​ភ្នំពេញ ៖ នៅយប់ថ្ងៃទី១៦ ខែឧសភានេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសអំពីដំណឹងសន្តិសុខជាតិបន្ទាន់មួយពាក់ព័ន្ធក្រុមហ៊ុនឈ្មោះ GCG Asia Co., LTD បានយករូបថត និងឈ្មោះសម្តេច ទៅបង្ហោះនូវលើ Website របស់ខ្លួន ដោយបានអះអាងសម្តេចនឹងចូលរួមសម្ពោធក្រុមហ៊ុននេះ នៅថ្ងៃទី២០ ខែឧសភា ឆ្នាំ២០១៩ខាងមុខនេះ។

លើសពីនេះ ក្រុមហ៊ុនបានយកឈ្មោះ ធនាគារជាតិកម្ពុជា និងធនាគារចិនថាជាដៃគូទទួលខុសត្រូវក្នុងជំនួញជួញដូរ Crypto Currency ប៉ុន្តែក្រុមហ៊ុននេះ ត្រូវបានស្ថានទូតឥណ្ឌូណេស៊ី បញ្ជាក់ថា ជាក្រុមហ៊ុនរកស៊ីមិនត្រូវ និងដាក់ក្នុងបញ្ជីខ្មៅទៅហើយ។

សូមអានខ្លឹមសារដូចខាងក្រោម ៖

សូមចុចចូលអានក្នុងប្រអប់នេះ   «ដំណឹងសន្តិសុខជាតិបន្ទាន់ »

​ខេត្តព្រះសីហនុ ៖ ម្ចាស់កាស៊ីណូជនជាតិចិននៅខេត្តព្រះសីហនុ ជាច្រើនកន្លែងហាក់ដូចជាមានសិទ្ធិអំណាចធំណាស់ យកចិញ្ចើមផ្លូវសាធារណៈធ្វើកន្លែងចតរថយន្តពាសវាលពាសកាលធ្វើរំភើយ ប្រហែលជាអាជ្ញាធរខេត្តព្រះសីហនុ មិនទាន់បានឃើញរូបភាពទាំងអស់នេះទេមើលទៅ បានជាពួកគាត់ធ្វើព្រងើយកន្តើយបែបនេះ។

បងប្អូនប្រជាពលរដ្ឋ និងអ្នកលេងតាមបណ្ដាញសង្គមហ្វេសប៊ុក ជាច្រើន បាន share រូបភាពនេះ ចែករំលែកបន្តគ្នា ដើម្បីឲ្យឃើញដល់អាជ្ញាធរនៅខេត្តព្រះសីហនុ តែកន្លងទៅនេះ គ្មានឃើញអ្វីប្រែប្រួលទេ ហើយទង្វើបបែបនេះ មិនមែនតែកាស៊ីណូតែមួយកន្លែងនេះទេ គែមានច្រើនកន្លែង បានយកចិញ្ចើមផ្លូវចូលធ្វើការចតរថយន្តរកស៊ីយកលុយច្រកហោប៉ៅផ្ទាល់ខ្លួន មិនខ្វល់ពីករណីធ្វើឲ្យប៉ះពាល់សណ្ដាប់ធ្នាប់សាធារណៈនោះឡើយ។

ប្រជាពលរដ្ឋរិះគន់យ៉ាងចាស់ដៃទៅលើអាជ្ញាធរពាក់ព័ន្ធ ដែលបណ្តែតបណ្តោយឲ្យកើតមាននូវករណីបែបនេះ។

គួរជម្រាបថា កន្លងមក ខេត្តទេសចរណ៍​ដ៏ល្បីល្បាញ ព្រះសីហនុ ចេះតែមកើតមានបទល្មើសជាបន្តបន្ទាប់ដែលភាគច្រើនបង្កឡើងដោយជនជាតិចិន ធ្វើឲ្យទេសចរមានការខ្លាចរអារ៕

ភ្នំពេញ ៖ ប្រជាពលរដ្ឋជាង១០នាក់ នៅព្រឹកថ្ងៃទី១៦ ខែឧសភា នេះ បានប្រមូលផ្តុំតវ៉ាជាថ្មី និងនាំគ្នាដុតកង់ឡានប្រឆាំងនឹង គ្រឿងចក្រដែលការពារដោយអាជ្ញាធរ និងកងកម្លាំងប្រដាប់អាវុធ ចុះទៅឈូសឆាយលើកជាទំនប់ព័ទ្ធផ្ទៃបឹងសំរោង ទៅតាមអនុក្រិត្យរបស់រាជរដ្ឋាភិបាល។  ប្រជាពលរដ្ឋ បានចោទអាជ្ញាធរខណ្ឌព្រែកព្នៅ ថា ការកាយដីធ្វើជាទំនប់នោះ រំលោភយករបស់ពួកគាត់ដែលធ្លាប់អាស្រ័យផលយូរមកហើយនោះ ប្រគល់ទៅឲ្យក្រុមហ៊ុនឯកជន។

ហេតុការណ៍ នេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៨ព្រឹកថ្ងៃទី១៦ ខែឧសភា ឆ្នាំ ២០១៩ នៅចំណុច ភូមិ សំរោងខាងត្បូង ស្ថិតនៅក្នុងសង្កាត់ សំរោង ខណ្ឌព្រែកព្នៅ។

តាមប្រជាពលរដ្ឋ ដែលផ្ទុះការតវ៉ា បានអោយដឹងថា ប្រជាពលរដ្ឋ ចំនួន ៧គ្រួសារ បានកាន់កាប់និងអាស្រ័យ ផល លើដីនោះ តាំងពីឆ្នាំ ១៩៩០ មកម្លេះ បែជាអាជ្ញាធរ ចុះទៅឈួសឆាយលើ ដីរបស់ គាត់ ដោយះអះអាង លើកជាទំនប់ ដើម្បីការពារផ្ទៃ បឹងសំរោង ដោយពុំទាន់មានដំណោះស្រាយឡើយ ។

ប្រជាពលរដ្ឋ បានបន្តទៀត ថា បើសិនស្តារបឹង ដូចអាជ្ញាធរជូនដំណឹងនោះ គាត់មិន ទំនាស់នោះទេ តែ ការព័ទ្ធ ឈូសឆាយ តែដីរបស់ពួកគាត់ទន់ខ្សោយ ។ចំណែកដីក្រុមហ៊ុន ធំៗ និងអ្នកមានអំណាច ដែលរងប៉ះពាល់ផ្ទៃដឹងដែរ អាជ្ញាធរ មិនហ៊ានទៅកាយនោះទេ ។

អាជ្ញាធរ ខណ្ឌព្រែកព្នៅ ដឹកនាំដោយលោក ស៊ឹម សុផង់ នាយករដ្ឋបាលខណ្ឌព្រែកព្នៅ បានប្រើគ្រឿងចក្រ ចុះទៅលើកទំនប់ធ្វើជាព្រំព័ទ្ធផ្ទៃបឹង អះអាងថា ធ្វើតាមអនុក្រិត្យ និងដើម្បីស្តារបឹងតាមការណែនាំ របស់សាលារាជធានីភ្នំពេញ។នៅក្នុងការប្រើគ្រឿងចក្រឈូសឆាយប្រជាពលរដ្ឋដែលបានអាស្រ័យផល និងបានកាន់កាប់ដីមួយចំនួន ដែលរងផលប៉ះពាល់ពីការស្តារបឹង ផ្ទុះការតវ៉ាជាបន្តបន្ទាប់ប្រឆាំងគ្រឿងចក្រ របស់អាជ្ញាធរ ។

សូមរំលឹកថា កាលពីវេលាថ្ងៃត្រង់ថ្ងៃទី១៥ខែឧសភា ឆ្នាំ ២០១៩ ម្សិលមិញ ប្រជាពលរដ្ឋ បានផ្ទុះការតវ៉ា ម្តងមកហើយ ប្រឆាំងគ្រឿង ចក្រ ហើយ ត្រូវបានអាជ្ញាធរ ឃាត់ខ្លួនក្រុមអ្នកតវ៉ាម្នាក់ បញ្ជូនទៅកាន់សាលាខណ្ឌព្រែកព្នៅ តែត្រូវបានដោះលែងវិញ បន្ទាប់ពីប្រជាពលរដ្ឋលើកគ្នា ទៅសាលាខណ្ឌទាមទារអោយដោះលែង។

គួរបញ្ជាក់ថា ផ្ទៃបឹងសំរោង ដែលបានកំណត់ដោយអនុក្រិត្យ ទុកជាសម្បត្តិសាធារណៈរបស់រដ្ឋ មានទំហំ ៣៣៦ហិកតា ។ការស្តារបឹងរបស់អាជ្ញាធរ ត្រូវបានប្រជាពលរដ្ឋចោទប្រកាន់ថា ដើម្បី យកដីនោះទៅអោយក្រុមហ៊ុនឯកជនមួយ ដែលកំពុងតែទិញយកបណ្តើរៗហើយ៕

ភ្នំពេញ ៖ ​លោក ស ខេង រដ្ឋមន្ដ្រីក្រសួងមហាផ្ទៃ នៅព្រឹកថ្ងៃទី១៦ ខែឧសភា ឆ្នាំ២០១៩នេះ បានផ្ដល់អនុសាសន៍ចំនួន៥ចំណុចសំខាន់ៗដល់ថ្នាក់ដឹកនាំ និងកងកម្លាំងនគរបាលទូទាំងប្រទេស ដើម្បីបន្ដអនុវត្តក្នុងន័យបង្កើត និងពង្រឹងប្រសិទ្ធភាពការងារ ស្របតាមគោលនយោបាយរបស់រាជរដ្ឋាភិបាល។

ថ្លែងក្នុងឱកាសអញ្ជើញជាអធិបតីភាព ក្នុងពិធីអបអរសាទរខួបអនុស្សាវរីយ៍ នៃកំណើតនគរបាលជាតិកម្ពុជា លើកទី៧៤ (១៦ ឧសភា ១៩៥៤-១៦ ឧសភា ២០១៩) លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានផ្ដល់នូវអនុសាសន៍ចំនួន៥ចំណុច សំខាន់ៗដល់ថ្នាក់ដឹកនាំ និងកងកម្លាំងនគរបាលជាតិ ដែលក្នុងនោះ ត្រូវពង្រឹងកងកម្លាំងនគរបាលជាតិ ដោយត្រូវធ្វើការប្តេជ្ញាចិត្តរួមគ្នា បន្តធ្វើការកែទម្រង់នគរបាលជាតិ អំពីក្របខ័ណ្ឌ ឋានន្តរស័ក្តិ តួនាទី មុខងារ និងការទទួលខុសត្រូវ នៅតាមស្ថាប័ន-អង្គភាពនគរបាលគ្រប់ថ្នាក់ ដើម្បីលើកកម្ពស់គុណភាព ប្រសិទ្ធភាពការងារ សំដៅឆ្លើយតបចំពោះការវិវត្តរីកចម្រើន របស់សង្គម និងស្ថានភាពប្រែប្រួលស្មុគស្មាញ នៃសភាពការណ៍សន្តិសុខ ក្នុងតំបន់ និងពិភពលោក។

បន្ថែមពីនេះ ជាក្រិត្យក្រម ក្នុងកម្លាំងអនុវត្តច្បាប់ ត្រូវមានលក្ខណៈសម្បត្តិ និង នីតិសម្បទាគ្រប់គ្រាន់ ក្នុងការបម្រើប្រជាពលរដ្ឋ ប្រកបដោយស្មារតី អង់អាចក្លាហាននិងមានសមត្ថភាពពេញលេញ ទាំងសមត្ថភាពផ្នែកច្បាប់ ជំនាញបច្ចេកទេស ព្រមទាំងមានមនសិការ វិជ្ជាជីវៈ បម្រើសេវាជូនប្រជាពលរដ្ឋប្រកបដោយភក្តីភាព។ លើមូលដ្ឋាននេះ ការកសាងអភិវឌ្ឍធនធានមនុស្ស និង ស្ថាប័ន គឺជាគោលដៅអាទិភាព ដែលគ្រប់អង្គភាពពាក់ព័ន្ធទាំងអស់ ត្រូវយកចិត្តទុកដាក់ តាមរយៈការរៀបចំវគ្គបណ្តុះបណ្តាលមុខជំនាញ ឯកទេស និងច្បាប់ រយៈពេលវែង-ខ្លី និងការបំប៉ននៅហ្នឹងកន្លែង ជាពិសេសបង្កើនការអប់រំ ពង្រឹងសីលធម៌ វិន័យកងកម្លាំងជាប្រចាំដើម្បីកសាងធនធានមន្ត្រីអនុវត្តច្បាប់ ឲ្យមានសមត្ថភាព មានសីលធម៌ គុណធម៌ និងមនសិការ វិជ្ជាជីវៈពិតប្រាកដ ស័ក្តិសមនឹងកិត្តិយសរបស់កងកម្លាំងនគរបាលជាតិ។

លោក ស ខេង ក៏បានជំរុញឱ្យគ្រប់អគ្គនាយកដ្ឋាន នាយកដ្ឋាន-អង្គភាពជំនាញ និងគ្រប់ស្នងការដ្ឋាននគរបាលរាជធានី-ខេត្ត នៅទូទាំងប្រទេស ត្រូវបន្តយកចិត្តទុកដាក់ខ្ពស់ ក្នុងការគ្រប់គ្រង ដឹកនាំអង្គភាព និងកងកម្លាំងក្រោមឱវាទ ដោយត្រូវពង្រឹងការអនុវត្តតួនាទី ភារកិច្ច ដែលបានចែងក្នុងច្បាប់ លិខិតបទដ្ឋាន ពាក់ព័ន្ធស្ថាប័ន អង្គភាពនីមួយៗ ដើរទន្ទឹមនឹងការខិតខំរក្សាឲ្យបាននូវសាមគ្គីភាពផ្ទៃក្នុង ផ្តល់ភាពកក់ក្តៅដល់កម្លាំងក្រោមឱវាទ ដោយត្រូវស្វែងយល់អំពីសុខទុក្ខ ការលំបាកបញ្ហាប្រឈម និងសំណូមពរនានា របស់ថ្នាក់ក្រោមជាតិ ព្រមទាំងត្រូវអនុវត្តឲ្យបានខ្ជាប់ខ្លួន នូវគោលនយោបាយសរសើរ ជូនរង្វាន់លើកទឹកចិត្ត និងអនុវត្តវិន័យតឹងរឹង ប្រកបដោយតម្លាភាព និងយុត្តិធម៌។

មួយវិញទៀត ត្រូវបន្តលើកទឹកចិត្ត និងបំផុសចលនាផ្សាភ្ជាប់ រវាងសមរភូមិក្រោយ ជាមួយសមរភូមិមុខតាមរយៈការបន្តពង្រឹងសម្ព័ន្ធមេត្រីភាព រវាងអង្គភាពនានា ជាមួយអង្គភានគរបាលជាប់ផុស មានការចូលរួមគាំទ្រពីប្រជាពលរដ្ឋ អង្គការសង្គមស៊ីវិល វិស័យឯកជន ដើម្បីរួមគ្នាធ្វើសកម្មភាពចុះសួរសុខទុក ស្វែងយល់អំពើពលិកម្ម និងបញ្ហាប្រឈមនានារបស់កងកម្លាំងនគរបាល ដើម្បីចូលរួមលើកទឹកចិត្តទាំងស្មារតី និងឧបត្ថម្ភគាំទ្រនូវមធ្យោបាយ សម្ភារ គ្រឿងឧបភោគ បរិភោគនានា ដល់កងកម្លាំងនគរបាល ដែលកំពុងឈរជើងនៅតាមព្រំដែន។ ទន្ទឹមនេះត្រូវបន្តយកចិត្តទុកដាក់ថែបំប៉នកម្លាំងការពារព្រំដែន ឲ្យបានល្អប្រសើរ ទាំងជីវភាពប្រចាំថ្ងៃ ទាំងជម្រក បន្ទាយ លេណដ្ឋាន មធ្យោបាយ ឧបករណ៍ សម្ភារៈ អាវុធ គ្រាប់រំសេវ សំដៅពង្រឹងកងកម្លាំងនគរបាល ការពារព្រំដែនឲ្យក្លាយជាកម្លាំងដ៏រឹងមាំ មានសមត្ថភាពពេញលេញ ការពារបូរណភាពទឹកដី។

តាមរយៈវេទិកានេះ លោកបានជំរុញលើកទឹកចិត្តដល់គណៈបញ្ជាការឯកភាព រដ្ឋបាលរាជធានី-ខេត្ត ក៏ដូចជាក្រសួង ស្ថាប័ន និងអាជ្ញាធរ មានសមត្ថកិច្ច ពាក់ព័ន្ធទាំងអស់ ត្រូវលើកកម្ពស់ស្មារតីសហការ ដឹកនាំគាំទ្រដល់គ្រប់សកម្មភាព របស់កងកម្លាំងនគរបាលជាតិ ដើម្បីរួមគ្នាថែរក្សាឲ្យបាននូវសុខសន្តិភាព ស្ថិរភាព សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក៏ដូចជាការពារឲ្យបាននូវសមិទ្ធផលសង្គមជាតិ ដែលយើងបានកសាងឡើងដោយលំបាកលំបិន សំដៅចូលរួមកសាងអភិវឌ្ឍសង្គមកម្ពុជា ឆ្ពោះទៅដល់គោលដៅអភិវឌ្ឍប្រកបដោយជោគជ័យ៕

ភ្នំពេញ ៖ មន្ទីរសង្គមកិច្ច អតីតយុទ្ធជននិងនីតិសម្បទារាជធានីភ្នំពេញ កំពុងគ្រប់គ្រងធ្វើរបបគោលនយោបាយដល់អតីតយុទ្ធជនកម្ពុជារាជធានីភ្នំពេញ គិតត្រឹមខែឧសភា ឆ្នាំ២០១៩ មានចំនួនសរុប៩៣១៨នាក់។

នេះយោងតាមការលើកឡើងរបស់អ្នកស្រី មុំ ចាន់ដានី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ក្នុងពិធីអបអរសាទរ ប្រារព្ធខួបលើកទី១២ ទិវាអតីតយុទ្ធជនកម្ពុជា២១ មិថុនា ដែលប្រារព្ធធ្វើឡើង ក្រោមវត្តមាន លោកជំទាវ កែវ សុខពិសី តំណាងឯកឧត្តម ឃួង ស្រេង អភិបាលរាជធានីភ្នំពេញកាលពីព្រឹកថ្ងៃទី១៦ ឧសភានេះ។

លោកស្រី មុំ ចាន់ដានី បានបញ្ជាក់ថាក្នុងចំណោមអតីតយុទ្ធជនទាំងនោះ រួមមាន៖ ជនពិការចំនួន១២៦១នាក់ គ្រួសារពលី១២១២នាក់ គ្រួសារមរណៈ ៥៨២នាក់ និវត្តជន៣៦៨៤នាក់ ជនបាត់បង់ពលកម្ម៦៧នាក់ បន្ទុក៩៩១៨នាក់ និង កូន២៤១៤នាក់។

លោកជំទាវ កែវ សុខពិសី អភិបាលរងរាជធានីភ្នំពេញ ក្នុងឱកាសនោះ បានមានប្រសាសន៍លើកឡើងថា ការប្រារឰពិធីខួបលើកទី ១២ ទិវាអតីតកម្ពុជា២១ មិថុនានេះ ដើម្បីបង្ហាញពីការយកចិត្តទុកដាក់ និង រំឭកគុណូបការៈគុណ ចំពោះបងប្អូនអតីតយុទ្ធជនទាំងអស់ ដែលបានលះបង់សាច់ស្រស់ឈាមស្រស់ ដើម្បីបុព្វហេតុជាតិមាតុភូមិ រហូតធ្វើឲ្យប្រទេសជាតិយើងមាន ការអភិវឌ្ឍរីកចម្រើនរហូតមកដល់ពេលបច្ចុប្បន្ន។

លោកជំទាវបន្តថា ក្រោយឆ្នាំ១៩៧៩ បងប្អូនអតីតយុទ្ធជនទាំងអស់ មានអាយុត្រឹមតែ១៥ទៅ២០ឆ្នាំប៉ុណ្ណោះ តែមកដល់ពេលនេះបានចូលនិវត្តន៍ទៅហើយ ខណៈដែលការណោះ បងប្អូននិវត្តន៍ជនទាំងអស់ សុទ្ធតែធ្វើការបំពេញការងារជូនជាតិ ដោយមិនមានប្រាក់ខែផងនោះ។

លោកជំទាវបន្តទៀតថា ក្រោមនយោបាយឈ្នះឈ្នះ របស់សម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឱ្យព្រះរាជាណាចក្រកម្ពុជាទាំងមូលមានសុខសន្តិភាពពេញបរិបូរណ៍ ធ្វើឲ្យកម្ពុជាមានឱកាសអភិវឌ្ឍន៍ប្រទេស មានការ រីកចម្រើនរហូតមកដល់បច្ចុប្បន្ននេះ ដោយមើល ឃើញពីគុណតំលៃ មិនអាចកាត់ថ្លៃបានពីសំណាក់អតីតយុទ្ធជន ទើបសម្ដេចបានបង្កើតឲ្យមានជាទិវារំលឹកអតីតយុទ្ធជននេះឡើងនៅថ្ងៃទី១២មិថុនាជារៀងរាល់ឆ្នាំ ។ មិនតែប៉ុណ្ណោះសម្ដេចតេជោនៅបានផ្ដល់ជាដីសម្បទាន ជាផ្ទះសំបែង ថវិកា និងការបណ្ដុះបណ្ដាលវិជ្ជាជីវៈជូនបងប្អូននិវត្តន៍ជន ថែមទៀតផង៕ 

ខេត្តព្រះសីហនុ ÷ មួយរយៈពេលចុងក្រោយនេះ ការបោះចោលសំរាម បានកំពុងក្លាយទៅជាប្រធានបទមួយយ៉ាងក្ដៅគគុកមួយ នៅក្នុងសង្គម ក៏ដូចជានៅក្នុងបណ្ដាញសង្គម អុីនធើណេត ដែលគ្រប់គ្នាបានលើកយកមកជជែកវែកញែក ដើម្បីស្វែងរកដំណោះស្រាយ ដែលត្រូវឲ្យប្រជាពលរដ្ឋមួយចំនួន កែប្រែទម្លាប់ដ៏អាក្រក់ក្នុងការបោះចោលសំរាមគ្មានសណ្ដាប់ធ្នាប់នេះ។

ដោយឡែកនាព្រឹក ថ្ងៃទី១៦ ខែឧសភា ឆ្នាំ២០១៩នេះ ខេត្ដព្រះសីហនុ វិញ ដែលគ្រាន់តែមេឃភ្លៀងមួយមេសោះ បែរជាសំរាមកើតឡើងយ៉ាងច្រើន មិនចាញ់ប្រឡាយលូបឹងត្របែកនោះឡើយ ដែលស្ថិតនៅចំនុចត្រង់គល់ស្ពានអូរសំអាត ផ្លូវឯករាជ្យ បណ្ដាលធ្វើឲ្យមានការកកស្ទុះប្រឡាយលូជាខ្លាំង។

យ៉ាងណាមិញ ចំពោះការបោះចោលសំរាមចូលទៅក្នុងអូរសំអាតនេះ រហូតត្រូវបានភ្លៀងមួយមេ បាននាំយកសំរាមទាំងអស់មករុញច្រាញមកគល់ស្ពានអូរសំអាតនេះ ពេលនេះគិតត្រូវម៉ោង ១០ និង៤០នាទីនេះ មិនត្រូវបានខេត្ត ក្រុង និងមន្ទីរជំនាញ បានសហការជាមួយក្រុមហ៊ុនដឹកសំរាម និងក្រុមហ៊ុនម៉ៅការដឹកកាកសំណល់ការដ្ឋាន ចុះយកគ្រឿងចក្រមកកាយសំរាមចេញពីអូរសំអាតនេះ ស្អាតវិញនោះទេ។

ទាក់ទិន និង បញ្ហាកាកសំណល់កកស្ទុះក្នុងប្រព័ន្ធលូរំដោះទឹកភ្លៀង នេះដែរ ភ្ញៀវទេសចរជាតិរិះគន់ថា់ ថា ឆ្នេរ សមុទ្រ ឬ បរិស្ថាន អនាម័យ ខេត្ត ព្រះសីហនុ ដែល ត្រូវ រាជរដ្ឋាភិបាល ប្រសិទ្ធ នាម ថា ជា «តារា រះ នា ទិសនិរតី» គួរ ត្រូវ ថែរក្សា អនាម័យ បរិស្ថាន តាម ផ្លូវ សាធារណៈ ឆ្នេរ សមុទ្រ និង ទីប្រជុំជន ក្នុង ក្រុង ទាំង មូល ឲ្យ មាន អនាម័យ ជា ប្រចាំ ដោយ មិន គួរ ឲ្យ មាន បរិស្ថាន គគ្រិច គ្មាន អនាម័យ និង មាន ក្លិន ស្អុយ ដូច ទីវាល ចាក់ សំរាម នោះ ទេ។

សាធារណជន សំណូមពរ ដល់ រដ្ឋបាល ក្រុង ខេត្ត ព្រះសីហនុ ពិសេស ប្រតិបត្តិករ ទេសចរណ៍ និង ប្រជាពលរដ្ឋ រស់ នៅ ខេត្ត ព្រះសីហនុ ត្រូវ ចូល រួម ការងារ ថែរក្សា អនាម័យ បរិស្ថាន ឲ្យ បាន ស្អាត ជាង រាល់ ថ្ងៃ ដើម្បី ឲ្យ សក្ដិសម កិត្តិយស ជា ឆ្នេរ ស្រស់ ស្អាត លំដាប់ ថ្នាក់ ពិភពលោក។

ចំណែក ប្រតិបត្តិករ ទេសចរណ៍ និង ប្រជាពលរដ្ឋ ខេត្ត ព្រះសីហនុ ស្នើ ឲ្យ រដ្ឋបាល ខេត្ត ព្រះសីហនុ ត្រូវ ស្ថាបនា ប្រព័ន្ធ លូ បង្ហូរ ទឹក ឲ្យ បាន ត្រឹមត្រូវ ដើម្បី រំដោះ ទឹក ស្អុយ ដស្អុយដែលជនលិចផ្លូវនៅប្របមាត់សមុទ្រ។

អភិបាល ខេត្ត ព្រះសីហនុ ឯកឧត្តម យន្ត មីន ធ្លាប់មាន ប្រសាសន៍ ថា កន្លង មក ថ្នាក់ដឹកនាំ នៅ តាម មន្ទីរ ស្ថាប័នរដ្ឋ ទាំង ស្ថាប័ន ស៊ីវិល និង កម្លាំង ប្រដាប់ អាវុធ ក្រោម ឱវាទ រដ្ឋបាល ខេត្ត ព្រះសីហនុ បាន បង្កើត កម្មវិធី ចុះ ដើរ រើស សំរាម ឬ សំអាត អនាម័យ បរិស្ថាន ទាំង ក្នុង ទីប្រជុំជន តាម តំបន់ ឆ្នេរ សមុទ្រ ជាដើម ជា រៀងរាល់ ខែ ដើម្បី បំផុស ឲ្យ ប្រតិបត្តិ ករ ទេសចរណ៍ និង ប្រជាពលរដ្ឋ មូលដ្ឋាន នេះ ចូលរួម ការងារ ថែរក្សា សំអាត អនាម័យ បរិស្ថាន ឆ្នេរ ឲ្យ បាន ទាំង អស់ គ្នា។

ឯកឧត្តម យន្ត មីន ទទួល ស្គាល់ ថា ការងារ សំអាត អនាម័យ បរិស្ថាន ឆ្នេរ នៅ មូលដ្ឋាន នេះ ទាំង ប្រតិបត្តិករ ទេសចរណ៍ និង ប្រជាពលរដ្ឋ មូលដ្ឋាន ភាគ ច្រើន មិន ទាន់ បាន ចូលរួម ថែរក្សា អនាម័យ បរិស្ថាន ឆ្នេរ និង តាម ទី សាធារណៈ ជាមួយ អាជ្ញាធរ ឲ្យ បាន ច្រើន ទេ ដោយ គិត តែ ពី ប្រយោជន៍ ផ្ទាល់ ខ្លួន៕

បន្ទាយមានជ័យ ៖ អាជ្ញាធរថៃ បានធ្វើការឃាត់ព្រះសង្ឃខ្មែរ៣អង្គ
ដោយចោទប្រកាន់ពីបទឆ្លងដែនចូលក្នុងប្រទេសថៃខុសច្បាប់ ហើយបញ្ជូនមកវិញប្រគល់ឱ្យអាជ្ញាធរកម្ពុជា តាមមាត់ច្រកទ្វារអន្តរជាតិជាំ កាលពីវេលាម៉ោ ៦ល្ងាចថ្ងៃទី១៥ ខែឧសភា ឆ្នាំ២០១៩ ស្ថិតនៅក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។

ព្រះសង្ឃខ្មែរដែលអាជ្ញាធរថៃចោទពីបទឆ្លងដែនខុសច្បាប់ ទី១ព្រះនាម ទត វឿន ព្រះជន្ម ៣៨ វស្សារស់ភូមិម្សាគ្រង ឃុំម្សាគ្រង ស្រុកស្ទោង ខេត្តកំពង់ធំ ទី២ព្រះនាម ប៉ក់ ភេន ព្រះជន្ម ៣០វស្សា និងទី៣ ព្រះនាម សេង សុវណ្ណ រិទ្ធី ព្រះជន្ម ១៩វស្សា ដោយព្រះសង្ឃទាំង ៣អង្គនេះ រស់នៅភូមិឃុំជាមួយគ្នា។

តាមអោយដឹងពីសមត្ថកិច្ចប្រចាំច្រកអន្តរជាតិជាំបានឱ្យដឹងថា ព្រះសង្ឃខ្មែរ ដែលអាជ្ញាធរថៃបញ្ជូនយកមកប្រគល់ឱ្យទាំង ៣អង្គខាងលើ ដែលសមត្ថកិច្ចបានធ្វើការសាកសួរ គឺពុំមានវត្តសម្រាប់គង់នៅនោះឡើយ ហើយឆៃយ៉ាល័ក្ខអត្តសញ្ញាណព្រះសង្ឃ ក៏មិនមានដែរ ដូច្នេះហើយ សមត្ថកិច្ច និងអាជ្ញាធរកម្ពុជាបានសម្រេចធ្វើការផ្សិក រួចឱ្យវិលត្រឡប់ទៅលំនៅឋានវិញនៅក្នុងថ្ងៃដដែល៕

ភ្នំពេញ ៖ ក្នុងឱកាស ដឹកនាំគណៈប្រតិភូជាន់ខ្ពស់ មកបំពេញទស្សនកិច្ចផ្លូវការ នៅព្រះរាជាណាចក្រកម្ពុជា តាមការអញ្ជើញរបស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្រ្តី នៃព្រះរាជាណាចក្រកម្ពុជា នៅព្រឹកថ្ងៃទី១៥ ខែ ឧសភានេះ ឯកឧត្តម ខាត់ហ្កា ប្រាសាទ សាម៉ា អូលី នាយករដ្ឋមន្រ្តី នៃ សាធារណរដ្ឋសហព័ន្ធ ប្រជាធិបតេយ្យនេប៉ាល់ និង លោកជំទាវ បានអញ្ជើញទៅ ទស្សនាវិមានឈ្នះ-ឈ្នះ ដើម្បីបានស្វែងយល់បន្ថែមទៀត នូវដំណែលប្រវត្តិសាស្រ្ត ពីជោគជ័យ នៃកិច្ចប្រឹងប្រែង នាំមកនូវសន្តិភាពពេញលេញ ការផ្សះផ្សា និងការបង្រួបបង្រួមជាតិរបស់កម្ពុជា។

មានប្រសាសន៍ប្រាប់អ្នកសារព័ត៌មាន នៅវិមានឈ្នះឈ្នះ ឯកឧត្តម នាយឧត្តមសេនីយ៍ ណឹម សុវត្ថិ អគ្គនាយក នយោបាយ កិច្ចការបរទេស និង ជាទីប្រឹក្សាពិសេស សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានឱ្យដឹងថា ឯកឧត្តម ខាត់ហ្កា ប្រាសាទ សាម៉ា អូលី នាយករដ្ឋមន្រ្តីនៃប្រទេសនេប៉ាល់ បានអញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា ពីថ្ងៃទី១៣ដល់១៥ខែឧសភា ឆ្នាំ២០១៩ អមដំណើរដោយ លោកជំទាវ រ៉ាឌីកា សាក់យ៉ា ឯកឧត្តម ប្រាឌីប គូម៉ា ហ្គាវ៉ាលី រដ្ឋមន្រ្តីការបរទេស ទីប្រឹក្សានាយករដ្ឋមន្ត្រី សមាជិកសភា មន្ត្រីជាន់ខ្ពស់រដ្ឋាភិបាល ព្រមទាំងគណៈប្រតិភូធុរកិច្ច។

ឯកឧត្តម ណឹម សុវត្ថិ បញ្ជាក់ថា ការអញ្ជើញមកទស្សនាវិមានឈ្នះឈ្នះ នាពេលនេះ ដើម្បីបានដឹងកាន់តែច្បាស់ថែមទៀត នូវគោលនយោបាយឈ្នះឈ្នះ របស់សម្តេចតេជោ ដែលបានធ្វើឱ្យបញ្ចប់សង្រ្គាមនៅកម្ពុជា ហើយទទួលបាននូវសន្តិភាពដ៏ពេញលេញដូចសព្វថ្ងៃនេះ។

ឯកឧត្តមបញ្ជាក់ទៀតថា ក្រោយពីសំណង់ប្រវត្តិសាស្រ្ត ឬ សំណង់រយឆ្នាំដ៏អស្ចារ្យមួយនេះ កើតឡើងទើបតែបានជាង៥ខែតែប៉ុណ្ណោះ មានប្រជាជន ភ្ញៀវទេសចរជាតិ អន្តរជាតិ អ្នកស្រាវជ្រាវប្រវត្តិសាស្រ្ត ថ្នាក់ដឹកនាំកំពូលៗ នៃបណ្តារប្រទេសនៅក្នុងតំបន់ និងពិភពលោក បានមកទស្សនាជាហូរហែរ។ សម្រាប់ថ្ងៃនេះ ជាលើកដំបូង ដែលវិមានឈ្នះឈ្នះរបស់កម្ពុជា បានទទួលការអញ្ជើញមកទស្សនា ថ្នាក់នាយករដ្ឋមន្រ្តី ខណៈពេលកន្លងមកនេះ ទទួលថ្នាក់រដ្ឋមន្រ្តី ឧបនាយករដ្ឋមន្រ្តី និងថ្នាក់ដឹកនាំសំខាន់ៗជាង២០ប្រទេស បានមកស្វែងយល់ ពីអត្ថន័យ និងតឹកតាងជាក់ស្តែង នៃវិមានឈ្នះឈ្នះរបស់កម្ពុជា៕

ភ្នំពេញ ៖ មន្រ្តីសមត្ថកិច្ច បានអះអាងថា មេខ្លោងក្រុមជនជាតិចិន ដែលបង្ហោះវីដេអូ គំរាមដល់សន្តិសុខខេត្តព្រះសីហនុ ត្រូវបានចាប់ខ្លួនហើយ នៅក្នុងប្រទេសចិន ។

តាមប្រភពព័ត៌មាន បានឲ្យដឹងថា អាជ្ញាធរចិន ពិតជាបានចាប់ខ្លួនមេខ្លោងនោះរួមហើយ ៗ ថែមទាំងបានទទួលចម្លើយសារភាពទៀតផង។

ប្រភពដដែលបន្តថា បើតាមការសាកសួរ ពួកក្រុមជនជាតិដែលអ្នកខ្លះ មានចាក់សាក់លើខ្លួនផងនោះ បានឲ្យដឹងថា ការដែលថតនេះ ក្នុងន័យលេងសើចប៉ុណ្ណោះ មិនមានបំណង ឬជាចេតនាអាក្រក់មកលើប្រទេសកម្ពុជានោះទេ ប៉ុន្តែមិនដឹងថា យ៉ាងម៉េចបានជាវីដេអូនេះ ត្រូវបានគេបង្ហោះ និងចែករំលែកតៗគ្នាបែបនេះទៅវិញ។ “ពួកគេអះអាងថា ពួកគេទទួលខុសត្រូវចំពោះមុខច្បាប់”។

ប្រតិបត្តិការបង្រ្កាបនេះ បានធ្វើឡើងក្រោយពីស្ថានទូតចិន ប្រចាំកម្ពុជា និងអាជ្ញាធរកម្ពុជា ប្រកាសបង្រ្កាបឲ្យខាងតែបាន ចំពោះការព្រមានដែលគំរាមកំហែងដល់សន្តិសុខ នៅខេត្តព្រះសីហនុ។

សូមបញ្ជាក់​ថា ជនជាតិ​ចិន​មួយក្រុម ដែល​បាន​បង្ហោះ​វីដេអូ ស្រែក​គំរាមថា ពួកគេ​មក​ពី​ខេត្ត​ឆុង​ឆី​ង ចង់​បង្ក​អសន្ដិសុខ នៅ​ខេត្ត​ព្រះសីហនុ ។ មួយ​ឡើង​ការ​គំរាម​របស់​ជនជាតិ​ចិន តាមរយៈ​វីដេអូ​នេះ កម្លាំង​នគរបាល​ខេត្ត​ព្រះសីហនុ សហការ​ជាមួយ នាយកដ្ឋាន​ជំនាញ​ដែល​ពាក់ព័ន្ធ កំពុង​បើក​ប្រតិបត្តិការ ដើម្បី​តាម​ស្វែងរក​ចាប់ខ្លួន​ពួកគេ​ទាំងនោះ យក​មក​ផ្តន្ទាទោស​តាមច្បាប់ ព្រោះ​ថា​កម្ពុជា មិន​អាចឲ្យ​មាន​ជនណា ឬ​ក្រុម​ណាមួយ មក​គំរាមកំហែងលើ​ដី​របស់​ខ្លួន​ឡើយ​ ៕​

ភ្នំពេញ ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានយាងចាកចេញពីរាជធានីភ្នំពេញ នៅវេលាម៉ោង ៩ព្រឹកថ្ងៃទី១៣ ខែឧសភា ឆ្នាំ២០១៩ នេះ ឆ្ពោះទៅកាន់រដ្ឋធានីប៉េកាំង ប្រទេសចិន ដើម្បីចូលរួមវេទិកាអរិយធម៌អាស៊ីលើកទី១ ដែលរៀបចំដោយប្រទេសចិន។ ព្រះរាជដំណើររបស់ព្រះអង្គនាពេលនេះ តបតាមការយាងរបស់ប្រធានាធិបតីចិន លោក ស៊ី ជីនពីង។ ក្នុងអំឡុងនៃព្រះរាជអវត្តមានរបស់ព្រះមហាក្សត្រ រាល់ព្រះរាជកិច្ចរបស់ព្រះអង្គ នឹងត្រូវរ៉ាប់រងដោយប្រមុខរដ្ឋស្តីទី សម្តេចវិបុលសេនាភក្តី សាយ ឈុំ ប្រធានព្រឹទ្ធសភា។

គួររំលឹកដែរថា កិច្ចសន្ទនាស្តីពីអរិយធម៌អាស៊ី ត្រូវបានស្នើឡើងដោយលោកប្រធានាធិបតី ស៊ី ជីនពីង នៅក្នុងសន្និសីទប្រចាំឆ្នាំប៉ូអាវ ខេត្តហៃណាន ប្រទេសចិន កាលពីខែមីនា ឆ្នាំ២០១៥។ កិច្ចសន្ទនាអរិយធម៌អាស៊ីនេះ ក្នុងបំណងពង្រឹងការផ្លាស់ប្តូររវាងយុវជនវ័យក្មេង សង្គមស៊ីវិល តំបន់ និងប្រព័ន្ធផ្សព្វផ្សាយនានាហើយបង្កើតបណ្តាញនៃការផ្លាស់ប្តូរការគិតនិងកិច្ចសហប្រតិបត្តិការ។

កិច្ចប្រជុំសន្ទនាអរិយធម៌អាស៊ីនេះ នឹងផ្តោតលើប្រធានបទនៃការផ្លាស់ប្តូរអរិយធម៌អាស៊ី ការយល់ដឹងពីគ្នាទៅវិញទៅមក និងសហគមន៍រួមវាសនា។ គោលបំណងសំខាន់ គឺឆ្ពោះទៅមុខដើម្បីទទួលបាននូវសមិទ្ធផលដ៏អស្ចារ្យនៃអរិយធម៌នៅអាស៊ីនិងពិភពលោក បង្កើតជាវេទិកាសម្រាប់ការរៀនសូត្រពីគ្នាទៅវិញទៅមកនិងការអភិវឌ្ឍទៅវិញទៅមក បង្កើនទំនុកចិត្តលើវប្បធម៌អាស៊ី លើកកម្ពស់កិច្ចសហប្រតិបត្តិការនៅក្នុងតំបន់អាស៊ីនិងការជឿទុកចិត្តគ្នាទៅវិញទៅ មក រួមកម្លាំងគ្នាដោយមានការយោគយល់គ្នា ក្នុងការអភិវឌ្ឍតំបន់អាស៊ី ជំរុញឱ្យមានភាពរឹងមាំនៃការបង្កើតថ្មីនៅអាស៊ី ផ្ដល់ការគាំទ្រខាងស្មារតីដល់សហគមន៍រួមវាសនានៅអាស៊ីនិងសហគមន៍រួមវាសនារបស់មនុស្សជាតិ។

សូមជម្រាបថា អញ្ជើញថ្វាយព្រះរាជដំណើររបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា មានវត្តមានសម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចពញាចក្រី ហេង សំរិន ប្រធានរដ្ឋសភា សម្តេចតេជោ ហ៊ុន សែន នាយករដ្ឋ មន្រ្តីនៃកម្ពុជា សម្តេចក្រឡាហោម ស ខេង សម្តេចវិជ័យសេនា ទៀ បាញ់ និងមន្រ្តីជាន់ខ្ពស់ព្រឹទ្ធសភា រដ្ឋសភា និងរាជរដ្ឋាភិបាល ព្រមទាំងមន្ត្រីព្រះបរមរាជវាំង ព្រះញាតិវង្សផងដែរ៕