចក៏បានឡើងជិះរថយន្តចេញទៅបាត់។
ក្រោយកើតហេតុ នារីរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលជ្រោយចង្វារ ឲ្យសមត្ថកិច្ចស្រាវជ្រាវ ស្លាកលេខលេខរថយន្ត និងជនបង្កដែលគេលួចថតបាន ប្រគល់ឲ្យសមត្ថកិច្ចចាត់ការ និងរកយុត្តិធម៍ដល់រូបនាងដែលជាស្ត្រីភេទទន់ខ្សោយ។

មេគង្គប៉ុស្តិ៍ មិនទាន់បានទទួលការបកស្រាយបែបណាមួយពីភាគីលោកផ្កាយបី នៅឡើយទេ ចំពោះការលើកឡើងពីនារីអ្នកចំរៀងដែលអះអាងថា នាងជាជនរងគ្រោះដោយអំពើហិង្សានេះ។

មន្ត្រីមូលដ្ឋានមួយរូបបានបង្ហាញការរិះគន់ថា សូមយើងទាំងអស់គ្នារង់ចាំមើលថា តើសមត្ថកិច្ចនឹងចាត់ការបែបណាលើមន្ត្រីជាន់ខ្ពស់បានប្រើហិង្សាលើនារីភេទដោយគ្រាន់តែរឿងចំណង់ផ្លូវភេទ ព្រោះដំណាក់កាលនេះទៅហើយ សូម្បីតែពលរដ្ខសាមញ្ញ ក៏គេគិតពីកិត្តិយស និងមានការខ្មាស់អៀនមិនហ៊ានប្រព្រឹត្តដល់ថ្នាក់នេះដែរ៕

ខេត្តកំពង់ធំ ៖ លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា បានចូលរួមក្នុងពិធីចុះហត្ថលេខាកិច្ចព្រមព្រៀងសហប្រតិបត្តិការជាដៃគូររវាងអង្គភាព CMAC និង អង្គការ JMAS លើគម្រោងបោសសម្អាតមីន និងគ្រាប់បែកចង្កោម ដោយគាំទ្រកំលាំងគ្រឿងចក្រ ថវិកាគាំទ្រគម្រោងចំនួនជាង៣១ម៉ឺនដុល្លារ។ ពិធីនេះ បានរៀបចំឡើងនៅរសៀលថ្ងៃទី២៦ ខែកុម្ភៈ ឆ្នាំ២០១៩។

លោក ហេង រតនា បានបញ្ជាក់ថា គម្រោងនេះ មានរយៈពេល១ឆ្នាំចាប់ផ្តើមពីថ្ងៃទី១ ខែមីនា ឆ្នាំ២០១៩ ដល់ថ្ងៃទី២៨ ខែកុម្ភៈ ឆ្នាំ២០២០ ស្ថិតនៅក្នុងស្រុកសន្ទុក ខេត្តកំពង់ធំ ដែលនេះ គឺជាឆ្នាំទី២ ហើយរបស់គម្រោង។

លោកបន្តថា បន្ថែមលើការងារបោសសម្អាតមីននេះ គម្រោងនេះក៏ផ្តោតសំខាន់ លើការអភិវឌ្ឍហេដ្ឋារចនាសម្ព័ន្ធ រូបវ័ន្ត រួមមានការជួលជុលផ្លូវ ជីកស្រះ ធ្វើអណ្តូងទឹក និងប្រព័ន្ធប្រឡាយទឹកជាដើម៕

ខេត្តក្រចេះ ៖ អង្គការ WWF និងក្រសួងបរិស្ថាន នៅថ្ងៃទី២៧ ខែកុម្ភៈ នេះ បានរៀបចំផ្តល់ជូនសម្ភារៈល្បាតដល់ក្រុមល្បាតរបស់សហគមន៍ក្នុងដែនជម្រកសត្វព្រៃ ព្រែកប្រសព្វ និងដែនជម្រកសត្វព្រៃ សំបូរ ក្នុងខេត្តក្រចេះ។

លោក ផៃ ប៊ុនឈឿន រដ្ឋលេខាធិការក្រសួងបរិស្ថាន បានបញ្ជាក់ថា ការប្រគល់សម្ភារៈល្បាតនាពេលនេះ គឺជាវេទិកាមួយបានបង្ហាញឱ្យឃើញពីការចូលរួម និងការសហការគ្នារវាងអ្នកពាក់ព័ន្ឋ និងពង្រឹងកិច្ចសហប្រតិបត្តិការកាន់តែល្អ ពង្រឹងការយល់ដឹង និងរកដំណោះស្រាយសមស្របពាក់ព័ន្ឋនឹងការការពារ គ្រប់គ្រងធនធានធម្មជាតិ ប្រកបដោយចីរភាព ក្នុងតំបន់ទេសភាពព្រៃលិចទឹកជារួម។

សម្ភារៈដែលបានប្រគល់នាពែលនោះ រួមមាន ៖ ឧបករណ៍ GPS ចំនួន ៧គ្រឿង ម៉ាស៊ីនថតរូប ៧គ្រឿង ត្រីវិស័យ ចំនួន ៧គ្រឿង សម្ភារៈសង្គ្រោះបន្ទាន់ ចំនួន ៧ ឈុត ដបទឹក ចំនួន ៤៦អង្រឹងមុង ពិលចំនួន ៤៦ ឈុត អាវភ្លៀងចំនួន ៤៦ ឈុត តង់ចំនួន ៤៦ ឈុត និងស្បែកជើងសម្រាប់ដើរល្បាយ ចំនួន ៤៦គូ ផងដែរ៕