ខេត្តព្រះសីហនុ ៖ ប្រជាពុទ្ធបរិស័ទជិតឆ្ងាយ បានរួមគ្នាប្រារព្ធពិធីបុណ្យវិសាខបូជាតាមបែបព្រះពុទ្ធសាសនា ដោយបានឧទ្ទិសបួងសួងសុំសេចក្តីសុខជូនគ្រួសារ និងសង្គមជាតិ នៅវត្តអូរកូនដំរី ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ នាថ្ងៃទី១៨ ខែឧសភា ឆ្នាំ២០១៩។

ពុទ្ធសាសនិកមានវ័យចំណាស់ៗ ក៏បានបួងសួងដល់វត្ថុស័ក្ដិសិទ្ធិនានា ជួយបន្ទន់ចិត្តមនុស្ស ឬបុគ្គលធ្លាប់ប្រព្រឹត្តសកម្មភាពអាក្រក់ ឲ្យងាកមកធ្វើអំពើល្អ ដើម្បីរួមចំណែកថែរក្សាអភិវឌ្ឍន៍ប្រទេសជាតិឲ្យថ្កុំថ្កើង និងមានសុខសន្តិភាពជារៀងរហូតទៅ។

ថ្ងៃ១៥កើត ខែពិសាខ ដែលត្រូវចំថ្ងៃពុធ ទី១៥ ខែឧសភា ឆ្នាំ២០១៩ ជាទិវាដែលពុទ្ធសាសនិកជននៅទូទាំងសកលលោក តែងនាំគ្នាប្រារព្ធពិធីបុណ្យដ៏សំខាន់មួយនេះមិនដែលខកខានទេ គឺបុណ្យវិសាខបូជា។ បុណ្យវិសាខបូជានេះ មានការចាប់អារម្មណ៍ជាលក្ខណៈអន្តរជាតិ រហូតឈានដល់អង្គការសហប្រជាជាតិ បានប្រកាសកាលពីថ្ងៃទី១៥ ខែធ្នូ ឆ្នាំ១៩៩៩ ទទួលស្គាល់ថា វិសាខបូជា គឺជាពិធីបុណ្យអន្តរជាតិមួយ ដែលគេអាចប្រារព្ធធ្វើនៅតាមការិយាល័យទាំងឡាយរបស់អង្គការសហប្រជាជាតិ នៅទូទាំងពិភពលោកថែមទៀតផង។

វិសាខបូជា ឬពិសាខបូជា គឺជាពិធីបុណ្យដែលពុទ្ធសាសនិកចាត់ទុកថា មានសារសំខាន់បំផុតមួយក្នុងចំណោមបុណ្យដទៃទៀតនៃព្រះពុទ្ធសាសនា ពីព្រោះជាការគោរពរំឭកនឹកដល់ព្រឹត្តិការណ៍ធំៗបីនាសម័យកាលរបស់ព្រះសម្មាសម្ពុទ្ធសមណគោតម គឺប៉ះចំថ្ងៃដែលព្រះអង្គទ្រង់ប្រសូត បានត្រាស់ដឹង និងបរិនិព្វាន។ ព្រឹត្តិការណ៍ទាំងបីនេះ បានកើតឡើងនៅចំថ្ងៃ១៥កើត ខែពេញបូណ៌មី ដែលមានព្រះចន្ទពេញវង់ ក្នុងខែពិសាខ ដូចគ្នា ខុសតែឆ្នាំតែប៉ុណ្ណោះ។

ងាកមកខេត្តព្រះសីហនុ ឯណោះវិញ បុណ្យវិសាខបូជាឆ្នាំនេះ រដ្ឋបាលខេត្ត បានរៀបចំធ្វើពិធីដើរហែក្បួនតាមផ្លូវសាធារណៈចាប់ពីចំណុច ត្រែកត្រែង តាមផ្លូវសំខាន់ៗនានា មានផ្លូវទំនប់រលក និងផ្លូវស្រុកស្ទឹងហាវ ជាដើម ឆ្ពោះទៅកាន់វត្តអូរកូនដំរី ដែលជាវត្តដ៏អត្តខាត់ជាងគេ ក្នុងចំណោមវត្តទាំង ២៤នៅក្នុងខេត្តព្រះសីហនុ។ វត្តនេះគឺមានតែព្រះសង្ឃវ័យក្មេងៗតែពីរអង្គគត់ ដែលកំពុងគង់ចាំព្រះវស្សានៅក្នុងវត្ត។

ទាក់ទិនបុណ្យវិសាខបូជានេះដែរ លោក ម៉ន ស៊ីណា គណៈកម្មការវត្ត អូរកូនដំរី បានបួងសួងឲ្យប្រជាពលរដ្ឋមូលដ្ឋាននេះ ក៏ដូចជានៅទូទាំងប្រទេសកម្ពុជា ទាំងមូលមានសុខភាពល្អ និងការរស់នៅរីកចម្រើនគ្រប់ក្រុមគ្រួសារ។ ជាងនេះ លោកក៏ស្នើឲ្យប្រជាពុទ្ធបរិស័ទជិតឆ្ងាយទាំងអស់ ឲ្យបន្តចូលរួមសហការលើការងារអភិវឌ្ឍន៍ប្រទេសជាតិ ក៏ដូចជាមូលដ្ឋានខេត្តព្រះសីហនុ ឲ្យរីកចម្រើនថែមទៀតនាថ្ងៃអនាគត។

លោក ម៉ន ស៊ីណា ឆ្លៀតរំឭកដល់ប្រជាពលរដ្ឋឲ្យបន្តចូលរតចូលរួមពិធីបុណ្យវិសាខបូជា ដែលកម្ពុជា តែងបានប្រារព្ធធ្វើជារៀងរាល់ឆ្នាំ ឲ្យស្ថិតក្នុងបេះដូងរបស់ប្រជាពុទ្ធបរិស័ទគ្រប់ៗរូបជារៀងរហូត ហើយលោកអំពាវនាវដល់ប្រជាពលរដ្ឋ ត្រូវងាកមកចូលរួមថែរក្សាសន្តិភាព និងការអភិវឌ្ឍប្រទេសជាតិជាមួយរាជរដ្ឋាភិបាល មានការរីកចម្រើននាថ្ងៃខាងមុខ ដើម្បីមានឱកាសដើរធ្វើបុណ្យទានរួមគ្នាជាបន្តទៀត។

ស្ត្រីវ័យចំណាស់ឈ្មោះ ហ៊ន នី ជាប្រជាពុទ្ធបរិស័ទចំណុះជើងវត្តអូរកូនដំរី ស្រុកស្ទឹងហាវ ខេត្តព្រះសីហនុ ដែលបានមកចូលរួមបុណ្យវិសាខបូជា កាលពីព្រឹកថ្ងៃទី១៨ ខែខែឧសភា បង្ហាញអារម្មណ៍រីករាយពេលបានរួមធ្វើបុណ្យវិសាខបូជា ជាមួយពុទ្ធបរិស័ទដែលមកពីទីជិតទីឆ្ងាយ។

ជាមួយគ្នានេះដែរ ព្រះតេជគុណ ម៉ាន់ ភក្តី ព្រះចៅអធិការនៅវត្តអូរកូនដំរី នេះ បានមានថេរដីកាថា បើគិតមកដល់ពេលនេះ បុណ្យវិសាខបូជា មានអាយុកាល ២.៥៦២ឆ្នាំហើយ ដោយផ្សារភ្ជាប់ទៅនឹងប្រភពដើមនៃពុទ្ធសករាជដែលប្រទេសកាន់ពុទ្ធសាសនាបាននិយមប្រើប្រាស់រហូតមកដល់សព្វថ្ងៃនេះ ជាអាយុរបស់ព្រះពុទ្ធសាសនា ពីព្រោះពុទ្ធសាសនារាប់ជាសករាជឡើង នៅថ្ងៃបន្ទាប់ពីព្រះសម្មាសម្ពុទ្ធបានចូលបរិនិព្វាន៕ ដោយ ៖ ន.រ 

ភ្នំពេញ ៖ ចាប់ពីថ្ងៃទី១៩ ដល់ថ្ងៃទី២៥ ខែឧសភា ឆ្នាំ២០១៩ ស្ថានភាពអាកាសធាតុរបស់កម្ពុជា នឹងរងឥទ្ធិពលខ្យល់មូសុងនីរតី បង្កឲ្យមានភ្លៀងធ្លាក់រាប៉ាយនៅទូទាំងកម្ពុជា ។ នេះបើតាមការជូនដំណឹងរបស់ក្រសួងធនធានទឹក និងឧតុនិយម ។

សម្រាប់រយៈពេលមួយសប្តាហ៍ទៅមុខ អាកាសធាតុនៅកម្ពុជា មានដូចខាងក្រោម ៖

១. នៅថ្ងៃទី១៩-២០ ខែឧសភា កម្ពុជា នឹងទទួលរងនូវឥទ្ធិពលនៃជ្រលងសម្ពាធទាបខ្សោយ និងខ្យល់មូសុងនីរតី ដែលនឹងធ្វើឱ្យរាជធានី-ខេត្តមួយចំនួន មានភ្លៀងធ្លាក់ក្នុងកម្រិតពីខ្សោយទៅ មធ្យម ពុំរាយប៉ាយបានល្អឡើយ។

២. ចាប់ពីថ្ងៃទី២១-២៥ ខែឧសភា ជ្រលងសម្ពាធទាប និងខ្យល់មូសុងនីរតី ចាប់ផ្តើមបង្កើនឥទ្ធិ ពលឡើងវិញ ដែលជាហេតុធ្វើឱ្យកម្រិតទឹកភ្លៀង មានភាពកើនឡើងជាលំដាប់ ក្នុងកម្រិតពីមធ្យមទៅបង្គួរ ទន្ទឹមនឹងភាពរាយប៉ាយ ក៏កាន់តែបានល្អប្រសើរ។
៣. សីតុណ្ហភាពអតិបរមា ស្ថិតក្នុងចន្លោះពី ៣៣-៣៦អង្សារសេ។
៤. បាតុភូ (Thunderstorm) ផ្គររន្ទះ និងខ្យល់កន្រ្តាក់ នៅតែបន្តកើតមានច្រើន។

ការជូនដំណឹងខាងលើនេះ បន្ទាប់ពីក្រសួងបានតាមដានឃើញថា បាតុភូត El Nino ដែលកម្ពុជាបាននឹងកំពុងទទួលតាំងពីដើមឆ្នាំមក រហូតមកដល់ពេលនេះ នៅតែបន្តមានអត្ថិភាពនៅឡើយដោយគ្រាន់តែឥទ្ធិពលបានថយចុះជាបន្តបន្ទាប់តែប៉ុណ្ណោះ៕

ភ្នំពេញ ៖ មន្ត្រីតុលាការ អមដោយសមត្ថកិច្ច នៅព្រឹកថ្ងៃទី១៨ ខែឧសភា ឆ្នាំ២០១៩ នេះ បានយកសាលក្រមផ្តន្ទាទោស លោក សម រង្ស៉ី ចំនួន២ ទៅបិទនៅទីស្នាក់ការអតីតគណបក្សសង្រ្គោះជាតិ នៅសង្កាត់ចាក់អង្រែក្រោម រាជធានីភ្នំពេញ។

យោងតាម សាលក្រមទាំង ២នេះ បង្ហាញថា លោក សម រង្ស៉ី ​ត្រូវបានផ្តន្ទាទោសដាក់ពន្ធនាគារសរុបរយៈពេល ៨ឆ្នាំ និងពិន័យជាប្រាក់ ២០លានរៀល ចូលជាថវិកាជាតិ។

បទល្មើសទាំង២នេះ រួមមានទី១- ជំនុំជម្រះលើបទចោទ ញុះញង់ឱ្យកងទ័ព កុំស្តាប់បញ្ជារាជរដ្ឋាភិបាលស្របច្បាប់ ដែលតុលាការបានកាត់ទោស លោក សម រង្ស៉ី ឱ្យជាប់ពន្ធនាគារ៤ឆ្នាំ និងពិន័យប្រាក់១០លានរៀល និងប្រមាថថ្នាក់ដឹកនាំកងយោធពលខេមរភូមិន្ទ កាត់ទោសលោក សម រង្ស៉ី ឱ្យជាប់ពន្ធនាគារ៤ឆ្នាំ និងពិន័យប្រាក់ ១០លានរៀលដូចគ្នា។

សូមរំលឹកថា កាលពីព្រឹកថ្ងៃទី០៧ ខែធ្នូ ឆ្នាំ២០១៧ កងយោធពលខេមរភូមិន្ទ បានដាក់ពាក្យប្តឹងទណ្ឌិត សម រង្ស៊ី ទៅកាន់សាលាដំបូងរាជធានីភ្នំពេញ ពាក់ព័ន្ធនឹងករណី ញុះញង់កុំឲ្យយោធិនស្តាប់បង្គាប់រាជរដ្ឋាភិបាលស្របច្បាប់ ធ្វើឲ្យខូចទឹកចិត្តកងទ័ព និងប្រមាថថ្នាក់ដឹកនាំកងយោធពលខេមរភូមិន្ទ។ ក្នុងពាក្យបណ្តឹងបានបញ្ជាក់ថា ការអំពាវនាវរបស់លោក សម រង្ស៊ី ធ្វើឲ្យប៉ះពាល់ដល់សន្តិសុខនៃរដ្ឋ ដែលជាបទល្មើសចែងនៅក្នុងក្រមព្រហ្មទណ្ឌ នៃព្រះរាជាណាចក្រកម្ពុជាកំពុងអនុវត្ត៕

ភ្នំពេញ ៖ បុរសជនជាតិចិនម្នាក់ ទំនងស្រវឹង បើករថយន្ត RAV4 ក្នុងល្បឿនយ៉ាងលឿន រេចង្កូតទៅបុករថយន្តកាមរីហាយប្រីដដែលចតស្ងៀមរុញទៅបុករថយន្តស៊េរីទំនើបមួយគ្រឿងទៀត បណ្តាលឲ្យរងការខូចខាតយ៉ាងដំណំ កាលពីវេលាម៉ោង ២និង២០នាទី រំលងអធ្រាត្រឈានចូលថ្ងៃទី១៨ ខែឧសភា ឆ្នាំ២០១៩ នៅចំណុចគល់ស្ពានអាកាសឥន្ទូខាងលិច ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមសាក្សីនៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តម៉ាកកាមរីហាយប្រីដ ពណ៌ស ពាក់ស្លាកលេខ ភ្នំពេញ 2AR-1167 និងរថយន្ត១គ្រឿងទៀត ម៉ាក TUCSON ពណ៌ខ្មៅ ពាក់ស្លាកលេខ ភ្នំពេញ 2AZ-2563 ចតស្ងៀម នៅលើដងផ្លូវមុខសណ្ឋាគារ អេនិក ប៊ូនិក ក្នុងទិសដៅពីកើតទៅលិច។ ក្រោយមកស្រាប់តែមានរថយន្តម៉ាក RAV4 ពណ៌ទឹកប្រាក់ ពាក់ស្លាកលេខ ភ្នំពេញ 2AY-9816 បើកបរដោយបុរសជនជាតិចិនម្នាក់ ធ្វើដំណើរក្នុងទិសដៅពីលិចទៅកើត ក្នុងល្បឿនយ៉ាងលឿន សង្ស័យស្រវឹងស្រា ក៏រេចង្កូតទៅបុករថយន្តហាយប្រីដ រុញទៅបុករថយន្តម៉ាក TUCSON បណ្តាលឲ្យរងការខូចខាតយ៉ាងដំណំ។

ក្រោយកើតហេតុ ភាគីទាំងសងខាងបានធ្វើការសម្របសម្រួល ដោយភាគីបង្កចេញថ្លៃជួសជុលទៅភាគីរងគ្រោះដើម្បីបញ្ចប់រឿងនៅកន្លែងកើតហេតុ មិនរំខាននាឲ្យលំបាកដល់សមត្ថកិច្ចនោះឡើយ៕ ដោយ ៖ សុផល

ភ្នំពេញ ៖ សាលាដំបូងរាជធានីភ្នំពេញ នៅរសៀលថ្ងៃទី ១៧ ខែឧសភា នេះ បានសម្រេចលើសំណុំរឿងគ្រោះថ្នាក់ចរាចរណ៍មួយដោយផ្តន្ទាទោសដាក់ពន្ធនាគារជ​នបង្កគឺកញ្ញា យិន ម៉ាណា រយៈពេល ១ឆ្នាំ ប៉ុន្តែទោសនេះ ត្រូវបានកំណត់ឲ្យអនុវត្តន៍ក្នុងពន្ធនាគារត្រឹមតែ ២ខែប៉ុណ្ណោះ ដោយ ១០ខែទៀត ត្រូវព្យួរ។

បើតាមការអនុវត្តទោស ដែលគិតចាប់តាំងពីកញ្ញា យិន ម៉ាណា ត្រូវបានឃុំខ្លួននាថ្ងៃទី២៩ ខែមីនា ឆ្នាំ២០១៩ កន្លងទៅ ហើយគិតមកទល់នឹងពេលនេះ ការអនុវត្តច្បាប់ឃុំខ្លួន គឺនៅសល់តែប្រមាណជាង១០ថ្ងៃទៀតប៉ុណ្ណោះ គឺគ្រប់រយៈពេល ២ខែហើយ ដោយកញ្ញា យិន ម៉ាណា នឹងអាចមានសេរីភាពឡើងវិញ ក្នុងចន្លោះថ្ងៃទី ២៩ ខែឧសភា ខាងមុខនេះ។

គួររម្លឹកថា កាលពីខែមីនា កញ្ញា យិន ម៉ាណា បានបើករថយន្តទំនើបម៉ាក Range Rover បង្កគ្រោះថ្នាក់ដល់និស្សិតស្រីម្នាក់ បណ្តាលឲ្យស្លាប់ភ្លាមៗយ៉ាងអណោចអធម។ តាមរយៈរូបភាពវីដេអូ កាមេរ៉ាសុវត្ថិភាព ប្រការនោះបានធ្វើមហាជនផ្ទុះកំហឹងជាខ្លាំង និងអំពាវនាវឲ្យកម្លាំងមានសមត្ថកិច្ចដាក់ទោសទណ្ឌឲ្យបានធ្ងន់ធ្ងរ។

ក្រោយមកសំណុំរឿងក្តីក៏ត្រូវបានបញ្ចប់ ដោយភាគីជនបង្ក បានយល់ព្រមធ្វើសំណងជំងឺចិត្ត(រដ្ឋប្បវេណី) ចំនួន ៧ម៉ឺនដុល្លារ ដល់គ្រួសារសព ប៉ុន្តែនៅសល់បណ្តឹងអាជ្ញាប៉ុណ្ណោះ ហើយនៅថ្ងៃទី១៧ ខែឧសភា នេះ តុលាការបានសម្រេចផ្តន្ទាទោសឲ្យជាប់ពន្ធនាគាររយៈពេល ១ឆ្នាំ តែអនុវត្តន៍ទោសត្រឹមតែ២ខែប៉ុណ្ណោះ៕

​​ភ្នំពេញ ៖​ ធនាគារជាតិ​នៃ​កម្ពុជា បានចេញ​សេចក្តីប្រកាស​ព័ត៌មាន​បន្ទាន់​មួយនា​រសៀល​នេះ ដោយ​ប្រកាស​បដិសេធ​លើ​ការផ្សព្វផ្សាយ​ព័ត៌មាន​មិន​ពិត​របស់​ក្រុមហ៊ុន GCG Co., ASIA LTD ពាក់ព័ន្ធ​ការទទួល​ប័ណ្ណ​ប្រកប​អាជីវកម្ម​ប្តូរប្រាក់​ពី​ធនាគារជាតិ​នៃ​កម្ពុជា ។​

​សូម​អាន​សេចក្តីប្រកាស​ព័ត៌មាន​ខាងក្រោម ៖

ភ្នំពេញ ៖ ក្រុមហ៊ុន GCG AsiaCo.,LTD ដែលបានយកឈ្មោះនិងរូបសម្ដេចតេជោ ហ៊ុនសែន នាយករដ្ឋមន្ដ្រីនៃកម្ពុជាទៅបង្ហោះក្នុងគេហទំព័ររបស់ខ្លួនដោយខុសច្បាប់ និងមានប្រតិកម្មភ្លាមៗ ពីប្រមុខនៃរាជរដ្ឋាភិបាលនោះ ត្រូវបានសមត្ថកិច្ចនិងមន្រ្តីធនាគារជាតិ ចុះទៅបិទជាបណ្ដោះ អាសន្ន នៅសង្កាត់វត្តភ្នំខណ្ឌដូនពេញនាព្រឹកថ្ងៃទី១៧ខែឧសភាឆ្នាំ២០១៩នេះ។

ជាមួយគ្នានេះកម្លាំងនគរបាលក៏បានឃាត់ខ្លួនប្រធានក្រុមហ៊ុនទាំង២នាក់ប្តីប្រពន្ធជាជនជាតិម៉ាឡេស៊ីផងដែរយកទៅសួរនាំដើម្បីចាត់ការបន្តទៀត។

បើតាមមន្រ្តីនគរបាលរូបនេះ ក្រុមហ៊ុនខាងលើអាចជាប់ព័ន្ធការលាងលុយកង្វក់ និងឆបោកលុយពី ប្រជាពលរដ្ឋនៅតាមបណ្តាខេត្តតែយ៉ាងណានោះរង់ចាំការសួរនាំបន្តទៀត។

កម្លាំងជំនាញរបស់អគ្គស្នងការដ្ឋានគរបាលជាតិបានបើកកិច្ចប្រជុំបន្ទាន់ជាមួយលោកជាចាន់តូអគ្គទេសាភិបាលធនាគារជាតិនៃកម្ពុជាដើម្បីសម្រេចចុងក្រោយឈានទៅរកការបន្តនីតិវិធីតាមផ្លូវច្បាប់ចំពោះថៅកែក្រុមហ៊ុននោះ។

កាលពីយប់មិញសម្តេចតេជោហ៊ុនសែនបានចេញមកប្រកាសអំពីដំណឹងសន្តិសុខជាតិបន្ទាន់មួយពាក់ព័ន្ធក្រុមហ៊ុនមួយឈ្មោះ GCG Asia Co., LTD បានយករូបថត និងឈ្មោះសម្តេទៅបង្ហោះនូវ លើ Website របស់ខ្លួន ដោយបានអះអាងសម្តេចនឹងចូលរួមសម្ពោធក្រុមហ៊ុននេះ នៅថ្ងៃទី២០ ខែ ឧសភា ឆ្នាំ២០១៩ខាងមុខនេះ។ លើសពីនេះក្រុមហ៊ុនបានយកឈ្មោះ ធនាគារជាតិកម្ពុជា និង ធនាគារចិនថាជាដៃគូទទួលខុសត្រូវក្នុងជំនួញជួញដូរ Crypto Currency ប៉ុន្តែក្រុមហ៊ុននេះត្រូវ បានស្ថានទូតឥណ្ឌូណេស៊ី បញ្ជាក់ថាជាក្រុមហ៊ុនរកស៊ីមិនត្រឹមត្រូវនិងដាក់ក្នុងបញ្ជីខ្មៅទៅហើយ។

ជាមួយគ្នានេះ សម្តេចតេជោ ហ៊ុនសែនសូមបដិសេធព័ត៌មានដែលផ្សាយ ក្នុងវេបសាយ របស់ក្រុម ហ៊ុនខាងលើនេះគឺមិនពិតទេនិងស្នើអាជ្ញាធនិងសមត្ថកិច្ចពាក់ព័ន្ធទាំងអស់ពិនិត្យតាមដាននិងស្រាវជ្រាវរកមុខជនខិលខូចយកមកផ្តន្ទាទោសតាមច្បាប់ជាធរមានជាបន្ទាន់។

សម្តេចតេជោ ហ៊ុន សែន បានសរសេរក្នុងFacebook ទាំងស្រុងយ៉ាងដូច្នេះថា៖ «ដំណឹង សន្តិសុខ ជាតិបន្ទាន់ ! កាលពីពេលថ្មីៗនេះ មានក្រុមហ៊ុន ឈ្មោះ GCG AsiaCo.,LTD បានយករូបថតខ្ញុំនិងឈ្មោះខ្ញុំទៅបង្ហោះនៅក្នុង Website របស់ក្រុមហ៊ុន http:gcgasiacoin.com ដែលនិយាយថាខ្ញុំជាអ្នកគាំទ្រនិងចូលរួមសម្ពោធកាត់ខ្សែបូក្រុមហ៊ុននៅក្នុងប្រទេសកម្ពុជានៅថ្ងៃទី ២០ ខែ ឧសភា ២០១៩។ ទន្ទឹមនឹងនោះ ក្រុមហ៊ុននេះ បានយកឈ្មោះធនាគារជាតិ និងធនាគារ ចិន នៅកម្ពុជាថា ជាដៃគូទទួលខុសត្រូវក្នុងជំនួញដូរលុយក្នុងរូបភាពគ្រីបតូឃឺរិនស៊ី (CryptoCurrency)។ តាមព័ត៌មានពីស្ថានទូតឥណ្ឌូណេស៊ីនៅកម្ពុជាគឺបញ្ជាក់ថា GCGAsia ជាក្រុមហ៊ុនរកស៊ីមិនត្រឹមត្រូវ ហើយត្រូវបានដាក់ចូលក្នុង BlackList»៕

ភ្នំពេញ ៖ ប្រធានកិត្តិយសគណបក្សប្រជាជនកម្ពុជា និងជាប្រធានក្រុមការងារគណៈកម្មាធិការ កណ្ដាល ចុះជួយខេត្តត្បូងឃ្មុំ សម្តេចអគ្គមហាពញាចក្រី ហេង សំរិន ព្រឹកថ្ងៃទី១៧ ខែឧសភា ឆ្នាំ២០១៩ នេះបានអញ្ជើញបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុម ប្រឹក្សាក្រុង ក្រុមប្រឹក្សាស្រុក នៅខេត្តត្បូងឃ្មុំ សម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាស្រុក ក្រុមប្រឹក្សាខណ្ឌនៅថ្ងៃទី២៦ ខែឧសភា ឆ្នាំ២០១៩ ខាងមុខនេះ។

ដោយយុទ្ធនាការឃោសនារកសម្លេងឆ្នោតសម្រាប់ការបោះឆ្នោតនេះត្រូវប្រព្រឹត្តទៅចាប់ពីថ្ងៃទី១៧ ដល់ថ្ងៃទី២៤ ខែឧសភា ឆ្នាំ២០១៩ នៅទូទាំងប្រទេស ហើយក្នុងឱកាសនេះសម្តេចអគ្គមហាពញា ចក្រី ហេង សំរិន បានហៅការជួបជុំរបស់បេក្ខជន និងអ្នកបោះឆ្នោតនាពេលនេះថា ជាការជួបជុំគ្នា ដើម្បីបង្ហាញនូវស្មារតីសាមគ្គី ឯកភាពគ្នា លើគោលដៅរបស់គណបក្ស ដែលត្រូវដណ្ដើមជ័យជម្នះ ក្នុងការបោះឆ្នោតខាងមុខ តាមរយៈការបោះឆ្នោតមួយដែលមានលក្ខណៈ សេរី ត្រឹមត្រូវ និង យុត្តិធម៌។

ថ្លែងទៅកាន់អង្គពិធីកាលពីព្រឹកមិញនេះដែរ សម្តេចពញាចក្រី ហេង សំរិន បានលើក ឡើងថា បច្ចប្បុន្នព្រះរាជាណាចក្រកម្ពុជាកំពុងស្ថិតក្នុងសន្តិភាព ស្ថិរភាព និងមានការអភិ វឌ្ឍន៍ហើយដែលបានរួមចំណែកលើកស្ទួយជីវភាពរស់នៅរបស់ប្រជាជនបានកាន់តែល្អប្រសើរ ជាបន្តបន្ទាប់ក្រោមការដឹកនាំរបស់គណបក្សប្រជាជនកម្ពុជា ជាពិសេសរាជរដ្ឋាភិបាលនីតិកាល ទី៦ នៃរដ្ឋសភា ក្រោមការដឹកនាំដោយសម្ដេចតេជោ ហ៊ុន សែន ដែលអនុវត្តបានល្អនូវកម្មវិធី នយោបាយរបស់គណបក្សសម្រាប់ការកសាង និងការពារមាតុភូមិកម្ពុជាឆ្នាំ២០១៨-២០២៣។

សម្តេចបានគូសបញ្ជាក់ថា តាមរយៈការខិតខំប្រឹងប្រែងរបស់មន្រ្តីយើងគ្រប់ថ្នាក់លើ គ្រប់វិស័យ ទើបមាតុភូមិរបស់យើងទទួលបាននូវសមិទ្ធផលខាងសេដ្ឋកិច្ចគួរឱ្យកត់សម្គាល់។

ទាក់ទងទៅនឹងការបោះឆ្នោតនៅថ្ងៃទី២៦ ឧសភាខាងមុខនេះ សម្តេចពញាចក្រី ហេង សំរិន បានប្រាប់ឲ្យអ្នកបោះឆ្នោត ដែលជាសមាជិកក្រុមប្រឹក្សាឃុំ សង្កាត់ក្នុងតំណែង ត្រូវ ទៅបោះឆ្នោតឲ្យបានគ្រប់ៗគ្នា ដោយសម្រាប់ខេត្តត្បូងឃ្មុំមានអ្នកបោះឆ្នោត ដែលជាសមាជិក ក្រុមប្រឹក្សាឃុំ សង្កាត់ ក្នុងតំណែងចំនួន ៥៣៦នាក់ និងមានគណបក្សនយោបាយចូលរួមប្រកួត ប្រជែងចំនួន៦។

សូមជម្រាជូនថា នៅទូទាំងប្រទេសកម្ពុជាមានរាជធានី ខេត្ត សរុបចំនួន ២៥ មានក្រុង ស្រុក ខណ្ឌ សរុបចំនួន ២០៣ និងមានអ្នកបោះឆ្នោតសរុបចំនួន ១ម៉ឺន ១ពាន់ ៥៧២នាក់ នេះ តាមការចេញផ្សាយរបស់គណៈកម្មាធិការជាតិរៀបចំការបោះឆ្នោត (គ.ជ.ប)៕

បន្ទាយមានជ័យ ៖ យ៉ាងហោចណាស់មនុស្សប្រុសស្រីចំនួនបីនាក់ ត្រូវបានស្លាប់ភ្លាមៗនៅកន្លែង ខណ:ដែលកំពុងជិះម៉ូតូហើយត្រូវរថយន្តដឹកដីបុកពីក្រោយពេញទំហឹង។ហេតុនេះបានកើតឡើងកាលពីវេលាម៉ោង ៩និង៤៥នាទីព្រឹក ថ្ងៃទី១៧ ខែឧសភា ឆ្នាំ២០១៩ នៅចំនុចមុខខ្លោងទ្វារវត្តអណ្ដូងថ្មមាស ស្ថិតក្នុងភូមិអណ្ដូងថ្មមាស សង្កាត់ផ្សារកណ្តាល ក្រុងប៉ោយប៉ែតខេត្តបន្ទាយមានជ័យ។

អ្នកឃើញហេតុការណ៍និយាយថា នៅមុនកើតហេតុម៉ូតូហុងដាឌ្រីម សេ១២៥ ពណ៌ខ្មៅ ពាក់ស្លាកលេខ បាត់ដំបង 1I-1949 បានបេីកឡេីងជែងរថយន្តធំដឹកដី ម៉ាក ហ្វុយសូ ពាក់ស្លាកលេខ ភ្នំពេញ 3A-3754ក្នុងទិសដៅស្របគ្នាហើយក៏គេចចូលមកស្តាំវិញបន្ទាប់ពីគេចចេញពីរថយន្តដែលបើកបរច្រាស់ទិសគ្នា ក៏ត្រូវរថយន្តដឹកដីស្របទិសនោះបុកពីក្រោយពេញទំហឹងកិនស្លាប់ទាំងបីនាក់តែម្តង។
លោក ធិន ស៊ិនដេត អធិការនៃអធិការដ្ឋានក្រុងប៉ោយប៉ែតបានអោយដឹងថាជនរងគ្រោះទាំងបីនាក់មានឈ្មោះ ១-ឈ្មោះ ផាត ភាព ភេទប្រុស អាយុ ៣៦ឆ្នាំ (អ្នកបេីកបរម៉ូតូ)

២-ឈ្មោះ ផាត ភាន ភេទប្រុស អាយុ ២៣ឆ្នាំ (អ្នករួមដំណេីរម៉ូតូ)
៣-ឈ្មោះ ស្រី តំ ភេទស្រី អាយុ ១៩ឆ្នាំ (អ្នករួមដំណេីរ) អ្នកទាំង បី រស់នៅ ភូមិក្បាលថ្នល់ ឃុំព្រៃខ្ពស់ ស្រុកបរវេល ខេត្តបាត់ដំបង ។

លោក ធិន ស៊ិនដេត បន្តថាក្រោយការវាស់វែងនិងពិនិត្យកន្លែងកើតហេតុបានសន្និដ្ឋានថាករណីគ្រោះថ្នាក់នេះគឺបណ្តាលមកពីការបើកបរខ្វះការប្រុងប្រយត្ន័ ជែងក្នុងស្ថានភាពគ្រោះថ្នាក់។

សមត្ថកិច្ចក៏បានធ្វើការឃាត់ខ្លួន អ្នកបេីកបររថយន្ត ឈ្មោះ ហេង វាសនា ភេទប្រុស អាយុ ២៧ឆ្នាំ រស់នៅផ្ទះ ថៅកែឈ្មោះ កុយ ស្ថិតក្នុង ភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវបានកំលាំងសមត្ថកិច្ចនគរបាលក្រុងប៉ោយប៉ែត ឃាត់ខ្លួននាំមកអធិការដ្ឋាននគរបាលក្រុងប៉ោយប៉ែតដើម្បីសាកសួរ៕ ដោយ ៖ ន.វ.